قومی

سدھو نے کرتارپور منصوبے کی افتتاحی تقریب میں شرکت کی دعوت قبول کرلی

اسلام آباد: سینیٹر فیصل جاوید نے نوجوت سنگھ سدھو سے رابطہ کرکے کرتارپور کی افتتاحی تقریب میں شرکت کی  دعوت دی جو سدھو نے قبول کرلی۔ 

پاکستان کی جانب سے کرتارپور میں دنیا کے سب سے بڑے گودوارے کے فقیدالمثال افتتاح کی تیاریاں جاری ہیں، وفاقی حکومت نے سرحد پار سے اسٹار کردار نوجوت سنگھ سدھو کو افتتاحی تقریب میں مدعو کرلیا اور اس حوالے سے وزیراعظم عمران خان کی خصوصی ہدایت پر سینٹر فیصل جاوید نے نوجوت سنگھ سدھو سے رابطہ کرکے نوجوت سنگھ سدھو کو تقریب میں شرکت کی باضابطہ دعوت دے دی ہے۔

دوسری جانب نوجوت سنگھ سدھو نے بھجوائی جانے والی دعوت قبول کرلی ہے اور کہا ہے کہ تاریخی تقریب میں مدعو کرنے پر وزیراعظم پاکستان کا شکرگزار ہوں، 9 نومبر کی تقریب میں شرکت کی سعادت حاصل کروں گا۔

نوجوت سنگھ سدھو کا کہنا ہے کہ کرتار پور کی تعمیر اور اس کے افتتاح نے سکھ مذہب کے کروڑوں پیروکاروں کو نہایت مثبت پیغام دیا ہے، دنیا بھر کے سکھ اپنے روحانی پیشواء باباگرونانک سے وابستہ مقام کی زیارت کے منتظر ہیں۔

 

اسلام آباد ایئرپورٹ پراے ایس ایف اہلکاروں کا مسافروں پر تشدد؛ اسٹیشن مینیجرٹیم سمیت معطل

اسلام آباد: وزیراعظم عمران خان نے نیو اسلام آباد ایئرپورٹ پر مسافروں سے بداخلاقی پر ایئرپورٹ منیجر طاہرسکندر، ڈیوٹی ٹرمینل منیجر ظہور اور ملک اکرم کو فوری طور پر معطل کرنے کا حکم دی ہے۔

نیواسلام آباد انٹرنیشنل ائیرپورٹ پر اے ایس ایف اہلکاروں کی جانب سے مسافروں سے بد اخلاقی کے واقعے پر وزیرِ اعظم عمران خان نے سخت ایکشن لیتے ہوئے ائیرپورٹ منیجر طاہر سکندر، ڈیوٹی ٹرمینل منیجر ظہور اور ملک اکرم کو فوری طور پر معطل کرنے کا حکم دیا ہے۔  وزیراعظم نے اسٹیشن منیجر پی آئی اے اسلام آباد پرویز نصیر اور ان کی پوری ٹیم کو بھی معطل کرنے اور ان کے خلاف انضباطی کاروائی شروع کرنے کا حکم دیا ہے۔

وزیراعظم نے فلائٹ واقعے کی عبوری رپورٹ موصول ہونے پر کابینہ ڈویژن کو متعلقہ افسران کے خلاف سخت ایکشن لینے کے لئے سول ایوی ایشن، پی آئی اے اور اے ایس ایف کو فوری طور پر عمل درآمد کرنے کی ہدایت کی ہے، اور حکم دیا ہے کہ صورتحال کو پیشہ وارانہ انداز سے نمٹنے میں ناکامی پر مذکورہ افسران کے خلاف انضباطی کاروائی کی جائے۔

اے ایس ایف اہلکاروں کے خلاف کارروائی کے لئے بریگیڈئیرعرفان ظفر کی سربراہی میں بورڈ آف انکوائری تشکیل دے دیا گیا ہے، انکوائری بورڈ پاکستان آرمی ایکٹ 1952کے تحت واقعے میں ملوث اے ایس ایف اہلکاروں کے خلاف کاروائی کرے گا اور دس دنوں میں کاروائی مکمل کرکے رپورٹ وزیراعظم کو پیش کی جائے گی۔

اپنی زندگی کی ضمانت نہیں تو نواز شریف کی ضمانت کیسے دے سکتاہوں،وزیراعظم

ننکانہ صاحب: وزیر اعظم عمران خان کا کہنا تھا کہ میں اپنی زندگی کی ضمانت نہیں دے سکتاتو نواز شریف کی ضمانت کیسے دے سکتاہوں۔

ننکانہ صاحب میں باباگرونانک یونیورسٹی کی تقریب سے خطاب کے دوران وزیر اعظم عمران خان نے کہا کہ تعلیم کے بغیر کوئی معاشرہ ترقی نہیں کرسکتا، ماضی میں بدقسمتی سے تعلیم کو ترجیح نہیں دی گئی، باباگرونانک یونیورسٹی میں جدید تعلیم بھی دی جائے گی، سب سے زیادہ کرپشن اوقاف کی زمینوں پر ہورہی ہے، ہر درگاہ کے پاس اوقاف کی زمین پر یونیورسٹی اور اسپتال بنائی جائے، امیر لوگوں کو ان کی اولاد بھی بھول جاتی ہے لیکن دنیا انسانیت کی خدمت کرنے والوں کو یاد رکھتی ہے۔

وزیر اعظم کا کہنا تھا کہ قانون کی بالادستی نہ ہوتو قومیں آگے نہیں بڑھتیں، ترقی یافتہ ممالک میں سب کے لیے ایک قانون ہے لیکن ہمارے ملک میں امیر اور غریب کےلیے الگ الگ نظام ہے، ماضی میں مدرسوں میں تمام مذاہب کے افراد تعلیم حاصل کرتے تھے، مغل دور میں اشرافیہ دہلی کے 2 مدرسوں میں تعلیم حاصل کرتے تھے،ملک میں یکساں تعلیمی نظام حکومت کی ذمہ داری ہے، ملک میں اشرافیہ اور عام عوام کےلیے الگ تعلیمی نظام ہے۔

وزیر اعظم نے کہا کہ عدالت کی جانب سے وفاق اورصوبائی حکومت سے پوچھا گیا کہ کیا ہم نوازشریف کی زندگی کی گارنٹی دے سکتے ہیں؟، پنجاب کی حکومت نے نواز شریف کو صحت کی بہترین سہولتیں دی ہیں،ہم صرف کوشش کرسکتے ہیں انسان کی زندگی کی ضمانت نہیں دے سکتا۔

مولانا فضل الرحمان کے حکومت کے خلاف آزادی مارچ سے متعلق وزیراعظم نے کہا کہ وزیراعظم بننے کے بعد پہلی تقریر میں پیش گوئی کی تھی کہ کرپٹ ٹولہ ایک ہوجائے گا۔ پہلے میثاق جمہوریت پر دستخط کیے گئے، مک مکا کرکے ملک کو لوٹا گیا، سب جانتے تھے کہ یہ خزانہ خالی کرکے گئے ہیں، پہلے دن سے سب نے مل کر شور مچایا کہ حکومت ناکام ہو گئی ہے، ہماری حکومت میں آدھا ٹیکس قرضہ واپس کرنے میں چلا گیا، ہمارے لئے معیشت مستحکم کرنا سب سے مشکل تھا، دنیا پاکستان کی معاشی پالیسیوں کی معترف ہے، آزادی مارچ والوں کو یہ خوف نہیں کہ حکومت ناکام ہورہی ہے بلکہ یہ خوف ہے کہ حکومت کامیاب ہورہی ہے۔ کہیں کہتے ہیں یہ یہودی لابی کے ہیں ،کہیں منہگائی کی وجہ بتاتے ہیں۔

وزیر اعظم نے مزید کہا کہ پی ٹی آئی ، ن لیگ اور پی پی کی حکومتوں کا پہلا سال دیکھ لیں، سب سے کم مہنگائی پی ٹی آئی کے پہلے سال میں ہوئی، ابھی تک تو ان پر ہمارے دور کے کیسز نہیں بنے صرف پرانے کیسز ہی چل رہے ہیں، اقامہ منی لانڈرنگ کا ذریعہ تھا ، کبھی سنا کہ وزیراعظم کے پاس اقامہ ہے، ہم دبئی، اور سوئٹرز لینڈ کا ریکارڈ مانگتے ہیں تو نہیں ملتا، اقامے کی وجہ سے یہ لوگ وہاں کے شہری سمجھے جاتے ہیں۔ ہمارے حالات کی خرابی ماضی میں دیئے گئے 2 این آر او ہیں، ایک این آر او نوازشریف اور دوسرا آصف زرداری کو ملا، ملک قرضوں کے دلدل میں دھنس گیا، غور سے سن لیں ، چاہے آپ سب مل کر آزادی مارچ کرلیں، بلیک میل نہیں ہوں گا ، جب تک زندہ ہوں، این آر او نہیں دوں گا۔

ٹیکس معاملات پر وزیراعظم نے کہا کہ آج ملک مقروض ہے اور مہنگائی اس لیے ہے کہ ڈالر چوری ہوکر یہاں سے باہر گئے، تاجروں سے کہتا ہوں کہ کوئی ملک ٹیکس کے بغیر نہیں چلتا، تاجروں نے ٹیکس نیٹ میں آنے پر رضامندی ظاہر کی ہے، ملک اب تیزی سے ترقی کی جانب بڑھے گا۔

جے یو آئی (ف) کی ذیلی تنظیم انصارالاسلام کی لیویزفورس پر حملے کی کوشش

بارکھان: بلوچستان میں جے یو آئی (ف) کی ذیلی تنظیم انصارالاسلام نے لیویز پر حملے کی کوشش کی جس کا ان کے خلاف مقدمہ درج کردیا گیا ہے۔

بلوچستان کے علاقے بارکھان میں جمعیت علماء اسلام (ف) کی ذیلی  تنظیم انصارالاسلا م نے لیویز فورس پر حملے کی کوشش کی جب کہ لیویز فورس نے ا پنے دفاع میں ہوائی فائرنگ کرتے ہوئے مشتعل ہجوم کو منتشر کردیا۔ واقعے کے بعد تھانہ صدر میں انصارالاسلا م کے کارکنوں کے خلاف مقدمہ درج کردیا گیا ہے۔

واضح رہے وفاقی وزارت داخلہ نے انصار الاسلام کی جانب سے پشاور میں ڈنڈا بردار جلوس نکالنے اور قائد جے یو آئی مولانا فضل الرحمٰن کو سلامی پیش کرنے کی ویڈیوز منظر عام پر آنے کے بعد تنظیم کی سرگرمیوں کو امن وامان کے لیے خطرناک قراردیتے ہوئے اس پر پابندی عائد کی ہے۔

تاہم مذکورہ پابندی صرف اسلام آباد کی حدود تک نافذ کی گئی ہے اور اس ضمن میں صوبوں کو اختیار تفویض کیا گیا ہے کہ وہ اپنے حالات کے مطابق اس حوالے سے فیصلہ کریں۔

کیکڑا ون گیس منصوبے پر وزیراعظم کو غلط بریفنگ دی گئی، ایم ڈی پی پی ایل کا انکشاف

کراچی: پاکستان پیٹرولیم لمیٹڈ (پی پی ایل) کے ایم ڈی اور سی ای او معین رضا خان نے انکشاف کیا ہے کہ کیکڑا ون میں گیس کے ذخائر کے حوالے سے وزیر اعظم کو بڑھا چڑھا کر بتایا گیا شروع سے ہی اس منصوبے کی ناکامی کا امکان 86 فیصد تک تھا۔

کمپنی کے 68 ویں سالانہ اجلاس سے خطاب اور میڈیا سے گفتگو میں انہوں نے کہا کہ کراچی کے ساحل کے قریب سمندر میں کیکڑا ون کے نام سے گیس کی تلاش کے منصوبے پر وزیر اعظم کو بڑھا چڑھا کر بتایا گیا، سمندر میں کھدائی کے بعد کنویں سے گیس نہیں پانی ہی دریافت ہوا۔

ایم ڈی نے کہا کہ شروع سے ہی اس منصوبے میں ناکامی کا خدشہ 86 فیصد اور کامیابی کا امکان محض 12 فیصد تھا، اس منصوبے پر 124 ارب روپے خرچ ہوئے اور یہ اخراجات ای این آئی، ایگزون موبل، او جی ڈی سی ایل اور پی پی ایل مساوی طور پر برداشت کریں گے۔

معین رضا خان نے کہا کہ سمندر میں کھدائی سے حاصل ہونے والی معلومات آگے چل کر کارآمد ثابت ہوں گی اب گہرے پانی سے قبل کم گہرے پانی میں کھدائی کریں گے جہاں کامیابی کا تناسب زیادہ اور اخراجات بھی کم ہوں گے۔

ایم ڈی نے کہا کہ معاہدے کے باوجود جینکوز پی پی ایل سے 250 ایم ایم سی ایف ڈی کے بجائے 159 ایم ایم سی ایف ڈی گیس خرید رہی ہے، گردشی قرضوں کے باعث کمپنی کو شدید مالی مشکلات کا سامنا ہے جس کے باعث تیل و گیس کی تلاش کی سرگرمیاں بھی متاثر ہورہی ہیں، اس وقت پی پی ایل کے قابل وصول واجبات 227 ارب روپے کی سطح تک پہنچ گئے ہیں۔

انہوں نے بتایا کہ سعودی کمپنی کے ساتھ مائننگ آپریشن کو توسیع دینے پر بات چیت جاری ہے جبکہ عراق میں پہلی قومی کمپنی کی حیثیت سے عراق میں اپنے آپریٹڈ بلاک 8 میں سب سے پہلے بین الاقوامی دریافتی کنویں مدائن 1- کی کھدائی کی۔

ان کا مزید کہنا تھا کہ ہماری توجہ موجودہ فیلڈز سے پیداوار میں اضافے اور نئے ذخائر کی تلاش پر ہے، حب سے ٹائٹ گیس کے ذخائر ملے ہیں تاہم ان کی کمرشل نیچر سے متعلق کام جاری ہے۔

بھارتی فوج کی ایل او سی پر فائرنگ، 3 شہری زخمی

بھمبر: بھارتی فوج نے ایل او سی کے علاقے باغسر سیکٹر میں بلا اشتعال فائرنگ کردی نتیجے میں 3 شہری زخمی ہوگئے۔

پاک فوج کے شعبہ تعلقات عامہ (آئی ایس پی آر) کے مطابق مقبوضہ کشمیر کی کشیدہ صورتحال سے توجہ ہٹانے کے لیے بھارت نے ایل او سی پر اشتعال انگیزی بڑھادی ہے، بھارتی فورسز نے ایک بار پھر سیز فائر معاہدے کی خلاف ورزی کرتے ہوئے شہری آبادی کو نشانہ بنایا۔

آئی ایس پی آر کے مطابق بھارتی فوج نے لائن آف کنٹرول کے باغسر سیکٹر میں بلا اشتعال فائرنگ کی، فائرنگ کے نتیجے میں ضلع بھمبر کے گاؤں مندیکا کی رہائشی ایک خاتون سمیت تین معصوم شہری زخمی ہوگئے۔

بلاول کو مولانا سے وہ نہیں ملے گا جس کی انہیں امید ہے، مراد سعید

اسلام آباد: وفاقی وزیر مواصلات مراد سعید کا کہنا ہے کہ بدقسمتی سے حادثاتی چیئرمین پی پی پی کو مولانا فضل الرحمان سے وہ کچھ نہیں ملے گا جس کی وہ امید لگائے بیٹھے ہیں۔

چیئرمین پی پی پی بلاول بھٹو کی پریس کانفرنس پر ردعمل کا اظہار کرتے ہوئے تحریک انصاف کے رہنما اور وفاقی وزیر مراد سعید کا کہنا تھا کہ روزِ اول سے کہہ رہے ہیں بلاول زرداری’’ابو بچاو‘‘ مہم چلا رہے ہیں، پیپلز پارٹی کے حادثاتی چیئرمین کی پوری سیاست اس نکتے پر کھڑی ہے کہ “ابو کو سہولتیں دلواوٴ”۔

مراد سعید کا کہنا تھا کہ بلاول زرداری کی مولانا فضل الرحمان سے عقیدت کے پیچھے بھی ابو کی جان چھڑوانے کا ہدف کار فرما ہے لیکن بدقسمتی سے حادثاتی چیئرمین کو مولانا سے بھی وہ کچھ نہیں ملے گا جس کی وہ امید لگائے بیٹھے ہیں، بلاول یاد رکھیں کہ وزیراعظم عمران خان مستعفی بھی نہیں ہوں گے اور آپ کے ابو سے لوٹ مار کا مال بھی نکلوائیں گے۔

وفاقی وزیر نے کہا کہ ابو کی لوٹ مار بچانے کے لیے حادثاتی چیئرمین نظریات کو بھی خیرباد کہہ چکے ہیں، سندھ کارڈ کھیلنے جیسی شرم ناک حرکت سے بلاول کے بڑوں کو فائدہ پہنچا نہ ان کے لیے کوئی خوشخبری ہے، سندھ میں کرپشن اور چور بازاری کی سیاست اپنی آخری سانسیں لے رہی ہے اور سندھ اب خود کو چوروں کے اس قبیلے سے لاتعلق کر رہا ہے۔

وزیراعظم عمران خان جلد استعفی دینے والے ہیں، بلاول بھٹو زرداری

اسلام آباد: پاکستان پیپلز پارٹی کے سربراہ بلاول بھٹو زرداری نے کہا ہے کہ وزیراعظم عمران خان جلد استعفی دینے والے ہیں۔

بلاول بھٹو زرداری نے نیب ریفرنس میں گرفتار اپنے والد آصف زرداری سے اسلام آباد میں ملاقات کی اور ان کی عیادت کی۔ اس دوران ملکی سیاسی صورتحال پر تبادلہ خیال کیا گیا۔

بعد ازاں میڈیا سے گفتگو کرتے ہوئے بلاول بھٹو زرداری نے کہا کہ کورٹ آرڈرکےباوجودآصف زرداری کوطبی سہولت فراہم نہیں کی جا رہیں، ہمارا مطالبہ ہے کہ طبی سہولیات کی فراہمی سے متعلق عدالتی حکم پرمکمل عملدرآمدکیاجائے، نوازشریف کی طرح آصف زرداری کو بھی نجی ڈاکٹر تک رسائی دی جائے، ن لیگ اور ہماری قیادت کی زندگیوں سے کھیلاجارہاہے، آصف زرداری نے ای سی ایل سے نام نکالنے اور باہرجانے کی اجازت نہیں مانگی۔

چیرمین پیپلز پارٹی نے کہا کہ پی ٹی آئی حکومت سے ملک،سیاست اورمعیشت  نہیں چل رہی، نااہل سلیکٹڈکٹھ پتلی اورجعلی ضدی وزیراعظم ملک نہیں چلاسکتا، عمران خان جلد استعفی دینے والاہے، آزادی مارچ میں شرکت کرنےوالے تمام افرادکوسلام پیش کرتاہوں، ابھی تو یہ سفر شروع ہوا ہے ابھی بہت کچھ ہونے والا ہے۔

بلاول بھٹو زرداری نے مزید کہا کہ پیپلز پارٹی چاہتی ہے پارلیمنٹ کے ذریعے مسئلے کا حل نکالا جائے، پیپلزپارٹی اختلافات کے باوجود جمہوریت اور پارلیمنٹ کے ساتھ کھڑی ہے، لیکن وزیراعظم عمران خان نے پارلیمان پرتالالگادیا ہے، حکومت عوام کو احتجاج کے لیے جمہوری فورم نہیں دے رہی ہے۔

Google Analytics Alternative