کھیل

وقار یونس نے بھی بھارتی ٹیم کو کھری کھری سنا دیں

شعیب اختر کے بعد پاکستان کرکٹ ٹیم کے سابق کپتان وقار یونس نے بھی بھارتی ٹیم کو کھری کھری سنا دیں۔

ورلڈ کپ میں انگلینڈ کے ہاتھوں شکست کے بعد اپنے پیغام میں وقار یونس کا کہنا تھا کہ یہ آپ نہیں ہیں ، جو آپ زندگی میں کرتے ہیں، وہ آپ کو ظاہر کرتا ہے کہ آپ کیا ہیں ، پاکستان سیمی فائنل تک رسائی حاصل کرنے میں کامیاب رہتا ہے یا نہیں میں اس سے پریشان نہیں بلکہ اس سے ہوں کہ کچھ چیمپئنز کی سپورٹس مین شپ کا امتحان ہوا اور وہ اس میں بری طرح ناکام رہے۔

اس سے قبل سابق فاسٹ بولر شعیب اختر نے بھی انگلینڈ کے ہاتھوں بلیو شرٹس کی ہار پر شکوک وشبہات کا اظہار کیا تھا، پوائنٹس ٹیبل کے اعتبار سے 14 پوائنٹس کے ساتھ آسٹریلیا تو پہلے ہی کوالیفائی کر چکا ہے، بھارت اور نیوزی لینڈ 11، 11، پوائنٹس کے ساتھ بالترتیب دوسرے اور تیسرے نمبر پر ہیں جب کہ انگلینڈ 10 پوائنٹس کے ساتھ چوتھے اور پاکستان 9 پوائنٹس کے ہمراہ پانچویں نمبر پر ہے۔

ویرات کوہلی بھی پاکستانی شائقین کے رویے کے مداح نکلے

برمنگھم: بھارتی کرکٹ ٹیم کے کپتان ویرات کوہلی بھی پاکستانی شائقین کے رویئے کے مداح ہو گئے۔

ویرات کوہلی کا کہنا ہے کہ مجھے یقین ہے کہ آج پاکستانی کرکٹ شائقین ہمیں سپورٹ کریں گے جو کہ نہایت نایاب چیز ہے۔

یہ بات قابل ذکر ہے کہ انگلینڈ اور بھارت کی ٹیموں کے درمیان ورلڈ کپ کا یہ میچ پاکستانی ٹیم کے لئے بھی اس لئے اہمیت کا حامل ہے کیونکہ بھارتی ٹیم کی فتح کی صورت میں گرین شرٹس کے عالمی کپ کے سیمی فائنل تک رسائی کے امکانات مزید روشن ہو جائیں گ

میچ کی اہمیت کو دیکھتے ہوئے پاکستانی شائقین کی بھی دلی خواہش ہے کہ بھارتی ٹیم ہر حال میں یہ میچ جیتے۔ انگلینڈ اور بھارت کی ٹیموں کے درمیان ورلڈ کپ کے اہم میچ میں ٹاس کے بعد گفتگو کرتے ہوئے ویرات کوہلی کا کہنا تھا کہ مجھے نہیں معلوم کہ باہر کیا ہو رہاہے لیکن مجھے یقین ہے کہ پاکستان کے کرکٹ شائقین میچ کے دوران ہمیں بھر سپورٹ کریں۔

شاہین آفریدی نےعمدہ کارکردگی کا کریڈٹ اظہر محمود کو دیدیا

فاسٹ بولر شاہین آفریدی نے نیوزی لینڈ کے بعد افغانستان کے خلاف بھی عمدہ کارکردگی کا کریڈٹ بولنگ کوچ اظہر محمود کو دے دیا۔

قومی ٹیم کے نوجوان  پیسر کا کہنا ہے کہ نیٹ میں بولنگ کوچ اظہر محمود کے ساتھ بھر پور محنت کی جس کا صلہ مجھے اچھی کارکردگی کی صورت میں ملا، اللہ کا شکر ہے کہ مجھے ایسے وقت میں وکٹیں مل رہی ہیں جب ٹیم کو بھی ان کی ضرورت ہوتی ہے، یہ قومی ٹیم کے ساتھ میرے کیریئر کے لئے بھی بہت اچھا ہے۔

شاہین آفریدی نے کہا کہ میچز کے دوران تمام کھلاڑی ایک دوسرے کو بھر پور سپورٹ کرتے ہیں، میری بولنگ کے دوران بھی ساتھی کھلاڑیوں کی طرف سے بھر پور حوصلہ افزائی کا سلسلہ جاری رہتا ہے، افغانستان کے خلاف 4 کھلاڑیوں کو پویلین کا راستہ دکھانے والے پیسر نے کہا کہ اپنی لائن اینڈ لینتھ کو مزید بہتر بنانا چاہتا ہوں، کوشش ہوگی کہ اگلے میچ میں بھی اپنی عمدہ کارکردگی سے ٹیم کی فتح میں اہم کردار ادا کروں۔

سلوٹ کی نقالی پر شیلڈن کوٹریل اور محمد شامی میں لفظی جنگ

ورلڈکپ میچ میں وکٹ لینے پر سلوٹ جشن منانے کی نقالی کرنے پر ویسٹ انڈین پیسر شیلڈن کوٹریل نے بھارتی بولر محمد شامی کو آڑے ہاتھوں لے لیا۔

باہمی میچ میں یوزیندرا چاہل نے وکٹ لی تو محمد شامی نے نقالی کرتے ہوئے شیلڈن کوٹریل کے انداز میں جشن منایا، کپتان ویرات کوہلی بھی پیچھے نہ رہے، اس کے رد عمل میں ویسٹ انڈین بولر نے سماجی رابطوں کے ویب سائیٹ کا سہارا لیتے ہوئے کہا ہے کہ اچھی بولنگ اور تفریح تھی لیکن نقل کرنا بھی بڑی چاپلوسی ہوتی ہے۔

دوسری جانب سوشل میڈیا پر محمد شامی کی حرکت کو کئی صارفین فوج کی عزت خراب کرنے والا عمل قرار دے رہے ہیں، پیسر نے اس نقالی کو ایک مذاق قرار دیتے ہوئے تنقید کو ہوا میں اڑا دیا ہے۔

کامران اکمل نے جان بوجھ کر کیچ چھوڑنے کا الزام مسترد کردیا

کامران اکمل نے آسٹریلیا میں جان بوجھ کر کیچ چھوڑنے کا الزام عائد کرنے پر سابق ٹیسٹ کرکٹر عبدالرزاق کی کلاس لے لی۔

اپنے ویڈیو پیغام میں وکٹ کیپر بیٹسمین نے کہا کہ جتنا بھی کھیلا، عزت سے کھیلا، ہمیشہ پاکستان کیلیے اچھی کارکردگی دکھانے کی کوشش کی، ایسا گھٹیا بندہ نہیں کہ ٹیم کو نقصان پہنچاﺅں، ورلڈکپ میں پاکستانی کرکٹرز سے کیچ چھوٹ رہے ہیں تو کیا ان پر الزمات لگادیں، اس طرح کی چھوٹی باتوں پر غصہ تو نہیں آتا، افسوس ضرور ہوتا ہے،جن کیساتھ کھیلا ہوں، وہی منہ اٹھا کر الزام لگادیں، یہ اچھی بات نہیں۔

کامران اکمل نے کہا کہ پاکستان میں اس حوالے سے کوئی قانون ہوتا تو لوگ الزامات لگانے سے پہلے سوچتے، مجھے اچھی طرح معلوم ہے کہ عبدالرزاق کس ذہن کے ساتھ کھیلے اور میں کس ذہن کیساتھ کھیلا،ان کو ایک میچ کے 4 اوورز میں بہت زیادہ رنز پڑے تب ہماری طرف سے تو الزام نہیں لگایا گیا تھا،ان کا میرے بارے میں بیان ناپختہ سوچ کا ثبوت ہے۔

پاکستان کرکٹ ورلڈکپ 1992 کی تاریخ دہرانے لگا

  لاہور:  پاکستان ورلڈکپ 1992کی تاریخ دہرانے لگا، ماضی میں گرین شرٹس نے ابتدائی7میچز میں فتح و شکست کی اسی ترتیب کے بعد سیمی فائنل میں جگہ بنائی۔

عمران خان کی قیادت میں ورلڈکپ 1992جیتنے والی پاکستان ٹیم کی ابتدا میں کارکردگی مایوس کن رہی،ایک موقع پر سیمی فائنل تک رسائی بھی مشکل نظر آرہی تھی، انگلینڈ میں جاری حالیہ میگا ایونٹ میں بھی گرین شرٹس اسی طرح کی صورتحال کا سامنا کررہے ہیں۔

ورلڈکپ 1992میں پاکستان نے پہلے میچ میں ویسٹ انڈیز کے ہاتھوں 10سے شکست کھائی،زمبابوے کو 53رنز سے ہرایا،تیسرا میچ انگلینڈ کیخلاف تھا جو بارش کی نذر ہوا،چوتھے میں بھارت نے 43رنز سے شکست دی،پانچویں میں جنوبی افریقہ نے 20رنز سے زیر کرلیا۔

سیمی فائنل تک رسائی مشکل نظر آنے لگی تھی، گرین شرٹس خواب غفلت سے جاگے،چھٹے میچ میں آسٹریلیا کو 48رنز سے ہرانے کے بعد ساتویں میں سری لنکا کو 4رنز سے زیر کرلیا،اس کے بعد ناقابل شکست نیوزی لینڈ کو بھی مات دے دی، پوائنٹس ٹیبل کی پوزیشن ایسی تھی کہ ایونٹ سے باہر ہونے والی آسٹریلوی ٹیم کی ویسٹ انڈیز کیخلاف فتح ضروری ہوگئی۔

خوش قسمتی سے ایسا ہی ہوا،پاکستان نے سیمی فائنل میں نیوزی لینڈ اور فائنل میں انگلینڈ کو زیر کرتے ہوئے ٹائٹل پر قبضہ جمایا۔

رواں ورلڈکپ میں پاکستان کی کامیابیوں اور ناکامیوں کی ترتیب یہی رہی،گرین شرٹس کو ویسٹ انڈیز نے 7وکٹ سے شکست دی،دوسرے میچ میں انگلینڈ کو 14رنز سے زیر کیا،تیسرا مقابلہ سری لنکا کیخلاف تھا جو بارش کی نذر ہوا،چوتھے میں آسٹریلیا نے 41رنز سے مات دی،پانچویں میں بھارت نے 89رنز سے ہرادیا،چھٹے میں جنوبی افریقہ کو 49رنز سے زیر کرتے ہوئے سیمی فائنل تک رسائی کی امیدیں برقرار رکھیں، ساتویں میں نیوزی لینڈ کو6وکٹ سے مات دیدی۔

اس وقت پاکستان کے پیش قدمی جاری رکھنے کا انحصار دیگر ٹیموں کے نتائج پر تھا، اس وقت بھی یہی صورتحال ہے، گرین شرٹس نے افغانستان اور بنگلہ دیش کو زیر کربھی لیا تو انگلینڈ کی مزید ایک ناکامی کی دعا بھی کرنا ہوگی۔

ورلڈکپ میں کفایتی بولنگ، شاہین آفریدی دوسرے پاکستانی بولر بن گئے

لاہور: شاہین شاہ آفریدی ورلڈکپ میں کفایتی بولنگ کرنے والے پاکستانی بولرز کی فہرست میں دوسرے نمبر پر آگئے۔

شاہین شاہ آفریدی نے 10اوورز میں صرف 28رنز دے کر 3شکار کیے،اس سے قبل ورلڈکپ 1999میں وسیم اکرم نے 27رنز کے عوض 2وکٹیں حاصل کی تھیں۔

شاہین شاہ آفریدی ورلڈکپ میں کسی بھی انڈر20بولر کی جانب سے تیسرا بہترین اسپیل بھی کرنے میں کامیاب ہوئے۔

شائق کی شوہر سے بدتمیزی نے مسزسرفراز کو رلا دیا

اہور:  شائق کی شوہر سے بدتمیزی نے مسزسرفرازکورلا دیا۔

بھارت سے شکست کے بعد سرفراز احمد بیٹے عبداللہ کو گود میں اٹھائے شاپنگ مال میں موجود تھے کہ ایک جذباتی نوجوان نے ان کو موٹاپے کا طعنہ دیا،اس بدتمیزی پر سنجیدہ لوگوں نے سخت ردعمل کا اظہار بھی کیا۔

اس واقعے کے بارے میں آئی سی سی کو انٹرویو میں سرفراز احمد نے کہاکہ ہار اور جیت کھیل کا حصہ ہے، یہ پاکستان کی پہلی ٹیم نہیں تھی جو روایتی حریف سے ہاری، اس سے قبل بھی ٹیمیں شکستوں سے دوچار ہوتی رہی ہیں، لوگوں کو کنٹرول میں رکھنا ہمارے بس میں نہیں لیکن ان کو سمجھنا چاہیے کہ اس طرح کی چیزیں کتنی اذیت دیتی ہیں۔

انھوں نے کہا کہ لوگ سوشل میڈیا پر کچھ بھی کہہ دیتے ہیں۔ ایسے واقعات کھلاڑیوں کو نفسیاتی طور پر بہت متاثر کرتے ہیں، میں بیٹے کے ساتھ ہونے کی وجہ سے بھی اس واقعہ پر زیادہ تکلیف محسوس کرتا رہا ۔

سرفراز احمد نے بتایا کہ اہلیہ وائرل ہونے والی ویڈیو دیکھنے کے بعد روتی رہیں،عبداللہ کے ساتھ ہونے کی وجہ سے میں نے جواب دینے سے گریزکیا اور خاموشی اختیار کرنا ہی بہتر سمجھا، افسوس کی بات یہ ہے کہ ویڈیو بنانے والے کی فیملی بھی ساتھ تھی، میں نے ان سے بات بھی کی، یہ چیز میرے حق میں بھی گئی،پاکستان اور بھارت میں لوگوں نے میری حمایت میں بات کی، مشکل وقت میں ساتھ دینے والوں کا شکرگزار ہوں۔

واضح رہے کہ ویڈیو بنانے والے نوجوان کا کہنا تھاکہ میں نے سرفراز احمد سے معذرت کرنے کے بعد ویڈیو ڈیلیٹ بھی کردی تھی لیکن نہیں جانتا کہ وائرل کس طرح ہوگئی، اگر کسی کی دل آزاری ہوئی تو ایک بار پھر معذرت کرتا ہوں۔

Google Analytics Alternative