کھیل

چار ٹیسٹ سیریز میں ڈبل سنچریوں کاریکارڈ کوہلی کے نام

ویراٹ کوہلی نے اپنی شاندار پرفارمنس کا سلسلہ بنگلا دیش کے خلاف بھی جاری رکھا ،وہ ٹیسٹ کرکٹ کی تاریخ میں لگاتار 4 ٹیسٹ سیریز میں ڈبل سنچری بنانے والے دنیا کے پہلےکرکٹر بن گئے ہیں۔

اس سے قبل عظیم آسٹریلوی بیٹسمین سر ڈان بریڈ مین اور بھارتی کرکٹر راہول ڈریوڈ نے لگاتار 3 ٹیسٹ سیریز میں 3 ڈبل سنچریاں بنائی تھیں ۔

بنگلادیش کے خلاف شاندار اننگز کھیلنے والے ویراٹ کوہلی کی بطور کپتان یہ چوتھی ڈبل سنچری ہے،اب وہ بطور کپتان ڈبل سنچریاں بنانے والے سرڈان بریڈمین، کلارک اور گریم سمتھ کے ہم پلہ ہو گئے، بطور کپتان زیادہ ڈبل سنچریاں بنانے کا عالمی اعزاز برائن لارا کے پاس ہے جنہوں نے پانچ ڈبل سنچریاں بنا رکھی ہیں۔

کوہلی نے گزشتہ سال کے آغاز میں ویسٹ انڈیز کے خلاف سیریز میں کیریئر کی پہلی ڈبل سنچری بنائی اور اس کے بعد نیوزی لینڈ کے خلاف سیریز میں اندور کے مقام پر انہوں نے مشکل وقت میں عمدہ باری کھیلتے ہوئے 211 رنز بنائے تھے۔

انگلینڈ کے خلاف بھی بھارتی کپتان بہترین فارم میں نظر آئے اور سیریز کے آخری ٹیسٹ میچ میں کیریئر کی سب سے بڑی 235 رنز کی خوبصورت اننگز کھیلی،جب بنگلہ دیش کی ٹیم تاریخ میں پہلی مرتبہ ٹیسٹ کھیلنے بھارت پہنچی تو کوہلی نے عمدہ کھیل پیش کرتے ہوئے 204 رنز کی عمدہ اننگز کھیلی اور لگاتار 4 سیریز میں ڈبل سنچری بنانے کا عالمی ریکارڈ بنا دیا۔

ان کی اس خوبصورت اننگز میں 24 چوکے شامل تھے۔بھارت نے دوسرے دن 687رنز پر اننگز ڈیکلیئر کرتے ہوئے بنگلہ دیش کو بیٹنگ کا موقع دیا۔

کوئٹہ گلیڈی ایٹرز نے لاہور قلندرز کو شکست دے دی

دبئی: پاکستان سپر لیگ کے دوسرے میچ میں کوئٹہ گلیڈی ایٹرز نے لاہور قلندرز کو 8 رنز سے شکست دے دی۔ 

دبئی انٹرنیشنل گراؤنڈ میں کھیلے گئے پاکستان سپر لیگ کے دوسرے میچ میں کوئٹہ گلیڈی ایٹرز نے لاہور قلندرز کو جیت کے لیے 137 رنز کا ہدف دیا جس کے جواب میں جیسن روئے اور کپتان برینڈن میکلم نے ٹیم کو جارحانہ آغاز فراہم کرتے ہوئے 3 اوورز میں 34 رنز بٹورے لیکن ذوالفقار بابر نے پہلے جیسن روئے کو 27 اور پھر میکلم کو 20 رنز پر پویلین بھیج کر لاہور قلندرز کی مشکلات میں اضافہ کیا، بعد میں آںے والے کھلاڑیوں میں فخر زمان 11، محمد رضوان 5، عمر اکمل 0، گرانٹ ایلیٹ اور سنیل نارائن نے 26،26 رنز کی اننگز کھیلی۔

کوئٹہ کی جانب سے ذوالفقار بابر، محمد نواز اور حسن خان نے 2،2 جب کہ ملز اور انور علی نے ایک ایک وکٹ حاصل کی۔

اس سے قبل لاہور قلندرز کے کپتان برینڈن میکلم نے ٹاس جیت کر پہلے بولنگ کرنے کا فیصلہ کیا، کوئٹہ کی جانب سے اس شفیق اور احمد شہزاد نے بیٹنگ کا آغاز کیا لیکن احمد شہزاد تیسرے ہی اوور میں 5 رنز بنا کر آؤٹ ہوگئے جب کہ کیون پیٹرسن اور کپتان سرفراز احمد بھی خاطر خواہ کارکردگی نہیں دکھاسکے وہ بالترتیب 3 اور ایک رنز بنا کر پویلین لوٹے، محمد نواز بھی صرف ایک ہی رنز بناسکے۔ روسوو 60 جب کہ اسد شفیق 29 رنز بنا کر ٹاپ اسکورر رہے۔

لاہور کی جانب سے محمد عرفان نے 3، سہیل تنویر اور سنیل نارائن نے ایک ایک وکٹ حاصل کی۔

واضح رہے پی ایس ایل کے افتتاحی میچ میں اسلام آباد یونائیٹڈ نے پشاور زلمی کو 7 وکٹوں سے شکست دی تھی۔

کرکٹر شرجیل خان کے حق میں ان کے اہل علاقہ کا مظاہرہ

مظاہرین کا کہنا ہے کہ شرجیل خان پر لگائے گئے الزامات بے بنیاد ہیں، ان کی معطلی کا حکم واپس لیا جائے۔

واضح رہے کہ پی سی بی کی جانب سے شرجیل خان اور خالد لطیف کو جواریوں سے ملنے کے الزام میں معطل کیا گیا ہے اور دونوں کھلاڑیوں کو دبئی سے وطن واپس بھیج دیا گیا ہے۔

شرجیل اور خالد پی ایس ایل ٹو میں اسلام آباد یونائیٹڈ کی جانب سے کھیل رہے تھے، اب تحقیقات کی تکمیل تک دونوں کھلاڑی پاکستان سپر لیگ ٹو میں شرکت نہیں کر سکیں گے۔

بھارت کی اسپن وکٹوں سے نمٹنے کیلئے آسٹریلیا تیار رہے، ولیمسن

نیوزی لینڈ کرکٹ ٹیم کے کپتان کین ولیمسن نے آئندہ دورہ بھارت کے حوالے سے آسٹریلیا کو خبردار کردیا ہے۔ ان کہنا ہے کہ کینگروز کو بھارت میں اسپن وکٹوں سے نمٹنے کیلیے تیار رہنا ہوگا۔

آسٹریلین ٹیم اسی ماہ کے آخر میں 4میچوں کی ٹیسٹ سیریز کیلئے بھارت کا دورہ کرنے والی ہے۔ 23فروری کو پونے میں پہلا ٹیسٹ شروع ہوگا۔ وليمسن کی قیادت میں کیویز نے حال ہی میں کینگروز کو تین ون ڈے میچز کی سیریز میں زیر کیا ہے۔

لیکن بلیک کیپس ٹیم 4ماہ پہلے ہی بھارت کے دورے ٹیسٹ سیریز 0-3 سے ہار گئی تھی۔ ولیمسن کی سیریز میں کارکردگی بہتر تھی، انہوں نے سنچری بھی اسکور کی تھی اس اعتبار سے ان کے ذہن میں مذکورہ دورے کے حوالے سے بہت کچھ تازہ ہی ہوگا۔

ان کا کہنا ہے کہ غیرملکی ٹیموں کیلیے بھارتی سرزمین انتہائی مشکل جگہ ہے۔ لیکن میں اچھی طرح جانتا ہوں کہ آسٹریلوی ٹیم اچھی ہے اور وہ بہت جلد خود کو حالات کے مطابق ڈھال لیتی ہے۔

لیکن ایسا ہرگز نہ سوچئے گا کہ دھول اڑاتی ساری پچز ہمیشہ ایک جیسا کھیلیں گی۔ یہ مکمل طور پر میزبان سائیڈ پر منحصر ہے کہ وہ کیسی پچز تیار کرتے ہیں۔

انہوں نے مزید کہا کہ بھارت کی ٹیم موجودہ سیزن میں ہوم گرائونڈز پر 13ٹیسٹ میچز کھیل چکی ہے اور بھارت کی پچوں میں کافی تبدیلی رونما ہوئی ہے۔ ایسے میں ٹاس بھی کافی اہم ہوتا ہے۔

ٹی20 میں ٹرپل سنچری کا ناقابل یقین کارنامہ

نئی دلی: بھارتی کرکٹر نے مقامی ٹی 20 ٹورنامنٹ کے ایک میچ میں ٹرپل سنچری کا ناقابل یقین کارنامہ انجام دے ڈالا، موہت اہلاوت نے صرف 72 گیندوں پر یہ سنگ میل عبور کرتے ہوئے کرکٹ کی تاریخ میں ایک نیا ریکارڈ بنایا۔

رائٹ ہینڈ بیٹسمین اس تاریخ ساز کارنامے کے بعد شہرت کی بلندیوں پر پہنچ گئے ہیں اور دہلی ڈیئر ڈیولز نے آئی پی ایل کے اگلے ایڈیشن کیلئے انہیں ٹرائلز کیلیے طلب کر لیا ہے۔ ایک غریب خاندان سے تعلق رکھنے والے نوجوان نے ایسٹ دہلی میں حریف ٹیم فرینڈز الیون کے بولرز کےچھکے چھڑا دیے، انہوں نے آخری دو اوورز میں 50 رنز بنا کر ٹرپل سنچری مکمل کی جس میں 5 مسلسل چھکے شامل ہیں، انہوں نے اننگز میں مجموعی طور پر 72 گیندوں کا سامنا کرتے ہوئے 39 چھکے اور 14 چوکے لگائے۔ ان کی ٹیم نے مقررہ اوورز میں 2 وکٹ پر 416 رنز بنائے، جواباً حریف ٹیم 200 رنز ہی بنا سکی۔

بعد ازاں میڈیا سے گفتگو کرتے ہوئے موہت نے کہا کہ کھیل کیلیے مدعو کیے جانے پر میں چلا گیا اور پھر یہ سب ہو گیا، 150 رنز بنانے کے بعد لگا کہ میں 250 بنا سکتا ہوں، میں نے ساتھی بیٹسمین کو بتایا کہ میں زیادہ سے زیادہ اسٹرائیک لینا چاہتا ہوں جس کے بعد آخری 2 اوورز میں یہ سنگ میل عبور کر لیا۔ بیٹسمین کے کوچ سنجے بھردواج نے کہا کہ مجھے اس کے اس کارنامے پر تعجب نہیں ہے، وہ ایک جارح مزاج بیٹسمین ہونے کے ساتھ کھیل کی اچھی سمجھ بوجھ بھی رکھتا ہے، گوتم گمبھیر سمیت کئی نامور کرکٹرز کی کوچنگ کرنے والے بھردواج نے کہا کہ اس کارنامے کی خبر اتنی جلدی پھیلی کہ دہلی ڈیئر ڈیولز نے بیٹسمین کو ٹرائلز کیلیے دعوت دے ڈالی ہے۔

ٹی 20 میچ میں ٹرپل سنچری کا یہ پہلا اور ناقابل یقین کارنامہ ہے لیکن یہ ایک فرسٹ کلاس میچ نہیں تھا۔ فرسٹ کلاس ٹی 20 میں سب سے بڑی انفرادی اننگز کا ریکارڈ کرس گیل کے پاس ہے جنہوں نے آئی پی ایل 2013 میں رائل چیلنجرز بنگلور کی جانب سے کھیلتے ہوئے 175 رنز بنائے تھے۔ جبکہ ٹی 20 انٹرنیشنلز میں سب سے زیادہ رنز کا ریکارڈ آسٹریلین بیٹسمین ایرون فنچ کے پاس ہے جنہوں نے 2013 میں انگلینڈ کے خلاف 156 رنز کی اننگز کھیلی تھی۔

موہت کا نام دو سال قبل اس وقت خبروں میں آیا تھا جب گوتم گمبھیر نے انہیں دہلی رانجی ٹرافی کیلیے زور دے کر ٹیم میں شامل کروایا تھا، 21 سالہ موہت نے کہا کہ گوتی بھائی نے مجھ پر جو اعتماد کیا میں اس پر ان کا شکر گزار ہوں اور آج میں نے ان کا خیال سچ ثابت کر دکھایا ہے۔ آئی پی ایل کھیل کر اپنی صلاحیتوں کا کھل کر اظہار کرنا چاہتا ہوں۔

بلائنڈ ٹی 20 ورلڈ کپ میں پاکستان کے ریکارڈ 373 رنز

الور: ٹی 20 بلائنڈ کرکٹ ورلڈ کپ میں پاکستان نے ریکارڈ 373 رنز اسکور کرتے ہوئے میگا ایونٹ کا سب سے بڑا مجموعہ ترتیب دے دیا۔کرناٹکا کرکٹ ایسوسی ایشن گراؤنڈ پر کھیلے گئے میچ میں پاکستان ٹیم نے اوپنرز کی جارحانہ اننگز کی بدولت ایونٹ کا سب سے بڑا مجموعہ تشکیل دیا، گرین شرٹس نے مقرررہ اوورز میں 4 وکٹوں کے نقصان پر 373 رنز بناتے ہوئے میگا ایونٹ میں اپنا ہی ریکارڈ بہتر کیا۔ اس سے قبل ورلڈ کپ 2012 میں بھی گرین شرٹس نے ویسٹ انڈیز کے خلاف ہی 364 رنز سکور کرکے میگا ایونٹ میں سب سے زیادہ رنز بنانے کا ریکارڈ بنایا تھا۔
پاکستانی اوپنر محمد جمیل 36 گیندوں پر 20 چوکوں کی مدد سے 100 رنز بنانے کے بعد ریٹائر ہو گئے جبکہ دوسرے اوپنر ریاست خان سنچری سے 6 رنز کی دوری پر رن آؤٹ ہو گئے، انہوں نے 32 گیندوں پر 9 چوکوں اور 2 چھکوں کی مدد سے 94 رنز کی اننگز کھیلی۔ دیگر کھلاڑیوں میں محمد ظفر 46، محسن خان 32، مطیع اللہ 27 اور عامر اشفاق 24 رنز کے ساتھ دیگر نمایاں اسکورر رہے۔ ویسٹ انڈیز کی جانب سے گنیش متھرا سنگھ اور اینتھونی فٹزگیرالڈ نے ایک ایک کھلاڑی کو آؤٹ کیا۔
374 رنز کے بڑے ہدف کے تعاقب میں ویسٹ انڈیز کی ٹیم پاکستانی بولنگ کا جم کر مقابلہ نہ کر سکی اور مقررہ 20 اوورز میں 9 وکٹیں کھو کر 191 رنز ہی بنا پائی، اس طرح پاکستان نے میچ میں 182 رنز سے کامیابی سمیٹی۔ ڈینیئل ڈیبویا 59 رنز بنا کر ٹاپ اسکورر رہے جبکہ اورن فلپ نے 36 رنز بنائے۔ پاکستان کی جانب سے ساجد نواز، محمد اکرم، ریاست خان، انیس جاوید اور محسن خان نے ایک ایک کھلاڑی کو پویلین بھیجا، 4 کیرینین بیٹسمین رن آؤٹ ہوئے۔
ایک دوسرے میچ میں سری لنکا نے بنگلا دیش کو شکست دے دی۔ بنگلا دیشی ٹیم نے 8 وکٹ پر 141 رنز بنائے، سری لنکا نے ہدف 12 اوورز میں 4 وکٹوں کے نقصان پر حاصل کر لیا۔
گرین شرٹس کی میگا ایونٹ میں یہ مسلسل آٹھویں فتح ہے، اس سے قبل وہ نیوزی لینڈ، انگلینڈ، روایتی حریف بھارت، سری لنکا، نیپال، جنوبی افریقا اور بنگلا دیش کی ٹیموں کو شکست سے دوچار کر چکے ہیں۔ قومی ٹیم جمعرات کو اپنا آخری لیگ میچ آسٹریلیا کے خلاف کھیلے گی۔

کراٹے کے گرینڈ ماسٹر اشرف طائی کا میچ فکسنگ کا اعتراف

کراٹے کے گرینڈ ماسٹر اشرف طائی نے میچ فکسنگ کا اعتراف کر لیا۔انہوں نے1983 میں جرمنی کےہاورڈ جیکسن کےخلاف فائٹ فکس کی تھی۔پانچ لاکھ ڈالرز لے کر میچ ہار گئے تھے۔

پاکستان کے گرینڈ ماسٹر اشرف طائی نے میچ فکسنگ کا انکشاف کرتے ہوئے کہا ہےکہ مارشل آرٹس میں بہت فکسنگ ہوتی ہے۔

انہوں نے مزید کہا کہ جو میچ میں ہاراوہ ٹائٹل فائٹ نہیں تھی اور نہ ہی اس فائٹ کا تعلق پاکستان سے تھا،فائٹ پاکستان کے پرچم تلے نہیں لڑی تھی ۔

پی ایس ایل فائنل میں کھلاڑیوں کو سربراہ مملکت کے برابر سکیورٹی فراہم کی جائے گی

دبئی: پی سی بی نے پاکستان سپر لیگ کے لاہور میں ہونے والے فائنل کے لیے کھلاڑیوں کو سربراہ مملکت کے برابر سکیورٹی فراہم کرنے کی یقین دہانی کروائی ہے۔ 

پاکستان سپر لیگ کا فائنل لاہور میں کروانے کے حوالے سے ایک اجلاس میں لیگ میں شریک پانچوں ٹیموں کے انٹرنیشنل پلیئرز نے شرکت کی، حکام نے پلیئرز کو فائنل میچ کے حوالے سے لاہور میں سیکیورٹی انتظامات کے حوالے سے تفصیلی بریفنگ دی۔ پی ایس ایل کے چیئرمین نجم سیٹھی نے کہا کہ کھلاڑیوں کو سربراہان مملکت کے برابر سیکیورٹی فراہم کی جائے گی۔ پاکستان ٹیم کے سابق کپتان وسیم اکرم اور رمیز راجہ نے بھی کھلاڑیوں سے ملاقات کر کے انہیں فول پروف سیکیورٹی انتظامات کی یقین دہانی کروائی۔

پاکستان میں انٹرنیشنل کرکٹ کی بحالی کے لیے پی سی بی نے پاکستان سپر لیگ کے دوسرے ایڈیشن کا فائنل لاہور میں کروانے کا فیصلہ کررکھا ہے، اس حوالے سے  پلیئرز کی عالمی تنظیم نے بھی خدشات کا اظہار کیا جسے حکام نے مسترد کر دیا تھا۔

واضح رہے کہ اس سے قبل آئی سی سی ٹاسک فورس کے سربرا ہ جائلز کلارک کو دورہ پاکستان کے دوران ترک صدر کے سیکیورٹی پروٹوکول پر بریفنگ دی گئی اور غیر ملکی کرکٹرز کیلئے بھی اسی نوعیت کے انتظامات کی یقین دہانی کرائی گئی تھی۔

Google Analytics Alternative