انٹر ٹینمنٹ

کنگ خان نے 28 سال بعد اپنی گریجویشن کی ڈگری حاصل کرلی

نئی دلی : کنگ خان بھی بالآخرڈگری ہولڈر گریجویٹ ہوگئے، 28 سال بعد اپنی گریجویشن کی ڈگری حاصل کرلی۔بالی ووڈ میگا اسٹار شاہ رخ خان اپنی نئی فلم “فین ” کے گانے کی لانچنگ کرنے نئی دلی کے ہنس راج کالج پہنچے، کالج انتظامیہ نے موقع غنیمت جانا اور 28 سال سے سنبھال کر رکھی ہوئی ڈگری کنگ خان کو پیش کردی۔ کنگ خان نے نئی دلی کے ہنس راج کالج سے 1988 میں گریجویشن کیا تھا لیکن ڈگری حاصل کیے بنا ہی کالج کو خیرباد کہہ دیا تھا۔

ڈیاگو، ریہرسل کے دوران پیٹ میں سیمورائی تلوار لگنے سے ہلاک ہو گیا

جاپان میں ایک اداکار تھیٹر کی ریہرسل کے دوران پیٹ میں سیمورائی تلوار لگنے سے ہلاک ہو گیا۔

ٹوکیو پولیس یہ جاننے کی کوشش کر رہی ہے کہ آیا موت حادثاتی تھی یا پھر قتل۔

ایک تھیٹر گروپ کے 33 سالہ اداکار ڈیاگو کاشینو ٹوکیو کے ایک اسٹوڈیو میں اپنے ساتھیوں کے ہمراہ ریہرسل کر رہے تھے جب یہ حادثہ پیش آیا۔

انہیں واقعہ کے فوراً بعد ہسپتال منتقل کیا گیا، لیکن وہ جانبر نہ ہو سکے۔

عامر خان سلمان خان کی فلم ‘سلطان’ کا بے تابی سے انتظار کر رہے

بولی وڈ کے عامر خان کا کہنا ہے کہ وہ سلمان خان کی آنے والی فلم ‘سلطان’ کا بے تابی سے انتظار کر رہے ہیں اور انہیں ان کی فلم سے بہت سی اچھی توقعات وابستہ ہیں۔

ایک رپورٹ کے مطابق ایک تقریب کے دوران عامر خان کا کہنا تھا ’سلمان کی فلمیں ہمیشہ ہی اچھی ہوتی ہیں اس لیے مجھے سلطان سے کافی اچھی امیدیں ہیں۔ جیسے سب ان کی فلموں کا بے صبری سے انتظار کرتے ہیں میں بھی کر رہا ہوں۔ مجھے یقین ہے یہ ایک بہترین فلم ہوگی۔

سلمان خان اپنی آنے والی فلم میں ایک پہلوان کا کردار ادا کر رہے ہیں جس میں ان کے ہمراہ انوشکا شرما اہم کردار ادا کریں گی، دلچسپ بات یہ ہے کہ عامر خان بھی اپنی اگلی فلم ’دنگل‘ میں ایک پہلوان کا کردار ادا کررہے ہیں۔

‘دنگل’ کے حوالے سے عامر کا کہنا تھا ’اس میں میرا کردار کافی مختلف ہوگا اور جسامت کئی حد تک فلم ‘گجنی’ کی یاد دلائے گی۔ میں نے فلم کے لیے 6 ماہ میں 25 کلو وزن بڑھایا ہے‘۔

عامر خان کو اس فلم میں وزن بڑھانے کے بعد اب وزن کم کرنے کی بھی ضرورت ہے جس کے بعد وہ فلم کے دوسرے حصے کی شوٹنگ مکمل کریں گے۔

سلمان خان کی فلم ’سلطان‘ رواں سال عید پر جبکہ عامر خان کی ’دنگل‘ کرسمس پر ریلیز کی جائے گی۔

گلوکارعطا اللہ عیسیٰ خیلوی بھی سیاست میں

لاہور :  چار دہائیوں تک اپنی آواز کا جادو جگانے والے عطا اللہ عیسیٰ خیلوی اب اپنے ہنر سیاست میں آزمائیں گے۔ پاکستان بھر میں مقبول گلوکار اب عمران خان کی تحریک انصاف کا حصہ بن کر نیا پاکستان بنائیں گے۔ انٹرا پارٹی الیکشن میں میانوالی کے ضلعی صدر کے لئے امیدوار بنیں گے۔تفصیلات کے مطابق سرائیکی میں گائیکی سے شہرت پانے والے عطاء اللہ کے چاہنے والے خیبر سے کراچی تک پھیلے ہیں۔ 1992  میں ریڈیو پاکستان سے کیریئر کا آغاز کرنے والے عیسیٰ خیلوی کو اپنے گانے ’’مندری دا تھیوا‘‘ سے شہرت ملی۔ عیسیٰ خیلوی نے اردو، سرائیکی اور پنجابی میں چالیس ہزار سے زائد گانے گائے۔سب سے زیادہ البمز ریلیز کرنے پر گنیز بک آف ورلڈ ریکارڈ میں اپنا نام بھی درج کرایا۔ پھر تحریک انصاف کا حصہ بنے اور نئے پاکستان کے گن گانے لگے۔ عطاء اللہ خان نیازی نے اب تحریک انصاف کے ضلعی صدر کا انتخاب لڑنے کا فیصلہ کیا ہے۔ ان کے اس اعلان نے تحریک انصاف کے کارکنوں اور عیسیٰ خیلوی کے پرستاروں میں خوشی کی لہر دوڑا دی ہے۔

فنکار مصروفیات کے باوجود ہشاش بشاش کیسے رہتے ہیں ؟

لاہور:  فنکار دن بھر کے کاموں اور مصروفیات کے باوجود ہشاش بشاش رہتے ہیں۔ آئیے دیکھتے ہیں کہ مصروف ترین زندگی گزارنے والے مشہور فلم سٹار اتنی محنت کے باوجود ہر وقت کھلے کھلے کیسے نظر آتے ہیں۔ خوبصورت مسکراہٹ والی جوہی چاولہ کا کہنا ہے کہ وہ ذہنی دباﺅ سے نجات کے لیے گانے کا سہارا لیتی ہیں۔ گنگنانے سے ان کا چہرہ کھل اٹھتا ہے۔لیونارڈو ڈی کیپریو نے اپنے گھر میں ہوا کو خوشبو دار بنانے کا نظام نصب کر رکھا ہے۔ ان کا کہنا ہے کہ اچھی خوشبو انہیں خوش رکھتی ہے۔ اکشے کمار دل خوش کرنے کے لیے سبز چائے پیتے ہیں۔ شبانہ اعظمی کہتی ہیں وہ جب ذہنی دباﺅ کا شکار ہوں تو الماریوں اور کمرے کی صفائی کرتی ہیں اور یوں ان کا ذہن تروتازہ ہو جاتا ہے۔کینڈل جینر ہشاش بشاش ہونے کیلئے اپنی بہن کم کار ڈاشین کے ساتھ وقت گزارتی ہیں۔دیا مرزا ذہنی سکون کے لیے مراقبے کا سہارا لیتی ہیں۔سلمان خان کا کہنا ہے کہ ایشوریا رائے سے جدائی کے بعد انہیں معلوم ہوا کہ غم سے نجات کا بہترین ذریعہ مصوری ہے۔ سیف علی خان بھی مصوری سے تروتازہ رہتے ہیں۔ بپاشا باسو جب بھی پریشانی کا شکار ہوں تو ورزش کا سہارا لیتی ہیں اور یوں جسم و ذہن تروتازہ ہو جاتے ہیں۔ شلپا شیٹھی کا خوش رہنے کا انداز بھی بہت پیارا ہے۔ شلپا مزے مزے کا کھانا تیار کرکے خود بھی مسکراتی ہیں اور دوسروں کو بھی خوش رہتی ہیں

عامر خان اور نریندر مودی کی ملاقات

ممبئی: بالی ووڈ کے مسٹر پرفیکٹ جو گزشتہ دنوں بھارت میں عدم برداشت پر بیان دینے سے متنازع گردانے جا رہے تھے انھوں نے گزشتہ روز بھارتی وزیراعظم نریندر مودی کی طرف سے دیے گئے ڈنر میں ان سے ملاقات کی ہے اس تقریب میں اداکارہ کنگنا رناوت بھی اس ڈنر میں مدعو تھیں۔گزشتہ روز ممبئی کے بندرا کورلا کمپلیکس میں میگا ایونٹ میک ان انڈیا تقریب میں شرکت کے بعد بھارتی وزیراعظم کے اس ڈنر میں بھارت کی حکومتی سطح پر اعلیٰ شخصیات کے اس ڈنر کا اہتمام کیا گیا تھا جس میں میڈیا کو بھی داخل ہونے کی اجازت نہیں تھی۔ یاد رہے بھارت میں عدم برداشت سے متعلق عامر خان نے کہا تھا کہ بھارت اب رہنے کے قابل نہیں رہا اور وہ مستقل سکونت کے لیے اہلیہ کرن راؤ کے ساتھ بیرون ملک چلے جائیں گے اس بیان پر بھارت میں خاصا ہنگامہ کھڑا ہوگیا تھا۔ اسی طرح 28 سالہ کنگنا رناوت نے بھی بھارت میں عدم برداشت کے بڑھتے رحجان سے متعلق بات کرتے ہوئے کہا تھا کہ اظہار رائے کی آزادی کا مطلب یہ نہیں ہوتا کہ کسی کی توہین کی جائے، اداکاروں کو زیادہ محتاط ہونا پڑتا ہے۔

سلمان خان اور شاہ رخ خان کیخلاف جرم ثابت نہ ہو سکا

نئی دہلی:  دہلی پولیس نے کہا ہے کہ سلمان خان اور شاہ رخ خان کیخلاف مندر کے سیٹ میں جوتوں سمیت داخل ہونا کوئی قابل دست اندازی جرم نہیں بنتا یہ بات انھوں نے دہلی کی شہری عدالت میں دونوں اداکاروں کیخلاف بگ باس 9 کے ایک پروگرام میں جوتوں سمیت مندر کے سیٹ میں داخل ہونے پر دائر درخواست کی سماعت کے دوران کہی۔واضح رہے کہ  ایڈیشنل چیف میٹروپولیٹین مجسٹریٹ کی عدالت نے گزشتہ سماعت پر پولیس کو ہدایت کی تھی کہ وہ گورو گولاٹی ایڈووکیٹ کی طرف سے دی گئی درخواست پر اٹھائے جانیوالے اقدامات سے اگاہ کرے۔روپ نگرتھانے کے ایس ایچ او کی تیار کردہ رپورٹ جو سب انسپکڑ نوین کمار نے عدالت میں پیش کی میں کہاگیا ہے کہ رائلٹی شو کی شوٹنگ جو اسٹوڈیو میں کی گئی کے دوران دونوں اداکاروں کا مندر کے سیٹ پر جوتوں سمیت داخل ہونے کا مقصد جان بوجھ کر کسی کے مذہبی جذبات کو مجروح کرنا نہیں تھا۔یہ قابل دست اندازی جرم نہیں بنتا کیونکہ پرومو مذہبی جگہ کے تقدس کوپامال کرنے یا کسی شخص کے انفرادی یا گروہی طور پر مذہبی جذبات کو ٹھیس پہنچانے کے لیے نہیں عکس بندکیا گیا تھا۔ کیس کی سماعت 2مارچ تک ملتوی کردی گئی۔

کنگ خان پر ایک لاکھ 93 ہزار سے زائد کا جرمانہ

ممبئی:  میونسپل کارپوریشن نے بالی ووڈ پر راج کرنے والے اداکار شاہ رخ خان پر ان کے گھر’’منت‘‘ کے باہر غیر قانونی تعمیرات کرنے پر ایک لاکھ 93 ہزار سے زائد کا جرمانہ کردیا۔ممبئی میونسپل کارپوریشن نے ایک سماجی کارکن کی درخواست کا جواب دیتے ہوئے کہا کہ گزشتہ سال فروری میں اداکار شاہ رخ خان پر ان کے گھر’’منت‘‘ کے باہر غیر قانونی تعمیرات کرنے پر ایک لاکھ 93 ہزار سے زائد کا جرمانے کا نوٹس جاری کیا گیا تھا جس کے لیے انہیں ایک ہفتے کی مہلت دی گئی تھی تاہم مہلت پوری ہونے پر ان کے گھر کے باہر غیرقانونی تعمیرات کو مسمار کرایا گیا ہے جب کہ اداکار کی جانب سے جرمانے کی ادائیگی بھی کردی گئی ہے

Google Analytics Alternative