کھیل

10ہزار رنز اور 500 وکٹیں؛ شکیب الحسن دنیا کے تیسرے آل راؤنڈر بن گئے

ڈھاکا:  بنگلادیشی اسٹار آل راؤنڈر شکیب الحسن نے انٹرنیشنل کرکٹ میں کیریئر کی 500 وکٹیں مکمل کرلیں۔

شکیب الحسن ٹیسٹ، ون ڈے اور ٹی ٹوئنٹی تینوں فارمیٹس میں 10ہزار سے زائد رنز اور 500 یا زائد وکٹیں لینے والے دنیا کے تیسرے آل راؤنڈر بن گئے ہیں، انھوں نے افغانستان کے خلاف تیسرے اور آخری ٹی ٹوئنٹی میچ میں ایک وکٹ لے کرانٹرنیشنل کرکٹ میں کیریئر کی 500 وکٹیں مکمل کرکے یہ اعزاز حاصل کیا، انھوں نے مجموعی طور پر 302 میچز کھیل کر کیریئر کی 500 وکٹیں مکمل کیں۔

آل راؤنڈر نے ٹیسٹ میچز میں 188، ون ڈے میں 235 جبکہ ٹی ٹوئنٹی میں 77 وکٹیں حاصل کر رکھی ہیں، انھوں نے تینوں فارمیٹس میں 500 وکٹیں اور 10ہزار سے زائد رنز بنا رکھے ہیں۔

اس سے قبل سابق پاکستانی آل راؤنڈر شاہد خان آفریدی اور جنوبی افریقہ کے جیک کیلس بھی یہ کارنامہ انجام دے چکے ہیں، کیلس نے تینوں فارمیٹس میں 25534 رنز اور577 وکٹیں لی ہیں جبکہ شاہد آفریدی نے 11196رنز اور541 وکٹیں حاصل کی ہیں۔

چیف سلیکٹر انضمام نے نوجوان ٹیم پر تنقید کو مسترد کردیا

قومی ٹیم کے چیف سلیکٹر انضمام الحق نے انگلینڈ کے خلاف ٹیسٹ سیریز برابر کرنے والی نوجوان پاکستانی ٹیم پر تنقید کو مسترد کرتے ہوئے کہا ہے کہ نوجوان کھلاڑیوں میں ورلڈ کلاس کرکٹر بننے کی پوری صلاحیت موجود ہے۔

پاکستان نے دورہ آئرلینڈ اور انگلینڈ کے دوران آئرلینڈ کو اس کی تاریخ کے پہلے ٹیسٹ میچ میں شکست دینے کے بعد انگلینڈ کے خلاف لارڈز میں بھی شاندار کھیل پیش کرتے ہوئے 9وکٹوں سے فتح سمیٹی تھی۔

تاہم ہیڈنگلے میں ہونے والے دوسرے ٹیسٹ میچ میں قومی ٹیم کی کارکردگی یکسر مختلف رہی اور بدتر بیٹنگ پرفارمنس کے سبب اننگز اور 55رنز سے ناکامی کا منہ دیکھنا پڑا۔

ٹیم کی دوسرے ٹیسٹ میں بدترین بیٹنگ خصوصاً سینئر بلے بازوں اور کپتان کی غیرذمے دارانہ کارکردگی پر ٹیم کو بدترین کارکردگی کا نشانہ بنایا گیا تاہم چیف سلیکٹر انضمام الحق قومی ٹیم کی کارکردگی سے مطمئن نظر آتے ہیں۔

انہوں نے کہا کہ اس سیریز سے یہ بات ثابت ہو گئی کہ ہماری نوجوان ٹیم میں بہت صلاحیت ہے اور اگر ہم ان پر اعتماد کرتے ہوئے مسلسل مواقع دیں اور انہیں لمبے عرصے تک کھلائیں تو ایک سے دو سال میں ٹیم کی بالکل مختلف شکل نظر آئے گی اور ان کھلاڑیوں میں ورلڈ کلاس کرکٹر بننے کی پوری صلاحیت موجود ہے۔

اپنے بھتیجے اور نوجوان امام الحق کے حوالے سے سوال پر انضمام نے کہا کہ ایک نوجوان کے طور پر اس نے ٹیمپرامنٹ دکھایا ہے اور آگے چل کر امید ہے کہ وہ مزید بہتر کارکردگی کا مظاہرہ کرے گا۔

چیف سلیکٹر نے سیریز میں اظہر علی اور اسد شفیق کی ناقص بیٹنگ کا دفاع کرتے ہوئے کہا کہ دباؤ آنے سے بعض اوقات آپ توقعات کے مطابق اس سطح پر کارکردگی نہیں دکھا پاتے لیکن اظہر نے گزشتہ سیزن میں سب سے زیادہ رنز کیے تھے جبکہ اسد شفیق نے بھی گزشتہ سیزن میں شاندار کھیل پیش کیا تھا اور بعض سیریز اچھی نہیں جاتیں لیکن آئندہ سیریز میں ہمیں ان دونوں کھلاڑیوں سے توقعات وابستہ ہیں۔

انہوں نے کپتان سرفراز احمد کا بھی دفاع کرتے ہوئے کہا کہ کپتان پر بہت زیادہ دباؤ ہوتا ہے جس کی وجہ سے وہ اپنی انفرادی کارکردگی پر توجہ نہیں دے پاتا اور میرے خیال میں سرفراز جس معیار کا کھلاڑی ہے اسے بہتر کارکردگی دکھانی چاہیے اور امید ہے کہ وہ آنے والے میچوں میں اچھی کارکردگی دکھانے میں کامیاب رہیں گے۔

قومی ٹیم اب 12 اور 13 جون کو ایڈن برگ میں اسکاٹ لینڈ کے خلاف دو ٹی20 میچز کھیلے گی۔

ٹی ٹوئنٹی بیٹنگ رینکنگ؛ بابراعظم نمبر ون بیٹسمین برقرار

آئی سی سی کی جانب سے جارہ کردہ نئی ٹی ٹوئنٹی رینکنگ میں ٹاپ 9 بولرز میں اسپنرز شامل ہیں جب کہ بیٹسمینوں کی فہرست میں قومی ٹیم کے بلے باز بابر اعظم سرفہرست ہیں۔ 

انٹر نیشنل کرکٹ کونسل (آئی سی سی) کی نئی ٹی ٹوئنٹی رینکنگ جاری کردی، نئی رینکنگ میں بنگلا دیش اور افغانستان کے مابین ٹی ٹوئنٹی سیریز کے بعد نئی ٹی ٹوئنٹی ٹیم رینکنگ میں پاکستان ٹیم بدستور نمبر ون ہے جب کہ بنگلا دیش کے خلاف کلین سوئپ کے بعد افغانستان ٹیم کو 4 پوائنٹس ملے ہیں تاہم وہ 8 ویں پوزیشن پر ہی موجود ہے، بنگلا دیشی ٹیم کو 5 پوائنٹس کی کمی کا سامنا کرنا پڑا ہے اور اب ان کا 11 ویں نمبر پر موجود اسکاٹ لینڈ سے صرف 4 پوائنٹس کا فرق رہ گیا ہے۔

بولنگ رینکنگ میں بولرز کی ٹاپ 9 پوزیشنز پر اسپنرز کا قبضہ برقرار ہے، افغان اسپنر راشد خان نے بنگلا دیش کے خلاف مین آف دی سیریز ایوارڈ لینے کے بعد ٹاپ پوزیشن مزید مستحکم کر لی ہے جب کہ پاکستان کے شاداب خان دوسرے نمبر پر موجود ہیں۔ محمد نبی 11 درجے کی چھلانگ کے ساتھ کیریئر میں پہلی مرتبہ 8 ویں جب کہ مجیب زدران 51 ویں نمبر پر آ گئے ہیں۔ فہرست میں عماد وسیم نے نویں پوزیشن سنبھالے رکھی، محمد عامر 13ویں درجے پر ہیں۔

بیٹسمینوں کی فہرست میں پاکستان کے بابر اعظم بیٹنگ میں بدستور نمبر ون ہیں، کولن منرو دوسرے، گلین میکسویل تیسرے، آرون فنچ چوتھے اور ایون لوئس ایک درجے بہتری ملنے پر پانچویں نمبر پر آگئے ہیں۔ افغان سمیع اللہ شنواری ترقی کرتے ہوئے 44 ویں، بنگلا دیشی محمود اللہ 33 ویں اور مشفیق الرحیم 41 ویں نمبر پر پہنچ گئے ہیں۔

افغانستان کا کلین سوئپ، بنگلادیش کو تیسرے ٹی ٹوئنٹی میں بھی شکست

افغانستان نے سنسنی خیز مقابلے کے بعد بنگلادیش کو تیسرے ٹی ٹوئنٹی میچ میں ایک رنز سے شکست دے دی جس کے بعد سیریز بھی 0-3 سے اپنے نام کرلی۔

افغانستان نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 145 رنز بنائے جس کے جواب میں بنگال ٹائیگرز 6 وکٹوں پر 144 رنز بناسکے۔

افغانستان کی جانب سے نپی تلی بولنگ کرائی گئی اور جلد بازی کا مظاہرہ کرتے ہوئے تین بنگلادیشی بلے باز رنز آؤٹ ہوئے۔

بلیو کیپس کے مجیب الرحمان، کریم جنت اور راشد خان نے ایک ایک وکٹ حاصل کی۔

بنگلادیش کے اوپننگ بلے باز لٹن داس 12 اور تمیم اقبال 5 رنز بناکر آؤٹ ہوئے جس کے بعد نئے آنے والے بلے باز سومیا سرکار بھی 15 رنز بنا کر رنز آؤٹ ہوئے۔

بنگال ٹائیگرز کی جانب سے مشفق الرحیم 46 اور محمد اللہ 45 رنز کے ساتھ نمایاں رہے۔

اس سے قبل افغانستان نے پہلے بیٹنگ کرتے ہوئے 6 وکٹوں پر 145 رنز بنائے جس میں محمد شہزاد کے 26 رنز اور سمیع اللہ شنواری کی ناقابل شکست 33 رنز کی اننگز نمایاں ہے۔

دیگر افغان بلے بازوں میں عثمان غنی 19، اصغر استنکزئی 27، محمد نبی 3، نجیب زدران 15اور شفیق اللہ 4 رنز بنا کر آؤٹ ہوئے۔

میچ میں بہترین کارکردگی پیش کرنے پر راشد خان کو مین آف دی میچ کے اعزاز سے نوازا گیا جب کہ بنگلادیش کے مشفق الرحیم سیریز کے بہترین کھلاڑی قرار پائے۔

فٹبال ورلڈکپ سے قبل کرپشن کا بڑا اسکینڈل سامنے آگیا

لندن: فٹبال ورلڈکپ کے آغاز سے پہلے دنیا کے مقبول ترین کھیل میں بھی کرپشن اسکینڈل سامنے آگیا۔

فٹ بال کے کھیل  میں بھی ایک بڑے اسٹنگ آپریشن نے کئی چہروں کو بے نقاب کردیا، اسٹنگ آپریشن کی ویڈیو میں افریقن فٹبال کے ریفری اور حکام کو میچز سے پہلے ڈالرز اور تحائف لیتے دیکھا جاسکتا ہے، ان میں ایک ریفری ایسا بھی شامل ہے جس نے ورلڈکپ میں بھی ذمہ داری نبھانی تھی۔

ویڈیو میں مکالمہ سنا جاسکتا ہے جس میں کرپٹ ریفری نے کہا کہ تحفہ دینے کا شکریہ، اس سے بھی زیادہ اہم آپ سے دوستی ہونا ہے۔ اسٹنگ آپریشن نے افریقن فٹبال کے مستقبل پر سوالیہ نشان لگادیا ہے۔ افریقن فٹبال حکام نے چند روز بعد 2026 کی میزبانی کے لیے اپنا ووٹ بھی کاسٹ کرناہے۔

قومی کرکٹ ٹیم کی اسکاٹ لینڈ کے خلاف ٹی ٹوئنٹی میچز سے قبل پریکٹس

 لاہور: پاکستان کرکٹ ٹیم نے اسکاٹ لینڈ کے خلاف ٹی ٹوئنٹی میچز سے قبل پریکٹس کا آغاز کر دیا۔

پاکستان کرکٹ ٹیم نے اسکاٹ لینڈ کے خلاف ٹی ٹوئنٹی میچز سے قبل پریکٹس کا آغاز کر دیا، مارچسٹن کیسل اسکول ایڈنبرا میں کھلاڑیوں نے بھرپور پریکٹس سیشن میں حصہ لیا جس میں فٹنس پر خصوصی توجہ دی گئی۔

واضح رہے کہ پاکستان اور اسکاٹ لینڈ کے مابین 2 میچوں پر مشتمل ٹی ٹوئنٹی سیریز کا پہلا میچ 12 جون جب کہ دوسرا میچ 13 جون کو ایڈنبرا میں کھیلا جائے گا، احمد شہزاد، حسین طلعت، آصف علی، محمد نواز، شاہین آفریدی اور شعیب ملک بھی قومی اسکواڈ کو جوائن کر چکے ہیں۔

مائیک ہیسن نیوزی لینڈ کی کوچنگ سے مستعفی

ویلنگٹن: کرکٹ ورلڈ کپ کے آغاز میں اب ایک سال سے بھی کم کا عرصہ رہ گیا ہے اور ایسے موقع پر نیوزی لینڈ کی ٹیم کے مایہ ناز کرکٹ ہیڈ کوچ مائیک ہیسن اپنے عہدے سے مستعفی ہو گئے ہیں۔

مائیک ہیسن نے جمعرات کو اپنے عہدے سے مستعفی ہونے کا اعلان کرتے ہوئے کہا کہ وہ انٹرنیشنل کرکٹ کے مطالبات اور سخت شیڈول سے اپنی نجی زندگی متاثر ہوئی ہے لہٰذا وہ اب اپنی بیوی اور دو بیٹیوں کے ساتھ وقت گزارنا چاہتے ہیں۔

مائیک ہیسن نے 20 جولائی 2012 میں کیویز ٹیم کی کوچنگ شروع کی اور تقریباً 6سال بعد 7 جون 2018 کو اپنے عہدے کو خیر باد کہہ دیا۔ چھ سال تک ہیسن کی کوچنگ کے دوران نیوزی لینڈ کی ٹیم تاریخ میں پہلی مرتبہ ورلڈ کپ کے فائنل تک پہنچنے میں کامیاب ہوئی۔

ان کی کوچنگ نیوزی لینڈ نے کرکٹ میں نئی بلندیوں کو چھوا خصوصاً سابق کپتان برینڈ میک کولم کے ساتھ ان کی جوڑی بہت کامیاب رہی اور دونوں نے مل کر ٹیم کو جارحانہ طرز کرکٹ کی ڈگر پر گامزن کر کے کامیابیوں سے ہمکنار کرایا۔

مائیک ہیسن کی کوچنگ کے دوران کیویز ٹیم نے 21 ٹیسٹ جیتے اور 21 میں ہی اس کو ناکامی کا سامنا کرنا پڑا جبکہ 65 ایک روزہ بین الاقوامی میچز میں نیوزی لینڈ کی ٹیم فاتح رہی اور 46 میچوں میں اس کو شکست کا منہ دیکھنا پڑا۔

اس کے علاوہ نیوزی لینڈ کی ٹیم نے مائیک ہیسن کی کوچنگ میں 56 ٹونٹی میچوں میں سے 30 میں کامیابی حاصل کی جبکہ 26 میں ناکام رہی۔

ویمنز ایشیا کپ میں پاکستان کی 147رنز سے فتح

کوالالمپور: ندا ڈار اور کپتان بسمہ معروف کی عمدہ کارکردگی کی بدولت پاکستان نے ویمنز ٹی20 ایشیا کپ ٹورنامنٹ میں ملائیشیا کو یکطرفہ مقابلے کے بعد 147 رنز سے ہرا کر تیسری کامیابی حاصل کر لی۔

جمعرات کو کھیلے گئے میچ میں پاکستان ویمنز ٹیم نے پہلے کھیلتے ہوئے مقررہ اوورز میں 5 وکٹوں کے نقصان پر 177 رنز بنائے۔

کپتان بسمہ معروف نے عمدہ بلے بازی کا مظاہرہ کرتے ہوئے 62 رنز کی دلکش اننگز کھیلی، ندا ڈار 41، جویریہ خان 31، جویریہ راؤف 13 اور ناہیدہ خان ایک رن بنا کر آؤٹ ہوئیں جبکہ ثنا میر 14 اور نین عابدی 9 رنز بنا کر ناٹ آؤٹ رہیں۔

جواب میں ملائیشین ٹیم مطلوبہ ہدف کے تعاقب میں 18.4 اوورز میں صرف 30 رنز پر ڈھیر ہو گئی اور صرف ایک کھلاڑی دوہرا ہندسہ عبور کر سکی۔

پاکستان کی جانب سے ندا ڈار نے 5 رنز دے کر 4 کھلاڑیوں کو پویلین کی راہ دکھائی، ثنا، نشرہ اور جویریہ خان نے ایک، ایک کھلاڑی کو آؤٹ کیا۔ ندا ڈار ٹیم کی جیت میں اہم کردار ادا کرنے پر میچ کی بہترین کھلاڑی قرار پائیں۔

دوسری جانب بھارت ویمنز ٹیم نے سری لنکا کو 7 وکٹوں سے شکست دے کر تیسری کامیابی سمیٹی جبکہ بنگلہ دیشی ویمنز ٹیم نے تھائی لینڈ کو 9 وکٹوں سے زیر کیا۔

Google Analytics Alternative