Home » 2017 » January » 02

Daily Archives: January 2, 2017

کراچی پولیس کا اسٹریٹ کرائم کیخلاف آپریشن کا اعلان

وزیراعلیٰ سندھ کی جانب سے آئی جی کو حکم ملا، کراچی پولیس چیف نے ایکشن میں آنے کی تیاری کر لی، کراچی پولیس نے اسٹریٹ کرائم کے خلاف نئے آپریشن کا اعلان کر دیا۔

کراچی پولیس چیف مشتاق مہر کا کہنا ہے کہ رینجرز کے ساتھ مل کر اسٹریٹ کرائم کے خلاف بڑی کارروائیاں کریں گے، اسٹریٹ کرائم میں ملوث ملزمان کا کسی نہ کسی طرح تعلق ڈرگ مافیا سے ہوتا ہے۔

انہوں نے کہا کہ کرسٹل اور ہیروئن پینے والے افراد اسٹریٹ کرائم میں ملوث ہیں،کراچی سے بڑا جرم ختم ہو گیا، اب اسٹریٹ کرمنلز سے نمٹنے پر فوکس ہے۔

مشتاق مہر کا کہنا تھا کہ موبائل فون کا سراغ لگانا بڑا مسئلہ بن گیا ہے،ملزمان موبائل فون کا آئی ایم ای آئی نمبر کرپٹ کر دیتے ہیں،موبائل فون کمپنیوں سے خصوصی سافٹ ویئر کے لیے بات کر رہے ہیں۔

وزیراعلیٰ سندھ کی آئی جی سے فرمائشیں

وزیراعلیٰ سندھ مراد علی شاہ نے چھٹیوں سے لوٹ کر ڈیوٹی پر واپس آنے والے آئی جی سندھ اے ڈی خواجہ کے سامنے فرمائشوں کے ڈھیر لگادیے ۔

آئی جی سندھ اے ڈی خواجہ چہ مگوئیوں کے جتنے شور کے ساتھ چھٹی پر گئے تھے ، پندرہ دن گزرنے پر اتنی ہی خاموشی سے دوبارہ چارج سنبھال لیا۔

وزیر اعلیٰ سندھ نے آئی جی سے کہا کہ اسٹریٹ کرائم سے پاک کراچی چاہیے، ان کارروائیوں کی روزانہ رپورٹ، ڈرگ مافیا کے خلاف آپریشن رینجرز سے اشتراک کے ساتھ چاہیے۔
مشیر اطلاعات سندھ کہتے ہیں کہ انہیں تو یہ معاملہ خوش خوش ہی لگ رہا ہے ،مگر وزیراعلیٰ سندھ کی جانب سے معاملہ اتنا خوش خوش نظر نہیں آرہا ہے ،جنہوں نے چھٹیوں سے واپسی پر ایک ساتھ کئی ٹاسک سونپ دیئے ہیں ۔

چند روز پہلے آئی جی سندھ سے متعلق سوال پر وزیر اعلیٰ سندھ مراد علی شاہ نے کہا تھا کہ کسی بھی افسر کو بدلنا صوبائی حکومت کی صوابدید ہے۔

عامر خان کی فلم ’’دنگل‘‘ نے ’’سلطان‘‘ کو مات دے دی

ممبئی: بالی ووڈ کے مسٹرپرفیکشنسٹ عامر خان کی فلم’’دنگل‘‘ نے سلمان خان کی فلم’’سلطان‘‘ کو باکس آفس کمائی میں پیچھے چھوڑ دیا۔

بالی ووڈ اسٹار عامر خان کی فلم ’’دنگل‘‘نے باکس آفس پر دھوم مچا رکھی ہے اورنے ایک کے بعد ایک کمائی کے ریکارڈ اپنے نام کررہی ہے جب کہ فلم نے  بھارت میں ریلیز کے 10 دنوں میں ہی کمائی میں سلمان خان کی فلم ’’سلطان‘‘ کو مات دے دی ہے اور 250 کروڑ سے زائد کمائی کرکے تیز ترین کمائی کرنے والی فلم بن گئی ہے۔

طاہر شاہ کا ’’ہیومینٹی لَو‘‘سوشل میڈیا پرچھاگیا

آئی ٹو آئی اور اینجل سے شہرت حاصل کرنے والے طاہر شاہ کا نیا شاہکار ریلیز کر دیا گیا ہے جس نے دھوم مچادی، سوشل میڈیا پر ویڈیودیکھنے والوں کی تعدادہزاروں سے تجاوز کر گئی ہے۔

نئے سال کے پیغام کے طور پر جاری کی جانے والی اپنی نئی ویڈیو کو طاہر شاہ نے ہیومینٹی لَو(انسانیت محبت) نامی اس ویڈیو میں ایک سفید بلی کو گود میں لیا ہوا ہے جبکہ موسیقی کے ساتھ ساتھ شاعری سناتے دکھائی دے رہے ہیں جو طاہر شاہ کی اپنی تحریر کردہ ہے۔

دو منٹ 18 سیکنڈ کی اس ویڈیو میں منفرد گلوکار طاہر شاہ سنہری کرسی پر سنہری لباس پہنے بیٹھے ہیں جبکہ سونے کی بڑی بڑی انگوٹھیاں بھی ان کی انگلیوں میں موجود ہیں۔ ویڈیو کے بیک گراؤنڈ میں درخت کے پتے بھی سنہری رنگ کے ہیں۔

سوشل میڈیا پرجاری کی جانیوالی اس ویڈیو کو 24گھنٹوں میں ہزاروں افراد نے دیکھا ، جن میں کچھ نے اپنی نا پسندیدگی کا اظہارکیا تو کچھ نے اس شاہکارکو پسند کرتے ہوئے طاہر شا ہ کی حوصلہ افزائی بھی کی۔

معروف ڈپارٹمنٹل اسٹورز پر سالانہ بلین ڈالرز کی چوری کا انکشاف

ہالی ڈو ستاروں کی سب سے ہائی پروفائل چوری اداکارہ ونونا رائڈر نے کی، جو بیورلی ہلز کے لگژری اسٹور ساکس ففتھ ایونیو سے پانچ ہزار ڈالرز مالیت کی اشیاء چوری کرتے ہوئے پکڑی گئیں، جس کے عوض انہیں نہ صرف جرمانہ ادا کرنا پڑا بلکہ نفسیاتی مشاورت کے لیے بھی بھیج دیا گیا۔

وینس میں اٹلی کے نا مور اسٹور سے اداکارہ لِندسے لوہان ڈھائی ہزار ڈالر مالیت کا ہار پہن کر باہر نکلنے لگیں تو سی سی ٹی وی کیمرے کی مدد سے دھر لی گئیں۔

لوہان پر اس کے بعد بھی 11ہزار ڈالر کا کوٹ اور 35ہزار ڈالر کی رولیکس گھڑی چرانے کے الزامات لگے۔

اداکارہ میگن فوکس نے امریکی اسٹور وال مارٹ سے 7ڈالر کی لپ گلوس چرائی،اداکارہ برٹنی اسپیئرز نے ہالی وڈ کے ایک اسٹور سے بالوں کی ایک وگ اور گیس اسٹیشن سے ایک لائٹرچرایا۔

ہیرے کی مدد سے دنیا کا باریک ترین تار تیار

نیویارک: امریکی سائنسدانوں نے ہیروں کو استعمال کرتے ہوئے دنیا کا سب سے باریک برقی تار بنایا ہے جو صرف تین ایٹموں کے برابر چوڑا ہے۔

امریکا کی اسٹینفرڈ یونیورسٹی میں ’’سلیک‘‘ (SLAC) نیشنل ایکسلریٹر لیبارٹری کے ماہرین نے بہت سے عناصر کے ایٹموں کو بچوں کے کھلونوں ’’لیگو‘‘ کے انداز میں جوڑا ہے۔ دنیا کے اس باریک ترین تار کو آپٹو الیکٹرونکس اور برقی کپڑوں جیسے درجنوں کاموں میں استعمال کیا جاسکے گا۔ اسی طرح بجلی کے زیاں کے بغیر سپر کنڈکٹر آلات بنانے کی راہ بھی ہموار ہوسکے گی۔

نیچر مٹیریلز میں شائع ہونے والے ایک مضمون کے مرکزی مصنف اور سائنسداں ہاؤ یان نے بتایا کہ ہم نے دنیا کا باریک ترین تار بنایا ہے جس سے بجلی گزر سکتی ہے۔ اسے بنانا بہت آسان ہے اور نصف گھنٹے میں مختلف عناصر کے ملاپ سے نتائج ظاہر ہوجاتے ہیں۔ اس عمل کو ’’سیلف اسمبلی‘‘ کہا جاتا ہے جس کے تحت ٹھوس قلمی قلب (کور) کے ساتھ ایک نینوتار بنایا گیا ہے جو بہترین برقی خصوصیات بھی رکھتا ہے۔ سوئی سے بھی کروڑوں گنا باریک تار میں سلفر اور تانبے (کاپر) کے ایٹم شامل کئے گئے ہیں اور ہیروں کو بیرونی سطح پر جمع کیا گیا ہے جو انسولیشن کا کام کرتے ہیں۔

اس باریک تاروں کو درست ترین آلات اور دیگر شعبوں میں استعمال کیا جاسکتا ہے۔ اتنی باریکی پر تار حیرت انگیز خواص ظاہر کرتے ہیں جن کا مفید استعمال کیا جاسکتا ہے۔ ان سے الیکٹرون مائیکروسکوپی میں بہتری اور چھوٹے برقی آلات بنانے میں بھی مدد مل سکتی ہے۔

اس سے قبل اسٹینفرڈ یونیورسٹی کی اسی ٹیم نے ایک جہتی (ون ڈائمینشنل) نینو تار بنایا تھا جسے زنک، کیڈمیم، چاندی اور فولاد کے ایٹموں سے تیار کیا گیا تھا۔ ایسے تاروں کو آپٹو الیکٹرونکس میں استعمال کیا جاسکتا ہے اور باریک ترین ایل ای ڈیز بنانے کی راہ ہموار ہوتی ہے۔

مینی کوئن چیلنج کا جنون خلائی اسٹیشن تک پہنچ گیا

ہیوسٹن: زمین پر انسانوں اور جانوروں میں پھیلنے والا مینی کوئن چیلنج اب بین الاقوامی خلائی اسٹیشن تک پہنچ گیا ہے۔

مینی کوئن چیلنج، جس میں انسان یا جانور کچھ دیر کے لیے بالکل ساکت ہوجاتے ہیں اور ان کی فلم بندی کی جاتی ہے لیکن خلاء کے بے وزنی والے ماحول میں معلق رہتے ہوئے خود کو ساکن رہنا کوئی آسان کام نہیں۔

البتہ بین الاقوامی خلائی اسٹیشن پر موجود خلا نوردوں نے منفرد انداز سے مینی کوئن چیلنج کھیل کر ساری دنیا کو حیران کردیا ہے اور اس کی مختصر سی ویڈیو سوشل میڈیا پر تیزی سے وائرل ہورہی ہے۔

اس ویڈیو میں بین الاقوامی خلائی اسٹیشن کا عملہ بالکل ساکت حالت میں معلق دکھایا گیا ہے جب کہ کیمرا ان کی منظر کشی کرتے ہوئے درمیان سے گزرتا ہے۔ بلاشبہ خلا کے زیرو گریویٹی والے ماحول میں ایسے معلق رہتے ہوئے خود کو ساکن رکھنا بے حد مشکل ہے لیکن تربیت یافتہ اور ماہر خلا نوردوں نے یہ بھی کردکھایا۔

اسٹیٹ بینک نے انعامی بانڈز کی قرعہ اندازی کی تاریخوں کا اعلان کردیا

اسلام آباد: اسٹیٹ بینک آف پاکستان نے 2017 کیلیے قومی انعامی بانڈز کی قرعہ اندازی کی تاریخوں کا اعلان کردیا ہے جس کے مطابق 15000 روپے والے قومی انعامی بانڈ کی سال نو کی پہلی قرعہ اندازی جو 2جنوری بروز سوموار کو ہونا تھی، نئے سال کے پہلے کاروباری ہفتے کے پہلے روز بینکوں میں تعطیلات کے باعث 3 جنوری بروز منگل منعقد ہو گی۔ یہ مجموعی طور پر 69ویں قرعہ اندازی ہے۔

مرکز قومی بچت کے ذرائع نے بتایاکہ اس قرعہ اندازی کا پہلا انعام3 کروڑ روپے کا ایک، دوسرا انعام ایک کروڑ روپے کے 3 اور تیسرا انعام ایک لاکھ85 ہزار روپے کے1696 انعامات ہیں۔ انہوں نے بتایاکہ مذکورہ سیریز پر کل 1700انعامات دیے جائیں گے۔ انہوں نے بتایاکہ قرعہ اندازی کے سلسلے میں تقریب اسٹیٹ بینک آف پاکستان راولپنڈی میں منعقد ہو گی جس میں مختلف مکاتب فکر کی اہم شخصیات شرکت کریں گی اور اس موقع پر کمپیوٹرائزڈ قرعہ اندازی کے ذریعے خوش نصیب افراد کا چناؤ کیا جائیگا۔ اسی طرح 750روپے والے قومی انعامی بانڈ کی قرعہ اندازی 16جنوری کو ہوگی، اس پرائز بانڈ کی یہ مجموعی طور پر 69ویں قرعہ اندازی ہے۔

7500 روپے اور 25000روپے والے قومی انعامی بانڈز کی قرعہ اندازی یکم فروری کو ہوگی، یہ 7500روپے والے بانڈ کی مجموعی طور پر 69ویں اور 25000روپے والے بانڈ کی 20ویں قرعہ اندازی ہے۔ 1500روپے اور 100 روپے کے قومی انعامی بانڈز کی قرعہ اندازی 15فروری کو ہوگی، یہ 1500 روپے والے بانڈ کی مجموعی طور پر 69ویں اور 100روپے والے انعامی بانڈ کی 17ویں قرعہ اندازی ہے۔ 40ہزار روپے والے قومی انعامی بانڈ کی قرعہ اندازی یکم مارچ کو ہوگی، یہ مجموعی طور پر 69ویں قرعہ اندازی ہے۔ 200 روپے والے بانڈ کی قرعہ اندازی 15مارچ کو ہوگی، یہ مجموعی طور پر 69ویں قرعہ اندازی ہے۔

15000روپے والے بانڈ کی قرعہ اندازی 3اپریل کو ہوگی، یہ مجموعی طور پر 70ویں قرعہ اندازی ہے۔ 750روپے والے بانڈ کی قرعہ اندازی 17اپریل کو ہوگی، یہ مجموعی طور پر 70ویں قرعہ اندازی ہے۔ 7500اور 25000روپے والے بانڈز کی قرعہ اندازی 2مئی کو ہوگی، یہ 7500روپے والے بانڈ کی مجموعی طور پر 70ویں اور 25000روپے والے بانڈ کی 21ویں قرعہ اندازی ہے۔ 1500روپے اور 100روپے قومی انعامی بانڈ کی قرعہ اندازی 15مئی کو ہوگی، یہ 1500روپے والے بانڈ کی مجموعی طور پر 70ویں اور 100روپے والے انعامی بانڈ کی 18ویں قرعہ اندازی ہے۔ 40ہزار روپے والے قومی انعامی بانڈ کی قرعہ اندازی یکم جون کو ہوگی، یہ مجموعی طور پر 70ویں قرعہ اندازی ہے۔ 200روپے والے بانڈ کی قرعہ اندازی 15جون کو ہوگی، یہ مجموعی طور پر 70ویں قرعہ اندازی ہے۔

15000روپے والے بانڈ کی قرعہ اندازی 3جولائی کو ہوگی، یہ مجموعی طور پر 71ویں قرعہ اندازی ہے۔ 750روپے والے بانڈ کی قرعہ اندازی 17جولائی کو ہوگی، یہ مجموعی طور پر 71ویں قرعہ اندازی ہے۔ 7500اور 25000روپے والے بانڈز کی قرعہ اندازی یکم اگست کو ہوگی، یہ 7500روپے والے بانڈز کی مجموعی طور پر 71ویں اور 25000روپے والے بانڈ کی 22ویں قرعہ اندازی ہے۔ 1500روپے اور 100روپے قومی انعامی بانڈز کی قرعہ اندازی 15اگست کو ہوگی، یہ 1500روپے والے بانڈ کی مجموعی طور پر 71ویں اور 100روپے والے انعامی بانڈ کی 19ویں قرعہ اندازی ہے۔40ہزار روپے والے قومی انعامی بانڈ کی قرعہ اندازی یکم ستمبر کو ہوگی، یہ مجموعی طور پر 71ویں قرعہ اندازی ہے۔ 200روپے والے بانڈ کی قرعہ اندازی 15ستمبر کو ہوگی، یہ مجموعی طور پر 71ویں قرعہ اندازی ہے۔

15000روپے والے بانڈ کی قرعہ اندازی 2 اکتوبر کو ہوگی، یہ مجموعی طور پر 72ویں قرعہ اندازی ہے۔ 750روپے والے بانڈ کی قرعہ اندازی 16اکتوبر کو ہوگی، یہ مجموعی طور پر 72ویں قرعہ اندازی ہے۔ 7500اور 25000روپے والے بانڈز کی قرعہ اندازی یکم نومبر کو ہوگی، یہ 7500روپے والے بانڈکی مجموعی طور پر 72ویں اور 25000روپے والے بانڈ کی 23ویں قرعہ اندازی ہے۔ 1500روپے اور 100روپے قومی انعامی بانڈز کی قرعہ اندازی 15نومبر کو ہوگی، یہ 1500روپے والے بانڈ کی مجموعی طور پر 72ویں اور 100روپے والے انعامی بانڈ کی 20 ویں قرعہ اندازی ہے۔ 40ہزار روپے والے قومی انعامی بانڈز کی قرعہ اندازی یکم دسمبر کو ہوگی، یہ مجموعی طور پر 72ویں قرعہ اندازی ہے جبکہ 2017 کی آخری قرعہ اندازی 200روپے والے قومی انعامی بانڈ کی ہوگی جو 15دسمبر 2017 کو لاہور میں کی جائیگی۔

Google Analytics Alternative