کھیل

ایشین ہاکی چیمپیئنز ٹرافی؛ قومی ٹیم کا کیمپ 22 ستمبر سے لاہور میں شروع ہوگا

لاہور: ایشین ہاکی چیمپیئنز ٹرافی کے لیے قومی ٹیم کا کیمپ یوم عاشور کے بعد 22 ستمبر سے لاہور میں لگایا جائے گا۔

ایشیائی ممالک کے درمیان ہاکی کی اس جنگ کے لیے ایشین ہاکی فیڈریشن نے لوگو بھی جاری کردیاہے، ٹورنامنٹ کا آغاز مسقط عمان میں 18 اکتوبر سے ہورہا ہے، سلطان قابوس اسٹیڈیم میں کھیلے جارہے اس ایونٹ کا فائنل 28 اکتوبر کو رکھاگیا ہے۔ ٹورنامنٹ میں پاکستان، دفاعی چیمپیئن بھارت، میزبان عمان، ملائشیا، جنوبی کوریا اور جاپان کی ٹیمیں ایکشن میں ہوں گی۔

گرین شرٹس اپنی مہم کا آغاز 19 اکتوبر کو کوریا کے خلاف میچ سے کریں گے، روایتی حریف پاکستان اور بھارت کا ٹاکرا 20 اکتوبر کو ہوگا، 22 اکتوبر کو قومی ٹیم عمان اور 24 اکتوبر کو جاپان کے خلاف میدان میں اترے گی جب کہ اگلے ہی روز قومی ٹیم اپنا آخری میچ ملائیشیا کے خلاف کھیلے گی۔

قومی ٹیم کے مینجر حسن سردار نے ایکسپریس نیوز سے بات کرتے ہوئے کہا کہ تربیتی کیمپ میں پنالٹی کارنر پر زیادہ فوکس کیاجائے گا، ایشیئن گیمز میں ہمارے کھلاڑی اس شعبے میں توقعات کے مطابق زیادہ اچھا رزلٹ نہیں دے سکے، اب ہم کوشش کریں گے کہ کیمپ میں اپنی خامیوں کو دور کریں اور مسقط میں ٹرافی اپنے نام کریں۔

امام الحق اور نئے فیلڈنگ کوچ نے دبئی میں قومی ٹیم کو جوائن کرلیا

دبئی: قومی ٹیم کے بلے باز امام الحق اور نئے فیلڈنگ کوچ گرانٹ بریڈ برنٹ نے ایشیا کپ کے لیے دبئی میں قومی ٹیم کو جوائن کرلیا۔

امام الحق ویزے میں تاخیر کے باعث قومی ٹیم کے ہمراہ نہیں جاسکے تھے تاہم آج انہوں نے دبئی پہنچ کر ٹیم کو جوائن کرلیا۔

دوسری جانب قومی کرکٹ ٹیم کے نئے فیلڈنگ کوچ گرانٹ بریڈ برنٹ بھی دبئی پہنچ گئے، انہیں پی سی بی نے حال ہی میں فیلڈنگ کوچ کے عہدے پر تعینات کیا ہے۔

ایشیا کپ کے لیے پاکستان ٹیم آج تیاریوں کا آغاز کرے گی اور 16 ستمبر کو ہانگ کانگ کے خلاف میچ سے قبل بھرپور پریکٹس کی جائے گی۔

ایونٹ کا سب سے بڑا ٹاکرا پاکستان اور بھارت کے درمیان 19 ستمبر کو ہوگا۔

قومی فٹبال ٹیم کا بھارت سے ٹاکرا، سرفراز احمد کا نیک خواہشات کا اظہار

 لاہور: قومی کرکٹ ٹیم کے کپتان سرفراز احمد نے ساف کپ سیمی فائنل میں بھارت سے مقابلے سے قبل پاکستان فٹبال ٹیم کیلیے نیک خواہشات کا اظہار کیا ہے۔

ایک وڈیو پیغام میں سرفراز احمد نے کہا کہ ”بھارت کے خلاف سیمی فائنل کیلیے ہماری نیک خواہشات قومی ٹیم کے ساتھ ہیں، ہم سب آپ کیلیے دعا گو ہیں، امید کرتے ہیں کہ ان شاءاللہ ہماری ٹیم اچھا پرفارم کرے گی، سابق کپتان اظہر علی نے بھی قومی ٹیم کیلیے نیک خواہشات کا اظہار کیا ہے۔

واضح رہے کہ پاکستان اور بھارت کی فٹبال ٹیمیں 5 برس بعد آج شام ساف کپ کے سیمی فائنل میں مدمقابل ہوں گی، قومی ٹیم نے 13 برس بعد ساف فٹبال چیمپئن شپ کے سیمی فائنل میں رسائی حاصل کی ہے، دوسرا سیمی فائنل بھی آج شام نیپال اور مالدیپ کی ٹیموں کے درمیان ہوگا۔

راہل اور پانٹ کی سنچریاں رائیگاں، بھارت کو آخری ٹیسٹ میں بھی شکست

لوکیش راہل اور ریشابھ پانٹ کی جرات مندانہ سنچریوں کے باوجود انگلینڈ نے بھارت کو پانچویں ٹیسٹ میچ میں 118 رنز سے شکست دے کر سیریز 1-4 سے فتح اپنے نام کر لی۔

اوول میں کھیلے گئے سیریز کے پانچویں اور آخری ٹیسٹ میچ میں انگلینڈ نے پہلی اننگز میں 332 رنز بنائے جس کے جواب میں بھارتی ٹیم پہلی اننگز میں 292رنز بنا کر آؤٹ ہو گئی۔

انگلینڈ نے 40رنز کی برتری کے بعد آخری ٹیسٹ میچ کھیلنے والے ایلسٹر کک اور کپتان جو روٹ کی سنچریوں کی بدولت دوسری اننگز 423رنز 8 کھلاڑی آؤٹ پر ڈکلیئر کر کے بھارت کو فتح کے لیے 464رنز کا مشکل ہدف دیا۔

تاہم ہدف کے تعاقب میں 2رنز پر 3وکٹیں گنوانے بھارتی ٹیم نے میچ کے چوتھے دن کھیل کے اختتام تک 58رنز بنائے تھے۔

میچ کے آخری دن لوکیش راہل اور اجنکیا راہانے نے پراعتماد انداز میں دن کا آغاز کیا اور اپنی ٹیم کی سنچری مکمل کرائی۔

لیکن 120کے مجموعی اسکور پر معین علی نے 37رنز بنانے والے راہانے کو پویلین لوٹا کر اپنی ٹیم کو اہم کامیابی دلائی جبکہ اگلے ہی اوور میں بین اسٹوکس نے پہلا ٹیسٹ کھیلنے والے ہنوما ویہاڑی کو کھاتا کھولے بغیر ہی رخصت کردیا۔

121رنز پر آدھی ٹیم کے آؤٹ ہونے کے بعد بھارتی ٹیم کی شکست صاف نظر آ رہی تھی لیکن اس موقع پر لوکیش راہل کا ساتھ دینے پانٹ آئے اور دونوں حریف باؤلرز کے خلاف ڈٹ گئے۔

دونوں کھلاڑیوں نے ذمے دارانہ بیٹنگ کا مظاہرہ کرتے ہوئے ناصرف عمدہ شراکت قائم کی بلکہ اس دوران 4 رن فی اوور سے زائد کی اوسط سے اسکور کرتے ہوئے جیت کی امیدوں کو برقرار رکھا۔

اس دوران لوکیش راہل اور ریشابھ پانٹ دونوں نے شاندار بیٹنگ کا مظاہرہ کرتے ہوئے انگلینڈ میں اپنی پہلی پہلی سنچریاں اسکور کیں۔

انگلینڈ کے باؤلرز انتہائی کوشش کے باوجود بھی دن کے درمیانی سیشن میں کوئی وکٹ نہ لے سکے جس کے بعد میچ دن کے آخری سیشن تک جا پہنچا اور میچ ڈرا ہونے کے امکانات روشن جبکہ بھارت شائقین کی میچ میں جیت کی امیدیں ایک مرتبہ پھر زندہ ہو گئیں۔

تاہم چائے کے وقفے کے چند اوورز بعد ہی انگلینڈ کو اس وقت بڑی کامیابی ملی جب عادل راشد کی ایک ناقابل یقین گیند نے راہل کی وکٹیں بکھیر دیں جنہوں نے 20چوکوں اور ایک چھکے کی مدد سے 149رنز کی اننگز کھیلی۔

ریشابھ پانٹ نے ساتھی کھلاڑی کے آؤٹ ہونے کے باوجود صورتحال کی نزاکت کو نہ سمجھتے ہوئے روایتی جارحانہ انداز جاری رکھا اور اسی کوشش میں عادل راشد کے اگلے اوور میں ان کی اننگز بھی تمام ہوئی جو 4 چھکوں اور 15چوکوں کی بدولت 114رنز پر محیط تھی۔

اس کے بعد انگلینڈ کو بھارتی ٹیم کی بساط لپیٹنے میں زیادہ دیر نہ لگی اور پوری بھارتی ٹیم 345رنز بنا کر آؤٹ ہو گئی اور میچ میں 118رنز کی شکست سے دوچار ہوئی۔

سیریز میں سب سے زیادہ 24وکٹیں لینے والے جیمز اینڈرسن نے سیریز کی آخری گیند پر محمد شامی کو آؤٹ کر کے ٹیسٹ کرکٹ میں سب سے زیادہ 464وکٹیں لینے والے فاسٹ باؤلر کا اعزاز اپنے نام کر لیا۔

اس میچ میں فتح کے ساتھ ہی انگلینڈ نے 5 میچوں کی سیریز 1-4 سے اپنے نام کر لی۔

کیریئر کا آخری ٹیسٹ میچ کھیلنے والے ایلسٹر کک کو پہلی اننگز میں 71 اور دوسری اننگز میں 147رنز کی شاندار باریاں کھیلنے پر میچ کا بہترین کھلاڑی قرار دیا گیا۔

انگلینڈ کے سیم کرن اور بھارت کے ویرات کوہلی سیریز کے بہترین کھلاڑی قرار دیے گئے۔

انٹرنیشنل سوکا ورلڈکپ؛ قومی فٹبال ٹیم شرکت کرے گی

لاہور: اسٹریٹ چلڈرن کے بعد اب ایک اور قومی ٹیم کو  فٹبال ورلڈکپ میں شرکت کا موقع مل گیا۔

انٹرنیشنل سوکا ورلڈکپ 23 سے 29 ستمبر تک  پرتگال کے شہر لزبن میں ہورہا ہے جس میں لاہور کے نوجوانوں پر مشتمل پاکستانی ٹیم بھی شرکت کررہی ہے، قومی سوکا ٹیم آفاق احمد کی قیادت میں سکس اے سائیڈ ورلڈ کپ میں شرکت کے لیے 21 ستمبر کو کراچی سے لزبن پرتگال روانہ ہوگی۔

اسکواڈ میں عبدالحنان، سمیر، ظفر خان، زاہد محمود، ولید جمال، حیدر علی، عامر گوندل، سعد علی، عمر جاوید، عالمگیر، کاشف، محمد زوہیب اور زیبیع اللہ وڑائچ شامل ہیں۔ کھلاڑیوں کا کہنا ہے کہ کبھی سوچا بھی نہیں تھا کہ ہمیں بھی ورلڈکپ میں پاکستان کی نمائندگی کرنے کا موقع ملے گا، 2 ماہ سے  کیمپ میں بھرپور تیاری کررہے ہیں اور خواہش ہے کہ فائنل تک رسائی پانے کے بعد ٹرافی کے ساتھ وطن لوٹیں۔ کوچ طارق لطفی نے اس پلیٹ فارم کو ان نوجوان فٹبالرز کے لیے خود کو منوانے کا بہترین موقع قرار دیا اور امید ظاہر کی کہ جس طرح سخت حبس کےموسم میں ان لڑکوں نے محنت کی ہے، اس کو دیکھ کر رزلٹ بھی اچھا آئے گا۔

منی فٹبال ورلڈکپ کے نام سے مشہور اس ایونٹ کے لیے لاہوری نوجوانوں کا انتخاب اس کوالیفائنگ مرحلے میں ہوا ہے جس میں لیزر لیگس کی طرف سے 3 ماہ پہلے ملک کے مختلف شہروں میں میچز کرائے گئے۔ فائنل میں سنسنی خیز مقابلے کے بعد لاہور نے پشاور کو شکست دی اور نیشنل چیمپئن بن کر پرتگال کا ٹکٹ پایا۔

انٹرنیشنل سوکا فیڈریشن کے زیر اہتمام ہونے والے اس ورلڈکپ میں مجموعی طورپر 32 ٹیمیں مدمقابل ہوں گی جن کو 8 گروپ میں تقسیم کیا گیا ہے۔

بورڈ کا اپنے ہی چیف سلیکٹر پر سے اعتبار اٹھ گیا

کراچی: پی سی بی کا اپنے ہی چیف سلیکٹر انضمام الحق پر سے اعتبار اٹھ گیا، مفادات کے ٹکراؤ کا جواز دے کر پی ایس ایل پلیئرز کیٹیگری کمیٹی سے باہر کر دیا۔

پی ایس ایل ڈرافٹ سے قبل کھلاڑیوں کی کیٹیگری کا تعین کیا جاتا ہے، ماضی میں چیف سلیکٹر انضمام الحق یہ فریضہ انجام دیتے تھے،ذرائع کے مطابق اس بار بعض فرنچائزز نے اعتراض اٹھایا کہ چیف سلیکٹر چونکہ لاہور قلندرز کے ٹیلنٹ ہنٹ پروگرام میں شریک رہے، اس سے مفادات کا ٹکراؤ ہوتا ہے ،لہذا ان کو پروسس سے الگ رکھا جائے، پی سی بی نے اس اعتراض کو تسلیم کرتے ہوئے انضمام کو کمیٹی سے باہر کر دیا۔

اس سے واضح ہوگیا کہ حکام نے قومی کرکٹ ٹیم کا انتخاب کرنے والے خود اپنے چیف سلیکٹر کی دیانتداری پر شک کیا، جس سے ان کی ساکھ پر سوال اٹھنے لگے ہیں،اس بار اختیار کردہ طریقہ کار کے تحت فرنچائزز مجوزہ کیٹیگریز لیگ منتظمین کے ساتھ شیئر کریں گے۔

اس کے بعد قومی سلیکٹرز وسیم حیدر اور وجاہت اﷲ واسطی سمیت پی ایس ایل ہیڈ آف پلیئرز ایکویزیشن عمران احمد خان اس کا جائزہ لے کر پی ایس ایل تھری ڈرافٹ میںشرکت کرنے والے کھلاڑیوں کی نئی کیٹیگریز کو حتمی شکل دیں گے، مقامی کھلاڑیوں کی ازسرنو تشکیل دی جانے والی کیٹیگریز کے بعد غیرملکیوں کی حتمی فہرست اور باقی بچ جانے والے دیگر تمام مقامی کرکٹرز کی کیٹیگریز میں سے ٹیموں کا انتخاب ہوگا۔

دلچسپ بات یہ ہے کہ طوفانی رفتار سے ترقی کی منازل طے کرنے والے عمران احمد خان نان کرکٹر ہونے کے باوجود اس کمیٹی میں شامل ہیں،ان کے بارے میں مشہور ہے کہ وہ بعض ٹیموں کیلیے نرم گوشہ رکھتے ہیں۔

واضح رہے کہ پی ایس ایل میں مفادات کے ٹکرائو والی بات کچھ نئی نہیں ہے، قومی کرکٹ ٹیم کے چیف کوچ مکی آرتھر اور بولنگ کوچ اظہر محمود ایک ہی فرنچائزکراچی کنگز سے وابستہ ہیں۔

 

وزیراعظم کا احسان مانی کی سربراہی میں اسپورٹس ٹاسک فورس بنانے کا حکم

 اسلام آباد: وزیراعظم عمران خان نے کھیلوں کی تنظیموں کی کارکردگی جانچنے کے لیے چیئرمین پی سی بی احسان مانی کی سربراہی میں ٹاسک فورس بنانے کا حکم دے دیا۔

وزیر اعظم ہاؤس میں عمران خان کی زیر صدارت وزارت بین الصوبائی رابطہ کا  اجلاس ہوا جس میں وزیر برائے بین الصوبائی رابطہ فہمیدہ مرزا، سیکرٹری آئی پی سی جمیل احمد، چیئرمین پی سی بی احسان مانی اور دیگر افسران شریک ہوئے۔

وزیر اعظم کو وزارت بین الصوبائی رابطہ کے طریقہ کار کے حوالے سے بریفنگ دی گئی، وزیر اعظم نے تعطل کا شکار منصوبوں کا ازسر نو جائزہ لینے کی ہدایت کی، اجلاس میں فیصلہ کیا گیا کہ کارکردگی نہ دکھانے والی فیڈریشنز، ایسوسی ایشنز کے ساتھ آہنی ہاتھوں سے نمٹا جائے گا، کھیلوں کے انفراسٹرکچر اور انتظامی اسٹرکچر میں ترامیم کی جائیں گی۔

وزیراعظم نے پہلے اقدام کے طور پر کھیل کے میدانوں میں اضافہ کرنے کی ہدایت کی، نیشنل انٹرن شپ پروگرام کو فعال اور مضبوط بناتے ہوئے نوجوان گریجوایٹس کیلیے پریکٹیکل ٹریننگ کے مواقع پیدا کئے جائیں گے، وزیر اعظم کو نیشنل پیرالمپک کمیٹی کی کارکردگی پر بھی بریفنگ بھی دی گئی۔

امارات کی کنڈیشنز میں شاداب خان کا کردار اہم ہوگا، انضمام الحق

 لاہور: چیف سلیکٹر انضمام الحق نے کہا ہے کہ متحدہ عرب امارات کی کنڈیشنز میں شاداب خان کا کردار اہم ہوگا۔

لاہور میں ایک یونیورسٹی تقریب کے موقع پر میڈیا سے بات کرتے ہوئے سابق کپتان نے کہا کہ ایشیا کپ کیلیے منتخب اسکواڈ بیٹنگ، بولنگ اور فیلڈنگ تینوں شعبوں میں متوازن ہے، گرین شرٹس پوری تیاری کیساتھ میدان میں اتر رہے ہیں، امید ہے کہ اچھی کارکردگی کا مظاہرہ کریں گے۔

انضمام الحق کا کہنا تھا کہ اس وقت پاکستان ٹیم کی سب سے بڑی قوت ہم آہنگی اور اتحاد کی فضا ہے، یواے ای کی سلو پچز پر سلو بولرز کو صلاحیتیں دکھانے کا موقع ملے گا، قومی اسکواڈ میں 2 اسپنرز شامل ہیں، شاداب خان پاکستان کی فتوحات میں اہم کردار ادا کرسکتے ہیں، اوپنرز فخرزمان اور امام الحق کیساتھ بابر اعظم بھی اچھی فارم میں ہیں،حارث سہیل بھی اچھی کارکردگی کا مظاہرہ کرتے رہے ہیں۔

ایک سوال پر چیف سلیکٹر نے کہا کہ اللہ نہ کرے کہ ایشیا کپ میں کوئی کھلاڑی زخمی ہو، اگر ہوا بھی تو یو اے ای ہمارے لئے ہوم گراﺅنڈ جیسا ہے،”اے“ ٹیم بھی وہاں ایکشن میں ہوگی،متبادل تلاش کرنے میں کوئی مشکل پیش نہیں آئے گی۔

Google Analytics Alternative