کھیل

محمد رضوان نے جنوبی افریقا میں ٹیم کو جوائن کرلیا

وکٹ کیپر محمد رضوان نے جوہانسبرگ میں قومی کرکٹ ٹیم کو جوائن کرلیا۔

ایمرجنگ ٹیم کے کپتان محمد رضوان کولمبو سے جنوبی افریقہ پہنچے ہیں، جب کہ لیگ اسپنر یاسر شاہ 20 دسمبر کو جوہانسبرگ پہنچیں گے۔  قومی کھلاڑیوں نے جنوبی افریقا پہنچ کر طویل مسافت کے بعد ہوٹل میں آرام کو ترجیح دی جب کہ پاکستانی ٹیم  آج  پہلا پریکٹس سیشن کرے گی جس میں فزیکل فٹنس کو بہتر بنانے کے لیے جم ورک کے ساتھ بیٹنگ اوربولنگ کی خامیوں کو دور کرنےپر توجہ دی جائے گی۔

قومی ٹیم اپنے دورے کا آغاز 19 دسمبر کو بنونی میں جنوبی افریقہ انوی ٹیشن الیون کے ساتھ میچ سےکرے گی، 3 ٹیسٹ میچز کی سیریز کا پہلا ٹیسٹ 26 دسمبر کو سنچورین میں کھیلا جائے گا۔ دوسرا ٹیسٹ 3 جنوری کو کیپ ٹاون  میں شیڈول ہے جب کہ تیسرا  اور آخری ٹیسٹ 11 جنوری کو جوہانسبرگ کے وانڈرز اسٹیڈیم میں رکھاگیا ہے۔ قومی ٹیم اپنے دورے میں 5 ون ڈے اور 3 ٹی ٹوئنٹی میچز بھی کھیلےگی۔

مفادات کا تحفظ؛ پی ایس ایل فرنچائزز کا ’’غیراعلانیہ اتحاد‘‘ قائم

کراچی:  پی ایس ایل فرنچائزز نے اپنے مفادات کو تحفظ دینے کیلیے’’غیراعلانیہ اتحاد‘‘ قائم کرلیا جب کہ ایک اونرکومختار نامہ دے کر اپنی جانب سے فیصلوں کا اختیار سونپ دیا گیا ہے۔

پی ایس ایل فرنچائززکے درمیان کئی معاملات پراختلافات پائے جاتے ہیں، بعض کو بھاری سرمایہ کاری کے باوجود کم قیمت پر فروخت ہونے والی ٹیموں کے برابر منافع ملنے پر بھی اعتراض ہے،اس کے باوجود اب انھوں نے اپنا ایک ’’غیراعلانیہ اتحاد‘‘ قائم کر لیا،اس کا مقصد باہمی مفادات کا تحفظ ہے۔

ذرائع نے بتایا کہ گزشتہ دنوں اسلام آباد میں منعقدہ گورننگ کونسل میٹنگ کے بعد فرنچائز اونرز  نے الگ سے ملاقات کی، اس موقع پر سب نے مل کر ایک مختار نامے پر دستخط کیے، جس کے تحت ایک فرنچائز اونر کو دیگر  کی جانب سے بھی فیصلوں کا حق دے دیا گیا، وہ کسی کے خلاف قانونی کارروائی سمیت سب کچھ کر  سکتے ہیں۔ صرف ایک فرنچائز اونر نے مذکورہ ’’پاورآف اٹارنی‘‘پر دستخط سے گریز کیا۔

دوسری جانب ذرائع نے مزید بتایا کہ پی سی بی اور خود فرنچائززکی جانب سے بھرپور کوشش کے باوجود اب تک حکومت کی جانب سے  ٹیکس میں چھوٹ کی یقین دہانی نہیں کرائی گئی ہے،اس حوالے سے اب عدالت سے رجوع کرنے پر غور بھی جاری ہے، ٹیکس میں چھوٹ ملنے کی آس پر بعض ٹیموں نے اب تک فیس جمع نہیں کرائی، انھوں نے حکام سے کہا تھا کہ بغیر ٹیکس کے فیس لے لی جائے مگر یہ درخواست قبول نہیں کی گئی۔

چند روز قبل بورڈ نے فرنچائزز کومزید 10روزکا وقت دیا تھا،آئندہ ہفتے یہ مدت مکمل ہونے پر بینک گارنٹی کیش کرا لی جائے گی، البتہ حکام کو امید ہے کہ ایسی نوبت نہیں آئے گی۔

واضح رہے کہ پی ایس ایل فور میں اب 2 ماہ سے بھی کم وقت باقی رہ گیا ہے۔

پی سی بی نے پی ایس ایل فور کے شیڈول کا اعلان کردیا

لاہور: پاکستان کرکٹ بورڈ نے پی ایس ایل فور کے لیے شیڈول کا اعلان کردیا۔

پاکستان سپر لیگ کے چوتھے ایڈیشن میں مجموعی طور پر 8 میچز پاکستان میں کھیلے جائیں گے، 14 فروری کو دبئی میں ایونٹ کی افتتاحی تقریب کے ساتھ دفاعی چیمپئن اسلام آباد اور لاہور قلندرز کی ٹیمیں ایکشن میں دکھائی دیں گے۔ پروگرام کے مطابق دبئی ، شارجہ کے ساتھ ابوظہبی بھی اس بار پی ایس ایل میچز کی میزبانی کرے گا۔

لاہور میں 3 اور فائنل سمیت کراچی میں 5 میچز کھیلیں جائیں گے، لاہور میں 9، 10 اور 12 مارچ کو میچز قذافی اسٹیڈیم میں ہوں گے۔ کراچی میں 07 ، 10 ، 12 ، 15 مارچ کو میچز رکھے گئے ہیں جب کہ فائنل 17 مارچ کو کراچی میں ہی کھیلا جائے گا۔

پاکستان کو 2020 ایشیا کپ کی میزبانی مل گئی

ایمرجنگ ایشیا کپ کی میزبانی کے بعد پاکستان کرکٹ کو ایک اور بڑی کامیابی مل گئی اور پاکستان 2020 کے ٹی20 ایشیا کپ کی میزبانی کرے گا۔

2020 کا ٹی20 ایشیا کپ ماہ ستمبر میں کھیلا جائے گا لیکن ابھی تک ایونٹ کے مقام کا فیصلہ نہیں کہ آیا اس کا انعقاد پاکستان میں ہو گا یا پاکستان اپنے مستقل ہوم گراؤنڈ متحدہ عرب امارات میں ایشین ٹیموں کی مہمان نوازی کرے گا۔

مارچ 2009 میں سری لنکن ٹیم پر دہشت گرد حملے کے بعد یہ پہلا موقع ہے کہ پاکستان کو سینئر ٹیم کے کسی انٹرنیشنل ٹورنامنٹ کی میزبانی ملی ہے۔

ایشیا کپ کا انعقاد ہر دو سال بعد ہوتا ہے اور 2020 میں شیڈول مینز ٹی20 ورلڈ کپ کو مدنظر رکھتے ہوئے اس سال ایشیا کپ بھی 20اوورز کے فارمیٹ کے تحت کھیلا جائے گا۔

ایونٹ کے مقام کا فیصلہ تاحال نہیں ہو سکا لیکن غیرملکی ٹیموں کی پاکستان آنے میں ہچکچاہٹ اور پاک بھارت تعلقات کے سبب ممکنہ طور پر پاکستان ایونٹ کی میزبانی متحدہ عرب امارات میں کر سکتا ہے۔

پاکستان اور بھارت کے درمیان کشیدہ تعلقات کے سبب ہی رواں سال ہونے والا ایشیا بھارت میں منعقد نہیں ہو سکا تھا اور بھارت نے اس ایونٹ کی میزبانی متحدہ عرب امارات میں کی تھی۔

ایشیا کپ ٹی20 ستمبر 2020 میں کھیلا جائے گا جس کے ایک ماہ بعد آسٹریلیا میں مینز ٹی20 ورلڈ کپ کا انعقاد ہو گا۔

ایشیا کپ گزشتہ کچھ عرصے سے دو فارمیٹس ون ڈے اور ٹی20 کے تحت کھیلا جا رہا ہے اور جس سال ٹی20 ورلڈ کپ شیڈول ہوتا ہے، اس سال ایونٹ کو ٹی20 فارمیٹ کے تحت کھیلا جاتا ہے لیکن پھر دوسرا ایڈیشن 50اوورز کے فارمیٹ کے تحت منعقد ہوتا ہے۔

پاکستان ٹیم جنوبی افریقہ کیلئے روانہ، کپتان اچھی کارکردگی کیلئے پُر عزم

پاکستان کرکٹ ٹیم دورہ جنوبی افریقہ کے لیے روانہ ہو گئی جو متحدہ عرب امارات (یو اے ای) سے ہوتی ہوئی جوہانسبرگ پہنچے گی، کپتان سرفراز احمد اچھی کارکردگی کے لیے پُر عزم ہیں۔

کراچی کے جناح انٹرنیشنل ایئرپورٹ سے قومی ٹیم کے کپتان سرفراز احمد، مڈل آرڈر بیٹسمین اسد شفیق اور اوپننگ بلے باز شان مسعود یو اے ای کے لیے روانہ ہوئے۔

امام الحق، بابر اعظم، حارث سہیل، اظہر علی سمیت دیگر کھلاڑی لاہور کے علامہ اقبال انٹرنینشل ایئرپورٹ سے روانہ ہوئے۔

جنوبی افریقہ سے ہی تعلق رکھنے والے پاکستان ٹیم کے ہیڈ کوچ مکی آرتھر پہلے ہی اپنے ملک میں موجود ہیں جبکہ دیگر ٹیم آفیشلز بشمول بیٹنگ کوچ گرانٹ فلاور اور باؤلنگ کوچ اظہر محمود بھی ٹیم کے ہمراہ روانہ ہوئے۔

جنوبی افریقہ روانگی سے قبل کپتان سرفراز احمد نے افریقہ میں بہترین کارکردگی دکھانے کے عزم کا اظہار کیا۔

ان کا کہنا تھا کہ ٹیم نے ماضی کی غلطیوں سے سیکھا ہے، تاہم نئی سوچ لے کر جنوبی افریقہ جارہے ہیں اور ماضی کو بھول کر پوری توجہ اس دورے پر ہوگی۔

انہوں نے کہا کہ جنوبی افریقہ کی وکٹیں باؤلرز کے لیے ساز گار ہوتی ہیں اور یہاں فاسٹ باؤلرز کا کردار ہی اہم ہوتا ہے۔

ریکارڈ ساز لیگ اسپنر یاسر شاہ اپنی ذاتی مصرفیات کی وجہ سے جنوبی افریقہ روانہ نہیں ہوئے، وہ کچھ روز بعد جوہانسبرگ جائیں گے۔

پاکستان اور جنوبی افریقہ کے درمیان 3 ٹیسٹ میچوں کی سیریز کا پہلا میچ 26 دسمبر کو شروع ہوگا، دوسرا ٹیسٹ 3 جنوری 2019 اور تیسرا ٹیسٹ 11 جنوری سے شروع ہوگا۔

ٹیسٹ سیریز کے بعد دونوں ٹیموں کے درمیان 5 ون ڈے کی سیریز کھیلی جائے گی جس کا پہلا میچ 19 جنوری کو پورٹ الیزبتھ، دوسرا 22 جنوری کو ڈربن، تیسرا 25 جنوری کو سنچورین، چوتھا 27 جنوری کو جوہانسبرگ اور پانچواں 30 جنوری کو کیپ ٹاؤن میں کھیلا جائے گا۔

پاکستان ٹیم مہمان ٹیم کے خلاف اس طویل دورے میں 3 ٹی ٹوئنٹی میچز بھی کھیلے گی جس کا پہلا میچ یکم فروری کو کیپ ٹاؤن، دوسرا 3 فروری کو جوہانسبرگ اور تیسرا سنچورین میں 6 فروری کو کھیلا جائے گا۔

ہاکی ورلڈ کپ: ہالینڈ نے بھارت کی چھٹی کرا دی

بھونیشور: ہاکی ورلڈ کپ کے کوارٹر فائنل میں ہالینڈ نے میزبان بھارت کو شکست دیکر ٹورنامنٹ سے باہر کر دیا۔

بھارت کے شہر بھونیشور میں کھیلے گئے کوارٹر فائنل میں نیدرلینڈ نے بھارت کو دو کے مقابلے میں ایک گول سے شکست دی۔

ڈچ ٹیم سے شکست کے بعد بھارتی کھلاڑی افسردہ کھڑے ہیں۔ فوٹو: آئی ایچ ایف

ہالینڈ نے بھارت کو شکست دیکر سیمی فائنل کے لیے کوالیفائی کر لیا ہے جہاں اس کا مقابلہ آسٹریلیا سے ہو گا۔

باہمی سیریز زر تلافی کیس؛ بھارت نے پاکستان سے 15 کروڑ روپے مانگ لیے

دبئی: باہمی سیریز کے معاہدے پر عمل درآمد نہ ہونے کے باعث زر تلافی پانے کے چکر میں پاکستان کو مزید زر سے ہاتھ دھونے پڑ سکتے ہیں۔

پاکستان آئی سی سی ڈسپیوٹ ریزولوشن کمیٹی میں باہمی سیریز معاہدے پر عمل درآمد نہ ہونے کے باعث زر تلافی لینے کی درخواست ہار گیا تھا۔ جس کے بعد اب بھارت نے پی سی بی سے قانونی اخراجات کی مد میں 15 کروڑ روپے مانگ لیے ہیں۔ اس سلسلے میں بھارتی کرکٹ بورڈ نے  آئی سی سی کی  ڈیسپیوٹ ریزولیشن کمیٹی کو خط بھی لکھ دیا ہے۔

خط کے متن میں کہا گیا ہے کہ پاک بھارت کرکٹ تنازع پر ہمارے 15 کروڑ روپے خرچ ہوئے لہذا کیس ہارنے پر ہمارے قانونی اخراجات اب پاکستان کرکٹ بورڈ پورے کرے۔

واضح رہے کہ پاکستان نے باہمی سیریز کھیلنے کا معاہدہ پورا نہ کرنے پر بھارت کیخلاف 63 ملین ڈالر کا مقدمہ کیا تھا جس میں فیصلہ پی سی بی کے خلاف آیا تھا۔

کمبلے کو بھارتی ٹیم کی کوچنگ سے ہٹانے میں کوہلی کا ہاتھ ثابت

نئی دلی: انیل کمبلے کو بھارتی کرکٹ ٹیم کی کوچنگ سے ہٹانے میں کپتان ویرات کوہلی کا ہاتھ ثابت ہوگیا

ایک بی سی سی آئی آفیشل کی جانب سے سپریم کورٹ کی مقرر کردہ کمیٹی آف ایڈمنسٹریٹرز کے سربراہ ونود رائے کو بھیجی گئی ای میل افشا ہوئی ہے، جس میں ان کا کہنا تھا کہ ویرات کوہلی چیف ایگزیکٹیو آفیسر کو باربار ایس ایم ایس بھیج کر کوچ کو تبدیل کرنے کا مطالبہ کررہے ہیں۔

Google Analytics Alternative