انٹر ٹینمنٹ

شاہد کپور نے سلمان خان کو پیچھے چھوڑ دیا

ممبئی: بالی ووڈ اداکار شاہد کپور کی فلم ’’کبیر سنگھ‘‘ رواں سال سب سے زیادہ کمائی کرنے کے ساتھ 5 ریکارڈز بنانے میں کامیاب ہوگئی۔

سال 2019 بالی ووڈ اداکار شاہد کپور کے لیے بہت اچھا ثابت ہوا ہے۔ حال ہی میں ریلیز ہونے والی ان کی فلم ’’کبیر سنگھ‘‘ رواں برس کی سب سے زیادہ کمائی کرنے والی ہندی فلم بن گئی ہے۔ ترن آدرش کے مطابق فلم  ریلیز کے صرف 24 روز (3 ہفتوں) میں 255 کروڑ 89 لاکھ روپے کماکر بلاک بسٹر ثابت ہوئی ہے۔ اس کے ساتھ ہی  فلم نے ریلیز کے محض 3 ہفتوں میں 5 ریکارڈز بنالیے ہیں۔

ہندی سینما کی 10 سب سے زیادہ بزنس کرنیوالی فلموں میں شامل

ہندی سینما میں سب سے زیادہ بزنس کرنے والی فلموں میں ’’کبیر سنگھ‘‘ دسویں نمبر پر شامل ہوگئی ہے۔ سب سے زیادہ بزنس کرنے والی فلموں میں باہوبلی2،  511 کروڑ کے ساتھ پہلے نمبر پر، دنگل 387 کروڑ کے ساتھ دوسرے، سنجو 342 کروڑکے ساتھ تیسرے، پی کے 340 کروڑ کے ساتھ چوتھے، ٹائیگر زندہ ہے 339 کروڑ کے ساتھ پانچویں، بجرنگی بھائی جان 320 کروڑ کے ساتھ چھٹے، پدماوت 302 کروڑ کےساتھ ساتویں، سلطان 300 کروڑ کے ساتھ آٹھویں، دھوم3، 284 کروڑ کے ساتھ نویں اور کبیر سنگھ 255 کروڑ کے ساتھ دسویں نمبر پر ہے۔

شاہد کپور کی پہلی سولو سپر ہٹ فلم

شاہد کپور کے کیریئر کی اب تک کی سب سے زیادہ بزنس کرنے والی سنجے لیلا بھنسالی کی فلم ’’پدماوت‘‘ تھی لیکن اس فلم میں اداکار رنویر سنگھ بھی شامل تھے۔ تاہم ’’کبیر سنگھ‘‘ شاہد کپور کے کیریئر کی سب سے زیادہ بزنس کرنے والی پہلی سولو سپر ہٹ فلم بن گئی ہے۔

آسٹریلیا میں سب سے زیادہ کمائی کرنیوالی فلم

کبیر سنگھ جہاں بھارت میں کمائی کے نئے ریکارڈ بنارہی ہے وہیں آسٹریلیا میں بھی یہ فلم سب سے زیادہ بزنس کرنے والی بالی ووڈ فلم بن گئی ہے۔ آسٹریلیا میں ’’کبیر سنگھ‘‘ نے گلی بوائے، اڑی، بھارت، اورساؤتھ انڈین فلم پیٹا کو پیچھے چھوڑ دیا ہے۔

2019 کی  دوسری سب سے زیادہ کمائی کرنے والی ہندی فلم

شاہد کپور اور کیارا ایڈوانی کی’’کبیرسنگھ‘‘ بھارتی باکس آفس پر 2019 کی اب تک کی سب سے زیادہ بزنس کرنے والی دوسری فلم بن گئی ہے اس سے آگے ہالی ووڈ فلم ’’اوینجرز؛ اینڈ گیم‘‘ ہے جس نے بھارت میں 373 کروڑ سے زائد کا بزنس کیا ہے۔

سب سے جلدی 200 کروڑ کمانے والی فلم

فلم ’’کبیر سنگھ‘‘ نے ریلیز کے محض 13 دنوں میں 200 کروڑ کماکرجہاں نیا ریکارڈ قائم کیا وہیں سلمان خان کی فلم ’’بھارت‘‘ کا ریکارڈ توڑ دیا جس نے ریلیز کے 14 دنوں میں 200 کروڑ کا بزنس کیا تھا۔

وویک اوبروئے بھارتی ٹیم کا مذاق اڑانے پر مشکل میں پڑگئے

ممبئی: بالی ووڈ اداکار وویک اوبروئے کو ورلڈ کپ سے باہر ہونے پر بھارتی ٹیم کا مذاق اڑانے پر سوشل میڈیا پرتنقید کا نشانہ بنایا جارہا ہے۔

بالی ووڈ اداکار وویک اوبروئے نے نیوزی لینڈ کے ہاتھوں شکست اور ورلڈ کپ سے باہر ہونے کے بعد اپنی ہی ٹیم کا مذاق اڑاتے ہوئے ایک مختصر سی ویڈیو شیئر کی ہے جس میں ایک بھارتی کرکٹ شائق سڑک پر چلتے ہوئے سوچ رہاہے کہ سامنے سے آنے والی خاتون انہیں گلے لگانے والی ہے لیکن خاتون اس کے بجائے اس کے پیچھے چلتے ہوئے شخص کو گلے لگالیتی ہے جس سے بھارتی مداح سخت شرمندہ ہوجاتا ہے۔

وویک اوبروئے نے اس ویڈیو کے ذریعے بھارتی  ٹیم کا مذاق اڑاتے ہوئے لکھا ہے کہ ورلڈ کپ سیمی فائنل میں بھارتی ٹیم کے ساتھ بالکل ایسا ہی ہوا ہے۔ تاہم وویک کی اس پوسٹ پر بھارتی شائقین سخت غصے میں آگئے اورانہیں اپنی ہی ٹیم کا مذاق اڑانے پر جم کر تنقید کا نشانہ بناڈالا۔

ایک صارف نے لکھا مسٹر اوبروئے بڑے ہوجائیں ورنہ لوگ آپ کو سنجیدہ لینا چھوڑ دیں گے۔

کچھ صارفین نے تو ویڈیو میں موجود شرمندہ بھارتی مداح کو وویک اوبروئے، خاتون کو ایشوریا رائے اور دوسرے شخص کو ابھیشیک قراردے کر وویک اوبروئے کا ہی مذاق اڑادیا۔ کئی لوگوں نے انہیں غصے میں ہارا ہوا شخص قرار دیا اور کچھ لوگوں نے تو یہاں تک کہہ دیا کہ ورلڈ کپ کھیلنے آپ چلے جاتے۔

واضح رہے کہ بھارتی ٹیم کے ورلڈ کپ سے باہر ہونے پر جہاں انڈین شائقین غصہ ہیں وہیں اداکار عامر خان نے کوہلی کا حوصلہ بڑھاتے ہوئے کہا تھا کہ بدقسمتی سے آج ہمارا دن نہیں تھا۔

ہانیہ عامر اور عاصم اظہر پہلی بار ٹی وی اسکرین کے لیے اکٹھے

اداکارہ ہانیہ عامر اور گلوکار عاصم اظہر ایک دوسرے کے بہترین دوست ہیں اور ایسا خیال کیا جاتا ہے کہ ایک دوسرے سے محبت کرتے ہیں۔

دونوں نے اس بارے میں کوئی باقاعدہ تصدیق تو نہیں کی مگر پہلی بار ہانیہ عامر اور عاصم اظہر آن اسکرین ضرور ایک دوسرے کی محبت میں گرفتار نظر آئیں گے۔

یہ دونوں الف اللہ، دلدل اور سنو چندا (دونوں سیزن) کی ہدایات دینے والے احسن طالش کی ٹیلی فلم ‘پیار کہانی’ میں ایک دوسرے کے مدمقابل کام کررہے ہیں اور پہلی بار یہ جوڑا آن اسکرین ایک ساتھ جلوہ گر ہوگا۔

ڈان امیجز سے بات کرتے ہوئے ڈائریکٹر احسن طالش نے بتایا ‘اس ڈرامے کی کہانی کشور اسمل نے تحریر کی ہے، جبکہ ہانیہ عامر اور عاصم اظہر مرکزی کردار ادا کررہے ہیں، اس کے علاوہ شیفی حسن اور فضیلہ قاضی بھی کاسٹ میں شامل ہیں، ڈرامے کی کہانی 2 مصنفوں کے گرد گھومتی ہے جو محبت میں گرفتار ہوجاتے ہیں’۔

انہوں نے مزید بتایا ‘عاصم اظہر ایک بزنس مین کے بیٹے کا کردار ادا کریں گے جس کا باپ اس کی شخصیت کو دباتا ہے، اس کا والد نہیں چاہتا کہ بیٹا مصنف بنے بلکہ اس کی خواہش ہے کہ وہ اس کے نقش قدم پر چلتے ہوئے ایک بزنس مین بن جائے، مگر عاصم کا کردار اپنی زندگی خود بنانے کا خواہشمند ہے’۔

عاصم اظہر اور ہانیہ عامر ڈائریکٹر کے ساتھ— ڈان امیجز فوٹو
عاصم اظہر اور ہانیہ عامر ڈائریکٹر کے ساتھ— ڈان امیجز فوٹو

ڈائریکٹر نے بتایا ‘دوسری جانب ہانیہ کا کردار ایک مشہور مصنف کا ہے جبکہ عاصم کو بطور مصنف ہر جگہ مسترد کردیا جاتا ہے’۔

احسن طالش کے مطابق ‘ہانیہ اور عاصم کی کیمسٹری کمال کی ہے اور یہ پہلی بار ہے جب وہ اسکرین پر ایک ساتھ کام کررہے ہیں، عاصم نے اچھا کیا ہے جبکہ ہانیہ تو ویسے ہی بہترین اداکارہ ہیں’۔

ہانیہ عامر — ڈان امیجز فوٹو
ہانیہ عامر — ڈان امیجز فوٹو

رومانوی کامیڈی فلم ’’ہیرمان جا‘‘ کا ٹریلر ریلیز ہوتے ہی مقبول

لاہور: حریم فاروق اورعلی رحمان کی نئی رومانوی کامیڈی فلم ”ہیر مان جا“ کا ٹریلر شائقین کی توجہ حاصل کرنے میں کامیاب ہوگیا۔

ہدایت کار اظفر جعفری کی رومانوی کامیڈی فلم’’ہیرمان جا‘‘ میں ٹی وی اور فلم کی معروف جوڑی علی رحمان اور حریم فاروق نے مرکزی کردار ادا کئے ہیں۔ ڈسٹری بیوشن کلب نے خوشیوں کے تہوار عیدالاضحی کے موقع پر پاکستانی فلموں کے شائقین کے لیے انٹرٹینمنٹ کی رولر کوسٹر رائیڈ ”ہیر مان جا“ کی نمائش کا اہتمام کیا ہے۔

’’ہیر مان جا‘‘ کا ٹریلر گزشتہ روزسوشل میڈیا کے ساتھ ملک کے تمام سنیماؤں میں ریلیز کردیا گیا ہے جسے فلمی حلقوں کے ساتھ ساتھ شائقین نے بھی خوب سراہا ہے۔ یوٹیوب پر ٹریلر کو 24 گھنٹوں کے دوران تقریباً 9 لاکھ لوگ دیکھ چکے ہیں جب کہ صارفین کی جانب سے ٹریلر کی بے حد تعریف بھی کی جارہی ہے۔

آئی آر کے بینر تلے بننے والی فلم ”ہیر مان جا“ اس کامیاب ٹیم کی نئی پیشکش ہے جو اس سے قبل ’’جانان‘‘ اور’’پرچی‘‘ جیسی فلمیں بنا چکے ہیں، جبکہ فلم کی مرکزی کاسٹ علی رحمان خان اور حریم فاروق کی جوڑی اس سے قبل بھی کئی ڈراموں اورفلم ’’پرچی‘‘ میں جلوے دکھا چکی ہے، یہی وجہ ہے کہ فلمی حلقوں کو فلم کا شدت سے انتظار ہے۔

فلم کی کہانی نوجوان نسل کو درپیش حالات اور مسائل کو مد نظر رکھ کر لکھی گئی ہے جبکہ معروف فنکار میکال ذوالفقار، آمنہ شیخ، شیزعلی خان، عابد علی اور احمد علی اکبر نے مہمان کرداروں میں جلوہ گر ہوکر فلم کی رونق کو چارچاند لگادئیے ہیں۔ رومینٹک اور کامیڈی سے بھرپور فلم عیدالاضحی پرنمائش کیلئے پیش کی جائے گی۔

میرے بس میں ہو تو بہنوں کو انڈسٹری میں کام نہ کرنے دوں، فیروز خان

پاکستانی اداکار و ماڈل فیروز خان نے کہا ہے کہ اگر ان کی بہنوں کی ذاتی زندگی پر ان کا بس چلتا یا ان کے کیریئر سے متعلق ان سے پوچھ جاتا تو وہ انہیں شوبز انڈسٹری میں کام نہیں کرنے دیتے۔

خیال رہے کہ فیروز خان کی بہنیں حمیمہ اور دعا ملک بھی ان کی طرح پاکستانی شوبز انڈسٹری کا حصہ ہیں جب کہ ان کی بڑی بہن حمیمہ ملک تو بولی وڈ میں بھی کام کر چکی ہیں۔

اگرچہ فیروز خان کی بہنیں اور وہ خود فلم انڈسٹری کا حصہ ہیں، تاہم ان کے والدین اور ان کی اہلیہ کا اس انڈسٹری سے کوئی تعلق نہیں اور وہ چاہتے ہیں کہ شوبز یا میڈیا سے منسلک لوگ ان کے اہل خانہ کے ان افراد کا شوبز اور میڈیا میں ذکر نہ کریں جن کا شوبز انڈسٹری سے کوئی تعلق نہیں۔

اگر مجھ سے رائے پوچھی جاتی تو بہنوں کو انڈسٹری میں کام کرنے نہ دوں، فیروز خان—فوٹو: فیس بک
اگر مجھ سے رائے پوچھی جاتی تو بہنوں کو انڈسٹری میں کام کرنے نہ دوں، فیروز خان—فوٹو: فیس بک

نجی ٹی وی چینل ’اے آر وائی‘ کے خصوصی پروگرام ’معصومانہ سوال‘ میں بات کرتے ہوئے فیروز خان نے صرف اپنی بہنوں اور خاندان بلکہ اپنی پیشہ ورانہ زندگی اور سیاست سے متعلق بھی بات کی۔

فیروز خان نے ایک سوال کے جواب میں کہا کہ اگر ان کی بہنوں حمیمہ اور دعا ملک کی ذاتی زندگی اور ان کے کیریئر سے متعلق فیصلہ کرنے کا حق ان کے پاس ہوتا یا ان سے پوچھا جاتا تو وہ انہیں شوبز انڈسٹری میں کام کرنے نہیں دیتے۔

ساتھ ہی انہوں نے وضاحت کی چوں کہ ان کی بہنوں کی ذاتی زندگی پر ان کا کوئی اختیار نہیں اور وہ شوبز انڈسٹری میں کام کرنا چاہتی ہیں، اس لیے وہ انہیں منع نہیں کرسکتے۔

پروگرام میں انہوں نے شوبز اور مذہب میں تصادم کے حوالے سے بھی بات کی اور اعتراف کیا کہ انہیں بعض مرتبہ یہ خیال آتا ہے کہ شوبز اںڈسٹری اور مذہب میں تصادم ہے۔

تاہم انہوں نے کہا کہ جب تک ان کے نصیب میں شوبز انڈسٹری میں کام کرنا لکھا ہوا ہے، وہ اس انڈسٹری کا حصہ رہیں گے اور جس دن ان کی قسمت سے متعلق دوسرا فیصلہ ہوگیا تو وہ اسی پر عمل کریں گے۔

انہوں نے ذو معنی جملوں میں کہا کہ کسی کی زندگی اور نصیب پر کسی کا اختیار نہیں ہوتا اور ان کے بھی نصیب میں جب تک شوبز انڈسٹری میں کام کرنا لکھا ہوا ہے، وہ کرتے رہیں گے۔

پروگرام کے دوران انہوں نے میشا شفیع اور علی ظفر جنسی ہراساں کیس سے متعلق بھی بات کی اور کہا کہ دونوں کو حقائق پر بات کرکے مل بیٹھ کر معاملے کو سلجھانا چاہیے۔

حال ہی میں لکس ایوارڈ میں یاسر حسین کی جانب سے اداکارہ اقراء عزیز کو شادی کی پیش کش کیے جانے کے اسٹائل پر بھی فیروز خان نے بات کی اور ان دونوں کے عمل کو ذاتی قرار دیا۔

فیروز خان نے پروگرام میں ملکی سیاست پر بھی بات کی اور وزیر اعظم عمران خان کی قدرے سخت پالیسیوں سے اتفاق کیا اور ساتھ ہی خواہش ظاہر کی کہ انہیں وزیر اعظم پاکستان سے ملاقات کرنے کی بھرپور خواہش ہے۔

ان کا کہنا تھا کہ انہیں عمران خان کا ایک بیان بہت ہی اچھا لگا جس میں وزیر اعظم نے کہا تھا کہ ملک کا کینسر عام علاج اور دوائیوں سے ٹھیک نہیں ہوگا۔

بالی ووڈ خانز فلم انڈسٹری پرمزید راج کرنے کے خواہشمند

ممبئی: بالی ووڈ کے سلطان سلمان خان نے اپنی شاہ رخ اور عامر خان کی مقبولیت میں کمی کے حوالے سے بات کرتے ہوئے کہا ہے کہ ہم تینوں خانز ابھی مزید کچھ سال تک بالی ووڈ پر راج کرنے کے خواہشمند ہیں۔

گزشتہ کئی دہائیوں سےبالی ووڈ خانزبھارتی فلم انڈسٹری پر راج کررہے ہیں۔ اس عرصے میں کئی اداکار آئے اور چلے گئے لیکن سلمان، شاہ رخ اورعامر خان جیسی مقبولیت کوئی حاصل نہ کرسکا۔ تاہم پچھلے کچھ عرصے میں تینوں خانز اپنی فلموں سے شائقین کو متاثر کرنے میں ناکام رہے ہیں۔

سلمان خان کی فلم ’’ریس3‘‘، شاہ رخ کی ’’زیرو‘‘ اور عامر خان کی ’’ٹھگ آف ہندوستان‘‘ باکس آفس پر کمال نہ دکھاسکیں۔ ان فلموں کی ناکامی کے بعد کہا جانے لگاتھا کہ بالی ووڈ میں خانز کا جادو اب ختم ہوگیا ہے۔

حال ہی میں بالی ووڈ کے سلطان سلمان خان نے فلم انڈسٹری پر اپنی کم ہوتی مقبولیت پر بات کرتے ہوئے کہا شہرت اور مقبولیت ایک دن آہستہ آہستہ دھندلا کر ختم ہوجاتی ہے، لیکن اسے ایک لمبے عرصے تک برقرار رکھنا اصل کام ہے اور مجھے لگتا ہے کہ میں، شاہ رخ، عامر، اکشے اور اجے ہی ہیں جو اپنے اسٹارڈم کو لمبے عرصے تک برقرار رکھنے میں کامیاب ہوئے ہیں۔

سلمان خان نے کہا ہم نے نا صرف اپنی مقبولیت کوبرقرار رکھا بلکہ ہماری بھرپور کوشش ہے کہ اس مقبولیت کو مزید کچھ سال اور برقرار رکھیں۔ سلومیاں نے اپنی شاہ رخ اور عامر کی فلموں کی ناکامی کے بارے میں بات کرتے ہوئے کہا اگر ہماری فلمیں نا چلنے سے باکس آفس کی کمائی میں 8 یا 10 فیصد کمی آئی ہے تو اس کا یہ مطلب نہیں کہ ہمارا زوال کا دور شروع ہوگیا ہے۔

واضح رہے کہ سلمان خان نے ’’ریس3‘‘ کی ناکامی کا غم  فلم ’’بھارت‘‘ کی کامیابی سے بھلادیا اور وہ اس وقت بھی کئی فلموں کی شوٹنگ میں مصروف ہیں جن میں ’’دبنگ3‘‘ اور سنجے لیلا بھنسالی کی فلم ’’انشااللہ‘‘ شامل ہیں، ان دونوں فلموں کا شائقین کو بے صبری سے انتظار ہے۔

حنا الطاف کو منیب بٹ پر تنقید مہنگی پڑ گئی

 

اداکارہ وماڈل حنا الطاف نے حال ہی میں ڈیجیٹل پلیٹ فارم ’بنجی‘ کے ایک شو میں ساتھی اداکار منیب بٹ کو ایک ایسا اداکار قرار دیا تھا جسے اداکاری نہیں آتی، تاہم وہ بھرپور اداکاری کے بھرم دیتے ہیں۔

حنا الطاف کی جانب سے منیب بٹ کے لیے کہے جانے والے یہ الفاظ انہیں مہنگے پڑ گئے اور اداکارہ کو شوبز شخصیات اور منیب بٹ کی اہلیہ اور سالی نے کھری کھری سنادیں۔

ہوا، کچھ یوں کہ حنا الطاف ’بنجی‘ کے شو ’ٹو بی آنیسٹ‘ میں شریک ہوئیں، جہاں انہوں نے شوبز انڈسٹری سمیت اپنی پیشہ ورانہ زندگی پر کھل کر بات کی۔

پروگرام میں حنا الطاف نے شوبز شخصیات پر سوشل میڈیا پر ہونے والی تنقید پر بھی بات کی اور کہا کہ بعض اوقات انہیں لباس اور بولنے کے انداز پر بھی تنقید کا نشانہ بنایا جاتا ہے۔

’بنجی‘ کی جانب سے اسی پروگرام کی فیس بک پر شیئر کی جانے والی ویڈیو میں حنا الطاف اور پروگرام کے میزبان تابش ہاشمی کو مختلف موضوعات پر بات کرتے ہوئے دیکھا جا سکتا ہے۔

پروگرام میں ریپڈ فائر سلسلے میں میزبان تابش ہاشمی کی جانب سے اداکارہ سے سوال کیا گیا کہ وہ کون سا اداکار ہے جسے اداکاری نہیں آتی، لیکن وہ بھرم پورے 100 روپے کے دیتا ہے؟

حنا الطاف نے میزبان کے سوال پر مسکراتے ہوئے کہا کہ ’انہیں لگتا ہے کہ وہ منیب بٹ ہیں‘۔

اداکارہ کے جواب میں تابش ہاشمی منیب بٹ کا نام گوگل پر سرچ کرنے لگتے ہیں، جس پر اداکارہ نے انہیں غصے میں کہا کہ وہ منیب بٹ کو نہیں جانتے؟ جس پر میزبان نے جواب دیا کہ وہ زیادہ ٹی وی نہیں دیکھتے، اس لیے انہیں ان کا پتہ نہیں۔

میزبان کی لاعلمی پر حنا الطاف نے انہیں بتایا کہ وہی ہیش ٹیگ اینیب والے‘ اور ساتھ ہی شکوہ کیا کہ منیب بٹ نے انہیں اپنی شادی پر بھی نہیں بلایا۔

حنا الطاف کی جانب سے ہیش ٹیگ اینیب کی یاد دہانی کرائے جانے کے بعد میزبان کو فوری طور پر منیب بٹ اور ان کی شادی آگئی اور کہنے لگے، وہی جن کی اہلیہ نے شادی کے اگلے دن مہندی سے ہاتھ پر لکھا تھا ’جہیز خوری بند کرو‘۔

حنا الطاف کی جانب سے منیب بٹ پر تنقید کیے جانے کے بعد انہیں اداکار کی اہلیہ اور سالی کے ساتھ ساتھ دیگر شوبز شخصیات نے بھی تنقید کا نشانہ بنایا اور کہا کہ کسی بھی اداکار کو ساتھی اداکار کے لیے ایسے نامناسب الفاظ استعمال نہیں کرنے چاہئیں۔

سب سے پہلے منیب بٹ کی اہلیہ اداکارہ ایمن خان نے حنا الطاف کو تنقید کا نشانہ بنایا اور ساتھ ہی انہوں نے اداکارہ و میزبان کو جاہل بھی قرار دیا۔

ایمن خان نے اپنی فیس بک پوسٹ میں لکھا کہ ان لوگوں کو شرم آنی چاہیے جو اپنے ساتھی اداکاروں کا تمسخر اڑاتے ہیں، ساتھ ہی انہوں نے اپنی پوسٹ میں ’حسد نہ کر‘ کے ہیش ٹیگ کا بھی استعمال کیا۔

منیب بٹ نے خود تاحال کوئی جواب نہیں دیا—فوٹو: ایمن خان انسٹاگرام
منیب بٹ نے خود تاحال کوئی جواب نہیں دیا—فوٹو: ایمن خان انسٹاگرام

ایمن خان کے بعد ان کی بہن منال خان نے بھی حنا الطاف کے بیان پر فیس بک اسٹیٹس میں میزبان سمیت اداکارہ کو آڑے ہاتھوں لیا اور سوال کیا کہ ہم ایک دوسرے سے اتنے جلتے کیوں ہیں؟

ان کے علاوہ اداکارہ ہانیہ عامر نے بھی حنا الطاف کو آڑے ہاتھوں لیا اور اپنی انسٹاگرام اسٹوری میں لکھا کہ تنقید برائے اصلاح اچھی بات ہے، تاہم کسی کی شخصیت کو فضول میں تنقید کا نشانہ بنانا درست عمل نہیں۔

اداکارہ کا کہنا تھا کہ خاص طور پر عوام کے سامنے کسی بھی شخصیت کے خلاف بات کرنا کسی کے بھی فائدے میں نہیں ہوتا، اس لیے عوامی مقامات پر ایسے بحث سے اجتناب کریں۔

علاوہ ازیں اداکارہ فائزہ خان نے بھی حنا الطاف کو تنقید کا نشانہ بنایا اور ساتھ ہی انہوں نے منیب بٹ کی تعریف بھی کی۔

حنا الطاف نے بھی اپنے بیان پر تاحال وضاحت نہیں کی—فوٹو: حنا الطاف انسٹاگرام
حنا الطاف نے بھی اپنے بیان پر تاحال وضاحت نہیں کی—فوٹو: حنا الطاف انسٹاگرام

فائزہ خان کا ٹوئیٹ میں کہنا تھا کہ اپنے ساتھ فنکاروں کے فن کا مذاق اڑانا کوئی اچھی بات نہیں۔

اداکارہ نے منیب بٹ کی تعریف کرتے ہوئے کہا کہ انہوں نے ان کے ساتھ کام کیا ہے، وہ انتہائی بہترین اداکار ہیں اور ان کی اداکاری کی تعریف پڑوسی ملک کے اداکاروں نے بھی کی ہے۔

حنا الطاف کی جانب سے تنقید کیے جانے پر تاحال خود منیب بٹ نے کوئی جواب نہیں دیا اور نہ ہی حنا الطاف نے اپنے بیان پر مزید کوئی وضاحت کی ہے۔

فلم ‘انسیپشن’ کے اینڈنگ کا راز آخرکار سامنے آگیا

سائنس فکشن تو وہی ہوتا ہے جس کا خیال بھی کسی نے بھی نہ کیا ہو مگر کئی بار ایسا کچھ فلموں میں نظر آجاتا ہے جس کو دیکھ کر یقین بھی نہیں آتا اور لگتا ہے کہ ایسا بھی ہوسکتا ہے یعنی یقینی بے یقینی کی کیفت طاری رہتی ہے۔

ایسی ہی ایک فلم ہولی وڈ ڈائریکٹر کرسٹوفر نولان کی ‘انسیپشن’ ہے، جو اکثر افراد بار بار دیکھتے ہیں اور پھر بھی ان کا دل نہیں بھرتا۔

اور ایک اچھی فلم وہ ہوتی ہے جس کی کہانی لوگوں کے ذہن سے محو نہ ہوسکے بلکہ کئی برس بعد بھی اس کے بارے میں سوالات کے جواب ڈھونڈنے پڑے۔

ایسا ہی انسیپشن کے اختتام میں ہوا اور فلم کو اب ریلیز ہوئے 9 سال ہوگئے، مگر ناظرین اب تک اس کی اینڈنگ کے بارے میں وضاحت کے منتظر ہیں۔

خوابوں سے راز چرانے والے باکمال چوروں کی اس فلم میں لیونارڈو ڈی کیپریو نے مرکزی ادا کیا تھا اور اس کا دل بھی ان کا کردار ڈوم کوب تھا جو اداروں کی معلومات چرانے میں مہارت رکھتا ہے، مگر اس کی خاصیت لوگوں کے خوابوں میں گھس کر ان کے لاشعور سے رازوں کو چرانا ہے۔

اس خاصیت نے کارپوریٹ دنیا میں اس کی مانگ بڑھا دی مگر اس کی قیمت بھی اس چور کو ہر اس چیز کی صورت میں چکانا پڑی جس سے اسے محبت تھی، جیسے بیوی نے خودکشی کرلی جبکہ وہ امریکا جاکر اپنے بچوں کو ملنے سے قاصر ہوگیا کیونکہ اس پر ہی بیوی کو مارنے کا الزام تھا۔

مگر پھر اسے دوبارہ سب کچھ پانے کا موقع اس طرح ملتا ہے ،جب اسے بظاہر ایک ناممکن کام کی پیشکش کی جاتی ہے یعنی کس کے ذہن میں ایک آئیڈیا پلانٹ کرنا۔

اگر آپ نے فلم نہیں دیکھی تو آگے پڑھنے سے گریز کریں کیونکہ اختتام نیچے درج ہوگا تاہم اگر دیکھ چکے ہیں تو آپ کو بھی یاد ہوگا کہ فلم کا اختتام کیسے ہوتا ہے۔

جیسا آپ کو یاد ہوگا کہ اپنے مشن میں کامیابی کے بعد ڈوم کوب اپنے بچوں سے ملنے جاتا ہے اور یہ تصدیق کرنے کے لیے لٹو گھماتا ہے کہ وہ خواب میں ہے یا حقیقت میں، مگر اسی وقت بچے آجاتے ہیں اور وہ کمرے سے باہر نکل جاتا ہے۔

فلم کے اختتامی منظر میں دیکھا جاسکتا ہے کہ لٹو گھوم رہا ہے جو کہ فلم کی کہانی کے مظابق اس بات کا عندیہ ہوتا ہے کہ یہ منظر خواب کا ہے، مگر ڈائریکٹر نے سین فوری ختم کردیا تو واضح طور پر کہنا مشکل ہوتا ہے کہ وہ لٹو گھومتا رہتا ہے یا نہیں۔

فلم کے ڈائریکٹر نے کبھی فلم کے اختتام کے بارے میں وضاحت نہیں کی بلکہ یہ معاملہ دیکھنے والوں پر چھوڑ دیا۔

فلم کے اختتام پر گھومنے والا لٹو — فوٹو بشکریہ وارنر برادرز
فلم کے اختتام پر گھومنے والا لٹو — فوٹو بشکریہ وارنر برادرز

تاہم اس میں فلم میں لیونارڈو ڈی کیپریو کے سسر کا کردار ادا کرنے والے مائیکل کین نے اس کے اختتام کے بارے میں تجسس ختم کرنے کی کوشش کی ہے۔

برطانوی روزنامے انڈپینڈنٹ کی رپورٹ کے مطابق برطانوی اداکار نے اس بارے میں بتایا ‘جب مجھے انسیپشن کا اسکرپٹ ملا، تو میں کافی الجھن کا شکار ہوگیا اور میں نے نولان سے کہا کہ میں یہ سمھنے سے قاصر ہوں کہ کہاں خواب ہے اور کہاں حقیقت، جس پر ڈائریکٹر نے کہا، جب تم سین میں ہوگے تو وہ حقیقت ہوگی، تو خود سمجھ لیں کہ جہاں اسکرین پر میں نظر آیا وہ حقیقی زندگی کا منظر تھا، جہاں میں نہیں تھا، وہ ایک خواب تھا’۔

اور فلم کی اینڈنگ کو دوبارہ ذہن میں دہرائیں تو آپ کو یاد آئے گا کہ اختتامی سین میں مائیکل کین بھی بچوں کے ساتھ موجود ہوتے ہیں تو اگر ان کی بات کو مانا جائے تو سین میں ان کی موجودگی اس بات کی تصدیق کرتی ہے کہ وہ خواب نہیں بلکہ حقیقت تھی۔

Google Analytics Alternative