کھیل

لارڈز ٹیسٹ:پاکستان کا انگلینڈ کو 283رنز کا ہدف

لارڈز  ٹیسٹ کے چوتھے روز پاکستان کی پوری ٹیم 215رنز بناکر آؤٹ ہوگئی، یوں انگلینڈ کو میچ جیتنے کیلئے 283رنز کا ہدف ملا ہے۔

لارڈز میں کھیلے جارہے پہلے ٹیسٹ میں پاکستان نے 214رنز 8کھلاڑی آؤٹ پر نامکمل اننگز شروع کی، لیکن دونوں وکٹیں اسکور میں صرف ایک رن کے اضافے پر گرگئیں، یاسر شاہ آج اسکور میں کوئی اضافہ کئے بغیر30 رنز بناکر آئوٹ ہوئے، محمد عامر صرف ایک رن بناکر براڈ کی گینڈ پر وکٹ کے پیچھے کیچ آؤٹ ہوگئے۔

یوں پاکستان کی پوری ٹیم 215رنز بناکر آؤٹ ہوگئی،انگلینڈ کی طرف سے ووکس نے 5،اسٹیورٹ براڈ نے تین جبکہ معین علی نے دو کھلاڑیوں کو آؤ ٹ کیا۔

پاکستان اور انگلینڈ کے درمیان پہلے ٹیسٹ میں میزبان ٹیم کوبڑا ہدف عبور کرکے تاریخ کو تبدیل کرنا ہوگا۔لارڈز میں ویسٹ انڈیز کی ٹیم انگلینڈ کے خلاف 344رنز کا ہدف عبور کرکے میچ نو وکٹ سے جیت چکی ہے۔

اس تاریخی گراؤنڈ میں1984میں ویسٹ انڈیز نے میزبان ٹیم کے خلاف بڑا ہدف عبور کیا تھا۔انگلش ٹیم یہاں سب سے بڑااسکور282رنز بناکر نیوزی لینڈ کو شکست سے دوچار کر چکی ہے۔لندن کے اس گراؤنڈ میں انگلینڈ کو زیادہ کامیابی نہیں مل سکی ہے۔

گذشتہ پانچ میں صرف ایک ٹیسٹ میں کامیابی انگلینڈ کا مقدر بنی ہے۔اس سال یہاں انگلینڈ اور سری لنکا کا ٹیسٹ میچ بھی ڈرا ہوگیا تھا

یاسرہ شاہ 13 ٹیسٹ میچوں میں 82 وکٹیں لینے والے پہلے بولر

لاہور : شاباش یاسر شاہ شاباش ایک اور معرکہ سر کر لیا۔ تیرہویں میچ میں بیاسی وکٹیں گرا کر ٹیسٹ کرکٹ میں ایک اور تاریخ لکھ دی۔

لارڈز کے تاریخی میدان میں یاسر شاہ نے ایک اور تاریخ لکھ دی۔ کیرئر کے پہلے تیرہویں میچ میں بیاسی شکار کر کے وہ ریکارڈ ہولڈر بن گئے۔ ٹیسٹ کرکٹ کی 139 سالہ تاریخ کا ریکارڈ توڑ ڈالا۔ یاسر شاہ سے پہلے تیرہ ٹیسٹ میچوں میں اکاسی وکٹوں کا کارنامہ آسٹریلوی فاسٹ بولر چارلی ٹرنر نے دکھایا تھا ۔ اس بات کو بھی گذرے ایک سو پچیس سال گذر گئے ہیں۔ اس سے پہلے وہ ایک اننگز میں پانچ وکٹیں حاصل کرنے پر لارڈز کے اعزازی بورڈ پر سنچری میکر کپتان کے ساتھ اپنا نام درج کرا چکے ہیں۔ لارڈز میں پانچ وکٹوں کے کارنامے سے یاسر شاہ نے موجودہ بولنگ کوچ مشتاق احمد کی بیس سال پہلے کی شاندار پرفارمنس یاد دلا دی۔ یاسر شاہ اسی تاریخی میدان میں پانچ وکٹوں کا کارنامہ دکھانے والے چھٹے پاکستانی بولر بن گئے ۔ ان سے پہلے خان محمد، مدثر نذر، وقار یونس، مشتاق احمد اور محمد عامر کے نام تھے

 

لارڈز ٹیسٹ، دوسری اننگز میں پاکستان آٹھ وکٹ پر 214 رنز بنا سکے

لارڈز: لارڈز ٹیسٹ میں دوسری اننگز میں پاکستان کے ٹاپ آرڈرز بلے باز پھر دھوکہ باز نکلے ۔ خدا خدا کر کے آٹھ وکٹ پر 214 رنز بنا سکے ۔ انگلینڈ کے خلاف مجموعی برتری دو سو اکاسی رنز ہو گئی ۔ یاسر شاہ کے 6شکار کے بعد انگلش گیند باز کرس ووکس نے بھی 5 وکٹیں اڑائیں۔

تیسرے روزانگلینڈ نے پہلی نامکمل اننگز 7 وکٹ پر 253 رنز سے شروع کی۔ سٹوارٹ براڈ 17 رنز بنا کر وہاب ریاض کا نشانہ بنے۔ سٹیون فن کو یاسر شاہ نے 5 رنز پر میدان بدر کیا یہ ان کی اننگز میچ کی چھٹی وکٹ تھی ۔ جیک بال 4 رنز بنا کر رن آؤٹ ہوئے۔ انگلش ٹیم کا سفر 272 پر تمام ہوا ۔ اس طرح پاکستان کو 67رنز کی برتری ملی۔ پاکستان کی دوسری اننگز کا آغاز مایوس کن رہا ۔ سٹوارٹ براڈ کی گیند پر محمد حفیظ صفر پر پویلین لوٹے ۔ دوسرے اوپنر شان مسعود کو 24 رنز پر کرس ووکس نے چلتا کیا۔ اظہر علی 23 رنز پر کرس ووکس کا دوسرا شکار بنے۔ یونس خان کی 25 اور پہلی اننگز کے سنچری میکر مصباح الحق کی صفر پر واپسی ہوئی ۔ دونوں کو معین علی نے آؤٹ کیا۔ لڑکھڑاتی بیٹنگ کو اسد شفیق نے 49 اور سرفراز احمد نے 45 رنز کا سہارا دیا ۔ دونوں کرس ووکس کی تیسری اور چوتھی وکٹ بنے۔ وہاب ریاض کھاتا کھولے بغیر کرس ووکس ہی کی جارحانہ باؤلنگ کی زد میں آئے۔ یاسر شاہ کیرئیر بیسٹ 30رنز بنا کر کریز پر موجود ۔ محمد عامر صفر پر ناٹ آؤٹ ہیں۔ انگلش باؤلر کرس ووکس میچ میں اب تک 11 قومی بلے بازوں کو ٹھانے لگا چکے ہیں۔ پاکستان نے پہلی اننگز میں 339رنز بنائے تھے

محمد حفیظ پر عائد پابندی آج ختم ہوجائے گی

لاہور : بائیو مکینک ٹیسٹ میں ناکامی کے بعد آئی سی سی نے قومی کرکٹر کے بائولنگ کرنے پر ایک سال کی پابندی عائد کر دی تھی. قومی اوپنر محمد حفیظ پر آئی سی سی کی جانب عائد ایک سال کی پابندی آج ختم ہوجائے گی ۔ ایک سال پہلے سری لنکا کے خلاف میچ میں محمد حفیظ کا بائولنگ ایکشن مشکوک قرار دیا گیا تھا اور بائیو مکینک ٹیسٹ میں ناکامی کے بعد آئی سی سی نے قومی آل رائونڈر کے بائولنگ کرانے پر ایک سال کی پابندی عائد کردی جو آج ختم ہوجائے گی ۔ محمد حفیظ نے انگلینڈ میں ٹریننگ کیمپ کے دوران بھرپور بائولنگ پریکٹس کی لیکن آئی سی سی کے سرکاری ٹیسٹ سے پہلے وہ ایک بار نجی طور پر ٹیسٹ کرانا چاہتے ہیں ۔ ذرائع کے مطابق محمد حفیظ کے بائولنگ ایکشن ٹیسٹ کے حوالے سے ٹیم مینجمنٹ لارڈز ٹیسٹ کے بعد حتمی فیصلہ کرے گی

 

پاکستانی باکسر محمد وسیم نے انٹرنیشنل پروفیشنل سلور ٹائٹل جیت لیا

سیول : محمد وسیم نے سخت مقابلے کے بعد فلپائن کے باکسر جیتھر اولیوا کو شکست دے کر کامیابی اپنے نام کی . پاکستانی باکسر محمد وسیم نے انٹرنیشنل پروفیشنل سلور ٹائٹل اپنے نام کر لیا ، سیول میں ہونے والے ایونٹ کے فائنل میں پاکستانی کھلاڑی نے اپنے فلپائنی حریف جیتھر اولیوا کو سخت مقابلے کے بعد شکست دے کر ٹائٹل جیتنے کا اعزاز حاصل کیا ۔ محمد وسیم اس سے قبل مختلف عالمی مقابلوں میں 11 ٹائٹل اپنے نام کرچکے ہیں ۔ انہوں نے کامن ویلتھ ، کمبیٹ گیمز ، کنگز کپ میں بھی مختلف میڈلز اپنے نام کئے ہیں

 

ؒلارڑز ٹیسٹ ،پاکستان پہلی اننگز میں 339 رنز بنا کر آوٹ

لارڑز ٹیسٹ کے دوسرے روز پاکستانی ٹیم پہلی اننگز میں 339 رنز بنا کر آئوٹ ہوگئی۔ دوسرے روز جب پاکستان کی ٹیم نے 282 رنز6 کھلاڑی آئوٹ سے کھیل کا آغاز کیا تو ابتداء ہی میں اسے پہلا نقصان سرفراز احمد کی شکل میں اٹھانا پڑا۔ وہ25 رنز بنا کر ،ووکس کا شکار ہوئے ۔ اس وقت ٹیم کا مجموعی اسکور 310 رنز تھا۔سرفراز کے جانے کے بعد آنے والے کھلاڑی وہاب ریاض بغیر کوئی رن بنائے پویلین لوٹ گئے ۔ وہ ووکس کی گیند پر بولڈ ہوئے ۔310 رنز کے مجموعے پریکے بعد دیگرے دو وکٹ گر جانے کے بعد محمد عامر اپنے کپتان کا ساتھ دینے کے لیے آئے اور اپنا کھاتہ چوکے سے کھولا ۔

جب ٹیم کا اسکور 316 پر پہنچا تو پاکستان ٹیم کو اپنے کپتان مصباح الحق کی قیمتی وکٹ کا نقصان اٹھانا پڑا وہ 305 گیندوں پر 114 رنز کی میراتھن اننگ کھیل کر آئوٹ ہوئے۔ ان کو اسٹیورٹ براڈ نے بولڈ کیا۔316 رنز پر نو وکٹ گرجانے کے بعد آخری کھلاڑی یاسرشاہ ، محمد عامر کا ساتھ دینے کے لیے آئے اور اس موقع پر دونوں کے درمیان 23 رنز کی شراکت قائم ہوئی ۔

پاکستان کو عامر کی آخری وکٹ کا نقصان 339 رنز پر اٹھانا پڑا۔ وہ 12 رنز بنا کر براڈ کا شکار بنے اور یوں پاکستان کی پوری ٹیم 339 رنز بنا کر آئوٹ ہوگئی۔

یوں پاکستان ٹیم اپنے گزشتہ روز کے اسکور میں آج4 وکٹ پر صرف 57 رنز کا ہی اضافہ کر سکی

لارڈز ٹیسٹ، انگلینڈ کیخلاف پاکستان کی بیٹنگ جاری

لارڈز ٹیسٹ میں پاکستان کی انگلینڈ کے خلاف بیٹنگ جاری ہے۔ مصباح الیون نےاب سے کچھ دیر پہلے تک 4 وکٹوں کے نقصان پر بیٹنگ جاری ہے۔

لارڈز: (ویب ڈیسک) چار میچوں کی سیریز کے افتتاحی میچ میں مصباح الحق نے ٹاس جیت کر بیٹنگ کا فیصلہ کیا۔ شان مسعود سات رنز بنا کر پویلین لوٹ گئے۔ محمد حفیظ نے چالیس رنز بنائے۔ آؤٹ ہونے والے تیسرے بلے باز اظہر علی تھے جو سات رنز بنا سکے ۔ یونس خان نے 33رنز کی اننگز کھیلی ۔ دونوں اوپنرز کو کرس ووکس نے آؤٹ کیا۔ لارڈز ٹیسٹ کے لیے پاکستان نے بائیں ہاتھ کے تین فاسٹ بولرز محمد عامر، راحت علی ،وہاب ریاض اور ایک سپن بولر یاسر شاہ کو ٹیم میں شامل کیا ہے

ہم انگلینڈ میچز جیتنے اور اچھا رویہ دکھانے آئے ہیں ، شہریار خان

لنڈن : کھلاڑی پروپیگنڈا بھول کر صرف میچ پر توجہ دیں، چیئرمین پی سی بی شہریار خان کی ٹیم کو ہدایتلارڈز ٹیسٹ سے قبل چیئرمین پی سی بی شہریار خان نے کھلاڑیوں سے ملاقات کر کے ان کی خوب حوصلہ افزائی کی ہے ۔

چھ سال بعد گرین شرٹس کا لارڈز کے میدان میں بڑا امتحان ہے، شہریار خان نے حوصلہ افزائی کیلئے  قومی کرکٹرز کیساتھ ملاقات کی ۔ انہوں نے گرین شرٹس کو منفی پراپیگنڈا کو بھول کر میچ پر توجہ دینے کا مشورہ دیا ۔

چیئرمین پی سی بی کا یہ بھی کہنا تھا کہ پاکستان کے مثبت امیج کو اجاگر کرنا سب کی ذمہ داری ہے ۔ کرکٹ ایک جینٹیل مین گیم ہے اور اسے ایسے ہی کھیلنا چائیے ۔ انہوں نے کہا کہ قومی ٹیم فیلڈ اور آف دی فیلڈ اچھی پرفارمنس کا مظاہرہ کرے

Google Analytics Alternative