کھیل

میڈرڈ اوپن: اعصام الحق کو پہلے رائونڈ میں شکست

ایونٹ کے مینز ڈبلز کے پہلے راؤنڈ میں اعصام اور ان کے پارٹنر رومانیہ کے فلورین مرگیا کا مقابلہ کروشیا کے میٹ پیوک اور آسٹریا کے اولیور ماراخ کی جوڑی سے ہوا۔

اعصام اور ان کے ساتھی کو میچ میں شکست ہوگئی۔اسکور 6-7 (5-7) 6-3 اور 10-8 رہا۔ واضح رہے کہ اعصام اور ان کے رومانوی پارٹنر نے گذشتہ ہفتےبارسلونا اوپن ٹائٹل جیتا تھا۔

پاکستان، ویسٹ انڈیز آخری ٹیسٹ کل شروع ہو گا

کھلاڑیوں نے فزیکل ٹریننگ کے ساتھ بولنگ ،بیٹنگ اور فیلڈنگ کی پریکٹس کی۔

تین ٹیسٹ کی سیریز ایک ایک سے برابر ہے۔ پہلے ٹیسٹ میں پاکستان نے ویسٹ انڈیز کو 7وکٹوں سے ہرایا تھا جبکہ دوسرے ٹیسٹ میں پاکستان کو 106رنز سے شکست کا سامنا کرنا پڑا تھا۔

ڈومینیکا ٹیسٹ سے قبل محمد عامر مشکل میں پڑ گئے

بائیں ہاتھ کے تیز بولر محمد عامر کے لئے دورہ ویسٹ انڈیز قدرے اطمینان بخش رہا ہے۔ وہ دو ٹیسٹ کے دوران گیارہ وکٹیں حاصل کر چکے ہیں ۔سیریز میں لیگ اسپنر یاسر شاہ کی 17وکٹوں کے بعد عامر دوسرے نمبر پر ہیں۔

جمیکا اور بارباڈوس کے ٹیسٹ میچوں میں محمد عامر دوسری اننگز میں متاثر کن بولنگ کا مظاہرہ کر نے میں ناکام ثابت ہوئے تھے،بارباڈوس ٹیسٹ کے بعد مینجمنٹ اور ساتھی کھلاڑیوںکے ساتھ گفتگو کرتے ہوئےانہوں نے ٹیسٹ کرکٹ کے بارے میں اپنی بولنگ کی خامیوں اور کوتاہیوں پر بات کی تھی۔

انہوں نے یہ تاثر بھی دیا کہ نسبتاً ون ڈے اور ٹی 20کے مقابلے میں ٹیسٹ کرکٹ قدرے محنت طلب کام ہے۔

گزشتہ ماہ اپنی 25ویں سالگرہ منانے والے محمد عامر نے اسپاٹ فکسنگ اسکینڈل میں پانچ سال کی پابندی کے بعد سے 13ٹیسٹ کھیلے ہیںجہاں انہوں نے 41وکٹیں حاصل کر رکھی ہیں۔

اکتیس اعشاریہ ستاون کی اوسط سے 27ٹیسٹ کھیلنے والے محمد عامر ٹیسٹ کرکٹ میں وکٹوں کی سنچری مکمل کر نے سے آٹھ وکٹ دور ہیں۔

تاہم ویسٹ انڈیز کے خلاف تیسرے ٹیسٹ سے پہلےوہ اس تشویش میں مبتلا ہیں کہ ٹیم مینجمنٹ اور ساتھی کھلاڑیوں سے ان کی گفتگو میڈیا تک کیسے پہنچی۔

اس بارے میں ویسٹ انڈیز میں ٹیم مینجمنٹ بھی تحقیقات کر رہی ہے،پابندی سے واپس آنے والے محمد عامر کے معاملات پر پاکستان کرکٹ بورڈ سخت نظر رکھے ہوئے ہے۔

محمد عامر کو دوسرے کھلاڑیوں کے مقابلے میں میڈیا سے آزادانہ انداز میں گفتگو کی اجازت بھی نہیں ہے۔

پاکستان میں انٹرنیشنل کرکٹ کی واپسی؛ ڈیرن سیمی حصہ بننے پر نہال

موہالی: لاہور میں پی ایس ایل فائنل کھیلنے پر سابق ویسٹ انڈین کپتان ڈیرن بدستور نہال ہیں، وہ کہتے ہیں کہ میں پاکستان میں انٹرنیشنل کرکٹ کی واپسی کا چھوٹا سا حصہ بننے پر بھی مطمئن ہوں۔

ڈیرن سیمی کی قیادت میں پشاور زلمی نے پاکستان سپر لیگ کا چیمپئن بننے کا اعزاز حاصل کیا تھا، وہ ان چند کھلاڑیوں میں سے ایک تھے جنھوں نے سیکیورٹی خدشات کی پروا نہ کرتے ہوئے لاہور میں پی ایس ایل کا فائنل کھیلے اور اسی وجہ سے انھیں یہاں پر کافی پذیرائی بھی حاصل ہوئی تھی۔ وہ ابھی تک اس کو نہیں بھول پائے ہیں۔ ان کا کہنا ہے کہ میں پاکستان میں انٹرنیشنل کرکٹ کی واپسی کے لیے چھوٹا سا حصہ ڈالنے پر کافی مطمئن ہوں۔

واضح رہے کہ ڈیرن سیمی اب ایک فری لانس کرکٹر ہیں اور دنیا بھر میں نجی لیگز کھیلنے میں مصروف رہتے ہیں۔ ان کی قیادت میں گذشتہ برس کے آغاز پر پر ویسٹ انڈیز نے دوسری مرتبہ ورلڈ ٹوئنٹی 20 چیمپئن بننے کا اعزاز حاصل کیا تھا تاہم اسی ایونٹ کی فاتح ٹرافی وصول کرنے کے موقع پر سیمی نے اپنے ویسٹ انڈین کرکٹ بورڈ کو شدید تنقید کا نشانہ بنایا تھا جس کی وجہ سے انھیں پھر انٹرنیشنل میچ کھیلنے کا موقع نہیں ملا۔

ڈیرن سیمی کا کہنا تھا کہ یہ کافی افسوسناک ہے کہ میرا آخری انٹرنیشنل ورلڈ ٹونئٹی 20 فائنل تھا، میں بدستور محدود اوورز کی کرکٹ کیلیے دستیاب ہوں مگر منتخب ہونے پر روتا نہیں ہوں، میں دنیا بھر میں مختلف لیگز کھیل رہا ہوں تاہم اگر ویسٹ انڈین بورڈ مجھے سلیکٹ کرتا ہے تو میں دستیاب ہوں لیکن میں ان لوگوں میں سے نہیں ہوں جو دودھ گرجانے پر رونے لگتے ہیں، میں ورلڈ ٹوئنٹی 20 جیتنے کے بعد جو کچھ کہا وہ میرے دل کی آواز تھی، میں نے وہی کہا جومجھے کہنا چاہیے تھا، اس کے بعد میں نے راتیں جاگ کر نہیں گزاریں، خدا نے مجھ پر بہت مہربانی کی ہے، وہی میرا سلیکٹر ہے، اس لیے اب جوکچھ ہوتا ہے مجھے اس کی کوئی پریشانی نہیں ہے، میں اب بھی ویسٹ انڈین کرکٹ کی فکر کرتا ہوں لیکن اگر وہ مجھے منتخب نہیں کرتے تو مجھے بھی کوئی پروا نہیں ہے۔

بختاور بھٹو بھی مکے بازی پر اتر آئیں

بختاور بھٹو زرداری نے آصفہ بھٹو زرداری کے ہمراہ دبئی میں رنگ کے کنگ عامر خان اور ان کی اہلیہ فریال مخدوم سے ملاقات کی ۔

اس موقع پردونوں بہنوں نے جوڑے کو بے نظیر بھٹو کی کتاب دی جبکہ بختاور بھٹو زرداری نےعامر خان کو اپنی باکسنگ کے جوہر بھی دکھائے ۔

آئی پی ایل: کولکتہ نے بنگلور کو4 اور گجرات نے پنجاب کو ہرا دیا

موہالی میں گجرات لائنز کے خلاف ہاشم آملہ کا بیٹ خوب چلا،آملہ نے صرف 60 گیندوں پر 104 رنز داغ دیئے ، جبکہ شان مارش نے بھی 58 رنز بنائے ۔کنگز الیون پنجاب کا اسکور 3وکٹ پر 189 رنز رہا ۔

جواب میں گجرات کے ڈیوائن اسمتھ نے شاندار بیٹنگ کی انہوںے صرف 39 گیندوں پر 74 رنز بناکر ٹیم کو جیت کی راہ پر ڈال دیا،جس کے بعد رائنا اور کارتک نے ٹیم کو میچ جتوادیا۔

اس سے پہلے کھیلے گئے میچ میں رائل چیلنجر بنگلورز کے سپرااسٹارز پھر ناکام ہو گئے۔ گیل صفر ،کوہلی 5اور ڈی ویلیئرز10 رنز بناسکے۔ ٹریوس ہیڈ نے 75 رنز بنائے اور ٹیم کااسکور6 وکٹ پر 158 تک پہنچا دیا۔

جواب میں کولکتہ کے اوپنرز نے میچ یکطرفہ بنا دیا۔ کرس لائن نے 22 گیندوں پر پر 50 رنزبنائے ، جبکہ سنیل نارائن نے 17 گیندوں پر 54 رنز داغ کر ٹورنامنٹ کی تیز ترین نصف سنچری اسکور کی۔دیگر بلے بازوں نے سولہویں اوور میں ٹیم کو 6وکٹ سے فتح دلا دی۔

ایونٹ میں آج سن رائزرز حیدرآباد اور ممبئی انڈینز آمنے سامنے ہونگے، میچ حیدرآباد دکن میں شام ساڑھے 7 بجے کھیلا جائےگا۔ ایونٹ کے تمام میچز جیو سپر پر براہ راست نشر کیے جائیں گے۔

لارڈز ون ڈے: انگلینڈ کا آئرلینڈ کیخلاف کلین سوئپ

میزبان ٹیم نے پہلے کھیلتے ہوئے مقررہ اوورز میں 6وکٹ پر 328رنز کا مجموعہ حاصل کیا۔ جونی بیئرسٹو 72 رنز پر ناٹ آئوٹ رہے، جبکہ جو روٹ 73،کپتان اوئن مورگن76اور عادل راشد 39 رنز کے ساتھ نمایاں رہے۔

آئرش سائیڈ329رنز کے ہدف کے تعاقب میں 243 کے اسکور پر ہمت ہارگئی۔ ولیم پورٹر فیلڈ نے 82 اور پال اسٹرلنگ نے 48 رنز کے ساتھ مزاحمت کی۔انگلشٹیم کی جانب سے لیام پلنکٹ اور جو روٹ نے تین تین وکٹ لیے۔

بھارت نے آئی سی سی چیمپئنز ٹرافی کیلئے ٹیم کا اعلان کردیا

نئی دلی: بھارت نے آئی سی سی چیمپئنز ٹرافی کے لئے ٹیم کا اعلان کر دیا ہے جس میں ویرات کوہلی کو ٹیم کا کپتان برقرار رکھا گیا ہے۔

بھارتی میڈیا کے مطابق بی سی سی آئی نے آئی سی سی چیمپئنز ٹرافی کے لئے اپنی ٹیم کا اعلان کر دیا ہے جس کے لئے ویرات کوہلی کو ٹیم کا کپتان برقرار رکھا گیا ہے۔ دیگر کھلاڑیوں میں مہندرا سنگھ دھونی، یووراج سنگھ، شیکر دھون،  روہت شرما، اجنکیا رہانے، امیش یادیو، رویندرا جڈیجا، روی چندرن ایشون، محمد شامی، بھونیشور کمار، ہردیک پانڈے اور جسپریت بمراہ شامل ہیں۔

واضح رہے کہ گزشتہ روز بی سی سی آئی نے آئی سی سی اور بھارتی سپریم کورٹ کے دباؤ میں آ کر چیمپئنز ٹرافی میں شرکت کا فیصلہ کیا تھا۔ آئی سی سی چیمپئنز ٹرافی یکم جون سے 18 جون تک انگلینڈ کے 3 شہروں میں کھیلی جائے گی جس میں پاک بھارت ٹاکرا 4 جون کو شیڈول ہے۔ بی سی سی آئی نے 14 روز کی تاخیر کے بعد ٹیم کا اعلان کیا۔

Google Analytics Alternative