انٹر ٹینمنٹ

رنبیر کی سالگرہ پر عالیہ بھٹ کے ہاتھ سے بنے کیک کے چرچے

بالی وڈ اداکار رنبیر کپور اور اداکارہ عالیہ بھٹ کے قریبی تعلقات اور دونوں کی شادی کے چرچے تو میڈیا پر ہوتے ہی رہتے ہیں اور اب عالیہ نے رنبیر کی 36 ویں سالگرہ پر خود اپنے ہاتھوں سے کیک تیار کرکے سب کو حیران کردیا، جس کی تصاویر بھی سوشل میڈیا پر وائرل ہوچکی ہیں۔

گزشتہ روز رنبیر کپور نے اپنی 36 ویں سالگرہ گھر پر اپنی والدہ نیتو اور چند قریبی دوستوں کے ساتھ منائی، جن میں عالیہ بھٹ بھی شامل تھیں۔

رنبیر کی سالگرہ پر عالیہ بھٹ نے بھارتی شیف ہرش کے ساتھ مل کر خود کیک اور پیسٹریز بنائیں اور انہیں خوبصورتی سے سجایا۔

شیف ہرش نے عالیہ کے ساتھ کیک بناتے وقت کی تصاویر انسٹاگرام اسٹوری  کے ذریعے شیئر کیں۔

ساتھ میں انہوں نے لکھا، ‘کیک تیار کرتے ہوئے سب سے اہم جزو مسکراہٹ ہے، اگر مسکرا نہیں سکتے تو پیسٹری کریم کو چکھ لیں اور مسکراہٹ بکھیریں’۔

شیف ہرش انسٹا اسٹوری اسکرین شاٹ—.

کیک تیار ہونے کے بعد ایک اور انسٹا اسٹوری شیئر کرتے ہوئے شیف ہرش نے عالیہ بھٹ کے لیے لکھا، ’ زبردست! اب ٹاؤن میں ایک نیا پیسٹری شیف آگیا ہے جس نے بہترین پائن ایپل کیک تیار کیا ہے‘۔

شیف ہرش انسٹا اسٹوری اسکرین شاٹ—.

عالیہ بھٹ کی اس محنت کو مداحوں کی جانب سے بے حد پسند کیا گیا جبکہ خود رنبیر نے بھی ان کو بہت سراہا۔

واضح رہے کہ عالیہ بھٹ اور رنبیر کپور کی جوڑی پہلی بار فلم ’براہماسترا‘ میں ایک ساتھ جلوہ گر ہوگی، اس فلم کی کاسٹ میں امیتابھ بچن بھی شامل ہیں۔

تیمورکی آیا کا معاوضہ کتنا؟

ممبئی: بالی ووڈ کے چھوٹے نواب اورکرینہ کپورخان کے بیٹے تیمورخان زیادہ تر اپنی آیا کے ساتھ تصاویروں میں نظر آتے ہیں جن سے وہ بہت گھلے ملے ہوتے ہیں۔

بھارتی میڈیا رپورٹس کے مطابق بالی ووڈ میں چھوٹی سی عمرمیں اسٹارکڈ بننے والے سیف اورکرینہ کے بیٹے تیمورعلی خان بھی خبروں کی زینت بنے رہتے ہیں۔ تیموراکثرمقامات پرسیف اورکرینہ کے ساتھ نظرآتے ہیں پرسب سے زیادہ وہ اپنی آیا کے ساتھ تصاویروں میں نظر آتے ہیں جن کے وہ بہت زیادہ قریب ہیں۔

رپورٹس کے مطابق تیمورکا خیال رکھنے والے ان کی آیا ماہانہ ڈیڑھ لاکھ روپے تنخواہ لیتی ہیں جوزیادہ وقت دینے پرایک لاکھ 75 ہزاربھی ہوجاتی ہے۔  تیمور کی آیا  کو ایک کار بھی دی گئی ہے جس میں وہ تیمورکوگھوماتی ہیں۔

واضح رہے کہ تیمورکی یہ آیا ممبئی میں اسٹارزکے بچوں کے لیے آیائیں دینے والی ایک بڑی ایجنسی کی جانب سے بھیجی گئی تھیں جو اسٹارزکے بچوں کا خیال رکھتی ہیں اوراسی ایجنسی نے اداکارتوشارکپوراوراداکارہ سوہا علی خان کوبھی آیا دی ہیں۔

تنوشری دتہ کا ناناپاٹیکر کے بعد بالی ووڈ ہدایت کار پر بھی ہراسانی کا الزام

ممبئی: بالی ووڈ اداکارہ تنوشری دتہ نے نانا پاٹیکر کے بعد بالی ووڈ کے ہدایت کار ویویک اگنی ہوتری پر بھی ہراسانی کا الزام لگادیا۔

بالی ووڈ اداکارہ تنوشری دتہ نے ایک بھارتی ویب سائیٹ کو انٹرویو دیتے ہوئے کہا کہ  فلم ’’چاکلیٹ، ڈیپ ڈارک سیکریٹس‘‘ کی شوٹنگ کے دوران ویویک اگنی ہوتری نے مجھے مختصر کپڑے پہن کر رقص کرنے کے لیے کہا اورمجھے ہراساں کرنے کے علاوہ  میرے ساتھ بدسلوکی کی جب کہ اس ڈانس میں میرا کوئی سین نہیں تھا، ہدایت کار کے اس رویے پر میں دنگ رہ گئی۔

اداکارہ نے مزید کہا اس واقعے کے وقت سیٹ پر موجود  اداکار عرفان خان  اور سنیل شیٹھی فوراً میری حمایت میں اٹھ کھڑے ہوئے، عرفان خان نے ہدایت کار سے کہا آپ کیا کہہ رہے ہیں شوٹنگ میں اداکارہ کی کوئی ضرورت نہیں اور مجھے معلوم ہے اداکاری کیسے کرنی ہے مجھے اداکاری کرنی آتی ہے۔ میں عرفان خان کے اس عمل کو سراہتی ہوں کیونکہ انہوں نے ہدایت کار کے سامنے میرے لیے آواز اٹھائی۔

’سوئی دھاگا‘ دیکھ کر انوشکا پر فخر ہورہا ہے، کوہلی

ممبئی: بھارتی کرکٹر ویرات کوہلی نے اپنی اہلیہ انوشکا شرما کی تعریفوں کے پُل باندھتے ہوئے کہا ہے کہ فلم سوئی دھاگا دیکھ کر انہیں  بیوی پر فخر ہورہا ہے۔

گزشتہ روز ممبئی میں اداکار ورون دھون اور انوشکا شرما کی فلم’’سوئی دھاگا‘‘کی اسپیشل اسکرین منعقد کی گئی جس میں انوشکا شرما، ویرات کوہلی اور کرکٹر ظہیر خان سمیت متعدد افراد نے شرکت کی۔

فلم دیکھنے کے بعد کوہلی نے ٹوئٹر پر انوشکا کی تعریفوں کے پُل باندھتے ہوئے کہا ’’میں نے سوئی دھاگا دوسری بار دیکھی ہے اور یہ مجھے پہلی بار سے بھی زیادہ اچھی لگی ہے، فلم کی پوری کاسٹ نے بہت عمدہ پرفارمنس دی ہے۔‘‘

ایک اور ٹوئٹ میں ویرات کوہلی نے لکھا’’فلم میں ورون دھون کی پرفارمنس اچھی تھی لیکن انوشکا شرما کے کردارممتا نے میرا دل جیت لیا، انوشکا کی بہترین اداکاری آپ کو ان سے محبت کرنے پر مجبور کردے گی، فلم دیکھنے کے بعد مجھے اپنی اہلیہ پر بے حد فخر محسوس ہورہا ہے، لہٰذا فلم ضرور دیکھئے گا۔‘‘

واضح رہے کہ انوشکا شرما اورورون دھون کی فلم’’سوئی دھاگا‘‘آج ریلیز ہورہی ہے۔

ارجن کپور‘ایک ولن’ کے دوسرے ولن؟

پروڈیوسر ایکتا کپور کی 4 سال قبل ریلیز ہونے والی رومانٹک تھرلر فلم ‘ایک ولن‘ کے سیکوئل بنانے کی تیاریاں جاری ہیں۔

اطلاعات ہیں کہ فلم کی ٹیم نے فلم کے دوسرے ولن کو بھی ڈھونڈ لیا۔

اگرچہ پہلے بھی یہ اطلاعات تھیں کہ ‘ایک ولن’ کے سیکوئل کے لیے ادیتیا رائے کپور کو کاسٹ کیے جانے کا امکان ہے۔

تاہم رواں برس جون میں یہ خبر سامنے آئی کہ سدھارتھ ملہوترا سیکوئل میں بھی اپنا کردار ادا کریں گے، تاہم اس کی تصدیق نہیں کی جاسکی تھی۔

اب اطلاعات ہیں کہ جہاں ‘ایک ولن‘ کے سیکوئل میں سدھارتھ ملہوترا اپنا کردار ادا کرتے نظر آئیں گے، وہیں ان کے ساتھ پہلی بار ارجن کپور بھی ایکشن میں دکھائی دیں گے۔

دکن کیرونیکل نے اپنی رپورٹ میں ذرائع سے بتایا کہ فلم کی ٹیم سے منسلک قریبی ذرائع نے بتایا کہ فلم میں اداکاری کے لیے دونوں اداکاروں سے بات چیت کا سلسلہ جاری ہے۔

پہلی فلم میں شردھا کپور نے مرکزی کردار ادا کیا تھا—اسکرین شاٹ
پہلی فلم میں شردھا کپور نے مرکزی کردار ادا کیا تھا—اسکرین شاٹ

ذرائع کے مطابق فلم کی ٹیم اس وقت ارجن کپور اور سدھارتھ ملہوترا کے ساتھ مذاکرات میں مصروف ہے، تاہم تاحال اس حوالے سے کوئی بھی معاہدہ نہیں ہوسکا۔

ذرائع نے بتایا کہ فلم کی ٹیم ارجن کپور کو فلم میں منفی کردار کے لیے کاسٹ کرنے کی خواہاں ہے، جس کے لیے مذاکرات جاری ہیں۔

اطلاعات ہیں کہ سیکوئل فلم میں سدھارتھ ملہوترا اپنا کردار ادا کرتے نظر آئیں گے، جب کہ ارجن کپور منفی کردار کرتے دکھائی دیں گے۔ تاہم ‘ایک ولن’ کے سیکوئل کی کاسٹ کا اعلان ہونا ابھی باقی ہے۔

یہ بھی چہ مگوئیاں ہیں کہ اس بار فلم میں شردھا کپور کی جگہ نئی ہیروئن کو کاسٹ کیا جائے گا، اس حوالے سے چہ مگوئیاں ہیں کہ ممکنہ طور پر پرینیتی چوپڑا یا کریٹی سونن کو کاسٹ کیا جائے گا، تاہم اس حوالے سے کچھ بھی کہنا قبل از وقت ہے۔

ابھی یہ بھی واضح نہیں ہے کہ سیکوئل فلم کو کب تک ریلیز کیا جائے گا، تاہم امکان ہے کہ اس حوالے سے رواں برس کے آخر تک حتمی اعلان کردیا جائے گا۔

خیال رہے کہ 2014 میں ریلیز ہونے والی فلم میں سدھارتھ ملہوترا کے ساتھ شردھا کپور, کمال راشد خان اور آمنہ شریف اور رتیش دیش مکھ نظر آئے تھے۔

فلم میں سدھارتھ ملہوترا نے ولن کا کردار ادا کیا تھا، جو بعد ازاں پیار ہونے کے بعد اچھے انسان بن جاتے ہیں۔

رتیش دیش مکھ فلم میں منفی انداز میں نظر آئے تھے۔

ہراسانی معاملہ؛ بالی ووڈ انڈسٹری تنوشری دتہ کے حق میں اٹھ کھڑی ہوئی

ممبئی: تنوشری دتہ کی جانب سے اداکار ناناپاٹیکر پر لگائے گئے جنسی ہراسانی کے الزامات پر پوری بالی ووڈ انڈسٹری اداکارہ کی حمایت میں اٹھ کھڑی ہوئی ہے۔

گزشتہ روز بھارت کی نامور صحافی جینک اسکوئرا نے ٹوئٹر پر تنوشری دتہ کے ناناپاٹیکر پر لگائے گئے الزامات کی تصدیق کرتے ہوئے کہا تھا کہ یہ واقعہ صحیح ہے کیونکہ وہ اس وقت وہیں تھیں، جینک کے اس ٹوئٹ کے بعد متعدد بالی ووڈ فنکاروں نےتنوشری کی حمایت میں ٹوئٹ کی۔

نامور ہدایت کارواداکار فرحان اختر نے لکھا’’10 سال قبل جب تنوشری دتہ کا کیریئر مشکلات کا شکار تھا وہ چپ رہ سکتی تھیں لیکن وہ اس وقت بھی چپ نہ رہیں اور آج بھی ان کا انداز وہی ہے جو پہلے تھا اور ان کی کہانی میں کوئی تبدیلی نہیں آئی، اس لیے ہمیں انہیں سراہا جانا چاہیے نہ کہ ان پر سوال اٹھانے چاہئیں۔‘‘

اداکارہ پریانکا چوپڑا نے لکھا کہ وہ فرحان اختر کی بات سے مکمل طور پر اتفاق رکھتی ہیں، ہمیں متاثرین پر یقین کرنے کی ضرورت ہے۔

اداکارہ سونم کپور نے بھی تنوشری کی حمایت میں ٹوئٹ کی’’مجھے تنوشری دتہ اور جینک پر یقین ہے، جینک میری دوست ہے وہ کچھ بھی ہوسکتی ہے لیکن جھوٹی نہیں ہوسکتی، اب وقت ہے ہم سب کو ایک دوسرے کے لیے کھڑے رہنے کا۔‘‘

اداکارہ پرینیتی چوپڑا نے تنوشری کا ساتھ دیتے ہوئے لکھا متاثرین اپنے ساتھ ہونے والی زیادتی برداشت کرتے ہیں لہٰذا ان پر یقین کرنا چاہیے اور انہیں عزت دینی چاہیے۔

اداکارہ ریچاچڈھا نے لکھا’’ تنوشری دتہ پر جو گزری اس بات کا انہیں بے حد افسوس ہے، کوئی بھی خاتون اپنے ساتھ پیش آنے والے حادثے کو دنیا کے سامنے لانا نہیں چاہتی جس کی وجہ سے اسےمذاق کا نشانہ بنایاجاتا ہے، اس کے ساتھ سیٹ پر جو بھی ہوا وہ بہت خوفناک تھا۔

اداکارہ سوارا بھاسکر نے بھی تنوشری کی حمایت میں ٹوئٹ کی اور لکھا مجھے تم پر یقین ہے۔

اکشے کمار کی اہلیہ اداکارہ ٹوئنکل کھنہ نے ٹوئٹ کرتے ہوئے لکھا تنوشری دتہ کو جج کرنے اور انہیں شرمندہ کرنے سے پہلے جینک کی یہ ٹوئٹ پڑھ لیں۔ کام کرنے کی جگہ پر بغیر کسی ڈر اور خوف کے ماحول میں کام کرنا ہر کسی کا حق ہے۔

گزشتہ روز اداکار عامر خان نے بھی تنوشری دتہ کی حمایت کرتے ہوئے کہا تھا کہ وہ اس بارے میں زیادہ کچھ نہیں جانتےلیکن اگر واقعی میں تنوشری دتہ کے ساتھ ایسا کچھ  ہوا ہے تو یہ بہت ہی افسوس کی بات ہے۔

’جوانی پھر نہیں آنی 2‘ نے صدر عارف علوی کا بھی دل جیت لیا

کراچی: صدر مملکت ڈاکٹر عارف علوی نے ہمایوں سعید اور فہد مصطفیٰ کی فلم’’جوانی پھر نہیں آنی2‘‘ کی تعریف کرتے ہوئے کہا ہے کہ انہیں یہ فلم بہت پسند آئی ہے۔

رواں سال کی سب سے زیادہ بزنس کرنے والی فلم’’جوانی پھر نہیں آنی2‘‘ جہاں پاکستانی شائقین کی امیدوں پر پوری اتری ہے وہیں اس فلم نے صدر  ڈاکٹر عارف علوی کا دل بھی جیت لیا ہے۔

صدر عارف علوی نے ٹوئٹر پر فلم کی تعریف کرتے ہوئے کہا کہ ’’میں نےکل فلم  جوانی پھر نہیں آنی2 دیکھی، فلم بہترین ہے، مجھے یہ دیکھ کر بہت خوشی محسوس ہورہی ہے کہ پاکستانی سینما بہتری کی جانب بڑھ رہا ہے اور بہت اچھی تفریح فراہم کررہا ہے۔‘‘

واضح رہے کہ’’جوانی پھر نہیں آنی2‘‘ پاکستان کی پہلی فلم ہے جو ریلیز سے اب تک  60 کروڑ سے زائد کا بزنس کرچکی ہے۔

سلمان خان کو قتل کرنے کی منصوبہ بندی کرلی گئی، وکیل کا انکشاف

ممبئی : بالی ووڈ سلطان سلمان خان کے وکیل نے انکشاف کیا ہے کہ فلم ’لویاتری‘ کی وجہ سے انتہا پسندوں کی جانب سے سلمان خان کو جان سے مارنے کی  منصوبہ بندی کرلی گئی ہے۔

چند روز قبل ہندو انتہا پسند جماعت وشوا ہندو پریشد (وی ایچ پی) کے سربراہ آلوک کمار کی جانب سے فلم ’لوراتری‘ کے ٹائٹل پر اعتراض اور سنیما گھروں میں فلم کی نمائش روکنے کی دھمکی دی گئی تھی، مسلسل دباؤ کی وجہ سے سلمان خان نے انتہا پسندوں کے سامنے گھٹنے ٹیکتے ہوئے فلم ’لوراتری‘ کا نام تبدیل کرکے  اسے ’لویاتری‘ کردیا تھا۔

بھارتی میڈیا رپورٹس کے مطابق بالی ووڈ سلطان سلمان خان نے فلم  ’لویاتری‘ کی وجہ سے مبینہ دھمکیاں ملنے کے باعث بھارتی سپریم کورٹ سے رجوع کرلیا ہے جب کہ چیف جسٹس دیپک مشرا خود اس کیس کی سماعت کریں گے۔

سلمان خان کے وکیل کا کہنا ہے کہ ہندو جماعت کے اعتراض کے بعد فلم کا نام تبدیل کردیا گیا ہے لیکن اس کے باوجود وہ ناخوش ہیں اور اب وہ فلم کے کئی سین نکالنے کا مطالبہ کر رہے ہیں۔ وکیل نے کہا کہ سلمان خان کو قتل کرنے کے لیے باقاعدہ طور پر منصوبہ بندی کرلی گئی ہے۔

واضح رہے کہ سلمان خان کی پروڈکشن میں بننے والی فلم  ’لویاتری‘ میں اُن کے بہنوئی ایوش شرما اور ورینہ حسین ڈیبیو کر رہے ہیں یہ فلم  5 اکتوبر کو سنیما گھروں کی زینت بنے گی۔

Google Analytics Alternative