سا ئنس اینڈ ٹیکنالوجی

رئیل می 2 پرو اسمارٹ فون متعارف کرا دیا

رئیل می برانڈ کی جانب سے رئیل می 2 اسمارٹ فون کا نیا ماڈل رئیل می 2 پرو کے نام سے متعارف کرا دیا متعارف کرا دیاہے۔

اسمارٹ فون میں اینڈرائیڈ اوریو آپریٹنگ سسٹم ، 6.3 انچ فل ایچ ڈی پلس ڈسپلے اور اسنیپ ڈریگن 660 اوکٹا کور پروسیسر دیا گیا ہے۔ فون کو 4 جی بی ، 6 جی بی اور 8 جی بی ریم کے ساتھ 64 جی بی اور 128 جی بی اسٹوریج کے آپشنز میں پیش کیا گیا ہے۔ اسٹوریج کو ایس ڈی کارڈ کی مدد سے 256 جی بی تک بڑھایا جا سکتا ہے۔اسمارٹ فون کے کیمرہ سیٹ اپ میں پشت پر 16 میگا پکسل اور 2 میگا پکسل کے دو کیمرے دیے گئے ہیں۔ ان میں فور کے ویڈیو ریکارڈنگ سپورٹ بھی شامل ہے۔ فون کا فرنٹ کیمرہ 16 میگا پکسل کا ہے اور اس میں آرٹیفیشل انٹیلیجنس بیوٹی فیچرز دیے گئے ہیں۔ اسمارٹ فون کی بیٹری 3500 ملی ایمپیئر آورز کی ہے۔4 جی بی ریم اور 64 جی بی اسٹوریج کے ساتھ فون کی قیمت 13 ہزار 990 ہندوستانی روپے ، 6 جی بی ریم اور 64 جی بی اسٹوریج کے ساتھ قیمت 15 ہزار 990 ہندوستانی روپے اور 8 جی بی ریم اور 128 جی بی اسٹوریج کے ساتھ 17 ہزار 990 ہندوستانی روپے ہے۔ اسمارٹ فون کو گیارہ اکتوبر سے فروخت کے لیے پیش کیا جائے گا ۔

فیس بک بانی کا اپنا اکاؤنٹ ہیکرز سے بچ نہیں سکا

جمعے کو فیس بک کی جانب سے اعتراف کیا گیا تھا کہ اس سماجی رابطے کی ویب سائٹ کے 5 کروڑ صارفین اکاﺅنٹ ہیک ہوئے جبکہ مزید 4 کروڑ افراد کے بھی متاثر ہونے کا امکان ہے۔

تاہم اب فیس بک کے لیے زیادہ شرمندگی کی بات یہ بنی ہے کہ اس کے بانی مارک زکربرگ سمیت کمپنی کے 2 اعلیٰ ترین عہدیداران بھی ان متاثرہ افراد میں شامل ہیں جن کے اکاﺅنٹ ہیک ہوئے۔

نیویارک ٹائمز کی رپورٹ کے مطابق ہیکرز کو فیس بک کے بانی مارک زکربرگ،سی او او شیرل سینڈبرگ اور یورپ کے لیے نائب صدر نکولا مینڈیلسن کے اکاﺅنٹس تک بھی رسائی حاصل ہوگئی تھی۔

ابھی تک یہی واضح نہیں کہ یہ سائبر حملہ کس حد تک سنگین تھا، یعنی صارفین کے ذاتی ڈیٹا پر ہیکرز کو کس حد تک رسائی حاصل ہوگئی تاہم فیس بک کے مطابق ابتدائی مرحلے میں ہی سیکیورٹی خامی پر قابو پالیا گیا تھا۔

جمعے کو صحافیوں سے بات کرتے ہوئے مارک زکربرگ کا کہنا تھا کہ حملہ آوروں کو صارفین کے نجی پیغامات یا کسی اکاﺅنٹ سے پوسٹ کرنے کی طاقت مل گئی تھی، مگر ایسی علامات نہیں ملیں جس سے عندیہ ملے کہ انہوں نے ایسا کیا۔

مارک زکربرگ کا کہنا تھا ‘ ہم اب تک نہیں جانتے کہ متاثرہ اکاﺅنٹس میں سے کسی کا غلط استعمال ہوا یا نہیں’۔

اس ہیکنگ حملے پر پرائیویسی تحفظات تو صارفین کی جانب سے سامنے آئے مگر فیس بک کے اعلیٰ عہدیداران کو ہدف بنانا اس کمپنی کے لیے مشکلات مزید بڑھانے کا باعث بنا۔

اگر ہیکرز کو فیس بک یا اس کے عہدیداران کی حساس معلومات تک رسائی مل گئی تو یہ کمپنی کے کافی تباہ کن ثابت ہوگا۔

فیس بک کے مطابق اس سائبر حملے میں اس کا اندرونی نطام متاثر نہیں ہوا مگر یہ واضح نہیں کیا کہ مارک زکربرگ یا سینڈبرگ کے اکاﺅنٹس سے کس قسم کی معلومات لیک ہوسکتی ہیں یا کونسی سروسز ان سے کنکٹ ہیں۔

دوسری جانب فیس بک صارفین کے اکاﺅنٹس ہیکنگ کے حوالے سے فیس بک کے خلاف مقدمہ بھی دائر کردیا گیا ہے۔

کیلیفورنیا اور ورجینیا سے تعلق رکھنے والے صارفین نے فیس بک کے خلاف مقدمات دائر کیے ہیں۔

بل گیٹس نے زندگی میں کامیابی کا راز بتادیا

بل گیٹس اس وقت 90 ارب ڈالرز سے زائد کے مالک ہونے کی وجہ سے دنیا کے دوسرے امیر ترین شخص ہیں اور برسوں نمبرون بھی رہ چکے ہیں، تاہم اگر وہ اچانک کسی وجہ سے غریب ہوجائیں تو دوبارہ کامیابی کے لیے کیا کریں گے؟

تو اس کا جواب بل گیٹس خود دیتے ہوئے کہتے ہیں کہ اگر انہیں دوبارہ زندگی میں کامیابی کے لیے جدوجہد کرنا پڑے تو وہ اپنی سوچ کو بدل کر سماجی حیثیت میں اضافے کی کوشش کرتے۔

مائیکرو سافٹ کے بانی کا کہنا تھا کہ آپ کا طرز فکر زندگی میں کامیابی پر بہت زیادہ اثرانداز ہوتا ہے۔

گزشتہ دنوں ایک ٹی وی شو کے دوران انہوں نے کہا ‘ ہم اکثر بہت زیادہ توجہ اس بات پر مرکوز کرتے ہیں کہ ہم کیا نہیں کرسکے، جس کے نتیجے میں ہم وہ اسباق نظرانداز کردیتے ہیں، جو کہ ہمارے لیے بہت زیادہ کارآمد ثابت ہوسکتے ہیں’۔

آسان الفاظ میں ناکامیوں پر فکرمند ہونے کی بجائے اپنی کامیابیوں سے متاثر ہوکر آگے بڑھیں۔

بل گیٹس کا کہنا تھا کہ وہ عالمی سطح پر لوگوں کی زندگیوں میں بہتری کے لیے اسی حکمت عملی پر عمل کرتے ہیں اور موجودہ حالات میں خرابی کی بجائے اچھی چیزوں کو دیکھتے ہیں، چاہے وہ غربت ہو، سیاست یا امراض۔

ان کا کہنا تھا کہ پرامید ہوکر سوچنے پر وہ دنیا بھر میں حالات کو بہتر ہوتا دیکھ رہے ہیں، جو کہ مایوسانہ سوچ میں ناکامیاں لگتیں۔

انہوں نے مزید کہا ‘ انتہائی غربت کی شرح 1990 سے 2018 میں 36 فیصد سے کم ہوکر 9 فیصد ہوچکی ہے، روزانہ ایک لاکھ 37 ہزار افراد انتہائی غربت سے باہر نکل رہے ہیں، گزشتہ 25 برسوں کے دوران ہم نے بچوں کی اموات کی شرح 50 فیصد تک کم کردی ہے جبکہ زرعی پیداوار کو بڑھایا ہے’۔

بل گیٹس کے مطابق انسان فطری طور پر اچھی چیزوں پر خوش ہونے کی بجائے خرابی پر تشویش زدہ ہوتے ہیں جبکہ مسائل کے حوالے سے ہم بہت بے صبرے ہیں۔

ان کا کہنا تھا کہ کسی کام کو مکمل صلاحیت سے کرنے کا مطلب یہ نہیں کہ سب کچھ پرفیکٹ ہوگا ‘ پرامید ہونے کا مطلب یہ نہیں کہ میں المیے اور ناانصافی کو نظرانداز کردوں’۔

اس کی بجائے یہ سمجھنے کی ضرورت ہوتی ہے کہ کیا کرنا کارآمد ہوگا اور اسے کیسے بہتر بنایا جاسکتا ہے، جس سے زندگی میں کامیابی کا امکان بڑھتا ہے۔

ہواوے نووا 3 آئی 6 جی بی ریم کے ساتھ لانچ

ہواوے کمپنی نے اپنے اسمارٹ فون نووا 3 آئی کا نیا ماڈل 6 جی بی ریم اور 128 جی بی اسٹوریج کے ساتھ متعارف کرا دیا ہے۔

اس سے قبل فون کو 4 جی بی ریم کے ساتھ 128 جی بی اسٹوریج اور 6 جی بی ریم کے ساتھ 64 جی بی اسٹوریج کے آپشنز میں پیش کیا جا چکا ہے۔ اسمارٹ فون میں 6.3 انچ فل ایچ ڈی پلس ڈسپلے ، اینڈرائیڈ اوریو آپریٹنگ سسٹم اور اوکٹا کور ہائی سلیکان کرن 710 پروسیسر دیا گیا ہے۔ فون کے کیمرہ سیٹ اپ میں پشت پر 16 میگا پکسل اور 2 میگا پکسل کے دو کیمرے جبکہ فرنٹ پر 24 میگا پکسل اور 2 میگا پکسل کے دو کیمرے شامل ہیں۔ اسمارٹ فون کی بیٹری 3340 ملی ایمپیئر آورز کی ہے۔ نئے ماڈل کی قیمت 2399 یان ہے اور اسے کالے ، جامنی اور سفید رنگ میں پیش کیا گیا ہے۔

انسٹاگرام لائٹ اور ویب ورژن میں نوٹیفیکیشنزکی سہولت فراہم

انسٹاگرام نے اپنی لائٹ ایپلی کیشن اور ویب ورژن میں نوٹیفیکیشنز کی سہولت فراہم کرنے کا اعلان کر دیا ہے۔اس سے پہلے نوٹیفیکیشن صرف انسٹا گرام کی اسٹینڈرڈ ایپلی کیشن میں موجود تھے۔ اینڈرائڈ پولیس کی رپورٹ کے مطابق موزیلا فائر فاکس ، سفاری اور کروم براؤزر پر انسٹاگرام استعمال کرنے والے صارفین چاہیں تو نوٹیفیکیشنز کو آن کر سکیں گے۔ جس کے بعد انہیں لائک ، کمنٹ اور فالورز کے متعلق نوٹیفیکیشن کے ذریعے آگاہ کیا جائیگا۔ فیچر کو اب انسٹاگرام کی لائٹ ایپلی کیشن کے لیے بھی پیش کر دیا گیا ہے۔

ایسی روبوٹک پرت جو عام سی شے کو روبوٹ میں تبدیل کردے گی

نیو ہیون: سائنس دان ایسی عجیب چیز ایجاد کرنے میں کامیاب ہو گئے ہیں جس سے گھریلو اور بے جان اشیاء کو روبوٹ میں تبدیل کیا جا سکے گا۔

سائنسی جریدے سائنس روبوٹک میں شائع ہونے والے مقالے میں دعویٰ کیا گیا ہے کہ امریکا کی یل یونیورسٹی اور ناسا کے ماہرین ایک ایسی برقیاتی پرت بنانے میں کامیاب ہوگئے ہیں جسے اگر عام سے کھلونے پر بھی چسپاں کردیا جائے تو کھلونا ایک روبوٹ بن جائے گا۔ اسے ’ روبوٹک اسکن‘ کا نام دیا گیا ہے۔

روبوٹک اسکن کو لچکدار شیٹس پر بنایا گیا ہے جس پر سینسرز اور بے جان چیز کو حرکت کرنے میں مدد دینے والے Actuators  کے جوڑے نصب ہیں جنہیں ایک کنٹرولر کی مدد سے چلایا جا سکتا ہے۔ روبوٹک اسکن بے جان اشیاء پر چسپاں ہو کر انہیں پھیلا سکتی ہے، سکیڑ دیتی ہے اور ساکت کر سکتی ہے۔

اس روبوٹک اسکن کو ایک کھلونا گھوڑے کی ٹانگوں پر لگا دیا گیا جس کے بعد وہ بے جان کھلونا چلنے، دوڑنے اور بھاگنے لگتا ہے۔ کامیاب تجربے کے بعد ماہرین اس ٹیکنالوجی سے پہننے والی قمیض بھی بنائیں گے جسے سپاہی اور خلاء نورد استعمال کر سکیں گے۔

اسی طرح سائنس دان اس ٹیکنالوجی کو معذور افراد کو لگا کر ناکارہ اعضاء کو حرکت کرنے کے قابل بنانے پر کام کر رہے ہیں اور جلد یہ ٹیکنالوجی بھی منظر عام پر آئے گی جو طب کی دنیا میں انقلاب ثابت ہو گی۔

ویوو وی 11 اسمارٹ فون متعارف کرا دیا گیا ہے۔

ویوو کمپنی کی جانب سے بھی ویوو وی 11 پرو کے بعد ویوو وی 11 فون بھی متعارف کرا دیا گیا ہے۔

فون میں کمپنی نے 6.3 انچ فل ایچ ڈی پلس سپر ایمولڈ ڈسپلے ، اینڈرائیڈ اوریو آپریٹنگ سسٹم ، میڈیا ٹیک ہیلیو پی 60 پروسیسر ، 6 جی بی ریم اور 64 جی بی اسٹوریج دیا ہے جسے ایس ڈی کارڈ کی مدد سے 256 جی بی تک بڑھایا جا سکتا ہے۔ فون کے کیمرہ سیٹ اپ میں پشت پر ڈوئل کیمرہ دیا گیا ہے جس میں 16 میگا پکسل اور 5 میگا پکسل کے دو سنسر شامل ہیں۔ فرنٹ کیمرہ 25 میگا پکسل کا ہے اور اس میں آرٹیفشل انٹیلیجنس فیچرز بھی دیے گئے ہیں۔ اسمارٹ فون کی بیٹری 3315 ملی ایمپیئر آورز کی ہے اور اسکے ساتھ کوئیک چارجنگ سپورٹ بھی شامل ہے۔ فون میں وائی فائی اور بلیوٹوتھ کنیکٹیویٹی بھی دی گئی ہے۔ سیکیورٹی کے لیے فون کی پشت پر فنگر پرنٹ سنسر بھی شامل ہے۔ اسمارٹ فون کی قیمت 22 ہزار 990 ہندوستانی روپے ہے اور اسے 27 ستمبر سے فروخت کے لیے پیش کیا جائے گا۔

ہیکر مارک زکربرگ کے فیس بک پیج کو لائیو ہیک کرنے کیلئے تیار

تائیوان سے تعلق رکھنے والے ایک ہیکر نے فیس بک کے بانی مارک زکربرگ کا پیج اتوار کو لائیو ہیک کرنے کا دعویٰ کردیا۔

مختلف ٹیکنالوجی کمپنیوں کے سافٹ وئیرز میں خامیاں تلاش کرکے انعام حاصل کرنے والے چینگ چی یوآن کے مطابق وہ مارک زکربرگ کا فیس بک اکاﺅنٹ اتوار کی شام 6 بجے (تائیوان کے وقت کے مطابق) کو ڈیلیٹ کرنے کی لائیو اسٹریم اپنے فیس بک پیج پر چلائے گا۔

تاہم اس حوالے سے مزید تفصیلات بتانے سے گریز کیا۔

24 سالہ ہیکر نے اپنے فیس بک پیج پر تحریر کیا ‘فیس بک کے بانی کے اکاﺅنٹ کو ڈیلیٹ کرنے کی نشریات اتوار کو لائیو نشر ہوگی’۔

دنیا بھر میں ٹیکنالوجی کا شوق رکھنے والے افراد مختلف کمپنیوں کی ویب سائٹس اور سافٹ وئیرز وغیرہ میں خامیاں سامنے لاتے ہیں، جس کے بدلے انہیں انعام دیا جاتا ہے۔

مگر یہ غیرمعمولی ہے کہ کوئی ہیکر ایسا رئیل ٹائم کرکے دکھائے۔

یہ تائیوانی ہیکر اس سے پہلے ایپل اور ٹیسلا وغیرہ پر حملے کا دعوے بھی کرچکا ہے، جس کی آزادانہ تصدیق ممکن نہیں۔

فیس بک میں بھی دیگر کمپنیوں کی طرح سائٹ میں خامیوں کی نشاندہی کے حوالے سے انعامی پروگرام موجود ہے، تاہم کمپنی کی جانب سے تائیوانی ہیکر کے دعویٰ پر کوئی بیان سامنے نہیں آیا۔

چینگ چی یوآن کے مطابق ‘میں پروفیشنل ہیکر نہیں بننا چاہتا اور سب کچھ ہیک کرنا نہیں چاہتا، میں تو بس بیزار ہوکر کوشش کرتا ہوں تاکہ کچھ پیسے کما سکوں’۔

Google Analytics Alternative