کھیل

یونس خان اور یاسر حمید کی شاندار بلے بازی لاہور کو شکست سے دوچار کردیا.

راولپنڈی: قومی ٹی ٹوئنٹی ٹورنامنٹ میں یونس خان اور یاسر حمید کی شاندار بلے بازی کی بدولت ایبٹ آباد نے لاہور کو اپ سیٹ شکست سے دوچار کردیا جبکہ پشاور کی ٹیم نے مصباح الحق کی ٹیم فیصل آباد کو زیر کر کے قیمتی پوائنٹس حاصل کر لیے۔

راولپنڈی کرکٹ اسٹیڈیم میں کھیلے گئے پہلے میچ میں لاہور کے کپتان اظہر علی نے ٹاس جیت کر پہلے فیلڈنگ کا فیصلہ کیا جو تباہ کن ثابت ہوا۔

ایبٹ آباد کی ٹیم نے یاسر حمید اور یونس خان کی شاندار بلے بازی کی بدولت اسکور بورڈ پر 198 رنز کا بڑا مجموعہ سجایا۔

یاسر حمید نے 43 گیندوں پر دو چھکوں اور نو چوکوں کی مدد سے 67 اور یونس نے لگاتار دوسرے میچ میں نصف سنچری اسکور کرتے ہوئے 39 گیندوں پر آٹھ چوکوں اور ایک چھکے کی مدد سے 61 رنز بنائے، سجاد علی نے بھی 38 رنز کی کارآمد اننگ کھیلی۔

جواب میں اسٹار سے سجی لاہور وائٹس کی ٹیم ایبٹ آباد کی باؤلنگ کے سامنے شروع سے ہی بے بس نظر آئی اور کھلاڑی وقفے وقفے سے وکٹیں گنوا کر پویلین لوٹتے رہے۔

لاہور کی ناقص بیٹنگ کا اندازہ اس بات سے لگایا جا سکتا ہے کہ سات بلے باز ڈبل فیگر میں بھی داخل نہ ہو سکے جبکہ محمد حفیظ 31 رنز کے ساتھ سب سے کامیاب بیٹسمین رہے۔

لاہور کی پوری ٹیم 115 رنز پر ڈھیر ہو گئی اور ایبٹ آباد نے 83 رنز کے بھاری مارجن سے کامیابی حاصل کی۔

ایبٹ آباد کی جانب سے خالد عثمان نے تباہ کن باؤلنگ کرتے ہوئے پانچ وکٹیں حاصل کر کے میچ آف دی میچ کا ایوارڈ حاصل کیا جبکہ جنید خان اور یاسر شاہ نے دو دو وکٹیں حاصل کیں۔

ادھر بدھ کو ہی کھیلے گئے دوسرے میچ میں پشاور کی ٹیم نے قومی ٹیسٹ ٹیم کے کپتان مصباح الحق کی فیصل آباد کی ٹیم کو اپ سیٹ شکست دی۔

فیصل آباد نے ٹاس جیت کر پہلے بیٹنگ کا فیصلہ کیا اور ایک موقع پر انہوں نے نویں اوور میں تین وکٹ کے نقصان پر 75 رنز بنا لیے تھے، اس موقع پر کپتان مصباح الحق کی وکت پر موجودگی کو دیکھتے ہوئے ایسا محسوس ہوتا تھا کہ شاید فیصل آباد کی ٹیم 150 سے زائد رنز کا مجموعہ اسکور بورڈ پر سجا لے گی۔

لیکن 94 کے مجموعے پر جب مصباح 34 رنز رنز بنا کر آؤٹ ہوئے تو بیٹنگ لائن میں بھونچال آگیا، مزید 13 رنز کے اضافے سے ٹیم مزید تین وکٹیں گنوا بیٹھی۔

اختتامی اوورز میں احسان عادل کی بہتر بیٹنگ کی بدولت فیصل آباد اسکور 133 رنز تک پہنچانے میں کامیاب رہا۔

جواب میں پشاور کی ٹیم بھی 52 رنز پر تین وکٹیں گنوا کر مشکلات سے دوچار ہو گئی تھی لیکن اس موقع پر افتخار احمد فیصل آباد کے باؤلرز کے سامنے ڈٹ گئے۔

انہوں نے لو اسکورنگ میچ میں 34 گیندوں پر دو چھکوں اور چار چوکوں کی مدد سے ناقابل شکست 51 رنز بنا کر اپنی ٹیم کو میچ میں پانچ وکٹ کی فتح سے ہمکنار کرا دیا جس پر انہیں میچ کا بہترین کھلاڑی قرار دیا گیا

کامن ویلتھ یوتھ گیمز میں پاکستان کے عبدالرحمان نے چاندی کا تمغہ جیت لیا.

سمووا: کامن ویلتھ یوتھ گیمز میں پاکستان کے عبدالرحمان نے ویٹ لفٹنگ کی 77 کلو گرام کی کیٹیگری میں چاندی کا تمغہ جیت لیا۔سمووا میں جاری پانچویں کامن ویلتھ یوتھ گیمز میں تمغے کی دوڑ کیلئے عبدالرحمان کو کیمرون، اسکاٹ لینڈ اور میزبان سمووا کے ویٹ لفٹرز سے سخت مقابلے کا سامنا تھا۔انہوں نے مجموعے طور پر 242 کلو گرام کا وزن اٹھا کر پاکستان کو چاندی کے تمغے کا حقدار بنا دیا۔اس موقع شائقین نے میڈل کیلئے جنگ میں چاروں کھلاڑیوں کے درمیان سخت مقابلے پر ان کو خوب سراہا۔یہ عبدالرحمان کی پاکستان کیلئے دوسری بڑی کامیابی ہے۔اس سے قبل رواں سال جنوری میں انہوں نے دوحا میں ایشین یوتھ ویٹ لفٹنگ چیمپیئن شپ میں 39 سال بعد پاکستان کو سونے کے تمغے کا حقدار بنایا تھا۔ادھر ٹینس کے مقابلے مزمل مرتضیٰ کو کوارٹر فائنل میں شکست کا سامنا کرنا پڑا اور وہ مقابلے سے باہر ہو گئے۔اب تک پاکستان نے پانچویں کامن ویلتھ یوتھ گیمز میں دو چاندی کے تمغے جیتے ہیں اور یہ دونوں ہی کامیابیاں ویٹ لفٹنگ کے شعبے میں حاصل کی ہیں۔

محمد حفیظ کو ٹی ٹونٹی ایونٹ میں باؤلنگ کرنے کی اجازت مل گئی

لاہور: قومی ٹی ٹونٹی ٹیم کے سابق کپتا ن محمد حفیظ کو آج سے شروع ہونے والے ڈومیسٹک ٹی ٹونٹی ایونٹ میں باؤلنگ کرنے کی اجازت مل گئی ہے ۔ ذرائع کے مطابق پاکستان کرکٹ بورڈ (پی سی بی) کے اعلی حکام نے اس حوالے سے حفیظ کو گرین سگنل دے دیا ہے جس کے بعد آل راؤنڈر آ ج اپنی ٹیم لاہوروائٹس اور اسلام آباد ریجن کے مابین راولپنڈی کرکٹ سٹیڈیم میں شیڈول میچ میں باؤلنگ کر یں گے ۔ اس بارے میں آئی سی سی کے ایک اعلی عہدیدار کا کہنا ہے کہ اگر کسی کھلاڑی پر انٹر نیشنل کرکٹ میں باؤلنگ کرنے پر پابندی عائد ہو تو متعلقہ کرکٹ بورڈ اسے ڈومیسٹک کرکٹ میں باؤلنگ کرنے کی اجازت دے سکتا ہے ، مذکورہ عہدیدار کے مطابق اس اجازت کا مقصد اس باؤلر کے ایکشن کی جانچ پڑتا ل کرنا ہوتا ہے اور اگر اسکا بورڈ مطمئن ہو تو وہ آئی سی سی سے اس کے باؤلنگ ایکشن کا ٹیسٹ دوبارہ لینے کی درخواست بھی کر سکتا ہے ۔ یاد رہے کہ محمد حفیظ کا ایکشن پہلی مرتبہ نومبر 2014ء میں نیوزی لینڈ کے خلاف متحدہ عرب امارات میں کھیلی گئی ٹیسٹ سیریز کے دوران رپورٹ ہوا تھا جس کے بعد آئی سی سی نے ان پر پابندی عائد کر دی تھی ،اپریل 2015ء میں انہوں نے اپنا باؤلنگ ایکشن چنائی کی لیب سے کلیئر کروایا تاہم سری لنکا کے خلاف حالیہ ٹیسٹ سیریز کے دوران ان کا ایکشن ایک بار پھر رپورٹ ہوا جس کے بعد باؤلنگ ایکشن کے ٹیسٹ کا نتیجہ انکے خلاف آنے کے بعد آئی سی سی نے ان پر ایک سال تک انٹر نیشنل کرکٹ میں باؤلنگ کروانے پر پابندی عائد کر دی ۔

پاکستان سپر لیگ میں شرکت کیلیے غیرملکی کرکٹرز سر گرم

کراچی:  پاکستان سپر لیگ میں شرکت سے قبل غیرملکی کرکٹرز نے ایسوسی ایشن سے مشاورت شروع کر دی ہے۔ تفصیلات کے مطابق لاہور، کراچی، پشاور، کوئٹہ اور اسلام آباد کے نام سے5ٹیمیں آئندہ برس 4 سے 24 فروری تک دوحا، قطر میں پی ایس ایل کے دوران ایکشن میں نظر آئیں گی، ایک ملین ڈالر انعامی رقم کے ایونٹ میں پی سی بی کا دعویٰ ہے کہ 40 انٹرنیشنل کرکٹرز شرکت کی خواہش رکھتے ہیں۔ ایونٹ کے حوالے سے فیڈریشن آف انٹرنیشنل کرکٹرز ایسوسی ایشن (فیکا) کے ایگزیکٹیو چیئرمین ٹونی آئرش نے بھی اپنے خیالات کا اظہار کیا ہے،کیپ ٹاؤن، جنوبی افریقہ سے نمائندہ ’’ایکسپریس‘‘ کو خصوصی انٹرویو میں انھوں نے کہا کہ بعض ممبر کرکٹرز نے پاکستان سپر لیگ کے حوالے سے ہم سے معلومات طلب کی ہیں البتہ ان کے نام نہیں بتا سکتا،ٹونی آئرش نے کہا کہ فیکا پی ایس ایل سمیت کسی بھی ٹوئنٹی 20 لیگ میں پلیئرز کو شرکت کا موقع ملنے کی حوصلہ افزائی کرتی ہے۔ البتہ بعض معاملات پر عمل درآمد ضروری ہے، ایک تو ایونٹ آئی سی سی سے منظور شدہ ہو، سیکیورٹی معاملات کے لحاظ سے کھلاڑیوں کی اس میں شرکت درست ہو،کھیل کا وقار برقرار رکھنے کے سلسلے میں اینٹی کرپشن اور ڈوپنگ کوڈز کا مکمل اطلاق کیا ہو، منفی عناصر سے بچنے کیلیے اینٹی کرپشن یونٹ کا تقرر بھی ضروری ہے۔ اسی کے ساتھ پلیئرز کے ساتھ درست اور منصفانہ معاہدے کیے جائیں۔انھوں نے کہا کہ ہمارا اپنے رکن ارکان کو یہی مشورہ ہوگا کہ اگر ان تمام باتوں پر عمل درآمد کیا جائے تو ضرور پی ایس ایل میں شرکت کریں، ساتھ ان کے اپنے ملک کی کرکٹ بورڈ کا این او سی بھی ضروری ہوگا۔ یاد رہے کہ1998میں قائم شدہ فیکا دنیا بھر کے کرکٹرز کے حقوق کا تحفظ کرتی ہے،آسٹریلیا، انگلینڈ، نیوزی لینڈ، جنوبی افریقہ،سری لنکا اور ویسٹ انڈیز کی پلیئرز ایسوسی ایشنز اس کی رکن ہیں،بنگلہ دیشی کرکٹرز ویلفیئر ایسوسی ایشن کا بھی فیکا سے اطلاق ہے، ٹیسٹ ممالک میں صرف پاکستان، بھارت اور زمبابوے اس کے رکن نہیں ہیں۔ ایک سوال پر ٹونی آئرش نے کہا کہ ماضی میں بعض ٹی ٹوئنٹی لیگز کے دوران کھلاڑیوں کو معاوضوں کے معاملے میں مشکلات کا سامنا کرنا پڑا، اسی لیے ہم تمام ایسے ایونٹس کے منتظمین کو معاہدے میں یہ شق رکھنے کا مشورہ دیتے ہیں کہ فیس کا کچھ حصہ لیگ شروع ہونے سے قبل ادا کر دیا جائے گا۔ہم کھلاڑیوں سے بھی کہتے ہیں کہ اس بات پر اصرار کریں۔ بھارت، سری لنکا اور بنگلہ دیشی لیگز کے فکسنگ سے متاثر ہونے کے بعد فیکا چیف نے پاکستان کو مشورہ دیا کہ سخت اینٹی کرپشن کوڈ کا اطلاق کریں، ایونٹ ہر حالت میں اینٹی کرپشن یونٹ کی زیرنگرانی کرایا جائے جو آئی سی سی کا ہو یا کونسل اسے جانچ چکی ہو

ڈس ایبلڈ کرکٹ ٹورنامنٹ میں پاکستان نے بھارت کو ہرا کر فائنل میں جگہ بنا لی۔

ڈھاکا: پانچ ملکی ڈس ایبلڈ ٹی ٹوئنٹی کرکٹ ٹورنامنٹ میں پاکستان نے بھارت کو 43رنز سے کچل کر فائنل میں رسائی پالی، لیفٹ آرم اسپنر فیاض احمد نے ہیٹ ٹرک کا کارنامہ انجام دیا، افغانستان نے میزبان بنگلہ دیش کو 3 وکٹ سے مات دے دی۔ تفصیلات کے مطابق ڈھاکا میں جاری ایونٹ میں پاکستان کیخلاف بھارتی سائیڈ نے ٹاس جیت کر پہلے بولنگ کا فیصلہ کیا، گرین شرٹس نے موقع سے بھرپور فائدہ اٹھاتے ہوئے مقررہ اوورز میں 6 وکٹیں گنواکر174 رنز اسکور بورڈ پر جوڑے، کپتان حسنین عالم نے ساتھی اوپنر مطلوب حسین کے ہمراہ ففٹی پلس کا آغاز فراہم کیا، حسنین عالم نے25 گیندوں پر 39رنز اسکور کیے۔ ان کی اننگز میں 6 چوکے اور ایک چھکا شامل رہا، مطلوب نے13رنز اسکور کیے، ریحان غنی مرزا نے 25 گیندوں پر 34رنز بنائے،دانش احمد 15بالز پر26رنز بنانے میں کامیاب رہے، دنیش کمار اور دیشارتھ نے 2،2 وکٹیں لیں، جواب میں لیفٹ آرم اسپنر فیاض احمد کی تباہ کن بولنگ کے سامنے بھارتی ٹیم 131رنز پر آؤٹ ہوگئی، یش ناگی 26،انسول 24 اور کرونل 20رنز بناکر کچھ مزاحمت کرپائے، فیاض نے ہیٹ ٹرک سمیت14رنز کے عوض4 کھلاڑیوں کو پویلین چلتا کیا،یہ انٹرنیشنل ڈس ایبلڈ کرکٹ ٹورنامنٹ کی تاریخ میں بھی پہلی ہیٹ ٹرک شمار ہوئی، راؤ جاوید اور نہارعالم نے 2،2 وکٹیں اپنے نام کیں۔ واضح رہے کہ ون ڈے انٹرنیشنل میں بھی دنیا کی پہلی ہیٹ ٹرک بنانے کا اعزاز پاکستان کے سابق فاسٹ بولر جلال الدین کو حاصل ہے، گذشتہ روزدوسرے میچ میں افغانستان نے بنگلہ دیش کو3 وکٹ سے ہرادیا، میزبان ٹیم نے مقررہ اوورز میں6 وکٹ کے نقصان پر119رنزبنائے، افغان بولرز نے آغاز پر نپی تلی بولنگ کرتے ہوئے ابتدائی3 اوورز میں میزبان ٹیم کے 2 کھلاڑی آؤٹ کیے، جس کے بعد ہر اوور کے ساتھ رنزبنانے کی رفتارکم ہوتی گئی۔ پاورپلے میں بنگلہ دیشی ٹیم محض18رنز اسکور کرپائی، امین الدین نے کچھ ہمت دکھاتے ہوئے 26کی اننگز کھیلی، شاہریا شمیم نے47 گیندوں پر 56رنزبٹورکرٹیم کو سنبھالادیا، اپربوکمار 19 رنز بناکرنمایاں رہے، محمود اللہ نے2 کھلاڑیوں کو قابوکیا، جوابی اننگز میں افغان ٹیم جارحانہ موڈ میں دکھائی دی اور دوسرے اوورمیں20 رنزبٹورے، حسیب اللہ متنازع انداز میں رن آؤٹ ہوئے، افغانستان نے ہدف 7 وکٹ پرحاصل کرلیا، 32رنز اسکور کرنے والے محمود اللہ کو میچ کا بہترین کھلاڑی قرار دیاگیا۔

نوواک جوکووچ کی لگاتار 26ویں فتح

نیویارک: عالمی نمبر ایک نوواک جوکووچ اسپین کے روبرٹو بوٹسٹا کو شکست دے کر یو ایس اوپن کے کوارٹر فائنل میں پہنچنے کے ساتھ ساتھ لگاتار 26ویں گرینڈ سلیم کے کوارٹر فائنل میں پہنچ گئے ہیں۔

2011 کے یو ایس اوپن چیمپیئن نے 6-3 کی فتح کے ساتھ پہلا سیٹ اپنے نام کیا لیکن دوسرے سیٹ میں ہسپانوی حریف نے انہیں اپ سیٹ کرتے ہوئے 4-6 سے فتح اپنے نام کی۔

تاہم اس کے بعد جوکووچ نے بوٹسٹا کو کوئی موقع نہ دیا اور اگلے دونوں سیٹ 6-4 اور 6-3 سے جیت کر لگاتار نویں مرتبہ یو ایس اوپن کے کوارٹر فائنل میں جگہ بنا لی۔

کوارٹر فائنل میں ان کا مقابلہ ایک اور ہسپانوی حریف فلسیانو لوپیز سے ہو گا۔

ادھر خواتین کی عالمی نمبر ایک سرینا ولیمز نے بھی کوارٹر فائنل میں جگہ بنا لی ہے جہاں ان کا مقابلہ اپنی بہن اور سابقہ چیمپیئن وینس ولیمز سے ہو گا۔

سرینا نے اپنی شاندار فارم کا سلسلہ برقرار رکھا اور امریکا کی ہی 19ویں سیڈ میڈیسن کی کو 6-3 اور 6-3 سے شکست دے کر ٹائٹل کے ساتھ ساتھ کیلنڈر گرینڈ سلیم کی جانب پیش قدمی برقرار رکھی۔

ان کی بہن اور 23ویں وینس ولیمز نے 152ویں سیڈ ایسٹونیا کی کوالیفائر اینٹ کونٹاویٹ کو باآسانی 6-2 اور 6-1 سے شکست دے کر کوارٹر فائنل میں رسائی حاصل کی جہاں ان کا سامنا اپنی بہن اور عالمی نمبر ایک سرینا سے ہو گا۔

واضح رہے کہ گزشتہ پانچ سال سے گرینڈ سلیم مقابلوں میں وینس کی کارکردگی اس معیار کی نہیں رہی جس کے لیے وہ ماضی میں مشہور تھیں اور یہی وجہ ہے کہ 2010 کے یو ایس اوپن کے سیمی فائنل میں رسائی کے بعد سے وہ کوئی قابل ذکر کارکردگی نہیں دکھا سکیں۔

اگر سرینا یہ گرینڈ سلیم جیت جاتی ہیں تو وہ سال کے چاروں گرینڈ سلیم مقابلے جیت کر کیلنڈر گرینڈ سلیم مکمل کر لیں گی اور اس کے ساتھ ساتھ اپنے ٹائٹلر کی تعداد 22 تک پہنچا کر جرمنی کی اسٹیفی گراف کا ریکارڈ برابر کردیں گی۔

پاکستان ہاکی فیڈریشن(پی ایچ ایف) میں ایک اور بحران کا خدشہ

کراچی: پاکستان ہاکی فیڈریشن(پی ایچ ایف) میں ایک نیا بحران پیدا ہونے کا خدشہ ہو چکا ہے جہاں میر ظفراللہ جمالی کی جانب سے نئے سیکریٹری شہباز سینئیر کی تعیناتی پر تحفظات کا اظہار کیے جانے کے بعد کا عہدہ خطرے میں پڑتا نظر آ رہا ہے۔

پاکستان ہاکی کی تاریخ میں پہلی بار اولمپکس تک رسائی میں ناکامی کے بعد باوجود پی ایچ ایف کے صدر، کوچ اور متعلقہ حکام نے استعفے دینے کی زحمت گوارا نہ کی لیکن ٹیم کی بدترین کارکردگی پر وزیر اعظم اور پاکستان ہاکی کے پیٹرن ان چیف نواز شریف کے نوٹس اور اس کی تحقیقات کیئے کمیٹی کے قیام کے بعد استعفوں کا ایک سلسلہ شروع ہوا۔

ٹیم کی کارکردگی کے حوالے سے مرتبہ کردہ رپورٹ وزیر اعظم ہاؤس پہنچنے کے ساتھ ہی پی ایچ ایف کے سابق صدر اختر رسول اور پھر ہیڈ کوچ شناز شیخ نے اپنے عہدوں سے استعفیٰ دے دیا جس کے ساتھ ہی ہاکی فیڈریشن کی کمان بریگیڈیئر ریٹائرڈ سجاد کھوکھر نے سنبھالی۔

لیکن اس فیڈریشن ایک بار پھر بحرانی کیفیت سے اس وقت دوچار ہوئی جب سابق سیکریٹری رانا مجاہد نے اپنے عہدے سے استعفیٰ دیا اور نئے صدر نے 1994 کا ورلڈ کپ جیتنے والی ٹیم کے کپتان اور سابق اولمپیئن شہباز سینئر کو سیکریٹری مقرر کیا جس پر میر ظفراللہ جمالی نے شدید ناراضی کا اظہار کیا ہے۔

وزیراعظم نے پی ایچ ایف میں نئے سیٹ اپ کی تشکیل کی ذمہ داری میرظفراللہ جمالی کو سونپتے ہوئے سیکریٹری وزارت بین الصوبائی رابطہ اعجاز چوہدری کو ہدایت کی تھی کہ قومی ہاکی سے متعلق تمام فیصلے میرظفراللہ جمالی کی مشاورت سے کیے جائیں گے۔

تاہم میرظفراللہ جمالی نے سیکریٹری اور دیگر عہدوں پر ہونے والی تقرریوں کے سلسلے میں انہیں نظرانداز کیے جانے پر وزیراعظم ہاؤس فون کر کے پیٹرن ان چیف سے سخت ناراضی کا اظہار کیا۔

نواز شریف نے اس کا سختی سے نوٹس لیتے ہوئے پاکستان ہاکی فیڈریشن کے صدر خالد کھوکھر کو میرظفراللہ جمالی سے فوری طور پر ملنے کی ہدایت کی تھی۔

ڈان نیوز سے گفتگو میں میر ظفراللہ جمالی نے تصدیق کی کہ ہفتے کو صدر اور نئے سیکرٹری ہاکی فیڈریشن نے ان سے ملاقات کی تاہم انہوں نے واضح کردیا کہ نئی تقرریاں ان سے بغیر مشاورت اور جلد بازی میں کی گئی ہے جس پر انہیں تحفظات ہیں۔

پاکستان کے سابق وزیر اعظم نے مزید کہا کہ ایک دو روز میں اسلام آباد جاکر وہ صدر ہاکی فیڈریشن سے ملاقات کریں گے جس میں وزیراعظم کی نمائندگی ملٹری سیکرٹری کریں گے۔

اس ملاقات میں پاکستان ہاکی فیڈریشن میں کی گئی حالیہ تقرریوں پر بات چیت ہوگی اور ان تبدیلیوں میں مزید تبدیلی کے امکانات موجود ہیں جس کے نتیجے میں ممکنہ طور پر شہباز سینئر اپنے عہدے سے محروم ہو سکتے ہیں۔

شین واٹسن نے ٹیسٹ کرکٹ سے ریٹائرمنٹ کا اعلان کردیا

آسٹریلین آل راؤنڈر شین واٹسن نے پنڈلی کی انجری کے سبب ٹیسٹ کرکٹ سے ریٹائرمنٹ کا اعلان کردیا ہے۔

دورہ انگلینڈ میں ایک بار پھر انجری کا شکار ہونے والے شین وارن نے فوری طور پر ٹیسٹ کرکٹ سے ریٹائرمنٹ کا اعلان کردیا ہے۔

وہ ہفتے کو لارڈز میں انگلینڈ کے خلاف ہونے والے پانچ میچوں کی سیریز کے دوسرے میچ کے دوران انجری کا شکار ہوئے، اس میچ میں آسٹریلیا 64 رنز سے فتحیاب رہا۔

اپنے دس سالہ ٹیسٹ کیریئر میں وقتاً فوقتاً انجری کا شکار رہنے والے 34 سالہ آسٹریلین کھلاڑی نے آج صبح ہی اپنی ٹیم کے کھلاڑیوں کو اپنے اس فیصلے سے آگاہ کیا۔

انہوں نے کہا کہ یہ فیصلہ کرنا آسان نہیں تھا لیکن میں سمجھتا ہوں کہ یہ آگے بڑھنے کا صحیح وقت ہے تاہم میں ابھی ایک روزہ اور ٹی ٹوئنٹی کرکٹ کھیلنے کیلئے پرامید ہوں۔

واضح رہے کہ شین واٹسن کو گزشتہ کچھ عرصے سے اپنی انجری اور فارم کی وجہ سے آسٹریلین ٹیم میں جگہ برقرار رکھنے میں شدید دشواری کا سامنا تھا۔

انہوں نے 59 ٹیسٹ میچوں میں آسٹریلیا کی نمائندگی کرتے ہوئے تین ہزار 731 رنز بنائے جبکہ 75 کھلاڑیوں کو بھی ٹھکانے لگایا۔

انہوں نے اپنی شاندار کارکردگی سے آسٹریلیا کو 14-2013 ایشز سیریز جتوانے میں اہم کردار ادا کیا تھا جبکہ وہ 2011 میں سال کے بہترین ٹیسٹ کھلاڑی کا آئی سی سی کا ایوارڈ جیتنے کا اعزاز بھی رکھتے ہیں جبکہ اس کے علاوہ انہیں دو بار ایلن بارڈر میڈل جیتنے کا اعزاز بھی حاصل ہے۔

جنوری 2005 میں پاکستان کے خلاف پہلا یسٹ کھیلنے والے واٹسن نے 23 سال کی عمر میں اپنی پہلی اننگ میں 31 رنز اسکور کرنے کے ساتھ ساتھ یونس خان کو اپنے کیریئر کی پہلی وکٹ بنایا تھا۔

واٹسن نے کہا کہ میں اپنے ٹیسٹ کیریئر میں وہ سب حاصل نہ کر سکا جس کا میں نے خواب دیکھا تھا۔

ان کا کہنا تھا کہ بحیثیت آل راؤنڈ میرا خواب تھا کہ میں بلے سے 50 سے زائد کی اوسط اور گیند سے 20 کے ہندسے میں اپنا ایوریج رکھ سکوں اور میں اس کے قریب بھی کچھ نہ کر سکا۔

لیکن انہوں نے کہا کہ مجھے فخر ہے کہ میں نے جتنی بھی کرکٹ کھیلی، اس میں اپنی بہترین کارکردگی کا مظاہرہ کیا۔

یاد رہے کہ واٹسن ایک ماہ کے عرصے میں ریٹائر ہونے والے تیسرے آسٹریلین کھلاڑی ہیں جہاں اس سے قبل سابق کپتان مائیکل کلارک اور اوپنر کرس راجرز ایشز سیریز کے اختتام پر کرکٹ سے علیحدگی اختیار کر چکے ہیں۔

Google Analytics Alternative