Home » 2019 » May » 14 (page 3)

Daily Archives: May 14, 2019

اسٹیٹ بینک نے نئے کرنسی نوٹوں کی بکنگ کی تاریخ کا اعلان کردیا

کراچی: اسٹیٹ بینک نے ایس ایم ایس سروس کے ذریعے نئے کرنسی نوٹوں کی بکنگ کی تاریخ کا اعلان کردیا۔

اسٹیٹ بینک کے مطابق رواں ماہ 20 سے 31 مئی تک نئے کرنسی نوٹوں کا اجراء کیا جائے گا۔ 19 مئی سے ایس ایم ایس کے ذریعے بکنگ کا آغازکردیا جائے گا۔ صارفین کو8877 پراپنا شناختی کارڈ نمبر، اسپیس اورمنتخب برانچ کا آئی ڈی نمبربھیجنا ہوگا۔ ای برانچزکے آئی ڈی نمبرزاسٹیٹ بینک اورنجی بینکوں کی ویب سائیٹس پردستیاب ہیں۔

ایک موبائل فون نمبرسے صرف ایک ہی شناختی کارڈ کا نمبربھیجا جاسکتا ہے جب کہ ایک شناختی کارڈ پر صرف ایک ہی مرتبہ نوٹ جاری کئے جائیں گے۔ نئے نوٹ ملک بھرکے مختلف بینکوں کے 142 شہروں کی 1700 شاخوں سے دستیاب ہوں گے۔ نئے نوٹوں کا فی کس کوٹا 10 روپے کی 3 گڈیاں، 50 اور 100 روپے کی ایک ایک گڈی ہے۔

محمد عامر وائرل انفیکشن کا شکار، ورلڈکپ اسکواڈ میں شرکت مشکوک

پاکستان کرکٹ ٹیم کے فاسٹ باؤلر محمد عامر وائرل انفیکشن کا شکار ہوگئے اور اب ان کی یہ بیماری شدت اختیار کرگئی جس کے بعد ان کی ورلڈکپ اسکواڈ میں شرکت بھی مشکوک ہے۔

کرک انفو کی رپورٹ کے مطابق محمد عامر پاکستان ٹیم کے ہمراہ اس وقت ٹیم کے دورہ انگلینڈ میں موجود ہیں، جہاں انہیں پہلے میچ میں ٹیم کا حصہ بنایا گیا لیکن دوسرے میچ میں انہیں ڈراپ کردیا گیا تھا۔

امکان ظاہر کیا جارہا ہے کہ محمد عامر کو جو انفیکشن لاحق ہوا ہے وہ ممکنہ طور پر ’چکن پوکس‘ ہے۔

کرک انفو کے مطابق ممکنہ طور پر انگلینڈ کے خلاف ہونے والے ہونے والے تیسری ون ڈے میں بھی محمد عامر کو ٹیم میں شامل نہیں کیا جائے گا کیونکہ وہ ٹیم کو چھوڑ کر لندن میں اپنے اہلِ خانہ کے پاس چلے گئے۔

ابھی تک یہ بات بھی سامنے نہیں آئی کہ ان کی بیماری کو ختم ہونے میں مزید کتنا وقت لگے گا، تاہم کرکٹ تجزیہ نگاروں کا ماننا ہے کہ انہیں ورلڈکپ اسکواڈ میں شامل کرلیا جائے گا۔

اس حوالے سے ڈان نیوز کے پروگرام ری پلے میں گفتگو کرتے ہوئے سینئر اسپورٹس جرنلسٹ عبدالغفار کا کہنا ہے کہ پی سی بی ذرائع کے مطابق محمد عامر کو اس وقت انگلینڈ کے خلاف ہونے والی سیریز سے بھی باہر نہیں کیا گیا ہے۔

واضح رہے کہ محمد عامر کو پاکستان کرکٹ بورڈ (پی سی بی) کی سلیکشن کمیٹی نے ورلڈکپ کے عبوری اسکواڈ کا حصہ نہیں بنایا تھا جبکہ امکان ظاہر کیا جارہا تھا کہ انگینڈ کے خلاف ہونے والی سیریز میں ان کی کارکردگی ورلڈکپ کے حتمی اسکواڈ میں ان کی شمولیت سے مشروط ہوگی۔

اکثر افراد کی پسندیدہ غذا صحت کے لیے تباہ کن

جب بات کی صحت کی ہو تو تمباکو نوشی کو تباہ کن سمجھا جاتا ہے جو کہ کینسر، امراض قلب، نظام تنفس کے مسائل اور دیگر کا خطرہ بڑھاتی ہے۔

مگر کیا آپ کو معلوم ہے کہ آج کل ہر ایک کی پسندیدہ مخصوص غذا صحت کے لیے تمباکو نوشی سے بھی زیادہ تباہ کن ثابت ہوتی ہے۔

جی ہاں واقعی یہ بات 195 ممالک کے افراد پر ہونے والی ایک طبی تحقیق میں سامنے آئی۔

امریکا کے انسٹیٹوٹ آف ہیلتھ میٹرکس اینڈ ایوولیشن کی تحقیق میں بتایا گیا کہ ناقص معیار کی غذا کا استعمال تمباکو نوشی سے زیادہ اموات کا باعث بن رہا ہے۔

درحقیقت فاسٹ یا جنک فوڈ کا شوق زندگی کی مدت کم کرتا ہے جبکہ صحت کے لیے بھی تباہ کن ثابت ہوتا ہے۔

تحقیق میں بتایا گیا کہ جنک فوڈ جیسے چپس، سافٹ ڈرنکس، برگر اور دیگر کو کھانا معمول بنانا انسانوں کو درپیش چند بڑے خطرات میں سے ایک ہے خصوصاً صحت مند زندگی ایک خواب بن جاتی ہے۔

تحقیق میں دریافت کیا گیا کہ اس طرح کی غذا میں غذائی اجزا کی کمی ہوتی ہے اور ان کا استعمال ترک کرکے سالانہ ایک کروڑ 10 لاکھ اموات کو آسانی سے روکا جاسکتا ہے۔

یہ اعدادوشمار تمباکو نوشی سے ہونے والی اموات سے زیادہ ہیں، کیونکہ سیگریٹ پینے سے سالانہ 80 لاکھ اموات ہوتی ہیں۔

درحقیقت جنک فوڈ کے استعمال سے ہائی بلڈ پریشر کے نتیجے میں ہونے والی اموات ایک کروڑ 10 لاکھ سے زائد ہیں۔

محققین نے بتایا کہ جنک فوڈ کے استعمال سے ہونے والی 22 فیصد افراد کی عمریں 70 سال سے کم ہوتی ہیں۔

ان کا کہنا تھا کہ سبزیوں اور غذائی اجزا کو خوراک سے نکال کر ان کی جگہ فاسٹ فوڈ کو دینا ہائی بلڈ پریشر، ذیابیطس، ہارٹ اٹیک اور فالج سمیت دیگر جان لیوا امراض کا خطرہ بڑھاتا ہے۔

تحقیق میں مشورہ دیا گیا کہ فاسٹ فوڈ کی جگہ صحت بخش غذا جیسے اجناس اور سبزیوں کو دینا لمبی اور صحت مند زندگی کے حصول میں مدد دے سکتا ہے۔

محققین کا کہنا تھا کہ امیر ممالک میں لوگوں کے اندر صحت کے لیے نقصان دہ غذاﺅں کے استعمال کا رجحان زیادہ پایا جاتا ہے ، وہاں لوگ زیادہ گوشت اور پراسیس غذائیں کھانے کے عادی ہوتے ہیں جبکہ سبزیاں، پھل اور اجناس کو نظرانداز کیا جاتا ہے۔

محققین کے مطابق دنیا بھر میں جنک فوڈ کے ساتھ سافٹ ڈرنکس کے استعمال کی شرح بھی بہت زیادہ بڑھ چکی ہے جس کے نتیجے میں ذیابیطس ایک وبا کی طرح پھیل رہی ہے۔

مولا جٹ كا نام استعمال كرنے كے خلاف درخواست سماعت كے لیے منظور

لاہور: ہائی كورٹ نے فلم مولا جٹ كا نام استعمال كرنے كے خلاف درخواست سماعت كے لیے منظور کرلی۔

لاہور ہائی كورٹ کے جج جسٹس اے مالک نے فلم مولا جٹ كا نام استعمال كرنے كے خلاف پروڈیوسر سرور بھٹی کی درخواست کی سماعت کی۔ عدالت نے درخواست پر لگے دفتری اعتراض ختم كركے درخواست سماعت كے لیے منظور كرلی۔

درخواست گزار نے موقف اختیار کیا کہ سنسر بورڈ كے پاس فلم كا ٹائٹل دینے كا كوئی اختیار نہیں، سنٹرل پنجاب اور سندھ سنسر بورڈ نے دی لیجنڈ آف مولا جٹ كے ٹریلر كا سنسر سرٹیفكیٹ جاری كیا، مولا جٹ كا ٹریڈ مارک سرٹیفكیٹ درخواست گزار سرور بھٹی كے پاس ہے، فلم كا ٹریڈ آئی پی او پہلے ہی مسترد کیا جاچکا ہے۔

درخواست گزار نے عدالت سے استدعا کی کہ جاری شدہ سنسر سرٹیفكیٹ كو كالعدم قرار دینے كا حكم دے۔

ون پلس 7 پرو کے 5 بہترین فیچرز

دنیا بھر میں آئی فون کلر سمجھے جانے والے فون ون پلس کے نئے فلیگ شپ فونز 14 مئی کو متعارف کرائے جارہے ہیں۔

یہ پہلا موقع ہے کہ یہ چینی کمپنی ایک ساتھ 2 فلیگ شپ فونز ون پلس 7 اور ون پلس 7 پرو متعارف کرانے جارہی ہے۔

مگر ان فونز کو متعارف کرانے سے قبل ہی کمپنی کی جانب سے ان فونز کے کئی فیچرز کے بارے میں بتادیا گیا ہے اور توقع کی جارہی ہے کہ ون پلس 7 پرو گوگل پکسل 3 اے ایکس ایل، سام سنگ گلیکسی ایس 10 ای اور آئی فون ایکس آر کو سخت ٹکر دے گا۔

اس کے چند فیچرز درج ذیل ہیں۔

ایچ ڈی آر پلس ڈسپلے

ون پلس 7 پرو کا ایک بڑا فیچر ایچ ڈی آر 10 پلس ڈسپلے ہے جو کہ ہائی ریزولوشن اسٹریمنگ کو سپورٹ کرے گا۔ یہ نیا ایچ ڈی آر اسٹینڈرڈ فریم بائی فریم ایڈجسٹمنٹ کی سہولت بھی فراہم کرے گا۔

پوپ اپ سیلفی کیمرا

ون پلس 7 سیریز میں نوچ نہیں ہوگا بلکہ ان میں فل اسکرین لگ بھگ بیزل لیس ڈسپلے دیا جائے گا، اس مقصد کے لیے فرنٹ کیمرے کو بھی ہٹا دیا گیا ہے اور پوپ اپ سیلیفی کیمرا سپورٹ دی جارہی ہے۔ اب تک پوپ اپ سیلفی کیمرا ویوو نیکس اور اوپو رینو وغیرہ میں نظر آیا ہے جبکہ شیاﺅمی کے جلد متعارف ہونے والے فونز میں بھی اس طرح کی سپورٹ دیئے جانے کا امکان ہے۔

ٹرپل بیک کیمرا

نئے پوپ اپ سیلفی کیمرے کے ساتھ ون پلس 7 پرو میں 3 بیک کیمرے دیئے جارہے ہیں، یہ پہلی بار ہے کہ اس کمپنی کے کسی فون میں 2 سے زائد فونز دیئے جارہے ہیں۔

یو ایف ایس 3.0 اسٹوریج

ون پلس 7 پرو کمپنی کا پہلا فون ہے جس میں یو ایف ایس 3.0 اسٹوریج دی جارہی ہے، یہ نیا اسٹوریج اسٹینڈرڈ تیز ترین ڈیٹا ٹرانسفر ریٹ کو یقینی بناتا ہے جس سے فون کی کارکردگی بہتر ہوتی ہے، ویسے تو توقع کی جارہی تھی کہ یہ فیچر سب سے پہلے سام سنگ کے نئے فلیگ شپ فون گلیکسی فولڈ میں نظر آئے گا مگر اب لگتا ہے کہ ون پلس 7 پرو اس معاملے میں سبقت حاصل کرلے گا۔

200 یفصد مضبوط وائبریشن موٹر

ون پلس کا ایک کمزور پہلو اب تک کمزور وائبریشن انجن تھا، یہ کمپنی آخرکار اس مسئلے کو ون پلس 7 پرو میں فکس کررہی ہے جس کے بارے میں کہا جارہا ہے کہ یہ 200 فیصد زیادہ مضبوط وائبریشن انجن سے لیس ہوگا۔

ہفتے میں تین مرتبہ خشک میوے کھانے سے بچے کے آئی کیو میں اضافہ

اسپین: اسپین میں کئے گئے ایک مطالعے سے انکشاف ہوا ہے کہ حاملہ خواتین مدتِ حمل کے ابتدائی دنوں میں اگر گری دار خشک میوے مثلاً بادام، پستے اور اخروٹ کھائیں تو اس سے بچے کی ذہانت (آئی کیو) میں اضافہ ہوسکتا ہے۔

اس سروے سے انکشاف ہوا ہے کہ حمل ٹھہرنے کی پہلی سہ ماہی (ٹرائی میسٹر) اگر کوئی خاتون ہفتے میں دو سے تین اونس گری دار پھل کھائے تو امکان ہے کہ اس سے بچے کا آئی کیو بہتر ہوتا ہے۔

اس سے قبل بھی گری دار پھلوں کے بہت سے فوائد سامنے آئے ہیں جو ذیابیطس، امراضِ قلب اور بلڈ پریشر وغیرہ سے محفوظ رکھنے میں مدد فراہم کرتے ہیں۔ بعض مطالعوں سے یہ بھی معلوم ہوا ہے کہ اگربڑھاپے میں ذہنی کمزوری سے بچنا ہے تو بھی بادام، پستے اور اخروٹ کا استعمال مفید ثابت ہوتا ہے۔ لیکن اب ان پھلوں کے زچہ اور بچہ پربہتر اثرات سامنے آئے ہیں۔

بارسلونا انسٹی ٹیوٹ آف گلوبل ہیلتھ کی جورڈی ہلویز اور ان کے ساتھیوں نے 2208 خواتین اور ان کے بچوں کا 8 سال تک مطالعہ کیا اور ان میں غذا ، ذہانت اور دورانِ حمل والدہ کی غذائی عادات کو نوٹ کیا گیا ۔ پھر پیدا ہونے والےبچے کا ڈیڑھ سال، 5 سال اور 8 سال کی عمر میں ذہنی صلاحیت کا جائزہ بھی لیا گیا۔

اس سروے سے معلوم ہوا کہ جن بچوں کی ماں نے حمل کی پہلی سہ ماہی میں گری دار پھل کھائے تھے وہ اسے نظر انداز کرنے والی ماؤں کے بچوں کے مقابلے میں قدرے زیادہ ذہین تھے۔ تاہم اس پورے سروے میں ماہرین نے ماں کی عمر، تعلیم، معاشی اور سماجی حیثیت اور سگریٹ نوشی وغیرہ کو بھی شامل کیا اور ان کے منفی اثرات کو بھی الگ کرکے دیکھا۔

ماہرین نے دیکھا کہ جن بچوں کی ماؤں نے ابتدائی ایام میں 75 گرام خشک میوے کھائے تھے ان کے بچوں میں توجہ، ارتکاز اور آئی کیو میں بہتری دیکھی گئی ۔ ماہرین نے اس کی وجہ اومیگا تھری فیٹی ایسڈ کو قرار دیا ہے جو ماں کی خوراک سے بچے کے وجود کا حصہ بن جاتی ہے اور یوں بچے کی دماغی بڑھوتری اور ذہانت میں اضافہ کرتی ہے۔

سید نور کا ایران کے اشتراک سے فلم بنانے کا اعلان

لاہور: معروف ہدایت کار سید نور نے ایران کے اشتراک اور تعاون سے فلم بنانے کا فیصلہ کیا ہے۔

پاکستان فلم انڈسٹری کو کئی نامور فلمیں دینے والے ہدایت کار سید نور کا ایک انٹرویو میں کہنا تھا کہ وہ ایرانی فلم انڈسٹری کے بہت بڑے مداح ہیں اور حال ہی میں انہیں فجر انٹرنیشنل فلم فیسٹیول کی جانب سے بھی مدعو کیا گیا جہاں انہوں نے بطور جج شرکت کی۔

سید نور نے  کہا کہ میری آمد کا جب لوگوں کو پتہ چلا تو بہت سے فلمسازوں نے مجھ سے ملاقاتیں کیں بعد ازاں ایک فلمساز اور ایرانی اداکار کے ہمراہ فلم کے حوالے سے گفتگو بھی ہوئی جس کا باقائدہ اعلان لاہور میں پریس کانفرنس کے ذریعے کیا جائے گا۔

ہدایت کار نے بتایا کہ فلم مشترکہ طور پر بنائی جائے گی جس کی شوٹنگ پاکستان اور ایران میں کی جائے گی جب کہ فلم کی کچھ عکس بندی ترکی میں بھی کی جائے گی۔ فلم کے اسکرپٹ پر کام جاری ہے جب کہ فلم کی شوٹنگ کچھ ماہ بعد شروع کردی جائے گی۔

سید نور نے کرداروں سے متعلق بتایا کہ فلم میں ایرانی اداکار کے ہمراہ صائمہ نور مرکزی کردار ادا کریں گی۔ جب کہ فلم میں دیگر کرداروں کے لئے دونوں ممالک کے نوجوانوں فنکاروں کو شامل کیا جائے گا۔

فیس بک نے کمپنی کو تقسیم کرنے کا مطالبہ مسترد کردیا

فیس بک کے شریک بانی کرس ہیگز نے گزشتہ دنوں کمپنی کو مختلف حصوں میں تقسیم کرنے کا مشورہ دیا تھا اور اب کمپنی نے اس کا جواب دیا ہے۔

فیس بک کے گلوبل افیئرز اینڈ کمیونیکشن کے نائب صدر نک کلیگ نے نیویارک ٹائمز میں شائع اپنے مضمون میں کرس ہیگز کے دلائل کو تنقید کا نشانہ بناتے ہوئے کہا کہ کمپنی خود کو زیادہ ریگولیٹ کرنے کی خواہش رکھتی ہے۔

کرس ہیگز کی اس بات کہ سیاستدانوں نے مسابقت کو یقینی بنانے کی ذمہ داری کو نظرانداز کردیا ہے، پر نک گلیگ کا کہنا تھا کہ شریک بانی نے فیس بک اور مسابقتی قوانین کے مقاصد کو صحیح طریقے سے سمجھا نہیں۔

ان کا کہنا تھا کہ فیس بک فیس بک ایک ایسی بڑی کمپین ہے جو متعدد چھوٹے ٹکڑوں کو جوڑ کر بنی ہے اور ہر ٹکڑا متعدد حریفوں سے مقابلہ کررہا ہے جبکہ اسے کچھ مارکیٹوں میں بالادستی بھی حاصل نہیں۔

انہوں نے زور دیا کہ اینٹی ٹرسٹ قوانین صارفین کے لیے کم قیمتوں اور اعلیٰ معیار کے تحفظ کے لیے ہیں، ان کا مقصد کسی کمپنی کے حجم یا اختلافات کو سزا دینا نہیں، بڑا ہونے کا مطلب برا ہونا نہیں ہوتا۔

نک گلیک نے مشورہ دیا کہ کمپنیوں کے احتساب کے لیے انہیں زیادہ ریگولیٹ کیا جانا چاہیے اور قوانین کے اطلاق کو یقینی بنانا چاہیے۔

اس سے قبل فیس بک کے بانی مارک زکربرگ نے کرس ہیگز کے بیان پر کہا تھا ‘جب میں نے ان لکھا مضمون پڑھا تو میرا ردعمل تھا کہ ان کی تجویز سے مسائل حل نہیں ہوں گے’۔

پیرس میں فرانس انفو سے بات کرتے ہوئے مارک زکربرگ نے اس خیال کو مسترد کردیا کہ فیس بک کو پرائیویسی، تحفظ، غلط معلومات جیسے مسائل کا سامنا ہے۔

انہوں نے کہا ‘کرس ہیگز کمپنی کو تقسیم کرنے کے ایک مخصوص خیال پر بات کررہے ہیں، جس سے ان کے خیال میں ہمیں درپیش چند سماجی مسائل کو حل کرنے میں مدد ملے گی، مگر میرے خیال میں یہاں چند حقیقی مسائل موجود ہیں، جیسے خطرناک مواد اور اطہار اور تحفظ کے درمیان درست توازن کی تلاش، تاکہ انتخابی مداخلت کو روکا جاسکے’۔

انہوں نے دعویٰ کیا کہ کمپنی کو تقسیم کرنے سے کسی قسم کی مدد نہیں ملے گی۔

Google Analytics Alternative