انٹر ٹینمنٹ

بگ باس سیزن11 کی فائنلسٹ حنا خان کی بالی ووڈ میں دھماکے دار انٹری

ممبئی: بگ باس سیزن 11 کے فائنل تک پہچنے والی حنا خان نے بالی ووڈ میں دھماکے دار انٹری دیدی ہے۔

بھارتی میڈیا رپورٹس کے مطابق بگ باس سیزن 11 سے شہرت پانے والی حنا خان چھوٹی اسکرین کے بعد اب بڑی اسکرین پر بھی اداکاری کے جوہر دکھاتی نظر آئیں گی۔اداکارہ کے قریبی ذرائع کا کہنا ہے کہ حنا بہت جلد ایک فلم کی شوٹنگ شروع کر رہی ہیں جس میں وہ ایک خود مختار لڑکی کا کردار ادا کریں گی۔

حنا خان نے بھی بالی ووڈ میں ڈیبیو کی تصدیق کرتے ہوئے کہا کہ میری فلم کی کہانی ایک خاتون کردار کے گرد گھومتی ہے جب کہ مجھے جان کر خوشی ہوئی کہ یہ فلم ایک خاص وقت اور مقام سے بھی تعلق رکھتی ہے جہاں ہم شہری زندگی کے ہنگاموں اور افراتفری سے دور رہیں گے۔ میں اس نئے میڈیم میں کام کرنے کے بارے میں بہت پرجوش ہوں۔

واضح رہے کہ حسین خان کی ہدایت کاری میں بننے والی فلم کی کہانی 90 کی دہائی میں کشمیر میں پیش آنے واقعے پر مبنی ہے جس میں لیجنڈ اداکارہ فریدہ جلال اداکارہ کی دادی کا کردار نبھا رہی ہیں ۔

سنی دیول کا فلموں میں کام کے حوالے سے اہم انکشاف

 ممبئی: بالی ووڈ کے معروف اداکار سنی دیول نے انکشاف کیا ہے کہ وہ کبھی بھی فلم کا اسکرپٹ نہیں پڑھتے بس سرسری طور پر کہانی سن کر فلم کرنے کی حامی بھرلیتے ہیں۔

بھارتی میڈیا رپورٹس کے مطابق سنی دیول نے ایک انٹرویو میں انکشاف کیا  کہ میں بہت ہی غیر معمولی شخص ہوں اور ہمیشہ اپنے دل کی سنتا ہوں یہی وجہ ہے کہ فلموں کے معاملے میں بھی اپنے دل کے ہی فیصلے کو ترجیح دیتا ہوں۔

سنی دیول نے کہا کہ میں صرف فلم کی کہانی سرسری طور پر سنتا ہوں لیکن اُس کی گہرائی میں نہیں جاتا اگر فلم کی کہانی اچھی ہوتی ہے تو پھر حامی بھر لیتا ہوں۔ جب کہ آج کل کی مناسبت سے فلموں کی کہانی سننا ضرورت بن گئی ہے لیکن اُس کے باوجود میں آج بھی فلم کا اسکرپٹ نہیں پڑھتا۔

اداکار نے کہا کہ فلم کو مکمل کرنے کے لئے میں صرف ہدایت کار سے آئیڈیا لیتا ہوں اور پھر جو اسکرپٹ رائٹر ہوتا ہے اس سے بات کرتا ہوں اور اس کو سنتا ہوں کیوں کہ یہی وہ چیز ہوتی ہے جو آخر کار اسکرین پر نظر آتی ہے۔

’جتنا یہ پورا ہے اس سے لمبا تو عافیہ کا نام ہے‘

بولی وڈ کنگ شاہ رخ خان کی فلم ’زیرو‘ کا انتظار مداح بےصبری سے کررہے ہیں اور اب فلم کا پہلا گانا جاری کردیا گیا ہے۔

’میرے نام تو‘ نامی رومانوی گانے میں شاہ رخ خان کے ہمراہ انوشکا شرما کو دکھایا گیا، جس میں فلم کے مرکزی کردار کی رومانوی کہانی کو پیش کیا گیا ہے۔

اس گانے میں ہولی کے تہوار کو دکھایا گیا، گانے کی موسیقی اجے اتل نے دی ہے۔

گانے کی گلوکاری ابھے جودہا پرکار نے کی ہے، جبکہ اس گانے کو ارشد کامل نے تحریر کیا۔

یاد رہے کہ شاہ رخ خان فلم ’زیرو‘ میں چھوٹے قد کے آدمی کا کردار ادا کرتے نظر آئیں گے، کترینہ کیف فلم میں کامیاب اداکارہ بنی جبکہ انوشکا شرما کو امیر گھرانے سے تعلق رکھنے والی معذور لڑکی کے روپ میں دکھایا گیا۔

فلم میں شاہ رخ خان باؤا سنگھ، انوشکا شرما عافیہ اور کترینہ کیف ببیتا نامی کردار نبھاتی نظر آئیں گی۔

شاہ رخ خان نے بھی گزشتہ روز اس گانے کی ریلیز کا اعلان کرنے کے لیے اپنے سوشل میڈیا اکاؤنٹس پر لکھا تھا کہ ’باؤا کو پیار ہے، عافیہ اس ہی کے نام ہے‘۔

جس کے بعد انوشکا نے بھی اپنے اکاؤنٹ پر گانے کا پوسٹر شیئر کرتے ہوئے لکھا کہ ’جتنا یہ پورا ہے اس سے لمبا تو عافیہ یوسفزئی بھنڈر کا نام ہے، پھر بھی مجھے کہتا ہے تو میرے نام ہے‘۔

خیال رہے کہ فلم کا پہلا ٹریلر بھی رواں ماہ ریلیز کیا گیا تھا، جسے مداحوں نے بےحد پسند کیا۔

فلم رواں سال 21 دسمبر کو سینما گھروں میں نمائش کے لیے پیش کی جائے گی۔

بولی وڈ شخصیات پاکستانی گلوکار کے گانے کے مداح ہوگئے

پاکستانی گلوکار عاصم اظہر نے معروف بولی وڈ شخصیات کو نئے گانے سے اپنا مداح بنالیا ہے۔

گلوکار کا نیا گانا ‘جو تو نہ ملا’ رواں ہفتے ریلیز ہوا جس کی تعریف معروف بولی وڈ پروڈیوسر و ڈائریکٹر کرن جوہر نے ایک ٹوئیٹ کرتے ہوئے ان الفاظ میں کی ‘ بہت ہی خوبصورت گانا’۔

یہ گانا عاصم اظہر نے گانے کے ساتھ خود کمپوز بھی کیا جبکہ کنال ورما نے اسے تحریر کیا۔

اس کی ویڈیو کی ہدایات یاسر جسوال نے دیں جبکہ اس میں عاصم اظہر اور اقرا عزیز جلوہ گر ہوئے۔

کرن جوہر سے ہٹ کر معروف بولی وڈ موسیقار سلیم مرچنٹ نے بھی اس کی تعریف کرتے ہوئے لکھا ‘ کمپوزیشن، پروڈکشن اور عاصم اظہر کی آواز سب خوبصورت ہیں’۔

اسی طرح ایک اور میوزک ڈائریکٹر، گلوکار امل ملک نے بھی گانے کو سراہا۔

گلوکار نے جمعے کو اپنی ایک ٹوئیٹ یہ بھی بتایا کہ ان کا گانا پاکستان میں یوٹیوب پر نمبرون ٹرینڈ ہورہا ہے۔

بدھ کو ایک ٹوئیٹ میں انہوں نے دعویٰ کیا تھا کہ ان کے گانے کی میوزک ویڈیو ایک دن میں سب سے زیادہ ویووز والی ویڈیو بن چکی ہے جو کہ پاکستان اور بھارت دونوں جگہ گوگل کی ویڈیو شیئرنگ سائٹ پر ٹرینڈ ہورہی ہے۔

سارہ علی خان کس بیماری سے جنگ لڑرہی ہیں؟

ممبئی: اداکار سیف علی خان کی بیٹی اور بالی ووڈ اداکارہ سارہ علی خان نے حال ہی میں اپنے بڑھے ہوئے وزن اور بیماری سے جنگ لڑنے کی کہانی میڈیا پر شیئر کی ہے۔

فلم’کیدار ناتھ‘ سے ڈیبیو کرنے والی اداکارہ جو آج ٹی وی اسکرین پر خوبصورت اور فٹ نظر آتی ہیں مگر وہ چند سال قبل تک بہت موٹی تھیں اور ان کا وزن 96 کلوگرام تھا تاہم یہ بات بہت کم لوگ جانتے ہیں کہ سارہ علی خان پولی سسٹک اووری ڈیزیز (پی سی او ڈی) میں مبتلا ہیں۔

یہ بیماری خواتین میں عام ہیں اور بھارت میں تقریباً ہر 10 میں سے ایک خاتون اس بیماری میں مبتلا ہے۔ حال ہی میں بالی ووڈ پروڈیوسر کرن جوہر کے شو’کافی ود کرن‘ میں سارہ علی خان نے اپنی بیماری سے متعلق کھل کربات کی۔ انہوں نے کہا وہ اب بھی پی سی او ڈی میں مبتلا ہیں اور اسی بیماری کی وجہ سے ان کا وزن بے تحاشہ بڑھا ہوا تھا۔ دراصل یہ بیماری ایک ہارمونل مسئلہ ہے اس بیماری میں خواتین کا وزن بے تحاشہ بڑھ جاتا ہے اور بہت مشکل سے کم ہوتا ہے۔

اس کے علاوہ اس بیماری میں مبتلا خواتین کی جلد اوربالوں کے ساتھ مسائل پیدا ہوجاتے ہیں جب کہ پی سی او ڈی میں مبتلا خواتین کو 40 سال کے بعد ذیابطیس ٹائپ 2 ہونے اور بانجھ پن کا خطرہ بھی ہوتا ہے۔ پی سی او ڈی کا کوئی مستقل علاج نہیں تاہم اس بیماری پر قابو پایا جاسکتا ہے اور ایک صحت مند زندگی گزاری جاسکتی ہے۔

سارہ علی خان نے کہا جب میں کولمبیا میں تھی اور میرا وزن 96 کلوگرام تھا اس وقت مجھے احساس ہوا کہ میں اداکارہ بننا چاہتی ہوں لیکن اتنے وزن کے ساتھ یہ بہت مشکل تھا تاہم میں نے اپنی بے تحاشہ کھانے کی عادت پر قابو پایا اوراپنے وزن کو 96 سے 52 کلوگرام تک لانے کےلیے کڑی محنت کی۔ نا صرف جم جاکر اپنے وزن کو کم کیا بلکہ صحت بخش غذائیں بھی کھائیں۔

واضح رہے کہ سارہ علی خان اپنی ڈیبیو فلم ’کیدار ناتھ‘ کے بعد رنویر سنگھ کے ہمراہ فلم ’سمبا‘ کے ذریعے بالی ووڈ میں جلوہ گر ہوں گی لیکن بالی ووڈ میں انٹری سے قبل ہی سارہ علی خان کا شمار انڈسٹری کی خوبصورت اداکاراؤں میں ہونے لگا ہے اور وہ  ان تمام خواتین کے لیے مثال ہیں جو بڑھے ہوئے وزن کے باعث مشکل کا شکار ہیں۔

سلمان خان کے والد کو دھمکی آمیز پیغام بھیجنے والا شخص گرفتار

ممبئی: بالی ووڈ کے سلطان سلمان خان کے والد سلیم خان کو ’چھوٹا شکیل گینگ‘ سے تعلق رکھنے کی دھمکی دینے والے شخص کو گرفتار کرلیا گیا۔

بھارتی میڈیا کے مطابق ریاست اتر پردیش کے شہر الہ آباد سے تعلق رکھنے والے شہری شاہ رخ غلام نبی نے سلمان کے پرسنل سیکریٹری کا نمبر حاصل کرکے اُن سے رابطہ کرنے کی کوشش کی اور اپنی خواہش کا اظہار کرتے ہوئے کہا کہ وہ اداکار کے ساتھ کام کرنا چاہتا ہے۔

سیکریٹری کی جانب سے انکار کیے جانے کے بعد غلام نبی نے ممکنہ طریقے سے سلمان خان کے والد سلیم خان سے رابطہ کیا اورانہیں دھمکی دیتے ہوئے کہا کہ اگر سلمان خان کے ساتھ کام کرنے کی اجازت نہیں دی گئی تو انہیں سنگین نتائج بھگتنے پڑیں گے کیوں کہ میرا تعلق ’چھوٹا شکیل گینگ‘ سے ہے۔

اس صوتحال کے مد نظر سیکریٹری نے باندرا کے پولیس اسٹیشن میں دھمکی دینے والے شخص کے خلاف ایف آئی آر درج کرانے کا فیصلہ کیا تاہم پولیس نے بروقت کارروائی کرتے ہوئے نمبر کی مدد سے ملزم کو الہ آباد سے گرفتار کرلیا۔

پی ایس ایل 4 میں 44 سالہ مصباح الحق منتخب، کئی نوجوان منہ دیکھتے رہ گئے

لاہور: پی ایس ایل فورکے ڈرافٹ میں 44سالہ مصباح الحق منتخب جبکہ کئی نوجوان کرکٹر منہ دیکھتے رہ گئے۔

اسلام آباد میں ہونے والے پی ایس ایل فور ڈرافٹ میں تمام فرنچائز ٹیموں نے اپنے 16رکنی اسکواڈز مکمل کرتے ہوئے سپلیمنٹری کھلاڑی بھی منتخب کرلیے، اسلام آباد یونائیٹڈ کا مینٹور بننے کے بجائے بطور پلیئر کھیلنے کیلیے بے تاب مصباح الحق کو حیران کن طور پر پشاور زلمی نے اپنی ٹیم میں شامل کرلیا۔

انٹرنیشنل کرکٹ سے ریٹائرڈ 44سالہ کھلاڑی گزشتہ سیزن میں اسلام آباد کی جانب سے کھیلتے ہوئے اچھی فارم میں نظر نہیں آئے تھے۔ ڈیرن سیمی کی موجودگی میں پشاور زلمی کے پاس قیادت کا فقدان بھی نہیں تھا، اس کے باوجود مصباح الحق کو منتخب کیا گیا۔

دوسری جانب ٹی ٹوئنٹی فارمیٹ کا تقاضا ہونے کے باوجود کئی نوجوان کرکٹرز کو کسی ٹیم نے بھی منتخب نہیں کیا،اظہر علی اور اسد شفیق جیسے سینئرزکو نظر انداز کردیا گیا، عبدالرزاق نے کم بیک کیلیے رواں سال ڈومیسٹک کرکٹ بھی کھیلی،ان سمیت عمران نذیر کی بھی پی ایس ایل کھیلنے کی خواہش پوری نہیں ہوسکی۔

ماضی میں عالمی ٹی ٹوئنٹی رینکنگ میں سر فہرست رہنے والے عمرگل،اسپاٹ فکسنگ اسکینڈل 2010  میں سزا پانے والے سلمان بٹ اور محمد آصف بھی کسی ٹیم میں جگہ نہیں بنا سکے، ،فواد عالم کو بھی کسی نے منتخب نہ کیا۔

کوئٹہ گلیڈی ایٹرز نے عمراکمل کو منتخب کیا، ساتھ احمد شہزاد کو بھی سپلیمنٹری کیٹیگری میں لے لیا،اوپنر کو بوقت ضرورت ہی طلب کیا جائے گا۔

دپیکا کی طرح پریانکا نے بھی 2 شادیاں کرنے کا منصوبہ بنا لیا

بولی وڈ کی ڈمپل گرل دپیکا پڈوکون اور پگی چوپس پریانکا چوپڑا کے درمیاں جہاں اداکاری اور فیشن میں غیر اعلانیہ مقابلہ دیکھا جاتا رہا ہے، وہیں اب یوں لگتا ہے جیسے دونوں نے شادی کے حوالے سے بھی ایک دوسرے کو پیچھے چھوڑنے کا منصوبہ بنا لیا ہے۔

جہاں پریانکا چوپڑا کو امریکی منگیتر نک جونس نے منگنی پر 3 کروڑ روپے سے زائد کی انگوٹھی پیش کی تھی۔

وہیں دپیکا پڈوکون کو رنویر سنگھ نے نک جونس سے بھی زیادہ قیمتی انگوٹھی دی، رپورٹس کے مطابق دپیکا کو ملنے والی انگوٹھی قیمت 5 کروڑ روپے تک تھی۔

اسی طرح جہاں دپیکا اور رنویر نے یورپی ملک اٹلی کے پرتعیش ہوٹل میں شادی کرکے تقریبا ساڑھے تین کروڑ روپے تک خرچ کیے۔

اب وہیں اطلاعات ہیں کہ پریانکا چوپڑا اور نک جونس بھی بھارتی ریاست راجستھان کے شہر جودھپور کے پر تعیش ہوٹل میں شادی کرکے تقریبا 4 کروڑ روپے تک خرچ کرنے کا ارادہ رکھتے ہیں۔

دپیکا اور رنویر نے اٹلی کے سیاحتی مقام لیک کومو میں شادی کی تھی—فائل فوٹو: فیس بک
دپیکا اور رنویر نے اٹلی کے سیاحتی مقام لیک کومو میں شادی کی تھی—فائل فوٹو: فیس بک

یہی نہیں بلکہ جہاں دپیکا اور رنویر نے بھی بیک وقت 2 شادیاں یعنی مختلف رسومات کیں، وہیں اب نک جونس اور پریانکا بھی یہی کرنے جا رہے ہیں۔

دپیکا اور رنویر نے 14 نومبر کو کونکنی اور 15 نومبر کو سندھی روایات کے مطابق شادی کی تھی۔

اور اب خبریں ہیں کہ پریانکا چوپڑا اور نک جونس بھی 2 دن تک جاری رہنے والی شادی کی تقریبات میں 2 روایات کے مطابق شادی کی رسومات ادا کریں گے۔

رنویر اور دپیکا نے کونکنی اور سندھی روایات کے مطابق شادی کی تھی—فوٹو: دیپ ویر انسٹاگرام
رنویر اور دپیکا نے کونکنی اور سندھی روایات کے مطابق شادی کی تھی—فوٹو: دیپ ویر انسٹاگرام

ٹائمز آف انڈیا نے اپنی رپورٹ میں بتایا کہ نک جونس 22 نومبر کو امریکا سے شادی کے لیے بھارت روانہ ہوئے، جہاں وہ سب سے پہلے دہلی میں قیام کریں گے۔

رپورٹ کے مطابق خبریں ہیں کہ نک جونس اور پریانکا چوپڑا نے بھارتی وزیر اعظم نریندر مودی کو بھی شادی کی دعوت دینے کا منصوبہ بنا لیا ہے اور دونوں ان سے دہلی میں مل کر انہیں دعوت پیش کریں گے۔

رپورٹ کے مطابق ممکنہ طور پر نریندر مودی ان کی شادی میں شرکت کریں گے اور اگر انہوں نے ان کی شادی میں شرکت کی تو وہ ایک سال بعد کسی شوبز شخصیت کی شادی میں شرکت کریں گے۔

پریانکا اور نک جودھپور کے تاریخی ہوٹل امید بھگوان پیلس میں شادی کریں گے—فوٹو: این ڈی ٹی وی
پریانکا اور نک جودھپور کے تاریخی ہوٹل امید بھگوان پیلس میں شادی کریں گے—فوٹو: این ڈی ٹی وی

اس سے قبل نریندر مودی انوشکا شرما اور ویرات کوہلی کی ممبئی میں ہونے والی شادی کی تقریب میں شریک ہوئے تھے۔

ساتھ ہی رپورٹ میں بتایا گیا کہ نک جونس اور پریانکا چوپڑا بھی 2 روایات کے مطابق شادی کریں گے۔

رپورٹ کے مطابق نک جونس اور پریانکا پہلے ہندی اور بعد ازاں عیسائی رسومات کے مطابق شادی کریں گے۔

ان کی شادی جودھپور کے معروف اور تاریخی ہوٹل امید بھگوان پیلس میں ہونے کا امکان ہے، تاہم اس حوالے سے جوڑے نے کوئی اعلان نہیں کیا۔

نک اور پریانکا ہندو اور عیسائی رسومات کے مطابق شادی کریں گے—فائل فوٹو: این ڈی ٹی وی
نک اور پریانکا ہندو اور عیسائی رسومات کے مطابق شادی کریں گے—فائل فوٹو: این ڈی ٹی وی
Google Analytics Alternative