Home » 2018 » November » 05

Daily Archives: November 5, 2018

امریکی نائب وزیر خارجہ ایلس ویلز کل پاکستان پہنچیں گی

اسلام آباد: امریکی نائب وزیر خارجہ ایلس ویلز کل ایک روزہ دورے پر پاکستان پہنچیں گی۔

ذرائع کے مطابق امریکی نائب وزیر خارجہ ایلس ویلز کل پاکستان کے ایک روزہ دورے پر اسلام آباد پہنچیں گی جہاں وہ وزیر خزانہ اسد عمر اور دیگر رہنماؤں سے اہم ملاقاتیں کریں گی، ملاقاتوں میں ایلس ویلز امریکا کی پالیسی برائے جنوبی ایشیا پر تبادلہ خیال کریں گی۔

ذرائع کا کہنا ہے کہ امریکی نائب وزیر خارجہ ایلس ویلز کی اپنے دورے کے دوران وزیراعظم عمران خان سے بھی ملاقات متوقع ہے۔

سندھ میں غنڈہ راج ہے جس کا خاتمہ ضروری ہے، فواد چوہدری

کراچی: وزیر اطلاعات فواد چوہدری کا کہنا ہے کہ سندھ میں غنڈہ راج ہے جس کا خاتمہ ضروری ہے، غریبوں کے اکاؤنٹس میں پیسے آصف زرداری نے ڈالے ہیں چاہے زرداری ہوں یا نواز شریف کسی کے کرپشن کے مقدمات واپس نہیں لیں گے۔

کراچی میں سیمینار سے خطاب کرتے ہوئے وفاقی وزیرِ اطلاعات فواد چوہدری کا کہنا تھا کہ ماضی میں کراچی کو بند کیا جاتا تھا اس دفعہ لاہور بند ہوگیا جب کہ وزیر خزانہ کو نشانہ بنایا گیا کہ وہ آئی ایم ایف کے سامنے جھک گئے ہیں تاہم اسٹیٹ بینک کو باہر سے ملنے والی رقم سے سپورٹ ملی ہے۔ انہوں نے کہا کہ ہمارا سوشل میڈیا پر کنٹرول بالکل بھی نہیں اور ٹی ایل پی کی جانب سے سوشل میڈیا کا بہت استعمال کیا گیا۔

فواد چوہدری نے کہا کہ انفارمیشن منسٹری ہمارے لیے ایک چیلنج ہے، ہر بات کہنے سے پہلے سوچنا پڑتا ہے کیوں کہ پرانی ویڈیو سامنے آجاتی ہی، پہلے وزراء بیانات دے کر مکر جاتے تھے، زمانہ بدل گیا ہے اور اب ویڈیوز سامنے آجاتی ہیں،وزراء کو اب محتاط رہنا چاہیے۔

وزیر اطلاعات کا کہنا تھا کہ آسیہ بی بی کیس پر خادم رضوی کا اکاؤنٹ سرگرم تھا، سوشل میڈیا سے متعدد نیوز آتی ہیں اور انہیں روکنا مشکل ہوتا ہے تاہم ہم پہلی بار سوشل میڈیا کو ریگولیٹ کرنے جارہے ہیں۔

بعد ازاں میڈیا سے بات کرتے ہوئے فواد چوہدری کا کہنا تھا کہ سندھ میں غنڈہ راج ہے جس کا خاتمہ ضروری ہے، پی ٹی آئی نے سندھ میں لسانی سیاست کے خاتمے کی بنیاد رکھ دی اور اگلے الیکشن میں سندھ میں پی ٹی آئی کی دو تہائی اکثریت ہوگی، پی پی پی کی فرسودہ سیاست ہے جس کی امین آصف زرداری کی پارٹی ہے۔ ان کا کہنا تھا کہ آصف زرداری نے غریبوں کے اکاؤنٹس میں پیسے ڈالے ہیں، ان غریبوں کو چاہیے کہ ان پیسوں سے مکر جائیں، چاہے آصف زرداری ہوں یا نواز شریف کسی کے کرپشن کے مقدمات واپس نہیں لیں گے۔

فواد چوہدری نے کہا کہ دھرنا شرپسندوں کو ریاست بھولے گی نہیں، یہ مذہب نہیں سیدھا سادا بغاوت کا معاملہ ہے اور بغاوت کو نظر انداز نہیں کیا جاسکتا، کسی کو غلط فہمی نہیں ہونی چاہیے کہ ریاست اس رویے کو معاف کرے گی۔ انہوں نے کہا کہ تحریک لبیک کے ساتھ معاہدے سے حکومت کی کمزوری کا تاثر دیا جارہا ہے، اس تاثر کو دور کرنے کے لیے اقدامات کریں گے۔

وزیر اطلاعات کا کہنا تھا کہ احتجاج میں فوج، عدلیہ اور حکومت کو نشانہ بنایا گیا، ریاست اسے نظرانداز نہیں کرے گی۔ ان کا کہنا تھا کہ دھرنے اور احتجاج ختم کرنے کے لیے ریاستی طاقت استعمال کرتے تو نقصان کا اندیشہ تھا، پھر تنقید ہوتی کہ طاقت کا استعمال کیوں کیا، ہم نے آگ بجھانے کو ترجیح دی اور بغیر نقصان کے شہروں کو کھولا، لیکن یہ مسئلے کا حل نہیں۔

چترال میں برفانی تودے تلے دب کر 4 افراد جاں بحق

چترال میں برفانی تودہ تلے دب کر 4 افراد جاں بحق ہو گئے۔

گزشتہ روز چترال کے علاقے شاہی نور میں برفانی تودہ آبادی پر جاگرا جس کے نتیجے میں 4 افراد تودے تلے دب گئے تھے جنہیں نکالنے کیلئے مقامی افراد نے اپنی مدد آپ کے تحت امدادی کارروائیاں کیں۔

اسسٹنٹ کمشنر چترال کا کہنا ہے کہ برفانی تودے تلے 4 افراد دبے تھے، جن کی لاشیں نکالنے کیلئے امدادی کارروائیاں کیں اور تمام افراد کی لاشیں نکال لی گئیں ہیں۔

دوسری جانب پولیس کے مطابق کل شام پیش آنے والے واقعے میں علاقہ دور دراز ہونے کے باعث امدادی کارروائیوں ميں تاخیر ہوئی۔

چین پاکستان کو معاشی بحران سے نمٹنے کیلیے مدد فراہم کرے گا، مشترکہ اعلامیہ

بیجنگ: وزیراعظم کے دورہ چین پر مشترکہ اعلامیہ جاری کردیا گیا جس میں کہا گیا کہ چین پاکستان کو معاشی بحران سے نمٹنے کے لیے مدد فراہم کرے گا جب کہ دونوں ممالک نے ڈالر کے بجائے اپنی کرنسی میں تجارت کرنے کا اعلان کیا ہے۔ 

وزیراعظم عمران خان کے دورہ چین پر پاک چین مذاکرات کا مشترکہ اعلامیہ جاری کردیا گیا، جس میں کہا گیا کہ وزیراعظم کے دورہ چین کےموقع پر دونوں ملکوں میں 15 معاہدوں پر دستخط ہوئے، دونوں ملک 2005 میں مشترکہ طورپردستخط کردہ فرینڈ شپ ٹریٹی کے رہنما اصولوں پر کاربند ہیں، دونوں ملکوں کے درمیان سیاسی تعلقات اوراسٹریٹجک کمیونیکیشن مضبوط بنائی جائےگی۔ وزیراعظم نے چینی قیادت کودورہ پاکستان کی دعوت دی جو قبول کرلی گئی۔

مشترکہ اعلامیہ میں کہا گیا کہ چین پاکستان کی شنگھائی تعاون تنظیم میں شمولیت کا خیرمقدم کرتا ہے، دونوں ممالک عالمی اورعلاقائی معاملات پر مشترکہ تعاون اور رابطوں کو مربوط بنائیں گے، عالمی دہشت گردی سے متعلق جامع کنونشن کا اتفاق رائے سے مسودہ تیارکیا جانا چاہیے، مقاصد کےحصول کے لیے قانون کی حکمرانی اور طویل المدتی جامع رولز بنائے جائیں۔

مشترکہ اعلامیہ کے مطابق پاکستان کے ساتھ تعلقات چین کی خارجہ پالیسی کی اولین ترجیح ہے، عالمی، خطے، مقامی حالات جیسے بھی رہے، دونوں ملکوں کی دوستی مضبوط ہوئی ہے، مستقبل میں پاک چین کمیونٹی کی سطح پرتعلقات کو مستحکم کیا جائےگا، پاکستان اور چین اسٹریٹجک تعاون اور پارٹنرشپ ہمیشہ مضبوط رہے گی، پاکستان میں معاشی ترقی اور روزگار پیدا کرنے کے لیے ورکنگ گروپ تشکیل دیئے جائیں گے۔

وزیراعظم کے دورہ چین سے متعلق جاری مشترکہ اعلامیہ میں کہا گیا کہ پاکستان کی دہشت گردی کے خاتمے اور امن کے لیے کوششیں قابل ستائش ہیں، پاکستان اور بھارت کے درمیان تنازعات کے حل کی پاکستانی کوششوں کو قدر کی نگاہ سے دیکھا جاتا ہے، پاکستان اور افغانستان وزراء خارجہ سطح پر مذاکرات تیز کریں گے، افغانستان کے لیے سہہ ملکی مذاکرات کا دور اسی سال ہو گا۔

مشترکہ اعلامیہ کے مطابق پاکستان اور چین نے دفاعی تعاون میں مزید وسعت دینے کا فیصلہ کیا ، پاکستان اور چین مشترکہ فوجی مشقیں کریں گے جب کہ یو این او امن مشن کے لیے ایک دوسرے سے روابط بڑھائے جائیں گے، یو این او اور ایف اے ٹی ایف کو سیاسی مقاصد کے لیے استعمال نہیں ہونا چاہیے، تمام ممالک جنرل اسمبلی، سیکیورٹی کونسل کی دہشتگردی سے متعلق قراردادوں پرعملدر آمد کے پابند ہیں اور یو این پابندیوں کے معاملات کو سیاسی مقاصد کے لیے استعمال کرنے سے باز رہیں۔

مشترکہ اعلامیہ میں کہا گیا کہ نیو کلیئر سپلائر گروپ میں پاکستان کی شمولیت خوش آئند ہو گی،  پاکستان کی نیوکلیئرسپلائر گروپ کے ساتھ تعاون اورگائیڈ لائنز پرعملدرآمد کی بھرپورحمایت کرتے ہیں جب کہ سی پیک کو درپیش ہر طرح کے خدشات اور خطرات سے بھر پور انداز میں نمٹا جائے گا، چین پاکستان کو معاشی بحران سے نمٹنے کے لیے مدد فراہم کرے گا۔ بعدازاں پاکستان اور چین نے ڈالر کے بجائے اپنی کرنسی میں تجارت کرنے کا بھی اعلان کیا۔

چیف جسٹس ثاقب نثار دل میں تکلیف کے باعث اسپتال میں داخل

راولپنڈی: چیف جسٹس پاکستان میاں ثاقب نثار کو  دل میں تکلیف کے باعث راولپنڈی انسٹیوٹ آف کارڈیالوجی ( آر آئی سی) میں داخل کرلیا گیا۔

چیف جسٹس ثاقب نثار انتہائی سخت سیکیورٹی میں فیملی کے ہمراہ چیک اپ کے لیے راولپنڈی انسٹیوٹ آف کارڈیالوجی پہنچے جہاں آر آئی سی کے سربراہ میجر جنرل (ر) اظہر کیانی نے چیف جسٹس کا چیک اپ کیا۔

ذرائع کے مطابق چیک اپ کے دوران پتا چلا کہ چیف جسٹس ثاقب نثار کے دل کی ایک شریان بند تھی، اسپیشل بیلون استعمال کرکے شریان کی بندش دور کردی گئی تاہم چیف جسٹس کو مزید دیکھ بھال کے لیے اسپتال میں داخل کرلیا گیا ہے۔

سربراہ آر آئی سی جنرل (ر) اظہر کیانی کا کہنا تھا کہ چیف جسٹس ثاقب نثار کی کامیاب اینجیوپلاسٹی کی گئی اور دل کی ایک بند شریان کو کھول دیا گیا، چیف جسٹس کی حالت خطرے سے باہر ہے اور اب وہ اہلخانہ سے گفتگو بھی کررہے ہیں جب کہ چیف جسٹس کو کیتھ لیب سے وی وی آئی پی وارڈ منتقل کردیا گیا ہے۔

حکمرانوں کی کرپشن نے ملک کو تباہ کیا اور ترقی سے روکا، وزیراعظم

بیجنگ: وزیراعظم عمران خان کا کہنا ہے کہ حکمرانوں کی کرپشن نے ملک کو تباہ کیا اور کرپشن کے خاتمے کے بغیر ترقی ممکن نہیں۔

چین کے دارالحکومت بیجنگ میں سینٹرل پارٹی اسکول کی تقریب سے خطاب کرتے ہوئے وزیراعظم عمران خان کا کہنا تھا کہ 1996 میں بدعنوانی کےخلاف اپنی سیاسی جدوجہد کا آغازکیا لیکن ہماری جماعت کوشروع میں اہمیت نہیں دی گئی تاہم آج تحریک انصاف پاکستان کی سب سے بڑی جماعت بن گئی ہے۔

وزیراعظم کا کہنا تھا کہ 60 کی دہائی میں پاکستانی شرح نموسب سے زیادہ تھی، پاکستان شمالی کوریا اورملائیشیا کے لیے بھی ماڈل تھا لیکن حکومتی طبقے کی بدعنوانی اورمنی لانڈرنگ نے ملک کے لیے مسائل پیدا کیے، حکمرانوں کی کرپشن نے ملک کو تباہ کردیا اور بدعنوانی نے پاکستان کی ترقی کوبری طرح متاثرکیا، کرپشن کے خاتمے کے بغیر ترقی ممکن نہیں، ہرسال اربوں ڈالرز ترقی پذیرملکوں سے ترقی یافتہ ممالک کوغیرقانونی طور پرمنتقل ہوجاتے ہیں۔

عمران خان نے کہا کہ پاکستان میں غربت اور کرپشن کا خاتمہ حکومت کی اولین ترجیح ہے، ریاستی اداروں کومضبوط کرنا بھی حکومت کی ترجیح ہے، اداروں کومضبوط کرکے ہی بدعنوانی کا خاتمہ کیا جاسکتا ہے اور اس حوالے سے چین کے تجربات سے فائدہ اٹھانا چاہتے ہیں کیوں کہ چین نے 70 کروڑ لوگوں کوغربت سے نکالا، وائٹ کالرکرائم سےنمٹنا اہم ہے اور اس کے لیے بھی چین کا تعاون درکارہے۔

وزیراعظم کا کہنا تھا کہ چین نے ہرمشکل وقت میں پاکستان کی مدد کی، پاکستان بھی چین کی مدد سے کبھی پیچھے نہیں رہے گا، پاکستانی معیشت دہشت گردی کے خلاف جنگ کی وجہ سے شدید متاثرہوئی، پاکستان کو بیرونی سرمایہ کاری کی ضرورت ہے جس کے لیے چین کے مستقبل کی قیادت سےبات کررہا ہوں جب کہ سی پیک پاکستان کے لیے انتہائی اہم ہے۔

وزیراعظم نے پنجاب میں نئے بلدیاتی نظام کی منظوری دے دی

لاہور: وزیراعظم عمران خان نے پنجاب میں نئے بلدیاتی نظام کی منظوری دے دی۔

وزارت قانون نے نئے بلدیاتی نظام کے قانونی مسودہ کی تیاری پر کام شروع کردیا ہے جسے جلد پنجاب کابینہ اور پھر صوبائی اسمبلی میں پیش کیا جائے گا۔ پنجاب کے وزیر بلدیات عبد العلیم خان نے نئے بلدیاتی نظام کی منظوری کی تصدیق کردی ہے۔

نئے نظام کے تحت تحصیل اور سٹی ڈسٹرکٹ گورنمنٹس قائم کی جائیں گی ۔ شہری علاقوں میں ٹاؤن کونسل اور دیہی علاقوں میں ڈسٹرکٹ کونسل ختم کرکے دیہی علاقوں میں ویلیج کونسل اور شہری علاقوں میں نیبرہڈ کونسل بنائی جائیں گی۔

تحصیل اور سٹی ڈسٹرکٹ حکومتوں میں میئرز کے انتخابات براہ راست جماعتی بنیادوں پر ہوں گے۔ تاہم حکومت پنجاب ویلیج کونسل اور نیبرہڈ کونسل کے انتخابات غیر جماعتی بنیادوں پر کرانے کی خواہشمند ہے۔

بلدیاتی ادارے سالڈ ویسٹ مینجمنٹ ،واسا، ڈویلپمنٹ اتھارٹیز، پارکس اینڈ ہارٹیکلچراتھارٹی (پی ایچ اے) بلدیاتی حکومتوں کے ماتحت ہوں گے، تاہم پولیس بلدیاتی نمائندوں کے ماتحت نہیں ہوگی۔ ذرائع کے مطابق نیبر ہڈ کونسل اور ویلیج کونسل چھ چھ ارکان پر مشتمل ہوگی جن کے سربراہان کو چیئرمین کہا جائے گا۔ ان کونسلز کے تین ارکان کو براہ راست منتخب کرنے اور تین اسپیشل سیٹیں رکھنے کی تجویز دی گئی ہے۔

پاکستان کا اقتصادی بحران، چین کاا مداد کا اعلان اور معاہدے

adaria

وزیراعظم پاکستان عمران خان نے اپنے دورہ چین کے دوران چینی صدر اور وزیراعظم سے اہم اور کامیاب ملاقاتیں کی ہیں۔ ان ملاقاتوں کے نتیجے میں چین نے کڑے اقتصادی حالات کی وجہ سے پاکستان کی مالی مدد کرنے کا اعلان کیا ہے۔ 3 اکتوبر ہفتہ کے روز چینی وزیراعظم لی کیچیانگ کے ساتھ ملاقات میں عمران خان نے دو طرفہ امور پر مفید گفتگو کی۔ چینی وزیراعظم نے پاکستان کے ساتھ اپنے تعلقات کو نہایت اہم قرار دیتے ہوئے اس اطمینان کا اظہار کیا کہ دونوں ملکوں کی دوستی ہر موسم میں قائم و دائم رہنے والی ہے۔ ادھر چین کے نائب وزیر خارجہ کونگ ژوانیو نے یہ حوصلہ افزا اشارہ دیا کہ ان کا ملک پاکستان کو حالیہ اقتصادی بحرانی صورت حال میں مدد کے لیے تیار ہے۔اگرچہ چینی نائب وزیر خارجہ کونگ ژوانیو نے یہ نہیں بتایا کہ بیجنگ حکومت پاکستان کو کتنی مدد فراہم کرے گی تاہم چین کی جانب سے یہ عندیہ وزیراعظم عمران خان کی ان کوششوں کا نتیجہ ہے، جو ملکی معیشت کی بحالی کے لیے وہ کر رہے ہیں۔بیجنگ میں گریٹ ہال کے باہر میڈیا سے بات چیت کرتے ہوئے چینی نائب وزیر خارجہ نے بتایا کہ بیجنگ حکومت پاکستان کو اقتصادی بحران سے نکلنے میں ہر ممکن مدد کرے گی۔اس سلسلے میں اصولی اتفاق ہو گیا ہے۔ اس امداد و تعاون سے پاکستانی حکومت اپنی معاشی مشکلات کو کنٹرول کرنے میں کامیاب ہو سکتی ہے اور یہی اس امداد کا بنیادی پہلو ہے ۔ اہم بات یہ ہے کہ چین کے دورے سے قبل عمران خان نے کہا تھا کہ وہ دو ممالک سے مالی امداد حاصل کرنے کی بھرپور کوشش کر رہے ہیں تاکہ ملکی اقتصادی بحران کو قابو میں لایا جا سکے۔ قبل ازیں سعودی عرب تین بلین امریکی ڈالر نقد اور تین بلین ڈالر سالانہ کا ادھار تیل دینے کا یقین دلا چکا ہے اب چین نے بھی مکمل مالی تعاون کی یقین دہانی کرائی ہے جو پاکستان کے لیے نہایت ہی ممد و معان ثابت ہو گی اور باہمی تعاون کے نئے در وا ہونگے ۔ چینی وزارت خارجہ نے پہلے ہی کہہ دیا تھا کہ پاکستانی وزیر اعظم عمران خان کے دورے سے دونوں ملکوں کے مابین نئے حالات کے تحت دو طرفہ ترقی، تعلقات اور تعاون کے ایک نئے باب کا آغاز ہو گا۔اس دورے سے سی پیک کے حوالے سے پھیلایا گیا ابہام بھی دور ہو ہے۔چینی نائب وزیرِ خارجہ کوانگ ژوان یو نے اس حوالے سے واضح کیا ہے کہ چین پاکستان اقتصادی راہداری (سی پیک)سے متعلق منصوبوں کی تعداد میں کوئی تبدیلی نہیں ہو رہی اگر کوئی تبدیلی ہوئی بھی تو ان منصوبوں کی تعداد میں کمی نہیں بلکہ اضافے کی صورت میں ہی ہوگی۔سی پیک کے منصوبوں کا دائرہ بڑھایا جائے گا اور ان سے عام لوگوں کو مزید فائدہ پہنچانے کی کوشش کی جائے گی۔چین پاکستان کا دیرینہ قریب ترین اتحادی ہے عمران خان کے برسرِ اقتدار آنے کے بعد بلاجواز پروپیگنڈہ کیا گیا کہ حکومت 60 ارب ڈالر مالیت کے ‘سی پیک’ منصوبوں پر نظرِ ثانی کا ارادہ رکھتی ہے حکومت کی جانب سے ایسا کوئی واضح موقف سامنے نہیں آیا تھا کہ نظر ثانی کرنے کا ارادہ رکھتی ہے اب تو چین نے بھی ایسے خدشات کی کھل کر نفی کردی ہے۔ وزیرِ اعظم کے حالیہ دورہ چین کا بنیادی مقصد اپنے دیرینہ اتحادی سے مالی تعاون اور سرمایہ کاری کا حصول ہی ہے تاکہ بحران سے دوچار معیشت کو سہارا مل سکے۔پاکستان کے زرِ مبادلہ کے ذخائر میں رواں سال کے دوران 42 فی صد تک کمی آچکی ہے اور اس وقت یہ ذخائر محض آٹھ ارب ڈالر رہ گئے ہیں جن سے صرف دو ماہ کا درآمدی بِل ادا ہوسکتا ہے۔وزیرِ اعظم عمران خان کے دورہ چین کے ثمرات ملنا شروع ہوگئے ہیں، دونوں ممالک نے 15 نئے معاہدوں اور مفاہمت کی یادداشت پر دستخط کئے ہیں۔معاہدوں اور مفاہمتی یادداشتوں پر دستخط وفود کی سطح پر ہونے والے مذاکرات کے دوران کیے گئے، وزیر اعظم عمران خان نے پاکستانی وفد جبکہ ان کے ہم منصب لی کیچیانگ نے چینی وفد کی قیادت کی۔ وزیر اعظم کو اس دورے سے جو توقعات وابستہ ہیں امید ہے وہ پوری ہونگی اور ہر مشکل کا آزمودہ دوست مکمل تعاون فراہم کرے گا۔

سرحدی خلاف ورزیاں ،یو این کب نوٹس لے گا
بھارتی فوج پاگل کتوں کی طرح کنٹرول لائن کے قریب گھریلو کام کاج میں مصروف خواتین کو بھی نشانہ بنا رہی ہے۔اگلے روز سرحدی علاقے نالی میرہ میں منیزابی بی زوجہ محمد وسیم اپنے گھر میں معمول کے کام میں مصروف تھیں کہ ایک وحشی بھارتی سکیورٹی سنائپر اہلکار نے ان پر فائر کھول دیا جس وہ موقع پر ہی شہید ہو گئی، نوجوان 22سالہ منیزابی بی دوبچوں کی ماں تھیں، پاکستان نے ایل او سی پر بھارتی فائرنگ سے خاتون کی شہادت پر بھارتی ڈپٹی ہائی کمشنر کو دفتر خارجہ طلب کر کے احتجاج کیا ہے، لیکن حقیقت یہ ہے بھارت جیسے بے شرم ملک کو ایسے احتجاج سے فرق نہیں پڑتا۔ایسے معاملات کو انسانی حقوق کے بین الاقومی پلیٹ فارم پر اٹھانا چاہیے کہ کس طرح بھارت بین الاقوامی قوانین کی دھجیاں اڑا رہا ہے۔رواں سال بھارتی فائرنگ سے اب تک 35 شہری شہید اور 135 زخمی ہوچکے ہیں ، جبکہ اس عرصہ کے دوران بھارت 2312 بار سیز فائر معاہدے کی خلاف ورزی کرچکا ہے۔ان اعدادوشمار کو اقوام متحدہ کے امن مبصر مشن کے شیئر کرنے کی ضرورت ہے۔اقوام متحدہ پر بھی بھاری ذمہ داری عائد ہوتی ہے کہ وہ از خود بھی ایسی ٹارگٹ کلنگ کا نوٹس لے جس میں معصوم شہری نشانہ بنتے ہیں۔
کرکٹ ٹیم کی شاندار کارکردگی پر مبارک باد
پاکستان نے نیوزی لینڈ کو ٹی 20 کرکٹ سیریز میں ہرا کر نیا عالمی ریکارڈ قائم کیا ہے جس پر وزیر اعظم عمران خان نے قومی کرکٹ ٹیم کو شاندار کارکردگی دکھانے پر مبارکباد دی ہے۔ وزیر اعظم نے کہا کہ قومی کرکٹرز نے میچز میں بہترین کھیل پیش کیا۔ انہوں نے کہا کہ لگاتار گیارہویں کرکٹ سیریز جیتنا ایک بڑا اعزاز ہے، آسٹریلیا اور نیوزی لینڈ کیخلاف میچز میں بہترین ٹیم اسپرٹ دیکھنے کو نظر آئی۔وزیر اعظم نے امید ظاہر کی ہے کہ قومی ٹیم اپنی کارکردگی کے تسلسل کو آئندہ بھی برقرار رکھے گی۔پوری قوم بھی اس شاندار کارکردگی پر ٹیم کو مبارک باد پیش کرتی ہے اور توقع رکھتی ہے کہ وہ آئندہ بھی ایسی شاندار کارکردگی کا مظاہرہ کرتی رہے گی۔

Google Analytics Alternative