کھیل

’ فیفا‘ کاغزہ پٹی میں 20 فٹ بال اسٹیڈیم تیار کرنے کا اعلان

فٹ بال کی بین الاقوامی فیڈریشن ’ فیفا‘ کے ایک اعلیٰ اختیاراتی وفد نے دورہ غزہ کے اختتام پر غزہ پٹی میں 20 فٹ بال اسٹیڈیم تیار کرنے کا اعلان کیا ہے۔گزشتہ دنوں ’’فیفا‘‘ کا وفد نے غزہ کا دورہ کیا تھا۔

وفد نے غزہ کی پٹی میں تین روز تک قیام کیا اور یہاں پر فٹ بال کی سرگرمیوں اور کھیل کے شعبے میں درپیش مسائل سے آگاہی حاصل کرنے کے بعد مصنوعی گھاس سے بنائے گئے ایک فٹ بال اسٹیڈیم کا افتتاح کیا۔

فلسطینی فٹ بال فیڈریشن کے ترجمان مصطفیٰ صیام کا کہنا ہے کہ فیفا غزہ کی پٹی میں فٹ بال کے 20 اسٹیڈیم تعمیرکرنا چاہتا ہے۔اس مقصد کے لیے فیفا کی طرف سے دس لاکھ ڈالر کی رقم مختص کی گئی ہے۔

ان میں سے سات اسٹیڈیم بیت لاھیا، النصیرات، الزھرہ، دیر البلح اور دیگر مقامات پر قائم کئے جائیں گے۔

گرین کیپس کو تاریخی رسوائی سے بچنے کا چیلنج درپیش

ہیملٹن: کیویز کے دیس میں30 سال سے سیریز میں ناقابل شکست گرین کیپس کو اب تاریخی رسوائی سے بچنے کا چیلنج درپیش آ گیا، مہمان ٹیم کو ہیملٹن میں شیڈول دوسرے ٹیسٹ میں لازمی فتح درکار ہوگی، مقابلہ پاکستانی وقت کے مطابق بدھ اور جمعرات کی درمیانی شب شروع ہوگا، چار فاسٹ بولرز کے ساتھ میدان سنبھالا جا سکتا ہے، قائمقام کپتان اظہر علی نے یاسر شاہ کو آرام دینے کا عندیہ دے دیا۔

کوچ مکی آرتھر نے کہاکہ فائنل الیون کا انتخاب کنڈیشنز کی اچھی طرح جانچ کے بعد کریں گے، محمد رضوان بظاہر مڈل آرڈر میں مصباح الحق کی جگہ سنبھالنے کے مضبوط امیدوار دکھائی دے رہے ہیں، شرجیل خان کو کھلانے کی صورت میں بیٹنگ آرڈر کو چھیڑنا پڑے گا۔ دوسری جانب کیویز چار رکنی فاسٹ بولنگ اٹیک کو برقراررکھیں گے۔

تفصیلات کے مطابق پاکستان کو نیوزی لینڈ کے ہاتھوں گذشتہ 30 برس کے دوران ایک مرتبہ بھی ٹیسٹ سیریز میں شکست نہیں ہوئی، اس سلسلے کو برقرار رکھنے کیلیے لازمی طور پر ہیملٹن ٹیسٹ میں کامیابی حاصل کرنا ہوگی، مقابلہ ڈرا ہونے کی صورت میں بھی سیریز میزبان ٹیم کے نام ہوجائے گی۔

پاکستان کو اپنے مرد بحران مصباح الحق کی خدمات میسر نہیں جنھیں سسر کے انتقال کی وجہ سے وطن واپس لوٹنا پڑا، اگر ایسا نہ بھی ہوتا تب بھی سلو اوور ریٹ کے باعث لگنے والی پابندی کی وجہ سے وہ یہ ٹیسٹ نہ کھیل پاتے۔

کیویز نے آخری مرتبہ پاکستان کے خلاف سیریز میںکامیابی1985 میں حاصل کی تھی، دونوں ٹیموں کے درمیان آخری بار ہیملٹن میں مقابلہ 6 برس قبل ہوا جس میں میزبان ٹیم دوسری اننگز میں ریت کی دیوار ثابت ہوئی تھی، اس کی آخری 8 وکٹیں صرف 50 رنز کے دوران گرگئی تھیں، پاکستان نے یہ میچ 10 وکٹ سے جیت لیا تھا، وہاب ریاض نے تب تین وکٹیں لی تھیں، اس بار بھی انھیں میدان میں اتارے جانے کا امکان ہے۔

قائمقام کپتان اظہر علی نے عندیہ دیا کہ اس مقابلے میں لیگ اسپنر یاسر شاہ کو باہر بٹھایا جا سکتا ہے، یوں مہمان ٹیم چارفاسٹ بولرز کے ساتھ میدان سنبھالے گی۔ کپتان اظہر علی نے کہاکہ بیٹنگ یونٹ کے طور پرہمیںاچھا کھیل پیش کرنے کی ضرورت ہے، مصباح الحق کی غیرموجودگی کے حوالے سے انھوں نے کہا کہ ہم ان کی کمی محسوس تو کریں گے لیکن اس صورتحال سے نمٹنا ہے، ان کی جگہ جو بھی آیا اس کے پاس رنز بنانے اور ہمیں مڈل آرڈر میں استحکام دینے کا موقع موجود ہوگا۔

ادھر کوچ مکی آرتھر نے کہاکہ کافی عرصے سے ٹیم کے ساتھ موجود محمد رضوان بھی الیون میں مصباح الحق کی جگہ سنبھال سکتے ہیں، شرجیل خان کی صورت میں ہمارے پاس ایک اور آپشن بھی موجود ہے تاہم انھیں ٹاپ پر کھلانے کی صورت میںاظہر کو ون ڈاؤن پر جانا اور بابر اعظم کو مڈل آرڈر میں کھیلنا ہوگا، اس حوالے سے کوئی بھی فیصلہ کنڈیشنز کی اچھی طرح جانچ کے بعد ہی کریں گے۔

کلائی کی انجری سے نجات کے بعد مچل سینٹنر دوبارہ ٹیم میں لوٹ چکے،ٹوڈایسٹل کی جگہ وہ کھیل سکتے ہیں۔ٹرینٹ بولٹ، ٹم ساؤتھی، نیل ویگنر اور کولن ڈی گرینڈ ہوم کی پرفارمنس سے کپتان کین ولیمسن کافی خوش اور دوسرے ٹیسٹ میں بھی انھیں اپنے فاسٹ اٹیک سے بہت زیادہ امیدیں وابستہ ہیں۔

دوسرے ٹیسٹ میں مصباح الحق کی کمی محسوس ہوگی، مکی آرتھر

ہیملٹن میں پاکستان کرکٹ ٹیم کے کوچ مکی آرتھر نے غیر ملکی ویب سائٹ کو دیئے گئے انٹرویو میں کہا کہ نیوزی لینڈ کے خلاف دوسرے ٹیسٹ میں مصباح الحق کی کمی محسوس ہوگی، اگر آپ کسی میچ میں اپنے رہنما سے محروم ہوجاتے ہیں تو یہ سخت لمحہ ہوتا ہے۔

انھوں نے کہا کہ ٹیم کی قیادت کوئی نہ کوئی تو کرے گا لیکن مصباح کا متبادل لانا بہت مشکل ہے، وہ طویل مدت سے قابل اعتماد کپتان ہیں۔

ہیملٹن ٹیسٹ میں محمد رضوان مڈل آرڈر میں ہمارے پاس اچھا بیٹسمین ہے جو کافی عرصے سے ٹیم کے ساتھ ہے، اگر ٹاپ آرڈر میں شرجیل کو کھلایا گیا تو پھر ہمیں ٹیم میں کافی ردوبدل کرنا پڑے گا۔

مکی آرتھر نے کہا کہ ٹیم مینجمنٹ ٹیسٹ میچ کی پچ دیکھ کر پلئیرز کو کھلانے کا فیصلہ کرے گی۔

آرمی چیف راحیل شریف کے ساتھ اسٹیڈیم کا افتتاح کرنا میرے لیے باعث فخر ہے- شاہد آفریدی

خیبر ایجنسی: مایہ ناز کھلاڑی شاہد آفریدی کا کہنا ہے کہ آرمی چیف راحیل شریف کے ساتھ اسٹیڈیم کا افتتاح کرنا میرے لیے باعث فخر ہے جب کہ وہ نہ صرف میرے بلکہ پورے پاکستان کے ہیرو ہیں۔

سابق کپتان پاکستان کرکٹ ٹیم شاہد آفریدی نے سماجی رابطے کی سائٹ ٹوئٹر پر کہنا تھا کہ خیبر ایجنسی میں آرمی چیف راحیل شریف کے ساتھ اسٹیڈیم کا افتتاح کرنا میرے لیے باعث فخر ہے، آرمی چیف نہ صرف میرے بلکہ پورے پاکستان کے ہیرو ہیں۔

View image on Twitter

شاہد آفریدی نے کہا کہ مجھے سپورٹ کرنے پر آرمی چیف کا بے حد مشکور ہوں اور جو کام پاکستان کے لیے جنرل راحیل نے کیے ہیں اس پر تہہ دل سے ان کا شکریہ ادا کرتا ہوں۔

کوہلی بال ٹیمپرنگ کرتے ہوئے پکڑے گئے، آئی سی سی کا کارروائی سے انکار

ممبئی: بھارتی ٹیسٹ کرکٹ ٹیم کے کپتان ویرات کوہلی بال ٹیمپرنگ کرتے ہوئے رنگے ہاتھوں پکڑے گئے تاہم آئی سی سی نے ان کے خلاف کسی قسم کی کارروائی کرنے سے انکار کردیا۔

انگلینڈ کے خلاف راجکوٹ میں کھیلے گئے پہلے ٹیسٹ میں بھارتی کپتان ویرات کوہلی  گیند کے ساتھ چھیڑ چھاڑ کرتے پکڑے گئے ہیں، اس حوالے سے ایک ویڈیو بھی سامنے آئی ہے جس میں کوہلی چیونگم چباتے ہوئے اس  پر ہاتھ لگا رہے ہیں اور پھر وہی ہاتھ  گیند پر رگڑ رہے ہیں۔ویڈیو میں صاف دیکھا جاسکتا ہے کہ بھارتی کپتان گیند کو شائن کرنے کی غیر قانونی کوشش کررہے ہیں تاکہ ان کے بالرز کو گیند کی شائننگ سے فائدہ اٹھاسکیں۔

ویرات کوہلی کی اس حرکت پر  ہلچلل مچی ہوئی ہے اور مبصرین نے آئی سی سی سے اس معاملے پر فوری اور سخت نوٹس لینے کا مطالبہ کیا ہے تاہم انٹرنیشنل کرکٹ کونسل اس معاملے پر روایتی چشم پوشی کا مظاہرہ کرتے ہوئے جانبداری کا مظاہرہ کررہی ہے،آئی سی سی کا موقف ہے کہ اس ویڈیو کی بنیاد پر کوہلی کے خلاف کوئی کارروائی نہیں کی جاسکتی کیونکہ یہ 9 دن پرانا واقعہ ہے اور قانون کے مطابق  کسی بھی قسم کی شکایت اس واقعے کے 5 دن کے اندر کی جاسکتی ہے۔

واضح رہے کہ منگل ہی کے روز جب کوہلی کی یہ ویڈیو سامنے آئی ہے وہیں آئی سی سی نے پروٹیز کپتان فاف ڈوپلیسی پر بال ٹیمپنگ کا الزام ثابت ہونے ہر میچ فیس کا 100 فیصد جرمانہ عائد کیا ہے۔

شاہد آفریدی اگرپرفارم کرینگےاور ٹیم کوان کی ضرورت ہوگی تو انہیں شامل کیاجائے گا-انضمام الحق

قومی کرکٹ ٹیم کے چیف سلیکٹر انضمام الحق نے کہا ہے کہ شاہد آفریدی اگرپرفارم کرینگےاور ٹیم کوان کی ضرورت ہوگی تو انہیں شامل کیاجائے گا،عامر کی بالنگ بہت بہترین ہے لیکن وہ اس طرح پرفارم نہیں کررہے، چیف سلیکٹر نے اسد شفیق کی کارکردگی پر بھی عدم اطمینان کا اظہار کردیا۔

انضمام الحق نے کہا کہ بہتر پرفارمنس اور ٹیم میں جگہ ہونے پر کھلاڑیوں کو شامل کیاجاتاہے، اگر کوئی اچھی پرفارمنس کررہاہوگا تو اسے ضرور سلیکٹ کیا جائےگا۔

ملک کی سیاست کے حوالے سے ایک سوال کے جواب میں انضمام الحق نے کہا کہ ان کا سیاست میں آنے کا کوئی ارادہ نہیں ہے۔

چیف سلیکٹر کا کہنا تھا کہٹیلنٹ کو آرگنائز کرنے کی ضرورت ہے، بہت سارے نئے کھلاڑی فرسٹ کلاس میں اچھی پرفارمنس دے رہےہیں، انہیں کیمپ میں بلا کر ٹریننگ دیں گے۔

انہوں نے کہا کہ اسد شفیق میں جتنا ٹیلنٹ ہے ،اس نے اتنی پرفارمنس نہیں دی،محمد عامر کی بولنگ بہت بہترین ہے،لیکن ویسی پرفارمنس نہیں دے رہا جیسی پہلے دیتا تھا، امید ہے بہت جلد اپنی پرانی پرفارمنس دے گا۔

انضمام الحق نے کہا کہ مصباح کی غیر موجودگی میں ٹیم کی قیادت اظہر علی کریں گے،یونس خان انہیں اچھا گائیڈ کرسکتے ہیں،اظہر کے لیے اچھا موقع ہے کہ سینئر کھلاڑی یونس خان ٹیم میںموجود ہے۔

ہماری ٹیم کو برداشت اوراعتماد کی ضرورت ہے ، ہماری اکیڈمی کے کوچز بہت زبردست ہیں،جاوید میانداد سے بہت کچھ سیکھا ہے۔

انضمام الحق نے بتایا کہ عمراکمل اور احمد شہزاد کو ڈسپلن کی خلاف ورزی پر سزادی تھی، سلمان بٹ کو میں نے فرسٹ کلاس کھیلنے کی اجازت دی۔

انہوں نے کہا کہ ویوین رچرڈز اور برائن لارا پسندیدہ کھلاڑی ہیں، وسیم اکرم اور وقار یونس بہترین بولر ہیں، دور حاضر میں ورات کوہلی بہت اچھا کھلاڑی ہے اور ہاشم آملہ بہت بہترین کھیلتا ہے۔

چیف سلیکٹر کا کہنا تھا کہ شرجیل خان اگر کریز پر رک جائےتو اسکور کرتاہے، اچھی اوسط کی وجہ سے اسے ٹیسٹ اسکواڈ میں شامل کیا۔

انضمام الحق کا کہنا تھا کہ پاکستان کرکٹ بورڈپی ایس ایل فائنل پاکستان میں کرانے کی کوشش کررہاہے،پی سی بی کے اقدامات سے پاکستان میں کرکٹ واپس لانے میں آسانی ہوگی۔

انہوں نے کہا کہ جنید خان کو ویسٹ انڈیز کے خلاف سائیڈ گیم میںکپتان بنایا تھا، جنید خان کاآپریشن ہوا ہے،اسے ریکور کرنےکےلیے وقت درکار ہے، اللہ کرے وہ جلد ی پرانی پرفارمنس پر آجائے۔

عالمی شہریت یافتہ پاکستانی کوہ پیما حسن سدپارہ انتقال کرگئے

راولپنڈی: عالمی شہریت یافتہ پاکستانی کوہ پیما حسن سدپارہ راولپنڈی میں انتقال کر گئے۔

دنیا بھر کی بلند چوٹیوں اور پہاڑوں پر پاکستان کا پرچم سربلند کرنے والے عالمی شہرت یافتہ کوہ پیما حسن سدپارہ راولپنڈی میں 53 برس کی عمر میں انتقال کرگئے، وہ کئی ماہ سے کینسر کے مرض میں مبتلا تھے اور راولپنڈی کے نجی اسپتال میں زیرعلاج تھے تاہم دوران علاج آج صبح حسن سدپارہ کی حالت بگڑی اور وہ دنیا فانی سے کوچ کرگئے۔

واضح رہے حسن سدپارہ ماؤنٹ ایورسٹ سمیت دنیا کی 8 بلند ترین چوٹیاں سر کرنے والے پہلے پاکستانی تھے۔

بھارت نے دوسرے ٹیسٹ میں انگلینڈ کو 246 رنز سے شکست دیدی

وشاکا پٹنم: بھارتی ٹیم نے دوسرے ٹیسٹ (Visakhapatnam Test)میچ میں انگلینڈ کو 246 رنز سے شکست دے دی ، بھارتی کپتان ویرات کوہلی کو بہترین اننگ کھیلنے پر مین آف دی میچ قرار دیا گیا۔

تفصیلات کے مطابق بھارت نے دوسرے ٹیسٹ میچ میں انگلینڈ کو شکست دے کر سیریز میں ایک صفر سے برتری حاصل کرلی ، میزبان ٹیم نے ٹاس جیت کر پہلے بیٹنگ کرنے کا فیصلہ کیا۔

بھارت نے پہلی اننگ میں 455 رنز بنائے جس میں کوہلی کے 167 سکور بھی شامل تھے ، جواب میں انگلینڈ ٹیم پہلی اننگ میں صرف 255 رنز بنا سکی۔

بھارتی ٹیم دوسری اننگ میں 204 رنز بنا سکی ، کپتان ویرات کوہلی نے 81 رنز کی اننگ کھیلی جواب میں انگلش ٹیم صرف 158 رنز بنا سکی۔

Google Analytics Alternative