قومی

سیکیورٹی خطرات کے باعث ملک بھر میں انسداد پولیو مہم معطل

اسلام آباد: پولیو ورکرز کو لاحق سکیورٹی خطرات کے باعث حکومت نے ملک بھر میں انسداد پولیو مہم کو معطل کردیا۔

انسداد پولیو پروگرام نے چاروں صوبوں، آزاد کشمیر اور گلگت بلتستان کے متعلقہ اداروں کو پولیو مہم معطل کرنے کی ہدایت کردی۔ پولیو مہم کو پشاور میں پیش آنے والے حالیہ واقعہ کے تناظر میں معطل کیا گیا ہے۔ مراسلے میں کہا گیا ہے کہ ملک کے کسی علاقے میں پولیو مہم نہیں چلائی جائے گی۔

گزشتہ دنوں پشاور میں پولیو کے قطروں کے باعث مبینہ طور پر متعدد بچوں کی طبیعت خراب ہوگئی تھی جس پر مشتعل ہجوم نے بنیادی صحت مرکز کو نذر آتش کردیا تھا۔

اس کے بعد کوئٹہ، لاہور اور خیبرپختون خوا کے مختلف علاقوں میں پولیو ورکرز پر حملے ہوئے جن میں پولیس اہلکار اور پولیو ورکرز جاں بحق ہوگئے۔

پنجاب کابینہ میں ردو بدل آئندہ مالی سال کے بجٹ تک موخر

لاہور: پنجاب کابینہ میں ردو بدل آئندہ مالی سال کے بجٹ تک موخر کر دیا گیا ۔

ذمہ دار ذرائع کے مطابق پنجاب کابینہ میں شامل وزراء کی کارکردگی کی سخت مانیٹرنگ کی جا رہی ہے اور اسی کی بناء کابینہ میں ردو بدل کیا جائے گا تاہم اس پر فوری عملدرآمد کی بجائے اسے آئندہ مالی سال کے بجٹ تک موخر کر دیا گیا ہے۔

واضح رہے کہ وفاقی کابینہ کے بعد پنجاب اور خیبرپختونخوا میں بھی صوبائی کابینہ میں تبدیلی کی خبریں گرم ہیں۔

پرویزمشرف یکم مئی کو پاکستان آئیں گے، وکیل سلمان صفدر

اسلام آباد: پرویزمشرف کے وکیل سلمان صفدر کا کہنا ہے کہ سابق صدر کے خاندان کے مطابق وہ یکم مئی کو پاکستان آرہے ہیں۔

اسلام آباد میں میڈیا سے بات کرتے ہوئے سابق صدر پرویز مشرف کے وکیل سلمان صفدر کا کہنا تھا کہ پرویز مشرف خود اوران کے اہلخانہ بھی ان کے پاکستان آنے پر زور دے رہے ہیں، اور خاندانی ذرائع کے مطابق سابق صدر یکم مئی کو پاکستان آرہے ہیں۔

سلمان صفدر نے کہا کہ پرویز مشرف کی صحت بہت خراب ہے اور صحت میں اونچ نیچ روزانہ کی بنیادوں پر لگی ہوئی ہے، اس لئے پرویز مشرف کی وطن واپسی کے لئے ان کی صحت اور عمر کو مدنظر رکھتے ہوئے ان کے معالج کی اجازت انتہائی اہم ہے، تاہم سابق صدر دو مئی کو اسپیشل کورٹ میں پیش ہونے کے حوالے سے پر عزم ہیں۔

دعوے سے کہتا ہوں میں ہر حکومت کا حصہ بن سکتا ہوں، چوہدری نثار

راولپنڈی: سینیئر سیاسی رہنما چوہدری نثار کا کہنا ہے کہ میں دعوے سے کہتا ہوں کہ میں ہر حکومت کا حصہ بن سکتا ہوں۔

یوسی لوہدراں میں عوام سے خطاب کرتے ہوئے سابق وزیرداخلہ چوہدری نثار کا کہنا تھا کہ مجھے بہت سی پیشکشیں ہوئیں لیکن میں نے انہیں جھٹلا دیا، ذرا سی بات کی تشہیر ہوجاتی اور میں تشہر کا قائل ہوں، جن لوگوں نے نیا شوشہ چھوڑا اور جو مجھے وزیراعلٰی پنجاب بنانا چاہتے ہیں وہی اس بات کا جواب دیں، میں دعوے سے کہتا ہوں کہ میں ہر حکومت کا حصہ بن سکتا ہوں۔

چوہدری نثار کا کہنا تھا کہ کل تک عمراں خان صاحب دوسری پارٹیوں پر تنقید کرتے تھے انہوں نے چند ماہ میں ریکارڈ قرضے لے لیے، معاشرہ تنزلی کا شکار ہے یہاں سب بکتے ہیں اور بک رہے ہیں، عوام چہرے بدلنے والوں کو قبول کرتے ہیں، حلال اور حرام کی تمیز ختم ہوگئی ہے، میرے والد کہا کرتے تھے کہ ہمارے دور میں برے لوگ انگلیوں پر گنے جاتے تھے اب اچھے لوگ انگلیوں پر گنے جاتے ہیں۔

سابق وزیرداخلہ نے کہا کہ اقتدار کی خواہش نہیں اب روزہ رکھا ہوا ہے آپ یقین کریں جب افطاری ہوگی تو مزہ آئے گا،  سیاست عہدے کے لیے نہیں عوام کے لیے کرتا ہوں، اگر عوام میرے ہاتھ پر ہاتھ رکھیں اور تمام مشکلات دور کرسکتا ہوں۔

خان صاحب سمجھتی ہے کا جملہ جان بوجھ کر نہیں بولا،بلاول بھٹو زرداری

اسلام آباد: پاکستان پیپلز پارٹی کے چیئرمین بلاول بھٹو زرداری کا کہنا ہے کہ خان صاحب سمجھتی ہے کا جملہ جان بوجھ کر نہیں بولا تھا۔

اسلام آباد میں پیپلز پارٹی کے رہنماؤں نے بلاول بھٹو زرداری سے ملاقات کی، اس موقع پر پیپلز پارٹی خیبر پختونخوا کے رہنماؤں نے بلاول بھٹو زرداری کو بلین ٹری سونامی، بی آر ٹی منصوبہ، مالم جبہ کیس اور اسکولوں میں طلبہ کے جعلی داخلوں سمیت صوبے میں مبینہ کرپشن سے متعلق بریفنگ دی۔

بلاول بھٹو زرداری نے کہا کہ پی ٹی آئی کے سارے دعوے ایک ایک کر کے جھوٹے ثابت ہوتے جارہے ہیں، پی ٹی آئی کی کرپشن پر تفتیشی ادارے ایکشن کیوں نہیں لیتے؟ ۔ انہوں نے پارٹی رہنماؤں کو ہدایت کی کہ پی ٹی آئی کی کرپشن کو ہر جگہ پر بے نقاب کیا جائے۔

دوسری جانب بلاول بھٹو زرداری نے پارٹی رہنماؤں سے غیر رسمی گفتگو کے دوران کہا کہ میں نے خان صاحب سمجھتی ہے کا جملہ جان بوجھ کر نہیں کہا، ایسا اردو پر عبور نہ ہونے کے باعث ہوا

راجن پور میں دو قبیلوں میں مسلح تصادم، 6 افراد جاں بحق

تحصیل روجھان کچہ کے علاقے میں دو قبیلوں کے درمیان فائرنگ کے تبادلے میں 6 افراد جاں بحق ہوگئے۔

پنجاب کے ضلع راجن پور کی تحصیل روجھان کچہ کے علاقے میں دو قبیلوں کے مابین مسلح تصادم میں 6 افراد جاں بحق اور متعدد زخمی ہوگئے۔

پولیس کے مطابق دونوں قبیلوں کے درمیان موٹرسائیکل کے تنازعے پر تلخ کلامی ہوئی جو پہلے ہاتھا پائی اور پھر فائرنگ میں تبدیل ہوگئی جس سے موقع پر ہی 2 افراد جاں بحق اور 7 افراد شدید زخمی ہوگئے، زخمیوں اور لاشوں کو اسپتال پہنچایا گیا جہاں قتل ہونے والے افراد کی شناخت شہباز اور کریم کے ناموں سے ہوئی۔

پولیس حکام کا کہنا ہے کہ فائرنگ کا تبادلہ تاحال جاری ہے، پولیس کی بھاری نفری بھی موقع پر پہنچ گئی ہے تاہم حالات پر قابو نہیں پایا جاسکا جب کہ دوسری جانب زخمی ہونے والے مزید 4 افراد زخموں کی تاب نہ لاتے ہوئے دم توڑ گئے ہیں اور فائرنگ کے تبادلے میں اب تک جاں بحق ہونے والے افراد کی مجموعی تعداد 6 ہوگئی ہے۔

وزیراعظم کی ورلڈ بینک اور آئی ایم ایف کی قیادت سے ملاقات

بیجنگ: وزیراعظم عمران خان سے عالمی بینک کی چیف ایگزیکٹو آفیسر (سی ای او) اور بین الاقوامی مالیاتی فنڈ (آئی ایم ایف) کی سربراہ نے الگ الگ ملاقات کی ہے۔

وزیراعظم عمران خان بیلٹ اینڈ روڈ فورم  میں شرکت کےلیے چار روزہ دورے پر بیجنگ میں موجود ہیں۔ اس موقع پر انہوں نے ورلڈ بینک کی چیف ایگزیکٹو آفیسر کرسٹالینا جارجیوا سے ملاقات کی ۔ ملاقات میں وزیرخارجہ شاہ محمود قریشی، مشیر خزانہ حفیظ شیخ اور مشیر تجارت رزاق داؤد موجود تھے۔

وزیراعظم نے ورلڈ بینک کی چیف ایگزیکٹو کرسٹالینا جارجیوا کو حکومت کے حالیہ معاشی اور مالیاتی اقدامات سے آگاہ کیا۔ عمران خان نے ورلڈ بینک کی جانب سے خطے کو آپس ملانے، غربت کے خاتمے اور کاروبار کو آسان بنانے جیسے اقدامات کی تعریف کی۔

وزیراعظم نے ورلڈ بینک کی اعلیٰ افسر کو پاکستان میں غربت کے خاتمے کے لیے شروع کیے گئے احساس پروگرام سے بھی آگاہ کیا۔ ورلڈ بینک کی چیف ایگزیکٹو نے قرضوں کی فراہمی اور بیرونی فنڈز جیسے شعبوں میں پاکستان کے ساتھ تعاون مزید بڑھانے پر اتفاق کیا۔

بعدازاں وزیراعظم عمران خان سے آئی ایم ایف کی ایم ڈی کرسٹینا لیگارڈ نے ملاقات کی جس میں آئی ایم ایف کی جانب سے پاکستان کے لیے بیل آؤٹ پیکیج کے حوالے سے تفصیلی تبادلہ خیال کیا گیا۔

ملاقات میں وزیراعظم نے کرسٹینا لیگارڈ کو ملکی معیشت بہتر بنانے کے لیے اٹھائے گئے اقدامات اور غربت مٹاؤ پروگرام سے بھی آگاہ کیا۔

شاہد خاقان عباسی اور مفتاح اسماعیل سمیت 7 افراد کے نام ای سی ایل میں شامل

اسلام آباد: سابق وزیراعظم شاہد خاقان عباسی اور مفتاح اسماعیل سمیت 7 افراد کے نام ای سی ایل میں شامل کرلیے گئے ہیں۔

مسلم لیگ (ن) کے رہنما اور سابق وزیراعظم شاہد خاقان عباسی اور مفتاح اسماعیل سمیت 7 افراد کے نام ای سی ایل میں شامل کرلیے گئے ہیں،ذرائع کے مطابق نیب کی سفارش پر نام ای سی ایل میں ڈالے گئے ہے، اس سے قبل تمام افراد کے نام اسٹاپ لسٹ میں ڈالے گئے تھے۔

ای سی ایل میں مزید جن افراد کے نام ڈالے گئے ہیں ان میں چیئرپرسن اوگرا عظمی عادل، سابق ایم ڈی پی ایس اوعمران الحق، مبین صولت، شاہداسلام الدین اورعامر نسیم بھی شامل ہیں۔

Google Analytics Alternative