کھیل

عامر ولیمے کے چند گھنٹے بعد ٹیم کو جوائن کرنے دبئی روانہ

لاہور: فاسٹ بولر محمد عامر اپنے ولیمے کی تقریب کے چند گھنٹے بعد ہی دبئی روانہ ہو گئے۔

فاسٹ بولر محمد عامر اپنے ولیمے کی تقریب کے چند گھنٹے بعد ہی دبئی روانہ ہو گئے جہاں پیسر کی نئی دلہن نرجس بھی ان کے ہمراہ تھیں،  یو اے ای پہنچ کرمحمد عامر قومی کرکٹ ٹیم کو جوائن کریں گے۔

محمد عامرکے بھائی اوران کی اہلیہ نرجس ملک کے اہل خانہ بھی انکے ہمراہ تھے، محمد عامر23 ستمبرسے شروع ہونے والی 3 ٹوئنٹی 20 میچزکی سیریز کیلیے دستیاب ہیں۔

دنیا کے دلکش ترین کرکٹرز کی فہرست جاری ۔ بھارت یہاں بھی پاکستان سے پیچھے ،سر فہرست کس کانام ہے ؟ جان کرخوش ہو جائیں گے

نئی دہلی(مانیٹرنگ ڈیسک):بھارتی ویب سائٹ نے دلکش ترین کرکٹ الیون میں پاکستان کے شاہد آفریدی کو سب سے پہلے نمبر پر رکھا ہے، فہرست میں احمد شہزاد اور عمران خان بھی شامل ہیں۔رپورٹ میں دنیا بھر کے مختلف ادوارمیں کھیلنے والے کرکٹرز کو زیر غور لایا گیا مگر زیادہ توجہ حالیہ یا ماضی قریب میں کرکٹ سے وابستہ کھلاڑیوں پر ہی دی گئی، اس دلکش الیون میں آفریدی کو بطور اوپنر پہلے نمبر پر رکھا گیا۔شاہد آفریدی کے بعد الیسٹر کک، احمد شہزاد، مائیکل کلارک، ویرات کوہلی، کیون پیٹرسن، ڈیوڈ گاور، عمران خان، بریٹ لی، جیمز اینڈرسن اور شین بونڈ موجود ہیں۔

پہلا T20:کل پاکستان اور ویسٹ انڈیز کا ٹاکرا ہوگا

چوکوں چھکوں کی برسات ہوگی ، ایکشن کا طوفان آئے گا ،پہلے ٹی ٹوئنٹی میں کل پاکستان اور ویسٹ انڈیز کا سامنا ہوگا۔ جیت کا سفر جاری رکھنے کےلیے شاہینوں نے جم کر پریکٹس کی ہے۔

رپورٹ کے مطابق پاکستان اور ویسٹ انڈیز کے درمیان تین ٹی ٹوئنٹی میچز کی سیریز کا آغازکل سے دبئی میں ہوگا۔ٹرافی کی کی تقریب رونمائی آج ہوگی۔

ایک طرف دو بار کی عالمی چیمپئن ویسٹ انڈیز جو کرس گیل اور اور ڈیرن سیمی کی غیر موجودگی میں بھی مضبوط ترین ٹیم ہے،ڈیوائن براوو،کائرن پولارڈ،مارلن سمیئول اور کپتان کارلوس بریتھ ویٹ جیسے ہٹر موجود ہیں ۔

دوسری جانب پاکستان کی ینگ ٹیم نئے قائد سرفراز احمد کی قیادت میں بہترین فارم میں ہے جس نے انگلینڈ جیسی مضبوط ٹیم کو یکطرفہ مقابلے میں زیر کیا ۔

پاکستانی اسکواڈ میں عمر اکمل کی واپسی ہوئی ہےجبکہ محمد عامر کو آرام دیا جاسکتا ہے۔میچ پاکستانی وقت کے مطابق کل رات نو بجے کھیلا جائےگا۔

یونس خان بیمار، ہسپتال میں داخل

پاکستانی کرکٹ ٹیم کے سینیئر بیٹسمین یونس خان کی طبعیت میں بتدریج بہتری آ رہی ہے اور انھیں آج رات ہسپتال سے فارغ کیا جا سکتا ہے۔

واضح رہے کہ یونس خان کو تیز بخار کی وجہ سے منگل کو کراچی کے نجی ہسپتال لایا گیا تھا۔

 

طبی معائنے کے بعد انھیں اسی روزگھر جانے کی اجازت دے دی گئی تھی لیکن تیز بخار کے سبب بدھ کو دوبارہ ہسپتال میں داخل کرنا پڑا تھا۔

اس وقت یہ خدشہ ظاہر کیا گیا تھا کہ وہ ڈینگی میں مبتلا ہیں تاہم ان کے متعدد ٹیسٹ کیے گئے جن سے پتہ چلا کہ وہ ڈینگی میں مبتلا نہیں ہیں ۔

پاکستان کے سینئیر بیٹسمین کے قریبی ذرائع نے  بتایا کہ یونس خان کا بخار اب اتر چکا ہے تاہم ڈاکٹرز انھیں آبزرویشن میں رکھ کر ان کی حالت کا بغور جائزہ لے رہے ہیں اور توقع ہے کہ انھیں آج رات کوگھر جانے کی اجازت دے دی جائے گی۔

پاکستان کو باقاعدہ ٹیسٹ کی نمبر ون ٹیم کا اعزاز ’گرز‘ دے دیا گیا

لاہور: پاکستان کو ٹیسٹ کرکٹ میں عالمی نمبر ون بننے پر آئی سی سی کی جانب سے ٹیسٹ ٹیم کے نمبر ون اعزاز ’گرز‘ سے نوازا گیا۔

ٹیسٹ میں نمبر ون ٹیم بننے پر لاہور کے قذافی اسٹیڈیم میں تقریب کا انعقاد کیا گیا جس میں قومی ٹیم کے کھلاڑیوں سمیت بورڈ کے دیگر حکام نے شرکت کی، تقریب میں آئی سی سی چیف ایگزیکٹو ڈیوڈ رچرڈ سن نے ٹیسٹ کی نمبر ون ٹیم بننے پر قومی ٹیسٹ کرکٹ ٹیم کے کپتان مصباح الحق کو ٹیسٹ کی نمبر ون ٹیم کی ٹرافی ’ گرز‘پیش کی۔

اس موقع پر  قومی ٹیسٹ ٹیم کے کپتان مصباح الحق نے آئی سی سی کی جانب سے نمبر ون ٹیسٹ ٹیم کا اعزاز ملنے پر شکریہ ادا کرتے ہوئے کہا کہ ہم نے 2010 سے تمام میچز ملک سے باہر کھیلے۔ ان کا کہنا تھا کہ کپتان اور لیڈر کھلاڑیوں کی کارکردگی کے بغیر کچھ نہیں کرسکتا، ہم نے ایک ٹیم بن کر کھیلا جس کا صلہ مل گیا ہے لیکن اب نمبر ون کی پوزیشن کو برقرار رکھنا ہمارے لیے چیلنج ہے۔

 

محمدعامرکی شادی ،فاسٹ بائولرنے اپنے آبائی گائوں والوں کوخوش کردیا

پاکستانی  کرکٹ ٹیم کے فاسٹ بالرمحمد عامر زندگی کی نئی اننگز شروع کرنے جارہے ہیں ۔ شادی کی رسومات کا آغاز کل سے لاہورمیں ہوگا مگراس موقع پران کے آبائی گاؤں میں بھی خوشی کا سماں ہے ۔ محمدعامرکے اہل خانہ کے مطابق محمد عامر نے ایک ہفتے قبل آبائی گاؤں میں شادی کے کارڈز تقسیم کئے۔ ولیمے کی تقریب ویسٹ انڈیزکی سیریز کے بعد راولپنڈی کی تحصیل گوجر خان کے نواحی گاؤں چنگا بنگیال میں ہو گی۔اس موقع پرموضع چنکابنگال کے عوامی حلقو ںنے کہاکہ محمدعامرکی شادی میں شرکت کےلئے لاہورجائیں گے جس کی دعوت ان کومحمدعامرنے خود دی ہے-

 

بنگلا دیش کے آل راؤنڈر شکیب الحسن ہیلی کاپٹر حادثے کا شکار

ڈھاکا: بنگلا دیش کے مایہ ناز آل راؤنڈر شکیب الحسن اور ان کی اہلیہ کو ڈھاکا کے قریبی علاقے میں چھوڑ کر واپس جانے والا ہیلی کاپٹر گر کر تباہ ہوگیا۔

غیرملکی خبررساں ادارے کے مطابق بنگلا دیشی کرکٹ ٹیم کے مایہ نازآل راؤنڈر کا ہیلی کاپٹر گرکر تباہ ہوگیا جس کے نتیجے میں ایک شخص ہلاک اور 4 افراد زخمی ہوگئے ۔اسٹار آل راؤنڈر شکیب الحسن نے واقعے کی تصدیق کرتے ہوئے میڈیا کو بتایا کہ ہیلی کاپٹر مجھے اور اہلیہ کو کمرشل کی ریکارڈنگ کے لئے بازار ٹاؤن کے قریب رائل ٹیولپ سی ریزورٹ میں چھوڑ کر واپس ڈھاکا جارہا تھا کہ صرف ڈیڑھ کلومیٹر کی اڑان بھرنے کے بعد ہی اینانی کے ساحل کے قریب گر کر تباہ ہوگیا جس کے نتیجے میں ایک شخص کی ہلاکت بھی ہوئی ہے جس کی شناخت شاہ عالم کے نام سے ہوئی ہے۔ جب کہ زخمی ہونے والے 4 افراد میں ریٹائرڈ پائلٹ ونگ کمانڈر شفیق الاسلام بھی شامل ہیں جنہیں قریبی نجی اسپتال منتقل کردیا گیا ہے۔

شکیب الحسن کا کہنا تھا کہ ہیلی کاپٹر حادثے کے حوالے سے کچھ کہہ نہیں سکتا تاہم حادثے  کا سن کر دھچکا لگا اور اب تک صدمے کی حالت میں ہوں تاہم شکر ادا کرتا ہوں کہ میں اور میری اہلیہ ہیلی کاپٹر میں سوار نہیں تھے اور اس وقت شوٹنگ میں مصروف تھے۔

کراچی بلیوز نے نیشنل ٹی ٹوئنٹی کپ جیت لیا

ملتان: کراچی بلیوز نے کراچی وائٹ کو فائنل میچ میں دلچسپ مقابلے کے بعد 3 رنز سے شکست دے کر نیشنل ٹی ٹوئنٹی کپ جیت لیا۔

ملتان کرکٹ اسٹیڈیم میں کھیلے گئے فائنل میچ میں کراچی بلیوز نے 3 وکٹوں کے نقصان پر 182 رنز بنائے جس کے جواب میں کراچی وائٹ کی ٹیم مقررہ 20 اوورز میں 8 وکٹوں کے نقصان پر 179 رنز ہی بنا سکی۔ ہدف کے تعاقب میں کراچی وائٹ کے اوپنرز زین عباس اور آصف ذاکر نے شاندار کھیل پیش کرتے ہوئے ٹیم کو 61 رنز کی شراکت فراہم کی تو آصف ذاکر 32 رنز بنا کر محمد نواز کی گیند پر بولڈ ہوگئے جس کے بعد اسد شفیق 6، کپتان اکبرالرحمان ایک، دانش عزیز 10 رنز بنا کر آؤٹ ہوئے۔

ٹیم کا مجموعی اسکور 128 تک پہنچا تو زین عباس بھی 47 رنز بنا کر پویلین لوٹ گئے۔ طارق ہارون 38، محمد حسن 10 اور اعظم حسین 2 رنز بنا کر آؤٹ ہوئے جب کہ سہیل خان 24 رنز کے ساتھ ناٹ آؤٹ رہے۔ کراچی بلیوز کی جانب سے محمد نواز نے شاندار بولنگ کا مظاہرہ کرتے ہوئے 4، محمد اصغر اور سعید اجمل نے 2،2 وکٹیں حاصل کیں۔

اس سے قبل بیٹنگ کرتے ہوئے کراچی بلیوز کی جانب سے خرم منظور نے شاندار بیٹنگ کرتے ہوئے 42 گیندوں پر 3 چھکوں اور 5 چوکوں کی مدد سے 70 رنز بنا کر آؤٹ ہوئے، شاہزیب حسن 11 اور کپتان خالد لطیف 9 رنز بنا سکے جب کہ فواد عالم 67 اور محمد سمیع 20 رنز کے ساتھ ناٹ آؤٹ رہے۔ کراچی وائٹ کے تابش خان، میر حمزہ اور اعظم حسین نے ایک ایک کھلاڑی کو آؤٹ کیا۔

Google Analytics Alternative