انٹر ٹینمنٹ

خواتین پر تشدد پیش کرتی فلم ‘کبیر سنگھ’ کامیاب

بولی وڈ اداکار شاہد کپور کی فلم ‘کبیر سنگھ’ ریلیز ہونے کے فوری بعد کامیاب ثابت ہوگئی تاہم اسے کئی تجزیہ کار شدید تنقید کا نشانہ بھی بنا رہے ہیں۔

فلم ‘کبیر سنگھ’ رواں سال 21 جولائی کو سینما گھروں میں ریلیز ہوئی، جس کے بعد اس کے ریویوز سامنے آئے، جہاں کئی تجزیہ کاروں نے فلم میں شاہد کی اداکاری کو سراہا وہیں بہت سے تجزیہ کاروں کا یہ بھی کہنا تھا کہ اس فلم میں خواتین کی مخالفت دکھائی ہے، جبکہ انہوں نے ہدایت کار پر الزام لگایا کہ فلم میں خواتین پر ظلم کرنے والے کردار کو ہیرو کے طور پر پیش کیا۔

یاد رہے کہ فلم میں شاہد کپور نے ایک میڈیکل کالج میں پڑھنے والے طلبہ کا کردار نبھایا جو آگے جاکر ایک کامیاب سرجن بنتا ہے۔

اس سفر میں اسے اپنے کالج کی ایک لڑکی سے محبت ہوجاتی ہے، جبکہ اس کا غصہ اسے کئی بار مشکلات کا شکار بھی بناتا ہے۔

فلم میں شاہد کپور کو شدید نشے کا عادی بھی دکھایا، جو اپنے پیار کی جدائی کے بعد خود کو تباہ کرنے کی ہر ممکن کوشش کرتا ہے۔

تجزیہ کاروں نے فلم میں شاہد کے اس ہی کردار کو تنقید کا نشانہ بنایا جبکہ ایک سین کو خاص طور پر ہائی لائٹ کیا جس میں شاہد کپور نے فلم کی مرکزی اداکارہ کو تھپڑ مارا، جبکہ ایک موقع پر انہیں یہ تک کہا کہ کالج میں ان کی کوئی پہچان نہیں، بلکہ اسے صرف کبیر کی گرل فرینڈ ہونے کے طور پر جانا جاتا ہے۔

متعدد بھارتی تجزیہ کاروں کے مطابق اس وقت دنیا بھر میں خواتین خود پر تشدد کرنے والوں کے خلاف آگے بڑھ کر می ٹو مہم کا حصہ بن رہی ہیں اور ایسے موقع پر کبیر سنگھ جیسی فلم کا سامنے آنا مایوسی سے کم نہیں۔

ان ریویوز کے باوجود شائقین نے بڑی تعداد میں شاہد کپور کی فلم کی نمائش کے لیے سینما گھروں کا رخ کیا اور فلم کو باکس آفس پر بلاک بسٹر ہٹ بنا دیا۔

بولی وڈ تجزیہ کار ترن ادرش نے سماجی رابطے کی ویب سائٹ ٹوئٹر پر مداحوں کے ساتھ شیئر کیا کہ شاہد کپور کی فلم نے ریلیز کے صرف ایک ہفتے میں بھارت میں 130 کروڑ روپے کمالیے۔

فلم نے اپنی ریلیز کے پہلے روز 20 کروڑ کمائے، جبکہ دوسرے روز 23 کروڑ روپے کے قریب حاصل کیے۔

اتوار کو فلم نے 28 کروڑ روپے کے قریب کمائے جس کے بعد پیر کو 18 کروڑ روپے کے قریب حاصل کیے۔

گزشتہ روز فلم نے 16 کروڑ روپے کے قریب کا بزنس کیا۔

خیال رہے کہ ’کبیر سنگھ‘ تیلگو فلم ’ارجن ریڈی‘ کا ہندی ریمیک ہے۔

شاہد کپور کی اہلیہ میرا راجپوت نے بھی اپنے سوشل میڈیا اکاؤنٹ پر ‘کبیر سنگھ’ میں اپنے شوہر کی کارکردگی کو سراہا۔

فلم میں شاہد کپور کے ساتھ ساتھ کیارا اڈوانی نے اہم کردار نبھایا، جبکہ اس کی ہدایات سندیپ ریڈی ونگا نے دی۔

شمعون عباسی نے فلم ’’دہلی گیٹ‘‘ میں اپنے کردار سے پردہ اٹھادیا

لاہور: معروف اداکار و ہدایت کار شمعون عباسی نے نئی آنے والی فلم ’دہلی گیٹ‘ میں اپنے کردار سے متعلق پردہ اٹھادیا۔

شمعون عباسی نے فلم ’دہلی گیٹ‘ میں اپنے کردار سے متعلق لب کشائی کرتے ہوئے کہا کہ فلم میں میرا کردار ولن کا ہے جس کا نام ملک گولڈ ہے، لیکن محبت کی کہانی بھی اسی کے گرد گھومتی ہے، در حقیقت فلم میں نظر آنے والا شخص امیر ترین اور سونے کا شوقین ہوتا ہے۔

شمعون عباسی نے  کہا کہ ویسے تو میں پہلے بھی کئی فلموں میں ولن کا کردار ادا کر چکا ہوں لیکن اس فلم میں میرا کردار منفرد ہے کیوں کہ بطور اداکار میں کوئی کردار ادا کرنے سے قبل اس کو باریکی سے دیکھتا ہوں پھر ہامی بھرتا ہوں۔

اداکار نے فلم کی کہانی کے حوالے سے کہا کہ ہم میں سے بہت سے لوگوں کو تاریخی دہلی گیٹ اور اندرونی شہر لاہور کے گرد رہنے والوں کی تاریخ کے بارے میں معلوم نہیں ہوگا۔ لہذہ فلم میں اس شہر کے حسن اور رنگا رنگ ثقافت کو دکھایا جائے گا جو دیکھنے والوں پر سحر طاری کردے گا، جب کہ فلم کی کہانی نہ صرف محبت سے بھر پور ہے بلکہ اس میں ایکشن اور مار دھاڑ بھی شامل ہے۔

واضح رہے کہ ندیم چھیمہ کی ہدایتکاری میں بننے والی فلم’ دہلی گیٹ‘ کو کمال پاشا نے تحریر کیا ہے۔ جس میں شمعون عباسی کے ساتھ ڈیبیو کرنے والے یاسر خان اور سوزین مرکزی کردار ادا کرتے نظر آئیں گے۔ فلم اگلے سال 2020 کے اوائل میں سنیما گھروں کی زینت بنے گی۔

سیف علی بھارت چھوڑ کر پاکستان پہنچنے والی’عظمیٰ‘ پر فلم کا حصہ؟

محبت کی خاطر 2 سال قبل مئی 2017 میں بھارت چھوڑ کر پاکستان پہنچنے والی نئی دہلی کی لڑکی ڈاکٹر عظمیٰ کی پریم کہانی پر فلم بنائے جانے کی اطلاعات گزشتہ برس سے جاری ہیں۔

اور اب رپورٹس سامنے آئیں ہیں کہ ڈاکٹر عظمیٰ اور ان کے پاکستانی پریمی طاہر علی کی رومانوی کہانی پر بننے والی فلم میں سیف علی خان کو شامل کرلیا گیا۔

خیال رہے کہ ئی دہلی کی رہائشی بھارتی شہری ڈاکٹر عظمٰی نے پاکستان آکر پاکستانی شہری طاہر سے پسند کی شادی کرلی تھی۔

عظمیٰ اور طاہر کی محبت ملائیشیا میں پروان چڑھی جس کے بعد عظمیٰ نے پاکستان آنے کا فیصلہ کیا اور وہ یکم مئی کو براستہ واہگہ پاکستان پہنچیں۔

بعد ازاں نکاح کے بعد اچانک ڈاکٹر عظمیٰ غائب ہوگئیں، جس کے بعد ان کے شوہر نے اسلام آباد کے پولیس تھانے میں انہیں تلاش کرنے کے لیے درخواست جمع کرائی۔

پھر اچانک یہ خبر سامنے آئی کہ عظمیٰ نے اسلام آباد میں قائم بھارتی ہائی کمیشن میں پناہ لے کر اپنے شوہر پر الزام عائد کردیا کہ انہوں نے انہیں اغوا کیا، عظمیٰ کی جانب سے الزامات لگائے جانے کے بعد پاکستان اور ہندوستان کی حکومتوں نے بھی اٹھایا اور پھر ڈاکٹر عظمیٰ کو اسلام آباد کی عدالت میں پیش کیا گیا۔

ڈاکٹر عظمیٰ کی طاہر سے پہلی ملاقات ملائیشیا میں ہوئی تھی—فوٹو: فیس بک
ڈاکٹر عظمیٰ کی طاہر سے پہلی ملاقات ملائیشیا میں ہوئی تھی—فوٹو: فیس بک

ڈاکٹر عظمیٰ نے اسلام آباد کی مقامی عدالت میں 506 ضابطہ فوجداری کے تحت درخواست دائرتے ہوئے یہ الزام بھی عائد کیا کہ اسے زیادتی کا نشانہ بھی بنایا گیا۔

ساتھ ہی انہوں نے یہ الزام بھی لگایا کہ ان کی شادی ’گن پوائنٹ‘ پر کرائی گئی جبکہ انہیں ’ہراساں‘ بھی کیا گیا۔

اسلام آباد کی مقامی عدالت کے بعد بعد ازاں یہ کیس اسلام آباد ہائی کورٹ میں بھی چلا، جس کے بعد عدالت نے انہیں ہندوستان جانے کی اجازت دی تھی۔

اسلام آباد ہائی کورٹ کی جانب سے اجازت ملنے کے بعد ڈاکٹر عظمیٰ مئی 2017 میں بھارت چلی گئی تھیں۔

ڈاکٹر عظمیٰ کے بھارت جانے کے بعد گزشتہ برس مارچ میں یہ خبر سامنے آئی کہ ان کی پریم کہانی پر بولی وڈ فلم بنائی جائے گی اور ممکنہ طور پر الیانا ڈی کروز ان کا کردار ادا کریں گی۔

طاہر علی اور ڈاکٹر عظمیٰ نے شادی بھی کی تھی—فائل فوٹو: رائٹرز/ ڈان نیوز
طاہر علی اور ڈاکٹر عظمیٰ نے شادی بھی کی تھی—فائل فوٹو: رائٹرز/ ڈان نیوز

تاہم ایک سال تک اس خبر کی تصدیق نہیں ہوسکی تھی، لیکن اب خبر سامنے آئی ہے کہ ڈاکٹر عظمیٰ کی پریم کہانی پر بنائی جانے والی فلم میں سیف علی خان کو بھی شامل کرلیا گیا۔

ممبئی مرر کے مطابق ڈاکٹر عظمیٰ اور طاہر علی کے رومانس پر سمیر ڈکشٹ، جتیش ورما اور گرش جوہر مشترکہ طور پر فلم بنائیں گے اور اس حوالے سے کام کا آغاز کردیا گیا۔

سیف علی خان بھارتی سفیر کا کردار ادا کریں گے—فوٹو: انڈیا ٹوڈے
سیف علی خان بھارتی سفیر کا کردار ادا کریں گے—فوٹو: انڈیا ٹوڈے

رپورٹ کے مطابق فلم کی ہدایات شوم نیر دیں گے جو اس سے پہلے تپسی پنو اور اکشے کمار کی فلم ’نام شبانہ‘ جیسی فلموں کی ہدایات دے چکے ہیں جب کہ فلم کی کہانی رتیش شاہ لکھیں گے۔

رپورٹ میں بتایا گیا کہ فلم کی ٹیم نے سیف علی خان کو کاسٹ کرنے کا پروگرام بنالیا ہے اور چھوٹے خان فلم میں ڈاکٹر عظمیٰ کے پریمی نہیں بلکہ اسلام آباد میں موجود بھارتی ہائی کمیشن کے ڈپٹی ہائی کمنشر جے پی سنگھ کا کردار ادا کرتے دکھائی دیں گے۔

رپورٹ کے مطابق جے پی سنگھ کی کوششوں کی وجہ سے ہی ڈاکٹر عظمیٰ واپس بھارت پہنچیں تھیں اور وہ اس کہانی کے مرکزی کردار تھے۔

اب جے پی سنگھ کا کردار سیف علی خان نبھاتے نظر آئیں گے۔

ساتھ ہی رپورٹ میں بتایا گیا کہ ابھی تک فلم کی ٹیم نے مرکزی اداکارہ کو کاسٹ کرنے کے حوالے سے کوئی فیصلہ نہیں کیا، تاہم فلم کی ٹیم چاہتی ہے کہ ڈاکٹر عظمیٰ کے کردار کے لیے کوئی بڑی اداکارہ کو کاسٹ کیا جائے۔

خیال کیا جا رہا ہے کہ آئندہ چند ہفتوں میں فلم کی ٹیم کاسٹ کا حتمی اعلان کرے گی، جس کے بعد آئندہ برس کے آغاز تک فلم کی شوٹنگ شروع کی جائے گی اور ممکنہ طور پر فلم کو 2020 کے وسط تک ریلیز کردیا جائے گا۔

رپورٹس تھیں کہ عظمیٰ پہلے سے شادی شدہ اور بچے کی ماں تھیں—فوٹو: اے پی
رپورٹس تھیں کہ عظمیٰ پہلے سے شادی شدہ اور بچے کی ماں تھیں—فوٹو: اے پی

راحت فتح علی خان کے لیے آکسفورڈ یونیورسٹی کا بڑا اعزاز

لندن: مقبول ترین پاکستانی گلوکارراحت فتح علی خان کو لندن کی آکسفورڈ یونیورسٹی کی جانب سے آج اعزازی ڈگری سے نوازا جائے گا۔

راحت فتح علی خان کا شمارایشیا کے بہترین گلوکاروں میں ہوتا ہے جنہوں نے پاکستان کے ساتھ بھارت میں بھی اپنی خوبصورت آواز سے لوگوں کودیوانہ بنا رکھا ہے۔ موسیقی کے شعبے میں گراں قدرخدمات انجام دینے کے لیے برطانیہ کی معروف آکسفورڈ یونیورسٹی کی جانب سے آج انہیں ڈاکٹریٹ کی اعزازی ڈگری سے نوازا جائے گا۔

آج لندن میں ہونے والی یاد گار تقریب سے قبل آکسفورڈ یونیورسٹی لندن کے چانسلر کی جانب سے استاد راحت فتح علی خان کے اعزاز میں عشائیہ دیا گیا اور انہیں شاندار الفاظ میں خراج تحسین بھی پیش کیا۔

استاد راحت فتح علی خان نے آکسفورڈ یونیورسٹی لندن کے چانسلر کا شکریہ ادا کرتے ہوئے کہا کہ انسان اگر سچی لگن اور محنت سے کسی بھی شعبے میں کام کرے تو ایک دن بڑی کامیابی ضرور حاصل ہوتی ہے۔ قوالی کا فن دنیا کے چپے چپے میں مقبول ہورہا ہے۔ 6 سو سال سے ہم قوالی گار ہے ہیں، ہمارے خاندان نے اس فن کی آبیاری میں کئی سال لگائے۔

آکسفورڈ یونیورسٹی انتظامیہ کے مطابق راحت فتح علی خان نے ایسے خاندان میں آنکھ کھولی جوجنوبی ایشیائی موسیقی کی پہچان بن گیا، انہوں نے موسیقی کی ابتدائی تعلیم  سات سال کی عمر سے لینی شروع کی اور اب تک 50 سے زائد البم ریلیز کرچکے ہیں۔

واضح رہے کہ راحت فتح علی خان نے دنیا بھرمیں بے شمارکنسرٹ میں پرفارم کیا ہے اس کے علاوہ وہ اب تک 50 سیریلزکے ٹائٹل سانگ اوربالی ووڈ، ہالی ووڈ اور پاکستانی فلموں کے لیے پلے بیک گلوکاری کرچکے ہیں۔

پاکستانی فلم “ریڈی اسٹیڈی نو” جولائی میں سینما گھروں کی زینت بنے گی

ہدایت کار ہاشم بن منور کی ڈیبیو فلم “ریڈی اسٹیڈی نو” اگلے ماہ 19 جولائی کو سینما گھروں کی زینت بنے گی۔

رومینٹک اور کامیڈی فلم کے مرکزی کردار میں ماڈل و اداکارہ آمنہ الیاس اور فیصل سیف اداکاری کے جوہر دکھایئں گے۔

فلم کا ٹریلر بھی جاری ہوچکا ہے جب کہ فلم کی کہانی ایک نوجوان جوڑے کے گرد گھومتی ہے جو کہ شادی کرنے کے لیے بیتاب ہے لیکن انہیں شادی میں کئی مشکلات کا سامنا کرنا پڑتا ہے۔

محبت میں گرفتار لڑکے اور لڑکی کے والدین بھی اس شادی کے لیے رضامند نہیں ہوتے۔

حالیہ انٹرویو میں ماڈل اور ادکارہ آمنہ الیاس کا کہنا تھا کہ ان کی “ریڈی اسٹیڈی نو” فلم سے بہت امیدیں وابستہ ہیں، ہاشم بن منور ایک بہترین ہدایت کار ہیں اور ان کا اس فلم کو بنانے کا واحد مقصد لوگوں کو تفریح فراہم کرنا ہے۔

آمنہ الیاس نے فیملی کامیڈی فلم میں اپنے کردار کے بارے میں بتاتے ہوئے کہا کہ میں اس فلم میں رضیہ کا کردار ادا کر رہی ہوں جو کہ ایک لڑکے سے بے حد محبت کرتی ہے اور اس سے شادی کرنے کے لیے کچھ بھی کر سکتی ہے۔

“ریڈی اسٹیڈی نو” میں آمنہ الیاس اور فیصل سیف کے علاوہ سلمان شاہد، اسماعیل تارا، نرگس رشید، زین افضل اور احمد بلال جو کہ طیفا ان ٹربل میں بلو بٹ کے کردار میں نظر آئے تھے، جلوہ گر ہوں گے۔

’ اچھی سندھی بہو، آپ کے ڈمپل دل لے گئے‘

بولی وڈ ڈمپل گرل دپیکا پڈوکون اور ایکشن ہیرو رنویر سنگھ نے یوں تو نومبر 2018 میں شادی کی تھی، تاہم دونوں کے رومانس کے چرچے اب تک میڈیا کی زینت بنتے رہتے ہیں۔

دونوں نے کم سے کم 5 سال تک تعلقات میں رہنے کے بعد اٹلی میں ’سندھی اور ’کونکنی‘ روایات کے مطابق شادی کی تھی۔

دپیکا پڈوکون کا تعلق ہند آریائی نسل سے ہے، جو کونکنی زبان بولتے ہیں، انہیں کونکنی قوم کے افراد بھی کہا جاتا ہے، اس لیے انہوں نے اپنی شادی اپنے خاندانی روایات کے مطابق کی۔

دونوں نے کونکنی اور سندھی روایات کے مطابق شادی کی تھی—فوٹو: انسٹاگرام
دونوں نے کونکنی اور سندھی روایات کے مطابق شادی کی تھی—فوٹو: انسٹاگرام

جب کہ رنویر سنگھ کا تعلق سندھی خاندان سے ہے اور ان کے آباؤ اجداد صوبہ سندھ کے دارالحکومت کراچی سے تھا جو تقسیم ہند کے بعد بھارت منتقل ہوئے تھے، اس لیے انہوں نے بھی اپنے خاندانی روایات کے مطابق شادی کی۔

شادی کو کئی ماہ گزرجانے کے باوجود دونوں سوشل میڈیا پر ایک دوسرے کی تصاویر پر رومانوی کمنٹس کرتے رہتے ہیں اور دونوں ایک دوسرے کے خاندانوں کی روایات کا بھی خیال کرتے رہتے ہیں۔

حال ہی میں دپیکا پڈوکون نے انسٹاگرام پر سفید لباس میں اپنی تصاویر شیئر کیں، جن پر ان کے مداحوں سمیت ان کے شوہر رنویر سنگھ نے بھی کمنٹس کیے اور ان کی جانب سے کیے گئے کمنٹس سب کی توجہ کا مرکز بن گئے۔

رنویر سنگھ نے اہلیہ کی سفید لباس کی تصاویر کی تعریف کرتے ہوئے جہاں انہیں اچھی ’سندھی بہو‘ قرار دیا، وہیں ان سے شکوہ بھی کیا کہ ان کے ڈمپلس ان کا دل لے گئے۔

ساتھ ہی انہوں نے اپنی اہلیہ کے لباس کی سندھی زبان میں بھی تعریف کی۔

رنویر سنگھ نے دپیکا پڈوکون کی ایک تصویر پر کمنٹس کرتے ہوئے انہیں اچھی سندھی بہو قرار دیا، تو ان کی دوسری تصویر پر لکھا کہ ’ان کے ڈمپلس ان کا دل لے گئے‘۔

اسی طرح رنویر سنگھ نے دپیکا پڈوکون کی ایک اور تصویر پر کمنٹ کرتے ہوئے ان کی لباس کی تعریف کی اورسندھی میں لکھا کہ ’ ھی پتلون ڈاڈھو سٹھو آھے‘ (یہ پتلون بہت ہی اچھی ہے)‘۔

اداکارہ کی تصاویر پر مداحوں نے بھی دلچسپ تبصرے کیے—فوٹو: انسٹاگرام
اداکارہ کی تصاویر پر مداحوں نے بھی دلچسپ تبصرے کیے—فوٹو: انسٹاگرام

چلبل پانڈے اور رجو کے رومانس میں تیسری خاتون کون؟

بولی وڈ کی آنے والی ایکشن کرائم فلم ’دبنگ تھری‘ کا شائقین کو کافی وقت سے انتظار ہے، کیوں کہ اطلاعات تھیں کہ یہ فلم 2018 تک ریلیز کردی جائے گی۔

تاہم فلم کی ریلیز تو دور کی بات اب تک فلم کا کوئی ٹریلر اور گانا بھی ریلیز نہیں کیا جا سکا، کیوں کہ اس کی شوٹنگ کافی تاخیر کے بعد رواں برس اپریل میں شروع کی گئی تھی۔

دبنگ تھری بنانے کا اعلان تو 2015 میں ہی کردیا گیا تھا اور فلم کے پروڈیوسر ارباز خان کی جانب سے بتایا گیا تھا کہ وہ ہی سیریز کی تیسری فلم کو بنائیں گے۔

تاہم فلم کی شوٹنگ شروع کرتے کرتے اور فلم کی کاسٹ کو سلیکٹ کرنے میں کافی تاخیر کے بعد رواں برس سے اس کی شوٹنگ شروع کردی گئی۔

دبنگ تھری کے حوالے سے جہاں ابتدائی طور پر خبریں تھیں کہ اس بار فلم میں سوناکشی سنہا کے بجائے مونی راؤ کو کاسٹ کیا جائے گا، تاہم بعد ازاں اس بات کی تصدیق کردی گئی کہ سوناکشی سنہا ہی فلم میں مرکزی کردار ادا کرتی دکھائی دیں گی۔

تاہم خیال کیا جا رہا ہے کہ مونی راؤ سمیت کوئی دوسرا اداکارہ بھی دبنگ تھری کا حصہ ہوں گی جو یا تو فلم میں مختصر کردار ادا کریں گی تا پھر وہ آئٹم سانگ کرتی دکھائی دیں گی۔

خبریں تھیں کہ مونی راؤ کو سوناکشی کی جگہ کاسٹ کیا جائے گا—فوٹو: بولی وڈ ہنگامہ
خبریں تھیں کہ مونی راؤ کو سوناکشی کی جگہ کاسٹ کیا جائے گا—فوٹو: بولی وڈ ہنگامہ

ساتھ ہی رپورٹس تھیں کہ اس بار فلم کی کہانی پہلی دونوں فلموں سے کچھ مختلف ہوگی اور اس بار ایک کے بجائے 2 مرکزی اداکارائیں کاسٹ کی جائیں گی اور ممکنہ طور پر فلم میں ٹرائی اینگل رومانس کو دکھایا جائے گا۔

یعنی فلم میں دبنگ ہیرو سے سوناکشی سنہا اور ایک اور خاتون محبت کرتی دکھائیں گی۔

تاہم اب سوناکشی سنہا نے اس معاملے پر وضاحت کی ہے اور کہا ہے کہ فلم میں ’چلبل پانڈے‘ اور ’رجو‘ کی محبت کے درمیان اور کوئی خاتون نہیں آئے گی۔

انڈیا ٹوڈے کے مطابق اداکارہ نے فلم میں ٹرائی اینگل پیار کو دکھانے سے متعلق چلنے والی خبروں کو بے بنیاد قرار دیا۔

سوناکشی سنہا کا کہنا تھا کہ فلم میں ٹرائی اینگل پیار کو نہیں دکھایا جائے گا اور اس بار بھی پہلی دونوں فلموں کی طرح وہ اکیلی ہی سلمان خان سے محبت کرتی دکھائی دیں گی۔

تاہم انہوں نے تسلیم کیا کہ اس بار فلم کی کہانی پہلی دونوں فلموں سے کچھ مختلف ہوگی۔

خیال رہے کہ اس سیریز کی پہلی فلم ’دبنگ‘ 2010 اور دوسری فلم ’دبنگ ٹو‘ 2012 میں ریلیز ہوئی تھی، دونوں میں سلمان خان اور سوناکشی سنہا نے مرکزی کردار ادا کیے تھے۔

پہلی دونوں فلموں میں سلمان خان بہادر پولیس افسر ’چلبل پانڈے‘ جب کہ سوناکشی سنہا ان کی بیوی ’رجو‘ کا کردار ادا کیا تھا۔

سلمان خان کی نئی تصویردیکھ کرمداح حیران پریشان

 ممبئی: بالی ووڈ کے دبنگ سلمان خان کی سوشل میڈیا پر جاری کی جانے والی نئی تصویر نے ان کے مداحوں کو حیران کردیا ہے۔

بھارتی میڈیا رپورٹس کے مطابق بالی ووڈ کے دبنگ سلمان خان نے انسٹاگرام پراپنی ایک نئی تصویرجاری کی ہے، جسے دیکھ کر سب ہی حیران ہوگئے ہیں۔

بالی ووڈ میں ایک لمبا وقت گزارنے کے باوجود بھی سلمان خان دیگراداکاروں کے مقابلے میں بہت فٹ تصور کیے جاتے ہیں جس کا ثبوت انہوں نے خود اپنی اس تصویر کے ذریعے دے دیا جب کہ ان کے مداح بھی داد دیئے بنا نہیں رہ پارہے ہیں۔

دوسری جانب سلمان خان ہدایتکارسنجے لیلا بھنسالی کی فلم ’انشا اللہ‘ میں اداکارہ عالیہ بھٹ کے ساتھ جلوہ گر ہوں گے۔

Google Analytics Alternative