Home » Author Archives: Admin

Author Archives: Admin

جو وزیر کام نہیں کرے گا اُس کے خلاف کارروائی ہوگی، وزیراعظم

پشاور: وزیر اعظم عمران خان کا کہنا ہے کہ جو وزیر دفتر نہیں جائے گا اُس کے خلاف کارروائی ہوگی اور پھر وہ شکوہ نہ کریں کہ وزارت چلی گئی۔ 

پشاور میں تقریب سے خطاب کرتے ہوئے وزیر اعظم نے کہا کہ خیبرپختونخوا کے لوگ سیاسی شعور رکھتے ہیں، خیبرپختونخوا کے لوگ دوسری باری نہیں دیتے لیکن ہمیں دی۔ یہاں کے لوگوں کی زندگیوں میں تبدیلی آئی اس لیے تحریک انصاف کو دوسرا مینڈیٹ ملا، 2018 کے الیکشن صاف اور شفاف ہوئے، ہم نے مینڈیٹ لینے کے لیے کوئی روایتی حربہ استعمال نہیں کیا، ہم نے الیکشن سے قبل فنڈز جاری نہیں کیے تھے، اگر کوئی بھی حلقہ کھلوانا چاہتے ہیں تو ہم تیار ہیں۔

وزیر اعلیٰ خیبر پختونخوا کی تعریف کرتے ہوئے وزیر اعظم نے کہا کہ محمود خان کی ایمانداری پر پورا یقین ہے، وہ سادہ اورسچے انسان ہیں۔ ہمیں یقین ہے کہ محمود خان کسی کے دباؤ میں نہیں آئیں گے۔ پنجاب میں عثمان بزدار کو وزیراعلیٰ بنایا تو ہمارا مذاق اڑایا گیا، عثمان بزدار بھی ایماندار اور دلیر شخص ہیں، انہوں نے پیسے ضائع نہیں کیے، وہ مافیا کا مقابلہ کرنے کے لیے کھڑے ہوگئے ہیں جب کہ شہباز شریف وزیراعظم کا طیارہ استعمال کرتے تھے، انہوں نے انٹرٹینمنٹ کی مد میں 35 کروڑ روپے خرچ کیے۔

وزیر اعظم نے کہا کہ ماضی میں چھوٹے سے طبقے کے لیے پالیسیاں بنتی رہیں، کسی نے نچلے طبقے کو اوپر لانے کے لیے نہیں سوچا، ملک میں امیر اورغریب میں فرق ختم ہونا چاہیے، جہاں امیر اورغریب میں فرق ہو وہ کیسے فلاحی ریاست بن سکتی ہے، حکومت کو ریکارڈ ملکی خسارہ ورثے میں ملا۔ بیوروکریسی کی سوچ ہے کہ سرمایہ کاری اچھی چیز نہیں، ہمیں سرمایہ کاروں کے لیے آسانیاں پیدا کرنی ہیں۔ وزیراعظم ہاؤس کی گاڑیاں اور بھینسیں بیچنے پر ہمارا مذاق اڑایا گیا حالانکہ ہم عوام کے پیسے پر بادشاہت کے نظام کا خاتمہ کررہے ہیں۔

وزیر اعظم نے کہا کہ ہمیں اب فارورڈ بلاک بننے اور حکومت گرنے کا کوئی خطرہ نہیں، وزراء کو شام تک اپنے دفاتر میں بیٹھنا چاہیے، مجھے پتہ چل جائے گا کہ کون سا وزیر آفس نہیں جارہا اور جو وزیر دفتر نہیں جائے گا اُس کے خلاف کارروائی ہوگی ، پھر وہ شکوہ نہ کریں کہ وزارت چلی گئی۔ آپ منتخب لوگ ہیں، اگرکام نہیں کیا تو لوگ آپ کو ڈنڈے ماریں گے، لوگ یہ نہیں سنیں گے کہ بیوروکریٹ نے کام نہیں کرنے دیا، اگر کوئی بیورو کریٹ رکاوٹ پیدا کرتا ہے تو اس کے خلاف ایکشن لیں، اگر کوئی بیورو کریٹ کام نہیں کرتا تو اس کو نکال دیں۔

وزیر اعظم نے کہا کہ پاکستان میں دنیا کے دیگر ملکوں کے مقابلے میں سب سے کم ٹیکس دیا جاتا ہے، 21 کروڑ پاکستانیوں میں 72 ہزار لوگ ماہانہ 2 لاکھ روپے کی آمدنی ظاہر کرتے ہیں، ایک وقت تھا کہ بیوروکریٹ کی ماہانہ تنخواہ سے 70 تولہ سونا خریدا جاسکتا تھا لیکن اب وزیر اعظم کو جو تنخواہ ملتی ہے اس سے بنی گالہ کا خرچہ بھی نہیں نکل سکتا۔ ماضی میں ڈومور کا مطالبہ کرنے والا امریکا اب کہتا ہے کہ طالبان سے مذاکرات کراؤ، پاکستان نے امریکا اور طالبان کی بات چیت کرائی ہے۔

حکومت نے پی اے سی کی سربراہی شہباز شریف کو دے کر یو ٹرن لیا، فواد چوہدری

اسلام آباد: وفاقی وزیر اطلاعات فواد چوہدری کا کہنا ہے کہ اپوزیشن قومی اسمبلی کا اجلاس چلنے نہیں دے رہی تھی اس لئے حکومت نے پی اے سی کی سربراہی شہبازشریف کو دینے کا فیصلہ کرکے یو ٹرن لیا ہے۔

پارلیمنٹ ہاؤس اسلام آباد کے باہر میڈیا سے بات کرتے ہوئے فواد چوہدری نے کہا کہ اپوزیشن جماعتیں پبلک اکاؤنٹس کمیٹی کی سربراہی کے معاملے پر اڑی ہوئی تھی اور قومی اسمبلی کا اجلاس چلنے نہیں دے رہی تھی۔ حکومت کا اس معاملے پر موقف قانون اور اخلاقیات کے مطابق تھا لیکن اسمبلی اجلاس سے روزانہ واک آؤٹ سے قومی خزانے کو کروڑوں کا نقصان ہورہا تھا۔

فواد چوہدری نے کہا کہ حکومت نے فراغ دلی کا مظاہرہ کرتے ہوئے فیصلہ کیا کہ پبلک اکاؤنٹس کمیٹی کی سربراہی کا فیصلہ اپوزیشن خود کرے اور حکومت اس میں رکاوٹ نہیں ڈالے گی۔ حکومت نے پبلک اکاؤنٹس کمیٹی کی سربراہی شہباز شریف کو دینے کا فیصلہ کر کے یو ٹرن لیا ہے۔ اب فیصلہ اپوزیشن کو کرنا ہے کہ وہ کس کو پی اے سی کا سربراہ نامزد کریں گے۔

وزیر اطلاعات کا کہنا تھا کہ چھوٹا بھائی بڑے بھائی کی کرپشن کا احتساب کیسے کرے گا۔ اس لئے اخلاقی طور پر شہباز شریف کی پبلک اکاؤنٹس کمیٹی کی سربراہی کا فیصلہ غلط اقدام ہے۔ انہیں چاہیے کہ پبلک اکاؤنٹس کمیٹی کی سربراہی قبول نہ کریں۔

وفاقی وزیر نے مزید کہا کہ اپوزیشن قومی اسمبلی کا اجلاس کسی صورت نہیں چلنے دینا چاہتی، پی اے سی کی سربراہی سے متعلق حکومت نے اپوزیشن کا غلط مطالبہ مان لیا ہے تو اب سعد فیق کے پروڈکشن آرڈر جاری نہ ہونے کو جواز بنا کر قومی اسمبلی اجلاس سے واک آ ؤ ٹ کر رہی ہے۔

قومی اسمبلی؛ سعد رفیق کے پروڈکشن آرڈر جاری نہ ہونے پر اپوزیشن کا واک آؤٹ

اسلام آباد: مسلم لیگ (ن) کے رکن خواجہ سعد رفیق کے پروڈکشن آرڈر جاری نہ ہونے پر اپوزیشن کی تمام جماعتوں نے دوسرے روز بھی قومی اسمبلی کے اجلاس کا واک آؤٹ کیا۔

اسپیکر اسد قیصر کی سربراہی میں قومی اسمبلی کا اجلاس ہوا، اجلاس کے دوران اپوزیشن جماعتوں نے خواجہ سعد رفیق کے پروڈکشن آرڈر جاری نہ ہونے پر احتجاج کیا۔ قائد حزب اختلاف شہباز شریف نے نکتہ اعتراض پر اظہار خیال کرتے ہوئے کہا کہ ہم تین روز سے خواجہ سعد رفیق کے پروڈکشن آرڈرز کا مطالبہ کر رہے ہیں۔ جس پر اسپیکر نے کہا کہ اس حوالے سے ہم نے قانونی مشاورت حاصل کی ہے۔

پیپلز پارٹی کے راجہ پرویز اشرف نے بھی مطالبہ کیا کہ خواجہ سعد رفیق کے پروڈکشن آرڈر جاری کئے جائیں۔ اس کے ساتھ ہی اپوزیشن کے تمام ارکان ایوان سے واک آؤٹ کرگئے۔

حکومتی اتحاد میں شامل بی این پی مینگل کے سردار اختر مینگل نے اظہار خیال کرتے ہوئے کہ پروڈکشن آرڈر کا اجرا پارلیمنٹیرین کا حق ہے۔ خواجہ سعد رفیق کے پروڈکشن آرڈر جاری کئے جائیں۔ ہم نے ہمیشہ اصولوں کی سیاست کی ہے اس وجہ سے 70 سال سے صعوبتیں برداشت کررہے ہیں۔ یہ پارلیمنٹ ہے مغلیہ دربار نہیں ہے۔ اس صورتحال میں یہاں نہیں بیٹھ سکتے۔ اس کے ساتھ ہی اختر مینگل بھی ایوان سے واک آؤٹ کرگئے۔

بعد ازاں وقفہ سوالات سمیت ایوان کی معمول کی کارروائی نمٹائی گئی۔ جس کے بعد اسپیکر اسد قیصر نے قومی اسمبلی کا اجلاس پیر کی شام چار بجے تک ملتوی کردیا۔

پاکستان کو سعودی امدادی پیکج کے تحت مزید ایک ارب ڈالر کی رقم موصول

کراچی: پاکستان کو سعودی عرب کے امدادی پیکج کے تحت مزید ایک ارب ڈالر کی رقم موصول ہوگئی ہے۔

ترجمان اسٹیٹ بینک کے مطابق پاکستان کو سعودی پیکج کے تحت مزید ایک ارب ڈالر کی رقم موصول ہوگئی ہے، جس کے بعد ملک میں غیر ملکی زرمبادلہ کے ذخائر 9 ارب 24 کروڑ ڈالر ہوگئے، جنوری میں ایک ارب ڈالر کی مزید قسط موصول ہوجائے گی، جس سے ذر مبادلہ کے ذخائر کی بہتری میں مدد ملے گی۔

اکتوبر میں وزیراعظم عمران خان نے سعودی عرب کا دورہ کیا تھا۔ اس موقع پر سعودی عرب نے ایک سال کے لیے پاکستان کے اکاؤنٹ میں 3 ارب ڈالر ڈپازٹ رکھنے اور 3 سال تک سالانہ 3 ارب ڈالر کا تیل ادھار پر دینے کے لیے رضامندی ظاہر کی تھی۔
سعودی عرب نے گزشتہ ماہ ایک ارب ڈالر ڈپازٹ کئے تھے اور رواں ماہ مزید ایک ارب ڈالر دپازٹ کردئیے گئے ہیں۔

دوسری جانب معاشی ماہرین کا کہنا ہے کہ سعودی ڈپازٹس سے پاکستان کے اکاؤنٹ میں رکھنے سے پاکستان کے زرمبادلہ کے ذخائر پر دباؤ میں کمی آئے گی اور ڈالر کے مقابلے میں روپے کی قیمت میں استحکام آئے گا۔

2018 میں بھی عاطف اسلم کا جادو بھارتیوں پر سر چڑھ کر بولتا رہا

ممبئی: پاکستان کے ساتھ بھارتیوں کے دلوں پر راج کرنے والے نامور پاکستانی گلوکار عاطف اسلم کی آواز کا جادو 2018 میں بھی بھارتیوں پر چھایا رہا اور رواں سال عاطف اسلم کے دوگانے بھارت میں گوگل پر سب سے زیادہ سرچ کیے جانے والے گانوں میں شامل رہے۔

دلبر دلبر

رواں سال بھارتیوں نے جس گانے کو گوگل پر سب سے زیادہ سرچ کیا اورجسے سب سے زیادہ پسند کیاگیا وہ مراکشی اداکارہ نورا فاتحی پر فلمایا گیا گانا’دلبر دلبر‘تھا۔ نورا فاتحی نے اپناگانا  گوگل پر سب سے زیادہ سرچ کیے جانے والے گانوں میں ٹاپ پوزیشن حاصل کرنے پر خوشی کا اظہار کرتے ہوئے ایک ویڈیو بھی شیئر کی جس میں انہوں نے گانے کو پسند کرنے والے تمام لوگوں کا شکریہ اداکیا۔ دوسرے نمبر پر پنجابی گانا ’دارو بدنام‘ رہا۔

تیرا فتور

تیسرے نمبر پر بھارتیوں نے جس گانے کو گوگل پر رواں سال سب سے زیادہ سرچ کیا وہ فلم’جینئس‘کا گانا تیرا فتور تھا جب کہ چوتھے نمبر بھارتیوں نے انڈین پوپ اسٹا ہاردی سندھو کے گانے ’کیابات اے‘ کو پسند کیا۔

دیکھتے دیکھتے

پانچویں نمبر پر بھارتیوں نے گوگل پر عاطف اسلم کے گانے’دیکھتے دیکھتے‘ کو سرچ کیا، فلم ’بتی گل میٹر چالو‘ میں اداکار شاہد اورشردھا کپور پر فلمایا گیا، گانا ریلیز ہوتے ہی شائقین میں مقبول ہوگیا تھا۔

دل دیاگلاں

فہرست میں عاطف اسلم ایک اور گانے ’دل دیا گلاں‘ کے ساتھ جگہ بنانے میں کامیاب ہوگئے ہیں۔ سلمان خان اور کترینہ کیف پر فلمائے گئے اس گانے کو بھارتیوں نے چھٹے نمبر پر سب سے زیادہ پسند اور سرچ کیا۔

لونگ لاچی

رواں سال پنجابی گانا ’لونگ لاچی‘ بھی بھارت میں بے حد پسند کیا گیا اور لوگوں نے اسے بار بار سنا جب کہ آٹھویں نمبر پر بھارتی ریپر پادشاہ کا گانا ’بز‘ سب سے زیادہ گوگل پر سرچ کیا گیا۔

نویں نمبر پر بھارتیوں نے انگریزی گانے ’دیسپاسیتو‘کو سرچ کیا جب کہ دسویں نمبر پر پنجابی گانا ’پردہ‘سب سے زیادہ پسند کیاگیا۔

’ٹو پوائنٹ زیرو‘ 700 کروڑ کمانے کے باجود چھٹے نمبر پر

بھارتی سپر اسٹار رجنی کانت اور بولی وڈ کھلاڑی اکشے کمار کی سپر میگا بجٹ فلم ’ٹو پوائنٹ زیرو‘ اگرچہ اپنے بجٹ سے زیادہ کمائی کر چکی ہے اور اس نے کئی فلموں کے ریکارڈ بھی توڑے ہیں۔

تاہم یہ فلم ریکارڈ کمائی کرنے کے باوجود 14 دسمبر تک بھارت کی سب سے زیادہ کمائی کرنے والی فلموں کی فہرست میں چھٹے نمبر پر موجود تھی۔

’ٹو پوائنٹ زیرو‘ نے 14 دسمبر تک دنیا بھر سے 700 کروڑ روپے کما لیے تھے اور یہ فلم ریلیز کے ابتدائی 2 ہفتوں میں اتنی کمائی کرنے والی پہلی فلم بھی ہے۔

ٹائمز ناؤ کے مطابق ’ٹو پوائنٹ زیرو‘ نے دنیا بھر سے 700 کروڑ روپے کما کر بھارت کی سب سے زیادہ کمائی کرنے والی فلموں کی فہرست میں چھٹی پوزیشن حاصل کرلی۔

فلم کو ہندی، تامل اور تیلگو زبانوں میں ریلیز کیا گیا—اسکرین شاٹ
فلم کو ہندی، تامل اور تیلگو زبانوں میں ریلیز کیا گیا—اسکرین شاٹ

فلم نے ریکارڈ کمائی کرتے ہوئے ‘باہو بلی ون’ کو پیچھے چھوڑ دیا اور ان سے چھٹا نمبر چھین کر اسے ساتویں نمبر پر پہنچا دیا، تاہم یہ فلم ’باہو بلی 2‘ کا ریکارڈ توڑنے میں تاحال ناکام ہے۔

اگرچہ فلم نے ریکارڈ کمائی کی ہے اور اپنے بجٹ سے کروڑوں روپے زائد بھی بٹور چکی ہے، تاہم فلم بھارت کی سب سے زیادہ کمائی کرنے والی فلموں سے پیچھے ہیں۔

اکشے کمار کے روپ نے سب کو حیران کیا—اسکرین شاٹ
اکشے کمار کے روپ نے سب کو حیران کیا—اسکرین شاٹ

بھارت کی سب سے زیادہ کمائی کرنے والی پانچ بڑی فلموں میں 3 مسٹر پرفیکشنسٹ عامر خان، ایک دبنگ ہیرو سلمان خان اور ایک ’باہو بلی 2‘ ہے۔

خیال کیا جا رہا ہے کہ آئندہ 2 سے 3 دن میں ’ٹو پوائنٹ زیرو‘ عامر خان کی پی کے اور سلمان خان کی بجرنگی بھائی جان سے آگے نکل کر چوتھے یا تیسرے نمبر پر پہنچ جائے گی۔

فلم میں 67 سالہ رجنی کانت 26 سالہ ایمی جیکسن سے پیار کرتے دکھائی دیے—اسکرین شاٹ
فلم میں 67 سالہ رجنی کانت 26 سالہ ایمی جیکسن سے پیار کرتے دکھائی دیے—اسکرین شاٹ

بھارت کی سب سے زیادہ پیسے کمانے والی فلم عامر خان کی دنگل ہے، جب کہ دوسرے نمبر پر باہوبلی 2، تیسرے نمبر پر سیکریٹ سپر اسٹار، چوتھے پر پی کے، پانچویں پر بجرنگی بھائی جان اور چھٹے نمبر پر ’ٹو پوائنٹ زیرو‘ آگئی ہے۔

رجنی کانت اور اکشے کمار کی اس فلم کو 550 کروڑ روپے کے بجٹ سے تیار کیا گیا تھا، تاہم یہ فلم صرف سینما گھروں سے ہی 700 کروڑ کمانے میں کامیاب گئی ہے۔

علاوہ ازیں اس فلم نے سیٹلائیٹ اور ٹی وی رائلٹی کی مد میں بھی 350 کروڑ روپے کمالیے ہیں۔

یہ فلم 2010 میں ریلیز ہونے والی رجنی کانت کی فلم ’روبوٹ‘ کا سیکوئل ہے، اس بار فلم میں جہاں ایشوریا رائے کی جگہ ایمی جیکسن کو کاسٹ کیا گیا ہے، وہیں فلم میں اکشے کمار کو بھی شامل کیا گیا ہے۔

فلم میں اکشے کمار طاقتور ولن جب کہ رجنی کانت روبوٹ ہیرو کے روپ میں نظر آئے ہیں اور ایمی جیکسن بھی اس کا ساتھ دیتی نظر آتی ہیں۔

فرانس میں فائرنگ کرکے 3 افراد کوقتل کرنے والے حملہ آورکی ہلاکت کی تصدیق

پیرس: فرانس کی کرسمس مارکیٹ میں فائرنگ کرکے 3 افراد کو قتل اور12 افراد کو زخمی کرنے والے شخص کی ہلاکت کی تصدیق ہوگئی۔

بین الاقوامی خبررساں ادارے کے مطابق فرانس کے وزیر داخلہ کرسٹوف کاسٹنرنے کرسمس مارکیٹ میں پولیس کی جوابی فائرنگ سے زخمی ہونے والے  29 سالہ حملہ آورشیرف شیکٹ کی ہلاکت کی تصدیق کردی ہے۔

حملہ آورمنگل کے روز اسٹراس برگ کی کرسمس مارکیٹ میں شہریوں پرفائرنگ کرکے زخمی حالت میں فرارہوگیا تھا۔ پولیس نے ملزم کے والدین اوردو بھائیوں سمیت 5 افراد کو حراست میں لے لیا تھا۔

پولیس حکام کا کہنا ہے کہ حملے کے وقت ملزم چاقو اورپستول سے لیس تھا جب کہ اس کے اپارٹمنٹ سے ایک گرنیڈ،  2 رائفل، 4 چھریاں اور شکار کے لیے استعمال ہونے والے 2 تیز دھار چاقو بھی برآمد ہوئے۔

شیرف شیکٹ اسٹراس برگ میں مراکش سے ہجرت کرکے آنے والے ایک گھرانے میں پیدا ہوا، وہ سیکیورٹی اداروں کی ملک کو ممکنہ طور نقصان پہنچانے والے افراد کی ’واچ لسٹ‘ میں شامل تھا۔ ملزم کے خلاف فرانس اورجرمنی میں چوری، ڈکیتی وغیرہ کے 27 مقدمات درج ہیں۔

عام سے گینگ سے منسلک عادی ملزم 2013 سے 2015 میں اسیری کے دوران شدت پسند مذہبی خیالات کا حامل شخص بن گیا تھا اورجیل میں پہلی مرتبہ شدت پسند اسلامی جماعتوں سے متعارف ہوا۔

دوسری جانب شدت پسند جماعت داعش کی ویب سائٹ عمق نے بھی دعویٰ کیا ہے کہ فرانس میں کرسمس مارکیٹ پر حملہ کرنے والا شیرف شیکٹ داعش کا جنگجو تھا۔

سی این جی ایسوسی ایشن کا کل سے سندھ بھر میں گیس اسٹیشنز کھولنے کا اعلان

کراچی: سی این جی ایسوسی ایشن نے کراچی سمیت سندھ بھر میں کل  سے گیس اسٹیشنز کھولنے کا اعلان کیا ہے۔

سی این جی بند ہونے سے کراچی،حیدر آباد اور اندرون سندھ میں آج پانچویں روز بھی معمولات زندگی بری طرح متاثر ہیں، پبلک ٹرانسپورٹ سڑکوں پر انتہائی کم ہے جب کہ  مافیا نے کرایوں میں 50 روپے تک   من مانا اضافہ  کردیا جس سے شہریوں کو شدید مشکلات کا سامنا کرنا پڑ رہا ہے۔

وزیر اعظم عمران خان کی ہدایت پر وفاقی وزیر پٹرولیم غلام محمد سرور گیس کا مسئلہ حل کرنے کراچی پہنچے جہاں انہوں نے وزیراعلیٰ سندھ سید مراد علی شاہ سے ملاقات کی جس میں وزیراعلیٰ  نے جلد گیس بحال کرنے کا مطالبہ کرتے ہوئے کہا کہ آئین کے مطابق جس صوبے سے گیس نکلتی ہے پہلا حق اس کا ہے اور جانبدارانہ کارروائیاں آئین کے ساتھ مذاق ہیں۔

دوسری جانب سی این جی ایسوسی ایشن نے کراچی سمیت سندھ بھر میں ہفتے  سے گیس اسٹیشنز کھولنے کا اعلان کیا ہے۔

واضح رہے کہ سوئی سدرن گیس کمپنی نے صوبے بھر میں سی این جی سیکٹر کو گیس کی فراہمی غیر معینہ مدت کے لیے بند کردی تھی،بعد ازاں گیس کا بحران مبینہ طور پر مصنوعی نکلا اور انکشاف ہوا کہ سندھ کی گیس پنجاب کو فراہم کی جارہی ہے۔

Google Analytics Alternative