Home » کھیل » ورلڈکپ کے بعد انضمام اور آرتھر کو ہٹانے کی خبریں بے بنیاد قرار
Pakistan Cricket Board (PCB) chief selector Inzamam-ul-Haq speaks with the team during a team practice in Lahore on April 15, 2018. Pakistan included five uncapped players in the 16-man squad announced April 15 for their Tests against Ireland and England starting next month, with an eye on the World Cup next year. / AFP PHOTO / ARIF ALI

ورلڈکپ کے بعد انضمام اور آرتھر کو ہٹانے کی خبریں بے بنیاد قرار

پاکستان کرکٹ بورڈ (پی سی بی) نے چیف سلیکٹر انضمام الحق اور کوچ مکی آرتھر کو ان کے عہدوں سے ہٹانے کی خبروں کی تردید کرتے ہوئے انہیں بے بنیاد قرار دے دیا۔

پی سی بی کی جانب سے جاری ہونے والی پریس ریلیز میں کہا گیا کہ بورڈ ان تمام خبروں کی تردید کرتا ہے جن میں کہا گیا ہے کہ ورلڈکپ کے بعد چیف سلیکٹر انضمام الحق اور ہیڈ کوچ مکی آرتھر کو فارغ کردیا جائے گا۔

بیان میں یہ بھی کہا گیا کہ پی سی بی نے تمام اسٹیک ہولڈرز کو پہلے ہی باور کروادیا تھا کہ چیف سلیکٹر، کوچ اور معاون اسٹاف کے مستقبل کا فیصلہ آئی سی سی کرکٹ ورلڈکپ 2019 کے بعد کیا جائے گا، تاہم اس مؤقف میں کوئی تبدیلی نہیں کی گئی۔

پی سی بی نے بھارتی نیوز ایجنسی پریس ٹرسٹ آف انڈیا (پی ٹی آئی) کی خبر کو جھوٹ کا پلندہ قرار دیتے ہوئے کہا کہ مقامی میڈیا نے بھی حقائق جانے بغیر یہ خبر شائع کردی۔

پی سی بی کا کہنا تھا کہ اس وقت پاکستان میں کرکٹ کے مداح ورلڈکپ کے لیے قومی ٹیم کے ساتھ ہیں لیکن ایسے میں اس طرح کی خبریں آنا پاکستان ٹیم کی ایونٹ میں مہم کو متاثر کرنے کی ایک کوشش ہے۔

پاکستان کرکٹ بورڈ نے کھلاڑیوں، چیف سلیکٹر اور ہیڈ کوچ مکی آرتھر سمیت ٹیم کے تمام معاون اسٹاف پر مکمل اعتماد کا اظہار بھی کیا۔

پی سی بی کی جانب سے کہا گیا کہ انتظامیہ کی جانب سے اہم عہدوں میں تبدیلی کے حوالے سے کوئی فیصلہ نہیں کیا گیا۔

خیال رہے کہ مقامی میڈیا میں بھارتی خبر رساں ایجنسی پی ٹی آئی کا حوالہ دیتے ہوئے کہا گیا تھا کہ پی سی بی نے کرکٹ ورلڈکپ 2019 کے اختتام کے بعد چیف سلیکٹر انضمام الحق اور ہیڈ کوچ مکی آرتھر کے معاہدوں کی تجدید نہ کرنے کا فیصلہ کیا ہے۔

رپورٹ کے مطابق امکان ظاہر کیا جارہا ہے کہ سابق کپتان عامر سہیل انضمام الحق کی جگہ پاکستان کے چیف سلیکٹر کا عہدہ سنبھال سکتے ہیں۔

پی سی بی ذرائع نے بھارتی نیوز ایجنسی پی ٹی آئی کو بتایا کہ عامر سہیل چیف سلیکٹر کے عہدے کے مضبوط امیدوار ہیں، تاہم پی سی بی کے منیجنگ ڈائریکٹر وسیم خان چیف سلیکٹر اور ہیڈ کوچ کی تقرری کا فیصلہ کریں گے۔

واضح رہے کہ عامر سہیل کرکٹ سے ریٹائرمنٹ کے بعد 2002 سے 2004 تک بطور چیف سلیکٹر کام کر چکے ہیں۔

About Admin

Google Analytics Alternative