Home » 2019 » November » 06 (page 4)

Daily Archives: November 6, 2019

ایف بی آر افسران نے پاکستان ریونیو اتھارٹی کے قیام کی مخالفت کردی

اسلام آباد:  وزیراعظم عمران خان کی ٹیکس مشینری میں اسٹیٹس کو توڑنے کے پلان کی راہ میں پہلی اہم رکاوٹ سامنے آگئی ہے۔

گزشتہ روز ( پیر ) فیڈرل بورڈ آف ریونیو ( ایف بی آر ) کے اعلیٰ افسران نے اجلاس میں وزیراعظم کی پاکستان ریونیو اتھارٹی ( پی آراے) قائم کرنے کی تجویز کی مخالفت کردی۔ ایف بی آر میں موجود ذرائع کے مطابق ایف بی آر کی 23 فیلڈ فارمیشنز، اس کے اراکین اور دیگر اعلیٰ حکام نے حکومت کے جون 2020 تک پی آر اے کے قیام کے خلاف رائے دی ہے۔

چیف کمشنروں کے اجلاس میں اعلیٰ افسران نے ایف بی آر کے چیئرمین شبرزیدی کے سامنے فرسٹریشن کا اظہار کیا۔ شبرزیدی ڈیٹا کلیکشن اور آٹومیشن پر خاص توجہ دیتے ہوئے ایف بی آرکی جدید خطوط پر تعمیر کرنا چاہتے ہیں۔ اس اقدام سے ٹیکس مشینری کا اجارہ دارانہ کردار ختم ہوجائے گا اور بہت سی بے مصروف پوسٹیں بھی ختم ہوجائیں گی جن میں 21 گریڈ کے چیف کمشنر کی پوسٹ بھی شامل ہے جسے بہت پُرکشش سمجھا جاتا ہے۔ چیئرمین ٹیکس دہندگان اور ٹیکس وصولنے والوں کے درمیان فزکل کونٹیکٹ ختم کرنے کے متمنی ہیں۔

ایف بی آر کے ان لینڈ ریونیو کی ملک کے بڑے شہروں میں 23 فیلڈ فارمیشنز ہیں جن کی سربراہی گریڈ 21 کا چیف کمشنر کرتا ہے۔ چیف کمشنر کی پوسٹ انتظامی ہے جب کہ قانونی اختیارات گریڈ 20 کے کمشنر کے پاس ہوتے ہیں۔ نئے منصوبہ بندی کے تحت چیف کمشنر کی پوسٹ ختم کر کے کمشنر کو بااختیار بنایا جائے گا۔ اسی وجہ سے اعلیٰ افسران نئے ری اسٹرکچرنگ پلان کے خلاف ہوگئے ہیں اور اسے ایک اور نیا تجربہ قرار دے رہے ہیں جسے ہر صورت ناکام ہونا ہے۔

واضح رہے کہ وزیراعظم عمران خان تین سالہ ٹیکس ایڈمنسٹریشن ری اسٹرکچرنگ پلان کی منظوری دے چکے ہیں جس کے تحت ایف بی آر کی ری اسٹرکچرنگ اور پی آر اے کے قیام کے لیے آئندہ سال جون تک کی ڈیڈ لائن مقرر کی گئی ہے۔

اس منصوبے میں ملک گیر سروے، اشیا و خدمات پر وفاقی اور صوبائی جنرل سیلز ٹیکس کو پی آر اے کے تحت لانا اور ویلیوایڈڈ ٹیکس کا نفاذ شامل ہیں۔ اس منصوبے کی منظوری ایک ماہ قبل وزیراعظم ہاؤس میں دی گئی صرف چیئرمین ایف بی آر کی موجودگی میں دی گئی تھی۔

ایف بی آر کے ایک افسر نے ایکسپریس ٹریبیون کو بتایا کہ منصوبے کی منظوری سے قبل شبر زیدی نے اپنی ٹیم کو اعتماد میں نہیں لیا تھا جس کی وجہ سے ٹیکس مشینری میں خفگی پائی جاتی ہے۔

ایف بی آر کے اعلیٰ حکام نے وفاقی حکومت کی جانب سے ٹیکس جمع کرنے کے مجوزہ اتھارٹی کے قانونی مینڈیٹ اور چیف کمشنر کی پوسٹ ختم کرنے پر سوالات اٹھائے تاہم چیئرمین ایف بی آر شبرزیدی نے کہا کہ پی آر اے پر گفت و شنید کا ابھی آغاز ہوا ہے اور مجھے امید ہے کہ میں ایف بی آر کے افسران کو قائل کرلوں گا۔

کھانے کے دوران پانی پینا فائدہ مند ہے یا نقصان دہ؟

ہوسکتا ہے کہ آپ نے اکثر سنا ہو کہ کھانے کے بعد یا درمیان میں پانی نہیں پینا چاہئے کیونکہ اس سے ہاضمہ متاثر ہوتا ہے۔

یا اس کے نتیجے میں جسم غذا میں موجود اجزا کو مناسب طریقے سے جذب نہیں کرپاتا یا پیٹ پھول جاتا ہے۔

اسی طرح کچھ کہتے ہیں کہ اس کے نتیجے میں زہریلا مواد اکٹھا ہونے لگتا ہے جس کے نتیجے میں متعدد طبی مسائل کا سامنا ہوسکتا ہے اور قدرتی طور پر ہوسکتا ہے کہ آپ سوچتے ہوں کہ کھانے کے ساتھ ایک گلاس پانی پینا کیا واقعی منفی اثرات کا باعث بنتا ہے یا بس ایک غلط خیال ہے۔

اس بارے میں سائنسی شواہد سے جانیں کہ کھانے کے دوران پانی پینا ہاضمے اور صحت پر کیا اثرات مرتب کرسکتا ہے۔

صحت مند ہاضمے کی بنیاد کیا ہے؟

یہ سمجھنا یا خیال کہ پانی کو ہاضمے کو متاثر کرنے کا باعث کیوں سمجھا جاتا ہے، معمول کے نظام ہاضمہ کو سمجھنے میں مددگار ثابت ہوسکتا ہے۔

ہاضمے کا عمل خوراک کے پہلے نوالے کے ساتھ ہی شروع ہوجاتا ہے، چبانے سے لعاب دہن بنانے والے غدود کو لعاب دہن بنانے کا سگنل ملتا ہے، جس میں ایسے انزائمے ہوتے ہیں جو کھانے کے ٹکڑے کرنے میں مدد دیتے ہیں۔

معدے میں یہ غذا تیزابی سیال میں مل جاتی ہے جہاں اس کےمزید ٹکڑے ہوتے ہیں اور ایک گاڑھا سیال بن جاتا ہے۔ چھوٹی آنت میں یہ سیال ہاضمے کے انزائمے سے مل جاتا ہے جو لبلبے اور بائل ایسڈ پر مشتمل ہوتے ہیں، جس سے اس سیال کے مزید ٹکڑے ہوتے ہیں اور ہر غذائی جز دوران خون میں جذب ہونے لگتا ہے۔

چھوٹی آنت میں اس سیال کے سفر کے دوران بیشتر غذائی اجزا جذب ہوجاتی ہیں، بس ایک پروٹین جذب ہونے سے بچ جاتا ہے۔

دوران خون میں یہ غذائی اجزا جسم کے مختلف حصوں میں سفر کرتے ہیں، اور یہ غذا کے ہضم ہونے کا مکمل عمل (اس کا انحصار اس غذا پر ہوتا ہے کہ آپ نے کیا کھایا) 24 سے 72 گھنٹے کے دوران مکمل ہوجاتا ہے۔

تو کھانے کے دوران پانی ہاضمے کے مسائل کا باعث بنتا ہے؟

مناسب مقدار میں پانی پینا متعدد فوائد کا باعث بنتا ہے، تاہم کچھ افراد کا دعویٰ ہے کہ کھانے کے دوران مشروبات کا استعمال اچھا خیال نہیں، ایسے عام دعوے درج ذیل ہیں۔

پہلا دعویٰ

کچھ لوگ زور دیتے ہیں کہ تیزابی مشروبات سے منہ خشک ہوتا ہے جس کے نتیجے میں جسم کے لیے غذا ہضم کرنا زیادہ مشکل ہوجاتا ہے، تاہم سائنسی طور پر ایسے شواہد نہیں کہ ان مشروبات کا استعمال نظام ہاضمہ پر منفی اثرات مرتب ہوتا ہے۔

دوسرا دعویٰ

متعدد یہ بھی دعویٰ کرتے ہیں کہ کھانے کے ساتھ پانی پینے سے غذا معدے میں موجود ایسڈ اور غذائی انزائمے میں حل ہوجاتی ہے اور جسم کے لیے کھانا ہضم کرنا مشکل ہوجاتا ہے، تاہم یہ بھی درست نہیں۔

تیسرا دعویٰ

ایک اور مقبول بحث یہ ہے کہ کھانے کے ساتھ مشروب کا استعمال کھانے کے ہضم ہونے کا عمل تیز کردیتا ہے، ایسا خیال کیا جاتا ہے کہ اس سے معدے کے ایسڈ اور ہاضمے کے انزائمے سے کھانے کے تعلق کا وقت کم ہوتا ہے جس سے ہاضمہ متاثر ہوتا ہے، مگر اس دعویٰ کے حوالے سے بھی سائنسی تحقیق یا شواہد موجود نہیں۔

پانی ہاضمہ بہتر کرسکتا ہے

پانی یا سیال مشروب غذا کے بڑے حصے کے ٹکڑے کرنے میں مدد دے سکتا ہے اور یہ غذائی نالی سے معدے میں پہنچانے میں بھی مددگار ہوسکتا ہے۔ اس کے علاوہ یہ غذا کے ہموار طریقے سے گزرنے میں مدد دیتا ہے، جس سے پیٹ پھولنے اور قبض کی روک تھام ہوتی ہے۔ مزید براں معدہ کھانا ہضم کرنے کے دوران پانی کو ایسڈ اور غذائی انزائمے کے ساتھ کردیتا ہے، درحقیقت ان انزائمے کے مناسب افعال کے لیے پانی کی ضرورت ہوتی ہے۔

کھانے کی اشتہا اور زیادہ کیلوریز سے بچائے

کھانے کے دوران پانی پینا نوالے کو چبانے کے دوران رکنے میں مدد دیتا ہے، یعنی ایک ایسا لمحہ ملتا ہے جس میں بھوک اور پیٹ بھرنے کے سگنل چیک کرنے کا موقع ملتا ہے اور اس سے حد سے زیادہ کھانے سے بچنے ک یروک تھام ہوتی ہے بلکہ جسمانی وزن میں کمی بھی مدد ملتی ہے۔

ایک تحقیق میں دریافت کیا گیا کہ جن افراد کو ہر بار کھانے سے سے قبل 500 ملی لیٹر پانی 12 ہفتوں تک استعمال کرایا گیا، ان میں اس دورانیے کے دوران 2 کلو وزن کم ہوا، تحقیق سے یہ بھی عندیہ ملتا ہے کہ پانی پینے سے میٹابولزم کی رفتار بڑھ جاتی ہے اور زیادہ کیلوریز جلانے میں مدد ملتی ہے۔

دلچسپ بات یہ کیلوریز جلنے کی شرح اس وقت کم ہوگئی جب پانی نے جسمانی درجہ حرارت کو بڑھا دیا، اس کی ممکنہ وجہ یہ ہے کہ ٹھنڈے پانی کو گرم کرنے کے لیے جسم زیادہ توانائی خرچ کرتا ہے، تاہم پانی کے میٹابولزم پر اثرات بہت زیادہ نمایاں نہیں اور ہر ایک میں نظر نہیں آتے اور یہ بھی پانی پر ہے، دیگر کیلوریز والے مشروبات پر نہیں۔

کن افراد کو نقصان ہوسکتا ہے؟

بیشتر افراد کو کھانے کے ساتھ پانی پینے سے کسی قسم سے منفی اثرات کا سامنا نہیں ہوتا تاہم اگر آپ سینے میں جلن کے شکار رہتے ہیں، تو کھانے کے ساتھ پانی سے منفی اثرات مرتب ہونے کا امکان ہوتا ہے، کیونکہ پانی یا مشروب سے معدے میں مقدار بڑھتی ہے، جس سے معدے کا دباﺅ بڑھ جاتا ہے، جو سینے میں جلن کا باعث بن سکتا ہے۔

حتمی نتیجہ

اگر کھانے کے ساتھ پانی یا مشروبات کے استعمال سے پیٹ پھولنے یا سینے میں جلن کا سامنا ہوتا ہے، تو اس کا استعمال نہ کریں، ورنہ ایسے شواہد موجود نہیں جو کھانے کے ساتھ پانی پینے سے روکتے ہوں۔

درحقیقت پانی یا مشروبات کا استعمال کھانے سے قبل یا درمیان میں کرنا ہاضمے کے عمل کو ہموار کرتی ہیں، ہائیڈریشن میں مدد ملتی ہے جبکہ پیٹ بھرنے کا احساس ہوتا ہے، بس یہ یاد رکھیں کہ مشروبات میں پانی ہی سب سے صحت بخش انتخاب ہے۔

پچ سازگار نہیں مولانا فضل الرحمان چھکا لگانے کے چکر میں آؤٹ نہ ہوجائیں، فردوس عاشق

اسلام آباد: معاون خصوصی فردوس عاشق اعوان کا کہنا ہے کہ مولانا فضل الرحمان کی ہارڈ ہٹنگ جاری ہے اور وہ چاہتے ہیں کہ ہر بال پر چھکا لگائیں لیکن اس میں آؤٹ ہونے کے زیادہ چانسز ہیں۔

اسلام آباد ہائی کورٹ کے باہر میڈیا سے بات کرتے ہوئے فردوس عاشق اعوان نے کہا کہ چیف جسٹس اسلام آباد ہائی کورٹ کے حکم پر عدالتوں کا دورہ کیا، وزیراعظم نے انصاف کی فراہمی کے لئے 23 سال جدوجہد کی، حکومت نے اصلاحاتی ایجنڈے کے تحت قوانین میں 8 ترامیم کی ہیں، عمران خان نے گلے سڑے نظام کو بدلنے کا وعدہ کیا تھا، نظام کو بدلنے کا آغاز ہو چکا ہے۔ حکومت قوانین میں تبدیلی کرکے اصلاحات کے عمل کو آگے بڑھا رہی ہے، نظام بدلنے کی پہلی اینٹ قوانین میں تبدیلی ہے۔ سینیٹ میں اکثریت نہ ہونے کی وجہ سے اسلام آباد ہائی کورٹ میں ججز کی تعیناتی کابل پاس نہیں ہوا۔

توہین عدالت نوٹس سے متعلق معاون خصوصی نے کہا کہ عدالت نے ان کی غیر شروط معافی کو مسترد نہیں کیا بلکہ 11 نومبر تک تحریری جواب جمع کرانے کا حکم دیا ہے۔ فردوس عاشق اعوان نے کہا کہ سیاست دان میدان میں رہ کر سیاست کرتا ہے، ہارجیت ہوتی رہتی ہے مگر سیاست دان میدان میں رہتا ہے، مولانا فضل الرحمان کی ہارڈ ہٹنگ جاری ہے، وہ چاہتے ہیں کہ ہر بال پر چھکا لگائیں، اس میں آؤٹ ہونے کے زیادہ چانسز ہیں،  کچھ گیندوں کو روک کر کھیلنا ہی سمجھ داری ہے، پچ ہموار نہیں، مولانا صاحب کو مدمقابل باؤلر کو بھی مدنظر رکھنا چاہیے۔ ہارڈ ہٹنگ کا جواب ہارڈ ہٹنگ سے نہیں دیا جائے گا۔

معاون خصوصی کا کہنا تھا کہ  مولانا فضل الرحمان کامیدان میں آنے کا وقت مناسب نہیں ہے، امید ہے کہ مولانا فضل الرحمان موسم، پچ، حالات اور بولر کو دیکھ کر فیصلہ کریں گے، وہ ریٹائرڈ ہرٹ نہیں ہوں گے، مولانا صاحب ہر وقت وزیراعظم کو ہدیہ تبرک بھیجتے ہیں اس سے پیچھے ہٹیں، مولانا فضل الرحمان ایساعمل نہ کریں کہ سیاست سے باہر ہوجائیں اور انہیں فیس سیونگ کا موقع نہ ملے، امید ہے فضل الرحمان اپنا بیانیہ قومی مفاد کےخلاف نہیں کریں گے۔

کیا آرمی چیف کی توسیع کا نوٹیفکیشن جاری ہو چکا، صحافی کی جانب سے پوچھے جانے والے سوال پر معاون خصوصی نے کہا پتہ نہیں کیوں میڈیا میں ایشو بنایا جارہا ہے نوٹیفکیشن اسی وقت ہوجاتا ہے جب پراسس شروع ہوتا ہے۔

اٹلی میں امدادی کام کے دوران عمارت میں دھماکا، 3 فائر فائٹرز ہلاک

روم: اٹلی میں ایک عمارت میں لگی آگ کو بجھانے کے دوران دھماکا ہوگیا جس کے نتیجے میں 3 فائر فائٹرز ہلاک ہوگئے۔

بین الاقوامی خبر رساں ادارے کے مطابق اٹلی کی ایک عمارت میں آگ لگ گئی، فائر بریگیڈ کا عملہ آگ بجھانے میں مصروف تھا کہ اس دوران  دھماکا ہوگیا اور عمارت مکمل طور تباہ ہوگئی جس کے نتیجے میں 3 فائر فائٹرز ہلاک اور 4 زخمی  ہوگئے۔

ایک فائر فائٹرز کی لاش ملبے تلے دب گئی جسے نکالنے کے لیے گھنٹوں کھدائی کی گئی۔ ہلاک اور زخمی ہونے والوں کی اسپتال منتقل کردیا گیا ہے، تاحال دھماکے کی وجہ کا تعین نہیں کیا جا سکا ہے، دھماکے کی نوعیت سے محسوس ہوتا ہے کہ دھماکا منصوبہ بندی سے کیا گیا۔

میونسپل ادارے نے واقعے کی تحقیقات کے لیے انکوائری کمیٹی تشکیل دے دی ہے جو واقعے کے ذمہ داروں کا تعین کرکے اپنی رپورٹ 15 دن کے اندر جمع کرانے کی پابند ہو گی۔ ہلاک ہونے والوں اہلکاروں کے لیے امدادی رقم کا اعلان اور لواحقین کو ملازمت دینے کا وعدہ کیا گیا ہے۔

ٹوئنٹی 20 ورلڈ کپ؛ آسٹریلیا آئندہ سال میلہ سجانے کیلیے تیار

سڈنی:  آسٹریلیا آئندہ سال ورلڈ ٹی ٹوئنٹی میلہ سجانے کیلیے تیار ہے۔

سڈنی میں www.cricketpakistan.com.pk کے نمائندہ سلیم خالق کو خصوصی انٹرویو میں ورلڈٹوئنٹی کے چیف ایگزیکٹیو نک ہوکلے نے کہا کہ میگا ایونٹ میں مردوں کے میچ 7اور خواتین کے 6 شہروں میں شیڈول کئے گئے ہیں،ٹکٹوں کی فروخت تیزی سے جاری ہے، نرخ بھی مناسب اور 5سے 20 ڈالر تک رکھے گئے ہیں، ہم پوری دنیا سے آنے والے شائقین کو خوش آمدید کہتے ہوئے بہترین سہولیات فراہم کرینگے،آسٹریلیا میں مقیم پاکستانی، بھارتی اور سری لنکن شائقین کی بڑی تعداد بھی میچز دیکھنے کیلیے آئے گی۔

انھوں نے کہا کہ ورلڈکپ مقابلوں کے دوران اسٹیڈیمزسے باہر بھی رونقیں لگائی جائیں گی، افتتاحی روز سڈنی اولمپک پارک میں جشن کا سماں ہوگا، سٹی سینٹرسمیت مختلف مقامات پر بھی میلہ سجایا جائے گا، فین زونز میں  ہر عمر کے شائقین کی دلچسپی کے لوازمات موجود ہوں گے۔

ایک سوال پر نک ہوکلے نے کہا کہ میں جہاں بھی جاؤں مجھ سے پاک بھارت میچ کے بارے میں ضرور پوچھا جاتا ہے، روایتی حریفوں کے مقابلے دنیا بھر کے شائقین کی توجہ کا مرکز بنتے ہیں،رینکنگ پوزیشن کی وجہ سے ورلڈ ٹی ٹوئنٹی کے پہلے راؤنڈ میں تو ان کا میچ نہیں ہوگا، ہوسکتا ہے کہ سیمی فائنل یا فائنل میں دونوں کا جوڑ پڑجائے، پاکستان اور بھارت کا وارم اپ میچ کرانے کا ابھی کوئی فیصلہ نہیں ہوا۔

’ای شارپ بینڈ‘ کی ’شبانہ‘ نے جوانوں کے دل جیت لیے

صوبہ سندھ کے دارالحکومت کراچی سے تعلق رکھنے والے میوزیکل بینڈ ’ای شارپ‘ نے اپنے ’پیپسی بیٹل آف دی بینڈز‘ میں پیش کیے گئے گانے ’او شبانہ‘ کی ویڈیو ریلیز کردی۔

’ای شارپ‘ نے ابتدائی طور پر ’او شبانہ‘ کو میوزیکل مقابلے پروگرام ’پیپسی بیٹل آف دی بینڈ‘ کے رواں برس نشر ہونے والے چوتھے سیزن میں پیش کیا تھا۔

’ای شارپ‘ کے اسی گانے کو ’پیپسی بیٹل آف دی بینڈز‘ کے ججز نے سنتے ہی سراہا تھا اور میوزیکل بینڈ کے اراکین نے تعریفیں بٹوری تھیں۔

اب ’ای شارپ‘ نے اسی گانے کو ’پیپسی بیٹل آف دی بینڈز‘ کے تعان سے جاری کردیا۔

’او شبانہ‘ نامی گانے کی ویڈیو 5 منٹ سے بھی کم دورانیے پر مبنی ہے اوراس میں اسکول کے طلبہ و طالبات کو دکھایا گیا ہے۔

گانے کی شاعری سمیت ویڈیو کو بھی سراہا جا رہا ہے—اسکرین شاٹ
گانے کی شاعری سمیت ویڈیو کو بھی سراہا جا رہا ہے—اسکرین شاٹ

گانے میں جوان سالہ اسکول کے طالب علم کو شبانہ نامی لڑکے کے عشق میں گرفتار ہوتے ہوئے دکھایا گیا ہے۔

گانے میں جہاں رومانس، جوانی، لڑکپن، اسکول کی زندگی اور محبت کو دکھایا گیا ہے، وہیں گانے میں تفریح بھی شامل کی گئی ہے اور مرکزی لڑکے کو گرمیوں سمیت ہر وقت ہاتھوں پر گلوز پہنے ہوئے دکھایا گیا اور اس کے اسی عمل پر ان کے کلاس فیلو انہیں چڑاتے دکھائی دیتے ہیں۔

گانے کو دو دن قبل ہی ریلیز کیا گیا تھا اور گانے نے ریلیز ہوتے ہی جوانوں کے دل جیت لیے، کئی افراد نے نہ صرف گانے کی میوزک بلکہ ویڈیو کو بھی سراہا۔

سام سنگ گلیکسی ایس 11 میں 108 میگا پکسل کیمرا دیئے جانے کا امکان

سام سنگ کا نیا فلیگ شپ فون گلیکسی ایس 11 اس کمپنی کا پہلا فون ہوگا جس میں 108 میگا پکسل کیمرا دیا جائے گا۔

یہ دعویٰ اسمارٹ فون کمپنیوں کے حوالے سے اکثر درست لیک کرنے والے ٹوئٹر صارف آئس یونیورس نے ایک ٹوئٹ میں کیا۔d

خیال رہے کہ اس وقت بیشتر بڑی کمپنیوں کے فونز میں 12 سے 16 میگا پکسل کیمرے فلیگ شپ فونز میں دیئے جاتے ہیں۔

سام سنگ نے اگست میں 108 میگا پکسل کیمرا سنسر تیار کرنے کا اعلان کیا تھا جو سب سے پہلے شیاﺅمی کے اسمارٹ فونز میں متعارف ہوا۔

مگر کمپنی خود کب اس سنسر کا استعمال کرے گی، یہ واضح نہیں تھا مگر اب ایسا لگتا ہے کہ گلیکسی ایس 11اس کا پہلا فون ہوگا۔

عام طور پر میگا پکسل کا زیادہ ہونا بہتر تصاویر لینے کی ضمانت نہیں ہوتا، درحقیقت گوگل کی جانب سے پکسل فونز میں 12 میگا پکسل کیمرا استعمال کیا جارہا ہے اور اسے بہترین اسمارٹ فون کیمرا قرار دیا جاتا ہے۔

درحقیقت میگاپکسل سے زیادہ اچھے سافٹ وئیر اور پراسیسنگ کی صلاحیت اسمارٹ فون کیمرے کی تصاویر کو بہتر بناتی ہے۔

مگر سام سنگ کا 108 میگا پکسل کیمرا کم روشنی میں زیادہ بہتر تصاویر لینے میں مدد دے سکے گا۔

اس سے پہلے یہ لیک سامنے آئی تھی کہ گلیکسی ایس 11 پہلا فون ہوگا جس میں 5 ایکس آپٹیکل زوم دیا جائے گا جس کے لیے وہ آپٹیکل زوم موڈیول کی پروڈکشن بھی کررہی ہے۔

مختلف رپورٹس کے مطابق گلیکسی ایس 11 کے بیک پر 4 کیمرے دیئے جائیں گے جن میں ایک تھری ڈی سنسنگ ٹی او ایف موڈیول بھی ہوسکتا ہے۔

خیال رہے کہ گلیکسی ایس 11 آئندہ سال فروری یا مارچ میں متعارف کرایا جائے گا اور اس کے حوالے سے لیکس کا سلسلہ جب تک جاری رہے گا۔

یونان میں ایک ٹرک سے 39 افغان تارکین وطن برآمد

ایتھنز: یونان میں ایک ریفریجریٹر ٹرک سے 39 افغان باشندوں سمیت 41 غیر قانونی تارکین وطن برآمد ہوئے جس پر ڈرائیور کو گرفتار کرلیا گیا۔

بین الاقوامی خبر رساں ادارے کے مطابق یونان کے شمالی علاقے میں پولیس نے معمول کی چیکنگ کے دوران ایک ریفریجریٹر ٹرک سے 41 تارکین وطن کو تحویل میں لے لیا۔ ان میں سے 39 کا تعلق افغانستان سے جب کہ ایک کا تعلق شام اور ایک کا ایران سے ہے۔

ٹرک میں چھپ کر کئی غیر قانونی طور پر سرحدیں عبور کر کے کئی دنوں تک کا سفر کرنے والے تارکین وطن کی صحت بہتر ہے تاہم 4 تارکین وطن کو اسپتال میں ابتدائی طبی امداد فراہم کی گئی۔ ٹرک ڈرائیور کو گرفتار کرلیا گیا ہے جس کا تعلق جارجیا سے ہے۔

حکام کا کہنا ہے کہ تمام تارکین وطن کی شناخت کے عمل میں 2 روز لگ سکتے ہیں۔ ٹرک سے متعلق معلومات جمع کر رہے ہیں۔ ٹرک سے برآمد ہونے والے تمام افراد کی عمریں 22 سے 48 سال کے درمیان ہے۔

واضح رہے کہ 10 روز قبل برطانیہ میں ایک کنٹینر سے 39 تارکین وطن کی لاشیں ملی تھیں جو ویت نام کے شہری تھے جب کہ تین روز قبل فرانس اور اٹلی کی سرحد کے نزدیک ایک ٹرک سے 31 پاکستانی تارکین وطن پکڑے گئے تھے۔

Google Analytics Alternative