انٹر ٹینمنٹ

’’پھنے خان‘‘ میں ایشوریا کے کردار کی پیشکش ہوئی تھی، مہوش حیات

 لندن: نامور پاکستانی اداکارہ مہوش حیات نے انکشاف کیا ہے کہ انہیں  بالی ووڈ فلم ’’پھنے خان‘‘اور ’’ڈیڑھ عشقیہ‘‘میں کام کی پیشکش ہوئی تھی لیکن انہوں نے بالی ووڈ پر پاکستانی فلموں کو ترجیح دی۔

فلم’’پنجاب نہیں جاؤں گی‘‘، ’’جوانی پھر نہیں آنی‘‘ اور ’ایکٹران لا‘جیسی کامیاب فلموں میں اداکاری کے جوہر دکھانے والی اداکارہ مہوش حیات کا شمار پاکستان کی صف اول کی اداکاراؤں میں ہوتاہے۔ مہوش حیات نے بیک ٹوبیک سپر ہٹ فلمیں دے کر ثابت کردیا ہے کہ پاکستانی اداکاروں کو کامیابی کے لیے  بالی ووڈ کی ضرورت نہیں۔ تاہم ایسا نہیں ہے کہ انہیں دیگر پاکستانی فنکاروں کی طرح بالی ووڈ سے کام کی پیشکش نہیں ہوئی تاہم انہوں نے بالی ووڈ کے بجائے پاکستان میں کام کرنے کو ترجیح دی۔

بی بی سی ایشین نیٹ ورک کو دئیے گئے انٹرویو میں مہوش حیات نے تمغہ امتیاز کے دوران ہونے والے تنازعات اور بالی ووڈ پیشکش سے متعلق کھل کر بات کی۔ مہوش حیات نے بتایا کہ انہیں تمغہ امتیاز ملنے کے اعلان کے بعد جس طرح میڈیا ا ور سوشل میڈیا پر تنقید کا نشانہ بنایاگیا اس چیز نے انہیں بہت تکلیف پہنچائی۔

پاک بھارت کشیدگی کے بعد پاکستانی فنکاروں پر بالی ووڈ کے دروازے بند ہونے کے بارے میں اظہار خیال کرتے ہوئے مہوش حیات نے کہا کہ ہمارے اداکار جو بالی ووڈ میں جاکر کام کرتے ہیں انہیں وہاں وہ عزت نہیں دی جاتی جس کے وہ مستحق ہیں۔ یہاں تک کہ ہمارے فنکار اپنی فلموں کے پریمیئر تک میں شریک نہیں ہوسکے جس کی مثال سجل علی ہیں جنہوں نے فلم ’مام‘ میں سری دیوی کی بیٹی کا کردار نبھایا تھا لیکن وہ نہ تو فلم کی تشہیر میں حصہ لے سکیں اورنہ ہی پریمیئر میں۔ یہ بہت افسوسناک بات ہے کیونکہ عزت نفس سے بڑھ کر کچھ نہیں ہوتا۔ ہمیں اپنے سینماؤں کو آباد کرنے کی ضرورت ہے، ہمارے یہاں بہترین ہدایت کار ہیں، ہماری فلمیں بہت اچھی ہیں۔

مہوش حیات نے بالی ووڈ میں کام کرنے کے حوالے سے کہا کہ وہ اپنے ملک میں رہ کر پاکستان کے لیے کام کرناچاہتی ہیں اور یہی ان کا فیصلہ ہے۔ دوران انٹرویو جب ان سے پوچھا گیا کہ انہیں بالی ووڈ فلم ’’ڈیڑھ عشقیہ‘‘ میں اداکارہ ہماقریشی اور’’پھنے خان‘‘ میں ایشوریارائے کے کردار کی پیشکش ہوئی تھی تاہم انہوں نے یہ دونوں کردار ٹھکرادئیے کے جواب میں مہوش نے کہا فلم ’’ڈیڑھ عشقیہ‘‘ میں انہیں اداکار ارشد وارثی کے ساتھ ایک سین پر اعتراض تھا جس پر انہوں نے اس سین کو فلم سے ہٹانے یا اس میں تبدیلی کے لیے کہا لیکن ان کی یہ بات ماننے سے انکار کردیا گیا جس کے باعث انہوں نے فلم میں کام کرنے سے انکار کردیا۔ مہوش حیات نے کہا کہ وہ اپنے دل کی سنتی ہیں اور ان کا دل جو کہتا ہے صرف وہی کرتی ہیں اوروہ بالی ووڈ میں کام کرنا نہیں چاہتیں۔

کچھ عرصہ قبل بالی ووڈ کے شہنشاہ امیتابھ بچن نے پاک بھارت کشیدگی کے بعد سوشل میڈیا پردونوں ممالک کے درمیان تعلقات کے موضوع پر بننے والی فلم میں کام کرنے سے معذرت کرلی تھی اس فلم میں وہ ایک پاکستانی شخص کا کردار اداکرنے والے تھے۔ فلم میں کام کرنے سے انکار کرنے پر مہوش حیات نے سوشل میڈیا پر سخت غصے کا اظہار کرتے ہوئے امیتابھ بچن کھری کھری سنادی تھیں۔ اس حوالے سے بات کرتے ہوئے مہوش حیات نے کہاامیتابھ بچن کو دیکھتے ہوئے ہم بڑے ہوئے ہیں ان کے لیے میرے دل میں بہت عزت ہے، وہ صرف اداکار نہیں بلکہ لیجنڈ ہیں اور ایک لیجنڈ سے مجھے یہ امید نہیں تھی کہ وہ ایسا کریں گے اور اپنے قدم پیچھے ہٹالیں گے ان کے اس عمل سے مجھے بہت مایوسی ہوئی تھی۔

نیوزی لینڈ مساجد حملوں پر فلم بنانے کا فیصلہ

قاہرہ: مصر سے تعلق رکھنے والے ہدایت کار نے نیوزی لینڈ کے شہر کرائسٹ چرچ کی مساجد پر ہونےو الے دہشتگردانہ حملوں پر فلم بنانے کا فیصلہ کیا ہے۔

رواں سال 15 مارچ کا دن دنیا کی تاریخ میں سیاہ ترین دن کے طور پر یاد رکھاجائے گا۔ 15 مارچ کو نیوزی لینڈ کے شہر کرائسٹ چرچ کی 2 مساجد پر عیسائی انتہاپسند نے ظلم و بربریت کی انتہا کرتے ہوئے 51 مسلمانوں کو شہید کردیا تھا۔

اس حملے کا اثر پوری دنیا پر پڑا اوردنیا بھر نے مسلمانوں کے ساتھ اظہار یکجہتی کیاجس میں نیوزی لینڈ کی وزیراعظم جینسڈا آرڈرن پیش پیش رہیں اور اپنی نرم طبعیت اورمسلمانوں سے اظہار یکجہتی سے دنیا بھر کے مسلمانوں کا دل جیت لیا۔

15 مارچ کو ہونے والے ان حملوں پر مصر سے تعلق رکھنے والےہدایت کار معیز مسعود نے فلم بنانے کا فیصلہ کیاہے۔ فلم کاٹائٹل ’ہیلو برادر‘ رکھا گیا ہے۔ یہ ٹائٹل حملے میں شہید ہونے والے 71 سالہ شخص کے آخری الفاظ سے متاثر ہوکر رکھاگیا ہے۔

معیز مسعود کا فلم بنانے کے حوالے سے کہنا ہے کہ 15 مارچ کو دنیا نے انسانیت کے خلاف ناقابل یقین جرم ہوتے ہوئے دیکھا ۔ فلم کی کہانی لوگوں کو متاثرین کے قرب لانے میں مدد کرے گی جس سے ہم سب ایک دوسرے کو بہتر انداز میں سمجھ سکیں گے۔ اس کے علاوہ فلم میں نفرت، بنیاد پرستی اور دہشتگردی کی جڑکی وجہ کو دکھایاجائےگا۔

اقراء نے انسٹاگرام پر ساتھی اداکاروں کو یاسر کی وجہ سے ان فالو کردیا؟

پاکستانی اداکارہ اقراء عزیر نے سوشل میڈیا پر اپنے انسٹاگرام اکاؤنٹ سے شوبز انڈسٹری سے تعلق رکھنے والے اپنے تقریباً تمام دوستوں کو ان فالو (unfollow) کردیا۔

ان کے انسٹاگرام اکاؤنٹ کو دیکھا جائے تو اداکارہ اس وقت صرف اپنے قریبی دوست اداکار یاسر حسین کو فالو کررہی ہیں۔

رپورٹس کہ مطابق اقراء نے ایسا حال ہی میں اپنے دو قریبی دوستوں یاسر حسین اور ہانیہ عامر کے درمیان ہوئے جھگڑے کے باعث کیا۔

دراصل ہوا کچھ یہ تھا کہ اداکارہ ہانیہ عامر نے چند روز قبل انسٹاگرام پر اپنی ایک تصویر شیئر کی تھی جس پر کیل مہاسوں کی مشکلات کا ذکر کیا تھا۔

جس کے بعد یاسر حسین سے ایک مداح نے ہانیہ کے حوالے سے پوچھا تو اداکار نے ہانیہ کے لیے دانے دار کا لفظ استعمال کیا۔

بعدازاں سوشل میڈیا پر یاسر حسین کو سخت تنقید کا سامنا کرنا پڑا جبکہ ہانیہ عامر کو مداحوں کے ساتھ ساتھ شوبز انڈسٹری سے تعلق رکھنے والی شخصیات نے بھی سپورٹ کیا۔

جس کے بعد ہانیہ اور یاسر دونوں کے درمیان جھگڑا شروع ہوگیا، جبکہ ان دونوں نے ایک دوسرے کو انسٹاگرام سے بھی ان فالو کردیا۔

دوسری جانب اقراء عزیز نے اس حوالے سے تو کوئی بیان جاری نہیں کیا، البتہ اپنے انسٹاگرام اکاؤنٹ سے یاسر کے علاوہ تمام شوبز دوستوں کو ان فالو کردیا جس میں اداکار عمران اشرف بھی شامل ہیں۔

یاد رہے کہ اقراء اور عمران نے ایک ساتھ کامیاب ڈرامے ‘رانجھا رانجھا’ میں کام کیا تھا۔

ساتھی اداکاروں کو انسٹاگرام سے ان فالو کرنے کے حوالے سے اداکارہ نے ایک انٹرویو میں بتایا کہ اس کا ہانیہ اور یاسر کے تنازع سے کوئی تعلق نہیں۔

جبکہ انہوں نے یہ بھی کہا کہ انسٹاگرام سے ان فالو کرنے کا یہ مطلب نہیں کہ وہ ذاتی زندگی میں بھی ان اداکاروں سے دوستی ختم کررہی ہوں، اداکارہ کے مطابق یہ سب ان کی زندگی میں پہلے جیسے ہی اہم ہیں۔

یاد رہے کہ اس سے قبل بھی اقراء اپنے دوست یاسر کی حمایت میں کئی بار سامنے آچکی ہیں۔

سوشل میڈیا پر ان دونوں کی منگنی اور جلد شادی کی افواہیں بھی سامنے آتی رہتی ہیں، جبکہ یہ دونوں بھی ایک دوسرے کے ساتھ کئی تصاویر اور ویڈیوز شیئر کرتے رہتے ہیں، جنہیں دیکھ کر ایسا محسوس ہوتا ہے کہ یہ دونوں ایک دوسرے کو پسند کرتے ہیں۔

یاسر حسین نے بھی چند روز قبل اپنے انسٹاگرام پر مداح کے سوال کا جواب دیتے ہوئے انکشاف کیا تھا کہ انہوں نے منگنی کرلی ہے، جس کے بعد اندازہ لگایا جارہا ہے کہ انہوں نے اقراء سے ہی منگنی کی ہے۔

شمعون عباسی کی ’درج‘ کو دنیا بھر میں ریلیز تاریخ مل گئی

پاکستانی اداکار شمعون عباسی کی فلم ’درج‘ کا پہلا ٹریلر چند روز قبل مداحوں کے ساتھ شیئر کیا گیا تھا، جس کی ریلیز ہونے کی تاریخ کا اب اعلان کردیا گیا۔

فلم رواں سال 11 اکتوبر کو دنیا بھر میں نمائش کے لیے پیش کردی جائے گی۔

درج امریکا، برطانیہ، کینیڈا، یو اے ای، کویت، بحرین، عمان اور قطر میں ریلیز ہوگی۔

اس فلم کی کہانی پنجاب سے تعلق رکھنے والے دو بھائیوں اور لاپتہ افراد کی تلاش پر مبنی ہے۔

’درج‘ کی ہدایات بھی شمعون عباسی نے دی ہے، جب کہ انہوں نے اس کی کہانی بھی لکھی ہے۔

فلم کی کاسٹ میں جہاں خود شمعون عباسی ایکشن دکھاتے نظر آئیں گے، وہیں ان کے ساتھ مائرہ خان، شیری شاہ، نعمان جاوید اور دیگر اداکار شامل ہیں۔

شمعون عباسی کا اپنی فلم کے حوالے سے ایک انٹرویو میں کہنا تھا کہ ’ہر کوئی کامیڈی فلمیں بنانے میں مصروف ہے، کیوں کہ لوگوں کو یہ زیادہ پسند آسکتی ہیں اور ایسی فلموں کی تشہیر بھی آسان ہے، اسپانسرز بھی باآسانی مل جاتے ہیں، ہمیں اپنی فلم کے لیے کوئی اسپانسر نہیں ملا، نہ کیس چینل نے ہماری فلم کی تشہیر کی، اس کے باوجود ہم نہیں رکے اور اپنی فلم پر کام کرتے رہے۔

’درج‘ کو شام فلم کے بینر تلے ریلیز کیے جائے گا۔

ماہرہ خان سمیت دیگرفنکارہانیہ عامر کی حمایت میں بول پڑے

کراچی: اداکارہ ہانیہ عامرنے اپنی بغیر میک اپ تصاویر سوشل میڈیا پر شیئر کرکے معاشرے میں قائم خوبصورتی کے معیارکے خلاف آواز اٹھائی ہے جس پر ماہرہ خان سمیت شوبز کے دیگر فنکار بھی ان کی آواز میں آواز ملانے لگے ہیں۔

اداکارہ ہانیہ عامر نے چند روز قبل انسٹاگرام پراپنی بغیر میک اپ  دوتصاویر شیئر کی تھیں جن میں ان کے چہرے پر کیل مہاسے اوردانے (ایکنی) نمایاں تھے جو کافی بدنما لگ رہے تھے۔ ہانیہ نے یہ تصاویر شیئر کرکے معاشرے میں قائم خوبصورتی کے معیارات پر سوالات اٹھاتے ہوئے کہا تھا کہ میری جلد میری پہچان کیوں ہے، خوبصورتی کے یہ معیار آخرکس نے بنائے ہیں کہ صاف اورشفاف جلد ہی خوبصورتی کی علامت ہے۔ اس کے علاوہ ہانیہ نے یہ بھی بتایا کہ چہرے پرموجود ان کیل مہاسوں اور دانوں کی وجہ سے وہ کس قدر پریشان رہیں، ان کے رات دن روتے ہوئے گزرے اور وہ عدم تحفظ کا شکارہونے لگی تھیں۔

جہاں اداکارہ ہانیہ نے اپنی تصاویر سوشل میڈیا پر شیئر کرکے اپنے خوف اور عدم تحفظات کو لوگوں کے ساتھ شیئرکیا تھا، وہیں اداکاریاسرحسین نے ان کی پوسٹ کو غیر سنجیدہ لیتے ہوئے انہیں مذاق کا نشانہ بنا ڈالا۔ یاسر حسین کے مذاق اڑانے پر ہانیہ سے رہانہ گیا اور انہوں نے یاسر کو کھری کھری سناتے ہوئےکہا کہ لوگ جس طرح دوسرے لوگوں کے عدم تحفظات کو نشانہ بناکر مذاق اڑاتے ہیں یہ نہایت بدتر اور قابل نفرت ہے۔ یہ مذاق نہیں بے عزتی ہے، میں نہیں ہنسی، کوئی دوسرا بھی نہیں ہنس رہا۔

نامور پاکستانی اداکارہ ماہرہ خان نے ہانیہ عامر کی پوسٹ کو شیئر کرتے ہوئے ان کی ہمت کی تعریف کی اورکہا میں بھی نہیں ہنس رہی، کوئی اور ہانیہ عامر نہیں ہوسکتی، مجھے تم پر فخر ہے کہ تم نے اتنی ہمت کا مظاہرہ کیا۔

اداکارہ سائرہ شہروز نے بھی ہانیہ عامر کی پوسٹ پر جواب دیتے ہوئے لکھا خراب جلد، بالوں کا گرنا اوروزن کا بڑھنا، یہ چیزیں ہم پر اثراندازہوتی ہیں، اکثر ہم انہیں سمجھ نہیں پاتے اورخود سے ہی لڑنے لگ جاتے ہیں۔ تاہم آخر میں سب ٹھیک ہوجاتا ہے۔

گلوکارہ و اداکارہ میشا شفیع نے ہانیہ عامر کی تصاویر پر تبصرہ کرتے ہوئے انہیں بہادر اورخوبصوت قراردیا۔

ڈاکٹر عامر لیاقت حسین کی اہلیہ طوبیٰ عامرنے ایک مختصر ویڈیو کلپ اپنے انسٹاگرام اکاؤنٹ پر شیئر کیا جس میں وہ کہتی نظر آرہی ہیں کہ جیسی تصویر میں نظر آتی ہے ویسی کسی کی بھی جلد نہیں ہوتی سب کے ساتھ مسائل ہوتے ہیں اورخواتین گھروں میں اپنی جلد کے حوالے سے پریشان ہوتی ہیں۔ طوبیٰ نے ہانیہ کی رائے کو بھی سراہا جس میں انہوں نے کہا تھا کہ اپنی جلد کو اپنی شخصیت کی پہچان بننے نہ دیں۔

ہانیہ عامرکے بعد مہوش حیات نے بھی خوبصورتی کے معیارپرسوال اٹھادئیے

کراچی: نامورپاکستانی اداکارہ ہانیہ عامرکے بعد مہوش حیات نے بھی سوشل میڈیا پراپنی بغیر میک اپ تصویر شیئر کرکے معاشرے میں قائم خوبصورتی کے معیار پر سوال اٹھادئیے ہیں۔

اداکارہ ہانیہ عامرکی بغیرمیک اپ شیئر کی جانے والی تصویر جس میں ان کے چہرے پر کیل مہاسے اور دانے(ایکنی) نظر آرہے ہیں، نے اب ایک تحریک کی صورت اختیارکرلی ہے۔ ماہرہ خان، سائرہ شہروز سمیت شوبز کی نامور اداکارائیں ہانیہ عامرکے اس اقدام کو سراہ رہی ہیں اوراب اداکارہ مہوش حیات نے بھی ہانیہ کے نقش قدم پر چلتے ہوئے اپنی تصویر شیئر کی ہے جس میں ان کے چہرے پردانے نظرآرہے ہیں۔

مہوش حیات نے اپنی تصویرکے ساتھ معاشرے میں قائم خوبصورتی کے معیار(جوصرف صاف اور شفاف جلد کوہی مانا جاتا ہے) کے خلاف آواز اٹھاتے ہوئے کہا کہ اسٹوڈیو لائٹس، کیمرہ اورگلیمرس میک اپ سے ہٹ کر ہم سب جلد کے ایک جیسے مسائل سے دوچار ہیں اور ہمیں بھی کسی عام لڑکی طرح اپنی جلد کو لے کرعدم تحفظ کا سامنا ہوتا ہے۔ ایک عورت ہونے کے ناطے چلو اسے قبول کرتے ہیں۔

واضح رہے کہ ہانیہ عامر نے چند روز قبل اپنی بغیر میک اپ دو تصاویر شیئر کی تھیں جن میں ان کے چہرے پر کیل مہاسے اور دانےنمایاں تھے جو کافی بدنما لگ رہے تھے۔ ہانیہ نے یہ تصاویر شیئر کرکے بتایا کہ چہرے پر موجود ان کیل مہاسوں کی وجہ سے وہ کتنا پریشان رہیں۔

معاشرے میں قائم خوبصورتی کے معیار پر سوال اٹھاتے ہوئے ہانیہ نے کہا تھا کہ میری جلد میری پہچان کیوں ہے، خوبصورتی کے یہ معیارآخرکس نے بنائے ہیں۔ ایک مشہورشخصیت کا مطلب مکمل ہونا نہیں ہے بلکہ مکمل ہونے کا مطلب یہ ہے کہ ہم اپنی حقیقی جلد کے ساتھ مطمئن رہیں۔ ہانیہ عامر کی اس پوسٹ کو ماہرہ خان، سائرہ شہروز اور میشا شفیع سمیت متعدد فنکاروں کی جانب سے بے حد سراہا جارہا ہے۔

’زیرو‘ کی ناکامی کے بعد انوشکا نے بولی وڈ کو خیرباد کہہ دیا؟

بولی وڈ اداکارہ انوشکا شرما آخری مرتبہ گزشتہ سال فلم ’زیرو‘ میں کام کرتی نظر آئی تھیں، جس کی ناکامی کے بعد سے انہوں نے کسی نئی فلم کا اعلان نہیں کیا۔

فلم زیرو کی ناکامی کے بعد ایسی رپورٹس سامنے آئی تھیں کہ انوشکا شرما نے بولی وڈ کو خیر باد کہنے کا فیصلہ کرلیا ہے۔

یاد رہے کہ فلم ’زیرو‘ میں شاہ رخ خان اور کترینہ کیف نے بھی انوشکا کے ساتھ کام کیا، فلم باکس آفس پر ناکام ثابت ہوئی جبکہ اسے منفی ریویوز بھی ملے۔

ان افواہوں کے سامنے آنے کے باوجود اداکارہ نے طویل عرصے سے اس حوالے سے کوئی بات نہیں کی تھی تاہم اب انہوں نے خاموشی توڑ دی ہے۔

انوشکا شرما کا کہنا تھا کہ ’گزشتہ تین سال سے میں کافی مصروف رہی، فیشن میں کام کیا، کئی ایسے کردار بھی ادا کیے جو بہت زیادہ چیلنجنگ تھے، ایک ہی سال میں پری، سوئی دھاگا اور زیرو جیسی فلموں میں کام کیا، سب ایک دوسرے سے منفرد تھے، یہ آسان نہیں ہوتا‘۔

اداکارہ نے مزید کہا کہ ’میرا خیال ہے کہ میں اب اپنے کیریئر میں اس موڑ پر آچکی ہوں جہاں مجھے فلمیں صرف اس لیے کرنے کی ضرورت نہیں کہ مجھے اپنا وقت پورا کرنا ہو‘۔

انوشکا گزشتہ سال فلم ’سنجو‘ میں بھی معاون کردار میں نظر آئی تھیں۔

انوشکا شرما کے مطابق ’ایک پروڈیوسر ہونے کی حیثیت سے میں مصروف رہتی ہوں، میں ایک اور فلم پروڈیوس کررہی ہوں، اس کے علاوہ بھی کافی چیزوں میں مصروف ہوں جو لوگوں کے سامنے نہیں‘۔

خیال رہے کہ 31 سالہ انوشکا شرما نے 2008 میں فلم ’رب نے بنادی جوڑی‘ کے ساتھ ڈیبیو کیا تھا۔

وہ فلم ’این ایچ ٹین‘ اور ’پری‘ کی پروڈکشن بھی کرچکی ہیں۔

ان کی کامیاب فلموں میں ’سوئی دھاگا‘، ’سلطان‘، ’این ایچ ٹین‘، ’اے دل ہے مشکل‘، ’دل دھڑکنے دو‘، ’پی کے’ اور ’بینڈ باجا بارات‘ شامل ہیں۔

2017 میں اداکارہ نے بھارتی کرکٹر ویرات کوہلی سے شادی کی تھی، وہ اپنے شوہر کے ساتھ سوشل میڈیا پر کئی خوبصورت تصاویر اور ویڈیوز شیئر کرتی رہتی ہیں۔

ایکس مین سیریزکی نئی فلم ’’ڈارک فینکس‘‘7 جون کو ریلیز کیلیے تیار

لاس اینجلس: مارول یونیورس سے جڑی ایکس مین سیریز کی نئی فلم “ڈارک فینکس” 7 جون کو ریلیز کے لئے تیار ہے۔

ہالی ووڈ ایڈونچر فلم “ڈارک فینکس” میں 1992 کا زمانہ دکھایا گیا ہے، جس میں سُپر ہیروز کا ایک گروپ دنیا کو بچانے کے لئے خطرناک مشنز پرجاتا ہے۔

کامیاب ترین ڈراما سیریل گیمز آف تھرونز سے شہرت حاصل کرنے والی اداکارہ “صوفی ٹرنر” فلم میں”جین گرے” کا مرکزی کردار ادا کررہی ہیں، جوایکس مین کے ساتھ مختلف مشنز میں حصہ لیتی ہیں۔

ایک خطرناک مشن  میں حادثے کےنتیجے میں”جین گرے”مرتے مرتے بچتی ہیں، جس کے بعد “جین گرے” کی شخصیت مثبت سے منفی ہو جاتی ہے اور وہ ایک طاقتور وِلن کے روپ میں سامنے آتی ہیں۔

اب دنیا کو بچانے کے لئے ایکس مین کو دوست سے طاقت ور ترین دشمن میں تبدیل ہونے والی جین گرے کا سامنا کرنا ہوگا۔ اس لڑائی میں جیت کس کی ہوگی یہ  پتہ چلے گا 7 جون کو۔

Google Analytics Alternative