Home » 2017 » January » 06

Daily Archives: January 6, 2017

لودھراں حادثہ، ایک ہی گھر کے6 بچے، رکشہ ڈرائیور سپردِ خاک

لودھراں میں چنگ چگی رکشہ کے ٹرین سے حادثے میں جاں بحق ہونے والے ایک ہی خاندان کے 6 بچوں کی نماز جنازہ کی ادائیگی کے بعد مقامی قبرستان میں آہوں اور سسکیوں کے درمیان سپرد خاک کردیا گیا۔

ایک ہی خاندان کے جاں بحق 6 بچوں میں 2 بہن بھائی فہد اور مریم بھی شامل تھے، جاں بحق افراد کی نماز جنازہ لودھراں کی بستی ممبر والا میں ادا کی گئی، جس میں اہل علاقہ نے شرکت کی، اس موقع پر رقت آمیز مناظر دیکھنے میں آئے،بچوں اوررکشہ ڈرائیورکی تدفین کردی گئی ہے۔

آج صبح لودھراں میں ٹرین نے معصوم بچوں کےخواب کچل دیئے، موٹر سائیکل رکشہ کھلے پھاٹک سے گزر رہا تھا کہ ہزارہ ایکسپریس کی زد میں آ گیا، حادثے میں اسکول جانے والے 7طالب علم اور رکشہ ڈرائیور سمیت 8افراد لقمہ اجل بن گئے۔

لودھراں کے علاقے جلال پور میں موٹرسائیکل رکشہ میں 11 طالب علم اوررکشہ ڈرائیورسوار تھے، رکشہ ڈرائیورنے پھاٹک کھلا پایا تو ریلوے لائن پارکرنے کی کوشش کی، لیکن یہ زندگی اورموت کی لکیر تھی،چند سیکنڈوں میں رکشہ ہزارہ ایکسپریس کی زدمیں آگیا، خوفناک تصادم میں ٹرین رکشہ کو کھنچتے ہوئے دورتک لے گئی۔

حادثے کی تحقیقات کے لیے انکوائری کمیٹی تشکیل دے دی گئی ہے، جس میں ریلوے حکام اور ڈسٹرکٹ سول انتظامیہ کے افسران شامل ہیں، حادثے کے بعد ٹریک کھول دیا گیا ہے۔

پاکستان اسٹاک: 100انڈیکس، 49 ہزار کی حد عبور کرگیا

پاکستان اسٹاک ایکسچینج نے نئےسال کا نیا ریکارڈ بنایا ہے، پاکستان اسٹاک ایکسچینج کا 100 انڈیکس کاروبار کے اختتام پر پہلی مرتبہ 49 ہزار سے اوپر بند ہوا۔

سرمایہ کاروں کو اگرچہ پاناما کیس کی تشویش رہی لیکن انہیں کارپوریٹ سیکٹر پر اعتماد بھی ہے، اس لئے پاناما کیس کی سماعت نو جنوری تک مؤخر کئے جانےپر خریداری بھی خوب کی۔

کاروبار کا اختتام ہوا تو 100 انڈیکس 324 پوائنٹس اضافے سے تاریخ کی بلند ترین سطح 49 ہزار 38 پر بند ہوا، کاروبار کے دوران 20 ارب روپے مالیت کے 43 کروڑ شیئرز کے سودے ہوئے۔

کاروبار کے اختتام پر مارکیٹ کیپٹلائزیشن 9795 ارب روپے سے تجاوز کر گئی۔

پاکستان میں سالانہ 5500 ارب کی خریداری، 800 ارب کی کرپشن کا انکشاف

اسلام آباد: سینیٹ کی قائمہ کمیٹی خزانہ کے اجلاس میں ملک کے اندر خریداریوں میں سالانہ 800ارب روپے کی کرپشن کا انکشاف ہوا ہے، ایم ڈی پیپرا کا کہنا تھا کہ سالانہ5 ہزار 5000 ارب روپے کی خریداری ہوتی ہے جس میں 800 ارب روپے کرپشن کی نذر ہو جاتے ہیں، سی پیک کے بعد سالانہ خریداری میں مزید اضافہ ہوگا۔

جمعرات کو کمیٹی کا اجلاس سینیٹر سلیم مانڈوی والا کی زیر صدارت پارلیمنٹ ہاؤس میں ہوا۔ اجلاس کو بریفنگ دیتے ہوئے ایم ڈی پبلک پروکیورمنٹ ریگولیٹری اتھارٹی خضر حیات نے بتایا خریداریوں میں کرپشن کو چیک کرنا ان کا کام نہیں، جب تک کرپشن کی نشاندہی نہ ہو نوٹس نہیں لیا جا سکتا جس پر چیئرمین کمیٹی نے کہا اس کا مطلب یہ ہوا کہ جو مرضی کرتا رہا کچھ نہیں ہو گا۔ کمیٹی نے آئندہ اجلاس میں حبیب بینک حکام سے مکمل تفصیلات طلب کر لیں۔

قومی اسمبلی کی قائمہ کمیٹی برائے خزانہ کی ذیلی کمیٹی نے دھوکا دہی اور غیرقانونی سرگرمیوں میں ملوث کمپنیوں کے بیرون ملک اثاثوں کی تفصیلات سہ ماہی بنیاد پر ایف بی آراورنیب کیساتھ شیئرکرنے کی تجویز دی ہے۔قومی اسمبلی کی قائمہ کمیٹی سمندر پار پاکستانیز نے کہا ہے کہ بیرون ملک جانیوالے پاکستانیوں کوپرموٹرز کی لوٹ مار سے بچایا جائے۔سینیٹ کی قائمہ کمیٹی برائے موسمیاتی تبدیلی نے غیرملکی شخصیات کو تلور کے کھلے عام شکار کی اجازت دینے پر برہمی کا اظہار کیا ہے۔

کراچی: منی مارکیٹ سسٹم میں سرمائے کی قلت

منی مارکیٹ سسٹم میں سرمائے کی قلت اسٹیٹ بینک نے 952 ارب روپے فراہم کردیئے۔

مرکزی بینک نے سرمایہ سات روزکے لئے فراہم کیا ہے۔ سرمائے کی فراہمی اوپن مارکیٹ آپریشن میں ٹریژری بلز اور پاکستان انوسٹمنٹ بانڈز خرید کر کی گئی۔

خریدے گئے بلز اور بانڈز پر شرح منافع 5 اعشاریہ 83 فیصد ادا کیاجائے گا۔

ایاز صادق اور حمزہ سمیت 93277 افراد ٹیکس آڈٹ کیلیے منتخب

اسلام آباد: فیڈرل بورڈ آف ریونیو (ایف بی آر) نے قرعہ اندازی میں اسپیکر قومی اسمبلی ایاز صادق ، وفاقی وزیر قانون زاہد حامد، حمزہ شہباز سمیت 3 درجن سے زائد سیاستدانوں، بیورو کریٹس، وکلا اور صحافیوں سمیت دیگر ٹیکس دہندگان کو آڈٹ کیلیے منتخب کر لیا ہے۔
ذرائع کے مطابق گزشتہ روز ایف بی آر ہیڈ کوارٹرز میں وفاقی وزیر خزانہ اسحٰق ڈار کی زیر صدارت پیرا میٹرز کی بنیاد پر ہونے والی قرعہ اندازی میں 93 ہزار277 ٹیکس دہندگان کو آڈٹ کیلیے منتخب کیا گیا، ایکسپریس کو دستیاب اعداد و شمار کے مطابق قرعہ اندازی میں ٹیکس ایئر 2015 کے آڈٹ کیلیے منتخب ہونے والوں میں سابق وفاقی وزیر اویس لغاری اور تحریک انصاف کے رہنما جہانگیر ترین کی اہلیہ آمنہ خان ترین اور دیگر اہم شخصیات کے نام بھی شامل ہیں۔
ایف بی آر حکام کا کہنا ہے کہ آڈٹ میں منتخب ہونے والے تمام لوگوں کو اگلے چند روز میں باضابطہ طور پر آڈٹ کے نوٹس جاری کرنا شروع کردییے جائیں گے، اے پی پی کے مطابق منی لانڈرنگ اور دہشت گردی کیلیے مالی وسائل کی فراہمی کی روک تھام کے نظام کا جائزہ لینے کیلیے اجلاس وزیر خزانہ سینیٹر اسحٰق ڈار کی زیر صدارت ہوا۔

کراچی: تیموریہ تھانے پر دستی بم حملے کا مقدمہ درج

کراچی کے علاقے نارتھ ناظم آباد میں واقع تیموریہ تھانے پر دستی بم حملے کا مقدمہ درج کرلیا گیا، پولیس کے مطابق مقدمہ پولیس اہلکارکی مدعیت میں نامعلوم افراد کے خلاف درج کیا گیا۔

پولیس کا کہنا ہے کہ مقدمہ تھانہ سی ٹی ڈی گارڈن میں درج کیا گیا، جس میں انسداد دہشت گردی کی دفعات لگائی گئی ہیں۔

واضح رہے کہ تیموریہ تھانے پر آج صبح دستی بم سے حملہ کیا گیا تھاجبکہ ملزمان کی فائیواسٹار چورنگی پر فائرنگ سے2پولیس اہلکار بھی زخمی ہوئے تھے۔

پاکستانی اداکارہ صبا قمر کی پہلی بھارتی فلم کا پوسٹرجاری

ممبئی: بالی ووڈ اداکار عرفان خان نے پاکستانی اداکارہ صبا قمر کے ساتھ فلم ’’ہندی میڈیم‘‘ کاپوسٹر جاری کردیا جس میں دونوں کو سائیکل رکشہ میں سوار دیکھا جاسکتا ہے۔

پاکستانی اداکارہ صبا قمر بالی ووڈ ادکارعرفان خان کے ہمراہ فلم ’’ہندی میڈیم‘‘ سے بھارتی فلم نگری میں کیرئیر کا آغاز کریں گی اورعرفان خان نے فلم’’ہندی میڈیم‘‘ کا پوسٹر جاری کردیا ہے جس میں صبا قمر ان کے ساتھ سائیکل رکشہ پر سوار ہیں اور شرماتے ہوئے نظر آرہی ہیں۔

دوسری جانب ہندو انتہاپسندوں کی دھمکیوں اور پروڈیوسرایسوسی ایشن کی جانب سے پاکستانی فنکاروں کے کام کرنے پر پابندی کے بعد صبا قمر کی فلم کی کاسٹ سے علیحدہ ہونے کی خبریں زیر گردش تھیں  لیکن اب فلم کا پوسٹر جاری ہونے کے بعد ایسی تمام خبریں بھی دم توڑ گئی ہیں۔

صبا قمر اور عرفان خان کی فلم رومانوی اور کامیڈی پر مبنی ہے جس میں دونوں اداکار میاں بیوی کے کردار میں نظر آئیں گے جس کی ہدایتکاری کے فرائض ساکیت چوہدری نے سر انجام دیئے ہیں۔

حکومت نے ایسے منصوبے شروع کیے جن کا محورغریب ترافراد ہیں، وزیراعظم

اسلام آباد: وزیر اعظم نواز شریف نے کہا ہے کہ صحت کا شعبہ حکومت کی اولین ترجیحات میں شامل ہے اوراسی لیے ہم نے ایسے منصوبے شروع کئے جن کا محور غریب تر افراد ہیں۔
اسلام آباد میں شاہ حماد نرسنگ یونیورسٹی کے سنگ بنیاد رکھنے کی تقریب سے خطاب کرتے ہوئے وزیراعظم نوازشریف کاکہنا تھا کہ شاہ حماد نرسنگ یونیورسٹی بحرین کی جانب سے پاکستانی عوام کے لئے بہترین تحفہ ہے یہ یونیورسٹی 2 برادر ممالک کے بہترین تعلقات کی عکاس ہے اور ہمیں بحرین کی دوستی پر فخر ہے۔
وزیراعظم کا کہنا تھا کہ صحت کےشعبے کے لئےتقویت کا باعث ہوگی جس میں معیاری تربیت فراہم کی جائے گی۔ ان کاکہنا تھاکہ ہم نے نرسنگ کے شعبے کے لئے اہم ریفارمز متعارف کرادی ہیں پروگرام کےتحت نادارطبقوں کوصحت کی مفت سہولیات فراہم کی جارہی ہیں۔

Google Analytics Alternative