کھیل

محمد حفیظ کو ٹی ٹونٹی ایونٹ میں باؤلنگ کرنے کی اجازت مل گئی

لاہور: قومی ٹی ٹونٹی ٹیم کے سابق کپتا ن محمد حفیظ کو آج سے شروع ہونے والے ڈومیسٹک ٹی ٹونٹی ایونٹ میں باؤلنگ کرنے کی اجازت مل گئی ہے ۔ ذرائع کے مطابق پاکستان کرکٹ بورڈ (پی سی بی) کے اعلی حکام نے اس حوالے سے حفیظ کو گرین سگنل دے دیا ہے جس کے بعد آل راؤنڈر آ ج اپنی ٹیم لاہوروائٹس اور اسلام آباد ریجن کے مابین راولپنڈی کرکٹ سٹیڈیم میں شیڈول میچ میں باؤلنگ کر یں گے ۔ اس بارے میں آئی سی سی کے ایک اعلی عہدیدار کا کہنا ہے کہ اگر کسی کھلاڑی پر انٹر نیشنل کرکٹ میں باؤلنگ کرنے پر پابندی عائد ہو تو متعلقہ کرکٹ بورڈ اسے ڈومیسٹک کرکٹ میں باؤلنگ کرنے کی اجازت دے سکتا ہے ، مذکورہ عہدیدار کے مطابق اس اجازت کا مقصد اس باؤلر کے ایکشن کی جانچ پڑتا ل کرنا ہوتا ہے اور اگر اسکا بورڈ مطمئن ہو تو وہ آئی سی سی سے اس کے باؤلنگ ایکشن کا ٹیسٹ دوبارہ لینے کی درخواست بھی کر سکتا ہے ۔ یاد رہے کہ محمد حفیظ کا ایکشن پہلی مرتبہ نومبر 2014ء میں نیوزی لینڈ کے خلاف متحدہ عرب امارات میں کھیلی گئی ٹیسٹ سیریز کے دوران رپورٹ ہوا تھا جس کے بعد آئی سی سی نے ان پر پابندی عائد کر دی تھی ،اپریل 2015ء میں انہوں نے اپنا باؤلنگ ایکشن چنائی کی لیب سے کلیئر کروایا تاہم سری لنکا کے خلاف حالیہ ٹیسٹ سیریز کے دوران ان کا ایکشن ایک بار پھر رپورٹ ہوا جس کے بعد باؤلنگ ایکشن کے ٹیسٹ کا نتیجہ انکے خلاف آنے کے بعد آئی سی سی نے ان پر ایک سال تک انٹر نیشنل کرکٹ میں باؤلنگ کروانے پر پابندی عائد کر دی ۔

پاکستان سپر لیگ میں شرکت کیلیے غیرملکی کرکٹرز سر گرم

کراچی:  پاکستان سپر لیگ میں شرکت سے قبل غیرملکی کرکٹرز نے ایسوسی ایشن سے مشاورت شروع کر دی ہے۔ تفصیلات کے مطابق لاہور، کراچی، پشاور، کوئٹہ اور اسلام آباد کے نام سے5ٹیمیں آئندہ برس 4 سے 24 فروری تک دوحا، قطر میں پی ایس ایل کے دوران ایکشن میں نظر آئیں گی، ایک ملین ڈالر انعامی رقم کے ایونٹ میں پی سی بی کا دعویٰ ہے کہ 40 انٹرنیشنل کرکٹرز شرکت کی خواہش رکھتے ہیں۔ ایونٹ کے حوالے سے فیڈریشن آف انٹرنیشنل کرکٹرز ایسوسی ایشن (فیکا) کے ایگزیکٹیو چیئرمین ٹونی آئرش نے بھی اپنے خیالات کا اظہار کیا ہے،کیپ ٹاؤن، جنوبی افریقہ سے نمائندہ ’’ایکسپریس‘‘ کو خصوصی انٹرویو میں انھوں نے کہا کہ بعض ممبر کرکٹرز نے پاکستان سپر لیگ کے حوالے سے ہم سے معلومات طلب کی ہیں البتہ ان کے نام نہیں بتا سکتا،ٹونی آئرش نے کہا کہ فیکا پی ایس ایل سمیت کسی بھی ٹوئنٹی 20 لیگ میں پلیئرز کو شرکت کا موقع ملنے کی حوصلہ افزائی کرتی ہے۔ البتہ بعض معاملات پر عمل درآمد ضروری ہے، ایک تو ایونٹ آئی سی سی سے منظور شدہ ہو، سیکیورٹی معاملات کے لحاظ سے کھلاڑیوں کی اس میں شرکت درست ہو،کھیل کا وقار برقرار رکھنے کے سلسلے میں اینٹی کرپشن اور ڈوپنگ کوڈز کا مکمل اطلاق کیا ہو، منفی عناصر سے بچنے کیلیے اینٹی کرپشن یونٹ کا تقرر بھی ضروری ہے۔ اسی کے ساتھ پلیئرز کے ساتھ درست اور منصفانہ معاہدے کیے جائیں۔انھوں نے کہا کہ ہمارا اپنے رکن ارکان کو یہی مشورہ ہوگا کہ اگر ان تمام باتوں پر عمل درآمد کیا جائے تو ضرور پی ایس ایل میں شرکت کریں، ساتھ ان کے اپنے ملک کی کرکٹ بورڈ کا این او سی بھی ضروری ہوگا۔ یاد رہے کہ1998میں قائم شدہ فیکا دنیا بھر کے کرکٹرز کے حقوق کا تحفظ کرتی ہے،آسٹریلیا، انگلینڈ، نیوزی لینڈ، جنوبی افریقہ،سری لنکا اور ویسٹ انڈیز کی پلیئرز ایسوسی ایشنز اس کی رکن ہیں،بنگلہ دیشی کرکٹرز ویلفیئر ایسوسی ایشن کا بھی فیکا سے اطلاق ہے، ٹیسٹ ممالک میں صرف پاکستان، بھارت اور زمبابوے اس کے رکن نہیں ہیں۔ ایک سوال پر ٹونی آئرش نے کہا کہ ماضی میں بعض ٹی ٹوئنٹی لیگز کے دوران کھلاڑیوں کو معاوضوں کے معاملے میں مشکلات کا سامنا کرنا پڑا، اسی لیے ہم تمام ایسے ایونٹس کے منتظمین کو معاہدے میں یہ شق رکھنے کا مشورہ دیتے ہیں کہ فیس کا کچھ حصہ لیگ شروع ہونے سے قبل ادا کر دیا جائے گا۔ہم کھلاڑیوں سے بھی کہتے ہیں کہ اس بات پر اصرار کریں۔ بھارت، سری لنکا اور بنگلہ دیشی لیگز کے فکسنگ سے متاثر ہونے کے بعد فیکا چیف نے پاکستان کو مشورہ دیا کہ سخت اینٹی کرپشن کوڈ کا اطلاق کریں، ایونٹ ہر حالت میں اینٹی کرپشن یونٹ کی زیرنگرانی کرایا جائے جو آئی سی سی کا ہو یا کونسل اسے جانچ چکی ہو

ڈس ایبلڈ کرکٹ ٹورنامنٹ میں پاکستان نے بھارت کو ہرا کر فائنل میں جگہ بنا لی۔

ڈھاکا: پانچ ملکی ڈس ایبلڈ ٹی ٹوئنٹی کرکٹ ٹورنامنٹ میں پاکستان نے بھارت کو 43رنز سے کچل کر فائنل میں رسائی پالی، لیفٹ آرم اسپنر فیاض احمد نے ہیٹ ٹرک کا کارنامہ انجام دیا، افغانستان نے میزبان بنگلہ دیش کو 3 وکٹ سے مات دے دی۔ تفصیلات کے مطابق ڈھاکا میں جاری ایونٹ میں پاکستان کیخلاف بھارتی سائیڈ نے ٹاس جیت کر پہلے بولنگ کا فیصلہ کیا، گرین شرٹس نے موقع سے بھرپور فائدہ اٹھاتے ہوئے مقررہ اوورز میں 6 وکٹیں گنواکر174 رنز اسکور بورڈ پر جوڑے، کپتان حسنین عالم نے ساتھی اوپنر مطلوب حسین کے ہمراہ ففٹی پلس کا آغاز فراہم کیا، حسنین عالم نے25 گیندوں پر 39رنز اسکور کیے۔ ان کی اننگز میں 6 چوکے اور ایک چھکا شامل رہا، مطلوب نے13رنز اسکور کیے، ریحان غنی مرزا نے 25 گیندوں پر 34رنز بنائے،دانش احمد 15بالز پر26رنز بنانے میں کامیاب رہے، دنیش کمار اور دیشارتھ نے 2،2 وکٹیں لیں، جواب میں لیفٹ آرم اسپنر فیاض احمد کی تباہ کن بولنگ کے سامنے بھارتی ٹیم 131رنز پر آؤٹ ہوگئی، یش ناگی 26،انسول 24 اور کرونل 20رنز بناکر کچھ مزاحمت کرپائے، فیاض نے ہیٹ ٹرک سمیت14رنز کے عوض4 کھلاڑیوں کو پویلین چلتا کیا،یہ انٹرنیشنل ڈس ایبلڈ کرکٹ ٹورنامنٹ کی تاریخ میں بھی پہلی ہیٹ ٹرک شمار ہوئی، راؤ جاوید اور نہارعالم نے 2،2 وکٹیں اپنے نام کیں۔ واضح رہے کہ ون ڈے انٹرنیشنل میں بھی دنیا کی پہلی ہیٹ ٹرک بنانے کا اعزاز پاکستان کے سابق فاسٹ بولر جلال الدین کو حاصل ہے، گذشتہ روزدوسرے میچ میں افغانستان نے بنگلہ دیش کو3 وکٹ سے ہرادیا، میزبان ٹیم نے مقررہ اوورز میں6 وکٹ کے نقصان پر119رنزبنائے، افغان بولرز نے آغاز پر نپی تلی بولنگ کرتے ہوئے ابتدائی3 اوورز میں میزبان ٹیم کے 2 کھلاڑی آؤٹ کیے، جس کے بعد ہر اوور کے ساتھ رنزبنانے کی رفتارکم ہوتی گئی۔ پاورپلے میں بنگلہ دیشی ٹیم محض18رنز اسکور کرپائی، امین الدین نے کچھ ہمت دکھاتے ہوئے 26کی اننگز کھیلی، شاہریا شمیم نے47 گیندوں پر 56رنزبٹورکرٹیم کو سنبھالادیا، اپربوکمار 19 رنز بناکرنمایاں رہے، محمود اللہ نے2 کھلاڑیوں کو قابوکیا، جوابی اننگز میں افغان ٹیم جارحانہ موڈ میں دکھائی دی اور دوسرے اوورمیں20 رنزبٹورے، حسیب اللہ متنازع انداز میں رن آؤٹ ہوئے، افغانستان نے ہدف 7 وکٹ پرحاصل کرلیا، 32رنز اسکور کرنے والے محمود اللہ کو میچ کا بہترین کھلاڑی قرار دیاگیا۔

نوواک جوکووچ کی لگاتار 26ویں فتح

نیویارک: عالمی نمبر ایک نوواک جوکووچ اسپین کے روبرٹو بوٹسٹا کو شکست دے کر یو ایس اوپن کے کوارٹر فائنل میں پہنچنے کے ساتھ ساتھ لگاتار 26ویں گرینڈ سلیم کے کوارٹر فائنل میں پہنچ گئے ہیں۔

2011 کے یو ایس اوپن چیمپیئن نے 6-3 کی فتح کے ساتھ پہلا سیٹ اپنے نام کیا لیکن دوسرے سیٹ میں ہسپانوی حریف نے انہیں اپ سیٹ کرتے ہوئے 4-6 سے فتح اپنے نام کی۔

تاہم اس کے بعد جوکووچ نے بوٹسٹا کو کوئی موقع نہ دیا اور اگلے دونوں سیٹ 6-4 اور 6-3 سے جیت کر لگاتار نویں مرتبہ یو ایس اوپن کے کوارٹر فائنل میں جگہ بنا لی۔

کوارٹر فائنل میں ان کا مقابلہ ایک اور ہسپانوی حریف فلسیانو لوپیز سے ہو گا۔

ادھر خواتین کی عالمی نمبر ایک سرینا ولیمز نے بھی کوارٹر فائنل میں جگہ بنا لی ہے جہاں ان کا مقابلہ اپنی بہن اور سابقہ چیمپیئن وینس ولیمز سے ہو گا۔

سرینا نے اپنی شاندار فارم کا سلسلہ برقرار رکھا اور امریکا کی ہی 19ویں سیڈ میڈیسن کی کو 6-3 اور 6-3 سے شکست دے کر ٹائٹل کے ساتھ ساتھ کیلنڈر گرینڈ سلیم کی جانب پیش قدمی برقرار رکھی۔

ان کی بہن اور 23ویں وینس ولیمز نے 152ویں سیڈ ایسٹونیا کی کوالیفائر اینٹ کونٹاویٹ کو باآسانی 6-2 اور 6-1 سے شکست دے کر کوارٹر فائنل میں رسائی حاصل کی جہاں ان کا سامنا اپنی بہن اور عالمی نمبر ایک سرینا سے ہو گا۔

واضح رہے کہ گزشتہ پانچ سال سے گرینڈ سلیم مقابلوں میں وینس کی کارکردگی اس معیار کی نہیں رہی جس کے لیے وہ ماضی میں مشہور تھیں اور یہی وجہ ہے کہ 2010 کے یو ایس اوپن کے سیمی فائنل میں رسائی کے بعد سے وہ کوئی قابل ذکر کارکردگی نہیں دکھا سکیں۔

اگر سرینا یہ گرینڈ سلیم جیت جاتی ہیں تو وہ سال کے چاروں گرینڈ سلیم مقابلے جیت کر کیلنڈر گرینڈ سلیم مکمل کر لیں گی اور اس کے ساتھ ساتھ اپنے ٹائٹلر کی تعداد 22 تک پہنچا کر جرمنی کی اسٹیفی گراف کا ریکارڈ برابر کردیں گی۔

پاکستان ہاکی فیڈریشن(پی ایچ ایف) میں ایک اور بحران کا خدشہ

کراچی: پاکستان ہاکی فیڈریشن(پی ایچ ایف) میں ایک نیا بحران پیدا ہونے کا خدشہ ہو چکا ہے جہاں میر ظفراللہ جمالی کی جانب سے نئے سیکریٹری شہباز سینئیر کی تعیناتی پر تحفظات کا اظہار کیے جانے کے بعد کا عہدہ خطرے میں پڑتا نظر آ رہا ہے۔

پاکستان ہاکی کی تاریخ میں پہلی بار اولمپکس تک رسائی میں ناکامی کے بعد باوجود پی ایچ ایف کے صدر، کوچ اور متعلقہ حکام نے استعفے دینے کی زحمت گوارا نہ کی لیکن ٹیم کی بدترین کارکردگی پر وزیر اعظم اور پاکستان ہاکی کے پیٹرن ان چیف نواز شریف کے نوٹس اور اس کی تحقیقات کیئے کمیٹی کے قیام کے بعد استعفوں کا ایک سلسلہ شروع ہوا۔

ٹیم کی کارکردگی کے حوالے سے مرتبہ کردہ رپورٹ وزیر اعظم ہاؤس پہنچنے کے ساتھ ہی پی ایچ ایف کے سابق صدر اختر رسول اور پھر ہیڈ کوچ شناز شیخ نے اپنے عہدوں سے استعفیٰ دے دیا جس کے ساتھ ہی ہاکی فیڈریشن کی کمان بریگیڈیئر ریٹائرڈ سجاد کھوکھر نے سنبھالی۔

لیکن اس فیڈریشن ایک بار پھر بحرانی کیفیت سے اس وقت دوچار ہوئی جب سابق سیکریٹری رانا مجاہد نے اپنے عہدے سے استعفیٰ دیا اور نئے صدر نے 1994 کا ورلڈ کپ جیتنے والی ٹیم کے کپتان اور سابق اولمپیئن شہباز سینئر کو سیکریٹری مقرر کیا جس پر میر ظفراللہ جمالی نے شدید ناراضی کا اظہار کیا ہے۔

وزیراعظم نے پی ایچ ایف میں نئے سیٹ اپ کی تشکیل کی ذمہ داری میرظفراللہ جمالی کو سونپتے ہوئے سیکریٹری وزارت بین الصوبائی رابطہ اعجاز چوہدری کو ہدایت کی تھی کہ قومی ہاکی سے متعلق تمام فیصلے میرظفراللہ جمالی کی مشاورت سے کیے جائیں گے۔

تاہم میرظفراللہ جمالی نے سیکریٹری اور دیگر عہدوں پر ہونے والی تقرریوں کے سلسلے میں انہیں نظرانداز کیے جانے پر وزیراعظم ہاؤس فون کر کے پیٹرن ان چیف سے سخت ناراضی کا اظہار کیا۔

نواز شریف نے اس کا سختی سے نوٹس لیتے ہوئے پاکستان ہاکی فیڈریشن کے صدر خالد کھوکھر کو میرظفراللہ جمالی سے فوری طور پر ملنے کی ہدایت کی تھی۔

ڈان نیوز سے گفتگو میں میر ظفراللہ جمالی نے تصدیق کی کہ ہفتے کو صدر اور نئے سیکرٹری ہاکی فیڈریشن نے ان سے ملاقات کی تاہم انہوں نے واضح کردیا کہ نئی تقرریاں ان سے بغیر مشاورت اور جلد بازی میں کی گئی ہے جس پر انہیں تحفظات ہیں۔

پاکستان کے سابق وزیر اعظم نے مزید کہا کہ ایک دو روز میں اسلام آباد جاکر وہ صدر ہاکی فیڈریشن سے ملاقات کریں گے جس میں وزیراعظم کی نمائندگی ملٹری سیکرٹری کریں گے۔

اس ملاقات میں پاکستان ہاکی فیڈریشن میں کی گئی حالیہ تقرریوں پر بات چیت ہوگی اور ان تبدیلیوں میں مزید تبدیلی کے امکانات موجود ہیں جس کے نتیجے میں ممکنہ طور پر شہباز سینئر اپنے عہدے سے محروم ہو سکتے ہیں۔

شین واٹسن نے ٹیسٹ کرکٹ سے ریٹائرمنٹ کا اعلان کردیا

آسٹریلین آل راؤنڈر شین واٹسن نے پنڈلی کی انجری کے سبب ٹیسٹ کرکٹ سے ریٹائرمنٹ کا اعلان کردیا ہے۔

دورہ انگلینڈ میں ایک بار پھر انجری کا شکار ہونے والے شین وارن نے فوری طور پر ٹیسٹ کرکٹ سے ریٹائرمنٹ کا اعلان کردیا ہے۔

وہ ہفتے کو لارڈز میں انگلینڈ کے خلاف ہونے والے پانچ میچوں کی سیریز کے دوسرے میچ کے دوران انجری کا شکار ہوئے، اس میچ میں آسٹریلیا 64 رنز سے فتحیاب رہا۔

اپنے دس سالہ ٹیسٹ کیریئر میں وقتاً فوقتاً انجری کا شکار رہنے والے 34 سالہ آسٹریلین کھلاڑی نے آج صبح ہی اپنی ٹیم کے کھلاڑیوں کو اپنے اس فیصلے سے آگاہ کیا۔

انہوں نے کہا کہ یہ فیصلہ کرنا آسان نہیں تھا لیکن میں سمجھتا ہوں کہ یہ آگے بڑھنے کا صحیح وقت ہے تاہم میں ابھی ایک روزہ اور ٹی ٹوئنٹی کرکٹ کھیلنے کیلئے پرامید ہوں۔

واضح رہے کہ شین واٹسن کو گزشتہ کچھ عرصے سے اپنی انجری اور فارم کی وجہ سے آسٹریلین ٹیم میں جگہ برقرار رکھنے میں شدید دشواری کا سامنا تھا۔

انہوں نے 59 ٹیسٹ میچوں میں آسٹریلیا کی نمائندگی کرتے ہوئے تین ہزار 731 رنز بنائے جبکہ 75 کھلاڑیوں کو بھی ٹھکانے لگایا۔

انہوں نے اپنی شاندار کارکردگی سے آسٹریلیا کو 14-2013 ایشز سیریز جتوانے میں اہم کردار ادا کیا تھا جبکہ وہ 2011 میں سال کے بہترین ٹیسٹ کھلاڑی کا آئی سی سی کا ایوارڈ جیتنے کا اعزاز بھی رکھتے ہیں جبکہ اس کے علاوہ انہیں دو بار ایلن بارڈر میڈل جیتنے کا اعزاز بھی حاصل ہے۔

جنوری 2005 میں پاکستان کے خلاف پہلا یسٹ کھیلنے والے واٹسن نے 23 سال کی عمر میں اپنی پہلی اننگ میں 31 رنز اسکور کرنے کے ساتھ ساتھ یونس خان کو اپنے کیریئر کی پہلی وکٹ بنایا تھا۔

واٹسن نے کہا کہ میں اپنے ٹیسٹ کیریئر میں وہ سب حاصل نہ کر سکا جس کا میں نے خواب دیکھا تھا۔

ان کا کہنا تھا کہ بحیثیت آل راؤنڈ میرا خواب تھا کہ میں بلے سے 50 سے زائد کی اوسط اور گیند سے 20 کے ہندسے میں اپنا ایوریج رکھ سکوں اور میں اس کے قریب بھی کچھ نہ کر سکا۔

لیکن انہوں نے کہا کہ مجھے فخر ہے کہ میں نے جتنی بھی کرکٹ کھیلی، اس میں اپنی بہترین کارکردگی کا مظاہرہ کیا۔

یاد رہے کہ واٹسن ایک ماہ کے عرصے میں ریٹائر ہونے والے تیسرے آسٹریلین کھلاڑی ہیں جہاں اس سے قبل سابق کپتان مائیکل کلارک اور اوپنر کرس راجرز ایشز سیریز کے اختتام پر کرکٹ سے علیحدگی اختیار کر چکے ہیں۔

پاک-انڈیا کرکٹ سیریز,دونوں ملکوں کے درمیان تناؤ کو کم کرنے میں معاون ثابت ہو گی۔وقار یونس

کراچی: قومی کرکٹ ٹیم کے کوچ وقار یونس نے پاکستان اور ہندوستان کے درمیان دوطرفہ سیریز کی امید ظایر کرتے ہوئے کہا ہے کہ کرکٹ دونوں ملکوں کے درمیان تناؤ کو کم کرنے میں معاون ثابت ہو گی۔

ہندوستان نے گزشتہ سال پاکستان کے ساتھ ایک معاہدے کی یادداشت پر دستخط کیے تھے جس کے تحت دونوں ملکوں کے درمیان 2023 تک چھ مکمل سیریز کھیلی جانی ہیں جس میں سے چار کی میزبانی پاکستان کرے گا۔

اس معاہدے کے تحت دونوں روایتی حریفوں کے درمیان پہلی سیریز رواں سال دسمبر میں ہونی تھی کی جس کی میزبانی ممکنہ طور پر پاکستان کرتا لیکن دونوں ملکوں کے درمیان سرحد پر جاری کشیدگی اور سفارتی تعلقات ایک بار پھر خراب ہونے کے سبب اس سیریز کے امکانات تقریباً نہ ہونے کے برابر ہیں۔

لیکن پاکستانی ٹیم کے کوچ وقار یونس اس صورتحال میں بھی دونوں ملکوں کے درمیان سیریز کے لیے پرامید ہیں۔

انہوں نے کہا کہ مجھے اب بھی سیریز کی امید ہے اور ہندوستان کے نام پیغام میں کہا کہ مستقل بنیادوں پر دوطرفہ سیریز کھیلنے سے دونوں ملکوں کے تعلقات میں موجود تناؤ کو کم کرنے میں مدد مل سکتی ہے۔

سابق فاسٹ باؤلر نے دونوں ملکوں کے درمیان 2007 سے اب تک ایک بھی ٹیسٹ میچ نہ ہونے پر افسوس کا اظہار کرتے ہوئے کہا کہ دونوں ملکوں کے درمیان موجودہ صورتحال کو دیکھتے ہوئے یہ سیریز خطرے میں دکھائی دیتی ہے لیکن مجھے اب بھی امید ہے کہ دسمبر میں سیریز ہو گی۔

’اگر سیریز نہیں ہو پاتی تو یہ پوری کرکٹ کی بہت بڑی بدقسمتی ہو گی ہر کوئی پاکستان ہندوستان کے میچ دیکھنا چاہتا ہے لیکن میرے خیال میں یہ دونوں ملکوں کے درمیان دوطرفہ کرکٹ میچز شروع کرنے کا نادر موقع ہے‘۔

اس موقع پر انہوں نے آئندہ سال ہونے والی پاکستان سپر لیگ کیلئے اپنی دستیابی ظاہر کرتے ہوئے پاکستان کرکٹ بورڈ پر زور دیا کہ وہ لیگ میں زیادہ سے زیادہ انڈر19 اور انڈر23 کھلاڑیوں کو مواقع فراہم کرے۔

ماضی کے مایہ ناز فاسٹ باؤلر نے کہا کہ بورڈ کو بیرون ملک سے بڑے کھلاڑیوں کو ضرور بلانا چاہیے لیکن اس کے ساتھ ساتھ پی ایس ایل ہمارے نوجوان کھلاڑیوں کو بھی عالمی منظر نامے پر متعارف کرانے کا شاندار موقع ہے۔

’اس طرح کی لیگ دوسرے ملکوں میں بھی ہوئی ہیں اور انہیں اس طرح کے مقابلوں سے فائدہ ہوا ہے‘۔

وقار نے انڈین پریمیئر لیگ کی مثال دیتے ہوئے کہا کہ آئی پی ایل کے ذریعے سے ہندوستان بے انتہا نوجوان باصلاحیت کھلاڑی ملے، اس سے ناصرف کھلاڑیوں کا مالی فائدہ ہوا بلکہ نئے کھلاڑیوں کو درکار اعلیٰ سطح کا تجربہ بھی حاصل ہوا۔

قومی ٹیم کے کوچ حال ہی میں سڈنی میں اہل خانہ کے ہمراہ چھٹیاں گزارنے کے بعد لاہور پہنچے ہیں۔

اسپاٹ فکسنگ اسکینڈل میں ملوث محمد عامر، سلمان بٹ کی قومی ٹیم میں واپسی کے حوالے سے سوال پر وقار نے کہا کہ ان تینوں کی پابندی کا ابھی خاتمہ ہوا ہے اور امجھے اس سلسلے میں بورڈ حکام سے بات چیت کا موقع نہیں ملا لہذٰا شاید ایک یا دو ہفتے بعد میں اس سلسلے میں بہتر جواب دے سکوں۔

سعید اجمل کی قومی ٹیم میں دوبارہ شمولیت کے بارے میں وقار کا کہنا تھا کہ اجمل اس وقت اپنے کیریئر کے سب سے مشکل وقت سے گزر رہے ہیں لیکن قومی ٹیم میں دوبارہ شمولیت کیلئے انہیں اپنی فارم ثابت کرنی ہو گی۔

کرکٹ کی دنیا کی قدیم ترین گیند سسیکس کرکٹ میوزیم میں موجود

لندن: دنیا کی قدیم ترین کرکٹ گیند سسیکس کرکٹ میوزیم میں موجود ہے، اس کی سلائیاں تقریباً ختم ہوچکیں جبکہ چمڑا بھی کئی جگہ سے اکھڑچکا ہے۔یہ گیند ساؤتھ اسٹریٹ میں واقع لیواس کے علاقے میں ایک گھر کی تزئین و آرائش کے دوران دریافت ہوئی، اس کے ہمراہ تین سنگل جوتے بھی پائے گئے ہیں، یہ گیند ان کے ساتھ رکھی گئی تھی، غالب امکان ہے کہ یہ جوتے 1760 اور 1770میں استعمال ہوئے لہذا یہ گیند بھی اسی دور کی تصور کی جارہی ہے، کرکٹ مورخ نکولس شارپ کے مطابق ابھی تک ہمارے سامنے اس سے پرانی کوئی چیز نہیں آئی ہے۔

Google Analytics Alternative