انٹر ٹینمنٹ

ماہرہ خان انسٹاگرام پر 5 ملین فالوورز کے ساتھ پہلی پاکستانی اداکارہ بن گئیں

کراچی: عالمی شہرت یافتہ اداکارہ ماہرہ خان پہلی پاکستانی اداکارہ بن گئیں جنہیں انسٹاگرام پر 5 ملین لوگوں نے  فالو کیا۔

سوشل میڈیا موجودہ دور میں ایک دوسرے سے رابطے میں رہنے کا سب سے طاقتور میڈیم ہے جس کے ذریعے نا صرف پرستار اپنے پسندیدہ اسٹارز سے متعلق ہر بات سے باخبر رہتے ہیں بلکہ شوبز اسٹارز بھی سوشل میڈیا کے ذریعے اپنے چاہنے والوں سے براہ راست رابطے میں رہتے ہیں۔

سوشل میڈیا کی دنیا میں فیس بک اور ٹوئٹر کی اپنی اہمیت ہے لیکن تصاویر شیئر کرنے والی ایپ ’’انسٹاگرام‘‘نے اس پلیٹ فارم پر جس تیزی سے اپنی جگہ بنائی ہے وہ قابل تعریف ہے۔ انسٹاگرام کے ذریعے عام افراد کے ساتھ شوبز اسٹارز بھی تصاویر اور مختصر دورانیے کی ویڈیوز شیئر کرکے لوگوں کو اپنی روزمرہ کی سرگرمیوں سے آگاہ رکھتے ہیں۔ یہی وجہ ہے کہ دیگر سوشل میڈیا اکاؤنٹس کی طرح انسٹاگرام پر بھی پاکستانی اداکاراؤں کے فالوورز کی تعداد لاکھوں میں ہے۔

انسٹاگرام پر ویسے تو فنکاروں کو لاکھوں کی تعداد میں لوگ فالو کرتے ہیں لیکن ماہرہ خان نے تمام فنکاروں کو پیچھے چھوڑدیا۔ انسٹاگرام پر ماہرہ خان کے فالوورز کی تعداد 5 ملین(50 لاکھ)ہوگئی ہےاور ماہرہ خان وہ پہلی پاکستانی اداکارہ بن گئی ہیں جنہیں انسٹاگرام پر 5 ملین لوگ فالو کرتے ہیں۔

اس موقع پر ماہرہ خان کی ایک ویڈیو سوشل میڈیا پر وائرل ہورہی ہے جس میں وہ 50 لاکھ فالوورز ہونے پر جشن مناتی نظر آرہی ہیں اس کے ساتھ ہی وہ انسٹاگرام پر شیئر کی گئی ایک تصویر کے بارے میں بتارہی ہیں جسے لوگوں نے بہت بڑی تعداد میں لائک کیا اوراس پر تبصرے کیے۔

یہ تصویر دراصل ترکی میں ماہرہ خان کے ایک دوست کی شادی تھی ۔لوگوں کو اس تصویر سے متعلق غلط فہمی ہوگئی تھی اور لوگ سمجھ بیٹھے تھے کہ یہ ماہرہ خان کی دوست کی شادی کی نہیں بلکہ خود ماہرہ خان کی منگنی کی تصویر ہے۔ اس تصویر کے بارے میں ماہرہ خان نےمزاحیہ انداز میں بات کرتے ہوئے کہاکہ مجھے اپنے دوست کے لیے بہت برا لگا کیونکہ اس بیچارے نے ترکی میں منعقد کی جانے والی تقریب اور اس میں شرکت کرنے والے تمام مہمانوں کا خرچہ اٹھایا تھا اور لوگ سمجھ بیٹھے کہ یہ میری شادی کی تقریب ہے ۔تاہم اس تصویر پر آنے والے تبصرے پڑھ کر مجھے بہت ہنسی آئی۔

اگر دیگر فنکاراؤں کی بات کی جائے تو اداکارہ ایمن خان اور ماورا حسین کو انسٹاگرام پر4.7 ملین لوگ فالوکرتے ہیں۔ سجل علی کے فالوورز کی تعداد4.2 ملین ہے۔ عروہ حسین کے 3.2 ملین، مومنہ مستحسن کے 2.9، مہوش حیات اور نیلم منیر کے 2.8 ملین، صبا قمر کے 2.2 ملین، ارمینا خان کے1.7ملین، صنم بلوچ کے 1.4 ملین، وینا ملک اور اداکارہ میرا کے ایک لاکھ سے زائد فالوورز ہیں۔

امیتابھ بچن کو طبیعت بگڑنے پر اسپتال منتقل کردیا گیا

ممبئی: بالی ووڈ کے بے تاج بادشاہ اور شہرہ آفاق اداکار امیتابھ بچن کی طبیعت بگڑ گئی ہے جس کے باعث انہیں اسپتال منتقل کیا گیا ہے۔

بھارتی میڈیا کے مطابق جگر کے عارضے میں مبتلا معروف اداکار امیتابھ بچن کو خرابی صحت کے باعث نانا وتی اسپتال میں داخل کیا گیا ہے جہاں اُن کے لیے ایک مخصوص کمرہ تیار کیا گیا ہے جس میں انتہائی نگہداشت کی تمام سہولیات موجود ہیں۔

اسپتال کےکمرے میں اہل خانہ کے علاوہ کسی کو جانے کی اجازت نہیں دی جارہی ہے جب کہ خاندانی ذرائع بھی امیتابھ بچن کی بیماری کے حوالے سے چپ سادھے ہوئے ہیں۔ ٹویٹر پر ہمہ وقت موجود رہنے والے امیتابھ بچن نے 5 دن میں صرف 6 ٹویٹس کی ہیں۔

جواں عزم  امیتابھ بچن  ٹی بی اور ہیپاٹائٹس بی کو شکست دے چکے ہیں۔ اُن کا جگر صرف 25 فیصد کام کر رہا ہے لیکن اس کے باوجود وہ ایک بھرپور اور متحرک زندگی گزار رہے ہیں۔ امیتابھ بچن کو ہیپاٹائٹس بی کا مرض 1983 میں ایک بوتل خون کی منتقلی کے دوران لاحق ہوا تھا۔

واضح رہے کہ فلم قلی کے ایک فائٹنگ سین میں پیٹ میں چوٹ لگنے سے امیتابھ بچن شدید زخمی ہوگئے تھے جس پر انہیں اسپتال لے جایا گیا جہاں انہیں ایک بوتل خون کی ضرورت پڑی۔ بدقسمتی سے وہ خون آلودہ تھا اور اس میں ہیپاٹائٹس کے جراثیم تھے جو ان کے جسم میں منتقل ہوگئے۔

 

جارج کلونی کی سالی کو 3 ہفتوں کیلئے قید کی سزا

معروف ہولی وڈ اداکار جارج کلونی کی اہلیہ قانون دان اور انسانی حقوق کی کارکن امل کلونی کی بہن تالا علم الدين کو 3 ہفتے کیلئے قید کی سزا سنائی گئی تھی۔

ڈیلی میل کی رپورٹ کے مطابق تالا علم الدين پر الزام ہے کہ وہ سنگاپور میں نشے کی حالت میں گاڑی چلا رہی تھیں جبکہ اس دوران ان کے پاس سنگاپور کا ڈرائیونگ لائسنس بھی نہیں تھا۔

47 سالہ تالا کو اس جرم میں 3 ہفتے کی قید کی سزا سنائی گئی ہے۔

رپورٹ کے مطابق تالا علم الدین کو 3640 پاؤنڈ (7 لاکھ 32 ہزار 457 پاکستانی روپے) جرمانہ بھی ادا کرنے کا حکم دیا گیا ہے جبکہ جیل سے رہائی کے بعد چار سال تک ڈرائیونگ کرنے پر بھی پابندی عائد کردی گئی۔

تالا علم الدین سنگاپور میں گرفتاری سے قبل اپنے شوہر کی بی ایم ڈبلیو ایکس ایس گاڑی چلا رہی تھی، جس کے باعث ان کے شوہر کے خلاف بھی کارروائی کی جاسکتی ہے۔

امل کلونی کی بہن سنگاپور کے ایک ریسٹورنٹ میں اپنی دوست کے ہمراہ شراب نوشی کررہی تھی، جس کے بعد رات کے 2 بجے وہ اپنی دوست کو گھر چھوڑنے کے لیے گاڑی چلا رہی تھی جس کے بعد پولیس نے انہیں روک کر گرفتار کیا۔

پولیس کے مطابق تالا کی سانس کا ٹیسٹ لیا گیا تو پتا چلا کہ وہ نشے کی حالت میں گاڑی ڈرائیو کررہی تھی۔

واضح رہے کہ امل کلونی کی بہن تالا شادی کے بعد نیویارک سے سنگاپور منتقل ہوئیں تھی، ان کا اپنا فیشن برینڈ ‘ٹوٹلی تالا’ سنگاپور میں کافی معروف ہے۔

رپورٹس کے مطابق 2013 میں بھی انہیں سنگاپور میں نشے کی حالت میں گاڑی چلانے پر سزا مل چکی ہے۔

شمون کی فلم ’دُرج‘ کو نمائش کی اجازت مل گئی

مرکزی سینسر بورڈ نے اداکار  و ہدایت کار شمعون عباسی کی فلم ’دُرج‘ کو ری ویو کے بعد پاس کر دیا۔

آدم خور انسانوں کی کہانی پر مبنی فلم ’دُرج‘ کو شمعون عباسی اور پروڈکشن ٹیم نے حقیقی رنگ دینے کے لیے کئی ماہ ریسرچ کی اور انہوں نے کافی وقت دنیا سے الگ تھلگ غاروں میں رہنے والے انسانوں کے ساتھ گزارا تاکہ اِن کے طرز زندگی کو صحیح روپ میں دکھا سکیں۔

فلم کی نمائش 18 اکتوبر کو ہونا تھی مگر گزشتہ دنوں مرکزی و صوبائی سینسرز بورڈز کی جانب فلم کو روک دیا گیا۔

سینسر بورڈز کی جانب سے پابندی کی کوئی باضابطہ وجہ نہیں بتائی گئی تاہم رپورٹس کے مطابق بورڈز کو فلم میں خوفناک مناظر اور مکالموں پر اعتراض تھا۔

فلم ’دُرج‘ پر پابندی کے فیصلے کو سوشل میڈیا پر بھی تنقید کا سامنا کرنا پڑا جب کہ کئی اداکاروں نے اسے بھی آڑے ہاتھوں لیا تھا۔

تاہم، اب فلم کو مرکزی سینسر بورڈ نے نمائش کی اجازت دے دی ہے۔

سینسر بورڈ کی جانب سے فلم کے ری ویو پر اسے پاس کیا گیا ہے جس کے بعد پاکستان میں فلم کی نمائش کی نئی تاریخ کا اعلان جلد کیا جائے گا۔

یاد رہے کہ پاکستان کے علاوہ فلم ’دُرج‘ 11 اکتوبر سے انٹرنیشنل سطح پر کئی سنیما گھروں میں ریلیز کی جا چکی ہے۔

حمزہ علی عباسی کے ہم شکل کی سوشل میڈیا پردھوم

کراچی: نامورپاکستانی اداکارو میزبان حمزہ علی عباسی کے ہم شکل نے سوشل میڈیا پردھوم مچادی ہے اورلوگ دونوں میں بے انتہا مشابہت دیکھ کر حیرت زدہ رہ گئے ہیں۔

میانوالی سے تعلق رکھنے والے یاسرعمار نامی شخص کی حمزہ علی عباسی سے حیرت انگیزمشابہت نے لوگوں کو دنگ کردیا ہے۔

یاسر عمار کی نہ صرف شکل حمزہ علی عباسی سے ملتی ہے بلکہ ان کی آواز اوران کے بات کرنے کا انداز بھی بالکل حمزہ علی عباسی جیسا ہے۔

یاسرعمار نے سوشل میڈیا پر اپنی تصاویر شیئر کی ہیں جن میں وہ بالکل حمزہ علی عباسی کی کاپی نظر آرہے ہیں۔

یاسر عمار 9 مارچ کو میانوالی میں پیدا ہوئے تھے اور حمزہ علی عباسی کی ہی طرح اداکاری کے پیشے سے وابستہ ہیں۔ وہ ہم ٹی وی کے ڈرامے’’لوگ کیا کہیں گے‘‘ میں اداکاری کے جوہردکھا چکے ہیں۔

جینیفر آنسٹن نے انسٹاگرام پر 5 گھنٹوں میں 1 ملین فالوورز کے ساتھ ریکارڈ بنالیا

لاس اینجلس:نامور ہالی ووڈ اداکارہ جینیفر آنسٹن نے انسٹاگرام پر 5 گھنٹوں میں ایک ملین فالوورز بنا کر گنیز ورلڈ ریکارڈ بنالیا۔

50 سالہ اداکارہ جینیفر آنسٹن اب تک سوشل میڈیا کے اہم ترین پلیٹ فارم انسٹاگرام سے دور تھیں تاہم انہوں نے منگل کے روز انسٹاگرام پر اکاؤنٹ بنایا اور دیکھتے ہی دیکھتے محض 5 گھنٹوں کے اندر ان کے فالوورز کی تعداد ایک ملین (10 لاکھ) ہوگئی۔

اس سے قبل انسٹاگرام پر سب سے جلدی فالوورز بنانے کا ریکارڈ  شہزادہ ہیری اور ان کی اہلیہ میگھن مارکل کے پاس تھا۔ شہزادہ ہیری اور میگھن مارکل نے اپریل میں انسٹاگرام پر اکاؤنٹ بنایا تھا اور اکاؤنٹ بنانے کے محض 5 گھنٹے 45 منٹ کے اندر ان کے فالوورز کی تعداد ایک ملین ہوگئی تھی۔

تاہم جینیفر آنسٹن نے منگل کے روز یہ ریکارڈ اس وقت توڑ ڈالا جب 5 گھنٹے 16 منٹ میں ان کو فالو کرنے والے لوگوں کی تعداد ایک ملین ہوگئی۔ شہزادہ ہیری اور میگھن مارکل کاریکارڈ توڑنے کے بعد جینیفر نے ایک ویڈیو انسٹاگرام پر شیئر کی جس میں وہ اپنا موبائل توڑتے ہوئے نظر آرہی ہیں۔

اس ویڈیو کے ساتھ انہوں نے نہایت معصومانہ انداز میں لکھا ’’یقین کریں میں یہ توڑنا نہیں چاہتی تھی۔‘‘ اس پیغام کے ساتھ انہوں نے تمام لوگوں کا شکریہ اداکیا جنہوں نے انہیں انسٹاگرام پر خوش آمدید کہاتھا۔

واضح رہے کہ محض 3 دنوں کے اندر جینیفر آنسٹن کے فالوورز کی تعداد 13 ملین سے زائد ہوگئی ہے اور دلچسپ بات یہ ہے کہ انہوں نے اپنے اکاؤنٹ میں صرف 3 پوسٹیں شیئر کی ہیں۔

پاکستانی اداکاراؤں کوکیٹ مڈلٹن سے کپڑے پہننا سیکھنا چاہیئے؛ سوشل میڈیا پرنئی بحث

شاہی جوڑے کی پاکستان آمد اوربرطانوی شہزادی کے پاکستانی لباس کی میڈیا پربے حد تعریف کی جارہی ہے تاہم کیٹ مڈلٹن کے مشرقی لباس نے سوشل میڈیا پر نئی بحث کا آغازکردیا ہے۔ صارفین کیٹ مڈلٹن کے لباس اورپاکستانی اداکاراؤں کے لباس کا موازنہ کرتے ہوئے کہہ رہے ہیں کہ ہماری اداکاراؤں کوبرطانوی شہزادی سے لباس پہننے کا طریقہ سیکھنا چاہیئے۔

دلوں کی ملکہ لیڈی ڈیانا کے بیٹے شہزادہ ولیم اپنی اہلیہ ڈچز آف کیمبرج کیٹ مڈلٹن کے ہمراہ تین روز قبل پاکستان پہنچے۔ برسوں بعد لیڈی ڈیانا کے بیٹے اوربہوکی پاکستان آمد کے باعث پورا ملک خوش دکھائی دیا اورلوگوں نے نہایت خوشدلی سے شاہی جوڑے کا استقبال کیا۔

اس موقع پر کیٹ مڈلٹن کے اندازاوران کے پُروقار لباس نے بھی پاکستانی عوام کے دل جیت لیے اور گزشتہ 3 روز سے سوشل میڈیا پرکیٹ مڈلٹن کے پاکستانی لباس ہی چھائے ہوئے ہیں۔

کیٹ مڈلٹن جب سے پاکستان آئی ہیں انہوں نے صرف مشرقی طرزکے لباس ہی زیب تن کیے ہیں اور بلاشبہ وہ ہر لباس میں بے انتہا خوبصورت دکھائی دی ہیں۔

تاہم کیٹ مڈلٹن کے مشرقی اندازکے لباس کی جہاں تعریف کی جارہی ہے وہیں ان کے انداز نے سوشل میڈیا پر نئی بحث کا آغاز کردیا ہے اور لوگ برطانوی شہزادی کے لباس کا موازنہ پاکستانی اداکاراؤں کے لباس سے کرتے ہوئے کہہ رہے ہیں کہ ہماری اداکاراؤں کو شہزادی سے لباس پہننا سیکھنا چاہیئے۔

زاہد جمال نامی صارف نے سوشل میڈیا پر کیٹ مڈلٹن کی شلوارقمیض اور مشرقی انداز کے لباس میں ملبوس تصویر کے ساتھ ماہرہ خان کی مغربی انداز کے لباس میں تصویر شیئرکی ۔ ماہرہ تصویر میں سفید رنگ کی مختصر فراخ پہنے ہوئے ہیں جب کہ اس لباس میں ان کا تقریباً آدھا جسم واضح ہورہا ہے۔ اس تصویرکے ساتھ زاہد جمال نے پیغام دیتے ہوئے لکھا صرف ایک ڈوپٹہ یاچادر کسی بھی خاتون کو پُروقار بنادیتا ہے۔

طلحہ عباسی نامی صارف نے کیٹ مڈلٹن کی پاکستان میں پہنے جانے والے لباس کی تصاویر کے ساتھ مہوش حیات کی تصاویر شیئر کیں جن میں مہوش حیات ڈانس ریہرسل کے دوران مختصر لباس پہنے نظر آرہی ہیں۔ تصویر کے ساتھ درج پیغام میں لکھا نظر آرہا ہے ایک برطانوی خاتون ہماری ثقافت کا احترام کرتے ہوئے۔

شعیب رحمان نامی صارف نے کیٹ مڈلٹن، شہزادہ ولیم ، لیڈی ڈیانا اور جمائما خان کی تصاویرشیئر کیں ان تصاویر میں یہ تمام خواتین شلوار قمیض اور ڈوپٹے میں نظر آرہی ہیں جب کہ دوسری طرف ماہرہ خان اور ریحام خان کی مغربی لباس میں تصاویر نظر آرہی ہیں۔ شعیب نے لکھا فرق دیکھیں جب غیر ملکی خواتین پاکستانی آتی ہیں اورجب پاکستانی خواتین دوسرے ممالک میں جاتی ہیں

محمد رضوان خان نامی صارف نے کیٹ مڈلٹن اورشہزادہ ولیم کی تصویر کے ساتھ یاسرحسین اور اقرا عزیز کی  امریکا میں لی گئی تصویرشیئر کی، جس میں اقرا مختصر فراخ پہنے ہوئی ہیں اور یاسر حسین بھی شارٹس میں نظر آرہے ہیں۔

سوشل میڈیا پرچل رہی اس بحث پراداکارہ منشا پاشا خود کو روک نہیں پائیں اور انہوں نے کیٹ مڈلٹن کا موازنہ پاکستانی اداکاراؤں سے کرنے پرسوشل میڈیا صارفین کو آڑے ہاتھوں لیتے ہوئے کہا مجھے کیٹ مڈلٹن کو پاکستانی کپڑوں میں دیکھ کر بہت اچھا لگ رہا ہے لیکن یہ پڑھ کرکوفت ہورہی ہے کہ ’’پاکستانی اداکاراؤں کو کیٹ مڈلٹن سے کپڑے پہننا سیکھنا چاہیئے‘‘۔ کسی گورے سے احساس کمتری میں مبتلا ہونے کا یہ مطلب نہیں کہ آپ پاکستانی اداکاراؤں پرتنقید شروع کردیں۔ کیٹ مڈلٹن کا تعلق شاہی خاندان سے ہے اور ان کے لباس ان کے پروٹوکول کا حصہ ہیں۔

‘ایک حادثے نے میری زندگی بدل دی’

پاکستانی شوبز انڈسٹری کی نامور فنکارہ عائشہ عمر کا کہنا ہے کہ ایک حادثے نے میری زندگی بدل دی۔

عائشہ عمر نے بتایا کہ ان کی کچھ مجبوریاں ہیں جن کی وجہ سےوہ بہت زیادہ فلموں اور ڈراموں میں کام نہیں کرسکتیں۔

عائشہ عمر کا کہنا ہے کہ ابھی بھی ایکسیڈنٹ کے کچھ زخم باقی ہیں، انہیں ایکسیڈنٹ سے قبل بالکل نہیں معلوم تھا کہ بے چینی کیا ہوتی ہے، وہ لوگوں سے سنتی تھیں تو عجیب لگتا تھا لیکن جب خود پر گزری تو بے چینی کا مطلب سمجھ میں آ یا۔

ایک سوال کے جواب میں عائشہ عمر نے اپنے کچھ فیصلوں میں غلطی کا بھی اعتراف کیا اور کہا کہ انہوں نے دو تین فلمیں چھوڑ دیں تھیں، جس کا انہیں افسوس ہے ۔ عائشہ عمر کے مطابق ان کی ایک فلم ’رہبرا‘ بدقسمتی سے مکمل نہیں ہو سکی تھی، لیکن اب اس فلم کی شوٹنگ شروع ہورہی ہے۔

فلم ’رہبرا‘ سے متعلق ان کا مزید کہنا تھا کہ اس میں ان کا کردار بہت دلچسپ ہے۔

عائشہ عمر نے ایک سوال کے جواب میں کہا کہ وہ اداکاری، گلوکاری ،ماڈلنگ اور کمپیئرنگ سب کام کرتی ہیں۔ “جب بہت باتیں کرنے کو دل چاہتا ہے تو کمپیئرنگ کرنے لگتی ہوں اور جب موسیقی کے رنگ بکھیرنے کو جی چاہتا ہے تو گانا شروع کر دیتی ہوں،لیکن اب میری ساری توجہ فلموں اور ڈراموں پر ہوگی۔”

عائشہ عمر کی حال ہی میں مصر میں ایک ایونٹ کے دوران تصاویر کی وجہ سے انہیں سوشل میڈیا پر بھی شدید تنقید کا نشانہ بنایا گیا۔

عائشہ عمر نے اپنی تصویروں پر کی جانے والی تنقید پر ردعمل دیتے ہوئے کہا کہ ” حسد کرنے والے مجھ سے بہتر پیار کرتے ہیں، جیلیسی میں بھی پیار چھپا ہوتا ہے، میں اس کو بھی انجوائے کرتی ہوں۔”

Google Analytics Alternative