کھیل

ساف فٹبال؛ بلند عزائم لیے قومی ٹیم بنگلہ دیش پہنچ گئی

لاہور: قومی فٹبال ٹیم کے کپتان صدام حسین ساف کپ میں شاندار کارکردگی دکھانے کیلیے پرعزم ہیں۔

ساف کپ میں شرکت کیلیے قومی اسکواڈ ہفتے کو بنگلہ دیش پہنچ گئی، برازیل سے تعلق رکھنے والے ہیڈ کوچ جوز انتونیو ناگورا، ٹرینر جوز پورٹیلا و دیگر معاون اسٹاف کے ہمراہ لاہور سے اڑان بھرنے والے اسکواڈ کے کپتان صدام حسین نے روانگی سے قبل گفتگو کرتے ہوئے کہا کہ کھلاڑیوں کے حوصلے بلند اور ایونٹ میں شاندار کارکردگی دکھانا کیلیے پر عزم ہیں، پاکستان فٹبال کی تاریخ میں پہلی بار پلیئرز کو بہترین غیر ملکی ٹرینرز کی رہنمائی میسر آئی ہے، تربیتی کیمپ میں مسلسل محنت کے نتیجے میں کھلاڑیوں کی جسمانی اور ذہنی استعداد میں نمایاں بہتری آچکی ہے، اسٹمینا بہتر ہوجانے کی وجہ سے پورے میچ میں یکساں معیار کا کھیل پیش کرنے کی صلاحیت حاصل کرچکے ہیں، ساف کپ میں نہ صرف اچھی کارکردگی پیش کرنے بلکہ ٹائٹل اپنے نام کرنے کیلیے پر عزم ہیں۔

پی ایف ایف کے مطابق صدام حسین سوئی سدرن گیس کمپنی کی ٹیم کے اسٹار کھلاڑی ہیں، ان کو رواں سیزن کیلیے کپتان مقرر کیا گیا ہے، اس فیصلے کا مقصد قومی ٹیم کی پالیسیوں میں تسلسل اور کپتان کو احساس تحفظ دیتے ہوئے اعتماد کی دولت سے مالا مال کرنا ہے۔

ہیڈ کوچ ناگورا نے کہا کہ صدام حسین اس وقت بہترین فارم میں ہیں، ان کی کھیل سے لگن، جذبے اور مہارت کو دیکھتے ہوئے کپتان بنایا گیا ہے، اسٹار پلیئر ٹیم کو کنٹرول کرنے اور میری رہنمائی کی روشنی میں بنائی جانے والی پلاننگ پر عمل درآمد کرانے کی بھرپور صلاحیت رکھتے ہیں، صدام کی قیادت میں ٹیم سے بہتر نتائج کی امیدیں وابستہ ہیں۔

صدر پی ایف ایف سید فیصل صالح حیات نے کہا کہ برازیلی کوچز نے قومی فٹبالرز کی کارکردگی میں نکھار لانے کیلیے سخت محنت کی ہے، ایشین گیمز کے دوران ٹیم کی پرفارمنس میں مسلسل بہتری دیکھی گئی، نیپال کیخلاف فتح اس کا ایک ثبوت ہے، پوری امید ہے کہ قومی ٹیم بہتری کا یہ سفر جاری رکھتے ہوئے ساف کپ میں بھی عمدہ کارکردگی کا مظاہرہ کرے گی۔

شاندار اور رنگارنگ تقریب کے ساتھ ایشین گیمز2018 کا اختتام

16دن تک جاری رہنے والے 40کھیلوں کے سنسنی خیز مقابلوں کے ساتھ انڈونیشیا میں جاری ایشین گیمز 2018 تاریخی کامیابی کے بعد شاندار تقریب کے ساتھ اپنے اختتام کو پہنچے۔

دارالحکومت جکارتا اور پالم بینگ میں منعقدہ گیمز کی شاندار انداز میں میزبانی کر کے انڈونیشیا نے تمام تر ناقدین کے منہ بند کرتے ہوئے ایونٹ کا بہترین انداز میں انعقاد کر کے توقعات کے برخلاف بہترین میزبان ہونے کا ثبوت دیا۔

2011میں منعقدہ ساؤتھ ایسٹ ایشین گیمز کی میزبانی کے دوران انڈونیشیا میں شدید بدنظمی دیکھی گئی تھی اور ان گیمز کے دوران کرپشن الزامات نے انڈونیشیا کی ساکھ کو بری طرح متاثر کیا تھا۔

2022 ایشین گیمز کی میزبانی کرنے والے چین کے نمائندے ایشین گیمز کی مشعل تھامے ہوئے ہیں— فوٹو: اے ایف پی
2022 ایشین گیمز کی میزبانی کرنے والے چین کے نمائندے ایشین گیمز کی مشعل تھامے ہوئے ہیں— فوٹو: اے ایف پی

تاہم فضائی آلودگی، شدید ٹریفک اور ایونٹ کے انعقاد سے چند دن قبل مجرموں کے خلاف کیے گئے کریک ڈاؤن کے باوجود انڈونیشیا نے ایونٹ کا بہترین انداز میں انعقاد کرایا اور ایشین گیمز کے کسی بھی مقابلے کے دوران کوئی بھی بدنظمی دیکھنے کو نہیں ملی۔

اولمپکس کے بعد سب سے بڑے گیمز تصور کیے جانے والے ایشین گیمز میں 17ہزار ایتھلیٹس نے شرکت کی اور 16دن تک ایونٹ میں دلچسپ اور کانٹے دار مقابلے منعقد ہوئے۔

اتوار کو گیمز کے آخری دن جاپان نے مکسڈ ٹیم ٹرائیتھلون کے مقابلوں میں ایونٹ کا آخری اور مجموعی طور پر 465واں گولڈ میڈل جیت کر ان گیمز کو منطقی انجام تک پہنچایا اور اپنے گولڈ میڈلز کی تعداد 75تک پہنچا کر دوسری پوزیشن حاصل کی۔

اولمپک کونسل آف ایشیا کے صدر شیخ احمد الفہد الصباح نے اتوار کو دارالحکومت جکارتا کے بیچوں بیچ واقع تماشائیوں سے کھچا کھچ بھرے گیلورا بنگ کارنو اسٹیڈیم میں خطاب کرتے ہوئے کہا کہ میں 18ویں ایشین گیمز کے اختتام کا اعلان کرتا ہوں۔

انہوں نے انڈونیشیا کے عوام، گیمز کے منتظمین اور ایشین گیمز میں شریک ملکوں کو مبارکباد دیتے ہوئے کہا کہ آپ نے یہ بڑا کام کر دکھایا اور بتا دیا کہ ایشیا کے عوام میں کتنی طاقت ہے۔

انہوں نے کہا کہ جکارتا اس طرح کے کسی بھی عالمی معیار کے ایونٹ کی میزبانی کی بھرپور صلاحیت رکھتا ہے۔

اس ایونٹ کے شاندار اور کامیاب انعقاد کے بعد انڈونیشیا کے صدر جوکو ول ڈوڈو نے 2032 اولمپکس کے لیے بولی لگانے کا اعلان کیا جہاں چند ہفتوں کے قبل اس بارے میں سوچنا بھی ناممکن نظر آتا تھا۔

جاپان کی ٹیم نے ایشین گیمز2018 کا آخری میڈل جیتنے کا اعزاز حاصل کیا—
جاپان کی ٹیم نے ایشین گیمز2018 کا آخری میڈل جیتنے کا اعزاز حاصل کیا—

انہوں نے ویڈیو لنک کے ذریعے اسٹیڈیم میں خطاب کرتے ہوئے کہا کہ یہ گیمز ایشیا کی طاقت کا منہ بولتا ثبوت ہیں اور ہم سب مل کر دنیا میں فرق ڈال سکتے ہیں۔

اولمپکس کے سربرا تھامس باک نے انڈونیشیا کی جانب سے 2032 اولمپکس کے لیے بولی لگائے جانے کے اعلان کا خیرمقدم کرتے ہوئے خبردار کیا کہ انہیں ایشین گیمز سے حاصل ہونے والی توانائی کو برقرار رکھنے کی ضرورت ہے اور ایسا نہ ہو کہ جب سب چلے جائیں تو آپ اندھیروں میں گھر جائیں۔

2022 میں ہونے والے اگلے ایشین گیمز کی میزبانی چین کرے گا اور اختتامی تقریب میں مشعل چین کے ایشین گیمز کے نمائندے کے سپرد کر دی گئی۔

گیمز کی اختتامی تقریب میں فنکاروں نے اپنے فن کا شاندار مظاہرہ کر کے شائقین کے دل موہ لیے جبکہ آخر میں آتش بازی کے دلفریب منظر نے آنکھوں کو خیرہ کردیا۔

گیمز میں میڈلز کی بات کی جائے تو فیورٹس چین نے لگاتار 10ویں ایشین گیمز میں اپنی برتری برقرار رکھی اور 132سونے، 92چاندی اور 65کانسی کے تمغوں کے ساتھ پہلی پوزیشن حاصل کی۔

1982 سے اب تک چین ایشین گیمز میں میڈلز کی فہرست میں سب سے آگے رہا ہے اور اس دوران کوئی بھی حریف ان کے قریب تک نہیں پہنچ سکا۔

اب چین کی کوشش ہو گی کہ وہ دو سال بعد ان کے بڑے حریف جاپان کی میزبانی میں منعقد ہونے والے اولمپکس گیمز میں بھی یکساں کارکردگی دہراتے ہوئے سبقت لے جائیں جہاں ایشین گیمز میں جاپان تمغوں کی فہرست میں دوسرے نمبر پر رہا۔

ایشین گیمز 2018 کی اختتامی تقریب میں شریک پاکستانی دستہ - فوٹو: اے پی
ایشین گیمز 2018 کی اختتامی تقریب میں شریک پاکستانی دستہ – فوٹو: اے پی

جاپان نے 75سونے، 56چاندی اور 74کانسی کے تمغوں کے ساتھ 205 میڈل جیتے جبکہ تیسرے نمبر پر رہنے والے جنوبی کوریا نے 49سونے کے تمغوں سمیت مجموعی طور پر 177میڈل جیتنے کا اعزاز حاصل کیا جبکہ میزبان انڈونیشیا نے بھی 31 سونے کے تمغے جیتے۔

ان گیمز کی خاص بات متحدہ کوریا کے دستے کی شرکت بھی رہی جس نے ایک سونے کا تمغہ جیت کر نئی تاریخ رقم کی۔

ایشین گیمز 2018 میں ماضی کے تمام گیمز کے مقابلوں میں بھارت کی ٹیم نے شاندار کھیل پیش کیا اور 15 سونے، 24چاندی اور 30کانسی کے تمغوں سمیت 69میڈلز جیت کر اسے بھارت کی تاریخ کا کامیاب ترین ایشین گیم بنا دیا۔

پاکستان کی کارکردگی ایک مرتبہ پھر واجبی رہی اور تمغہ جیتنے کے لیے فیورٹ ہاکی ٹیم کوئی میڈل نہ جیت سکی اور پاکستان کو محض 4کانسی کے تمغوں پر اکتفا کرنا پڑا۔

جاپان کی تیراک ریکاکو ایکی کو بہترین ایتھلیٹ قرار دیا گیا جنہوں نے 6 گولڈ میل جیتے اور کسی سنگل گیم میں 6گولڈ میڈل جیتنے والی ایشین گیمز کی تاریخ میں پہلی خاتون بن گئیں۔

جاپان کی تیراک ریکاکو ایکی جنہوں نے بہترین ایتھلیٹ کا اعزاز جیتا - فوٹو: اے ایف پی
جاپان کی تیراک ریکاکو ایکی جنہوں نے بہترین ایتھلیٹ کا اعزاز جیتا – فوٹو: اے ایف پی

جنوبی کوریا کی فوج سے چھٹی لے کر ایشین گیمز میں شرکت کرنے والے ہیونگ من نے کوریا کو سونے کا تمغہ جتوا کر ان گیمز کو یادگار بنا لیا۔

انڈونیشیا کے 12سالہ اسکیٹ بورڈر سونے کا تمغہ جیتنے والے سب سے کمسن ایتھلیٹ بنے جبکہ انڈونیشیا کے 78سالہ ارب پتی تاجر مائیکل بیم بینگ کارڈ گیم میں کامیابی حاصل کر کے میڈل جیتنے والے سب سے ادھیڑ عمر شخص قرار پائے۔

ایشین گیمز ہاکی: پاکستان روایتی حریف بھارت سے برانز میڈل کا میچ ہار گیا

ایشین گیمز ہاکی میں پاکستان ٹیم روایتی حریف بھارت سے برانز میڈل کا میچ ہار گئی۔

روایتی حریف بھارت نے پاکستان کو ایک کے مقابلے میں دو گول سے شکست دے کر تیسری پوزیشن اور برانز میڈل حاصل کرلیا۔

جکارتہ میں جاری ایشین گیمز کے ہاکی ایونٹ میں پاکستان اور بھارت کے درمیان تیسری پوزیشن کے لیے دلچسپ مقابلہ ہوا۔

بھارت نے کھیل کے ابتداء میں ہی پاکستان کے خلاف گول اسکور کردیا، یہ گول آکاش دیپ سنگھ نے بنایا۔ دوسرے اور تیسرے کوارٹر میں پاکستان نے بھارت کے خلاف تابڑ توڑ حملے کئے مگر گول نہ ہوسکا۔

چوتھے اور آخری کوارٹر میں دونوں ٹیموں کے کھلاڑیوں نے خوب تیزی دکھائی، بھارتی کھلاڑی پردیپ سنگھ نے ایک اور گول کردیا۔

پاکستان کی طرف سے محمد عتیق نے گول کرکے خسارہ کم تو کیا مگر دوسرا گول اسکور نہ ہوسکا اور یوں بھارت نے پاکستان کو ایک کے مقابلے میں دو گول سے شکست دے کر برانز میڈل اپنے نام کرلیا۔

جاپان ہاکی کا ایشین چیمپئن بن گیا

ایشین گیمز ہاکی کے فائنل میں جاپان نے ملائیشیا کو اعصاب شکن مقابلے کے بعد شکست دے کر سونے کا تمغہ اپنے نام کرلیا۔

جاپان اور ملائیشیا کے درمیان میچ مقررہ وقت تک 6-6 گول سے برابر رہا جس کے بعد میچ کا فیصلہ پینلٹی شوٹ آؤٹ پر کیا گیا۔

پینلٹی اسٹروکس پر جاپان نے ملائیشیا کو 1-3 سے شکست دے کر گولڈ میڈل اپنے نام کرلیا جبکہ ملائیشیا کے حصے میں چاندی کا تمغہ آیا۔

وزیراعظم کھلاڑیوں کے خلاف سخت ایکشن لیں، ڈائریکٹر پی ایچ ایف

پاکستان ہاکی فیڈریشن (پی ایچ ایف) کے ڈائریکٹرنوید عالم شکست پر ٹیم مینجمنٹ اور کھلاڑیوں پر برس پڑے اور کہا کہ پاکستان کی شکست پر مایوسی ہوئی۔

نوید عالم نے مزید کہا کہ کھلاڑیوں نے پاکستان کی عزت کا خیال نہیں کیا، ہاکی فیڈریشن نے مشکلات میں کھلاڑیوں کیلئے سب کچھ کیا لیکن نتیجہ صفر نکلا۔

نوید عالم نے مطالبہ کیا کہ وزیراعظم اور پی ایچ ایف کے صدر کھلاڑیوں کے خلاف سخت ایکشن لیں، غیر ملکی کوچ اور سینئرمینجمنٹ کی تعیناتی کے باوجود کھلاڑی پرفارمنس نہ دکھا سکے۔

کامران اکمل کوچ اور کپتان کے خلاف پھٹ پڑے

 کراچی: وکٹ کیپر بیٹسمین کامران اکمل نے کہا ہے کہ کھلاڑیوں کے انتخاب میں سلیکشن کمیٹی، کوچ اور کپتان کو مل کر فیصلہ کرنا چاہیے لیکن موجودہ حالات میں کوچ اور کپتان کی چل رہی ہے۔

کراچی میں میڈیا سے بات کرتے ہوئے وکٹ کیپر بیٹسمین کامران اکمل کوچ اور کپتان کے خلاف پھٹ پڑے، انہوں نے کہا کہ میری کرکٹ ابھی ختم نہیں ہوئی ہے، میری فٹنس اور کارکردگی بھی سب کے سامنے ہے، دیگر ممالک کی ٹیموں میں دو وکٹ کیپر شامل ہوتے ہیں۔

کامران اکمل نے کہا کہ کھلاڑیوں کے انتخاب میں سلیکشن کمیٹی، کوچ اور کپتان کو مل کر فیصلہ کرنا چاہیے لیکن موجودہ حالات میں کوچ اور کپتان کی چل رہی ہے۔ چیف سلیکٹر کا ٹیم کے انتخاب میں زیادہ عمل دخل نظر نہیں آرہا، اتنی ہمت نہیں کہ حق کے لئے لڑائی کرسکوں، حق کے لئے آواز بلند کروں گا تو نوٹس جاری ہوجاتا ہے،اپنے آپ کو بیٹ ماروں یا سامان جلا دوں، کیا منفرد کارنامہ انجام دوں کہ شاید پی سی بی مجھ سے رابطہ کرے۔

کوہلی کو آرام دینے کا فیصلہ، روہت شرما ایشیا کپ کیلئے بھارتی ٹیم کے کپتان مقرر

ممبئی: بی سی سی آئی نے ایشیا کپ 2018 کے لیے بھارتی ٹیم کا اعلان کردیا جس کا کپتان روہت شرما کو مقرر کیا گیا ہے۔

انٹرنیشنل کرکٹ کونسل (آئی سی سی) کے مطابق بھارتی کرکٹ بورڈ نے ایشیا کپ 2018 میں کپتان ویرات کوہلی کو آرام دینے کا فیصلہ کیا ہے اور ان کی جگہ روہت شرما کو ٹیم کی کپتانی سونپی گئی ہے۔

بی سی سی آئی نے ٹوئٹر اکاؤنٹ کے ذریعے ایشیا کپ کے لیے بھارتی ٹیم کا اعلان کیا جس کے مطابق منیش پانڈے کی ٹیم میں واپسی ہوئی ہے جب کہ راجستھان رائلز کے بائیں ہاتھ کے میڈیم پیسر خلیل احمد کو بھی ٹیم میں شامل کیا گیا ہے جو اپنے پہلے ون ڈے انٹرنیشنل کا ڈیبیو کریں گے۔

اس کے علاوہ انگلینڈ کے خلاف ون ڈے انٹرنیشنل نہ کھیلنے والے کیدر جادھو کو بھی ٹیم میں شامل کیا گیا ہے جب کہ سریش رائنا ایشیا کپ میں بھارتی ٹیم کا حصہ نہیں ہوں گے۔

BCCI

@BCCI

Team India for Asia Cup, 2018 announced. Rohit Sharma set to lead the side in UAE

بی سی سی آئی کے مطابق بھارتی ٹیم کا 15 رکنی اسکواڈ روہت شرما (کپتان)، شیکھر دھون (نائب کپتان)، کے ایل راہل، امباتی رائیوڈو، منیش پانڈے، کیدر جادھو، ایم ایس دھونی، دنیش کارتک، ہاردک پانڈیا، کلدیپ یادیو، یوزویندرا چھاہل، بھونیشور کمار، جسپرت بومرا، شھردل ٹھاکر اور خلیل احمد پر مشتمل ہے۔

واضح رہے کہ ایشیا کرکٹ کپ کا میلہ 15 ستمبر سے متحدہ عرب امارات کے میدانوں میں سجے گا جس میں پاکستان، بھارت، بنگلا دیش، سری لنکا اور افغانستان کی ٹیمیں حصہ لے رہی ہیں۔

ٹورنامنٹ کے فائنل سے پہلے پاکستان اور بھارت کی ٹیموں کے درمیان بڑا ٹاکرا 19 ستمبر کو ہو گا۔

ساف کپ کیلئے 20 رکنی قومی فٹبال اسکواڈ بنگلہ دیش روانہ

لاہور: ساف کپ کیلئے 20 رکنی قومی فٹبال اسکواڈ لاہور سے براستہ دوحا بنگلہ دیش کے دارالحکومت ڈھاکہ روانہ ہوگیا،

ساف کپ کیلئے 20 رکنی قومی فٹبال اسکواڈ لاہور سے براستہ دوحا بنگلہ دیش کے دارالحکومت ڈھاکہ روانہ ہوگیا۔ ٹیم کی قیادت صدام حسین کریں گے، نائب کپتان حسن بشیرہوں گے، منتخب کھلاڑیوں میں عمر حیات،محمد نوید، فیصل اقبال، ذیشان رحمٰن، عبداللہ قاضی، شہباز یونس، محسن علی، بلاول الرحمن، محمد ریاض،احمد فہیم، سعد اللہ، محمود خان، صدام حسین (کپتان)، حسن بشیر (نائب کپتان)،محمد عادل، محمدعدنان یعقوب، یوسف بٹ، ثاقب حنیف، احسان اللہ، محمد علی شامل ہیں۔

ہیڈ کوچ جوز انٹونیو ناگورا، اسسٹنٹ کوچز محمد حبیب، عیسیٰ خان، گول کیپر کوچ زاہد علی، فزیکل ٹرینرروبرٹو پورٹیلا، فزیو تھراپسٹ محمد عدنان بھی سکواڈ کے ہمراہ ہوں گے۔ واضح رہے کہ ساف کپ 4 ستمبر سے بنگلہ دیش کے دارالحکومت ڈھاکہ میں شروع ہو گا۔ پاکستان اپنا پہلا میچ 4 ستمبر کو نیپال سے کھیلے گا جبکہ اپنے گروپ میں شامل دیگرٹیموں بنگلہ دیش اور بھوٹان سے میچز بالترتیب 6 اور8 ستمبرکوشیڈول ہیں۔

آخری ون ڈے میں آئرلینڈ کو شکست،سیریز افغانستان کے نام

بلفاسٹ: افغانستان نے آئرلینڈ کو فیصلہ کن ون ڈے انٹرنیشنل میچ میں 8 وکٹوں سے شکست دے کر 3 میچوں کی سیریز 1-2 سے اپنے نام کرلی، راشد خان عمدہ باؤلنگ کی بدولت سیریز کے بہترین کھلاڑی قرار دیے گئے۔

افغانستان نے 125 رنز کا آسان ہدف 24ویں اوور میں محض 2 وکٹوں کے نقصان پر پورا کیا۔

احسان اللہ 57 اور حشمت اللہ شاہدی 34 رنز بنا کر ناقابل شکست رہے، راشد خان کو عمدہ باؤلنگ کا مظاہرہ کرنے پر سیریز کا بہترین کھلاڑی قرار دیا گیا ۔

بلفاسٹ میں کھیلے گئے آخری اور فیصلہ کن ون ڈے انٹرنیشنل میچ میں میزبان آئرش ٹیم پہلے کھیلتے ہوئے 36.1 اوورز میں ایک سو 24 رنز پر ڈھیر ہو گئی۔

گیری ولسن 23، سیمی سنگھ اور اینڈی بلبرائن 17، 17، کپتان ولیم پورٹرفیلڈ 14، پال اسٹرلنگ 2، نیل اوبرائن ایک، ٹم مورتگ 2 اور بائیڈ رینکن 4 رنز بنا کر آؤٹ ہوئے۔

افغانستان کے اسپن جادوگر راشد خان نے 3، گلبدین نائب، آفتاب عالم اور محمد نبی نے 2، 2 اور اصغر نے ایک کھلاڑی کو آؤٹ کیا۔

راشد خان کی عمدہ باؤلنگ کی خاص بات یہ تھی کہ انہوں نے تینوں آئرش کھلاڑیوں کو ایل بی ڈبلیو آؤٹ کیا۔

جواب میں افغانستان نے مطلوبہ ہدف 23.5 اوورز میں 2 وکٹوں پر باآسانی حاصل کرلیا۔

محمد شہزاد 1 اور رحمت شاہ 33 رنز بنا کر آؤٹ ہوئے، احسان اللہ نے 57 اور حشمت اللہ شاہدی نے 34 رنز کی اننگز کھیل کر ٹیم کو فتح دلائی۔

آئرلینڈ کی طرف سے ٹم مورتگ اور رینکن نے ایک، ایک وکٹ حاصل کی۔

یاد رہے کہ آئرلینڈ نے افغانستان کو سیریز کے دوسرے میچ میں 3 وکٹوں سے شکست دے کر سیریز 1-1 سے برابر کردی تھی۔

جبکہ سیریز کے پہلے میچ میں افغانستان نے آئرلینڈ کو شکست دے کر سیریز میں برتری حاصل کی تھی۔

رمیز راجہ نے احسان مانی کو بطور چیئرمین پی سی بی موزوں انتخاب قرار دے دیا

لاہور: رمیز راجہ نے احسان مانی کو بطور چیئرمین پی سی بی موزوں انتخاب قرار دے دیا۔

ایک انٹرویو میں سابق ٹیسٹ کرکٹر نے کہا کہ وزیر اعظم عمران خان کے ویژن کو پیش نظر رکھتے ہوئے بورڈ کے نئے سربراہ اپنی ذات سے بالا تر ہوکر کام کریں گے۔ انھوں نے کہا کہ عمران خان ریجنل کرکٹ کے زبردست حامی ہیں،یہ تصور پی ایس ایل میں کامیاب رہا، کئی سابق کرکٹرز بھی اس کی حمایت کرتے ہیں، اب یہ احسان مانی پر ہے کہ وہ اس معاملے میں کس نوعیت کے اقدامات اٹھاتے ہیں۔

رمیز راجہ نے کہا کہ گزشتہ دنوں بنی گالا میں ملاقات کے دوران عمران خان نے اپنی جدوجہد پر روشنی ڈالی اور بتایا کہ اس سلسلے میں کرکٹ کے پس منظر نے کیا کردار ادا کیا،ان کا وزیر اعظم منتخب ہونا صرف پاکستان ہی نہیں بلکہ عالمی کرکٹ برادری کیلیے بڑے فخر اور اعزاز کی بات ہے۔

Google Analytics Alternative