قومی

نواز شریف نے عدلیہ مخالف تحریک چلائی تو ان کے خلاف نکلوں گا، عمران خان

اوکاڑہ: تحریک انصاف کے چیئرمین عمران خان نے کہا ہے کہ نواز شریف نے عدلیہ کے خلاف تحریک چلانے کا اعلان کیا ہے، ان سے پوچھتا ہوں کہ انہوں نے کبھی زندگی میں کوئی تحریک چلائی ہے؟

پنجاب کے شہر اوکاڑہ میں پی ٹی آئی کے جلسہ عام سے خطاب کرتے ہوئے انہوں نے کہا کہ نواز شریف نے گزشتہ روز کہا ہے کہ وہ پاکستان کی عدلیہ کے خلاف تحریک چلائیں گے، میں نواز شریف سے سوال کرتا ہوں کہ انہوں نے کبھی زندگی میں کوئی تحریک چلائی ہے؟ کیا ن لیگ نے اس وقت تحریک چلائی جب پرویز مشرف نے نواز شریف کو قید کردیا تھا؟ نواز شریف معاہدہ کرکے باہر چلے گئے لیکن تحریک چلائی کسی نے؟

عمران خان نے ن لیگی رہنماؤں پر تنقید کی کہ اس طرح کے لوگ تحریک نہیں چلاسکتے، نواز شریف اپنے اور میرے مقدمے کا موازنہ نہیں کریں، میں کبھی حکومت میں نہیں رہا جب کہ کرپشن حکومت میں رہ کر کی جاتی ہے؟  خیبر پختون خوا میں آکر میری کرپشن پوچھی جائے اگر کرپشن نکلی تو سیاست چھوڑ دوں گا۔

پی ٹی آئی کے چیئرمین نے کوئٹہ میں چرچ پر حملے کی مذمت کرتے ہوئے کہا کہ قائد اعظم نے جدوجہد اس لیے کی کہ پاکستان میں  اقلیتوں کو بھی انصاف ملے گا، ان کا بنایا ہوا پاکستان ہندوستان سے بہت بہتر ہے کیوںکہ سب جانتے ہیں کہ ہندوستان میں اقلیتوں کے ساتھ کیا کچھ ہورہا ہے، ہم سب کو عہد کرنا ہوگا کہ اقلیتوں کو برابر کا شہری بنائیں گے۔

عمران خان کا کہنا تھا کہ ملک بھر میں ن لیگ کی حکومت ہے؟ آپ تحریک کس کے خلاف چلائیں گے؟ آپ تحریک چلائیں سب سے پہلے کسان آپ کی تحریک کا ٹماٹروں کے ساتھ استقبال کریں گے، ن لیگ عدلیہ کے خلاف نکلی تو میں ن لیگ کے خلاف نکلوں گا، اگرنواز شریف سمجھتے ہیں کہ عوام ان کے ساتھ ہے تو الیکشن کیوں نہیں کرالیتے؟

چیئرمین تحریک انصاف نے الزام عائد کیا کہ شہباز شریف بھی کم نہیں، انہوں نے کوئٹہ جا کر نوٹوں کے عوض ججز کو خریدنے کی کوشش کی، نواز شریف جسٹس قیوم کی طرح کے ججز چاہتے ہیں، اگر آج عدلیہ نواز شریف کو بحال کردے تو ن لیگ آج اسی عدلیہ کی تعریف شروع کردے گی، سوا ارب روپے جو منی لانڈرنگ کے ذریعے تین سال پہلے باہر گئے ہم اس کی وصولی کے لیے بھی جدوجہد کریں گے، حدیبیہ پیپر ملز کیس میں نئی چیزیں سامنے آئی ہیں، مزید شواہد لے کر نیب کے پاس جاؤں گا۔

قبل ازیں شاہ محمود قریشی کا کہنا تھا کہ عمران خان کے حق میں آنے والا فیصلہ مخالفین کو ہضم نہیں ہورہا، محمود اچکزئی کا فاٹا کو متنازع علاقہ قرار دینا ٹھیک نہیں۔

دوسری جانب عمران خان کے خطاب پر رد عمل کا اظہار کرتے ہوئے خواجہ سعد رفیق کا کہنا تھا کہ بد زبانی نہیں کرنا چاہتے لیکن عمران خان جھوٹ بولیں گے تومنہ توڑ جواب دیں گے، ملک کو عدم استحکام سے دوچار کرنے کی سازش کرکےعمران کس کا کام کر رہے ہیں؟ عمران شعبدہ بازی اور گمراہ کن پروپیگنڈے پر بےشرمی کی حد تک یقین رکھتے ہیں۔

سعد رفیق کا کہنا تھا کہ عمران خان نے جہانگیر ترین کا مال کھایا اور اسے ہی قربانی کا بکرا بنادیا، عمران خان نے خود جوئے اوربال ٹمپرنگ کا اعتراف کیا، وہ ڈیرہ غازی خان جیل میں 5 دن نہیں کاٹ سکے جب کہ نواز شریف نے استقلال سے مشرف دورمیں 17 ماہ جیل کاٹی، نوازشریف نے عالمی طاقتوں کا دباؤ مسترد کرکے ایٹمی دھماکوں کا فیصلہ کیا وہ کسی دھمکی، دباؤ اور مالی پیشکش کو خاطرمیں نہیں لائے

وزیر ریلوے کا کہنا تھا کہ عمران خان نے ٹھیک کہا ہے کہ گیدڑ تحریک نہیں چلاسکتے کیوں کہ نواز شریف شیر کی طرح بہادر اور عمران گیدڑ کی طرح بزدل ہیں، عمران خان کوئی تحریک چلانے کے قابل نہیں، عدلیہ بحالی تحریک میں عمران خطرے کے خوف سے اسلام آباد میں چھپے رہے جب کہ نوازشریف نے سنگین سیکیورٹی الرٹ کے باوجود عدلیہ بحالی تحریک کی قیادت کی، ہم عدلیہ کا بے حد احترام کرتے ہیں لیکن قانون کے منافی فیصلوں پرتنقید ہوگی۔

نیب نے چوہدری برادران سے انتخابی اخراجات کی تفصیلات مانگ لیں

 لاہور: قومی احتساب بیورو (نیب) نے مسلم لیگ (ق) کے چوہدری برادران سے انتخابی اخراجات کی تفصیلات مانگ لیں۔

نیب کی جانب سے سابق وزیراعظم چوہدری شجاعت حسین اور سابق نائب وزیراعظم چوہدری پرویز الہی کے مبینہ غیر قانونی اثاثوں کی تحقیقات جاری ہیں۔  نیب نے چوہدری برادران سے الیکشن مہم میں ہونے والے اخراجات کا بھی ریکارڈ طلب کرتے ہوئے کہا کہ اب تک جتنے الیکشنز میں حصہ لیا ان کی انتخابی مہم پر خرچ کردہ رقم کی تفصیلات فراہم کی جائیں۔

نیب نے چوہدری شجاعت اور چوہدری پرویز الہی کو انتخابی رقم کے ذرائع و وسائل سے بھی آگاہ کرنے کی ہدایت کی ہے۔ ذرائع کے مطابق نیب لاہور نے الیکشن کمیشن سے بھی چوہدری برادران کے انتخابی اخراجات کی تفصیلات طلب کرنے کا فیصلہ کیا ہے۔ الیکشن کمیشن سے یہ تفصیلات دو ہفتے میں فراہم کرنے کا کہا جائے گا۔

نیب ذرائع کے مطابق چوہدری برادران اور الیکشن کمیشن کی جانب سے موصول تفصیلات کا آزاد ذرائع سے موازنہ کیا جائے گا، ملزمان کی جانب سے غلط جواب جمع کرانے پر انہیں پانچ برس تک سزا بھی ہو سکتی ہے۔

واضح رہے کہ نیب آمدن سے زائد اثاثہ جات کیس میں چوہدری برادران کے خلاف 2 ارب 42 کروڑ روپے سے زائد کے اثاثوں کی چھان بین کر رہا ہے۔

عمران نےٹھیک کہا گیدڑ تحریک نہیں چلا سکتے، سعد رفیق

لاہور: وفاقی وزیر ریلوے خواجہ سعد رفیق کا کہنا ہے کہ تحریک انصاف کے سربراہ نے ٹھیک کہا ہے کہ گیدڑ تحریک نہیں چلا سکتے، نواز شریف شیر کی طرح بہادر جبکہ عمران خان گیدڑ کی طرح بزدل ہیں ۔

نواز شریف شیر کی طرح بہادر اور عمران گیدڑ کی طرح بزدل شخص ھے۔

عمران نے ٹھیک کہا گیدڑ تحریک نہیں چلا سکتے اسی لیے وہ کوٸ تحریک چلانے کے قابل نہیں ھیں

اوکاڑہ میں عمران خان کے خطاب کے بعد سعد رفیق کا ٹوئٹرپر جاری پیغا م میں کہنا تھا کہ نواز شریف نے استقلال سے مشرف دور میں 17 ماہ جیل کاٹی جبکہ عمران خان ڈیرہ غازی خان میں 5دن تک جیل نہیں کاٹ سکے۔
سعد رفیق کا مزید کہنا تھا کہ عدلیہ کا بے حد احترام کرتے ہیں لیکن قانون کے منافی فیصلوں پر تنقید ہوگی اور بلا جواز الزامات کا جواب دیا جائے گا۔ بد زبانی نہیں کرنا چاہتے مگر جھوٹ بولو گے تو منہ توڑ جواب دیں گے۔عمران نے خود جوئے اور بال ٹمپرنگ کا اعتراف کیا ، ملک کو عدم استحکام سے دو چار کرنے کی سازش کر کے عمران کس کا کام کر رھے ہیں ؟؟

عدلیہ کا بے حد احترام کرتے ھیں لیکن قانون کے منافی فیصلوں پر تنقید ھو گی۔

بلا جواز الزامات کا جواب دیا جاۓ گا۔

وزیر ریلوے کا مزید کہنا تھا کہ میاں نواز شریف نے سنگین سیکیورٹی الرٹ کے باوجودعدلیہ بحالی تحریک کی قیادت کی جبکہ عمران خطرے کے خوف سے اسلام آباد میں چھپا رہا۔نواز شریف کِسی دھمکی دباواور مالی پیشکش کو خاطر میں نہیں لائے اور انہوں نے عالمی طاقتوں کا شدید دباو مسترد کر کے ایٹمی دھماکوں کا فیصلہ کیا۔

میاں نواز شریف نے سنگین سیکیورٹی الرٹ کے باوجودعدلیہ بحالی تحریک کی قیادت کی ۔

عمران خطرے کے خوف سے اسلام آباد میں چھُپا رہا۔

ایک اور ٹوئٹ میں وزیر ریلوے نے کہا کہ عمران نے جہانگیر ترین کا کھایا اور انہیں ہی قربانی کا بکرا بنا دیا۔عمران شعبدہ بازی اور گمراہ ک±ن پروپیگنڈا پر بے شرمی کی حد تک یقین رکھتے ھیں۔ دوسروں کو گالیاں دینے والا خود سر سے پاو¿ں تک گالی ھے۔

اسلامی فوجی اتحادکے ایجنڈے میں القدس سرفہرست ہوناچاہیے، سراج الحق

جماعت اسلامی کے امیر سراج الحق نے فلسطین اور کشمیر کے معاملات کو حل کرنے کے لیے مسلم امہ کے اتحاد پر زور دیتے ہوئے کہا ہے کہ اسلامی فوجی اتحاد کو ایک ایجنڈہ دینا چاہیے جس میں القدس سرفہرست ہو۔

کراچی میں جماعت اسلامی کے القدس ملین مارچ سے خطاب کرتے ہوئے سراج الحق کا کہنا تھا کہ مسلم امہ اتحاد کے ذریعے ہی طاقت ور ہوسکتی ہے اور اب مسلمانوں کو کشمیراورفلسطین کے لیے اٹھ کھڑا ہونا پڑے گا۔

امریکا کی جانب سے بیت المقدس (یروشلم) کو اسرائیل کا دارالحکومت قرار دینے کے فیصلے کو غلط قرار دیتے ہوئے انھوں نے کہا کہ امریکا کو اپنا فیصلہ واپس لینا ہوگا اور حکمرانوں سے مطالبہ کرتے ہوئے کہا کہ مسلم ممالک امریکا کے سفیروں کو نکال دیں۔

سینیٹر سراج الحق نے کہا کہ آج کراچی میں لاکھوں کے جلسہ عام نے پیغام دیا ہے کہ ہم بھی القدس کےساتھ ہیں اور کشمیر اورالقدس کے لیے ایک ہونا چاہیے۔

جماعت اسلامی کے امیر نے اپنے خطاب میں تجویز دی کہ اسلامی فوجی اتحاد کوایک ایجنڈا دینا چاہیے جس میں القدس سرفہرست ہونا چاہیے۔

خیال رہے کہ سعودی عرب کی رہنمائی میں تشکیل دیا گیا اسلامی فوجی اتحاد 40 اسلامی ممالک پر مشتمل ہے جس کا مقصد رکن ممالک کو انسداد دہشت گردی میں تعاون فراہم کرنا ہے۔

پاک فوج کے سابق سربراہ جنرل راحیل شریف کو اسلامی فوجی اتحاد کا کمانڈر مقرر کیا گیا ہے۔

انھوں نے کہا کہ عالم اسلام متحد نہیں بلکہ دست و گریباں ہے، امت مسلمہ کو سازش کے تحت تقسیم کیا جارہا ہے، امت کومسلکی اور رنگ و نسل پرتقسیم کرناسازش ہے۔

مسلمان حکمرانوں پر تنقید کرتے ہوئے ان کا کہنا تھا کہ عالم اسلام کے حکمران سورہے ہیں لیکن قوم جاگ رہی ہے اور جب تک ایک مسلمان بھی زندہ ہے القدس اسرائیل کا دارالحکومت نہیں بن سکتا۔

ان کا کہنا تھا کہ کبھی ہم روہنگیا اورکبھی مسئلہ کشمیر پراحتجاج کررہے ہیں لیکن متحد ہوکر تمام سازشوں کو توڑنا ہوگا۔

امیر جماعت اسلامی نے ملکی سیاست پر بات کرتے ہوئے کہا کہ 2018 میں پاکستان میں اسلامی انقلاب آئے گا۔

انھوں نے کوئٹہ میں چرچ پرحملے کی مذمت کرتے ہوئے پاکستان میں دہشت گردی کا ذمہ دار بھارت کو قرار دے دیا۔

سراج الحق کا کہنا تھا کہ پاکستان کے خلاف بھارت، اسرائیل اور امریکا کا ٹرائیکا بن چکا ہے۔

کوئٹہ حملے کا مقصد مذہبی تقسیم کوہوا دینا ہے، آرمی چیف

 راولپنڈی: آرمی چیف جنرل قمرجاوید باجوہ کا کہنا ہے کہ کوئٹہ حملے کا مقصد مذہبی تقسیم کو ہوا دینا ہے جب کہ ایسے گھناؤنے حملوں کا ثابت قدمی سے مقابلہ کریں گے۔

آرمی چیف جنرل قمرجاوید باجوہ نے کوئٹہ میں چرچ پرحملے کی مذمت  کرتے ہوئے کہا کہ کوئٹہ حملے میں مسیحی بھائیوں کونشانہ بنایا گیا، جس کا مقصد مذہبی تقسیم کوہوا دینا اور تفرقہ ڈالنا ہے جب کہ حملے کا مقصد کرسمس کا جشن پھیکا کرنے کی بھی کوشش ہے۔

آرمی چیف نے کہا کہ سکیورٹی فورسز کی بروقت کارروائی قابل تعریف ہے، ہم دہشت گردی کے خلاف متحد اورثابت قدم ہیں اور ایسے گھناؤنے حملوں کا ثابت قدمی سے مقابلہ کریں گے۔

“Quetta church attack targeting our brotherly Christian Pakistanis is an attempt to cloud Christmas celebrations / create religious cleavages. Effective response by LEAs is commendable. We stay united and steadfast to respond against such heinous attempts” COAS.

واضح رہے کہ کوئٹہ کے زرغون روڈ پر واقع چرچ پر خودکش حملے میں 9 افراد جاں بحق اور 55 سے زائد زخمی ہوگئے ہیں۔

اگر خیبر پختونخوا میں میری کرپشن نکلی تو سیاست چھوڑ دوں گا، عمران خان

اوکاڑہ: پاکستان تحریک انصاف (پی ٹی آئی) کے چیئرمین عمران خان نے کہا ہے کہ نواز شریف کی تنقید کا مقصد 300 ارب روپے کی کرپشن بچانا ہے، نواز شریف اپنے اور میرے مقدمے کا موازنہ نہیں کریں، میں کبھی حکومت میں نہیں رہا جب کہ کرپشن حکومت میں رہ کر کی جاتی ہے؟ خیبر پختونخوا میں آکر میری کرپشن پوچھی جائے اگر کرپشن نکلی تو سیاست چھوڑ دوں گا۔
اوکاڑہ کے فٹبال گراونڈ میں منعقدہ جلسہ عام سے خطاب کرتے ہوئے عمران خان نے کہا کہ نواز شریف نے عدلیہ کے خلاف تحریک چلانے کا اعلان کیا ہے، گیدڑ کبھی تحریک نہیں چلا سکتے،میں ان سے پوچھتا ہوں کہ انہوں نے کبھی زندگی میں کوئی تحریک چلائی ہے؟ عمران خان نے کہا کہ کیا ن لیگ نے اس وقت تحریک چلائی جب پرویز مشرف نے نواز شریف کو قید کردیا تھا؟ نواز شریف معاہدہ کرکے باہر چلے گئے لیکن تحریک چلائی کسی نے؟

عمران خان نے کہا کہ سپریم کورٹ میں اپنی نااہلی کیس کے دوران انہوں نے 60 دستاویزات پیش کیں جبکہ نواز شریف نے اپنے کیس میں صرف ایک قطری کا خط پیش کیا جو کہ ایک فراڈ تھا۔اگر آج عدالت نواز شریف کو بری کردے تو نوازشریف اسی عدالت کی تعریف کریں گے۔ان کا کہنا تھا کہ امپائرز کو بھی بلالیں اس کے باوجود نوازشریف کو شکست دیں گے، ہر کرپٹ سیاستدان نواز شریف کے ساتھ کھڑا ہے۔

کوئٹہ میں چرچ پر حملے کی مذمت کرتے ہوئے عمران خان نے کہا کہ قائد اعظم نے جدوجہد اس لیے کی کہ پاکستان میں اقلیتوں کو بھی انصاف ملے گا، ان کا بنایا ہوا پاکستان ہندوستان سے بہت بہتر ہے جہاں اقلیتوں کے ساتھ کیا کچھ ہور ہا ہے، ہم سب کو عہد کرنا ہوگا کہ اقلیتوں کو برابر کا شہری بنائیں گے۔

عمران خان نے الزام عائد کیا کہ ن لیگ جسٹس عبدالقیوم والی عدلیہ چاہتی ہے جسے شہباز شریف فون پر فیصلے لکھواتے تھے۔شہباز شریف کو تنقید کا نشانہ بناتے ہوئے عمران خان نے کہا کہ آپ کا ڈرامہ اب ختم ہوچکا ہے، لوگ آپ کو سمجھ چکے ہیں، ہم شہبازشریف کیخلاف نیب میں جائیں گے،انکے خلاف نئی چیزیں آئی ہیں۔انہوں نے کہا کہ وزیراعظم شاہد خاقان عباسی شریف خاندان کی غلامی کررہے ہیں۔، خواجہ سعد رفیق سے بھی پوچھوں گا تمہارے پرائزبانڈ کیسے نکلتے تھے؟ خواجہ آصف سے بھی 15 لاکھ روپے جو دبئی سے لیتے ہیں اس کا پوچھوں گا۔

ہماری تہذیب چھیننے کیلئے پی ٹی آئی کو صوبے میں لایا گیا،فضل الرحمان

پشاور:جمعیت علماءاسلام کے سربراہ مولانا فضل الرحمان نے کہا ہے کہ ہماری تہذیب کو چھیننے کیلئے پی ٹی آئی کو خیبر پختونخوا میں لایا گیا، عمران خان نے خود اعتراف کیا کہ وفاق میں حکومت ملتی تو اس کا حال بھی خیبر پختونخوا جیسا ہوتا۔
صوبائی دارالحکومت میں منعقدہ ناموس رسالت کانفرنس سے خطاب کرتے ہوئے مولانا فضل الرحمان نے کہا کہ عمران خان کا خیال تھا مولویوں کوپیساملے گا،فضل الرحمان تنہارہ جائیں گے،علمااتنے بے غیرت نہیں کہ پیسوں کےلئے اپناایمان بیچیں،فضل الرحمان کا کہناتھا کہ یہ لوگ آپ کے روزگارکوبہترنہیں،آپ کے کردارکوتباہ کررہے ہیں،مدارس کےلئے سرکارکاپیسالیناعلما نے تباہ کن قراردیاہے۔
انہوں نے شہدااے پی ایس کوخراج عقیدت پیش کرتے ہوئے مطالبہ کیا کہ اے پی ایس واقعے کی دوبارہ عدالتی تحقیقات کرائی جائے ، ان کا کہنا تھا کہ ہم اپنی قوم، عزت اور ناموس کیساتھ کھڑے ہیں، فاٹا کا مسئلہ بڑا سیدھا سادہ ہے مگر کچھ مفاد پرستوں نے اسے پیچیدہ بنا دیا ہے، ہم نے سیدھی بات کی تھی کہ فاٹا کی عوام کی منشائ سے فیصلہ کیا جائے، ہمارا ان سے ایک ہی اختلاف ہے کہ وہ فاٹا کا فیصلہ فاٹا کی عوام پر مسلط کرنا چاہتے ہیں جبکہ ہم فاٹا کی عوام کی منشاء سے فیصلہ چاہتے ہیں۔

کراچی میں ٹرک نے پولیس موبائل کو ٹکر ماردی، 11 اہلکار زخمی

کراچی: نیشنل ہائی وے پر ٹریلر اور پولیس موبائل میں تصادم کے نتیجے میں 11 اہلکار زخمی ہوگئے۔

کراچی میں نیشنل ہائی وے پر شاہ لطیف ٹاؤن کٹ کے قریب مخالف سمت سے آنے والے ٹریلر نے پولیس موبائل کو ٹکر مار دی جس کے نتیجے میں 11 اہلکار زخمی ہوگئے۔

حادثے میں پولیس وین مکمل طور پر تباہ ہو گئی۔ زخمیوں کو جناح اسپتال منتقل کیا گیا جہاں انہیں طبی امداد فراہم کی گئی۔ تمام افراد کی حالت تسلی بخش بتائی جاتی ہے۔ پولیس نے ٹرک کے ڈرائیور کو بھی گرفتار کرلیا ہے جس نے جائے حادثہ سے فرار ہونے کی کوشش کی تھی۔

پولیس کے مطابق زخمی افراد زیر تربیت پولیس اہلکار ہیں جن میں شاہ رحمان ، ساجد ، صدام ، شعیب ، عبد الطیف، مجاہد حسین ، معشوق ، حنیف ، زاہد ، فرحان اور عرفان شامل ہیں۔

Google Analytics Alternative