انٹر ٹینمنٹ

پاکستان میں پرفارمنس، سلمان خان نے میکا سنگھ کے ساتھ امریکی کنسرٹ منسوخ کردیا

 

پاکستان میں گلوکاری کی پرفارمنس کے بعد بالی ووڈ کے سلطان سلمان خان نے بھی ہندو انتہا پسندوں کے نقش قدم پر چلتے ہوئے میکا سنگھ کے ساتھ امریکا میں ہونے والا کنسرٹ منسوخ کردیا۔

کشمیر میں جاری بھارتی جارحیت اور ظلم کے خلاف جہاں ساری دنیا مذمت کر رہی ہے وہیں مودی سرکار کی تشدد پسندانہ حکمت عملی کے خلاف بالی ووڈ فنکار بھی خاموش تماشائی بنے ہوئے ہیں۔ بھارتی فلم انڈسٹری کے کنگ سمجھے جانے والے اداکار شاہ رخ خان کی پاکستان اور مسلم مخالف فلم بنائے جانے کے بعد اب سلمان خان بھی انتہا پسندانہ سوچ کے ساتھ میدان میں آگئے۔

ہر سال کی طرح سلمان خان کا رواں سال امریکا کے مختلف شہروں میں 25 اگست سے دورہ طے تھا جہاں ان کے ساتھ میکا سنگھ کو بھی پرفارم کرنا تھا لیکن سلمان خان نے پاکستان میں پرفارمنس کی وجہ سے میکا سنگھ کے ساتھ ہونے والا ایونٹ منسوخ کردیا۔

دوسری جانب فیڈریشن آف ویسٹرن انڈیا سینما ایمپلائز (ایف ڈبلیو آئی سی ای) نامی تنظیم نے میکا سنگھ پر بھارت بھر میں پابند عائد کردی تھی اور اس تنظیم نے سلمان خان کے امریکی ایونٹ کے تناظر یہ بھی کہا تھا کہ اگر کوئی فنکار میکا سنگھ کے ساتھ کام کرے گا تو اسے بھی پابندی کا سامنا کرنا پڑے گا۔

سلمان خان کے قریبی ذرائع نے ایونٹ کی منسوخی کی تصدیق کرتے ہوئے کہا کہ سلمان خان کے لیے ضروری ہوگیا ہے کہ وہ میکا سنگھ سے اپنا فاصلہ بر قرار رکھیں کیوں کہ انہوں نے دونوں ملکوں کے درمیان جاری کشیدہ صورتحال کے باوجود پاکستان میں جا کر پرفارم کیا تھا۔

ترجمان پاک فوج کا پاکستان مخالف فلم بنانے پر شاہ رخ خان کو کرارا جواب

پاکستان مخالف نیٹ فلیکس ویب سیریز بنانے اورمسلمان وپاکستانیوں کو دہشتگرد دکھانے پر ترجمان پاک فوج میجر جنرل آصف غفور نے شاہ رخ خان کو آئینہ دکھاتے ہوئے کرارا جواب دیا ہے۔

گزشتہ روز بالی ووڈ اداکار شاہ رخ خان نے ٹوئٹر پر آن لائن اسٹریمنگ کمپنی نیٹ فلیکس کے لیے بنائی گئی ویب سیریز’’بارڈ آف بلڈ‘‘ کا ٹریلر جاری کیاتھا۔ اس سیریز کی کہانی بھارتی خفیہ ایجنسی ’’را‘‘ کے ایجنٹ کے گرد گھومتی ہےجسے پاکستان میں خفیہ مشن کے لیے بھیجا گیا ہے۔ یہ کردار بالی ووڈ اداکار عمران ہاشمی نے ادا کیا ہے جسے اپنے مزید ایجنٹوں کو پاکستان سے چھڑانے کی ذمہ داری دی جاتی ہے۔

ٹریلر میں پاکستان کو دہشت گرد اور فساد پرپا کرنے والا دکھایا گیا ہے۔ شاہ رخ خان کو پاکستان مخالف ویب سیریز بنانے پر جہاں پاکستانیوں کی جانب سے تنقید کا نشانہ بنایا جارہاہے وہیں پاک فوج کے ترجمان میجر جنرل آصف غفور نے اپنے ذاتی ٹوئٹر اکاؤنٹ پر شاہ رخ خان کو پاکستان اورمسلمان مخالف سیریز پروڈیوس کرنے پر حقیقت سے روشناس کراتے اور آئینہ دکھاتے ہوئے کہا ہے کہ ’’شاہ رخ خان آپ بالی ووڈ کے مرض میں مبتلا ہیں۔ جب کہ حقیقت میں ’’را‘‘ کے ایجنٹ جاسوس کلبھوشن جادھو، ونگ کمانڈر ابھی نندن اور 27 فروری 2019 کو پاکستان کی جانب سے بھارت کو دیا جانے والا منہ توڑ جواب دیکھیں۔

ترجمان پاک فوج نے شاہ رخ خان کو مخاطب کرتے ہوئے کہا کہ آپ مقبوضہ کشمیر میں ہونے والے مظالم اور ہندو توا اور آر ایس ایس کے نازی ازم کے جنون کے خلاف آواز اٹھاکر امن اورانسانیت کو فروغ دے سکتے تھے۔‘‘

واضح رہے کہ نیٹ فلیکس کے لیے بنائی گئی یہ ویب سیریز بھارتی ناول نگار بلال صدیقی کی کتاب پر مبنی ہے۔ ٹریلر میں دکھائی گئی کہانی کے مطابق بلوچستان میں چند بھارتی جاسوس بھارت کو اہم معلومات بھجوائے جانے سے قبل ہی پکڑے جاتے ہیں۔ جنہیں چھڑانے کے لیے ایک اور بھارتی جاسوس کبیر آنند(عمران ہاشمی)کو پاکستان بھیجا جاتا ہے

پریانکا چوپڑا کیخلاف مذمتی قرارداد پنجاب اسمبلی میں جمع

اداکارہ پریانکا چوپڑا سے امن کی سفیر کا عہدہ واپس نہ لینے کیخلاف مذمتی قرارداد پنجاب اسمبلی سیکرٹریٹ میں جمع کرا دی گئی۔ 

اقوام متحدہ کی جانب سے پریانکا چوپڑاسے امن کی سفیر کا عہدہ واپس نہ لینے کیخلاف مذمتی قرارداد پنجاب اسمبلی سیکرٹریٹ میں جمع کرا دی گئی۔

مسلم لیگ (ن)کی رکن سمیر اکومل کی جانب سے جمع کرائی گئی قرارداد کے متن میں کہا گیا ہے کہ دو ایٹمی ممالک کے درمیان نفرت اور جنگ کی حمایت کرنے پر پریانکا چوپڑا امن کی سفیر کا عہدہ رکھنے کی اہلیت کھو چکی ہیں۔ مطالبہ ہے کہ اقوام متحدہ پریانکا چوپڑا کے حوالے سے اپنے فیصلے پر نظرثانی کرے۔

پہلی پاکستانی نژاد سپر ہیرو مارول یونیورس کا حصہ

مارول اسٹوڈیوز نے پہلی پاکستانی نژاد امریکی مسلم کمالہ خان کو بطور سپرہیرو مس مارول اپنے سنیما یونیورس کا حصہ بنانے کا اعلان کیا ہے۔

مارول کے سربراہ کیون فیج نے ڈزنی کی ڈی 23 ایکسپو میں اس بات کا اعلان کیا۔

ہول یوڈ رپورٹرز کے مطابق مس مارول ٹی وی سیریز ڈزنی کے نومبر میں پیش کی جانے والی اسٹریمنگ سروس ڈزنی پلس کا حصہ ہوگی، یہ سروس مختلف ممالک میں 12 نومبر کو متعارف کرائی جارہی ہے۔

مارول سنیما یونیورس کے مختلف کرداروں پر بھی اس اسٹریمنگ سروسز پر الگ الگ سیریز دکھائی جائیں گی جو کہ مارول سنیما یونیورس کی کہانیوں کا متبادل ورژن ہوگا۔

کمالہ خان کا کردار مارول کامکس میں سب سے پہلے 2013 میں متعارف کرایا گیا تھا جو ایک پاکستانی نژاد امریکی سپرہیرو مس مارول کا روپ دھارتی ہے۔

اس سے پہلے کیرول ڈینورس کو کامکس میں مس مارول کے طور پر جانا جاتا تھا مگر جب اس کردار کو کیپٹن مارول کا نام دیا گیا تو کمالہ خان نے خود کو مس مارول کا خطاب دیا۔

یعنی اس کردار کو ’مارول کومکس‘ کے کردار ’کیپٹن مارول‘ سے متاثر ہوکر بنایا گیا تھا، یہ مارول کا پہلا مسلم خاتون کا کردار تھا، جس نے دنیا بھر میں شہرت حاصل کی۔

اس کردار کی تخلیق کار پاکستانی نژاد امریکی لکھاری و کومکس ایڈیٹر ثنا امانت ہیں، جو گزشتہ کئی سال سے مارول کومکس میں بطور ایڈیٹر خدمات سر انجام دے رہی ہیں۔

ثنا امانت بھی امریکی ریاست نیو جرسی میں رہتی ہیں اور کردار کو دیکھ کر ایسا لگتا ہے کہ انہوں نے یہ کردار اپنی ذات سے متاثر ہوکر بنایا۔

کیون فیج کا ڈزنی اینوٹ میں کہا تھا ‘آپ مس مارول سے ڈزنی پلس سیریز میں ملیں گے اور پھر اسے ہماری فلموں میں بھی دیکھ سکیں گے، یہ ہمارے لیے بہت زیادہ پرجوش کردینے والا ہے’۔

فوٹو بشکریہ مارول کامکس
فوٹو بشکریہ مارول کامکس

مس مارول پراجیکٹ کی ہدایات بیشا کے علی کے ذمے ہوگی، تاہم اس کی کاسٹ اور اسٹریمنگ کی تاریخ کا فی الحال کوئی اعلان نہیں کیا گیا۔

گزشتہ سال ایک انٹرویو میں کیون فیج نے کہا تھا مس مارول کو مارول سینما یونیورس کا حصہ بنانے پر کام ہورہا ہے۔

انہوں نے کہا ‘ہم اس وقت کیپٹن مارول پر کام کررہے ہیں، مس مارول کامک بکس کا ایک اور کردار ہے، ایک مسلم ہیرو جو کیپٹن مارول سے متاثر ہے، اس پر بھی کام کیا جائے گا، ہم نے اسے بھی متعارف کرانے کی منصوبہ بندی کررکھی ہے، جس کی باری کیپٹن مارول کے بعد آئے گی’۔

یہ تو واضح نہیں کہ یہ کردار کس کے حصے میں آئے گا مگر ممکنہ طور پر وہ ایشیائی نژاد اداکارہ ہوگی۔

خیال رہے کہ مارول کومکس کے سنیما یونیورس میں اب تک ’اسپائیڈر مین، تھور، ہلک، آئرن مین، کیپٹن امریکا، بلیک پینتھر، بلیک ویڈو، ایکس مین، گارڈین آف دی گلیکسی، ڈاکٹر اسٹرینج اور تھونس سمیت کئی اہم سپر ہیروز اور ولن کے کردار متعارف کرائے جا چکے ہیں۔

حمزہ علی عباسی اور نیمل خاور شادی کے بندھن میں بندھ گئے

ادکارہ حمزہ علی عباسی اور نیمل خاور شادی کے بندھن میں بندھ گئے۔

دونوں کا نکاح 25 اگست کو ایک سادہ تقریب میں ہوا۔

اس تقریب کی تصاویر فوٹوگرافر ماہا وجاہت خان نے شیئر کیں جو سوشل میڈیا پر گردش کررہی ہیں۔

خیال رہے کہ رواں ہفتے سوشل میڈیا پر یہ بات سامنے آئی تھی کہ حمزہ علی عباسی نیمل خاور کے ساتھ شادی کرنے والے ہیں، جس کے بعد اداکار نے خود سوشل میڈیا پوسٹس پر اس کی تصدیق بھی کی۔

دونوں کی زندگی کے یادگار دن کی تصاویر دیکھیں۔

تقریب کی آرائش

شادی کے بندھن میں بندھ جانے والا جوڑا

فوٹو بشکریہ ماہا وجاہت خان انسٹاگرام
فوٹو بشکریہ ماہا وجاہت خان انسٹاگرام

نیمل خاور نکاح نامے پر دستخط کررہی ہیں

فوٹو بشکریہ ماہا وجاہت خان انسٹاگرام
فوٹو بشکریہ ماہا وجاہت خان انسٹاگرام

ایک خوبصورت لمحہ

اس موقع پر دونوں بہت خوش نظر آئے

فوٹو بشکریہ ماہا وجاہت خان انسٹاگرام
فوٹو بشکریہ ماہا وجاہت خان انسٹاگرام

نیمل خاور نے اپنی والدہ عروسی لباس کو اس موقع کے لیے ڈیزائنر مہین شاہ سے ری ڈیزائن کرایا

عاطف اسلم اور عمارہ حکمت بھی تقریب میں شریک تھے

گوہر رشید تقریب کے شرکا کے ساتھ سیلفی لیتے ہوئے

جب نوبیاہتا جوڑا خود اپنی سیلفی لے رہا تھا

نوبیاہتا جوڑا

واضح رہے کہ اداکارہ نیمل خاور ایک پینٹر بھی ہیں، جنہوں نے رواں سال اپریل میں اپنی پینٹنگز کی نمائش کی ایک تقریب بھی منعقد کی تھی۔

نیمل خاور اس وقت ‘انا’ نامی ڈرامے میں اہم کردار نبھارہی ہیں، ان کی اداکاری کو بھی بے حد پسند کیا جارہا ہے۔

ماہرہ خان نے منگنی کی افواہوں پر وضاحت کردی

اداکارہ ماہرہ خان جن کی حال ہی میں ایکشن ڈرامہ فلم ’ سپر اسٹار‘ ریلیز ہوئی تھی، یوں تو وہ ان دنوں اپنی فلم کی کامیابی پر خوش ہیں۔

تاہم انہوں نے رواں برس مئی میں اپنی منگنی کی افواہوں سمیت دیگر افواہوں پر پہلی بار وضاحت کردی۔

رواں برس مئی میں بھارتی میڈیا کی جانب سے ایسی خبریں سامنے آئی تھیں کہ پاکستانی اداکارہ نے ترکی میں اپنے دیرینہ دوست سے منگنی کرلی۔

رپورٹ میں کسی کا حوالہ دیے بغیر ماہرہ خان کی جانب سے انسٹاگرام پر شیئر کی گئی تصاویر کو دیکھ کر اندازے سے بتایا گیا کہ اداکارہ نے دیرینہ دوست سلیم کریم سے منگنی کی۔

بھارتی اخبار کی جانب سے رپورٹ شائع کرنے کے بعد ماہرہ خان کی منگنی کی خبریں انٹرنیٹ اور میڈیا پر وائرل ہوگئی تھیں۔

خبریں وائرل ہونے کے بعد جہاں ماہرہ خان سے منسلک قریبی ذرائع نے ڈان امیجز کو بتایا تھا کہ اداکارہ کی منگنی کی خبریں بے بنیاد ہیں۔

میرے حوالے سے میڈیا میں نہ صرف منگنی بلکہ کئی طرح کی جھوٹی خبریں چلیں، اداکارہ—اسکرین شاٹ
میرے حوالے سے میڈیا میں نہ صرف منگنی بلکہ کئی طرح کی جھوٹی خبریں چلیں، اداکارہ—اسکرین شاٹ

اداکارہ کے قریبی افراد کے مطابق ماہرہ خان دوستوں کے ساتھ ترکی میں ایک دوست کی شادی میں شرکت کے لیے گئی تھیں۔

اور اب اداکارہ نے بھی منگنی کی خبروں پر وضاحت کرتے ہوئے کہا ہے کہ وہ دوستوں کے خرچ پر ہی ان کی شادی میں شرکت کرنے گئی تھیں۔

بول ٹی وی کے پروگرام ’بول نائٹس ود احسن خان‘ میں بات کرتے ہوئے ماہرہ خان نے دلچسپ انداز میں کہا کہ وہ تو دوستوں کی شادی میں شرکت کے لیے گئی تھیں مگر ان کی منگنی کی جھوٹی افواہیں پھیلائی گئیں۔

اداکارہ کا کہنا تھا کہ میڈیا میں ہر جگہ ان کی منگنی کے چرچے ہونے اور ان کی تصاویر شائع ہونے پر انہیں اپنی شادی میں مدعو کرنے والے دوست ناراض ہوگئے اور کہا کہ ہر جگہ ان کی ہی خبریں چل رہی ہیں اور ان کی شادی کا کوئی ذکر ہی نہیں ہو رہا۔

اداکارہ کا کہنا تھا کہ انہوں نے دوستوں کو سمجھایا کہ میڈیا کی غلط خبروں میں ان کی کوئی غلطی نہیں۔

اداکارہ نے واضح کیا کہ نہ صرف ان کی منگنی بلکہ ان سے متعلق مختلف قسم کی جھوٹی خبریں میڈیا میں چلتی رہتی ہیں۔

انہوں نے پروگرام میں یہ بھی بتایا کہ انہیں اپنے متعلق میڈیا میں چلنے والی ایک افواہ بہت اچھی لگی اور ان کی خواہش تھی کہ کاش وہ سچ ہوجائے۔

ماہرہ خان نے بتایا کہ یوٹیوب پر ان کے گھر سے متعلق 2 ویڈیوز وائرل ہیں، جن میں عالیشان گھر دکھا کر دعویٰ کیا جا رہا ہے کہ یہ اداکارہ کے گھر ہیں۔

انہوں نے خواہش کا اظہار کیا کہ کاش ویڈیو میں دکھایا جانے والا ایک گھر حقیقت میں ان کا ہوجائے اور ان کی خواہش پوری ہوجائے۔

ایک سوال کے جواب میں ماہرہ خان نے ریما خان کو اپنی پسندیدہ اداکارہ قرار دیا، تاہم ساتھ ہی انہوں نے میرا، مہوش حیات، صبا قمر اور آمنہ الیاس کو بھی اچھی اداکارائیں قرار دیا۔

ماہرہ خان کی حال ہی میں ریلیز ہونے والی فلم سپر اسٹار نے اچھی کمائی کی تھی—فوٹو: انسٹاگرام
ماہرہ خان کی حال ہی میں ریلیز ہونے والی فلم سپر اسٹار نے اچھی کمائی کی تھی—فوٹو: انسٹاگرام

ایک اور سوال کے جواب میں ماہرہ خان نے شاہ رخ خان کو ’جادوگر‘ رنبیر کپور کو ’تماشہ‘ اور بلال اشرف کو ’بے قرار‘ اداکار قرار دیا۔

ماہرہ خان نے اعتراف کیاکہ انہوں نے بہت ہی کم کام کیا ہے لیکن لوگوں کا خیال ہے کہ انہوں نے بہت ہی زیادہ کام کیا ہے۔

انہوں نے ایک اور خواہش کا اظہار کرتے ہوئے کہا کہ ان کی خواہش ہے کہ وہ نعمان اعجاز اور ثانیہ سعید جیسی اداکاراؤں کے ساتھ کام کریں۔ انہوں نے پروگرام کے دوران فردوس جمال کو سینیئر اور ٹیلنٹڈ اداکار بھی قرار دیا۔

خیال رہے کہ کچھ ہفتے قبل فردوس جمال نے ماہرہ خان کو عمر رسیدہ قرار دیتے ہوئے کہا تھا کہ وہ نہ تو اچھی اداکارا ہیں اور نہ ہی ان کی عمر ایسی ہے کہ وہ ہیروئن کے کردار ادا کرسکیں۔

امریکی گلوکارہ ٹیلر سوئفٹ پاکستانی طالبہ کی مدد کو آگئیں

ٹورنٹو: نامور امریکی گلوکارہ ٹیلر سوئفٹ نے پاکستانی طالبہ عائشہ خرم کی یونیورسٹی کی فیس ادا کرنے کے لیے 6 ہزار 386 ڈالرز تقریباً 10 لاکھ 22 ہزار پاکستانی روپے کی رقم عائشہ کے اکاؤنٹ میں ٹرانسفر کردی۔

کینیڈا کی اونٹاریو یونیورسٹی آف واٹر لو سے تعلق رکھنے والی پاکستانی نژاد طالبہ عائشہ خرم اور اس کے گھر والوں نے یونیورسٹی میں ٹیوشن کی فیس ادا کرنے کے لیے آن لائن مدد کی درخواست کی تھی۔ جس کے بعد امریکی گلوکارہ ٹیلر سوئفٹ نے تقریباً 10 لاکھ 22 ہزار پاکستانی روپے کی رقم عائشہ کے اکاؤنٹ میں ٹرانسفر کردی۔

اس رقم سے عائشہ اپنی تعلیم کو جاری رکھ سکے گی۔ رقم کے ساتھ گلوکارہ ٹیلر سوئفٹ نے عائشہ کے لیے پیغام بھی لکھا ہے جس میں انہوں نے عائشہ کو تعلیم جاری رکھنے کی ہدایت کی ہے۔ رقم ملنے پر طالبہ عائشہ خرم نے پاپ سنگر ٹیلر سوئفٹ کا شکریہ ادا کیا۔

واضح رہے کہ عائشہ خرم اونٹاریو کی یونیورسٹی آف واٹر لو میں اکاؤنٹس اور فائنانشلمینجمنٹ کی طالبہ ہیں۔ عائشہ نے خراب مالی حالات کے باعث اپنی ایک دوست کے کہنے پر آن لائن مدد حاصل کرنے کا فیصلہ کیا تھا۔

عائشہ نے مزید کہا جب انہوں نے یہ خبر اپنے والدین کو سنائی تو انہیں یقین نہیں آیا اوروہ رونے لگے یہ بالکل ایسا ہے جیسے کسی فرشتے نے میری مدد کی ہو۔

پاکستان میں پرفارمنس پر تنقید؛ میکا سنگھ نے بھارتی میڈیا کو آئینہ دکھادیا

ممبئی: بھارتی گلوکار میکا سنگھ پاکستان میں پرفارمنس کے حوالے سے کی جانے والی تنقید سے اتنے تنگ آگئے کہ اپنے ہی میڈیا پر چلا اٹھے اورانہیں دوغلی پالیسی اپنانے پر آئینہ دکھایا۔

بھارتی گلوکار میکا سنگھ کی چند روز قبل پاکستان میں شادی کی تقریب کے دوران پرفارمنس پر ہندو انتہا پسند اور نفرت انگیز بھارتی میڈیا شدید برہم ہے اور میکا سنگھ کے معافی مانگنے کے باوجود انہیں تنگ کرنے سے باز نہیں آرہا۔

گزشتہ روز میکا سنگھ نے ایک پریس کانفرنس کے دوران پاک بھارت کشیدگی کے اس ماحول میں پاکستان میں پرفارمنس کرنے کو اپنی غلطی قرار دیتے ہوئے کہا کہ میں نے کشیدگی سے بہت پہلے معاہدہ طے کیاتھا لہٰذا جب مجھے ویزا موصول ہوا تو میں چلا گیا۔ میکا سنگھ نے پاکستان میں پرفارم کرنے پرمعافی مانگتے ہوئے کہا کہ وہ آئندہ یہ غلطی نہیں دہرائیں گے۔

میکا سنگھ کی جانب سے پاکستان میں دوبارہ پرفارم نہ کرنے کی یقین دہانی کے باجود بھارتی میڈیا ان پر چڑھ دوڑا اور انہیں اپنے سوالوں سے زچ کرنا شروع کردیا تو میکا سنگھ آپے سے باہر ہوگئے اور اپنے ہی میڈیا کو آئینہ دکھاتے ہوئے کہا کہ کیا آپ لوگوں کو معلوم ہے کہ دو ماہ قبل پاکستانی گلوکار عاطف اسلم اور نیہا ککڑ نے ایک ساتھ پرفارم کیا تھا؟ کیا آپ کو یہ بھی معلوم ہے کہ سونو نگم نے چار ماہ قبل عاطف اسلم کے ساتھ پرفارم کیاتھا؟ تب کسی نے کچھ کیوں نہیں کہا؟

میکا سنگھ نے کہا کہ جب میں کچھ کرتاہوں تو میڈیا فوراً اسے پکڑ کر اپنی سرخیاں بنانے میں لگ جاتاہے۔ آپ لوگ چاہتے ہیں کہ مجھے غصہ آئے  تاکہ آپ لوگ اسے اپنے چینلز پر دکھائیں اور اپنے اخباروں کی سرخیاں بنائیں۔

Google Analytics Alternative