Home » Author Archives: Admin (page 3030)

Author Archives: Admin

وزارت خزانہ کے مطالبات زر کو منظور کر لیا گیا

اسلام آباد  قومی اسمبلی کے اجلاس میں وزارت خزانہ کے مطالبات زر کو منظور کر لیا گیا ۔سپیکر قومی اسمبلی ایاز صادق کی زیر صدارت قومی اسمبلی کا اجلاس ہوا جس میں وزارت خزانہ کے 26مطالبات زر پر 244سے زائد کٹوتی کی تحاریک پیش کی گئی ۔ایوان نے 15کھرب 84ارب 31کروڑ 70لاکھ روپے کے مطالبات زر منظور کرلیے ۔

حکومتی پریس کانفرنس کے بعد معاملہ ”ڈیڈ“ ہو گیا: اعتزاز احسن

اسلام آباد پاکستان پیپلز پارٹی کے رہنماءاور سینیٹر اعتزاز احسن نےکہا ہے کہ ہم وزیراعظم کو ٹارگٹ نہیں کر رہے بلکہ وزیراعظم رینج میں آ رہے ہیں، حکومتی پریس کانفرنس کے بعد ڈیڈ لاک نہیں معاملہ ”ڈیڈ“ ہو گیا ۔

اعتزاز احسن نے کہاکہ ٹی او آرز کے معاملے پر حکومت اپنی پوزیشن سے انحراف کر رہی ہے اور احتساب کی بات کی جائے تو یہ لوگ گالی گلوچ کرتے ہیں لیکن ہم ہمیشہ پارلیمانی زبان ہی استعمال کریں گے۔انہوں نے کہا کہ وزیراعظم نے خود کو احتساب کیلئے پیش کیا ہے اس لئے احتساب کا آغاز وزیراعظم اور ان کے خاندان سے ہی ہونا چاہئے۔ اعتزاز احسن نے کہا کہ قومی سرمایہ خفیہ طریقے سے سرحد کے آر پار آتا جاتا رہا ہے۔ ٹی او آرز کے معاملے پر پارلیمانی کمیٹی کا ڈیڈ لاک تھا لیکن حکومتی پریس کانفرنس کے بعد اب معاملہ ”ڈیڈ“ ہو گی ہے۔

سرکاری عمارتوں میں لکڑی کی بجائے المونیم سٹیل استعمال کیا جائے،پرویز خٹک

پشاور وزیر اعلیٰ خیبر پختونخوا نے حکم دیا ہے کہ تمام سرکاری عمارتوں بشمول سکول،ہسپتال وغیرہ میں دورازوں ،کھڑکیوں اور روشندانوں وغیرہ میں لکڑی کے سامان کی بجائے المونیم سٹیل استعمال کی جائے تاکہ صوبے میں جنگلات کو زیادہ سے زیادہ تحفظ فراہم کیا جا سکے۔اس امر کا اعلان محکمہ جنگلات ،ماحولیات اور جنگلی حیات خیبر پختونخوا کے تمام متعلقہ محکموں اور افسران کے نام جاری کردہ ایک مراسلے میں کیا گیا۔

انگلینڈ اور سری لنکا کل ہونگے آمنے سامنے

لندن انگلینڈ اور سری لنکا کے درمیان پانچ ون ڈیز کی سیریز کا پہلا میچ کل ناٹنگھم کے ٹرینٹ برج گراونڈ میں کھیلا جائے گا۔ڈے نائٹ میچ پاکستانی وقت کے مطابق شام چھ بجے شروع ہوگا۔اس میچ سے پہلے آئی لینڈرز نے آئرلینڈ کو دو میچوں میں شکست دی تھی جس کی وجہ سے ان کا مورال کافی بلند ہے لیکن انگلینڈ کی ٹیم سری لنکا کیخلاف ٹیسٹ سیریز جیت چکی ہے۔ اس سیریز سے پہلے سری لنکا کی ٹیم مینجمنٹ میں طویل مشاورت ہوئی جس میں انگلینڈ کیخلاف نئی حکمت عملی سے میدان میں اترنے کا فیصلہ کیا گیا۔ اس حکمت عملی کے مطابق اگر کوئی وکٹ جلد گر جاتی ہے تو نیچے والے نمبروں کے بلے باز کو تیز سکور کرنے کیلئے پروموٹ کیا جائے گا۔اس سیریز کیلئے ایان مورگن انگلینڈ جبکہ اینجلو میتھوز سری لنکا کے کپتان ہوں گے۔

ماضی کی طرح اس بجٹ میں بھی عوام کیلئے کچھ نہیں ہے.شیخ رشید

اسلام آبادعوامی مسلم لیگ کے سربراہ شیخ رشید نے کہا ہے کہ ماضی کی طرح اس بجٹ میں بھی عوام کیلئے کچھ نہیں ہے۔ میڈیا رپورٹس کے مطابق قومی اسمبلی میں اظہار خیال کرتے ہوئے شیخ رشید کا کہنا تھا کہ جب سے پیدا ہوا ہوں سن رہا ہوں کہ یہ بجٹ عوام کا بجٹ ہے جبکہ حقیقت یہ ہے کہ ماضی کی طرح اس بجٹ میں بھی عوام کیلئے کچھ نہیں انہوں نے کہا کہ وزیراعظم ہاﺅس کے باتھ روم کیلئے 22 ملین روپے رکھے گئے ، سپیکر صاحب پی ایم ہاﺅس میں کون سی سونے کی ٹوٹیاں لگ رہی ہیں ۔شیخ رشید کا کہنا تھا کہ کابینہ اور حکومت میں تخت لاہور چھایا ہوا ہے ، سپیکر صاحب! آپ خوش نصیب ہیں کہ لاہور سے ہیں۔ عوامی مسلم لیگ کے سربراہ نے کہا کہ اسحاق ڈار پر دبئی میں ٹاورز کی ملکیت کا الزام عمران خان نے لگایا ہے۔ اسحاق ڈار اس معاملے میں جو بھی کہنا چاہتے ہیں وہ عمران خان سے کہیں

ہر لیک ہونے والی ویڈیو کی ذمہ دار وزارت داخلہ نہیں ہر صوبہ خود ہے ، وزیر داخلہ

اسلام آباد  وفاقی وزیر داخلہ چوہدری نثار نے کہا ہے کہ تین ملزموں کی ویڈیوز لیک ہوئیں لیکن یہ وزارت داخلہ کی ذمہ داری نہیں ہے ،پہلی ویڈیو بلوچستان میں لیک ہوئی جس کی ذمہ داری بلوچستان حکومت پر عائد ہوتی ہے ،خالد شمیم اڈیالہ جیل میں تھا اس لیے ویڈیو لیک ہونے کی انکوائری کرائی جس کی تحقیقاتی رپورٹ جلد منظر عام پر آجائے گی۔ان کا کہنا ہے کہ ڈاکٹر عاصم کی ویڈیو لیک ہونے پرتحقیقات کے لیے سندھ حکومت کو خط لکھ دیا ہے ،وفاقی حکومت بھی ہر قسم کے تعاون کے لیے تیار ہے لیکن جس طرح کے بیانات آرہے ہیں مجھے ان پر افسوس ہے ۔
قومی اسمبلی میں خطاب کرتے ہوئے وزیر داخلہ نے کہا کہ ایسے واقعات کو بند ہونا چاہیے ،انہیں روکنے کی ذمہ داری صوبوں پرعائد ہوتی ہے ،یہ عدالتوں کی تضحیک اور عدالتی نظام پر اثر انداز ہونے کی کوشش ہے ۔بھارت کے حوالے سے گفتگو کرتے ہوئے چوہدری نثار نے کہا کہ ہندو انتہا پسند تنظیمیں پاکستان اور بھارت کے تعلقات کے درمیا ن میں رکاوٹ ہیں ،ہندہ انتہا پسند تنظیموں کا بھارتی حکومت پر اثر و رسوخ ہے ۔ان کا کہنا تھا کہ پاکستان دوستی کی پالیسی مودی کی امریکی کانگریس میں تقریر سے واضح ہے ،بھارت تعلقات کی بحالی میں سنجیدہ ہے تو مذاکرات کے دروازے اتنے عرصہ بند کیوں کیے ۔انہوں نے کہا کہ وزیر اعظم پاکستان کے کسی ملک یاسر براہ حکومت سے تعلقات پاکستان کے مفادات سے منسلک ہیں ،بھارتی وزیر خارجہ کی جانب سے انہیں ذاتی رنگ دینا کسی طور مناسب نہیں ۔

اپوزیشن پاناما پیپرز تحقیقات 6 نکات پیش ،پی پی اور پی ٹی آئی کا کنٹینر ایک ہی ہوسکتا ہے: اعتزاز احسن

اسلام آباد  پاکستان پیپلز پارٹی کے سینئر رہنما سینیٹر اعتزاز احسن نے متحدہ اپوزیشن کی جانب سے پاناما پیپرز کی تحقیقات کیلئے 6 نکات پیش کردیے اور کہا ہے کہ جس کا نام پاناما پیپرزمیں آیا اس کی اور اس کے خاندان کی تحقیقات ہونی چاہئیں لیکن تحقیقات کا آغاز وزیر اعظم اور ان کے خاندان سے ہو اوراگرکوئیاپارٹمنٹ خریدا گیاتومختارنامہ دینا چاہیے،بتانا چاہیے کہ کس سے خریدا۔ جب تک پاناماپیپرز کی تحقیقات کے حوالے سے کوئی سنجیدگی نہیں دکھائی جاتی تب تک ٹی او آرکمیٹی میں جانے کا کوئی فائدہ نہیں ہے ۔ حکومت پاناما لیکس کی تحقیقات پر سنجیدگی کامظاہرہ کرے نہیں تو عید کے بعد پی پی اور پی ٹی آئی کا کنٹینر ایک ہی ہوسکتا ہے۔ان خیالات کا اظہار انہوں نے متحدہ اپوزیشن کی مشترکہ پریس کانفرنس سے خطاب کرتے ہوئے کیا ۔ اس موقع پر متحدہ اپوزیشن کی 9 جماعتوں میں سے صرف 5 جماعتیںپریس کانفرنس میں شریک ہوئیں جبکہ ایم کیو ایم، اے این پی ، قومی وطن پارٹی اور بی این پی عوامی نے متحدہ اپوزیشن کی پریس کانفرنس میںشرکت نہیں کی۔پی پی رہنما نے کہا کہ حکومت پاناما پیپرز کی تحقیقات نہیں چاہتی بلکہ ڈیڑھ 2 لاکھ مقدمات کی انکوائری چاہتی ہے ۔ پاناما پیپرز کی حمودالرحمان اور ایبٹ آباد کمیشن جیسی تحقیقات نہیں چاہتے اس میں مالیاتی جرم کیا گیا ہے جس میں پاکستان کا سرمایہ خفیہطریقے سے باہر بھیجا گیا جس کی تحقیقات کیلئے خصوصی قانون سازی کی جائے ایسا قانون ایسا ضابطہ ہوجس میں سب کی تحقیقات یکساں ہو ں اور وزیر اعظم کا کوئی امتیازنہ ہو۔سینیٹر اعتزاز احسن کا اپنے مطالبات پیش کرتے ہوئے کہنا تھا کہ وزیر اعظم پرالزام ہے وہ مجرم ثابت نہیں ہوئے تحقیقات کا آغاز وزیراعظم اور ا ن کے خاندان سے ہو۔جس کا نام پاناماپیپرز میں آیا اس کے خاندان کے افراد کی تحقیقات ہونی ہے۔ جس کا نام پاناما میں آیا ہے اس کے قریبی رشتے داروں کے مختارنامے لیے جائیں اور مختارناموں کے ذریعے ان افراد کے بینک اکاونٹس تک رسائی حاصل ہونی چاہیے۔
انہوں نے کہا کہ پاناما پیپرز میں جس کسی کا نام آیا ہے وہ ایک شخص کو وکالت نامہ دے اور مخصوص قانون میں مطلوبہ شخص اور اس کے خاندان کے مختار نامے لیے جائیں ۔ فرانزک ایڈیٹر کو بینک اکاو¿نٹس تک رسائی دی جائے ۔ بینک اکاو¿نٹ سے رقم منتقل کرنے کا وکالت نامہ دیا جائے ۔ جس شخص سے تحقیقات کی جائیں وہ بتائے کہ اس نے اربوں روپے کے اثاثے کیسے بنائے ہیں۔
اعتزاز احسن کا کہنا تھا کہ وزیراعظم کے صاحبزادے حسین نوازنے انکشاف کیا کہ لندن میں ان کی اربوں روپے کی پراپرٹی ہے وجہ نہیں پتا کہ وزیر اعظم کے صاحبزادے نے انکشاف کیوں کیا۔ ہم نے 3 مئی کو اپنے 15 ٹی او آرز پیش کیے لیکن اس کے مقابلے میں حکومت نے اپنے ٹی او آرز پیش کیے اپوزیشن نے حکومت کے 4 ٹی او آرز میں سے 3 مان لیے اور 24 اپریل کو حکومت نے سپریم کورٹ کو خط لکھا جو سپریم کورٹ نے واپس کردیا اور حکومتی ٹی او آرز کو مسترد کردیا۔ وزیر اعظم نے 16 مئی کو اسمبلی میں خطاب کیا اور 17 مئی کو بارہ رکنی ٹی او آر کمیٹی بنی لیکن حکومت کی جانب سے پاناما پیپرز کی تحقیقات میں دلچسپی کا مظاہرہ نہیں کیا جارہا۔

این اے 110 انتخابی عذرداری کیس کی سپریم کورٹ میں سماعت

اسلام آباد  سپریم کورٹ میں آج این اے 110 انتخابی عذرداری کیس کی سماعت ہوئی۔ چیف جسٹس انور ظہیر جمالی کی سربراہی میں تین رکنی بنچ نے سماعت کی۔ دوران سماعت الیکشن کمیشن کے حکام نے کہا کہ 26 پولنگ سٹیشنز کا ریکارڈ مل گیا ہے صرف تین کا رہ گیا ہے۔عدالت میں سماعت کے دوران وفاقی وزیر دفاع کے وکیل اور چیف جسٹس آف پاکستان کے درمیان دلچسپ مکالمہ بھی ہوا۔خواجہ آصف کے وکیل نے ایک موقع پر کہا کہ ہم خود اس معاملے کو ختم کرنا چاہتے ہیں تاکہ کسی تکلیف نہ ہو جس پر چیف جسٹس نے ریمارکس دیے کہ آپ کا موکل تو عہدے کا مزہ لوٹ رہا ہے، تکلیف تو مخالف امیدوار کو ہے۔خواجہ آصف کے وکیل نے کہا کہ اس کیس کے معاملے پر میڈیا میں بہت کیچڑ اچھالی جارہی ہے جس پر چیف جسٹس نے کہا میڈیا ٹرائل تو آرڈر آف دی ڈے ہے، کسی کو استثناءنہیں۔بعدازاں عدالت نے الیکشن کمیشن کو ہدایت کی کہ جیسے ہی مزید تین پولنگ اسٹیشنز کا انتخابی مواد ملے فوراً نادرا کو بھجوا دیا جائے۔ کیس کی سماعت جولائی کے چوتھے ہفتے تک ملتوی کر دی گئی

Google Analytics Alternative