قومی

جہانگیر ترین کی چوہدری برادران سے ملاقات، وزیراعلیٰ پنجاب کے انتخاب پر مشاورت

لاہور: پی ٹی آئی رہنما جہانگیر ترین اور علیم خان نے لاہور میں چوہدری برادران سے ملاقات کی جس میں وزیراعلیٰ پنجاب کے انتخاب پر مشاورت کی گئی۔

پاکستان تحریک انصاف کے رہنما جہانگیر ترین اور علیم خان لاہور میں چوہدری برادران کی رہاش گاہ پہنچے جہاں انہوں نے مسلم لیگ (ق) کے صدر چوہدری شجاعت حسین، چوہدری پرویزالہی اور چوہدری مونس الہی سے ملاقات کی ۔ ملاقات میں وزیراعلیٰ پنجاب ، اسپیکر اور ڈپٹی اسپیکر کے انتخاب پر مشاورت سمیت ارکان پنجاب اسمبلی سے رابطوں اور 14 اگست کو پارلیمانی پارٹی کے اجلاس پر بھی تبادلہ خیال کیا گیا۔

اس موقع پر میڈیا سے بات کرتے ہوئے جہانگیر ترین کا کہنا تھا کہ پنجاب میں ہمیں نمبر گیم میں واضح برتری حاصل ہے تاہم ابھی چیف منسٹر پنجاب کے بارے کوئی فیصلہ نہیں ہوا، ن لیگ کے متعدد ارکان سے ہماری بات چیت چل رہی ہے جو ہمارے امیدوار کو ووٹ دیں گے، صوبے کو مسلم لیگ (ق) کی پارٹنر شپ سے چلائیں گے اور ایسی گورننس دیں گے کہ تاریخ میں ایسا کام کبھی نہیں ہوا ہوگا۔ انہوں نے کہا کہ شریف برادران نے اداروں کو کھوکھلا کیا ہے، ان کی تمام چیزوں کو بے نقاب کریں گے بتائیں گے کہ 10 سال میں کتنا نقصان ہوا۔

چوہدری پرویز الہی نے میڈیا سے گفتگو میں کہا کہ کافی امور پر بات کی ہے، انتخابات کے بعد چیلنجز اور لوکل باڈیز پر بھی گفتگو ہوئی، شہباز شریف کا نظام کھوکھلا ہے، بلدیاتی اداروں کے پاس اختیار نہیں، کوئی ادارہ ایسا نہیں چھوڑا جو برباد نہ کیا ہو جب کہ شیخ چلی کی طرح ایسے منصوبے بنائے جس کا کوئی فائدہ نہیں ہوا۔

گورنر ہاؤس کو درس گاہ میں تبدیل کیا جائے گا، نامزد گورنر سندھ عمران اسماعیل

کراچی: تحریک انصاف کے نامزد گورنرسندھ عمران اسماعیل نے گورنرہاؤس کو تعلیمی ادارہ بنانے اور اخراجات کم سے کم کرنے کا اعلان کردیا۔

چیئرمین تحریک انصاف عمران خان سے ملاقات کے بعد کراچی ایئرپورٹ پہنچنے پر پی ٹی آئی کے رہنماؤں اور کارکنوں نے عمران اسماعیل کو گورنر سندھ نامزد ہونے پر انہیں مبارک باد پیش کی۔

اس موقع پر میڈیا سے بات کرتے ہوئے عمران اسماعیل کا کہنا تھا کہ ہم عمران خان کے پروگرام پر عمل کرتے ہوئے حقیقی تبدیلی لائیں گے، گورنر ہاؤس ایک تاریخی عمارت ہے اسے منہدم نہیں کریں گے بلکہ  تعلیمی ادارہ بنائیں گے اور ابتدائی طور پر اس میں کوئی انسٹی ٹیوٹ یا لائبریری بنانے کا ارادہ ہے۔

عمران اسماعیل  نے کہا کہ  میں متحرک گورنر  رہوں گا،گورنر ہاؤس میں نہیں رہوں گا، سندھ کے دور دراز علاقوں میں جاؤں گا اور وہاں کے حالات کا جائزہ لوں گا۔ انہوں نے کہا کہ انتخابات میں پی ٹی آئی سندھ کی سب سے بڑی اپوزیشن جماعت بن کرابھری ہے اس لیے سندھ اسمبلی میں قائد حزب اختلاف بھی تحریک انصاف سے ہوگا۔

نامزد گورنر کا مزید کہنا تھا کہ کراچی کی عوام نے پی ٹی آئی کو مینڈیٹ دیا ہے ہم ترقیاتی منصوبوں میں شفافیت لائیں گے اور منصوبوں کا تھرڈ پارٹی آڈٹ کرائیں گے، کرپشن کا خاتمہ کریں گے کیونکہ بدعنوانی کے بغیر ترقی ممکن نہیں۔

ایک مخصوص نشست پر پی ٹی آئی اور بی این پی کے درمیان ٹاس ہوگا

اسلام آباد: بلوچستان اسمبلی کی خواتین کی مخصوص نشستوں میں سے ایک کا فیصلہ نہ ہوسکا جس کی وجہ سے پی ٹی آئی اور بی این پی کے درمیان ٹاس ہوگا۔

الیکشن کمیشن کے مطابق  خواتین اور اقلیتوں کی مخصوص نشستوں  کا نوٹی فکیشن جاری کردیا گیا ہے تاہم بلوچستان اسمبلی کی 11 خواتین کے لیے مخصوص نشستوں میں سے 10 کا نوٹی فکیشن جاری  ہوا ہے جب کہ ایک نشست کا فیصلہ نہ ہوسکا جس کے لیے ٹاس کیا جائے گا۔

الیکشن کمیشن کا کہنا ہے کہ مخصوص نشست کے لیے تحریک انصاف اور بلوچستان نیشنل پارٹی کے درمیان ٹاس ہوگا جس کے بعد اس کا نوٹی فکیشن جاری کیا جائے گا۔

چمن: موٹرسائیکل میں نصب بم دھماکے سے ایک شخص جاں بحق

بلوچستان کے علاقے چمن میں بم دھماکے سے ایک شخص جاں بحق اور 3 فرنٹیئر کورپس (ایف سی) اہلکاروں سمیت 9 افراد زخمی ہوگئے۔

پولیس کا کہنا تھا کہ چمن کے مال روڈ کے علاقے میں نامعلوم شرپسندوں نے مبینہ طور پر ایف سی اہلکاروں کو لے جانے والی گاڑی پر حملہ کیا۔

ان کا کہنا تھا کہ شر پسندوں نے آئی ای ڈی بم کو سڑک کے کنارے کھڑی موٹرسائیکل میں نصب کیا تھا۔

دھماکے میں زخمی ہونے والے افراد کو طبی امداد فراہم کرنے کے لیے فوری طور پر سول ہسپتال چمن منتقل کردیا گیا جہاں پہلے ہی ایمرجنسی نافذ کردی گئی تھی۔

دھماکے سے قریب کھڑی گاڑیوں میں آگ لگ گئی جبکہ گھروں اور دکانوں کے شیشے بھی ٹوٹ گئے۔

دھماکے کے بعد پولیس، لیویز اور ایف سی اہلکاروں نے جائے وقوع کو گھیرے میں لے کر بند کردیا۔

واضح رہے کہ اس سے قبل 20 جولائی کو بھی چمن میں مال روڈ پر ریموٹ کنٹرول بم دھماکے کے نتیجے میں 5 افراد زخمی ہوگئے تھے۔

پولیس کے مطابق چمن کی مصروف ترین شاہراہ مال روڈ پر دھماکا اس وقت ہوا، جب قانون نافذ کرنے والے ایک ادارے کی گاڑی وہاں سے گزر رہی تھی۔

پولیس حکام کا کہنا تھا کہ دھماکا ریموٹ کنٹرول تھا جبکہ دھماکا خیز مواد ایک موٹر سائیکل میں نصب کیا گیا تھا اور اس کا ہدف قانون نافذ کرنے والے اداروں کی گاڑی تھی۔

پی ٹی آئی کا حکومت میں آتے ہی تھانوں میں تشدد پر پابندی لگانے کا فیصلہ

لاہور: پاکستان تحریک انصاف نے حکومت میں آتے ہی پولیس اسٹیشنز میں شہریوں پر تشدد کرنے پر پابندی لگانے کا فیصلہ کیا ہے۔

پاکستان تحریک انصاف کے مرکزی رہنما نعیم الحق کا کہنا ہے کہ تحریک انصاف کی قیادت پولیس اسٹیشنز اورقانون نافذ کرنے والے اداروں کی جانب سے شہریوں پر تشدد کے خلاف اقدامات اٹھانے کے لیے تیار ہے، عمران خان  حلف اٹھانے کے فوری بعد تھانوں میں شہریوں پر ہونے والے تشدد کو بند کرنے کے احکامات جاری کرسکتے ہیں۔

نعیم الحق نے کہا کہ پولیس اسٹیشنز اور تمام قانون نافذ کرنے والے اداروں کی جانب سے شہریوں پر تشدد کرنے پر پابندی ہونی چاہیے، یہ غیر اسلامی اور غیر آئینی ہے، اس سے زیادہ تر غریب لوگ متاثر ہوتے ہیں، تحریک انصاف  تھانوں میں شہریوں پر ہر طرح کا تشدد ختم کرے گی اور صحیح سمت میں تمام اقدمات اٹھائے گی۔

دوسری جانب پاکستان تحریک انصاف کے سربراہ عمران خان نےسرکاری ٹی وی چینل پی ٹی وی اور ریڈیو پاکستان میں بھی اصلاحات کا فیصلہ کیا ہے۔ ذرائع تحریک انصاف کے مطابق کپتان نے ہدایت جاری کرتے ہوئے کہا ہے کہ سرکاری چینل کو صرف حکومتی کوریج تک محدود نہیں رکھا جائے گا، بلکہ پی ٹی وی کو معلومات، تفریح اور غیر جانبداری کے ایجنڈے پر گامزن کیاجائے گا۔

اس کے علاوہ  پی ٹی وی میں اصلاحات کے لئے تمام ضر وری تبدیلیاں لائی جائیں گی اور ریڈیو پاکستان پر بھی عوام کا اعتماد بحال کیا جائے گا۔

مخصوص نشستیں؛ کئی سیاستدانوں نے اپنی رشتہ دار خواتین کو رکن اسمبلی بنوادیا

 اسلام آباد: متعدد سیاستدانوں نے مخصوص نشستوں پر اپنی خواتین رشتہ داروں کو قومی اسمبلی تک رسائی دلادی۔

ایکسپریس نیوز کے مطابقکی مخصوص 221 نشستوں پر ارکان اسمبلی کے نوٹی فکیشن جاری کردیے ۔ اس طرح ملک میں ہونے والے حالیہ انتخابات کا آخری مرحلہ بھی مکمل ہوگیا اور تمام جماعتوں کی انتخابی پوزیشن واضح ہوگئی۔ اس کے ساتھ ساتھ پاکستان کے کئی سیاستدانوں کی خواتین رشتہ داروں کی قسمت جاگ اٹھی اور انہوں نے بھی قومی اسمبلی تک رسائی حاصل کرلی ہے۔

تحریک انصاف خواتین کی  28 اور اقلیتوں کی 5 مخصوص نشستیں ملا کر قومی اسمبلی میں 158 ارکان کے ساتھ  سب سے آگے ہے۔ پی ٹی آئی کی جانب سے جن خواتین کو ایم این اے کا منصب ملا ہے ان میں شیریں مزاری، منزہ حسن، عندلیب عباس اور سابق وزیراعلیٰ خیبر پختونخوا پرویز خٹک کی سالی نفیسہ عنایت اللہ خان خٹک اور بھتیجی ساجدہ بیگم شامل ہیں۔ جب کہ پی ٹی آئی کی لاہور سے معروف رہنما ڈاکٹر یاسمین راشد ممبر پنجاب اسمبلی منتخب ہوئی ہیں۔

مسلم لیگ (ن) خواتین کی 16، اور اقلیتوں کی 10 مخصوص نشستوں میں سے 2 نشستیں حاصل کر کے مجموعی طور پر 82 ارکان قومی اسمبلی کے ساتھ ملک کی دوسری بڑی جماعت بن چکی ہے۔

مسلم لیگ (ن) کی جانب سے خواتین کی مخصوص نشستوں کے لئے نامزد کردہ خواتین میں خواجہ آصف کی اہلیہ مسرت آصف اور بھتیجی شیزا فاطمہ، سابق وزیر اطلاعات مریم اورنگزیب، ان کی والدہ طاہرہ اورنگزیب، سابق وزیرخزانہ حفیظ پاشا کی اہلیہ عائشہ غوث پاشا، نواز شریف کے معاون خصوصی طارق فاطمی کی اہلیہ زہرہ ودود فاطمی، سابق وزیرمملکت چوہدری جعفر اقبال کی بیٹی زیب جعفر اور بھتیجی مائزہ حمید اور رکن آزاد کشمیر اسمبلی ناصر ڈار کی بہن کرن ڈار شامل ہیں۔

مریم نواز کی سیکرٹری ثانیہ عاشق اور چوہدری جعفر اقبال کی اہلیہ عشرت جعفر پنجاب اسمبلی کے لئے منتخب ہوئی ہیں۔

پاکستان پیپلز پارٹی خواتین کی 9 اور 2 اقلیتی مخصوص نشستیں حاصل کرکے 53 نشستوں کے ساتھ ملک کی تیسری بڑی جماعت بن کر سامنے آئی ہے۔  پیپلز پارٹی کی حنا ربانی کھر، شازیہ مری، ناز بلوچ ممبر قومی اسمبلی منتخب ہوئی ہیں جب کہ شہلا رضا اور ریحانہ لغاری ممبر سندھ اسمبلی بن گئیں ہیں۔

متحدہ قومی موومنٹ پاکستان نے کشور زہرا جبکہ متحدہ مجلس عمل نے سپریم کورٹ بار ایسوسی ایشن کے سابق صدر کامران مرتضیٰ کی اہلیہ عالیہ کامران کو بلوچستان سے نامزد کیا ہے۔ سابق صدر مملکت چودھری فضل الہٰی کی پوتی تاشفین صفدر بھی رکن قومی اسمبلی منتخب ہوئی ہیں۔

سعودی شاہ سلمان کی عمران خان کو انتخابات میں کامیابی پر مبارکباد

جدہ: سعودی شاہ سلمان بن عبدالعزیز السعود اور ولی عہد محمد بن  سلمان نے پاکستان تحریک انصاف کے سربراہ عمران خان کو انتخابات میں کامیابی پر مبارکباد دیتے ہوئے ان کے لیے نیک خواہشات کا اظہار کیا ہے۔

سعودی فرمانروا شاہ سلمان  اور ولی عہد محمد بن سلمان نے اپنے پیغام میں عمران خان کی صحت یابی کے لیے دعا کرتے ہوئے  کہا کہ ہم سعودی عوام اور حکومت کی جانب سے عمران خان کو انتخابات میں کامیابی پر مبارکباد دیتے ہیں۔ خادم حرمین شریفین اور ولی عہد محمد بن سلمان نے پاکستانی عوام اور ملک  کی ترقی و خوشحالی کے لیے بھی دعا کی۔

واضح رہے کہ تحریک انصاف انتخابات میں سب سے زیادہ نشستیں حاصل کرنے کے بعد مرکز میں حکومت بنانے کی پوزیشن میں ہے جب کہ پی ٹی آئی کی جانب سے پاکستان کےاگلے وزیر اعظم کے لیے عمران خان کو نامزد کیاگیا ہے۔

مسافر بس اور سیکیورٹی فورسزکی گاڑی میں تصادم،4 ایف سی اہلکار جاں بحق

ڈیرہ اسماعیل خان: صوبہ خیبرپختونخوا کے شہر ڈیرہ اسماعیل خان میں درابن ژوب روڈ پر ایک مسافر بس اور سیکیورٹی فورسز کی گاڑی میں تصادم کے نتیجے میں 4 ایف سی اہلکار جاں بحق ہوگئے۔

پولیس کے مطابق حادثے میں 8 اہلکار زخمی بھی ہوئے۔

پولیس کے مطابق مسافر بس میں بھی زیادہ تر اہلکار ہی موجود تھے۔

واقعے کی اطلاع ملتے ہی پولیس اور سیکیورٹی فورسز جائے وقوع پر پہنچیں۔

دوسری جانب حادثے کے زخمیوں اور لاشوں کو کمبائنڈ ملٹری اسپتال (سی ایم ایچ) منتقل کردیا گیا۔

Google Analytics Alternative