کھیل

ویرات کوہلی دنیا کا بہترین بلے باز ہے، وسیم اکرم

نئی دلی: پاکستان کے سابق کپتان اور سوئنگ کے بے تاج بادشاہ وسیم اکرم نے بھارتی بلے ویرات کوہلی کو دنیا کا بہترین بلے باز قرار دے دیا۔اپنے ایک انٹرویو میں وسیم اکرم کا کہنا تھا کہ کھلاڑی پر ایک وقت آتا ہے جب وہ سیکھتا ہے کہ کیسے رنز بنانے ہیں، ویرات کوہلی دنیا کا بہترین بلے باز ہے اور وہ کرکٹ کے تمام فارمیٹس میں مہارت کے ساتھ کھیلتا ہے۔ ان کا کہنا تھا کہ ویرات کوہلی کو بولنگ کرانا مشکل ہوتا ہے، اگر میں بھی ہوتا تو مجھے بھی کوہلی کو گیند کرانے میں مشکل پیشٰ آتی۔

پاکستانی ٹیم کو ہندوستان جانے کی اجازت مل گئی

کراچی: ہندوستانی حکام کی سیکیورٹی ضمانت کے بعد حکومت پاکستان نے قومی ٹیم کو ورلڈ ٹی ٹوئنٹی 2016 میں شرکت کیلئے ہندوستان جانے کی اجازت دے دی ہے۔

پاکستان کرکٹ بورڈ کی ایگزیکٹو کمیٹی کے چیئرمین نجم سیٹھی نے میڈیا سے گفتگو کرتے ہوئے کہا کہ وزیر داخلہ چوہدری نثار علی خان نے ٹیم کو ہندوستان جانے کی قاباعدہ اجازت دے دی ہے۔

انہوں نے کہا کہ مغربی بنگال کی وزیر اعلیٰ نے سیکیورٹی کی یقین دہانی کرائی جبکہ ہندوستان میں پاکستانی ہائی کمشنر عبدالباسط نے سیکریٹری سے بھی اس سلسلے میں ملاقات کی جس کے بعد ٹیم کو ہدنوستان بھیجنے کی منظوری دے دی گئی۔

ہندوستان نے آج پاکستانی ٹیم کی سیکیورٹی ضمانت دی جس کے ساتھ ہی قومی ٹیم کی ورلڈ ٹی ٹوئنٹی میں شرکت کی راہ میں حائل آخری رکاوٹ بھی دور ہو گئی تھی۔

ہندوستانی ریاست مغربی بنگال کی وزیراعلیٰ ممتا بینر جی نے ایک مراسلے کے ذریعے اس بات کی یقین دہانی کروائی کہ پاکستان کی مردوں اور خواتین کی کرکٹ ٹیموں کو ہندوستان میں قیام کے دوران مکمل سیکیورٹی فراہم کی جائے گی.

دوسری جانب پاکستان کرکٹ بورڈ (پی سی بی) کے ایک عہدیدار نے مغربی بنگال کی حکومت کی جانب سے مراسلہ موصول ہونے کی تصدیق کی ہے.

مذکورہ عہدیدار نے نام ظاہر نہ کرنے کی شرط پر بتایا کہ مراسلے کو پاکستانی ٹیم کی ہندوستان روانگی کی اجازت لینے کے لیے وزارت داخلہ کو بھجوا دیا گیا ہے.

ہندوستان میں پاکستان مخالف مظاہروں اور وزیر اعلیٰ ہماچل پردیش کے بیان کے بعد پاکستان کی ورلڈ ٹی ٹوئنٹی میں شرکت پر سوالیہ نشان لگ گیا تھا۔

پاکستان کو سیکیورٹی کی فراہمی سے انکار کے بعد حکومت پاکستان نے صورتحال کا نوٹس لیتے ہوئے قومی ٹیم کو روانگی سے روکتے ہوئے سیکیورٹی کی صورتحال جاننے کیلئے ایک ٹیم تشکیل دی تھی۔

سیکیورٹی وفد نے ہندوستان سے واپسی پر منفی رپورٹ پیش کرتے ہوئے پاکستان کو دھرم شالا میں شیڈول پاکستان اور ہندوستان کے درمیان میچ نہ کھیلنے کا مشورہ دیا تھا۔

حکومت پاکستان اور پی سی بی نے اس صورتحال کا نوٹس لیتے ہوئے دھرم شالا سے میچ منتقل کرنے اور ہندوستان سے سیکیورٹی کی تحریری طور پر ضمانت دینے کا مطالبہ کیا تھا۔

تاہم صورتحال اس وقت بہتری کی جانب گامزن ہوئی جب دھرم شالا کی کشیدہ صورتحال اور پاکستان کے مطالبے کو مدنظر رکھتے ہوئے انٹرنیشنل کرکٹ کونسل نے 19 مارچ کو پاکستان اور ہندوستان کے درمیان میچ دھرم شالا سے کولکتہ کے ایڈن گارڈنز منتقل کرنے کا اعلان کیا تھا۔

تاہم میچ کا مقام تبدیل کیے جانے کے باوجود پاکستانی حکومت اور کرکٹ بورڈ نے ہندوستانی حکومت کی تحریری یقین دہانی تک ٹیم ہندوستان نہ بھیجنے کا اعلان کیا تھا۔

تاہم جمعے کو ہندوستانی حکام نے پاکستانی ٹیم کو مکمل سیکیورٹی فراہم کرنے کی یقین دہانی کرا دی ہے اور وزیر اعلیٰ مغربی بنگال کی وزیر اعلیٰ ممتا بینرجی کی تحریری یقین دہانی پی سی بی حکام کو ارسال کردی گئی ہے۔

کرکٹ ایسوسی ایشن آف بنگال کے صدر اور ہندوستانی ٹیم کے سابق کپتان ساروو گنگولی نے وزیر اعلیٰ مغربی بنگال اور پولیس کمشنر راجیو کمار کی تحریری یقین دہانی کا خط آئی سی سی کو بھی جمع کرا دیا ہے۔

ہندوستان کے وزیر داخلہ راج ناتھ سنگھ کا بھی کہنا ہے کہ ‘ہندوستان آنے والی تمام ٹیموں کو سیکیورٹی فراہم کی جائے گی، اس حوالے سے کوئی شک نہیں ہونا چاہیے’.

ورلڈ ٹی ٹوئنٹی، پاکستانی شائقین کو ویزے کے حصول میں شدید دشواری کا سامنا

کولکتہ: ورلڈ ٹوئنٹی 20 میں قومی ٹیم کو بھارت جانے کا گرین سگنل تو ابھی تک نہیں مل سکا دوسری جانب بھارت سے میچ دھرم شالا سے کولکتہ منتقل ہونے سے پاکستانی شائقین کو ویزے کے حصول میں شدید دشواری کا سامنا کرنا پڑیگا۔دھرم شالا میں پاکستان سے 200 شائقین کی آمدمتوقع تھی تاہم کولکتہ میں بمشکل 7، 8 ہی پہنچ پائینگے، ویزے کے حصول کیلیے ٹکٹ کی تصویر پیش کرنا ضروری ہے جب کہ مذکورہ میچ میں صرف 8 دن ہی باقی رہ گئے ہیں۔ اس لیے ویزا ملنا آسان نہیں ہوگا۔دوسری جانب بھارتی حکومتی ذرائع کا کہنا ہے کہ ہم پاکستانی شائقین کو ملٹی سٹی ویزا دینے کو تیار ہیں مگر اس کیلیے ان کے پاس میچز ٹکٹس کا موجود ہونا ضروری ہے۔ یاد رہے کہ گرین شرٹس کی ایونٹ میں شرکت حکومتی اجازت سے مشروط ہے۔

ورلڈ ٹی ٹوئنٹی کوالیفائنگ راؤنڈ میں آج دو میچ کھیلے جائیں گے

دھرمشالہ: ورلڈ ٹی ٹوئنٹی کوالیفائنگ راؤنڈ میں آج دو میچ کھیلے جائیں گے، گروپ اے کے میچز میں بنگلہ دیش کا مقابلہ آئر لینڈ اور نیدر لینڈ کا مقابلہ اُومان سے ہوگا۔

گروپ اے میں اومان نے آئرلینڈ کو شکست دے کر اپ سیٹ کیا ہے۔ جب کہ بنگلہ دیش نے پہلے میچ میں نیدر لینڈ کو شکست دی تھی۔

کوالیفائنگ راؤنڈ آٹھ ٹیموں پر مشتمل ہے، جنہیں دو گروپس میں تقسیم کیا گیا ہے۔ ہر گروپ کی ٹاپ ٹیم سپر ٹین راؤنڈ کے لئے کوالیفائی کرلے گی۔

بھارتی حکومت کی سیکیورٹی صلاحیت سوالیہ نشان بن گئی

اسلام آباد :  سابق وفاقی وزیر سینیٹر مشاہد اللہ خان نے کہا ہے کہ حکومت قانون سے متصادم کوئی کام نہیں کرے گی، بھارتی حکومت کی سیکیورٹی صلاحیت سوالیہ نشان بن گئی ہے، پاکستان کھیل کو کھیل سمجھتا ہے ۔ جمعہ کو پارلیمنٹ ہاﺅس کے باہر میڈیا سے گفتگوکرتے ہوئے انہوں نے کہا کہ کراچی میں رینجرز نے ایک ایسے اہم مسئلہ کو حل کیا جو پولیس کرنے میں ناکام رہی ، حکومت سے مطالبات کرنا بری بات نہیں ، حکومت پاکستان قانون کے متصادم کوئی کام نہیں کرے گی۔ انہوں نے کہا کہ ایم کیوایم کے حوالے سے سرفراز مرچنٹ نے جو باتیں کی ہیں بطور ریاست پاکستان کو ان الزامات کی تحقیقات ضرور کرنی چاہئے۔ اگرکسی کے خلاف ثبوت ملتے ہیں تو کارروائی کرنی چاہئے ۔ انہوں نے کہا کہ پاکستان کھیل کو کھیل سمجھتا ہے، وزیر داخلہ نے قومی کرکٹ ٹیم بھیجنے کے حوالے سے درست موقف اپنایا ہے، بھارت کی سیکیورٹی صلاحیت پوری دنیا کےلئے سوالیہ نشان بن گئی ہے جبکہ بھارت سلامتی کونسل میں ممبرشپ کا مطالبہ کررہا ہے، یہ ان کےلئے کالا دھبہ ہے۔ انہوں نے کہا کہ پاکستانی قوم کا وقار کھیل سے زیادہ مقدس ہے ، بھارتی حکومت پاکستانی کرکٹ ٹیم کو سیکیورٹی نہیں دے سکتی تو دوسری ٹیموں کو کیسے دے رہی ہے۔ اس حوالے سے آئی سی سی کو سوچنا ہوگا، بھارت کھیل کو کھیل سمجھے پاکستانی کرکٹ ٹیم کرکٹ کھیلنا چاہتی ہے۔

WT20 میں قومی کرکٹ ٹیم کی شرکت کا فیصلہ حکومت کرے گی، PCB

لاہور:  پاکستان کرکٹ بورڈ (پی سی بی)کے چیئرمین شہر یار خان نے کہا ہے کہ بھارت میں ہونے والے ٹی 20 ورلڈ کپ میں قومی کرکٹ ٹیم کی شرکت کا فیصلہ حکومت پاکستان کرے گی۔ نیشنل کرکٹ اکیڈمی لاہور میں قومی کرکٹ ٹیم کے کھلاڑیوں اور ٹیم مینجمنٹ کو ٹی ٹونٹی ورلڈ کپ میںسیکورٹی کی صورتحال اور ٹیم کی ٹی ٹونٹی ورلڈ کپ میں شرکت کے بارے میں بریفنگ دیتے ہوئے انہوں نے کہاکہ پاکستان کرکٹ بورڈ آئی سی سی حکام سے مسلسل رابطہ میں ہے اور امید ہے کہ بھارتی حکومت کی طرف سے قومی ٹیم کی بھارت میں سیکورٹی کی یقین دہانی مل جائے گی جس کے بعد سیکورٹی صورتحال کے حوالے سے وفاقی وزارت داخلہ کو اعتماد میں لے کر اس ضمن میں ان کی ہدایا ت کی روشنی میں فیصلہ کیا جائے گا۔ انہوں نے قومی ٹیم کے کھلاڑیوں اور ٹیم مینجمنٹ پر واضح کردیا کہ ٹی ٹونٹی ورلڈ کپ میں شرکت کےلئے بھارت جانے کا حتمی فیصلہ حکومت پاکستان کرے گی اور اگر حکومت نے ٹیم کو بھارت جانے کی اجازت دی تو ٹیم کو صرف اور صرف کرکٹ پر فوکس کرتے ہوئے بہترین ڈسپلن کا مظاہرہ کرے گی۔ انہوں نے کہاکہ پاکستانی کرکٹرز ملک کے ایمبیسڈر ہیں اور انہیں دوران فیلڈ اور آف دی فیلڈ بہترین اخلاق اور پرفارمنس کا مظاہرہ کرنا چاہئے کیونکہ ملک اور عوام کو ان سے بہت زیادہ توقعات ہیں ۔ٹیم مینجر انتخاب عالم نے ٹیم کو بھارت میں سیکورٹی کی صورتحال کے حوالے سے آگاہ کرنے اور کھلاڑیوں پر اعتماد کرنے پر چیئرمین پی سی بی کا شکریہ ادا کرتے ہوئے انہیں یقین دلایا کہ ڈسپلن پر کسی قسم کا سمجھوتہ نہیں کیا جائے گا اور کھلاڑی ٹی ٹونٹی ورلڈ کپ میں بہترین پرفارمنس کا مظاہرہ کرکے قوم کی توقعات پر پورا اتریں گے ۔انہوں نے کہاکہ ٹی ٹونٹی ورلڈ کپ میں پاکستان کا پول سخت ہے اور اس میں آسٹریلیا ،نیوزی لینڈ اور بھارت جیسی مضبوط ٹیمیں شامل ہیںلیکن ٹیم ٹی ٹونٹی ورلڈ کپ میں بہترین کا رکردگی کامظاہرہ کرے گی ۔

آسٹریلیا نے جنوبی افریقہ کو 6 وکٹوں سے ہرا دیا

کیپ ٹاﺅن :  آسٹریلیا نے جنوبی افریقہ کو آخری اور فیصلہ کن ٹی ٹونٹی کرکٹ میچ میں دلچسپ مقابلے کے بعد 6 وکٹوں سے شکست دے کر تین میچوں کی سیریز 2-1 سے جیت لی، جنوبی افریقہ نے مقررہ اوورز میں 4 وکٹوں کے نقصان پر 178 رنز کا مجموعہ تشکیل دیا، آملہ نے انتہائی شاندار اور ذمہ دارانہ بیٹنگ کا مظاہرہ کرتے ہوئے حریف باﺅلرز کا ڈٹ کر مقابلہ کیا، انہوں نے کیریئر بہترین 97 رنز کی ناٹ آﺅٹ اننگز کھیلی تاہم وہ 3 رنز کے فرق سے سنچری مکمل نہ کر سکے، جواب میں کینگروز ٹیم نے مطلوبہ ہدف آخری اوور کی دوسری گیند پر 4 وکٹوں پر پورا کیا، عثمان خواجہ اور شین واٹسن نے ٹیم کو 76 رنز کا جارحانہ آغاز فراہم کر کے اس کی جیت کی بنیاد رکھی، کپتان سٹیون سمتھ 44 اور شین واٹسن 42 رنز بنا کر نمایاں رہے، آملہ کی 97 رنز کی اننگز رائیگاں گئی۔ آملہ میچ اور وارنر سیریز کے بہترین کھلاڑی قرار پائے۔ جمعرات کو کیپ ٹاﺅن میں کھیلے گئے سیریز کے تیسرے اور فیصلہ کن ٹی ٹونٹی میچ میں جنوبی افریقن ٹیم کے کپتان فاف ڈوپلیسی نے ٹاس جیت کر پہلے بیٹنگ کا فیصلہ کیا جو ان کیلئے درست ثابت نہ ہو سکا، پروٹیز ٹیم نے پہلے کھیلتے ہوئے مقررہ اوورز میں 4 وکٹوں کے نقصان پر 178 رنز بنائے، آملہ نے شاندار بلے بازی کا مظاہرہ کرتے ہوئے کیریئر بہترین 97 رنز کی اننگز کھیلی اور ناٹ آﺅٹ رہے، ڈیوڈ ملر 30، کوئنٹن ڈی کوک 25، کپتان ڈوپلیسی 4 اور ریلی روسو 16 رنز بنا کر آﺅٹ ہوئے، نیتھن کولٹر نیل نے 2، شین واٹسن اور جیمز فالکنر نے ایک، ایک وکٹ حاصل کی، جواب میں آسٹریلوی ٹیم نے مطلوبہ ہدف 19.2 اوورز میں 4 وکٹوں پر حاصل کیا، عثمان خواجہ اور شین واٹسن نے اوپننگ شراکت میں ٹیم کو 76 رنز کا جاندار آغاز فراہم کر کے ٹیم کی جیت کی بنیاد رکھی، واٹسن 42 اور خواجہ 33 رنز بنا کر آﺅٹ ہوئے، اس کے بعد کپتان سٹیون سمتھ، ڈیوڈ وارنر اور گلین میکسویل نے شاندار بیٹنگ کا مظاہرہ کر کے ٹیم کو فتح سے ہمکنار کرایا، سمتھ 44 اور وارنر 33 رنز بنا کر آﺅٹ ہوئے، میکسویل 19 اور مارش 4 رنز بنا کر ناٹ آﺅٹ رہے۔ عمران طاہر نے 2 اور کاگیسوربادا نے ایک کھلاڑی کو آﺅٹ کیا۔ عمدہ کارکردگی کی بدولت ہاشم آملہ میچ اور وارنر سیریز کے بہترین کھلاڑی قرار پائے۔

ICC WT20، دفاعی چیمپئن سری لنکن ٹیم بھارت پہنچ گئی

ممبئی: دفاعی چیمپئن سری لنکن کرکٹ ٹیم فاسٹ باﺅلر لاستھ مالنگا کے بغیر ورلڈ کپ ٹی ٹونٹی کرکٹ ٹورنامنٹ میں شرکت کیلئے بھارت پہنچ گئی۔ سری لنکا کو سپر ٹین میں گروپ ون میں انگلینڈ، جنوبی افریقہ، ویسٹ انڈیز اور گروپ بی فاتح کوالیفائر ٹیم کے ساتھ رکھا گیا ہے اور وہ 17 مارچ کو کوالیفائر ٹیم کے خلاف ٹائٹل دفاع مہم کا آغاز کرے گی۔ بھارت پہنچنے پر میڈیا سے بات چیت کرتے ہوئے ٹیم کے نومنتخب کپتان اینجلومیتھیوز نے اپنے بیان میں کہا کہ ٹائٹل کے دفاع کےلئے سر توڑ کوشش کرینگے۔ انہوں نے کہا کہ وہ ذہنی طور پر ٹیم کی قیادت کیلئے تیار نہیں تھے تاہم بورڈ حکام کی پیشکش کو ٹھکرا نہیں سکا اور ٹیم کیلئے اپنی صلاحیتوں سے بڑھ کر کردار ادا کرنے کی کوشش کروں گا۔ انہوں نے کہا کہ میں نے صرف ورلڈ ٹی ٹونٹی کیلئے ٹیم کی قیادت کی ذمہ داری قبول کی ہے، بورڈ حکام نے مجھ پر اعتماد کیا ہے اور میں انہیں ٹھیس نہیں پہنچاﺅں گا۔ انہوں نے کہا کہ ایشیا کپ میں ٹیم کی ناقص کارکردگی ماضی کا حصہ بن چکی ہے، ہم نے اچھی کرکٹ نہیں کھیلی لیکن اس کے باوجود کھلاڑیوں کا مورال بلند ہے، میں چاہتا ہوں کہ کھلاڑی بغیر کسی دباﺅ میگا ایونٹ میں پرفارم کریں اور ہم ٹائٹل کے دفاع کیلئے ہر چیلنج سے نمٹنے کیلئے پوری طرح سے تیار ہیں۔ مالنگا ٹیم کے ہمراہ بھارت نہیں آئے وہ بحالی کا عمل ملک میں مکمل کریں گے تاہم امید ہے کہ وہ پہلے میچ سے قبل ٹیم جوائن کر لیں گے۔

Google Analytics Alternative