کھیل

’’اے ‘‘کیٹیگری؛ ہر کرکٹر کو ماہانہ 8لاکھ 75ہزار روپے ملیں گے

لاہور: سینٹرل کنٹریکٹ کی رقم میں اضافہ کرنے کے ساتھ ساتھ کھلاڑیوں کو ٹیسٹ، ون ڈے اور ٹی 20 میں دی جانے والی میچ فیس میں بھی اضافہ کردیا گیا ہے۔

نئے سینٹرل کنٹریکٹ میں ’’اے‘‘ کیٹگری کے حامل ہر کرکٹر کو ماہانہ 8لاکھ 75ہزار روپے ملیں گے،’’بی‘‘ کیٹیگری والوں کو تقریباً ساڑھے 5 لاکھ روپے حاصل ہونگے، ’’سی‘‘ کیٹیگری میں موجود ہر کرکٹر کو 3لاکھ 75ہزار روپے جبکہ ’’ڈی‘‘ کیٹیگری والوں کو تقریباً 2لاکھ روپے ملیں گے، پہلی بار متعارف کرائی جانے والی ’’ای‘‘ کیٹیگری میں شامل ہر کھلاڑی ماہانہ ایک لاکھ روپے وصول کرے گا۔

سینٹرل کنٹریکٹ کی رقم میں اضافہ کرنے کے ساتھ ساتھ کھلاڑیوں کو ٹیسٹ، ون ڈے اور ٹی 20 میں دی جانے والی میچ فیس میں بھی اضافہ کردیا گیا ہے، ’’اے‘‘ کیٹگری میں شامل کرکٹر کو ٹیسٹ میچ کا معاوضہ ساڑھے 11 لاکھ روپے ملے گا۔

 

پی سی بی نے کھلاڑیوں کے سینٹرل کنٹریکٹ کا اعلان کردیا، حفیظ کی بی کیٹیگری میں تنزلی

پاکستان کرکٹ بورڈ نے کھلاڑیوں کے لیے نئے سینٹرل کنٹریکٹ کا اعلان کر دیا ہے جس کے مطابق تجربہ کار آل راؤنڈر محمد حفیظ کی اے سے بی کیٹیگری میں تنزلی ہو گئی ہے۔

پی سی بی نے قومی ٹیم کے کپتان سرفراز احمد اور سینئر کھلاڑیوں کی مشاورت نے کھلاڑیوں کے لیے نیا سینٹرل کنٹریکٹ تیار کیا۔

پاکستان کرکٹ بورڈ کی جانب سے 33 کھلاڑیوں کو سینٹرل کنٹریکٹ دیا گیا ہے اور کھلاڑیوں کے لیے سینٹرل کنٹریکٹ کی فیس میں 25 سے 30 فیصد تک اضافہ کیا گیا ہے۔

پاکستان کرکٹ بورڈ کی جانب سے سینٹرل کنٹریکٹ میں شامل کھلاڑیوں کو  اے، بی، سی، ڈی اور ای کیٹیگری میں رکھا گیا ہے۔ اے اور بی کیٹیگری میں 6، 6 کھلاڑی شامل ہیں جب کہ سی کیٹیگری میں 9، ڈی میں 5 اور ای کیٹیگری میں 7 کھلاڑیوں کو رکھا گیا ہے۔

پی سی بی کی جانب سے کپتان اے کیٹیگری میں کپتان سرفراز احمد، شعیب ملک، اظہر علی، محمد عامر ، یاسر شاہ اور بابر اعظم شامل ہیں۔

بی کیٹیگری میں فہیم اشرف، اسد شفیق، حسن علی، فخر زمان، شاداب خان اور محمد حفیظ کو رکھا گیا ہے۔

سینٹرل کنٹریکٹ کی سی کیٹیگری میں عماد وسیم، محمد عباس، وہاب ریاض، جنید خان، حارث سہیل، امام الحق، محمد نواز، عثمان خان شنواری اور شان مسعود شامل ہیں۔

جن کھلاڑیوں کو ڈی کیٹیگری میں رکھا گیا ہے ان میں رومان رئیس، آصف علی، راحت علی، عثمان صلاح الدین اور حسین طلعت شامل ہیں۔

پی سی بی کی جانب سے بلال آصف، سعد علی، محمد رضوان، شاہیں شاہ آفریدی، صاحبزادہ فرحان، عمید آصف اور میرحمزہ کو ای کیٹیگری میں رکھا گیا ہے۔

ڈانٹ کے باوجود سرفراز کی قیادت میں کھیلنا پسند ہے، فخرزمان

اسپورٹس رپورٹر: قومی کرکٹ ٹیم کے اوپنر فخر زمان نے کہا ہے کہ وہ سرفراز احمد کی جانب سے ڈانٹ ڈپٹ کے باوجود ان کی قیادت میں کھیلنا پسند کرتے ہیں۔
عالمی شہرت یافتہ مایہ ناز بلے باز فخر زمان کا کہنا تھا کہ وہ دیگر کھلاڑیوں کی نسبت  سرفراز احمد کو زیادہ سمجھتے ہیں کیونکہ وہ ان کے ساتھ کراچی میں اکٹھے کھیلتے ہوئے کافی وقت ساتھ گزارتے ہیں، میدان کے باہر اچھے دوست ہونے کے باوجود ان کی جانب سے میدان میں سرزنش کا سامنا کرنا پڑتا ہے، میں اس کے جواب میں مسکرا دیتا ہوں جس پر انہیں مزید غصہ آتا ہے۔

فخر زمان کا کہنا تھا کہ پاکستان کی نمائندگی اور فخر پاکستان کہا جانا میرے لیے بہت بڑا اعزاز ہے، اچھی کارکردگی پر تعریف سے اطمینان ملتا ہے، ڈبل سنچری کے بعد سعید انور سے موازنے کے سوال پر انہوں نے کہا کہ سعید بھائی کےساتھ ملانا درست نہیں، وہ ایک عظیم پلیئر تھے، ان کے معیار تک پہنچنے کے لیے ابھی وقت درکار ہے، اپنی بہترین کوششیں جاری رکھوں گا۔ میرے ذہن میں کچھ خاص اہداف نہیں ہیں، میچ میں اپنی توجہ مرکوز رکھتا ہوں، امید ہے کہ ٹیسٹ ٹیم کا مستقل حصہ بننے میں بھی کامیاب ہو جاﺅں گا۔

 

کھلاڑی لیگ کے بجائے ملک کیلئے کھیلنے کو ترجیح دیں، سرفراز

قومی کرکٹ ٹیم کے کپتان سرفراز احمد نے کھلاڑیوں کو لیگ کرکٹ کے بجائے ملک سے کھیلنے کو پہلی ترجیح بنانے کا مشورہ دیا ہے۔

کراچی میں معین خان کرکٹ اکیڈمی میں کوئٹہ گلیڈی ایٹرز کی جانب سے منعقدہ ایک تقریب میں کپتان سرفرازاحمد، معین خان سمیت دیگرکھلاڑی شریک ہوئے۔

میڈیا سے بات کرتے ہوئے سرفراز احمد کہا کہ الیکشن میں کامیابی پر عمران خان کو مبارکباد دینے بنی گالہ گئے تھے اور امید ظاہر کی کہ عمران خان کے اقتدار میں کرکٹ مزید ترقی کرے گی۔

سرفراز نے کھلاڑیوں کو لیگ سے روکنے کے پاکستان کرکٹ بورڈ(پی سی بی) کے اقدام کو درست قرار دیتے ہوئے کہا کہ زیادہ لیگ کھیلنے سے کھلاڑیوں کی فٹنس متاثر ہوتی ہے اور کھلاڑیوں کو ملک کو ترجیح دینے کا مشورہ بھی دیا۔

ایشیاکپ کی تیاریوں کےحوالے سے کپتان نےکہا کہ ایونٹ میں سخت مقابلہ ہوگا اور ایشیا کپ میں کامیابی کی بھرپور کوشش کریں گے۔

سنیل گواسکر، عمران خان کی تقریب حلف برداری میں شرکت پرتذنذب کا شکار

سابق بھارتی کرکٹر سنیل گواسکر تحریک انصاف کے چیئرمین عمران خان کی بطور وزیر اعظم تقریب حلف برداری میں شرکت پر تذبذب کا شکار ہیں۔

تحریک انصاف نے عام انتخابات میں اکثریت حاصل کی ہے جس کے بعد پارٹی چیئرمین عمران خان متوقع وزیر اعظم ہوں گے۔

تحریک انصاف کے ترجمان فواد چوہدری کے مطابق عمران خان کی بطور وزیر اعظم تقریب حلف برداری میں شرکت کے لیے سنیل گواسکر، کپل دیو، نوجوت سنگھ سدھو اور بالی وڈ اداکار عامر خان کو دعوت دی گئی ہے۔

تقریب حلف بردار ی میں شرکت کے لیے تاحال صرف سابق بھارتی کرکٹر نوجوت سنگھ سدھو نے حامی بھری ہے جب کہ بالی وڈ اداکار عامر خان تقریب میں شرکت سے معذرت کرچکے ہیں ہے اور اب سابق بھارتی کرکٹر سنیل گواسکر بھی تذبذب کا شکار ہیں۔

بھارتی ٹی وی کو انٹرویو میں سنیل گواسکر کا کہنا تھا کہ عمران خان کی پارٹی کی جانب سے گزشتہ روز دعوت نامہ موصول ہوا لیکن ان کی تقریب حلف برداری کی تاریخ ابھی طے نہیں ہوئی ہے۔

تقریب میں شرکت کے حوالے سے ان کا کہنا ہے کہ تقریب میں شرکت مشکل لگ رہی ہے جس کی وجہ بھارت اور انگلینڈ کے مابین ٹیسٹ میچ اور پھر انگلینڈ روانگی ہے۔

ایک سوال کے جواب میں سنیل گواسکر کا کہنا تھا کہ باقاعدہ دعوت نامہ موصول ہونے کے بعد حکومت سے بھی اجازت طلب کروں گا اور حکومت نے اجازت دی تو شرکت کروں گا۔

عمران خان کے اقتدار میں آنے سے کرکٹ کو تقویت ملے گی، سرفراز احمد

کراچی:پاکستان کرکٹ ٹیم کے کپتان سرفراز احمد نے کہا ہے کہ عمران خان کے اقتدار میں آنے سے کرکٹ کو تقویت ملے گی۔

سندھ انسٹی ٹیوٹ آف یورولوجی اینڈ ٹرانسپلانٹیشن (ایس آئی یو ٹی) کے زیر اہتمام ’’انسانی زندگی بچاؤ‘‘ واک کا اہتمام کیا گیا جس کا مقصد انسانی اعضا عطیہ کرنا ہے۔ واک میں ڈاکٹر ادیب رضوی اور قومی ٹیم کے کپتان سرفراز احمد نے بطور مہمان خصوصی شرکت کی جس میں ہزاروں کی تعداد میں ورکرز اور عوام بھی شریک ہوئے۔

اس موقع پر میڈیا سے گفتگو کرتے ہوئے قومی کرکٹ ٹیم کے کپتان سرفراز احمد کا کہنا تھا کہ سب لوگ آئیں اعضا عطیہ کریں، اس کار خیر میں اپنا حصہ ڈالیں اور زندگیاں بچائیں، میری بھتیجی بھی جگر کے عارضے میں مبتلا ہے اور پاکستان میں علاج نہ ہونے کی وجہ سے وہ بھارت گئی ہوئی ہے۔

حالیہ عام انتخابات میں پاکستان تحریک انصاف کی کامیابی پر سرفراز احمد کا کہنا تھا کہ عمران خان کا وزیر اعظم بننا خوش آئند ہے کیوں کہ عمران خان کے اقتدار میں آنے سے کرکٹ کو تقویت ملے گی۔

انہوں نے مزید کہا کہ پی سی بی کا غیر ملکی لیگز کے حوالے سے اقدام درست ہے کیوں کہ لیگز زیادہ کھیلنے والے کھلاڑیوں کی فٹنس متاثر ہوتی ہے تاہم کنٹریکٹ والے کھلاڑیوں کو سیزن میں شرکت کرنا چاہیے جب کہ ایشین گیمز میں کامیاب ہونے کی بھر پور کوشش کریں گے۔

ویرات کوہلی کی ون ڈے کے بعد ٹیسٹ میں بھی پہلی پوزیشن

دبئی: بھارتی کرکٹ ٹیم کے کپتان ویرات کوہلی ایک روزہ کرکٹ کے بعد ٹیسٹ میں بھی پہلے نمبر پر آگئے۔

انٹرنیشل کرکٹ کونسل نے بھارت اور انگلینڈ کے پہلے ٹیسٹ کے بعد رینکنگ جاری کردی جس کے مطابق بھارتی کپتان ویرات کوہلی رینکنگ میں پہلے نمبر پر آگئے ہیں۔

ویرات کوہلی نے پہلی پوزیشن آسٹریلوی کپتان اسٹیو اسمتھ سے چھینی ہے جو کہ دوسرے اور انگلینڈ کے بلے باز جو روٹ کا تیسرا نمبر ہے۔

اسٹیواسمتھ 32 مہینے بیٹمسینوں کی رینکنگ میں پہلے نمبر پر رہے ہیں لیکن انگلینڈ کے خلاف پہلے ٹیسٹ میں ویرات کوہلی نے 149 اور 51 رنز کی اننگز  کھیل کر ان سے یہ پوزیشن چھین لی۔

آئی سی سی کی ٹیسٹ رینکنگ میں ٹاپ 10 میں پاکستان کا کوئی بیٹسمین شامل نہیں ہے۔

یاد رہے کہ بھارتی کپتان ویرات کوہلی ایک روز میچز میں بھی پہلی پوزیشن پر براجمان ہیں۔

نجم سیٹھی نے دوبارہ ٹی وی پر آنے کا عندیہ دے دیا

لاہور: کرکٹ کیلیے صحافت چھوڑنے والے نجم سیٹھی نے دوبارہ ٹی وی پر آنے کا عندیہ دے دیا۔

عام انتخابات میں پی ٹی آئی کی کامیابی کے بعد پی سی بی میں بھی تبدیلی کی لہر چلنے کا امکان روشن ہے،اس صورتحال میں ہر کرکٹ شائق چیئرمین نجم سیٹھی کے مستقبل کے بارے میں سوچ رہا ہے،سماجی رابطوں کی ویب سائیٹ پر ایک صارف نے ان سے کہا کہ ’’ہم چاہتے ہیں کہ آپ اور آپ کی چڑیا ٹی وی پر آئیں اور اہم انکشافات کریں،آپ نے چیئرمین پی سی بی کے طور پر بہت اچھا کام کیا ہے‘‘۔ جواب میں نجم سیٹھی نے کہا کہ انشاء اللہ میں اور میری چڑیا بہت جلد ٹی وی پر نظر آئیں گے۔

ایک اور صارف نے کہا کہ ’’اگر نیب نے آپ کو کلیئرنس دیدی تو سب سے پہلے میں حمایت کروں گا کہ آپ چیئرمین پی سی بی کے طور پر خدمات جاری رکھیں‘‘۔ جواب میں نجم سیٹھی نے 11مئی2018کو جاری کیا جانے والا لیٹر پیش کردیا جس میں بتایا گیا ہے کہ 17اپریل کو جاری کیے جانے والے احکامات کے تحت چیئرمین پی سی بی اور پی ایس ایل نجم سیٹھی کیخلاف کیس کی چھان بین کی گئی ہے،اس میں کوئی ایسی چیز نہیں پائی گئی کہ جس پر کارروائی کا آغاز کیا جائے، چیئرمین نیب نے اس میں ناٹ فٹ فار ایکشن کا لفظ استعمال کیا،نجم سیٹھی نے یہی الفاظ اپنے پیغام میں درج کردیے۔

Google Analytics Alternative