کھیل

لاہور میں پریس کانفرنس کرتے ہوئے شہریار خان کا کہنا تھا کہ جس دن کھلاڑیوں کو اینٹی کرپشن پر لیکچر دیا گیا اسی شام وہ مشتبہ شخص سے ملنے چلے گئے، ثبوت ہمارے ہاتھ آئے تو فورا معطل کردیا ۔

پی سی بی چیئرمین نے کہا کہ شرجیل خان اور خالد لطیف کو شو کاز دیا جارہا ہے، دونوں کھلاڑیوں کو جواب دینے کا مکمل موقع ملے گا ۔

شہریار خان نے کہا ہے کہ آئی سی سی کا نیا آئین بہت اہم ہے،نئے آئین میںکوئی ترامیم نہیں ،کلین شیٹ نکال کر آئین بنایا ہے، بھارتی بورڈ نے بگ تھری کے خاتمے کو ملتوی کرنے کی کوشش کی،آئی سی سی کے 10رکن ملکوں نے پاکستان کے حق میں ووٹ دیا ۔

چیئرمین پی سی بی نے مزید کہا کہ بگ تھری کے معاملے پر معلوم تھا بھارت کی جانب سے مخالفت ہوگی۔ تاہم بھارت کا ریوینیو کم ہوکر اب بھی سب سے زیادہ ہے۔آئی سی سی کا نیا آئین آج سے لانچ ہوگیا ہے۔خوش آئند بات یہ ہے کہ آئین میں کوئی بگ تھری اور بگ فور نہیں ۔

کوئٹہ گلیڈی ایٹرز کا ٹاس جیت کر فیلڈنگ کا فیصلہ

شرجیل اور خالد کے سوا باقی کھلاڑیوں کو کلیئر کردیا :نجم سیٹھی

پی ایس ایل ٹو کے دوران مشکوک افراد سے کھلاڑیوں کے ملنے کے معاملے پر چیئرمین پاکستان سپر لیگ نجم سیٹھی کہتے ہیں کہ شرجیل خان اور خالد لطیف کے سوا باقی کھلاڑیوں کو کلیئر کردیا، اب کسی کھلاڑی کو فکرمند ہونےکی ضرورت نہیں۔

چیئرمین پی ایس ایل نجم سیٹھی کا یہ بھی کہنا ہے کہ شرجیل خان اورخالد لطیف سے متعلق تحقیقات 10 سے 15 دن میں مکمل ہوں گی، تحقیقات کی روشنی میں معاملہ آگے بڑھے گا۔

انہوں نے بتایا کہ باقی جن دوتین کھلاڑیوں سے سوالات کیے گئے وہ اب کلیئرہیں۔

نجم سیٹھی نے کہا کہ اگرکسی بکی نے رابطہ کیا تو کھلاڑی فوراً ہمیں بتائیں کہ کیا بات ہوئی، پی سی بی اور پی ایس ایل انتظامیہ کی طرف سے کھلاڑیوں کی نگرانی جاری رہے گی۔

وسیم اکرم اور وقار یونس کے درمیان ’جنگ‘ چھڑ گئی

کراچی: وسیم اکرم اور وقار یونس کے درمیان ٹویٹر پر ’جنگ‘ چھڑگئی، سابق رائٹ آرمر کی جانب سے عمر کا طعنہ دینے پر سوئنگ کے سلطان نے بھی جوابی وار کردیا، پرانے بولنگ پارٹنر کو حقائق درست کرنے کا مشورہ دینے کے بعد ٹویٹ ڈیلیٹ کردی۔

پاکستانی کرکٹ ٹیم کے سابق کپتان اور فاسٹ بولر وسیم اکرم نے اپنے ساتھی بولر وقار یونس کے طنز کا جواب دینے کیلیے مائیکرو بلاگنگ ویب سائٹ ٹوئٹر کا ہی سہارا لیا ہے۔ وقار یونس کی جانب سے بدھ کو ایک ٹویٹ میں وسیم اکرم کو بڑھتی عمر اور یادداشت کی خرابی کی طعنہ دیا گیا تھا۔ اس کے جواب میں وسیم اکرم نے ٹویٹ کی کہ ’دوست اپنے حقائق درست کرو اور اگر ہم ’عمر‘ کی بات کرنے لگیں گے تو تم جانتے ہو کہ اس کھیل میں تمہیں ہر بار ہرا سکتا ہوں‘۔

دلچسپ بات یہ ہے کہ ٹوئٹر پر یہ پیغام دینے کے کچھ دیر بعد وسیم اکرم نے یہ ٹویٹ حذف کر دی۔ وقار یونس نے بدھ کو انڈین اسپنر انیل کمبلے کے نئی دہلی میں 18 برس قبل ایک ٹیسٹ اننگز میں 10 وکٹوں کے حصول کے حوالے سے وسیم اکرم کے ایک انٹرویو کے تناظر میں ان کے موقف کو غلط قرار دیا تھا۔

انٹرویو میں وسیم اکرم نے بتایا تھا کہ کس طرح وقار یونس نے رن آؤٹ ہو کر انیل کمبلے کو 1999 میں نئی دہلی ٹیسٹ کی دوسری اننگز میں دس وکٹوں سے محروم رکھنے کی تجویز دی تھی۔ انیل کمبلے کے اس کارنامے کے 18 سال کی تکمیل پر سابق بھارتی بیٹسمین سہواگ نے اپنی ٹویٹ میں وسیم اکرم کے ایک انٹرویو کی کاپی شائع کی جس میں سابق پاکستانی کپتان نے کہا کہ’’جب کمبلے نو وکٹیں لے چکے تھے تو وقار میرے ساتھ وکٹ پر موجود تھے، انہوں نے کہا کہ رن آؤٹ ہونے کے بارے میں کیا خیال ہے تاکہ کمبلے کو دس وکٹیں نہ مل سکیں‘۔

وسیم اکرم کے مطابق اس پر انھوں نے کہا کہ ’کسی کے نصیب میں اگر لکھا ہوا ہے تو کوئی کچھ نہیں کر سکتا لیکن میں وعدہ کرتا ہوں کہ میں کمبلے کی آخری وکٹ نہیں بنوں گالیکن اس کے بعد میں ہی تھا جس نے کمبلے کو اپنی وکٹ تحفے میں دیدی‘۔

بعدازاں اس ٹویٹ کے جواب میں وقار نے اپنے ساتھی بولر کو مخاطب کرتے ہوئے ٹویٹ کی کہ’ایسا کچھ نہیں ہوا تھا، وسیم بھائی شاید آپ کی عمر بڑھ گئی ہے‘۔ یاد رہے کہ فروری 1999 میں فیروز شاہ کوٹلہ گراؤنڈ میں کھیلے جانے والے ٹیسٹ میچ میں پاکستان کی ٹیم 420 رنز کی تعاقب میں 207 رنز بنا کر آؤٹ ہو گئی تھی۔ انیل کمبلے نے دوسری اننگز میں پاکستان کے تمام دس کھلاڑیوں کو آؤٹ کیا تھا اور وہ انگلینڈ کے اسپنر جِم لیکر کے بعد دوسرے بولر بن گئے تھے جنھوں نے یہ کارنامہ سر انجام دیا تھا۔

چار ٹیسٹ سیریز میں ڈبل سنچریوں کاریکارڈ کوہلی کے نام

ویراٹ کوہلی نے اپنی شاندار پرفارمنس کا سلسلہ بنگلا دیش کے خلاف بھی جاری رکھا ،وہ ٹیسٹ کرکٹ کی تاریخ میں لگاتار 4 ٹیسٹ سیریز میں ڈبل سنچری بنانے والے دنیا کے پہلےکرکٹر بن گئے ہیں۔

اس سے قبل عظیم آسٹریلوی بیٹسمین سر ڈان بریڈ مین اور بھارتی کرکٹر راہول ڈریوڈ نے لگاتار 3 ٹیسٹ سیریز میں 3 ڈبل سنچریاں بنائی تھیں ۔

بنگلادیش کے خلاف شاندار اننگز کھیلنے والے ویراٹ کوہلی کی بطور کپتان یہ چوتھی ڈبل سنچری ہے،اب وہ بطور کپتان ڈبل سنچریاں بنانے والے سرڈان بریڈمین، کلارک اور گریم سمتھ کے ہم پلہ ہو گئے، بطور کپتان زیادہ ڈبل سنچریاں بنانے کا عالمی اعزاز برائن لارا کے پاس ہے جنہوں نے پانچ ڈبل سنچریاں بنا رکھی ہیں۔

کوہلی نے گزشتہ سال کے آغاز میں ویسٹ انڈیز کے خلاف سیریز میں کیریئر کی پہلی ڈبل سنچری بنائی اور اس کے بعد نیوزی لینڈ کے خلاف سیریز میں اندور کے مقام پر انہوں نے مشکل وقت میں عمدہ باری کھیلتے ہوئے 211 رنز بنائے تھے۔

انگلینڈ کے خلاف بھی بھارتی کپتان بہترین فارم میں نظر آئے اور سیریز کے آخری ٹیسٹ میچ میں کیریئر کی سب سے بڑی 235 رنز کی خوبصورت اننگز کھیلی،جب بنگلہ دیش کی ٹیم تاریخ میں پہلی مرتبہ ٹیسٹ کھیلنے بھارت پہنچی تو کوہلی نے عمدہ کھیل پیش کرتے ہوئے 204 رنز کی عمدہ اننگز کھیلی اور لگاتار 4 سیریز میں ڈبل سنچری بنانے کا عالمی ریکارڈ بنا دیا۔

ان کی اس خوبصورت اننگز میں 24 چوکے شامل تھے۔بھارت نے دوسرے دن 687رنز پر اننگز ڈیکلیئر کرتے ہوئے بنگلہ دیش کو بیٹنگ کا موقع دیا۔

کوئٹہ گلیڈی ایٹرز نے لاہور قلندرز کو شکست دے دی

دبئی: پاکستان سپر لیگ کے دوسرے میچ میں کوئٹہ گلیڈی ایٹرز نے لاہور قلندرز کو 8 رنز سے شکست دے دی۔ 

دبئی انٹرنیشنل گراؤنڈ میں کھیلے گئے پاکستان سپر لیگ کے دوسرے میچ میں کوئٹہ گلیڈی ایٹرز نے لاہور قلندرز کو جیت کے لیے 137 رنز کا ہدف دیا جس کے جواب میں جیسن روئے اور کپتان برینڈن میکلم نے ٹیم کو جارحانہ آغاز فراہم کرتے ہوئے 3 اوورز میں 34 رنز بٹورے لیکن ذوالفقار بابر نے پہلے جیسن روئے کو 27 اور پھر میکلم کو 20 رنز پر پویلین بھیج کر لاہور قلندرز کی مشکلات میں اضافہ کیا، بعد میں آںے والے کھلاڑیوں میں فخر زمان 11، محمد رضوان 5، عمر اکمل 0، گرانٹ ایلیٹ اور سنیل نارائن نے 26،26 رنز کی اننگز کھیلی۔

کوئٹہ کی جانب سے ذوالفقار بابر، محمد نواز اور حسن خان نے 2،2 جب کہ ملز اور انور علی نے ایک ایک وکٹ حاصل کی۔

اس سے قبل لاہور قلندرز کے کپتان برینڈن میکلم نے ٹاس جیت کر پہلے بولنگ کرنے کا فیصلہ کیا، کوئٹہ کی جانب سے اس شفیق اور احمد شہزاد نے بیٹنگ کا آغاز کیا لیکن احمد شہزاد تیسرے ہی اوور میں 5 رنز بنا کر آؤٹ ہوگئے جب کہ کیون پیٹرسن اور کپتان سرفراز احمد بھی خاطر خواہ کارکردگی نہیں دکھاسکے وہ بالترتیب 3 اور ایک رنز بنا کر پویلین لوٹے، محمد نواز بھی صرف ایک ہی رنز بناسکے۔ روسوو 60 جب کہ اسد شفیق 29 رنز بنا کر ٹاپ اسکورر رہے۔

لاہور کی جانب سے محمد عرفان نے 3، سہیل تنویر اور سنیل نارائن نے ایک ایک وکٹ حاصل کی۔

واضح رہے پی ایس ایل کے افتتاحی میچ میں اسلام آباد یونائیٹڈ نے پشاور زلمی کو 7 وکٹوں سے شکست دی تھی۔

کرکٹر شرجیل خان کے حق میں ان کے اہل علاقہ کا مظاہرہ

مظاہرین کا کہنا ہے کہ شرجیل خان پر لگائے گئے الزامات بے بنیاد ہیں، ان کی معطلی کا حکم واپس لیا جائے۔

واضح رہے کہ پی سی بی کی جانب سے شرجیل خان اور خالد لطیف کو جواریوں سے ملنے کے الزام میں معطل کیا گیا ہے اور دونوں کھلاڑیوں کو دبئی سے وطن واپس بھیج دیا گیا ہے۔

شرجیل اور خالد پی ایس ایل ٹو میں اسلام آباد یونائیٹڈ کی جانب سے کھیل رہے تھے، اب تحقیقات کی تکمیل تک دونوں کھلاڑی پاکستان سپر لیگ ٹو میں شرکت نہیں کر سکیں گے۔

بھارت کی اسپن وکٹوں سے نمٹنے کیلئے آسٹریلیا تیار رہے، ولیمسن

نیوزی لینڈ کرکٹ ٹیم کے کپتان کین ولیمسن نے آئندہ دورہ بھارت کے حوالے سے آسٹریلیا کو خبردار کردیا ہے۔ ان کہنا ہے کہ کینگروز کو بھارت میں اسپن وکٹوں سے نمٹنے کیلیے تیار رہنا ہوگا۔

آسٹریلین ٹیم اسی ماہ کے آخر میں 4میچوں کی ٹیسٹ سیریز کیلئے بھارت کا دورہ کرنے والی ہے۔ 23فروری کو پونے میں پہلا ٹیسٹ شروع ہوگا۔ وليمسن کی قیادت میں کیویز نے حال ہی میں کینگروز کو تین ون ڈے میچز کی سیریز میں زیر کیا ہے۔

لیکن بلیک کیپس ٹیم 4ماہ پہلے ہی بھارت کے دورے ٹیسٹ سیریز 0-3 سے ہار گئی تھی۔ ولیمسن کی سیریز میں کارکردگی بہتر تھی، انہوں نے سنچری بھی اسکور کی تھی اس اعتبار سے ان کے ذہن میں مذکورہ دورے کے حوالے سے بہت کچھ تازہ ہی ہوگا۔

ان کا کہنا ہے کہ غیرملکی ٹیموں کیلیے بھارتی سرزمین انتہائی مشکل جگہ ہے۔ لیکن میں اچھی طرح جانتا ہوں کہ آسٹریلوی ٹیم اچھی ہے اور وہ بہت جلد خود کو حالات کے مطابق ڈھال لیتی ہے۔

لیکن ایسا ہرگز نہ سوچئے گا کہ دھول اڑاتی ساری پچز ہمیشہ ایک جیسا کھیلیں گی۔ یہ مکمل طور پر میزبان سائیڈ پر منحصر ہے کہ وہ کیسی پچز تیار کرتے ہیں۔

انہوں نے مزید کہا کہ بھارت کی ٹیم موجودہ سیزن میں ہوم گرائونڈز پر 13ٹیسٹ میچز کھیل چکی ہے اور بھارت کی پچوں میں کافی تبدیلی رونما ہوئی ہے۔ ایسے میں ٹاس بھی کافی اہم ہوتا ہے۔

Google Analytics Alternative