انٹر ٹینمنٹ

کیا آپ فلم ’’گلابو ستابو‘‘ میں شامل اس اداکار کو پہچان سکتے ہیں؟

ممبئی: بالی ووڈ کے لیجنڈ اداکار امیتابھ بچن کو اُن کی نئی آنے والی فلم ‘گلابو ستابو‘ کی جاری ہونے والی پہلی جھلک میں پہچاننا ناممکن لگ رہا ہے۔

مشہور فلم ’پیکو‘ میں منفرد کردار نبھانے کے بعد امیتابھ بچن ایک بار پھر ہدایت کار شوجتھ سرکار کے ساتھ فلم ’گلابو ستابو‘ میں نئے انداز کے ساتھ نظر آرہے ہیں۔ فلم کو لیکر اُن کے مداحوں کو بے صبری سے انتظار تھا کیوں کہ کہا جارہا تھا کہ اس فلم میں بھی امیتابھ بچن بلکل منفرد انداز کے ساتھ سامنے آئیں گے۔ تاہم ان مداحوں کو اب مزید انتظار کرنے کی ضرورت نہیں کیوں کہ فلم کی پہلی جھلک جاری کردی گئی ہے۔

فلم ’گلابو ستابو‘ کی جاری کردہ پہلی جھلک میں ایک بزرگ کی تصویر ہے جوکہ چہرے پر چشمہ، داڑھی اور سر پر ٹوپی پہنے غصے میں دیکھ رہے ہیں در حقیقت یہ کوئی اور نہیں بلکہ امیتابھ بچن ہیں۔ جنہیں پہلی نظر دیکھنے والا کوئی عام شخص ہی سمجھے گا۔ جب کہ امیتابھ کے ساتھ اس فلم میں ایوشمان کھرانہ کامیڈی کا تڑکا لگاتے نظر آئیں گے۔ جوکہ اس فلم میں امیتابھ بچن کے کرائے دار کا کردار ادا کر رہے ہیں۔

کامیڈی سے بھرپور فلم ’گلابو ستابو‘ کی کہانی جوہی چترویدی نے لکھی ہے  جب کہ فلم کو رونی لاہری اور شیل کمار پروڈیوس کر رہے ہیں، فلم 24 اپریل 2020 میں سنیما گھروں کی زینت بنے گی۔

بھارتی اداکارہ نے رکن اسمبلی کا حلف لینے سے قبل شادی کرلی

رواں برس ہونے والے بھارت کے لوک سبھا یعنی ایوان زیریں کے 17 ویں انتخابات میں ریاست مغربی بنگال سے الیکشن جیتنے والی بنگالی فلموں کی معروف اداکارہ نصرت جہاں روحی نے جہاں رکن اسمبلی منتخب ہونے کے بعد پارلیمنٹ کے باہر تصاویر کھچوا کر سب کو حیران کیا تھا۔

وہیں انہوں نے رکن لوک سبھا منتخب ہوتے ہی رواں ماہ 2 جون کو منگنی کرکے سب کو حیران کیا تھا۔

نصرت جہاں روحی نے ریاست مغربی بنگال سے آل انڈیا ترینیمول کانگریس (اے آئی ٹی سی) کی ٹکٹ پر انتخاب لڑا تھا اور وہ لوک سبھا کی نوجوان ترین رکن بھی ہیں۔

انتخابات میں کامیابی کے بعد پہلی مرتبہ 28 مئی کو ساتھی اداکارہ مغربی بنگال سے ہی انتخابات جیتنے والی اداکارہ ممی چکربورتی کے ساتھ لوک سبھا پہنچی تھیں اور دونوں اداکاراؤں نے پارلیمنٹ کے باہر کھچوائی گئی تصاویر کو سوشل میڈیا پر شیئر کیا تھا۔

دونوں اداکاراؤں کی سوشل میڈیا پر شیئر کی گئی تصاویر پر انہیں تنقید کا نشانہ بنایا گیا تھا اورکئی صارفین نے ان کی تصاویر پر کمنٹس کیے تھے کہ لوک سبھا کسی فلم کی شوٹنگ کا مقام نہیں۔

اداکارہ نے ترکی میں شادی کی—فوٹو: انسٹاگرام
اداکارہ نے ترکی میں شادی کی—فوٹو: انسٹاگرام

لوک سبھا کے باہر فلمی انداز میں تصاویر کچھوا کر اسے سوشل میڈیا پر شیئر کرنے سے شہرت حاصل کرنے کے بعد نصرت جہاں روحی نے رواں ماہ 2 جون کو سوشل میڈیا کے ذریعے اپنی منگنی کا اعلان کیا تھا۔

اداکارہ اور منتخب رکن لوک سبھا نے شادی کے حوالے سے کوئی بات نہیں کی، تاہم خیال کیا جا رہا تھا کہ وہ لوک سبھا کا حلف لینے کے چند ہفتوں بعد شادی کرلیں گے۔

لیکن نصرت جہاں روحی نے حلف لینے سے قبل ہی شادی کرکے ایک بار پھر سب کو حیران کردیا۔

ٹائمز آف انڈیا کے مطابق نصرت جہاں روحی نے لوک سبھا گذشتہ ہفتے ہونے والے پہلے اجلاس میں شرکت نہیں کی اور نہ ہی انہوں نے تاحال حلف لیا ہے۔

اداکارہ نے والد کے ساتھ جذباتی تصویر بھی شیئر کی—فوٹو: انسٹاگرام
اداکارہ نے والد کے ساتھ جذباتی تصویر بھی شیئر کی—فوٹو: انسٹاگرام

نصرت جہاں روحی نے رکن لوک سبھا بننے سے زیادہ شادی کو اہمیت دی اور انہوں نے اپنے منگیتر کولکتا کے کاروباری شخص نکھل جین سے ترکی میں شادی کرلی۔

اداکارہ نے ہندوستانی رسومات کے تحت شادی کی، جس میں ان کی قریبی دوستوں سمیت اہل خانہ نے شرکت کی۔

نصرت جہاں روحی کی شادی میں ان کی قریبی دوست، اداکارہ اور ان کے ساتھ ہی نو منتخب ہونے والی رکن لوک سبھا ممی چکربورتی نے بھی شرکت کی۔

اداکارہ نے شادی کے بعد شوہر کے ساتھ تصاویر سوشل میڈیا پر شیئر کیں، جو دیکھتے ہی دیکھتے وائرل ہوگئیں۔

اداکارہ نے حلف لینے سے زیادہ شادی کرنے کو ترجیح دی—فوٹو: انسٹاگرام
اداکارہ نے حلف لینے سے زیادہ شادی کرنے کو ترجیح دی—فوٹو: انسٹاگرام

خیال رہے کہ نصرت جہاں روحی لوک سبھا رکن منتخب ہونے والی 2 مسلمان خواتین میں سے ایک ہیں، ان کے علاوہ ان کی ہی ریاست مغربی بنگال سے ساجدہ احمد بھی رکن لوک سبھا منتخب ہوئی ہیں۔

نصرت جہاں روحی اور ساجدہ احمد سمیت مجموعی طور پر اس بار لوک سبھا کے انتخابات میں 78 خواتین کامیاب ہوئی تھیں

نصرت جہاں روحی نوجوان ترین رکن لوک سبھا بھی بنیں گیں—فوٹو: انسٹاگرام
نصرت جہاں روحی نوجوان ترین رکن لوک سبھا بھی بنیں گیں—فوٹو: انسٹاگرام

نصرت جہاں روحی بنگالی، تامل اور تیلگو سمیت بھارت کی دیگر زبانوں میں بننے والی فلموں سمیت ہندی زبان میں بننے والے ڈراموں میں بھی اداکاری کے جوہر دکھا چکی ہیں۔

نصرت جہاں روحی ٹولی وڈ یعنی تامل، تیلگو، بنگالی اور مراٹھی زبان میں فلمیں بنانے والی انڈسٹری کی مقبول ترین اداکارہ ہیں۔

نصرت جہاں اور ممکی چکربورتی کو لوک سبھا کے باہر تصاویر کھچوانے پر تنقید کا نشانہ بھی بنایا گیا تھا—فوٹو: ٹوئٹر
نصرت جہاں اور ممکی چکربورتی کو لوک سبھا کے باہر تصاویر کھچوانے پر تنقید کا نشانہ بھی بنایا گیا تھا—فوٹو: ٹوئٹ

وینا ملک آصف زرداری کے پروڈکشن آرڈر جاری ہونے پر بھڑک اُٹھیں

کراچی: معروف پاکستانی اداکارہ وینا ملک پیپلز پارٹی کے شریک چیئرمین آصف زرداری کے پروڈکشن آرڈر جاری ہونے پر بھڑک اُٹھیں۔

وینا ملک نے سماجی رابطے کی ویب سائٹ ٹوئٹر پر اپنی ٹوئٹس میں تنقید کرتے ہوئے کہا کہ 30 سال تک ہمارے پیارے ملک اسلامی جمہوریہ پاکستان کو جن چوروں ڈاکوؤں اور غداروں نے لوٹا آج ان کو پروڈکشن آرڈرز کے ذریعے اسمبلی میں بلایا جارہا ہے، جناب اسد قیصر قوم کے ٹیکس کے پیسے سے چلنے والی اسمبلی میں چوروں کو بلا کر آپ ہمیں مایوس کررہے ہیں۔

وینا ملک نے وزیر اعظم عمران خان کو مخاطب کرتے ہوئے کہا کہ ڈیئر خان صاحب یہ قوم صرف اس امید پر بھوکی سوتی رہی ہے کہ ایک دن عمران خان وزیر اعظم بنے گا اور پھراس قوم کو لوٹنے والوں کا احتساب ہوگا مگر قوم کو لوٹنے والوں کو پھر سے اسمبلیوں میں بلایا جا رہا ہے قوم آپ کے ساتھ ہے ان کا تگڑا احتساب کریں۔

اداکارہ نے یہ بھی کہا کہ پاکستان میں آج بھی غریب کیلئے الگ اور امیر کے لیے الگ الگ قانون ہے۔غریب روٹی چوری کرتا پکڑا جائے تو پوری عمر جیل میں گزارنی پڑتی ہے مگر جن کرپٹ سیاستدانوں کی وجہ سے روٹی چوری کرنے پر مجبور ہوتا ہے ان کی پروڈکشن آرڈرز کے ذریعے آنیاں جانیاں لگی رہتی ہیں۔

’سڑک آپ کے باپ کی نہیں‘، سوشل میڈیاصارفین نے اکشے کمار کو آڑے ہاتھوں لے لیا

ممبئی: بالی ووڈ کے ایکشن ہیرو اکشے کمار کو سوشل میڈیا پر موٹر سائیکل پر سواری کرتے ہوئے تصویر شیئر کرنا مہنگا پڑگیا صارفین نے انہیں شدید تنقید کا نشانہ بناڈالا۔

اکشے کمار کا شمار بالی ووڈ کے ان اداکاروں میں ہوتا ہے جو روایتی کمرشل فلموں سے ہٹ کرایسی فلموں میں کام کرنا پسند کرتے ہیں جس میں لوگوں کو معاشرے کے سدھار کے حوالے سے کوئی پیغام دیاجائے اور صرف فلموں میں ہی نہیں وہ بہت سی ایسی مہمات کا حصہ بھی ہیں جو لوگوں میں شعور اجاگر کرنے کے لیے کام کرتی ہیں۔

گزشتہ برس اکشے کمار نے اپنے سوشل میڈیا اکاؤنٹ پر چند ویڈیوز شیئر کی تھیں جس میں وہ لوگوں کو موٹر سائیکل چلاتے وقت ہیلمٹ پہننے کا سبق دیتے نظر آرہے تھے، اور ہیلمٹ نہ پہننے کی صورت میں وہ لوگوں کو اس کے خطرناک نتائج سے آگاہ کرتے ہوئے کہہ رہے تھے کہ ’’سڑک تمہارے باپ کی نہیں ہے‘‘۔

تاہم شاید اکشے کمار اپنا پڑھایا ہوا سبق خود ہی بھول گئے۔ بالی ووڈ کے کھلاڑی نے چند روز قبل اپنے انسٹاگرام پرایک تصویر شیئر کی تھی جس میں وہ بغیر ہیلمٹ پہنے موٹر سائیکل چلاتے نظر آرہے ہیں، بس یہ تصویر شیئر کرنے کی دیر تھی کہ لوگوں نے انہیں آڑے ہاتھوں لیتے ہوئے شدید تنقید کا نشانہ بناڈالا۔

سوشل میڈیا صارفین نے اکشے کمار کو ہیلمٹ نہ پہننے پر ان کی پرانی ویڈیوز کا حوالہ دیتے ہوئے کہا ’’ہیلمٹ کہاں ہے؟‘‘، ’’بڑا گیان پھیلاتا تھا (دانشوری بھگارتاتھا) اب ہیلمٹ کہاں ہے بھائی۔‘‘ جب کہ ایک صارف نے تو اکشے کمار کے الفاظ ان ہی کو لوٹاتے ہوئے کہا ’’ہیلمٹ کہاں ہے؟ روڈ آپ کے باپ کی نہیں ہے، ایسا ہی کہتے ہیں نہ آپ۔‘‘

مہوش حیات کا نیا آئٹم سانگ ’’گینگسٹر گڑیا‘‘سوشل میڈیا پر مقبول

کراچی: خوبرو پاکستانی اداکارہ مہوش حیات کا نیا آئٹم سانگ ’’گینگسٹر گڑیا‘‘ سوشل میڈیا پر مقبول ہورہاہے۔

اداکارہ مہوش حیات اداکاری میں تو اپنی صلاحیتوں کا لوہا منوا چکی ہیں تاہم فلموں میں آئٹم نمبرز کے لیے فلمسازوں کی پہلی پسند بھی مہوش حیات ہی ہوتی ہیں۔ مہوش فلم ’’نامعلوم افراد‘‘ میں ’’بلی‘‘ اور ’’چھلاوا‘‘میں ’’چڑیا‘‘ جیسے آئٹم نمبرز پر پرفارم کرچکی ہیں۔ جہاں ان کے آئٹم نمبرز مداحوں میں مقبول ہوئے، وہیں انہیں آئٹم نمبرز پر پرفارم کرنے کے لیے شدید تنقید کا نشانہ بھی بنایا گیا لیکن وہ مہوش حیات ہی کیا جو تنقید سے ڈر جائیں۔

حال ہی میں مہوش حیات کافلم ’’باجی‘‘ کے لیے فلمایا گیا نیا آئٹم سانگ ’’گینگسٹرگڑیا‘‘ لوگوں کی توجہ کا مرکز بناہوا ہے جس میں مہوش گینگسٹر بنیں اپنے رقص اور قاتل اداؤں سے لوگوں کولُبھاتی نظر آرہی ہیں۔

گانے کی خاص بات یہ ہے کہ اسے بالی ووڈ کی نامور گلوکارہ سنیدھی چوہان نے گایا ہے جب کہ اس کی اوریجنل کمپوزیشن طحہٰ ملک نے کی ہے۔ گانے کے بول عثمان خالد بٹ نے لکھے ہیں اور کوریوگرافی بھی انہوں نے ہی کی ہے۔

واضح رہے کہ اداکارہ میرا کی فلم ’’باجی‘‘ رواں ماہ 28 جون کو نمائش کے لیے پیش کی جائے گی، فلم میں اداکاہ میرا اور عثمان خالد بٹ کے علاوہ اداکار محسن عباس حیدر اور ماڈل و اداکارہ آمنہ الیاس بھی اداکاری کے جوہر دکھاتی نظر آئیں گی، فلم کا انتظار شائقین بے صبری سے کررہے ہیں۔

عاطف اسلم کا بھارت کی سڑکوں پر ’’تاجدار حرم‘‘ پڑھنے والے شخص کو سلام

لاہور: بین الاقوامی شہرت یافتہ گلوکار عاطف اسلم کو بھارت کی سڑکوں پر ’’تاجدار حرم‘‘ پڑھنے والے شخص کی  آواز نے اپنا گرویدہ بنا لیا۔

عالمی شہرت یافتہ گلوکار عاطف اسلم اپنی خوبصورت آواز کی وجہ سے اپنی مثال آپ ہیں۔ اُن کی آواز نے نہ صرف پاکستان بلکہ پڑوسی ملک بھارت میں بھی سحر طاری کر رکھا ہے یہاں تک کہ عاطف اسلم کے گیتوں کے بغیر بھارتی فلموں کو ادھورا سمجھا جاتا ہے۔

عاطف اسلم کی خاص بات یہ ہے کہ وہ اپنے با کمال فن استعمال کرتے وقت دوسرے کے فن کو بھی قدر کی نگاہ سے دیکھتے ہیں۔ یہی وجہ ہے کہ وہ پاکستان میں چھپے ٹیلنٹ کو سامنے لانے کے لئے بھی جدو جہد کرتے ہیں۔ لیکن یہ بات بھی سچ ہے کہ ٹیلنٹ کبھی چھپتا نہیں خواہ وہ دنیا کے کسی کونے میں ہی کیوں نہ ہو اور یہی ہوا کہ عاطف اسلم کو بھارت کی سڑکوں پر گھومتے شخص کی آواز بھی متاثر کرنے میں کامیاب ہو گئی۔

عاطف اسلم نے سماجی رابطے کی ویب سائٹ انسٹا گرام پر ایک ویڈیو شیئر کی جس میں ایک شخص بھارتی شہر حیدرآباد دکن کی سڑکوں پر  ’تاج دارِ حرم‘ کا کلام نہایت ہی خوبصورت انداز کے ساتھ پڑھتا نظر آرہا ہے۔ کلام کو مزید خوبصورت بنانے کے لئے یہ شخص اپنی دھن میں مگن ڈفلی بھی بجا رہا ہے۔

عاطف اسلم بھی اس شخص کی روح کو متاثر کرنے والی آواز پر خاموش نہ رہ سکے، انہوں نے ویڈیو کے ساتھ تعریف کرتے ہوئے سبحان اللہ کہا اور کہا کہ کیا روح داری تاج دارِ حرم ہے۔ عاطف نے  گزارش کی کہ اگر کوئی اس شخص کو حیدر آباد دکن میں دیکھے تو اسے میرا سلام کہے۔

‘زندگی کھلی کتاب ہونے کی وجہ سے بریک اپ پر بہت تکلیف ہوئی’

 بولی وڈ اداکارہ کترینہ کیف کچھ ماہ قبل یہ بات کہہ چکی ہیں کہ انہیں رنبیر کپور سے تعلق ختم ہونے پر کوئی پچھتاوا نہیں بلکہ اس بریک اپ کے بعد وہ زیادہ مضبوط ہوئیں مگر اب انہوں نے اعتراف کیا ہے کہ وہ ان کے لیے انتہائی تکلیف دہ دور تھا۔

رنبیر کپور سے کترینہ کیف نے کیریئر کے ابتدائی دور میں محبت کی تھی اور دونوں کے درمیان کچھ سال تک تعلقات بھی رہے، تاہم کبھی بھی دونوں نے اس کا اعتراف نہیں کیا تھا۔

گزشتہ سال دسمبر میں ایک انٹرویو کے دوران کترینہ کیف نے کہا تھا ’میں رنبیر سے ہوئے اپنے بریک اپ کو کسی نعمت سے کم نہیں سمجھتی، کیوں کہ ایسا ہونے کے بعد ہی مجھے اپنی اہمیت اپنی سوچ اور اپنی خواہشات کا اندازہ ہوا‘۔

کترینہ نے یہ بھی کہا کہ انہیں اپنے بریک اپ پر کسی قسم کا کوئی افسوس نہیں۔

اب ایک نئے انٹرویو میں انہوں نے کہا کہ وہ کبھی اس بریک اپ بات نہیں کرتی مگر میڈیا نے انہیں اس پر مجبور کیا۔

ان کا کہنا تھا ‘جہاں تک میرے انداز کی بات ہے تو میں کبھی اپنے تعلق کے بارے میں بات نہیں کرتی، میں اس بارے میں بات اس لیے کی کیونکہ میڈیا کو اس میں دلچسپی تھی، میں ہر بار اپنی طرف آنے والی گولی سے نہیں بچ سکتی اور ایسا کرنا اچھا بھی نہیں لگتا، تو بہترین بات یہی ہے کہ جس حد تک کم ہوسکے اتنا شیئر کولوں اور میرا یہ بھی ماننا ہے کہ حقیقت کو تسلیم کرنا چاہیے، ہم (رنبیر اور کترینہ) اب بھی ایک دوسرے کے لیے احترام رکھتے ہیں اور یہ کبھی تبدیل نہیں ہوگا’۔

انسٹاگرام فوٹو
انسٹاگرام فوٹو

ان کا کہنا تھا کہ ایک اسٹار ہونے کی وجہ سے انہیں اس پر بہت تکلیف ہوئی مگر اس وجہ سے انہیں بہتر فرد بننے میں بھی مدد ملی ‘جب ہم دونوں الگ ہوئے، تو میری ایک بہن بھی اس طرح کی صورتحال سے گزر رہی تھی، اس وقت مجھے احساس ہوا کہ میری زندگی چونکہ دوسروں کے لیے کھلی کتاب ہے تو اس لیے میری انا کو زیادہ تکلیف ہوئی، ہم دونوں نے ایک جیسا درد محسوس کیا، مطالعے کے ذریعے میں نے سکون پایا، میرے دوست بھی بہت معاون ثابت ہوئے، مجھے زندگی کے اس باب پر کوئی پچھتاوا نہیں، میں اس تجربے سے گزر کر پہلے سے زیادہ باشعور ہوگئی ہوں’۔

چند ماہ قبل ایک انٹرویو کے دوران کترینہ کیف نے کہا تھا کہ گرچہ سلمان خان ان کے سب سے بہترین دوست ہیں، مگر بعض مرتبہ وہ کئی دنوں، ہفتوں اور یہاں تک کہ کئی ماہ تک بات بھی نہیں کرتے، تاہم پھر بھی وہ ایک دوسرے کے بہترین دوست ہیں۔

انسٹاگرام فوٹو
انسٹاگرام فوٹو

شادی اور بچوں کے حوالے سے پوچھے گئے سوال کے جواب میں ان کا کہنا تھا کہ اگرچہ ماضی میں انہوں نے شادی کرنے اور ڈھیر سارے بچے پیدا کرنے کی منصوبہ بندی بھی بنائی تھی، تاہم ان کی خواہش مکمل نہ ہوسکی۔

کترینہ کیف نے یہ نہیں بتایا کہ وہ کس سے شادی کرنا چاہتی تھی اور ان کی خواہش کیوں پوری نہ ہوسکی۔

مستقبل میں محبت کے حوالے سے اداکارہ نے کہا کہ انہیں لگتا ہے کہ انہیں جب بھی ضرورت ہوگی، انہیں محبت مل جائے گی۔

انسٹاگرام فوٹو
انسٹاگرام فوٹو

کترینہ کیف نے وضاحت کی کہ انہیں کہیں بھی، کبھی بھی، کسی سے بھی محبت ہوسکتی ہے اور اس کے لیے کوئی انتظار نہیں کرنا پڑتا۔

اداکارہ نے مثال دی کہ ہوسکتا ہے کہ کبھی کسی ایئرپورٹ پر ان کے ہاتھ سے کتاب گر جائے اور وہ اسے اٹھانے کے لیے نیچے جھکیں تو عین اس وقت کوئی شخص آکر انہیں کتاب اٹھانے میں مدد دے اور اسی لمحے ان دونوں کی نظریں ایک دوسرے سے ٹکرائیں اور پھر ان میں محبت ہوجائے۔

سنی دیول کی بھارتی الیکشن میں جیت خطرے میں پڑنے لگی

نئی دہلی: بھارتی الیکشن میں بی جے پی کے ٹکٹ پر گورداس پور لوک سبھا کی سیٹ جیتنے والے اداکارسنی دیول کی کرسی خطرے میں پڑنے لگی۔

ناموربالی ووڈ اداکارسنی دیول حال ہی میں بھارتی الیکشن میں بی جے پی کے ٹکٹ پرپنجاب کے حلقے گورداس پورسے سیاسی اکھاڑے میں اترے اوراپنے حریفوں کومات دیتے ہوئے الیکشن میں کامیابی حاصل کرلی، تاہم اب ان کی سیٹ خطرے میں پڑگئی ہے۔

بھارتی میڈیا رپورٹ کے مطابق سنی دیول نے اپنی انتخابی مہم کے دوران الیکشن کمیشن کی جانب سے طے کیے گئے اخراجات سے زیادہ پیسے خرچ کیے۔ انتخابی مہم کے دوران امیدواروں پرنظررکھنے والے ادارے واچ ڈوگ کوسنی دیول کے زائد اخراجات کے حوالے سے شکایت موصول ہوئی ہے، لہذٰا اس معاملے پرالیکشن کمیشن سنی دیول کے خلاف کارروائی کرکے انہیں نوٹس جاری کرسکتا ہے جس کے باعث  سنی دیول کی جیتی ہوئی سیٹ بھی خطرے میں پڑسکتی ہے۔

بھارتی الیکشن کمیشن کی طرف سے مقررکردہ ماڈل ضابطہ اخلاق کے قواعدو ضوابط کے مطابق لوک سبھا کا کوئی بھی امیدوار اپنی انتخابی مہم میں 70 لاکھ روپے سے زائد اخراجات نہیں کرسکتا جب کہ الیکشن کمیشن کو موصول ہونے والی دستاویزات کے مطابق سنی دیول نےانتخابی مہم کے دوران تقریباً86  لاکھ روپے خرچ کیے۔

الیکشن کمیشن کو یہ اختیار بھی حاصل ہے کہ قواعدو ضوابط کی خلاف ورزی پر الیکشن کمیشن کا ادارہ امیدوار کی پارلیمنٹ کی رکنیت کو معطل کرکے دوسرے نمبر پر آنے والے امیدوار کو فاتح قرار دے سکتاہے۔

واضح رہے کہ سنی دیول نے گورداس پور کی سیٹ پر کانگریس کے امیدوار سنیل جاکھڑ کو 80 ہزارووٹوں سے شکست دے  کرکامیابی حاصل کی تھی۔ گورداس پور کی یہ سیٹ سنی دیول سے قبل اداکار وسیاستدان ونود کھنہ کے پاس تھی۔

Google Analytics Alternative