کھیل

پاکستان نےٹیسٹ میں ویسٹ انڈیز کو 56 رنز سے تاریخی شکست دے دی۔

پاکستان نے دبئی ٹیسٹ میں ویسٹ انڈیز کو 56 رنز سے تاریخی شکست دے دی۔ تین میچوں کی سیریز میں پاکستان کوایک صفر کی برتری مل گئی، محمد عامر نے تین یاسرشاہ اورمحمد نواز نے دو دو کھلاڑیوں کا شکار کیا۔  اظہرعلی میچ کے بہترین کھلاڑی قرار پائے۔

پاکستان اور ویسٹ انڈیز کے درمیان کھیلے جارہے دبئی ٹیسٹ میں پاکستان نے کالی آندھی کو 56 رنز سے شکست دے کر اپنا 400 واں ٹیسٹ میچ جیت لیا، پاکستان ڈے نائٹ ٹیسٹ جیتنے والی پہلی ایشین ٹیم بن گئی۔

پاکستان نے ویسٹ انڈیز کو جیت کیلئے 346 رنز کا ہدف دیا تھا۔ ویسٹ انڈیز کی پوری ٹیم 289 رنز بنا سکی۔ ویسٹ انڈیز کے بلے باز ڈیرن براوو نے ٹیم کی جیت کیلئے بہت کوشش کی۔

کھیل کے پانچویں روز پاکستان کو جیت کیلئے نو وکٹیں اور ویسٹ انڈیز کو دوسو اکیاون رنز درکار تھے، لیکن عامر نےپہلی ہی گیند پرخطرناک سیموئلز کو پویلین بھیج دیا۔

محمد نواز نے بلیک ووڈ کو چار رنز پر چلتا کیا۔ ڈیرن براوؤ اور چیس کی شراکت پاکستان کے خطرہ بننے ہی والی تھی کہ یاسرشاہ کی گھومتی گیند اپنا کام دکھاگئی۔

دو گیندوں بعد ہی وہاب کی ریورس سوئنگ نے بلے باز کا کام تمام کیا۔ وکٹیں گرتی رہیں لیکن براؤو پاکستان کے لئے درد سر بنے رہے،

براوو مشکل وقت میں وکٹ پر کھڑے رہے اور نہایت عمدہ بلے بازی کا مظاہرہ کرتے ہوئے اپنی سنچری اسکور کی، لیکن ان کی سنچری بھی ٹیم کے کام نہ آئی۔ڈیرن براوو نے شاندار بلے بازی کا مظاہرہ کرتے ہوئے 116 رنز بنائے۔

براؤو کےآؤٹ ہوتے ہی ٹیل اینڈرز نے زیادہ مزاحمت نہ کی۔ پاکستان نےمیچ چھپن رنز سے جیت کرچار سوویں میچ کو یادگار بنادیا۔ شاندار ٹرپل سنچری پر اظہر علی میچ کے بہترین کھلاڑی قرار پائے۔

پاکستان کاچار سو واں ٹیسٹ میچ گلابی گیند کے نام رہا، تاریخی ٹیسٹ میچ میں پاکستان کو یادگار فتح حاصل ہوئی، اظہرعلی نے ریکارڈ ٹرپل سنچری اسکور کی، یاسر شاہ نے کم ٹیسٹ میچز میں سو وکٹوں کاریکارڈ۔ توڑ ڈالا۔

دوسری اننگز میں محمد عامر 3، یاسر شاہ اور محمد نواز نے 2، 2 جبکہ وہاب ریاض نے ایک وکٹ حاصل کی

کپتان مصباح الحق: ڈے نائٹ ٹیسٹ میں جیت کو وہ یادگار لمحہ سمجھتے ہیں۔

پاکستانی کرکٹ ٹیم کے کپتان مصباح الحق کا کہنا ہےکہ پاکستان کی تاریخ کے چار سوویں اور گلابی گیند کے ساتھ پہلے ڈے نائٹ ٹیسٹ میں جیت کو وہ یادگار لمحہ سمجھتے ہیں۔

لاہور: پولو گراؤنڈ میں قومی نیزہ بازی چیمپئن شپ کاآغاز

رینجرز ہیڈ کوارٹرزلاہورکے پولوگراؤنڈ میں قومی نیزہ بازی چیمپئن شپ شروع ہو گئی ہے،نیزہ بازی کےیہ مقابلے 20 اکتوبر تک جاری رہیں گے۔

قومی نیزہ بازی چیمپئن شپ میں100 سے زائد ٹیمیں حصہ لے رہی ہیں،ڈی جی رینجرز پنجاب میجر جنرل عمر فاروق برقی نے قومی چیمپئن شپ کا افتتاح کیا۔

چیمپئن شپ کےنمائشی مقابلوں میں پنجاب کلب،رینجرز پنجاب ،غازی راوی اتحاد کلب اور نتھو شیرازی کی ٹیموں نےنمایاں پوزیشنیں حاصل کیں۔

بہاولپور سےصادق پبلک اسکول کی لڑکیوں کی ٹیم نےچیمپئن شپ میں خصوصی شرکت کی اور10پوائنٹس حاصل کئے۔

دبئی ٹیسٹ کے آخری روز ویسٹ انڈیز کی بیٹنگ

دبئی ٹیسٹ فیصلہ کن مرحلے میں داخل ہوگیا ہے، میچ کی اخری روز ویسٹ انڈیز نے 95رنز 2 کھلاڑی آؤٹ پر اننگزکو آگے بڑھایا، ویسٹ انڈیز کو جیت کیلئے 251 رنزجبکہ پاکستان کو 8وکٹوں کی ضرورت ہے۔

دبئی ٹیسٹ کے چوتھے روز دوسری اننگز میں پاکستانی بیٹسمینوں نے ناقص کارکردگی کا مظاہرہ کیا اور پوری ٹیم صرف 123 رنز پر ڈھیرہو گئی یوںویسٹ انڈیز کوجیت کےلیے 346 رنز کا ہدف ملا ۔اس سے قبل ویسٹ انڈیز کی پہلی اننگز 357 رنز پر تمام ہوگئی تھی ۔

پاکستان نے فالوآن کرانے کے بجائے دوسری اننگز 222 رنز کی برتری کے ساتھ شروع کی لیکن پھر شروع ہوا عجب تماشا،تو چل میں آیا کی مصداق وکٹوں کی لائن لگ گئی اور پوری ٹیم 123 رنز ہی بناسکی۔گرین کیپس کو اس تباہی سے دوچار کرنے والے دیوندرا بشوتھے،جنہوں نے49 رنز کے عوض آٹھ وکٹیں حاصل کیں۔

پہلی اننگز کے خسارے کے باعث ویسٹ انڈیز کو جیت کےلیے 346 رنز بنانے تھے ۔اوپنر بریتھ ویٹ اور جانسن 87 رنز پرپویلین لوٹ گئے،جب کھیل ہوا تو اسکور دو وکٹ پر 95 رنز تھا ۔

عمران نذیر کو قوانین کی خلاف ورزی پر چالان کردیا گیا ۔

لاہور میں ٹریفک قوانین کی خلاف ورزی پر کرکٹر عمران نذیر کا چالان کردیا گیا ۔

پولیس کے مطابق کرکٹر عمران نذیر شمالی چھاؤنی کے علاقے میں سیٹ بیلٹ باندھے بغیر ڈرائیونگ کر رہے تھے۔

ٹریفک وارڈن نے کرکٹر عمران نذیر کوروکا اور قانون کی خلاف ورزی پر ان کا چالان کرتے ہوئے 5 سو روپے جرمانہ کردیا

مائیک بریرلی:نائٹ میچ ٹیسٹ کرکٹ کی دلچسپی میں اضافہ کرنے کے لیے ضروری ہیں

انگلینڈ کے سابق کپتان اور ایم سی سی کے سابق صدر مائیک بریرلی کا کہنا ہے کہ ڈے نائٹ میچ ٹیسٹ کرکٹ کی دلچسپی میں اضافہ کرنے کے لیے ضروری ہیں اور یہ کوشش جاری رہنی چاہیے۔

مائیک بریرلی نے دبئی کرکٹ سٹیڈیم میں ایک انٹرویو میں کہا کہ وہ یہ سمجھتے ہیں کہ ٹیسٹ کرکٹ کے بچاؤ کے لیے ڈے اینڈ نائٹ ٹیسٹ میچز کا ہونا بہت ضروری ہے۔

تاہم ان کا کہنا تھا کہ اس کے ساتھ ساتھ دیگر عوامل بھی بڑی اہمیت کے حامل ہیں جن میں بہترین کرکٹرزکے ساتھ اعلیٰ معیار کی کرکٹ کا کھیلا جانا بھی شامل ہے۔

مائیک بریرلی جو ایک طویل عرصے سے کرکٹ کے قوانین بنانے والے ادارے ایم سی سی سے وابستہ ہیں کہتے ہیں کہ وہ گلابی گیند کے حق میں ہیں لیکن اس پر یقیناً مزید کام ہونا ہے۔

انھوں نے کہا کہ ڈے اینڈ نائٹ ٹیسٹ میچز میں لوگ اپنی دن بھر کی مصروفیات سے فارغ ہوکر کم از کم دو سیشن دیکھنے ضرور آسکتے ہیں۔

پہلا ٹیسٹ :پاکستان اور ویسٹ انڈیز کے درمیان کھیلے جاری ہے

پاکستان اور ویسٹ انڈیز کے درمیان کھیلے جارہے ڈے نائٹ ٹیسٹ میں ویسٹ انڈیز کو میچ کے آخری روز جیت کیلئے مزید 251 رنز درکار ہیں اور اس کی 8 وکٹیں باقی ہیں، کھیل کے چوتھے روز لیگ اسپنرز چھائے رہے، پہلے یاسر شاہ نے چھ وکٹیں لیں تو جواب میں بشو نے بھی آٹھ کھلاڑیوں کو پویلین کی راہ دکھائی۔

ڈے اینڈ نائٹ ٹیسٹ کے چوتھے روز ویسٹ انڈیز نے نامکمل پہلی اننگز تین سو پندرہ رنز اور چھ وکٹ کے نقصان سے دوبارہ شروع کی۔ پہلے سیشن کے دوسرے ہی اوور میں ڈورچ کی وکٹ یاسر شاہ لے اڑے

جیسن ہولڈر اور میگوئل کومنز کو بھی لیگ اسپنر نے اپنا شکار بنایا۔ اس کے ساتھ ہی یاسر شاہ نے وکٹوں کی سنچری بھی مکمل کی۔ آخری وکٹ محمد نواز نے حاصل کی اور ویسٹ انڈیز پہلی اننگز میں تین سو ستاون رنز بناسکی

پاکستان کو دوسو بائیس رنز کی برتری حاصل رہی۔ مہمان ٹیم کو فالو آن کرانے کے بجائے پاکستان نے دوبارہ بیٹنگ کا فیصلہ کیا، لیکن جلد اسکور بنانے کی کوشش میں پوری ٹیم ایک سو تیئس رنز پر آؤٹ ہوگئی

گلے شکوے دور، جاوید میانداد اور شاہد آفریدی میں صلح ہوگئی

کراچی: لیجنڈری کرکٹر جاوید میانداد نے شاہد آفریدی سے متعلق الزامات واپس لے لیے جس کے بعد دونوں میں گلے شکوے ختم ہوگئے اور صلح ہوگئی۔

قومی کرکٹ ٹیم کے لیجنڈری کرکٹر جاوید میانداد اور سابق کپتان شاہد آفریدی کے درمیان آج ملاقات ہوئی جس میں دونوں سابق کھلاڑیوں نے ایک دوسرے کے بارے میں کہے گئے الفاظ پر معذرت کی اور جاوید میانداد نے آفریدی پر میچ فکسنگ سے متعلق اپنے الزامات واپس لے لیے جس کے بعد دونوں کھلاڑیوں میں تمام گلے شکوے ختم ہوگئے اور دونوں کھلاڑیوں نے ایک دوسرے کو گلے لگایا اور مٹھائی کھلائی۔

اس موقع پر جاوید میانداد کا کہنا تھا کہ بڑی اچھی بات ہے شاہد آفریدی میرے ساتھ ہے اور یہ میرے چھوٹے بھائیوں کی طرح ہے جب کہ میں نے شاہد آفریدی سے متعلق جو کچھ کہا تھا وہ غصہ میں کہا تھا لہٰذا میں اپنے الفاظ واپس لیتا ہوں۔ شاہد آفریدی نے کہا کہ میں نے جاوید بھائی سے کبھی معافی کا مطالبہ نہیں کیا کیوں کہ یہ میرے بڑے ہیں لیکن یہ ان کا بڑا پن ہے کہ انہوں نے اپنے الفاظ واپس لے لیے کیوں کہ ان سے میرے اور میری فیملی کو دکھ ہوا تھا۔ انہوں نے کہا کہ اگر میری بات بھی آپ کو بری لگی جو یقیناً لگی ہوگی میں اس پر معافی چاہتا ہوں۔

جاوید میانداد اور شاہد آفریدی کےدرمیان ملاقات سینیٹر اقبال محمد علی کے گھر پر ہوئی اور سینیٹر نے دونوں قومی کرکٹرز کے درمیان صلح میں اہم کردار ادا کیا۔

واضح رہے کہ جاوید میانداد نے آفریدی پر کرکٹ سے ریٹائرمنٹ نہ لینے پر کڑی تنقید کرتے ہوئے کہا تھا کہ بڑا کرکٹر وہی ہوتا ہے جو اپنے وقت پر کرکٹ چھوڑ دیتا ہے جب کہ شاہد آفریدی نے ایک پریس کانفرنس میں کہا تھا کہ جاوید میانداد کو ہمیشہ سے پیسوں کا مسئلہ رہا ہے اس لیے وہ ایسی باتیں کرتے ہیں جس کے جواب میں لیجنڈری کرکٹر نے آفریدی پر بھارت میں ہونے والے ورلڈکپ 2011 کا سیمی فائنل فکس کرنے کا الزام لگایا تھا۔

Google Analytics Alternative