کھیل

برازیل :ریو ڈی جنیرو میں اولمپکس 2016 کی افتتاحی تقریب کا آغاز

ریو اولمپکس 5 سے 21 اگست تک جاری رہیں گے اور اس میں 205 ممالک حصہ لے رہے ہیں

ان اولمپکس گیمز میں گیارہ ہزار 178 ایتھلیٹس میڈلز کی جنگ لڑیں گے۔ ریو اولمپکس کے 42 کھیلوں میں 306 ایونٹس ہوں گے اور ان کھیلوں کے لیے 37 مقامات کا انتخاب کیا گیا ہے ۔

ریو اولمپکس میں پاکستان کا سات رُکنی دستہ حصہ لے گا ۔اس سات رُکنی دستے میں دو شوٹرز، دو پیراک، دو ایتھلیٹس اور ایک جوڈو کا کھلاڑی شامل ہے۔

ریو اولمپکس میں سب سے بڑا دستہ امریکا کا 552 ایتھلیٹس پر مشتمل ہے جبکہ میزبان برازیل کا دستہ 475 ایتھلیٹس پر مشمل ہے ۔

ان اولمپکس مقابلوں میں پہلے گولڈ میڈل کا فیصلہ تیر اندازی کے ایونٹ میں ہوگا۔

ریو اولمپکس : غلام مصطفی کی قیادت میں پاکستانی دستے کا مارچ پاسٹ

پاکستانی دستے کی قیادت کے لیے آخری وقتوں میں شاہ حسین شاہ کی جگہ غلام مصطفی کا نام پیش کردیا گیا ۔

مارچ پاسٹ میں پاکستانی شوٹر نے پرچم تھامے قومی دستے کی قیادت کی۔ ریو اولمپکس میں پاکستان کا سات رُکنی دستہ حصہ لے رہا ہے ،

نواک جوکووچ نے راجرز کپ ٹینس کا ٹائٹل اپنے نام کر لیا –

سربیا کے نواک جوکووچ نے راجرز کپ ٹینس کا ٹائٹل اپنے نام کر لیا۔ ویمنز ایونٹ میں رومانیہ کی سیمونا ہیلپ نے میدان مار لیا۔

ٹورنٹو:  راجرز کپ ٹینس کا میدان کینیڈا کے شہر ٹورنٹو میں سجا۔ فائنل میں نواک جوکووچ اور کائی نیشکوری ہوئے آمنے سامنے۔ راجر کپ کے آخری معرکے میں جاپان کے نیشکوری ہوئے ناکام۔ عالمی نمبر ایک سربین سٹار نواک جاکووچ نے جیتا ایک اور ٹائٹل۔ خواتین کے ایونٹ میں رومانیہ کی سیمونا ہیلپ نے مارلیا میدان۔ نمبر پانچ سیڈ نے امریکا کی میڈیسن کیز کو ہرایا اسٹریٹ سیٹس میں۔

 

پانچویں وکٹ لینے پرسہیل کا سجدہ شکر، پویلین جاتے ہوئے ’’پش اپس ‘‘ کیے-

برمنگھم: سہیل خان نے پانچویں وکٹ حاصل کرنے کے بعد سجدہ شکر ادا کیا، پویلین واپس جاتے ہوئے انھوں نے ’’پش اپس ‘‘ بھی کیے، لارڈز ٹیسٹ میں سنچری پر مصباح الحق نے یہ روایت ڈالی اور بعد میں فتح کے بعد پوری ٹیم نے اسے دہرایا تھا۔

اس کا مقصد کاکول کیمپ میں ٹریننگ کرانے والے آرمی ٹرینرز کو خراج تحسین پیش کرنا تھا۔ یاد رہے کہ سہیل خان نے اپنا پہلا ٹیسٹ 2009 میں سری لنکاکیخلاف کراچی میں کھیلا تھا، دوسری بار انھیں زمبابوے کیخلاف 2011 کے بولاوایو ٹیسٹ میں شرکت کا موقع ملا ۔

مگر 245 رنز کے عوض واحد وکٹ نے کیریئر آگے بڑھانے سے روکے رکھا، گذشتہ برس ورلڈکپ کے بعد کمر میں اسٹریس فریکچر نے بھی سہیل کو نقصان پہنچایا مگر اب ایجبسٹن میں قسمت چمک اٹھی۔

 

 

برمنگھم ٹیسٹ کے دوسرے دن کا کھیل،محمد حفیظ صفر پر آئوٹ

برمنگھم ٹیسٹ کے دوسرے روز کا کھیل جا ری ہے جہاں پاکستان کو ابتداء میں ہی محمد حفیظ کا نقصان اٹھانا پڑاہے جب جیمز انڈرسن نے پہلے ہی اوور کی چوتھی گیند پر انہیں پویلین بھیج دیا،محمد حفیظ کھاتا کھولے بغیر ہی لوٹ گئے،اس وقت پاکستان کا مجموعہ بھی صفر ہی تھا۔

میچ کے پہلے روز پاکستان بولرز نے نے اپنا کام سرانجام دے دیا تھا اور انگلش ٹیم کو بڑے اسکور سے روک دیا تھا تاہم اب پاکستانی بیٹسمینوں کو اپنی ذمہ داریاں ادا کرنی ہیں۔

اس سے پہلے پاکستان کے سہیل خان نے برمنگھم ٹیسٹ کے پہلے روز انگلینڈ کے پانچ وکٹ اڑا دیے، ان کی فائیو اسٹار پرفارمنس کے سامنے انگلش ستارے ماند پڑ گئے۔ ہوم ٹیم 297رنز پر آئوٹ ہوگئی۔ پانچ سال کے صبر آزما انتظار کے بعد ٹیسٹ سائیڈ میں آنے والے سہیل خان نے23اوورز میں96رنز دے کر آدھی انگلش ٹیم کو فارغ کیا۔

 

گیری بیلنس نے70اور معین علی63رنز بنائے ، محمد عامر نے دوسری نئی گیند پر دو وکٹ حاصل کئے۔ راحت علی نےبھی دو وکٹ لئے، یاسر شاہ کو ایک وکٹ ملی۔ کیریئر کے ابتدائی دو ٹیسٹ میں سہیل خان کو ایک وکٹ ملی تھی۔ وکٹ کیپر سرفراز احمد نے پانچ کیچ لے کر پچھلے ٹیسٹ کی ناکامیوں کا ازالہ کردیا۔ 1971میں لیڈز میں وسیم باری نے پانچ کیچ لئے تھے۔

 

ابر آلود موسم کے باوجود پاکستانی بولروں گیند کو سوئنگ کرانے میں ناکام رہے۔278رنز7 وکٹ پر پاکستان نے دوسری نئی گیند لی اور پہلی ہی گیند پر عامر نے اسٹیورٹ براڈ کو سلپ میں کیچ آوٹ کرادیا، اظہر علی نے ان کامشکل کیچ لیا۔

 

معین علی اور براڈ نے 47گیندوں پر32رنز کی شراکت قائم کی، براڈ کا حصہ13رنز کا رہا، گیری بیلنس نےپچاس رنز113گیندوں پر 8چوکوں کی مدد سے بنائے۔ معین علی کو امپائر نے یاسر شاہ کی گیند پر کیچ آوٹ قرار دے دیا تھا لیکن وہ ریویو نے انہیں بچالیا ۔ معین علی نے 29ویں ٹیسٹ میں چھٹی نصف سنچری99گیندوں پر پانچ چوکوں کی مدد سے بنائی۔

 

گیری بیلنس اور معین علی نے 66رنز کی پارٹنرشپ قائم کی۔ پاکستان کے کپتان مصباح الحق کا ٹاس جیت کر بولنگ کا فیصلہ درست ثابت ہوا۔ آوٹ آف فارم ایلکس ہیلز سہیل خان کی گیند پر وکٹ کیپر سرفراز احمد کو کیچ دے بیٹھے۔ اگلے ہی اوور میں سہیل خان نے دوسرے ٹیسٹ کے ہیرو جوروٹ کو تین رنز پر سلپ میں حفیظ کا کیچ بنا کر انگلش کیمپ میں سنسنی پھیلا دی۔

 

گیری بیلنس اور جیمز ونس نے چوتھی وکٹ کی شراکت میں 69 رنز بنائے۔ ونس 39 رنز بنا کر سہیل خان کی گیند پر سلپ میں کیچ دے بیٹھے۔ انگلش کپتان الیسٹر کک نے 45رنز کی اچھی اننگز کھیلی۔ انھیں راحت علی نے ایل بی ڈبلیو کیا۔ لنچ پر انگلینڈ کا اسکور تین وکٹ پر ایک سو رنز تھا۔ لنچ کے بعد سہیل خان نے دو وکٹ چھ رنز کے عوض دس گیندوں پر حاصل کیں۔

 

ایجبسٹن ٹیسٹ: پاکستان کی انگلینڈ کے خلاف ٹاس جیت کر فیلڈنگ

ایجبسٹن ٹیسٹ میں پاکستان نے انگلینڈ کے خلاف ٹاس جیت کر فیلڈنگ کا فیصلہ کیا ہے، پاکستان نے دو تبدیلیاں کی ہیں، شان مسعود اور وہاب ریاض کی جبکہ سمیع اسلم اور سہیل خان کو ٹیم میں شامل کیا گیا ہے،سہیل خان نے2011میں آخری ٹیسٹ زمبابوے کے خلاف بولاوایو میں کھیلا تھا۔ سمیع اسلم نے بنگلہ دیش کےخلاف دو ٹیسٹ کھیلے ہیں۔

دونوں ٹیموں کے درمیان چار ٹیسٹ کی سیریز ایک ایک سے برابر ہے، لارڈز ٹیسٹ میں پاکستان نے انگلینڈ کو 75رنز سے شکست دی تھی جبکہ مانچسٹر میں انگلینڈ نے 330رنز سے پاکستان کو ہرایا تھا۔

پاکستان کپتان مصباح الحق کہتے ہیں کہ جو کچھ ماضی میں ہوچکا اسے بھول کر نئے عزم اور نئے حوصلوں کے ساتھ میدان میں اترینگے۔ البتہ موافق حالات میں انگلش ٹیم کو اسی کی سرزمین پر شکست دینا پاکستان کے لئے ہمالیہ سر کرنے کے مترادف ہوگا۔

ایجبسٹن میں پاکستان کو انگلینڈ کے خلاف پہلی جیت کا انتظار ہے۔ برمنگھم میں پاکستان نے سات ٹیسٹ میچ کھیلے ہیںجن میں سے چار انگلینڈ جیتاہے۔1962میں یہاں انگلینڈ نے پاکستان کواننگز اور24رنز،1978 میں اننگز اور57رنز،1982میں 113رنز اور2010 کے ٹیسٹ میچ میں9وکٹ سے شکست دی تھی۔ تین ٹیسٹ ڈرا رہے ہیں۔

1971میں ظہیر عباس نے 274 ، مشتاق محمد نے100اور آصف اقبال نے104ناٹ آئوٹ رنز بنائے تھے۔ پاکستان نے608رنز بنائے تھے لیکن ٹیسٹ ڈرا ہوگیا تھا۔

انگلینڈ اس گرائونڈ میں آٹھ سال سے کوئی ٹیسٹ نہیں ہارا ہے، آخری مرتبہ 2008میںجنوبی افریقا نے انگلینڈ کو اس گرائونڈ پر شکست دی تھی۔

کوچ مکی آرتھر کا کہنا تھا کہ میں نے لڑکوں سے کہا تھا کہ ہم لارڈز میں جنگجو تھے اور اولڈ ٹریفورڈ میں معاملہ بالکل اس کے الٹ ہوگیا تھا۔ ہم واپس ٹھیک راستے پر آنے کے لیے جو کرسکتے ہیں وہ کررہے ہیں اور مجھے سو فی صد یقین ہے کہ ہم دوسرے میچ میں اوپر ہوں گے۔ ہم نے مانچسٹر کی یاد کو بھلا دیا ہے، لڑکے برتری حاصل کرنے کے لیے پرعزم ہیں۔

اولمپکس ، پاکستان کےمختصر دستے کو تاحال این او سی نہیں مل سکا

ریو اولمپکس 2016 میں شرکت کےلیے پاکستانی دستے کو یکم اگست کی رات ریو ڈی جینرو روانہ ہونا ہے لیکن تاحال قومی دستے کو این او سی جاری نہیں ہو سکا ہے۔

سمری وزیر اعظم ہاؤس ضرور پہنچ چکی ہے لیکن اس پر پرائم منسٹر کے دستخط باقی ہیں ، اولمپکس میں پہلی بار پاکستان کی ہاکی ٹیم شرکت نہیں کر رہی،ٹریک اینڈ فیلڈ میں دو ایتھلیٹ محبوب علی اور نجمہ پروین،سوئمنگ میں حارث بانڈے اور لیانا سوان،شوٹنگ میں غلام مصطفیٰ اور مناہل جبکہ جوڈو میں شاہ حسین شاہ پاکستان کی نمائندگی کریں گے ۔

ان کے ساتھ گیارہ آفیشلز بھی ریو ڈی جینرو جائیں گے۔

اسنوکر چیمپئن شپ:پاکستان نے کوارٹر فائنل کیلئے کوالیفائی کرلیا

ورلڈ ٹیم اسنوکر چیمپئن شپ اور ورلڈ سکس ریڈ بالز اسنوکر چیمپئن شپ مصر کے شہر شرم الشیخ میں جاری ہے ۔

ٹیم ایونٹ کے پری کوارٹر فائنل میں اسجد اقبال اور بابر مسیح پر مشتمل پاکستان ون ٹیم نے چی وائی او اور مین لوئی لیونگ پر مشتمل ہانگ کانگ تھری کو تین ۔ صفر سے شکست دے کر کوارٹر فائنل میں جگہ بنائی ۔

پہلے سنگلز میں بابر مسیح نے چوئی وائی او کو چونسٹھ ۔ نو سے شکست دی ۔ دوسرے سنگلز میں اسجد اقبال نے مین لوئی لیونگ کو ستاون ۔ انچاس سے شکست دی ۔

ڈبلز میں پاکستانی جوڑی نے ہانگ کانگ کے پیئر کو اکیاسی ۔ بائیس سے زیر کرکے پاکستان کو تین ۔ صفر کی فتح دلوادی ۔ کوارٹر فائنل میں پاکستان کا مقابلہ ویلز سے ہوگا۔

Google Analytics Alternative