کھیل

پی ایس ایل نے میرے لئے انٹرنیشنل کرکٹ کا دروازہ کھولا، شاہین آفریدی

قومی ٹیم کے فاسٹ بولر شاہین آفریدی کا کہنا ہے کہ ی ایس ایل نے میرے لئے انٹرنیشنل کرکٹ کا دروازہ کھول دیا۔

قومی ٹیم کے لیفٹ آرم پیسر کا کہنا ہے کہ فرسٹ کلاس کیریئر کے آغاز سے پی ایس ایل میں 5 وکٹوں کی عمدہ کارکردگی تک سخت محنت کی، بڑے بھائی کے مشورے اور والدین کی دعائیں کام آئیں اور انٹرنیشنل کرکٹ میں بھی موقع پانے میں کامیاب ہو گیا۔

ایک انٹرویو میں انہوں نے کہا کہ اپنی صلاحیتوں اور محنت پر یقین تھا لیکن انٹرنیشنل کرکٹ کا دروازہ پی ایس ایل نے کھولا، گزشتہ سیزن میں 4 رنز دیکر ملتان سلطانز کی 5 وکٹیں حاصل کیں تو ہیڈ کوچ مکی آرتھر بڑے متاثر ہوئے اور ویسٹ انڈیز کے خلاف کراچی میں ٹی ٹوئنٹی سیریز سے قبل قومی ٹیم کے ٹریننگ سیشنز میں شرکت کیلئے بلا لیا، اس وقت یہ اندازہ نہیں تھا کہ اتنی جلدی ٹیسٹ ڈیبیو کا موقع بھی مل جائے گا۔

شاہین آفریدی نے کہا کہ میری کامیابی میں بھائی ریاض آفریدی کا اہم کردار ہے، انہوں نے بہتر بولنگ اور مثبت ذہن کے ساتھ پرفارم کرنے کیلئے بھرپور رہنمائی کی۔ دوسری جانب پیسر کے بھائی ریاض آفریدی کا کہنا ہے کہ شاہین شاہ صرف 8 سال کی عمر میں میرے پیڈز، گلوز اور ہیلمٹ پہن کر میدان میں جانے کیلئے اصرار کرتے تھے، میرے والد صاحب کی خواہش تھی کہ شاہین آفریدی نامور آل رائونڈر شاہد آفریدی کی وکٹ حاصل کریں جو پی ایس ایل تھری میں پوری ہو گئی۔

یاد رہے کہ لاہور قلندر کے پیسر شاہین آفریدی نے کراچی کنگز کی جانب سے کھیلنے والے شاہد آفریدی کی وکٹ اڑائی لیکن سینئر کا احترام کرتے ہوئے جشن منانے سے گریز کیا تھا۔

ویسٹ انڈین ویمن کرکٹرز نے دورہ پاکستان کو اپنے لیے اعزازقرار دے دیا

دبئی: ویسٹ انڈین ویمن کرکٹرز نے دورہ پاکستان کو اپنے لیے اعزاز قرار دیدیا۔

پیسر شاکیرا سیلمین نے کہاکہ مجھے بہت ہی خوشی ہوئی کہ ایسی ٹیم کا حصہ بنی جو پاکستان جانے کو تیار ہوئی، میرے لیے یہ اعزاز کی بات ہے کہ میں نے پاکستانی خواتین کی اپنی فیملیز کے سامنے کھیلنے میں مدد کی، مجھے معلوم ہی نہیں تھا کہ اپنے میدانوں پر کھیلنا پاکستانی پلیئرز کیلیے کتنا اہمیت کا حامل ہے۔ ان کی ساتھی کھلاڑی انیسہ محمد 2003 میں بھی پاکستان کا دورہ کرچکی ہیں۔

انھوں نے کہاکہ میرے لیے پاکستان کا دوبارہ سفر کافی بہتر ثابت ہوا، سچ بات تو یہ ہے کہ میں نے خود کو انتہائی محفوظ محسوس کیا، میں تو یہ کہوں گی کہ پاکستان کا سفر میری زندگی کا سب سے بہترین سفر رہا، میں نے اپنی ساتھی کھلاڑیوں کی بھی پاکستان کے ٹور کیلیے حوصلہ افزائی کی۔ پاکستانی آل راؤنڈر کائنات امتیاز نے کہاکہ اپنے کراؤڈ کے سامنے کھیلنے سے بڑھ کر اور کوئی خوشی نہیں ہوتی۔

واضح رہے کہ حال ہی میں کیریبیئن ویمنز ٹیم نے کراچی میں 3 ٹوئنٹی 20 میچز کی سیریز کھیلی تھی۔

 

‘صبر کریں، بہت جلد پی ایس ایل پاکستان میں ہو گا‘

پاکستان سپرلیگ (پی ایس ایل) فور کی افتتاحی تقریب میں پرفارم کرنے والے نامور فنکاروں میں شامل اداکار اور گلوکار فواد خان نے ویسٹ انڈیز کرکٹر ڈیرن سیمی کو پاکستانی قوم کا پسندیدہ کھلاڑی قرار دے دیا۔

دبئی میں منعقد پریس کانفرنس کے دوران انہوں نے کہا کہ ’پی ایس ایل میں ڈیرن سیمی کی واپسی سے جذبہ مزید بڑھا ہے تاہم ہمارے نزدیک تمام کھلاڑی قابل احترام ہیں‘۔

اس حوالےسے فواد خان نے امید ظاہر کی کہ ’تمام پی ایس ایل کامیاب رہے تاہم بتدریج پی ایس ایل پاکستان منتقل ہوجائےگا‘۔

انہوں نے بتایا کہ ’پی ایس ایل کی اختتامی تقریب کراچی میں ہو گی‘۔

ان کا کہنا تھا کہ ’پی ایس ایل ایک ایسا مقابلہ ہے جس میں اسپورٹس مین شپ کا مظاہرہ کیا جاتا ہے لیکن اس سے زیادہ تمام لوگوں کی ایک جگہ موجودگی سے ملکی اور غیر ملکی کھلاڑیوں کے مابین مربوط رابطے کا رحجان بڑھے گا اور مثبت بیغام پہنچے گا‘۔

گلوکار علی عظمت نے کہا کہ ’پاکستان سمیت دبئی کے وسیع اسٹیڈیم بھی تماشائیوں سے بھر جاتے ہیں تاہم یہ ایک پیغام ہے کہ پاکستان ایک پر امن ملک ہے‘۔

ان کا کہنا تھا کہ ’پاکستان میں سیاحت تیزی سے فروغ پا رہی ہے‘۔

علی عظمت نے کہا کہ ’بیرونی دنیا میں پاکستان کا تشخص بری طرح مسخ ہے لیکن جو کوئی غیرملکی ملک میں آتا ہے تو غریب سے غریب شخص بھی اپنی ہمت کے مطابق میزبانی کرتا ہے اور وہ میزبانی کو کبھی نہیں بھولتا‘۔

انہوں نے کہا کہ ’اگرکرکٹ، فلم اور میوزک کے ذریعے پوری دنیا میں پاکستان کا مثبت تاثرمل رہا ہے تو ہم سب کی کوشش پوری ہوجائے گی‘۔

فواد خان کا کہنا تھا کہ پی ایس ایل کا اینتھم گانا میرے لئے اعزاز کی بات ہے اور افتتاحی تقریب میں ینگ دیسی کے ساتھ بہترین پرفارم کریں گے۔

آئی سی سی نئی ٹیسٹ رینکنگ جاری، انگلینڈ کی دو درجے تنزلی

دبئی:ویسٹ انڈیز اور انگلینڈ کے درمیان سیریز ختم ہونے پر آئی سی سی نے ٹیموں کی نئی ٹیسٹ رینکنگ جاری کردی۔

انٹرنیشنل کرکٹ کونسل کی جانب سے جاری کردہ نئی ٹیسٹ رینکنگ کے تحت ٹیسٹ سیریز میں دو ایک سے ناکامی کے بعد انگلینڈ کی ٹیم کی دو درجے تنزلی ہوئی ہے اور وہ تیسری سے پانچویں پوزیشن پر آگری ہے۔ انگلینڈ کی ٹیم سینٹ لوشیا میں کھیلا گیا آخری ٹیسٹ 232 رنز سے جیتنے میں سرخرو رہی تاہم  دو ٹیسٹ ہارنے سے اس کو 4 رینکنگ پوائنٹس سےمحروم ہونا پڑا جس سے اس کی رینکنگ متاثر ہوئی ہے۔

دوسری جانب ویسٹ انڈیز کو ٹیسٹ سیریز  اپنے نام کرنے پر 7 پوائنٹس ملے ہیں لیکن اس کی رینکنگ میں کوئی بہتری نہیں آئی۔ نئی درجہ بندی میں بھارتی ٹیم بدستور پہلے نمبر پر موجود ہے۔ ساوتھ افریقہ کا دوسرا ، نیوزی لینڈ کا تیسرا آسٹریلیا کا چوتھا نمبر ہے ۔۔ ٹیسٹ ٹیم رینکنگ میں پاکستان ٹیم  کا نمبر ساتواں ہے۔

پی ایس ایل: پشاور زلمی کا اپنے شائقین کیلئے تحفہ

 کرکٹ کے دیوانوں کا میلہ پاکستان سپر لیگ (پی ایس ایل) سیزن 4 کے آغاز میں بس چند لمحات ہی باقی ہیں اور ٹیمیں بھرپور کارکردگی دکھانے کے لیے تیاریوں میں مصروف ہیں۔

ایک طرف جہاں کھلاڑی بہترین کھیل دکھانے کی تیاری کر رہے وہیں پی ایس ایل میں شامل ٹیمیں اپنے شائقین کو متوجہ کرنے کے لیے ترانے جاری کر رہی ہیں اور اس مرتبہ پشاور زلمی نے ایک قدم آگے بڑھتے ہوئے شائیقین کو تحفہ دیا ہے۔

پشاور زلمی کی جانب سے پاکستان سپر لیگ سیزن 4 کے پشتو ترانے کی ویڈیو جاری کردی گئی۔

یہ پشتو ترانہ خیبرپختونخوا کے ثقافتی اور تاریخی پس منظر پر مبنی ہے اور اس میں علاقے کے ثقافتی رنگ عیاں ہیں جبکہ یہ ترانہ نوجوانوں کو خصوصی طور پر متاثر کرتا ہے کہ وہ اپنے شعبے میں بہترین کام کرنے کے ساتھ امن کے فروغ میں بھی پیش پیش رہیں۔

پشاور زلمی کے اس ترانے کو معروف پشتو گلوکار زیک آفریدی اور گلوکارہ گل پانٹرہ نے اپنی آواز دی ہے جبکہ اسے صدارتی ایوارڈ یافتہ شاعر لئیق زادہ نے تحریر کیا ہے۔

پشتو ترانے کے جاری ہونے پر پشاور زلمی کے چیئرمین کا کہنا تھا کہ یہ ترانہ پورے خیبرپختونخوا اور زلمی کے شائقین کے دل کی آواز ہے۔

انہوں نے کہا کہ پشاور زلمی کی ٹیم پاکستان سپر لیگ سیزن 4 میں اچھی کارکردگی دکھا کر شائقین کی امیدوں پر پورا اترنے کی کوشش کرے گی۔

امام الحق پشاور زلمی کا حصہ بن گئے

لاہور: پاکستان سپر لیگ 4 کے لیے پاکستان کے نوجوان اوپننگ بیٹسمین امام الحق کو پشاور زلمی اسکواڈ میں شامل کرلیا گیا، وہ آج رات دبئی روانہ ہوں گے۔

امام الحق کو بطور 21واں کھلاڑی پشاور زلمی اسکواڈ کا حصہ بنایا گیاہے،  پشاور زلمی کے چیئرمین جاوید آفریدی نے امام الحق کو زلمی فیملی میں خوش آمدید کہتے ہوئے کہا کہ امام الحق کی شمولیت سے زلمی اسکواڈ مزید مضبوط ہوگا۔

23 سالہ امام الحق 29 ٹی ٹوئنٹی میچز میں 40.61 کی اوسط سے ،853رنز بناچکے ہیں، امام الحق  21 ون ڈے میچز میں 5 سنچریوں اور 5 نصف سنچریوں کی مدد سے 1090رنز بناکر محدود اوورز کی کرکٹ میں اپنی صلاحیتوں کا لوہا منواچکے ہیں۔

پی ایس ایل کے چوتھے ایڈیشن کی ٹرافی کی تقریب رونمائی

دبئی: پاکستان سپر لیگ کے چوتھے ایڈیشن کی ٹرافی کی تقریب رونمائی کردی گئی، تمام ٹیموں کے کپتانوں اور مہمانوں نے ٹرافی کے ساتھ تصاویر بھی بنوائیں۔

پی ایس ایل 4 کا باقاعدہ آغاز 14 فروری  کو دبئی میں دفاعی چیمپئن اسلام آباد یونائیٹیڈ اور لاہور قلندرز کے درمیان میچ سے ہوگا جس کے لیے تمام تیاریاں مکمل کرلی گئیں۔

دبئی اسٹیڈیم میں ایونٹ کی ٹرافی کی رونمائی تقریب میں چیئرمین پی سی بی احسان مانی، ایم ڈی پی سی بی وسیم خان، تمام فرنچائز مالکان اور دیگر مہمانوں نے شرکت کی۔

پشاور زلمی کے کپتان ڈیرن سیمی، لاہور قلندرز کے محمدحفیظ ، کراچی کنگز کے عماد وسیم، ملتان سلطانز کے شعیب ملک اور اسلام آباد یونائیٹڈ کے کپتان محمد سمیع نے مختلف ٹرافیوں کی رونمائی کی۔

پی ایس ایل 4 کی ٹرافی کی رونمائی کے بعد تمام ٹیموں کے کپتانوں نے اس کے ساتھ تصاویر بھی بنوائیں۔

ایونٹ میں شامل تمام ٹیموں کے کپتانوں نے چیئرمین پی سی بی احسان مانی اور منیجنگ ڈائریکٹر وسیم خان کے ہمراہ پریس کانفرنس کی۔

اس موقع پر احسان مانی کا کہنا تھا کہ پاکستان سپر لیگ کا اب تک کا سفر شاندار ہے، ایونٹ کی کامیابی میں فرنچائز اونرز، اسپانسرز اور سب سے زیادہ کردار کھلاڑیوں نے ادا کیا۔

انہوں نے کہا کہ 3 سال میں پاکستان سپر لیگ پاکستان کا قومی فخر بن چکا ہے، اس لیگ کا مقصد نوجوان کھلاڑیوں کو اپنا ہنر دکھانے کا موقع دینا ہے، پی ایس ایل ٹرافی پاکستان کی ثقافت اور روایات کے ساتھ اس کےمستقبل کی عکاس ہے۔

یاد رہے کہ پاکستان سپر لیگ کی افتتاحی تقریب 14 فروری کو دبئی میں ہوگا اور اسی روز افتتاحی میچ لاہور قلندرز اور اسلام آباد یونائیٹیڈ کے درمیان کھیلا جائے گا۔

پی ایس ایل 4؛ کھلاڑیوں سے اینٹی کرپشن کوڈ پر دستخط کروانے کی مہم شروع

لاہور: پاکستان کرکٹ بورڈ نے پی ایس ایل 4 کو کرپشن فری بنانے کے لئے ضابطہ اخلاق جاری کرتے ہوئے ٹیموں میں شامل کھلاڑیوں سے اینٹی کرپشن کوڈ پر دستخط کروانے کی مہم بھی شروع کردی ہے۔

پی سی بی اینٹی کرپشن یونٹ کے ساتھ ساتھ آئی سی سی اینٹی کرپشن یونٹ کے اہلکار بھی ہوٹل اور میچز کے دوران کرکٹرز، میچ ، ٹیم آفیشلز اور ٹیم مالکان پر نظر رکھیں گے۔

ذرائع کے مطابق پی سی بی نے پی ایس ایل کے ضابطہ اخلاق کو سخت کردیا ہے تاکہ کوئی ناخوشگوار واقعہ رونما نہ ہو۔ ڈریسنگ روم اور ڈگ آؤٹس میں صرف کرکٹرز اور ٹیم انتظامیہ کو ہی بیٹھنے کی اجازت ہوگی، میچز کے دوران اسٹیڈیمز میں ٹیم مالکان کھلاڑیوں سے دور رہیں گے۔ کرکٹرز کی غیر متعلقہ افراد سے میل جول پر پابندی ہوگی، پلئیرز اور آفیشلز کی ہوٹل لابی میں بھی نقل و حمل محدود ہوگی، نجی پارٹیوں میں شرکت بھی نہیں کی جاسکے گی، کہیں آنے جانے کے لئے صرف ٹیم کے ساتھ ہی ٹریولنگ کی اجازت ہوگی کھلاڑیوں کے بلاجواز ہوٹل کی لابی میں بیٹھنے پر بھی پابندی ہو گی۔

ضابطہ اخلاق کے تحت کھلاڑیوں کے میڈیا منیجر کی عدم موجودگی میں انٹرویوز دینے کی پابندی ہوگی۔ فرنچائز مالکان ہوٹل میں کھلاڑیوں کے کمروں میں نہیں جاسکیں گے۔ کھلاڑیوں کے بلاجواز ہوٹل کی لابی میں بیٹھنے پر بھی پابندی ہوگی۔ کھلاڑیوں کے میڈیا منیجر کی عدم موجودگی میں انٹرویوز دینے کی پابندی ہوگی۔ فرنچائز مالکان ہوٹل میں کھلاڑیوں کے کمروں میں نہیں جاسکیں گے۔ پی سی بی سکیورٹی اینڈ ویجی لینس کے حکام ہوٹلز میں کھلاڑیوں پر خصوصی نظر رکھیں گے۔

14 فروری سے شروع ہونے والے ایونٹ کے لیے پی سی بی نے فرنچائزز مالکان پر واضح کردیا ہے کہ لیگ کے حوالے سے وضع کیے گئے اینٹی کرپشن کوڈ پر سختی سے عمل درآمد کو یقینی بنایا جائے۔ یہ کوڈ آف کنڈکٹ کرکٹرز، فرنچائز مالکان کے ساتھ دیگر آفیشلز پر بھی لاگو ہوگا۔

واضح رہے کہ پی ایس ایل 2 میں کرکٹ کرپشن کے واقعات سامنے آئے تھے جس سے پاکستان کی بدنامی کے ساتھ پی ایس ایل کی شفافیت پر سوالات اٹھے تھے۔

Google Analytics Alternative