انٹر ٹینمنٹ

جیمز بانڈ فلم سیریز کو نیا ایجنٹ مل گیا

معروف زمانہ جاسوس ہولی وڈ فلم سیریز جیمز بانڈ کی 25 ویں فلم کو یوں تو آئندہ برس ریلیز کیا جائے گا، تاہم یہ فلم اپنی ریلیز سے قبل ہی خبروں میں ہیں۔

جہاں ابتدائی طور پر یہ فلم نئے جاسوس کی وجہ سے خبروں میں تھی، وہیں اس فلم کےنئے ولن کے حوالے سے بھی کئی قیاس آرائیاں تھیں۔

اگرچہ یہ اعلان کردیا گیا تھا کہ جیمز بانڈ کی 25 ویں فلم میں بھی برطانوی اداکار ڈینیئل کریگ جاسوس کا کردار ادا کرتے دکھائی دیں گے، تاہم اداکار نے پہلے ہی واضح کردیا تھا کہ وہ آخری بار اس کردار کو ادا کریں گے۔

ڈینیئل کریگ مسلسل چوتھی بار اس کردار کو ادا کر رہے ہیں اور انہوں نے اپنی خراب ہوتی صحت کی وجہ سے گزشتہ برس اس بات کا عندیہ دیا تھا کہ وہ آخری بار فلم میں ایجنٹ کا کردار ادا کریں گے۔

ڈینیئل کریگ کے اعلان کے بعد فلم کے نئے ایجنٹ پر باتیں ہونا شروع ہوگئی تھیں اور اداکار ادریس ایلبا سمیت کئی اداکاروں کے نام سامنے آئے۔

جہاں جیمز بانڈ کے نئے ایجنٹ کے حوالے سے چہ مگوئیاں ہوتی رہیں، وہیں فلم کے ولن کے حوالے بھی باتیں چلتی رہیں۔

خیال کیا جا رہا تھا کہ 25 ویں فلم میں ولن کا کردار پہلی بار کوئی خاتون ادا کرتی دکھائی دیں گی اور اس حوالے سے خبریں تھیں کہ ہیلینا کارٹر فلم میں ولن بنیں گی۔

ڈینیئل کریگ آخری بار ایجنٹ کے روپ میں دکھائی دیں گے—پرومو فوٹو
ڈینیئل کریگ آخری بار ایجنٹ کے روپ میں دکھائی دیں گے—پرومو فوٹو

تاہم بعد ازاں فلم کی ٹیم نے مصری نژاد اداکار ریمی ملک کو ولن بنانے کا اعلان کیا۔

جیمز بانڈ کے ولن کا مسئلہ حل ہوا تو شائقین کو نئے ایجنٹ کی فکر ہونے لگی اور خیال کیا جانے لگا کہ ممکنہ طور پر ادریس ایلبا ہی نئے جاسوس بنیں گے۔

تاہم اب ادریس ایلبا کی جگہ ایک خاتون کا نام سامنے آیا ہے جس سے شائقین کو خوشگوار حیرت ہوئی ہے۔

جی ہاں، خبریں کہ جیمز بانڈ کی 25 ویں فلم میں ہی نئے ایجنٹ کو متعارف کرایا جائے گا اور اب جاسوس کا کردار کوئی مرد نہیں بلکہ خاتون ادا کرتی دکھائی دیں گی۔

برطانوی اخبار’دی گارجین‘ نے اپنی رپورٹ میں ’میل آن سنڈے‘ کا حوالہ دیتے ہوئے بتایا کہ فلم کی ٹیم نے تاریخی فیصلہ کرتے ہوئے جاسوس کا کردار پہلی بار ایک خاتون کو دینے کا فیصلہ کرلیا۔

فلم کی ٹیم کے قریبی ذرائع کے مطابق اب ڈینیئل کریگ کی جگہ جاسوس کا کردار ایک اداکارہ نبھاتی نظر آئیں گی۔

رپورٹ کے مطابق افریقی نژاد برطانوی اداکارہ 31 سالہ لشانا لائنچ ایجنٹ کا کردار ادا کریں گی۔

رپورٹ کے مطابق ایجنٹ کی تبدیلی کو آنے والی فلم میں ہی دکھایا جائے گا اور ڈینیئل کریگ کو 25 ویں فلم میں برطانوی جاسوس ادارے ’ایم آئی سکس‘ سے ریٹائرمنٹ لیتے ہوئے دکھایا جائے گا۔

پہلی بار سیاہ فام خاتون جیمز بانڈ میں جاسوس بنیں گی—فوٹو: میٹرکس پکچر
پہلی بار سیاہ فام خاتون جیمز بانڈ میں جاسوس بنیں گی—فوٹو: میٹرکس پکچر

رپورٹ میں دعویٰ کیا گیا کہ فلم میں لشانا لائنچ براہ راست ڈینیئل کریگ کی جگہ نہیں لیں گی، بلکہ پہلے والے ایجنٹ کو ریٹائرڈ کروانے کے بعد نیا ایجنٹ متعارف کرایا جائے گا اور ایک طرح سے یہ نیا کردار ہوگا لیکن اس کردار کا کام وہی ہوگا جو پہلے ایجنٹ کا تھا۔

رپورٹ کے مطابق آنے والی جیمز بانڈ کی 25 ویں فلم میں ڈینیئل کریگ کو جاسوس مشن کے دوران جمیکا میں ریٹائرڈ ہوتے ہوئے دکھایا جائے گا اور ان کی جگہ جاسوس کی ذمہ داریاں لشانا لائنچ کے نئے کردار کو دی جائیں گی۔

پہلی بار جیمز بانڈ میں کسی سیاہ فام خاتون کو مرکزی کردار دیے جانے پر فلم کی ٹیم کو سراہا جا رہا ہے اور اس فیصلے کو تاریخی بھی قرار دیا جا رہا ہے، تاہم اس حوالے سے ٹیم نے فی الحال کوئی تصدیق نہیں کی کہ جیمز بانڈ کا نیا ایجنٹ ایک خاتون ہی ہوگی۔

جیمز بانڈ کی 25 ویں فلم میں ریمی ملک ولن کے روپ میں دکھائی دیں گے—فوٹو: یو ایس اے میڈیا نیٹ ورک
جیمز بانڈ کی 25 ویں فلم میں ریمی ملک ولن کے روپ میں دکھائی دیں گے—فوٹو: یو ایس اے میڈیا نیٹ ورک

خیال رہے کہ جیمز بانڈ میں جاسوس یا ایجنٹ کا کردار برطانوی خفیہ ایجنسی ایم آئی سکس کے اہلکار کا کردار ہوتا ہے جو کئی خطرناک منصوبوں پر کام کرتا ہے۔

اس کردار کو منشیات اور جرائم فروشوں کے بڑے بڑے گروپوں سے سامنے کرتے ہوئے دکھایا جاتا ہے، اس بار ایجنٹ یا جاسوس کا کردار ریمی ملک سے مقابلہ کرتے دکھائی دے گا۔

جیمز بانڈ کی 25 ویں فلم میں ریمی ملک ولن کا کردار ادا کرتے دکھائیں دیں گے اور اس فلم کو آئندہ برس اپریل تک ریلیز کیا جائے گا۔

سیریز کی 25 ویں فلم 5 سال کے وقفے کے بعد ریلیز کی جائے گی، جیمز بانڈ کی 24 ویں فلم ’اسپیکٹر‘ 2015 میں ریلیز کی گئی تھی، اس سے پہلے 2012 میں اسی سیریز کی 23 ویں فلم ’اسکائی فال‘ ریلیز کی گئی تھی۔

‘دلبر’ فیم نورا فتیحی کا رقص بھی ‘ساقی’ کو بچا نہ سکا

بولی وڈ میں کئی سالوں سے ماضی کے پرانے گانوں کا ریمکس بناکر نئے انداز میں ریلیز کرنے کا ٹرینڈ عروج پر ہے، تاہم ایسا کہنا غلط نہیں ہوگا کہ ہر پرانا گانا ریمکس بننے کے لیے نہیں۔

جلد ریلیز ہونے والی بولی وڈ فلم ‘بٹلا ہاؤس’ میں بھی ماضی کے کامیاب گانے ‘او ساقی ساقی’ کا ریمکس پیش کیا گیا، تاہم یہ شائقین کو محظوظ کرنے میں پوری طرح ناکام رہا۔

خیال رہے کہ گانا ‘او ساقی ساقی’ 2004 کی فلم ‘مسافر’ کا حصہ تھا، جس نے ریلیز ہوتے ہی کئی بلاک بسٹر گانوں کے ریکارڈ توڑے۔

اس گانے میں بولی وڈ اداکارہ کوئنا مترا اور سنجے دت نے پرفارم کیا تھا، جبکہ اس کی گلوکاری سنیدھی چوہا اور سکھوندر نے کی تھی۔

نئے گانے کے سامنے آنے کے بعد اوریجنل گانے میں پرفارم کرنے والی اداکارہ کوئنا نے بھی سوشل میڈیا پر اپنی مایوسی کا اظہار کیا۔

کوئنا مترا کا اپنی ٹویٹ میں کہنا تھا کہ ‘فلم مسافر سے میرے گانے او ساقی ساقی کا ریمکس بنا کر ریلیز کیا گیا، اس گانے کی گلوکاری سنیدھی چوہان اور سکھوندر نے شاندار انداز میں کی تھی، مجھے نیا گانا بالکل پسند نہیں آیا، یہ بدترین ہے’۔

البتہ کوئنا نے نئے گانے میں رقص کرنے والی اداکارہ نورا فتیحی کے رقص کی تعریف کرتے ہوئے لکھا کہ امید ہے وہ اس شاندار گانے کے بدترین ریمکس کو اپنی پرفارمنس سے بچا سکیں۔

نئے گانے کی گلوکاری نیہا ککڑ، تلسی کمار اور بی پراک نے کی، گانے کا میوزک تنشک باگچی نے دیا، جبکہ گلوکاری اور میوزک کو بھی خاصہ پسند نہیں کیا گیا۔

فلم بٹلا ہاؤس میں جان ابراہم نے مرکزی کردار نبھایا ہے جس کی ہدایات نکھل اڈوانی نے دی ہے۔

خیال رہے کہ اس سے قبل جان ابراہم کی فلم ‘ستیامیوا جیت’ میں بھی نورا نے ایک ماضی کے کامیاب گانے ‘دلبر دلبر’ کے ریمکس پر پرفارم کیا تھا۔

یہ گانا اب تک کا سب سے کامیاب ریمکس قرار پایا تھا، جس میں نورا کے شاندار رقص کو خوب سراہا گیا۔

فلم ‘بٹلا ہاؤس رواں سال 15 اگست کو سینما گھروں میں نمائش کے لیے پیش کی جائے گی۔

تاپسی پنو کی فلم میں کام دلوانے کے لیے صحافیوں سے منتیں

بولی وڈ اداکارہ تاپسی پنو جن کی حال ہی میں ریلیز ہونے والی ہارر فلم ’گیم اوور‘ نے کوئی اچھی کمائی نہیں کی، تاہم ان کی جلد آنے والی بائیوگرافی فلم ’سانڈ کی آنکھ‘ کے ٹیزر نے دھوم مچا رکھی ہے۔

تاپسی پنو کو بولی وڈ کی نئی اداکاراؤں میں ٹیلنٹڈ اداکارہ تسلیم کیا جاتا ہے، جنہوں نے ’پنک، نام شبانہ، ملک، سورما، من مرضیاں اور بدلا‘ جیسی فلموں میں شاندار اداکاری کی وہ جلد ہی ’تڑکا، مشن منگل اورسانڈ کی آنکھ‘ جیسی فلموں میں کام کرتی دکھائی دیں گی۔

تاہم تاپسی پنو نے صحافیوں سے آنے والی بولی وڈ فلم میں کام دلوانے کے لیے کردار ادا کرنے کی درخواست کرتے ہوئے کہا ہے کہ وہ انہیں فلم کا کردار دلوائیں۔

ایسٹرن آئی کے مطابق تاپسی پنو سے حال ہی میں بھارتی ویمن کرکٹ ٹیم کی کپتان متھالی راج کی زندگی پر بنائی جانے والی فلم میں کام کرنے کے حوالے سے پوچھا گیا تو انہوں نے صحافیوں سے منتیں کرنا شروع کردیں۔

خوشی ہوگی اگر مجھے میتھالی راج کی زندگی پر بننے والی فلم میں کاسٹ کیا گیا، اداکارہ—فوٹو: ہندوستان ٹائمز
خوشی ہوگی اگر مجھے میتھالی راج کی زندگی پر بننے والی فلم میں کاسٹ کیا گیا، اداکارہ—فوٹو: ہندوستان ٹائمز

رپورٹ کے مطابق تاپسی پنو نے متھالی راج کی زندگی پر بنائی جانے والی فلم کےخیال کو سراہتے ہوئے کہا کہ وہ اس فلم میں کام کرنے کے لیے انتہائی بے قرار ہیں، تاہم انہیں نہیں پتہ کہ انہیں کاسٹ کیا جائے گا یا نہیں؟

اداکارہ کے مطابق وہ چاہتی ہیں کہ متھالی راج کی زندگی پر بنائی جانے والی فلم میں انہیں کاسٹ کیا جائے، کیوں کہ وہ اسکرین پر کرکٹ کھیل کر منفرد کردار ادا کرنا چاہتی ہیں۔

اداکارہ نے پنک اور نام شبانہ جیسی فلموں سے کامیابی حاصل کی—فوٹو: انسٹاگرام
اداکارہ نے پنک اور نام شبانہ جیسی فلموں سے کامیابی حاصل کی—فوٹو: انسٹاگرام

اداکارہ نے رکھ رکھاؤ کیے بغیر صحافیوں کو کہا کہ وہ متھالی راج کی زندگی پر بنائی جانے والی فلم فلم کی ٹیم کو انہیں کاسٹ کرنے کا مشورہ دیں۔

تاپسی پنو نے صحافیوں سے کہا کہ وہ فلم کی ٹیم کو کہیں کہ متھالی راج کی زندگی پر بنائی جانے والی فلم کے لیے تاپسی پنو کو کاسٹ کریں۔

اداکارہ نے متھالی راج کی زندگی پر بنائی جانے والی فلم کے لیے خود کو موزوں بھی قرار دیا۔

سانڈ کی آنکھ میں اداکارہ ایک دیہاتی خاتون کا کردار ادا کرتی دکھائی دیں گی—اسکرین شاٹ
سانڈ کی آنکھ میں اداکارہ ایک دیہاتی خاتون کا کردار ادا کرتی دکھائی دیں گی—اسکرین شاٹ

خیال رہے کہ گزشتہ برس متھالی راج نے خود ایک انٹرویو کے دوران اعتراف کیا تھا کہ ان کی زندگی پر فلم بنائے جانے کے حوالے سے کام جاری ہے۔

متھالی راج نے نہ صرف اپنی زندگی پر فلم بنانے کی تیاریوں کی تصدیق کی تھی بلکہ انہوں نے فلم میں اپنا کردار ادا کرنے کے لیے اپنی پسندیدہ اداکارہ کا نام بھی بتایا تھا۔

متھالی راج چاہتی ہیں پریانکا ان کا کردار ادا کرے، تاپسی چاہتی ہیں وہ متھالی بنیں—فوٹو: انڈیا ڈاٹ کام/ ہندوستان ٹائمز
متھالی راج چاہتی ہیں پریانکا ان کا کردار ادا کرے، تاپسی چاہتی ہیں وہ متھالی بنیں—فوٹو: انڈیا ڈاٹ کام/ ہندوستان ٹائمز

متھالی راج نے خواہش ظاہر کی تھی کہ ان کی زندگی پر بنائی جانے والی فلم میں پریانکا چوپڑا کو ان کا کردار ادا کرنے کے لیے کاسٹ کیا جائے۔

اگرچہ متھالی راج نے اپنی زندگی پر فلم بنائے جانے کی تصدیق کی تھی، تاہم انہوں نے یہ نہیں بتایا تھا کہ کون فلم ساز ان کی زندگی پر فلم بنانے جا رہا ہے اور اس کو کب تک ریلیز کیا جائے گا۔

تاہم خیال کیا جا رہا ہے کہ آئندہ برس تک ان کی زندگی پر بننے والی فلم کو ریلیز کردیا جائے گا۔

میتھالی راج کا کردار ادا کرکے خوشی ملے گی، اداکارہ—فوٹو: انسٹاگرام
میتھالی راج کا کردار ادا کرکے خوشی ملے گی، اداکارہ—فوٹو: انسٹاگرام

شاہد کپور نے سلمان خان کو پیچھے چھوڑ دیا

ممبئی: بالی ووڈ اداکار شاہد کپور کی فلم ’’کبیر سنگھ‘‘ رواں سال سب سے زیادہ کمائی کرنے کے ساتھ 5 ریکارڈز بنانے میں کامیاب ہوگئی۔

سال 2019 بالی ووڈ اداکار شاہد کپور کے لیے بہت اچھا ثابت ہوا ہے۔ حال ہی میں ریلیز ہونے والی ان کی فلم ’’کبیر سنگھ‘‘ رواں برس کی سب سے زیادہ کمائی کرنے والی ہندی فلم بن گئی ہے۔ ترن آدرش کے مطابق فلم  ریلیز کے صرف 24 روز (3 ہفتوں) میں 255 کروڑ 89 لاکھ روپے کماکر بلاک بسٹر ثابت ہوئی ہے۔ اس کے ساتھ ہی  فلم نے ریلیز کے محض 3 ہفتوں میں 5 ریکارڈز بنالیے ہیں۔

ہندی سینما کی 10 سب سے زیادہ بزنس کرنیوالی فلموں میں شامل

ہندی سینما میں سب سے زیادہ بزنس کرنے والی فلموں میں ’’کبیر سنگھ‘‘ دسویں نمبر پر شامل ہوگئی ہے۔ سب سے زیادہ بزنس کرنے والی فلموں میں باہوبلی2،  511 کروڑ کے ساتھ پہلے نمبر پر، دنگل 387 کروڑ کے ساتھ دوسرے، سنجو 342 کروڑکے ساتھ تیسرے، پی کے 340 کروڑ کے ساتھ چوتھے، ٹائیگر زندہ ہے 339 کروڑ کے ساتھ پانچویں، بجرنگی بھائی جان 320 کروڑ کے ساتھ چھٹے، پدماوت 302 کروڑ کےساتھ ساتویں، سلطان 300 کروڑ کے ساتھ آٹھویں، دھوم3، 284 کروڑ کے ساتھ نویں اور کبیر سنگھ 255 کروڑ کے ساتھ دسویں نمبر پر ہے۔

شاہد کپور کی پہلی سولو سپر ہٹ فلم

شاہد کپور کے کیریئر کی اب تک کی سب سے زیادہ بزنس کرنے والی سنجے لیلا بھنسالی کی فلم ’’پدماوت‘‘ تھی لیکن اس فلم میں اداکار رنویر سنگھ بھی شامل تھے۔ تاہم ’’کبیر سنگھ‘‘ شاہد کپور کے کیریئر کی سب سے زیادہ بزنس کرنے والی پہلی سولو سپر ہٹ فلم بن گئی ہے۔

آسٹریلیا میں سب سے زیادہ کمائی کرنیوالی فلم

کبیر سنگھ جہاں بھارت میں کمائی کے نئے ریکارڈ بنارہی ہے وہیں آسٹریلیا میں بھی یہ فلم سب سے زیادہ بزنس کرنے والی بالی ووڈ فلم بن گئی ہے۔ آسٹریلیا میں ’’کبیر سنگھ‘‘ نے گلی بوائے، اڑی، بھارت، اورساؤتھ انڈین فلم پیٹا کو پیچھے چھوڑ دیا ہے۔

2019 کی  دوسری سب سے زیادہ کمائی کرنے والی ہندی فلم

شاہد کپور اور کیارا ایڈوانی کی’’کبیرسنگھ‘‘ بھارتی باکس آفس پر 2019 کی اب تک کی سب سے زیادہ بزنس کرنے والی دوسری فلم بن گئی ہے اس سے آگے ہالی ووڈ فلم ’’اوینجرز؛ اینڈ گیم‘‘ ہے جس نے بھارت میں 373 کروڑ سے زائد کا بزنس کیا ہے۔

سب سے جلدی 200 کروڑ کمانے والی فلم

فلم ’’کبیر سنگھ‘‘ نے ریلیز کے محض 13 دنوں میں 200 کروڑ کماکرجہاں نیا ریکارڈ قائم کیا وہیں سلمان خان کی فلم ’’بھارت‘‘ کا ریکارڈ توڑ دیا جس نے ریلیز کے 14 دنوں میں 200 کروڑ کا بزنس کیا تھا۔

وویک اوبروئے بھارتی ٹیم کا مذاق اڑانے پر مشکل میں پڑگئے

ممبئی: بالی ووڈ اداکار وویک اوبروئے کو ورلڈ کپ سے باہر ہونے پر بھارتی ٹیم کا مذاق اڑانے پر سوشل میڈیا پرتنقید کا نشانہ بنایا جارہا ہے۔

بالی ووڈ اداکار وویک اوبروئے نے نیوزی لینڈ کے ہاتھوں شکست اور ورلڈ کپ سے باہر ہونے کے بعد اپنی ہی ٹیم کا مذاق اڑاتے ہوئے ایک مختصر سی ویڈیو شیئر کی ہے جس میں ایک بھارتی کرکٹ شائق سڑک پر چلتے ہوئے سوچ رہاہے کہ سامنے سے آنے والی خاتون انہیں گلے لگانے والی ہے لیکن خاتون اس کے بجائے اس کے پیچھے چلتے ہوئے شخص کو گلے لگالیتی ہے جس سے بھارتی مداح سخت شرمندہ ہوجاتا ہے۔

وویک اوبروئے نے اس ویڈیو کے ذریعے بھارتی  ٹیم کا مذاق اڑاتے ہوئے لکھا ہے کہ ورلڈ کپ سیمی فائنل میں بھارتی ٹیم کے ساتھ بالکل ایسا ہی ہوا ہے۔ تاہم وویک کی اس پوسٹ پر بھارتی شائقین سخت غصے میں آگئے اورانہیں اپنی ہی ٹیم کا مذاق اڑانے پر جم کر تنقید کا نشانہ بناڈالا۔

ایک صارف نے لکھا مسٹر اوبروئے بڑے ہوجائیں ورنہ لوگ آپ کو سنجیدہ لینا چھوڑ دیں گے۔

کچھ صارفین نے تو ویڈیو میں موجود شرمندہ بھارتی مداح کو وویک اوبروئے، خاتون کو ایشوریا رائے اور دوسرے شخص کو ابھیشیک قراردے کر وویک اوبروئے کا ہی مذاق اڑادیا۔ کئی لوگوں نے انہیں غصے میں ہارا ہوا شخص قرار دیا اور کچھ لوگوں نے تو یہاں تک کہہ دیا کہ ورلڈ کپ کھیلنے آپ چلے جاتے۔

واضح رہے کہ بھارتی ٹیم کے ورلڈ کپ سے باہر ہونے پر جہاں انڈین شائقین غصہ ہیں وہیں اداکار عامر خان نے کوہلی کا حوصلہ بڑھاتے ہوئے کہا تھا کہ بدقسمتی سے آج ہمارا دن نہیں تھا۔

ہانیہ عامر اور عاصم اظہر پہلی بار ٹی وی اسکرین کے لیے اکٹھے

اداکارہ ہانیہ عامر اور گلوکار عاصم اظہر ایک دوسرے کے بہترین دوست ہیں اور ایسا خیال کیا جاتا ہے کہ ایک دوسرے سے محبت کرتے ہیں۔

دونوں نے اس بارے میں کوئی باقاعدہ تصدیق تو نہیں کی مگر پہلی بار ہانیہ عامر اور عاصم اظہر آن اسکرین ضرور ایک دوسرے کی محبت میں گرفتار نظر آئیں گے۔

یہ دونوں الف اللہ، دلدل اور سنو چندا (دونوں سیزن) کی ہدایات دینے والے احسن طالش کی ٹیلی فلم ‘پیار کہانی’ میں ایک دوسرے کے مدمقابل کام کررہے ہیں اور پہلی بار یہ جوڑا آن اسکرین ایک ساتھ جلوہ گر ہوگا۔

ڈان امیجز سے بات کرتے ہوئے ڈائریکٹر احسن طالش نے بتایا ‘اس ڈرامے کی کہانی کشور اسمل نے تحریر کی ہے، جبکہ ہانیہ عامر اور عاصم اظہر مرکزی کردار ادا کررہے ہیں، اس کے علاوہ شیفی حسن اور فضیلہ قاضی بھی کاسٹ میں شامل ہیں، ڈرامے کی کہانی 2 مصنفوں کے گرد گھومتی ہے جو محبت میں گرفتار ہوجاتے ہیں’۔

انہوں نے مزید بتایا ‘عاصم اظہر ایک بزنس مین کے بیٹے کا کردار ادا کریں گے جس کا باپ اس کی شخصیت کو دباتا ہے، اس کا والد نہیں چاہتا کہ بیٹا مصنف بنے بلکہ اس کی خواہش ہے کہ وہ اس کے نقش قدم پر چلتے ہوئے ایک بزنس مین بن جائے، مگر عاصم کا کردار اپنی زندگی خود بنانے کا خواہشمند ہے’۔

عاصم اظہر اور ہانیہ عامر ڈائریکٹر کے ساتھ— ڈان امیجز فوٹو
عاصم اظہر اور ہانیہ عامر ڈائریکٹر کے ساتھ— ڈان امیجز فوٹو

ڈائریکٹر نے بتایا ‘دوسری جانب ہانیہ کا کردار ایک مشہور مصنف کا ہے جبکہ عاصم کو بطور مصنف ہر جگہ مسترد کردیا جاتا ہے’۔

احسن طالش کے مطابق ‘ہانیہ اور عاصم کی کیمسٹری کمال کی ہے اور یہ پہلی بار ہے جب وہ اسکرین پر ایک ساتھ کام کررہے ہیں، عاصم نے اچھا کیا ہے جبکہ ہانیہ تو ویسے ہی بہترین اداکارہ ہیں’۔

ہانیہ عامر — ڈان امیجز فوٹو
ہانیہ عامر — ڈان امیجز فوٹو

رومانوی کامیڈی فلم ’’ہیرمان جا‘‘ کا ٹریلر ریلیز ہوتے ہی مقبول

لاہور: حریم فاروق اورعلی رحمان کی نئی رومانوی کامیڈی فلم ”ہیر مان جا“ کا ٹریلر شائقین کی توجہ حاصل کرنے میں کامیاب ہوگیا۔

ہدایت کار اظفر جعفری کی رومانوی کامیڈی فلم’’ہیرمان جا‘‘ میں ٹی وی اور فلم کی معروف جوڑی علی رحمان اور حریم فاروق نے مرکزی کردار ادا کئے ہیں۔ ڈسٹری بیوشن کلب نے خوشیوں کے تہوار عیدالاضحی کے موقع پر پاکستانی فلموں کے شائقین کے لیے انٹرٹینمنٹ کی رولر کوسٹر رائیڈ ”ہیر مان جا“ کی نمائش کا اہتمام کیا ہے۔

’’ہیر مان جا‘‘ کا ٹریلر گزشتہ روزسوشل میڈیا کے ساتھ ملک کے تمام سنیماؤں میں ریلیز کردیا گیا ہے جسے فلمی حلقوں کے ساتھ ساتھ شائقین نے بھی خوب سراہا ہے۔ یوٹیوب پر ٹریلر کو 24 گھنٹوں کے دوران تقریباً 9 لاکھ لوگ دیکھ چکے ہیں جب کہ صارفین کی جانب سے ٹریلر کی بے حد تعریف بھی کی جارہی ہے۔

آئی آر کے بینر تلے بننے والی فلم ”ہیر مان جا“ اس کامیاب ٹیم کی نئی پیشکش ہے جو اس سے قبل ’’جانان‘‘ اور’’پرچی‘‘ جیسی فلمیں بنا چکے ہیں، جبکہ فلم کی مرکزی کاسٹ علی رحمان خان اور حریم فاروق کی جوڑی اس سے قبل بھی کئی ڈراموں اورفلم ’’پرچی‘‘ میں جلوے دکھا چکی ہے، یہی وجہ ہے کہ فلمی حلقوں کو فلم کا شدت سے انتظار ہے۔

فلم کی کہانی نوجوان نسل کو درپیش حالات اور مسائل کو مد نظر رکھ کر لکھی گئی ہے جبکہ معروف فنکار میکال ذوالفقار، آمنہ شیخ، شیزعلی خان، عابد علی اور احمد علی اکبر نے مہمان کرداروں میں جلوہ گر ہوکر فلم کی رونق کو چارچاند لگادئیے ہیں۔ رومینٹک اور کامیڈی سے بھرپور فلم عیدالاضحی پرنمائش کیلئے پیش کی جائے گی۔

میرے بس میں ہو تو بہنوں کو انڈسٹری میں کام نہ کرنے دوں، فیروز خان

پاکستانی اداکار و ماڈل فیروز خان نے کہا ہے کہ اگر ان کی بہنوں کی ذاتی زندگی پر ان کا بس چلتا یا ان کے کیریئر سے متعلق ان سے پوچھ جاتا تو وہ انہیں شوبز انڈسٹری میں کام نہیں کرنے دیتے۔

خیال رہے کہ فیروز خان کی بہنیں حمیمہ اور دعا ملک بھی ان کی طرح پاکستانی شوبز انڈسٹری کا حصہ ہیں جب کہ ان کی بڑی بہن حمیمہ ملک تو بولی وڈ میں بھی کام کر چکی ہیں۔

اگرچہ فیروز خان کی بہنیں اور وہ خود فلم انڈسٹری کا حصہ ہیں، تاہم ان کے والدین اور ان کی اہلیہ کا اس انڈسٹری سے کوئی تعلق نہیں اور وہ چاہتے ہیں کہ شوبز یا میڈیا سے منسلک لوگ ان کے اہل خانہ کے ان افراد کا شوبز اور میڈیا میں ذکر نہ کریں جن کا شوبز انڈسٹری سے کوئی تعلق نہیں۔

اگر مجھ سے رائے پوچھی جاتی تو بہنوں کو انڈسٹری میں کام کرنے نہ دوں، فیروز خان—فوٹو: فیس بک
اگر مجھ سے رائے پوچھی جاتی تو بہنوں کو انڈسٹری میں کام کرنے نہ دوں، فیروز خان—فوٹو: فیس بک

نجی ٹی وی چینل ’اے آر وائی‘ کے خصوصی پروگرام ’معصومانہ سوال‘ میں بات کرتے ہوئے فیروز خان نے صرف اپنی بہنوں اور خاندان بلکہ اپنی پیشہ ورانہ زندگی اور سیاست سے متعلق بھی بات کی۔

فیروز خان نے ایک سوال کے جواب میں کہا کہ اگر ان کی بہنوں حمیمہ اور دعا ملک کی ذاتی زندگی اور ان کے کیریئر سے متعلق فیصلہ کرنے کا حق ان کے پاس ہوتا یا ان سے پوچھا جاتا تو وہ انہیں شوبز انڈسٹری میں کام کرنے نہیں دیتے۔

ساتھ ہی انہوں نے وضاحت کی چوں کہ ان کی بہنوں کی ذاتی زندگی پر ان کا کوئی اختیار نہیں اور وہ شوبز انڈسٹری میں کام کرنا چاہتی ہیں، اس لیے وہ انہیں منع نہیں کرسکتے۔

پروگرام میں انہوں نے شوبز اور مذہب میں تصادم کے حوالے سے بھی بات کی اور اعتراف کیا کہ انہیں بعض مرتبہ یہ خیال آتا ہے کہ شوبز اںڈسٹری اور مذہب میں تصادم ہے۔

تاہم انہوں نے کہا کہ جب تک ان کے نصیب میں شوبز انڈسٹری میں کام کرنا لکھا ہوا ہے، وہ اس انڈسٹری کا حصہ رہیں گے اور جس دن ان کی قسمت سے متعلق دوسرا فیصلہ ہوگیا تو وہ اسی پر عمل کریں گے۔

انہوں نے ذو معنی جملوں میں کہا کہ کسی کی زندگی اور نصیب پر کسی کا اختیار نہیں ہوتا اور ان کے بھی نصیب میں جب تک شوبز انڈسٹری میں کام کرنا لکھا ہوا ہے، وہ کرتے رہیں گے۔

پروگرام کے دوران انہوں نے میشا شفیع اور علی ظفر جنسی ہراساں کیس سے متعلق بھی بات کی اور کہا کہ دونوں کو حقائق پر بات کرکے مل بیٹھ کر معاملے کو سلجھانا چاہیے۔

حال ہی میں لکس ایوارڈ میں یاسر حسین کی جانب سے اداکارہ اقراء عزیز کو شادی کی پیش کش کیے جانے کے اسٹائل پر بھی فیروز خان نے بات کی اور ان دونوں کے عمل کو ذاتی قرار دیا۔

فیروز خان نے پروگرام میں ملکی سیاست پر بھی بات کی اور وزیر اعظم عمران خان کی قدرے سخت پالیسیوں سے اتفاق کیا اور ساتھ ہی خواہش ظاہر کی کہ انہیں وزیر اعظم پاکستان سے ملاقات کرنے کی بھرپور خواہش ہے۔

ان کا کہنا تھا کہ انہیں عمران خان کا ایک بیان بہت ہی اچھا لگا جس میں وزیر اعظم نے کہا تھا کہ ملک کا کینسر عام علاج اور دوائیوں سے ٹھیک نہیں ہوگا۔

Google Analytics Alternative