قومی

وزیراعظم جب جھوٹا اور نااہل ہو تو ایسی ہی صورتحال ہوتی ہے، مریم اورنگزیب

اسلام آباد:  ترجمان مسلم لیگ (ن) مریم اورنگزیب کا کہنا ہے کہ وزیراعظم جب جھوٹا اور نااہل ہو تو ایسی ہی صورتحال ہوتی ہے تاہم جھوٹوں کا مقابلہ نہیں کر سکتے۔

اسلام آباد میں میڈیا سے گفتگو میں ترجمان مسلم لیگ (ن) مریم اورنگزیب کا کہنا تھا کہ موجودہ حکومت نااہل اور نالائق ہے، حکومت کے پاس اپنی کارکردگی بتانے کے لیے کچھ نہیں، پی ٹی آئی کا طریقہ واردات مختلف ہے، دوسروں کو چور اور ڈاکو کہنا ان کا طریقہ واردات ہے۔

مریم اورنگزیب نے کہا کہ پچھلے 9 ماہ میں گیس 141 فیصد پہلے ہی مہنگی ہوچکی ہے تاہم اب مزید قیمتوں میں 80 فیصد اضافہ ہونے والا ہے، جھوٹی حکومت عوام کو آئی ایم ایف کی شرائط بتائے۔ انہوں نے کہا کہ عمران خان اب کنٹینر پر نہیں بلکہ وزیراعظم کی کرسی پر ہیں تاہم وزیراعظم لاڈلے ہیں اور لاڈلے سے سوال نہیں ہوسکتا۔

ترجمان مسلم لیگ (ن) نے کہا کہ فواد چوہدری سیاسی خانہ بدوش اور کرائے کے وزیر ہیں جب کہ انہوں نے شاہد خاقان عباسی پر جھوٹے الزامات لگائے، وزیراعظم جب جھوٹا اور نااہل ہو تو ایسی ہی صورتحال ہوتی ہے تاہم جھوٹوں کا مقابلہ نہیں کر سکتے۔

نیب عدالت سے حمزہ شہبازکی گرفتاری کی اجازت مانگے گا، ذرائع

لاہور: ذرائع کا کہنا ہے کہ پنجاب اسمبلی میں اپوزیشن لیڈر اور مسلم لیگ (ن) کے رہنما حمزہ شہبازشریف نیب کے سوالات کے جوابات دینے میں ناکام رہے اور نیب کل عدالت میں حمزہ شہباز کو گرفتار کرنے کی اجازت مانگے گا۔

پنجاب اسمبلی میں اپوزیشن لیڈر حمزہ شہباز کی مختلف کیسز میں نیب میں پیشیوں کا سلسلہ جاری ہے، اور ضمانت ملنے کے بعد وہ 3 دفعہ نیب میں پیش ہوچکے ہیں، اور آج بھی وہ نیب کے سامنے پیش ہوئے تاہم ذرائع کے مطابق وہ نیب کے سوالات کے جوابات دینے میں ناکام رہے۔

ذرائع کا کہنا ہے کہ نیب کی 2 انوسٹی گیشن ٹیموں نے حمزہ شہباز سے آمدن سے زائد اثاثہ جات اور مبینہ منی لانڈرنگ کے حوالے سے سوالات کیے، تاہم حمزہ شہباز نے دونوں ٹیموں کے سوالات پر ٹال مٹول سے کام لیا اور نیب حکام کو کل تک کا انتظار کرنے کی تلقین کرتے رہے۔

ذرائع کے مطابق حمزہ شہبازشریف سے ہونے والی تفتیش، ان کے تعاون نہ کرنے اور سوالات کے جوابات نہ دینے سے متعلق سینئر افسران کو آگاہ کر دیا گیا ہے جب کہ نیب کی جانب سے رپورٹ بھی تیار کرلی گئی ہے جو کل عدالت میں پیش کی جائے گی، اور ممکنہ طور پر نیب کی جانب سے  کل عدالت میں حمزہ شہباز کی گرفتاری کی درخواست کی جائے گی۔

واضح رہے کہ حمزہ شہباز نے لاہور ہائیکورٹ میں رمضان شوگر ملز اور صاف پانی کرپشن کیس میں عبوری ضمانت کے لیے الگ الگ درخواستیں دائر کی تھیں اورموقف اپنایا تھا کہ نیب کی طرف سے گرفتاری کا خدشہ ہے، نیب پہلے بهی سیاستدانوں کو کسی اور انکوائری میں بلا کر دوسرے مقدمات میں گرفتار کر چکا ہے، عدالت نے حمزہ شہباز کی دونوں کیسز میں 17 اپریل تک عبوری ضمانت منظور کی، اور دو کیسز میں ایک ایک کروڑ کے مچلکے بھی جمع کرانے کا حکم دیا تھا، کل شہبازشریف کی عبوری ضمانت کی تاریخ ختم ہوجائے گی۔

صدارتی نظام کے حق میں نہیں ہم اس کو روکیں گے، آصف زرداری

اسلام آباد: سابق صدر آصف زرداری کا کہنا ہے کہ صدارتی نظام کے حق میں نہیں تاہم انھیں کوشش کرنے دیں ہم اس کو روکیں گے۔

اسلام آباد احتساب عدالت میں پیشی کے بعد صحافیوں سے گفتگو میں سابق صدر اور شریک چیئرمین پیپلزپارٹی آصف علی زرداری کا کہنا تھا کہ یہ روز پاکستان میں نیا تجربہ کرنے کے موڈ میں ہیں تاہم صورتحال دن بدن بد سے بدتر ہوتی جا رہی ہے۔

صحافی کے سوال پر کہ صدارتی نظام کی باتیں ہو رہی ہیں کیا کہیں گے، آصف زرداری نے کہا کہ صدارتی نظام کے حق میں نہیں، انھیں کوشش کرنے دیں تاہم ہم اس کو روکیں گے۔

واضح رہے کہ سابق صدر آصف زرداری اور فریال تالپور اسلام آباد کی احتساب عدالت عدالت میں پیش ہوئے جہاں دونوں حاضری لگوانے کے بعد واپس روانہ ہوگئے، دوران سماعت نیب پراسیکیوٹر نے عدالت کو بتایا کہ 2 خواتین ملزمان نورین اور کرن کی وعدہ معاف گواہ بننے کی درخواست نیب کو ملی ہے۔

مودی جھوٹے انسان اور لمبی لمبی پھینکنے میں نمبر ون ہیں، سدھو

احمد آباد: سابق کرکٹر اور کانگریس کے رہنما نوجوت سنگھ سدھو نے کہا ہے کہ وزیراعظم نریندرا مودی جھوٹے شخص ہیں اور لمبی لمبی پھینکنے میں نمبر ون ہیں۔

بین الاقوامی خبر رساں ادارے کے مطابق انتخابی مہم کے سلسلے میں جلسہ عام سے خطاب کرتے ہوئے کانگریس رہنما اور سابق کرکٹر نوجوت سنگھ سدھو نے وزیراعظم نریندرا مودی کو آڑے ہاتھوں لیا اور نمبر ون ’پھینکو‘ اور ایک نمبر کا جھوٹا قرار دیا۔

سدھو کا کہنا تھا کہ گجرات میں مہاتما گاندھی جیسا لیڈر پیدا ہوا اور مجھے حیرت ہے کہ ایسی سرزمین سے مودی جیسا شخص کیسے جنم لے سکتا ہے؟ مودی صرف ایک فیصد امیر لوگوں کے کام کرتے ہیں اور غربا کی انہیں کوئی پروا نہیں ہے، وہ کسان دشمن اور مزدور مخالف وزیراعظم ہیں۔

نوجوت سدھو نے حکومتی پالیسیوں کو تنقید کا نشانہ بناتے ہوئے مزید کہا کہ مودی نے کروڑوں نوکریاں دینے کا وعدہ کیا تھا لیکن حکومت میں آنے کے بعد لوگوں کو بے روزگار کیا، معیشت تباہ کی اور بھارت میں نفرت کو پروان کو چڑھایا۔

ایساقدم نہیں اٹھائیں گے جس سے معیشت کو نقصان ہو، چیئرمین نیب

 لاہور: قومی احتساب بیورو کے سربراہ جاوید اقبال نے کہا ہے کہ ایساقدم نہیں اٹھائیں گےجس سےملکی معیشت کونقصان ہو۔

چیئرمین نیب جاوید اقبال نے پنجاب سول سیکریٹریٹ میں خطاب کرتے ہوئے کہا کہ حکومتی معاملات چلانےکیلیےبیوروکریسی کا کردار اہم ہے، نیب نے جن بیوروکریٹس کےخلاف کارروائی کی، ان کے خلاف ٹھوس شواہدموجودہیں، ایساقدم نہیں اٹھائیں گےجس سےملکی معیشت کونقصان ہو۔

جاوید اقبال نے کہا کہ گزشتہ برس پنجاب میں میگا کرپشن کیسزسامنےآئے، حکومت پالیسی بناتی ہے،عملدرآمد بیوروکریسی کاکام ہے جو ملک کی ریڑھ کی ہڈی کی حیثیت رکھتی ہے، وہ فیصلے نہیں کرےگی توہم آگےکیسےبڑھیں گے، شواہدسےثابت کروں گا،نیب جو کام کررہا ہے وہ درست ہے۔

چیرمین نیب کا کہنا تھا کہ میگاکرپشن مقدمات کومنطقی انجام تک پہنچانااولین ترجیح ہے، نیب احتساب سب کیلئے کی پالیسی پر بلاتفریق عمل پیرا ہے، بدعنوانی تمام برائیوں کی جڑ ہے جس کے خاتمہ کو قومی فریضہ سمجھ کر فرائض سرانجام دے رہے ہیں۔

پشاور میں دہشتگردوں کے خلاف آپریشن 16 گھنٹوں بعد مکمل، 5 دہشتگرد ہلاک

پشاور: حیات آباد فیز 7 میں دہشت گردوں کے خلاف آپریشن 16 گھنٹے بعد مکمل کرلیا گیا ہے جب کہ کارروائی کے دوران 5 دہشت گرد ہلاک اور ایک پولیس اہلکار شہید ہوگیا۔ 

پشاور پولیس نے گزشتہ رات انٹیلی جنس اطلاعات کی بنیاد پر حیات آباد میں واقع 3 منزلہ مکان میں دہشت گردوں کی موجودگی کی اطلاع پر کارروائی کی تھی، آپریشن کے دوران مکان میں موجود دہشت گردوں کی جانب سے شدید مزاحمت کی گئی۔

کارروائی کے دوران دہشت گردوں کی جانب سے مزاحمت اور ایک پولیس اہلکار کی شہادت کے بعد آپریشن میں پاک فوج کے ایس ایس جی کمانڈوز بھی شامل ہوگئے، اطراف کی عمارتوں میں موجود عام شہریوں کی جان و مال بچانے کی غرض سے پولیس اور سیکیورٹی فورسز نے کارروائی کے لیے انتہائی احتیاط برتی۔

آپریشن کے دوران علاقے کا مکمل محاصرہ کیا گیا اور کسی بھی شخص کو آپریشن کی جگہ جانے کی اجازت نہیں تھی۔ کارروائی کی نگرانی سی سی پی او پشاور اور ایس ایس پی آپریشن نے کی جب کہ کور کمانڈر پشاور نے بھی جائے وقوعہ کا دورہ کیا۔ عمارت کلیئر کئے جانے کے بعد عمارت کو دھماکا خیز مواد سے اڑادیا گیا۔

کارروائی کے دوران 5 دہشت گرد ہلاک جب کہ پولیس اہلکار قمر عالم شہید ہوا۔ جس کی نماز جنازہ پولیس لائن میں ادا کی گئی، نماز جنازہ میں شہید اہلکار کے ورثا کے علاوہ وزیر اعلی خیبر پختونخوا محمود خان، کور کمانڈر پشاور لیفٹیننٹ جنرل شاہین مظہر اور آئی جی خیبر پختونخوا محمد نعیم نے بھی شرکت کی۔

چیئرمین نیب نے شہباز شریف کی اہلیہ اور بیٹیوں کے طلبی نوٹسز منسوخ کردیے

لاہور: قومی احتساب بیورو (نیب) کے سربراہ جسٹس ریٹائرڈ جاوید اقبال نے منی لانڈرنگ کیس میں شہباز شریف کی اہلیہ اور بیٹیوں کے طلبی نوٹسز منسوخ کردیے۔

چیئرمین جسٹس ریٹائرڈ جاوید اقبال نے نیب  لاہور کا دورہ کیا جہاں ڈی جی نیب لاہور شہزاد سلیم  نے انہیں شریف فیملی کے کیسز کے حوالے سے تفصیلی بریفنگ دی۔

نیب لاہور کے مطابق چیئرمین نیب نے نصرت شہباز، رابعہ عمران اور جویریہ علی کو طلب کرنے کے نوٹسز منسوخ کرتے ہوئے گھر پر سوال نامہ بھجوانے کے احکامات جاری کردیے جو آج ہی شریف فیملی کو بھجوائے جائیں گے۔ جسٹس ریٹائرڈ جاوید اقبال نے شریف فیملی کے تمام کیسز کی براہ راست نگرانی خود کرنے کا فیصلہ بھی کیا۔

اس موقع پر چیرمین نیب نے کہا کہ نیب خواتین کے تقدس، حرمت، عزت اور چار دیواری پر مکمل یقین رکھتا ہے اور احتساب سب کیلئے کی پالیسی پر سختی سے گامزن ہے، نیب کی کسی سیاسی پارٹی سے وابستگی نہیں۔

جاوید اقبال نے کہا کہ نیب خود مختار ادارہ ہے اور دباؤ کو بالائے طاق رکھتے ہوئے قانون اور آئین پاکستان کو مد نظر رکھ کر اپنا کام کرتا ہے، نیب کی نظر میں تمام ملزمان برابر ہیں تاہم تمام میگا کرپشن کیسز کو میرٹ اور صرف میرٹ کی بنیاد پر جلد از جلد منطقی انجام تک پہنچایا جائے گا، نیب کی وابستگی صرف اور صرف ریاست پاکستان سے ہے۔

آئی جی پنجاب امجد جاوید سلیمی کو عہدے سے ہٹا دیا گیا

لاہور: آئی جی پنجاب امجد سلیمی کو عہدے سے ہٹا کر اسٹیبلشمنٹ ڈویژن رپورٹ کرنے کی ہدایت کی گئی ہے۔

پنجاب کے انسپیکٹر جنرل پولیس کو تبدیل کردیا گیا ہے اور موجودہ آئی جی امجد سلیمی کو عہدے سے ہٹا کر پولیس سروس گریڈ 22 کے کیپٹن (ر) عارف نواز کو بحیثیت آئی جی پنجاب تعینات کردیا گیا ہے، عارف نواز سیکرٹری نارکوٹکس ڈویژن تعینات تھے۔

اسٹیبلشمنٹ ڈویژن کی جانب سے کیپٹن (ر) عارف نواز کی بطور آئی جی پنجاب تعیناتی کا نوٹی فکیشن بھی جاری کر دیا گیا ہے، جب کہ  امجد جاوید سلیمی کو اسٹیبلشمنٹ ڈویژن رپورٹ کر نے کی ہدایت کی گئی ہے۔

Google Analytics Alternative