کھیل

عامر خان کی جنرل راحیل شریف سے ملاقات، چیمپئن بیلٹ پیش کی

راولپنڈی: ورلڈ باکسنگ کونسل نے پاکستان میں امن کے لیے پاک فوج کے سربراہ کو ان کے اقدامات کے اعتراف میں خصوصی چیمپئین بیلٹ سے نوازا ہے۔

پاک فوج کے شعبہ تعلقات عامہ آئی ایس پی آر کی جانب سے جاری بیان کے مطابق پاکستانی نژاد ورلڈ باکسنگ ویلٹرویٹ چیمپیئن عامر خان نے جنرل ہیڈ کوارٹرز راولپنڈی میں پاک فوج کے سربراہ سے ملاقات کی اور ملک میں امن کے لیے ان کی جانب سے اٹھائے گئےا قدمات کو سراہا

ملاقات کے دوران عامر خان نے ورلڈ باکسنگ کونسل کے صدر مارشیو سلیمان کی جانب سے بھجوایا گیا خصوصی چیمپیئن بیلٹ بھی پیش کیا جو کہ انہوں نے پاکستان میں امن کے لیے جنرل راحیل شریف کے کردار کے اعتراف میں بھجوایا تھی۔

نامور فٹبالر لیونل میسی نے انٹرنیشنل فٹبال سے ریٹائرمنٹ کا فیصلہ واپس لے لیا

بیونس آئرس: نامور فٹبالر لیونل میسی نے انٹرنیشنل فٹبال سے ریٹائرمنٹ کا فیصلہ واپس لے لیا،جس کے بعد انہیں فیفا ورلڈ کپ 2018 کوالیفائرز کے لیے ارجنٹائن کے اسکواڈ میں شامل کر لیا گیا.

تفصیلات کے مطابق ارجنٹائن کے 29 سالہ شہرت یافتہ فٹبالر لیونل میسی نے کوپا امریکا کپ 2016 کے فائنل میں چلی کے خلاف ارجنٹینا کی شکست پر بین الاقوامی فٹ بال سے کنارہ کشی کا اعلان کیا تھا.

حال ہی میں مشہور فٹبالر میسی نے اپنے بیان میں کہا کہ انہوں نے ’ملک کی محبت اور ٹیم میں رہ کر مدد کرنے کے لیے فٹبال کی دنیا میں واپس آنے کا فیصلہ کیا ہے۔‘

یاد رہے کہ میسی نے کوپا امریکا کپ 2016 کے فائنل میں چلی کے خلاف پینالٹی ضائع کرنے کے بعد فٹبال کی دنیا کو خیر باد کہہ دیا تھا.

چلی نے ارجنٹینا کو ہرا کرمسلسل دوسری بار کوپا امریکا کپ جیتنے کا اعزاز حاصل کیا تھا،فائنل میچ مقررہ وقت تک بغیر کسی گول کے برابر رہا جس کے بعد پینالٹی شوٹ آؤٹ پر چلی نے 0-4 سے فتح اپنے نام کی.

لیونل میسی رواں برس ستمبر کے آغاز میں ورلڈ کپ کوالیفائرز 2016 میں یورو گوائے اور وینزویلا کے خلاف ایکشن میں نظر آئیں گے۔

واضح رہے کہ لیونل میسی رواں برس ستمبر کے آغاز میں ورلڈ کپ کوالیفائرز 2016 میں یورو گوائے اور وینزویلا کے خلاف ایکشن میں نظر آئیں گے

یونس خان آؤٹ، پاکستان کی برتری 203 رنز

پاکستان اور انگلینڈ کے مابین سیریز کے چوتھے اور آخری ٹیسٹ میچ میں پاکستان نےنو وکٹوں کے نقصان پر 531 رنز بنائے ہیں اور اس طرح پاکستان کی برتری 203 رنز کی ہو چکی ہے۔ یونس خان 218 بنا کر آؤٹ ہو گئے ہیں۔

محمد عامر 30 بنا کر کھیل رہے ہیں جبکہ سہیل خان ابھی ابھی کریز پر آئے ہیں۔

یونس خان نے 29 چوکوں اور چار چھکوں کی مدد سے اپنے کریئر کی چھٹی ڈبل سنچری سکور کی۔

آخری آؤٹ ہونے والے کھلاڑی وہاب ریاض تھےجو چار رنز بنا کر معین علی کی گیند پر وکٹ کیپر کے ہاتھوں کیچ آؤٹ ہو گئے۔ محمد عامر یونس خان کا ساتھ دینے کے لیے میدان میں آئے ہیں اور 22 رنز بنا کر کریز پر موجود ہیں۔

انگلش کپتان نے اپنے تمام فیلڈروں کو باونڈری لائن پر بھیج دیا ہے اور وہ پاکستان کے رنز بنانے کی رفتار کو کم کرنے کی کوششوں میں مصروف ہیں۔

کراچی میں لیجنڈ کرکٹر حنیف محمد کی نمازہ جنازہ ادا کردی گئی

کراچی : لیجنڈ کرکٹر حنیف محمد کی نمازہ جنازہ ادا کردی گئی، حنیف محمد روز گزشتہ نجی اسپتال میں انتقال کر گئے تھے، وہ طویل عرصے سے کینسر کے موذی مرض میں مبتلا تھے۔

تفصیلات کے مطابق کراچی میں نماز جمعہ کے بعد پرانی سبزی منڈی کے قریب واقع نعمانی مسجد میں مفتی تقی عثمانی نے لیجنڈ کرکٹر کی نماز جنازہ پڑھائی، اس موقع پر سیکورٹی کے انتہائی سخت انتظامات کئے گئے تھے۔

آئی سی سی کے سابق صدر ظہیر عباس، جاوید میانداد، معین خان، اسکواش لیجنڈ جہانگیر خان سمیت دیگر معروف شخصیات کے ساتھ عوام کی بڑی تعداد نے نماز جنازہ ادا کی، نماز جنازہ کے بعد شرکاء نے حنیف محمد کو خراج عقیدت پیش کیا اور ان کے نام سے اکیڈمی بنانے کی خواہش کا اظہار کیا۔

حنیف محمد کئی عرصے سے کینسر کے موذی مرض سے جنگ لڑنے کے بعد جمعرات کی شام کراچی کے نجی اسپتال میں زندگی کی بازی ہار گئے تھے، حنیف محمد نے بیوی، دو بیٹے اور ایک بیٹی کو سوگوار چھوڑا ہے۔

ماسٹر حنیف محمد کو12 روز قبل کراچی کے ایک نجی اسپتال میں داخل کرایا گیا تھا، جہاں انھیں انتہائی نگہداشت کے وارڈ میں طبی امدا دی گئی تھی جس کے بعد ان کی حالت قدرے بہتر ہوگئی تھی۔

جمعرات کی دوپہر حنیف محمد کی دل کی دھڑکن 6 منٹ کیلئے بند ہوگئی تھیں لیکن معجزانہ طور پر چھ منٹ کے بعد اُن کی دل کی دھڑکنیں بحال ہو گئیں تھیں ، جس کے بعد ان کی حالت مسلسل بگڑتی رہی اور شام 5 بج کر آٹھ منٹ پر وہ زندگی کی وکٹ پر لمبی اننگز کھیلنے کے بعد اپنے چاہنے والوں کو افسردہ کرگئے تھے۔

ریو اولمپکس کے چھٹا روز، جرمنی کے ایونٹ میں تین گولڈ میڈلز

ریو اولمپکس کے چھٹے روز روئنگ اور شوٹنگ میں جرمنی کی کارکردگی اچھی رہی اور اس نے ایونٹس میں تین گولڈ میڈلز جیت لیے۔

برازیل کے شہر ریوڈی جنیرو میں اولمپکس کے چھٹے روز ایتھلیٹس کے درمیان گولڈ میڈلز کی جنگ جاری ہے، آج سب سے زیادہ چھ تمغے روئنگ میں تقسیم کیے گئے جس میں سے دو جرمنی کے نام رہے، دیگر تمغے نیوزی لینڈ، پولینڈ، کروشیا اور سوئٹزرلینڈ نے جیتے۔

جرمنی نے آج کے دن شوٹنگ کا واحد گولڈ میڈل بھی حاصل کیا ، امریکا نے ویمنز جوڈو اور ویمنز جمناسٹک میں سونے کے تمغےجیتے، کنوئنگ میں سلواکیہ اور اسپین نے گولڈ میڈل حاصل کیے، مینز جوڈو میں گولڈ میڈل چیک ری پبلک نے جیتا،۔

ویمنز آرچری میں جنوبی کوریا کی ہیجنگ چینگ نے گولڈ میڈل جیتا،برطانیہ نے سائیکلنگ کے مینز ٹیم اسپرنٹ میں سونے کا تمغہ حاصل کیا، رومانیہ بھی سونے کا تمغہ جیتنے والے ممالک میں شامل ہوگیا ہے، چھٹے روز 21 گولڈ میڈلز کے لیے کھلاڑی نبرد آزما ہیں جس میں سے 16کے فیصلہ ہوگئے ہیں۔

اس وقت ٹیبل پر امریکا 13 سونے، 12 چاندی اور 10 کانسی سمیت 35 تمغوں کے ساتھ سرفہرست ہے، چین کا دوسرا نمبر ہے جس کے طلائی تمغوں کی تعداد 10 اور مجموعی تمغے 26 ہیں، جاپان 6 گولڈ کے ساتھ بدستور تیسرےنمبرپر ہے

جوڈو: پاکستان کے شاہ حسین شاہ دوسرے ہی راؤنڈ میں ہمت ہار گئے

ریوڈی جنیرو:  پاکستانی کھلاڑی شاہ حسین شاہ  اولمپکس کے جوڈو ایونٹ میں دوسرے ہی راؤنڈ میں ہمت ہار گئے، 100 کلوگرام مقابلے میں انھیں یوکرینی حریف آرتم بلوشنکو نے ہزیمت سے دوچار کیا۔

ابتدائی مرحلے میں انھیں مخالف کھلاڑی کی عدم شرکت کے باعث بائی ملی تھی، 22سالہ جوڈوکا براعظمی کوٹے پر اولمپک گیمز میں پاکستان کی نمائندگی کررہے تھے، ان کے والد باکسر حسین شاہ نے 1988میں سیؤل اولمپکس میں کانسی کا تمغہ اپنے نام کیا تھا، وہ اولمپکس مقابلوں میں انفرادی کھیلوں میں تمغہ جیتنے والے آخری پاکستانی کھلاڑی بھی ہیں۔

اوول ٹیسٹ:پاکستان نے تین وکٹوں پر 196رنز بنالیے

پاکستان اور انگلینڈ کے درمیان جاری چوتھے اور آخری ٹیسٹ میچ کے دوسرے دن پاکستان نے اپنی پہلی اننگز میں چائے کے وقفے تک 57اوورز کے کھیل میں 3 وکٹوں کے نقصان پر 196رنز بنائے ہیں۔
اس وقت پاکستانی ٹیم انگلینڈ کی پہلی اننگز کے اسکور 328رنز سے 132رنز پیچھے ہے جبکہ اسکی 7 وکٹیں ابھی باقی ہیں۔ آج پاکستان کے پہلے آئوٹ ہونے والے بیٹسمین یاسر شاہ تھے جو 26رنز بناکر آئوٹ ہوئے۔
جس کے بعد اظہر علی 49رنز کی اچھی باری کھیل کر پویلین لوٹے، انھوں نے اسد شفیق کے ساتھ ملکر 75رنز کی پارٹنر شپ قائم کی۔ بعدازاں اسد شفیق 79اور یونس خان 26کے درمیان 69رنز کی شراکت قائم ہوئی جو ابھی جاری ہے۔
انگلینڈ کی جانب سے اسٹورٹ براڈ ،اسٹیون فن اورمعین علی ایک ایک وکٹ لے پائے ہیں ۔

ریو اولمپکس،امریکی پیراک مائیکل فیلپس نے 22واں گولڈ میڈل جیت لیا

ریو اولمپکس میں امریکی پیراک مائیکل فیلپس نے چوتھا اور کیرئیر کا ریکارڈ بائیسواں گولڈ میڈل جیت لیا، امریکہ سولہ طلائی تمغوں کے ساتھ میڈلز ٹیبل پر سرفہرست ہے۔

سوئمنگ کی تاریخ کے کامیاب ترین پیراک مائیکل فیلپس نے ایک اور اعزاز اپنے نام کرلیا، مائیکل فیلپس مسلسل چار ایونٹس کی ایک ہی کیٹگری میں گولڈ میڈل جیتنے والے پہلے سوئمر بن گئے-

امریکی پیراک نے دو سو میٹر انفرادی میڈلے میں عمدہ کارکردگی دکھائی اور موجودہ ایونٹ میں مسلسل چوتھا اور کیرئیر کا بائیسواں گولڈ میڈل جیت لیا، انھوں نے 2004، 2008 اور 2012 کے اولمپکس میں بھی اس ریس میں کامیابی حاصل کی تھی۔

امریکی سوئمر بائیس گولڈ کے علاوہ اولمپکس میں دو چاندی اور دو کانسی کے تمغے بھی حاصل کرچکے ہیں۔

دوسری جانب رگبی میں فجی نے برطانیہ کو ہراکر پہلا گولڈ میڈل حاصل کیا، رگبی سیون میں کانسی کا تمغہ جنوبی افریقہ کو ملا جس نے جاپانی ٹیم کو شکست دی-

جمناسٹک میں امریکہ کی سائمن بائلز بہترین ایتھلیٹ قرار پائیں۔

ریو اولمپکس  میں چھٹے روز امریکہ سولہ گولڈ اور مجموعی طور پر اڑتیس میڈلز کے ساتھ سرفہرست ہے۔ چین کا گیارہ طلائی تمغوں کے ساتھ دوسرا نمبر ہے۔

Google Analytics Alternative