قومی

شہباز شریف سمیت 58 ارکان اسمبلی کے خلاف مقدمہ درج

لاہور: متحدہ اپوزیشن کے مال روڈ پر جلسہ کرنے پر شہباز شریف سمیت 58 قومی و صوبائی اسمبلی ارکان کے خلاف مقدمہ درج کرلیا گیا ہے۔

متحدہ اپوزیشن کی جانب سے گزشتہ روز اجازت نہ ملنے کے باوجود مال روڈ پر جلسہ کیا گیا جس پر پولیس نے اپوزیشن لیڈر شہباز شریف، روحیل اصغر، ڈاکٹر اسد اشرف، عظمیٰ بخاری اور دیگر پارٹی کے قائدین سمیت 58 قومی و صوبائی اسمبلی ارکان کے خلاف مقدمہ درج کرلیا ہے، مقدمہ لاہور کے تھانہ سول لائنز میں درج کیا گیا ہے جب کہ مقدمہ میں مزید 1800 نامعلوم افراد کو نامزد کیا گیا ہے۔

مقدمہ ایس ایچ او سول لائنز کی مدعیت میں درج کیا گیا ہے جس میں ساؤنڈسسٹم ایکٹ کی خلاف ورزی، سرکاری ملازمین پر تشدد، امن و امان میں خلل ڈالنے اور سڑک بلاک کرنے سمیت دیگر دفعات کو شامل کیا گیا ہے

واضح رہے کہ گزشتہ روز مال روڈ پر جلسے کی اجازت نہ ملنے کے باوجود اپوزیشن اتحاد نے چئیرنگ کراس پر جلسہ کیا تھا جس سے شہباز شریف نے خطاب کیا تھا۔ اس موقع پر پولیس اہلکاروں اور کارکنوں میں متعدد بار لڑائی جھگڑے بھی ہوئے، پولیس کارکنوں کو روکنے کی رکاوٹیں لگاتی تو کچھ ہی دیر میں رکاوٹیں ہٹادی جاتیں۔

وزیراعظم عمران خان اور صدر ٹرمپ میں کامیاب مذاکرات ہوئے، امریکا

واشنگٹن: ترجمان امریکی محکمہ خارجہ مورگن اورٹیگس کا کہنا ہے کہ وزیراعظم عمران خان اور صدر ٹرمپ کے درمیان مثبت اور کامیاب مذاکرات ہوئے۔

ترجمان امریکی محکمہ خارجہ مورگن اورٹیگس نے نیوز بریفنگ دیتے ہوئے کہا کہ صدر ڈونلڈ ٹرمپ اور وزیراعظم پاکستان عمران خان کی پہلی ملاقات ہوئی، عمران خان سے وزیرخارجہ پومپیو کی بھی اہم ملاقات ہوئی۔

مورگن اورٹیگس نے کہا کہ عمران خان نے افغان حکومت اور طالبان پر مذاکرات کے لئے زور دیا ہے، افغانستان میں امریکا اور نیٹو فورسز نے بہت قربانیاں دی ہیں، امریکا نےافغانستان میں اربوں ڈالرزخرچ کیے، چاہتے ہیں کہ افغان عوام اپنے مستقبل کا فیصلہ خود کریں، افغانستان میں امن کیلیے حتمی ڈیڈلائن نہیں دے سکتے۔

سلیکٹڈ نے نئے پاکستان کے نام پر ملک کا بیڑا غرق کردیا، شہباز شریف

لاہور: پاکستان مسلم لیگ (ن) کے صدر شہباز شریف کا کہنا ہے کہ سلیکٹڈ وزیراعظم نے نئے پاکستان کے نام پر ملک کا بیڑا غرق کردیا۔

ماڈل ٹاؤن لاہور میں کارکنوں سے خطاب کے دوران شہباز شریف نے کہا کہ کارکنوں کو نواز شریف کا سلام پیش کرتا ہوں، لاہور والو! نکلو اور ایک ساتھ ووٹ پر ڈاکے کا حساب لو، آؤ میرے ساتھ چلو۔

شہباز شریف نے کہا کہ ہم حساب لیں گے اسپتالوں سے ادویات کیوں ختم کی گئیں غربت کیسے بڑھی، مہنگائی کیوں ہوئی،  سلیکٹڈ نے نئے پاکستان کے نام پر ملک کا بیڑا غرق کردیا ہے، عوامی خدمت کے بدلے جان بھی چلی جائے توہ پروا نہیں۔

مسلم لیگ (ن) کے صدر نے کہا کہ نواز شریف اور ساتھیوں نے ملک سے اندھیرے ختم کئے مگر انہیں جیل میں ڈالا گیا، جو جیلوں میں پڑے ہیں ان کا ایک ہی قصور ہے انہوں نے غریبوں کی مدد کی۔

ہم عمران خان اور چیئرمین سینیٹ کو این آر او نہیں دیں گے، مولانا فضل الرحمان

پشاور: جمعیت علمائے اسلام (ف) کے سربراہ مولانا فضل الرحمان کا کہنا ہے کہ عمران خان کے لئے جن لوگوں نے مجھے این آر او کے لئے کہا ان کا نام نہیں لوں گا، تاہم اتنا کہتا ہوں کہ ہم نہ چیئرمین سینٹ کو این آر او دیں گے نہ عمران خان کو۔

پشاور میں ملین مارچ جلسے سے خطاب کرتے ہوئے جے یو آئی کے سربراہ مولانا فضل الرحمان کا کہنا تھا کہ جعلی وزیراعظم امریکا گئے، امریکی صدر ڈونلڈ ٹرمپ نے ان کا استقبال کیا، لیکن حقیقت اس کے برعکس ہے، ٹرمپ نے جعلی وزیراعظم کا استقبال نہیں کیا بلکہ  آرمی چیف کا پروٹوکول کے ساتھ استقبال کیا گیا۔

مولانا فضل الرحمان کا کہنا تھا کہ عمران خان کے وژن پر ماتم کرنے کا دل چاہتا ہے، ان کے امریکا جلسے کا اہتمام قادیانیوں نے کیا، عمران خان کو یہودیوں کی دوستی مبارک ہو۔ جن لوگوں نے مجھے عمران خان کے لئے این آر او کے لئے کہا ان کا نام نہیں لوں گا، ہم نہ چیئرمین سینٹ کو این آر او دیں گے نہ عمران خان کو۔

سربراہ جے یو آئی نے کہا کہ  جب سوویت یونین مالی اعتبار سے کمزور ہوا تو ختم ہوگیا، آج پاکستان کی معیشت بیٹھ  چکی ہے، ریاست کیسے مستحکم رہے گی، پاکستان کے وسائل کے بھی ہم مالک نہیں اور عالمی ادارے سانپ کی طرح ان پر بیٹھے ہیں، ریکوﮈک کیس میں ہمیں 6 ارب کا جرمانہ ہوگیا۔

انہوں نے مزید کہا کہ ملک میں آئین کی حکمرانی نہیں، ادارے اپوزیشن کے خلاف استعمال ہو رہے ہیں، مہنگائی آسمان پر پہنچ چکی ہے، بجٹ منظور ہونے کے ایک ماہ کے اندر تاجروں نے ہڑتال کردی، پاکستان کو ان معیشت کے قاتلوں سے نجات دلانی ہوگی۔

وزیراعظم نے وفاقی کابینہ کو دورہ امریکا پر اعتماد میں لیا

اسلام آباد: وزیراعظم عمران خان نے وفاقی کابینہ کو دورہ امریکا پر اعتماد میں لیتے ہوئے کہا کہ حالیہ دورہ اپنی نوعیت کا کامیاب دورہ ہے۔

وفاقی کابینہ کا اجلاس وزیراعظم عمران خان کی زیر صدارت ہوا جس میں 10 نکاتی ایجنڈے پر غور کیا گیا، وزیراعظم نے کابینہ کو دورہ امریکا پر اعتماد میں لیا ، ان کا کہنا تھا کہ دورہ امریکا اپنی نوعیت کا کامیاب دورہ ہے۔ وزیراعظم نے کابینہ کو بتایا کہ امریکی صدر کے ساتھ کامیاب میٹنگ ہوئی، مسئلہ کشمیر کو اجاگر کرنے میں پاکستان نےبھرپور کردار ادا کیا جب کہ امریکی صدر ڈونلڈ ٹرمپ جلد پاکستان کا دورہ کریں گے۔

ذرائع کے مطابق سابق حکمرانوں اور ان کے خاندان کے بیرون ملک دوروں پر آنے والے اخراجات پر کابینہ کو بریفنگ بھی دی گئی اور گزشتہ 10 سال میں حکمرانوں کی جانب سے پی آئی اے طیارے استعمال کیے جانے کی رپورٹ بھی کابینہ اجلاس میں پیش کی گئی۔

اجلاس میں وفاقی کابینہ ریگولیٹری اتھارٹیز کا انتظامی کنٹرول کابینہ ڈویژن کے ماتحت کرنے اور پاکستان نیشنل شپنگ کارپوریشن کے چیئرمین کے ایڈیشنل چارج کی توسیع پر بھی غور کیا گیا۔ اس کے علاوہ وفاقی کابینہ نے قرضوں پر تحقیقاتی کمیشن کے سیکرٹری کی تبدیلی اور اکیڈمی آف لیٹرز کے چیئرمین کی تقرری کے لیے ریکروٹمنٹ رولز میں تبدیلی کی منظوری بھی دی۔

وفاقی کابینہ نے 17 جولائی کو ہونے والے ای سی سی اجلاس میں کیے گئے فیصلوں کی توثیق کی اور وزیرمواصلات کی جانب سے پاکستان پوسٹ کی کارکردگی پر تفصیلی بریفنگ بھی دی گئی۔

پاکستان نے دورے کی دعوت دی تو قبول کریں گے، افغان طالبان

دوحہ: افغان طالبان کا کہنا ہے کہ اگر پاکستان نے انھیں دورے کی دعوت دی تو وہ قبول کریں گے اور وزیراعظم عمران خان سے ملاقات کریں گے۔

قطر کے دارالحکومت دوحہ میں طالبان کے سیاسی دفتر کے ترجمان سہیل شاہین نے بی بی سی سے گفتگو کرتے ہوئے کہا کہ اگر انھیں پاکستان نے دورے کی باضابطہ دعوت دی تو قبول کریں گے، ہم تو خطے اور پڑوسی ممالک کے دورے کرتے رہتے ہیں، پاکستان بھی جائیں گے جو ہمارا ہمسایہ اور مسلمان ملک ہے۔

پاکستان کے آلہ کار ہونے سے متعلق الزام کے جواب میں سہیل شاہین نے کہا کہ جن لوگوں کے پاس طالبان کے خلاف جھگڑے کے لیے کوئی اور دلیل نہیں وہی ہم پر ایسے الزامات لگاتے ہیں، ہمارے اسلامی اور قومی مفاد ہیں جس میں ہم کسی کو بھی مداخلت نہیں کرنے دیتے، جہاں تک دوسرے ممالک اور ہمسایہ ممالک کے ساتھ رابطے قائم کرنے کا سلسلہ ہے، اُن کے ساتھ تو ہمارے رابطے ہیں بھی اور ہم چاہتے بھی ہیں۔

افغان حکومت سے مذاکرات کے بارے میں سہیل شاہین نے کہا کہ بیرونی قوتوں کے ساتھ مذاکرات کی کامیابی کے بعد طالبان تمام افغان فریقین کے ساتھ ساتھ افغان حکومت سے بھی ملیں گے، ہم نے افغانستان کے مسئلے کو بیرونی اور اندرونی دو مرحلوں میں تقسیم کیا ہے، بیرونی مرحلے کے مذاکرات اب مکمل ہونے والے ہیں جن کی کامیابی کی صورت میں پھر دوسرے مرحلے میں تمام افغان فریقین سے بات چیت کی جائے گی، جس میں افغان حکومت بھی ایک فریق کی حیثیت سے شامل ہوسکتی ہے۔

کابل سے اغوا کئے گئے امریکی اور آسٹریلوی شہریوں کی رہائی کے بارے میں سہیل شاہین کا کہنا تھا کہ ہماری ہروقت یہ کوشش ہوتی ہے کہ قیدیوں کے تبادلے ہوں اور گرفتار ساتھی رہا ہو جائیں، ہم نے پہلےبھی گرفتار ساتھیوں کی رہائی کے لیے قیدیوں کے تبادلے کئے ہیں اور اب بھی کرنے کی کوشش کرتے ہیں۔ اُس میں اگر کوئی کچھ کردار کرنا چاہتا ہے تو یہ اچھی بات ہے۔

واضح رہے کہ وزیراعظم عمران خان نے امریکا کے حالیہ دورے میں کہا تھا کہ پاکستان واپس جاکر طالبان سے ملیں گے اور انہیں افغان حکومت کے ساتھ مذاکرات پر آمادہ کریں گے اور وہ کابل سے اغوا کئے گئے غیرملکیوں کے رہائی کی کوشش بھی کریں گے۔

حکومت کے پاس دس لاکھ روپے بھی نہیں تو چندہ مانگنا شروع کردے، سپریم کورٹ

اسلام آباد: سپریم کورٹ کے جج جسٹس عظمت سعید نے ریمارکس دیے ہیں کہ اگر حکومت کے پاس دس لاکھ روپے بھی نہیں تو ڈی چوک میں چندہ مانگنا شروع کر دے۔

جسٹس عظمت سعید کی سربراہی میں سپریم کورٹ کے دو رکنی بنچ نے بنی گالہ ، کورنگ نالہ میں غیر قانونی تجاوزات سے متعلق کیس کی سماعت کی۔ گندگی کے حوالے سے ٹریٹمنٹ پلانٹس نہ لگانے پر عدالت نے برہمی کا اظہار کرتے ہوئے آئندہ سماعت ہر سیکریٹری داخلہ کو پیش ہونے کا حکم دیا۔ عدالت نے اسلام آباد کے ماسٹر پلان میں تبدیلی کی تجاویز بھی طلب کرلیں۔

جسٹس عمر عطا بندیال نے استفسار کیا کہ کورنگ نالے پت لگائے جانے والے ٹریٹمنٹ پلانٹس کے لئے کتنا عرصہ درکار ہوگا؟۔ سرکاری وکیل نے جواب دیا کہ تین ٹریٹمنٹ پلانٹس کی منظوری ہوئی ہے دو سال میں لگ جائیں گے۔

جسٹس عظمت سعید نے ریمارکس دیے کہ مطلب دو سال تک حکومت پنڈی والوں کو گندہ پانی پلائے گی، حکومت نے کورنگ نالے کے ارد گرد آبادی بننے ہی کیوں دی، حکومت نے تو غیر قانونی آبادی ختم کرنے کے معاملے پر بے بسی ظاہر کر دی ہے۔

جسٹس عمر عطا بندیال نے کہا کہ قانون پر عمل ہو تو اس آبادی کو ہٹایا جانا چاہئیے، دس دس لاکھ روپے لگا کر وقتی طور ہر پانی کی صفائی کا کام کیا جا سکتا ہے۔ جسٹس عظمت سعید نے کہا کہ اگر حکومت کے پاس دس لاکھ روپے بھی نہیں تو ڈی چوک میں چندہ مانگنا شروع کر دے۔

عدالت نے حکم دیا کہ ماسٹر پلان میں تبدیلی سوچ سمجھ کر کی جائے اور حکومت فوری طور پر مختصر مدتی اقدامات کرے۔ کیس کی مزید سماعت آئندہ ہفتے تک ملتوی کردی گئی۔

لاہور سمیت پنجاب کے مختلف شہروں میں موسلا دھار بارش، 2 افراد جاں بحق

لاہور: پنجاب کے مختلف شہروں میں طوفانی بارش سے نظام زندگی درہم برہم ہوگیا۔

لاہور میں موسلادھار بارش سے شاہراہوں پر پانی جمع ہوگیا جس سے معمولات زندگی متاثر ہوگئے۔ لوگوں کو دفاتر جانے میں دشواری کا سامنا کرنا پڑا اور شہری گھروں میں محصور ہوکر رہ گئے۔ بارش کے باعث ریلوے اسٹیشن پلیٹ فارم اور ہیڈ کوارٹر کی چھتیں بھی ٹپکنے لگیں۔ لیسکو کے 180 فیڈر ٹرپ کرگئے جس سے بجلی کی فراہمی متاثر ہوئی اور متعدد علاقے اندھیرے میں ڈوب گئے۔

کراچی میں بھی سیاہ بادلوں نے ڈیرے ڈال لیے۔ کئی علاقوں میں تیز ہوائیں چلنے لگیں اور بوندا باندی سے موسم خوشگوار ہوگیا۔

راولپنڈی اور اسلام آباد میں بھی شدید بارشوں کا سلسلہ جاری ہے۔ راولپنڈی کے ایک گھر میں بارش کا پانی بیسمنٹ (تہہ خانے) میں بھرگیا جس میں ڈوب کر ماں بچہ جاں بحق ہو گئے۔ 30 سالہ ماں اپنے ایک سالہ بیٹے کو بچاتے ہوئے پانی میں ڈوب گئی۔

راول پنڈی میں شدید بارش سے نالہ لئی میں پانی کی سطح بلند ہونے کے باعث طغیانی پری الرٹ وارننگ جاری کردی گئی۔ کٹاریاں کے مقام پر پانی کی سطح 11 فٹ سے تجاوز کرگئی ہے۔

راولپنڈی اور اسلام آباد میں سیلابی کیفیت کے باعث پاک فوج کی ٹرپل ون بریگیڈ کو ہائی الرٹ کردیا گیا ہے۔ بریگیڈ کمانڈر نے مختلف علاقوں کا دورہ کرکے پانی کی صورتحال کا جائزہ لیا ہے۔

محکمہ موسمیات نے دریاؤں اور برساتی نالوں میں طغیانی کے خطرے کا الرٹ جاری کردیا ہے جس کے مطابق جمعہ سے ہفتہ کے دوران ہزارہ، راولپنڈی، گوجرانوالہ ڈویژن، کشمیر، ژوب، قلات، ڈی جی خان ڈویژن میں موسلادھار بارش کے باعث طغیانی آسکتی ہے۔

محکمہ موسمیات کے مطابق  سید پور کے مقام پر 141 ملی میٹر ، پی ایم ڈی H/8 اسلام آباد و گردنواح میں 77 ملی میٹر، شمس آباد کے مقام پر 86ملی میٹر اور گولڑہ کے مقام پر 20 ملی میٹر بارش ریکارڈ ہوئی۔

چیچہ وطنی، کوٹ رادھاکشن، واربرٹن، کالاشاہ کاکو، شیخوپورہ، مریدکے، فاروق آباد، نارنگ منڈی، فیروزوالہ، شاہدرہ، جلالپورجٹاں میں بھی گرج چمک کے ساتھ تیز بارش ہوئی۔

شاہدرہ فیروزوالہ اور گرد نواح میں گھنگور گھٹائیں چھا گئیں اور وقفہ وقفہ سے تیز بارش سے نشیبی آبادیوں میں پانی بھر گیا۔ نارنگ منڈی اور گردونواح میں ٹھنڈی ہوا کے ساتھ تیز بارش ہوئی جب کہ فاروق آباد، کوٹ رادھا کشن، شیخوپورہ میں بھی گرج چمک کے ساتھ بارش ہوئی۔ مریدکے اور گردونواح میں ٹھنڈی ہوا کے ساتھ بارش سے گرمی کا زور ٹوٹ گیا۔ جب کہ واربرٹن و گردونواح میں موسلادھار بارش سے موسم خوشگوار ہو گیا۔

دوسری جانب وزیراعلیٰ پنجاب سردار عثمان بزدار نے بارش کے پانی کی جلد نکاسی کی ہدایت کرتے ہوئے کہا ہے کہ  انتظامیہ، واسا حکام اور متعلقہ اداروں کے افسران نشیبی علاقوں سے نکاسی آب کیلئے تمام وسائل بروئے کار لائیں۔ نکاسی آب کا کام جلد از جلد مکمل کیا جائے جس کی نگرانی افسران خود کریں۔

وزیر اعلیٰ پنجاب نے کہا نکاسی آب کا کام مکمل ہونے تک افسران فیلڈز میں موجود رہیں۔ ٹریفک کی روانی کو برقرار رکھنے کیلئے ٹریفک حکام موثر اقدامات کریں۔ بارش کے دوران عوام کو آمد و رفت میں مشکل نہیں ہونی چاہیئے۔

Google Analytics Alternative