انٹر ٹینمنٹ

آپ کے دوست اسپائیڈرمین کی پھر واپسی

آپ کے دوست اسپائیڈر مین کو بھی تعطیلات کی ضرورت ہوتی ہے، آخر سر گھما دینے والی تدریس اور ایوینجرز کے ساتھ دنیا کو بچانے کی کوششیں (اس کے ساتھ ساتھ انفٹنی وار میں ہوا میں تحلیل ہوجانا)، یقیناً پیٹر پارکر کو وقفے کی ضرورت ہے۔

اور یہی وہ خیال ہے جو اسپائیڈر مین کی نئی فلم میں دکھایا گیا ہے۔

اسپائیڈر مین فار فرام ہوم کا پہلا ٹریلر سامنے آگیا ہے جس میں پیٹر پارک یورپ میں چھٹیاں منانے گیا ہوا ہے اور اپنا مخصوص اسپائیڈر مین سوٹ بھی نہیں لے کر گیا۔

مگر وہاں اس کی ملاقات اچانک نک فیوری سے ہوجاتی ہے جس کے نتیجے میں حالات بدل کر رہ جاتے ہیں۔

اس بار اسپائیڈر مین کا سامنا گلوب ہیڈڈ مسٹریو سے ہورہا ہے اور ایک نیا سوٹ بھی پیٹرپارکر کے بدن میں نظر آئے گا۔

ویسے یہ فلم اسپائیڈر مین کے لیے کافی سخت ثابت ہونے والی ہے کیونکہ ایوینجرز سیریز کی تیسری فلم میں وہ جب مٹی بن کر غائب ہوگیا تو اس کی واپسی کیسے ہوئی۔

مگر اس کا جواب یقیناً ایوینجرز اینڈ گیم میں سامنے آ ہی جائے گا جو کہ اپریل میں ریلیز ہوگی۔

سونی اسٹوڈیو کی نئی اسپائیڈرمین فلم کو دنیا بھر میں 5 جولائی کو ریلیز کیا جائے گا۔

 

عامر خان کے ہمشکل نے سب کو چکرا رکھ دیا

ممبئی: سوشل میڈیا پر بالی ووڈ کے مسٹر پرفیکشنسٹ عامر خان کے ہمشکل کی ایک تصویر گردش کررہی ہے جس نے سب کو چکرا کر رکھ دیاہے۔

عامر خان کے ہمشکل کی تصویر دراصل ان کے چھوٹے بھائی فیصل خان  کی ہے جو ان کے اگلے پراجیکٹ کی ہے، تصویر میں فیصل خان بالکل عامر خان کی کاربن کاپی لگ رہے ہیں اور یہی چیزمداحوں کو حیران کررہی ہے۔

بھارتی میڈیا کے مطابق اداکار فیصل خان اپنے بھائی عامر خان کے ساتھ 2000 میں فلم’’میلہ‘‘میں نظر آئے تھے لیکن یہ فلم باکس آفس پر بری طرح ناکام ہوگئی تھی اور اس کے ساتھ ساتھ فیصل خان کا کیریئر بھی ختم ہوگیاتھا۔ اب تقریباً 19 سال بعد اداکار فیصل خان ایک بار پھر شوبز میں انٹری دے رہے ہیں لیکن اداکار کے طور پر نہیں بلکہ بطور گلوکار۔ سوشل میڈیا میں گردش کرنے والی تصویر اداکار فیصل خان کے نئے پراجیکٹ فلم ’’فیکٹری‘‘کی ہے جس میں فیصل خان اپنی آواز کا جادو جگائیں گے۔

فیصل خان نے اپنی نئی فلم کے بارے میں بتاتے ہوئے کہا فلم’’فیکٹری‘‘ان کا ڈریم پراجیکٹ ہے، فلم کے ڈائریکٹر نے جب مجھے فلم میں گانا گانے کے لیے کہا تومیں حیران رہ گیا تاہم ان کا کہنا تھا کہ گانے’’عشق تیرا‘‘کے لیے میری آواز بالکل موزوں ہے۔

واضح رہے کہ اداکار فیصل خان کے تعلقات ان کے بھائی سپر اسٹار عامر خان سے زیادہ اچھے نہیں ہیں۔ اس کے علاوہ وہ کئی سال تک شیزو فرینیا کے مرض کا شکار رہے ہیں۔ 2008 میں ایک بھارتی ویب سائیٹ کو دئیے گئے انٹرویو میں فیصل خان کا کہنا تھا کہ میں بیمار نہیں ہوں بلکہ مجھے زبردستی بیمار بناکر گھر میں قید کردیاگیاہے۔

کرینہ کپورمیری رول ماڈل ہے، کرشمہ کپور

ممبئی: بالی ووڈ کی ماضی کی کامیاب اداکارہ کرشمہ کپور کا کہنا ہے کہ ان کی چھوٹی بہن کرینہ کپور خان ان کی رول ماڈل ہیں۔

اداکارہ کرشمہ کپورنے اپنی چھوٹی بہن اور بالی ووڈ کی نامور اداکارہ کرینہ کپورخان کے ریڈیو شو عشق 104.8 ’’وہاٹ وومن وانٹ ود کرینہ کپورخان‘‘ میں شرکت کی جہاں انہوں نے کرینہ کی جانب سے پوچھے جانے والے سوال کہ ان کی رول ماڈل کون ہیں کا بہت دلچسپ جواب دیا اورکہا کہ میری رول ماڈل تم ہو۔

کرشمہ نے کہا ہم دونوں کا تعلق ایک ہی پیشے سے ہے، ہم دونوں ایک دوسرے کی طاقت ہیں، کرینہ کے علاوہ میں اپنی والدہ سے بھی بے حد متاثرہوں جنہوں نے ہم دونوں بہنوں کی اتنی اچھی پرورش کی۔

شوبزسے منسلک رہنے کے بارے میں کرشمہ نے کہا کہ شوبز سے جڑے رہنے کا کوئی فارمولا نہیں، میں نے فلم انڈسٹری کو کئی برس دئیے ہیں اور میرے نظریے کے مطابق مختلف چیزیں کرتے رہنے سے آپ شوبز سے جڑے رہتے ہیں۔

واضح رہے کہ کرشمہ کپور نے بالی ووڈ کیریئر کا آغاز تقریباً 28 سال قبل فلم ’’پریم قیدی‘‘سے کیا تھا اس کے بعد وہ متعدد کامیاب فلموں میں نظر آئیں تاہم وہ آخری بار 2012 میں فلم ’’ڈینجرزعشق‘‘ میں نظر آئی تھیں جس کے بعد انہوں نے فلموں سے بریک لے لیا۔

’گڑ نال عشق میٹھا‘: انیل اور سونم کپور کی آنے والی فلم کا گانا ریلیز

بالی وڈ اداکار انیل کپور اور ان کی صاحبزادی سونم کپور کی آنے والی فلم ’ایک لڑکی کو دیکھا تو ایسا لگا‘ کا شادی سیزن میں دھمال مچانے والا گانا ’گُڑ نال عشق میٹھا‘ ریلیز  کردیا گیا، جس میں باپ اور بیٹی کی جوڑی نے زبردست رقص کیا ہے۔

’گڑ نال عشق میٹھا‘ دراصل 90 کی دہائی کا مقبول گانا ہے جسے گلوکار ملکیت سنگھ کی آواز میں پیش کیا گیا تھا، جس کی ویڈیو میں ملائکا اروڑا اور جاس اروڑا پرفارمنس دکھاتے نظر آئے تھے۔

اب اس گانے کا ریمکس بنایا گیا ہے، جس کی شاعری گرپیت سینی نے لکھی ہے، جبکہ نوراج ہنس اور ہرش دیپ کور نے اسے گایا ہے۔

اس کے اوریجنل گانے کی موسیقی بلے ساگو نے ترتیب دی تھی، جبکہ فلم کے گیت کے لیے موسیقی روچک کوہلی نے ترتیب دی ہے۔

اس گانے میں ایک مہندی کی تقریب کا منظر فلمایا گیا ہے، جس میں انیل کپور نہایت جوش و خروش سے رقص کر رہے ہیں جب کہ ان کی بیٹی سونم کپور کچھ شرمائی ہوئی دکھائی دے رہی ہیں۔

واضح رہے اس فلم میں ہم جنس پرستی کا موضوع شامل کیا گیا ہے اور اسے سال کی غیر متوقع رومانوی کہانی قرار دیا جارہا ہے۔

 راجکمار ہیرانی، ونود چوپڑا اور فوکس اسٹار اسٹوڈیو کے بینر تلے بننے والی یہ فلم شیلی چوپڑا کی ڈیبیو فلم ہے جو آئندہ برس یکم فروری کو سینما گھروں کی زینت بنے گی۔

فلم میں انیل کپور اور سونم کپور کے علاوہ راج کمار راؤ اور جوہی چاولہ بھی مرکزی کردار میں جلوہ گر ہوں گے۔

بالی ووڈ فلم ’’ ایکسیڈنٹل پرائم منسٹر‘‘ کو پاکستان میں نمائش کی اجازت مل گئی

کراچی: سابق بھارتی وزیراعظم من موہن سنگھ کی زندگی پرمبنی فلم ’’دی ایکسیڈنٹل پرائم منسٹر‘‘ کو پاکستان میں نمائش کی اجازت مل گئی۔

پاکستان سنسربورڈ کے چیئرمین دانیال گیلانی نے فلم ’’دی ایکسیڈنٹل پرائم منسٹر‘‘ کی پاکستان میں نمائش کی تصدیق کرتے ہوئے کہا ہے کہ سنسربورڈ نے فلم کوپاکستان میں ریلیزکے لیے کلیئر کردیا ہے۔ فلم پروڈیوسرجینتی لال نے ’’دی ایکسیڈنٹل پرائم منسٹر‘‘ کو پاکستان میں نمائش کی اجازت ملنے پر خوشی کا اظہارکرتے ہوئے کہا ہے کہ اب پاکستانی شائقین بھی اس فلم سے لطف اندوز ہوسکیں گے۔

جینتی لال نے مزید کہا بطورکرکٹرمیں نے عمران خان کی ہمیشہ تعریف کی ہے اوراب بطور وزیر اعظم میں ان کی بہت عزت کرتا ہوں، میں پاکستانی سنسر بورڈ کا بھی مشکورہوں جنہوں نے فلم کو ریلیز کی اجازت دی۔

واضح رہے کہ فلم ’’دی ایکسیڈنٹل پرائم منسٹر‘‘ میں اداکار انوپم کھیر نے سابق بھارتی وزیر اعظم من موہن سنگھ کا مرکزی کردارنبھایا ہے جب کہ دیگرکاسٹ میں اداکار اکشے کھنا بھی شامل ہیں۔ فلم 18 جنوری کو پاکستان میں ریلیز کی جائے گی۔

فلم کا نام سری دیوی کیوں رکھا؟ بونی کپورکا فلمسازوں کو قانونی نوٹس

ممبئی: بالی ووڈ پروڈیوسر بونی کپور نے بغیر اجازت اپنی اہلیہ سری دیوی کے نام پر فلم کا نام رکھنے پر فلمسازوں کو قانونی نوٹس بھجوادیا۔

گزشتہ برس آنکھ مارنے والی ویڈیوسے مشہور ہونے والی اداکارہ پریاپرکاش واریئر فلم’’سری دیوی بنگالو‘‘ سے بالی ووڈ میں انٹری دے رہی ہیں۔ حال ہی میں پریا نے اپنی فلم کی ٹیزرلانچنگ تقریب میں شرکت کے لیے ممبئی کا رخ کیا تاہم ان کی پہلی ہی فلم مشکلات کا شکار ہوگئی۔

بھارتی میڈیا کے مطابق فلم ’’سری دیوی بنگالو‘‘ میں پریا پرکاش واریئرایک کامیاب لیکن تنہا اداکارہ کا کردارنبھارہی ہیں، ٹیزر میں اداکارہ کی باتھ ٹب میں موت کا سین بھی اسی طرح دکھایا گیا ہے جس طرح سری دیوی کی موت واقع ہوئی تھی۔ لہٰذا سری دیوی کے شوہربونی کپورنے ’’سری دیوی بنگالو‘‘ کے فلمسازوں اور ہدایت پرسانتھ ممبولی کو ان کی اجازت کے بغیر ان کی اہلیہ کے نام پر فلم کا نام رکھنے پر قانونی نوٹس بھجوایا ہے۔

فلم’’سری دیوی بنگالو‘‘کے ہدایت کارپرسانتھ ممبولی نے بونی کپورکی جانب سے قانونی نوٹس موصول ہونے کی تصدیق کرتے ہوئے کہا ہے کہ سری دیوی بہت عام نام ہے، اورمیری فلم کا کردار بھی ایک اداکارہ کا ہے تاہم ہم اس نوٹس کا جواب دیں گے۔

مزاحیہ فلم ’ ٹوٹل دھمال‘ کی پہلی جھلک سامنےآگئی

ممبئی: بالی ووڈ کی مزاح سے بھرپور فلم ’دھمال‘ سیریز کے نئے سیکوئل ’ٹوٹل دھمال‘ کی پہلی جھلک سامنے آگئی۔

معروف فلمی تجزیہ کار ترن آدرش نے سماجی رابطے کی ویب سائٹ ٹوئٹر پر فلم ’ٹوٹل دھمال‘ کی پہلی جھلک جاری کردی۔ تصویر میں اجے دیوگن کو جنگل میں کھڑا دیکھا جا سکتا ہے جہاں وہ کاندھے پر بندر کو بٹھائے ہوئے ہیں۔

فلم کے اس سیکوئل کی خاص بات یہ ہے کہ اس سیکوئل میں اجے دیوگن کے ساتھ ارشد وارثی، جاوید جعفری، رتیش دیش مکھ اور سنجے مشرا کے ساتھ پہلی بار انیل کپور اور مادھوری ڈکشٹ کی جوڑی 18 سال بعد اس سیکوئل میں نظر آئے گی۔ ساتھ ہی انہوں نے بتایا کہ اندرا کمار کی ہدایت کاری میں بننے والی فلم رواں سال 22 فروری کو سنیما گھروں کی زینت بنے گی۔

مادھوری ڈکشٹ کا اس حوالے سے ایک انٹرویو میں کہنا تھا کہ میری اور انیل کی جوڑی کافی مقبولیت کی حامل ہے اور یہ جوڑی ایک بار پھر فلم ’ٹوٹل دھمال‘ میں جلوے بکھیرتی نظر آئے گی اور مجھے اُمید ہے لوگوں کو کیمسٹری سے بھرپور یہ فلم یقیناً پسند آئے گی۔

واضح رہے کہ اجے دیوگن سے قبل سنجے دت 2007ء اور 2011ء میں ریلیز ہوئی کامیاب فلم ’دھمال‘ اور ’ڈبل دھمال‘ میں اپنی اداکاری کا جادو دکھاچکے ہیں۔ دونوں مزاحیہ فلموں میں ان کے ساتھ اداکار ارشد وارثی، جاوید جعفری اور رتیش دیش مکھ نے اہم کردار ادا کیا تھا۔

راجکمار ہیرانی پر جنسی ہراسانی کا الزام، ’منا بھائی تھری‘ روک دی گئی

ممبئی: نامور ہدایت کار راج کمار ہیرانی نے خود پر جنسی ہراسانی کے الزامات لگنے کے بعد فلم ’منا بھائی تھری‘ روک دی گئی۔ 

بالی ووڈ میں’منا بھائی‘ جیسی ہٹ فلم سے اپنے کیریئر کا آغاز کرنے والے نامور ہدایت کار راج کمار ہیرانی نے انڈسٹری کو تمام بلاک بسٹر فلمیں دیں جن میں ’لگے رہو منا بھائی‘، ’تھری ایڈیئٹس‘ ، ’پی کے‘ اور ’سنجو‘ شامل ہیں جب کہ فلم ’سنجو‘ میں جس طرح انہوں نے سنجے دت کی کہانی بیان کے اس کے بعد انہیں ’بیسٹ اسٹوری ٹیلر‘ کا خطاب بھی دیا گیا تاہم فلم ’سنجو‘ ہی کی وجہ سے وہ اب مشکل کا شکار ہوگئے ہیں۔

رپورٹس کے مطابق ہدایت کار ان دنوں اپنی ہٹ فلم ’منا بھائی‘ کے دوسرے سیکوئل کی تیاری میں مصروف ہیں اور اس کے لیے انہیں فوکس اسٹوڈیو کا تعاون حاصل ہے مگر ان پر جنسی ہراسانی کے الزامات کے بعد فوکس اسٹوڈیو نے واضح کردیا کہ ہدایت کار کو کلین چٹ ملنے تک یہ فلم نہیں بنے گی۔

دوسری جانب راج کمار ہیرانی کی تمام فلموں میں ساتھ دینے والے ودھو ونود چوپڑا نے بھی متاثرہ خاتون کے ساتھ اظہار یکجہتی کے لیے اپنی نئی فلم ’ایک لڑکی کو دیکھا تو ایسا لگا‘ کی پروموشن سے راجکمار ہیرانی کا نام ہٹا دیا ہے۔

واضح رہے فلم ’سنجو‘ میں راج کمار ہیرانی کی اسسٹنٹ ڈائریکٹر نے الزام عائد کیا ہے کہ فلم کی تیاری کے دوران ہدایت کار نے انہیں مسلسل جنسی طور پر ہراساں کیا۔ خاتون کی جانب سے اس الزام کے بعد راج کمار ہیرانی نے ان تمام الزامات کی تردید کردی ۔

Google Analytics Alternative