کھیل

قومی کرکٹ ٹیم کی اسکاٹ لینڈ کے خلاف ٹی ٹوئنٹی میچز سے قبل پریکٹس

 لاہور: پاکستان کرکٹ ٹیم نے اسکاٹ لینڈ کے خلاف ٹی ٹوئنٹی میچز سے قبل پریکٹس کا آغاز کر دیا۔

پاکستان کرکٹ ٹیم نے اسکاٹ لینڈ کے خلاف ٹی ٹوئنٹی میچز سے قبل پریکٹس کا آغاز کر دیا، مارچسٹن کیسل اسکول ایڈنبرا میں کھلاڑیوں نے بھرپور پریکٹس سیشن میں حصہ لیا جس میں فٹنس پر خصوصی توجہ دی گئی۔

واضح رہے کہ پاکستان اور اسکاٹ لینڈ کے مابین 2 میچوں پر مشتمل ٹی ٹوئنٹی سیریز کا پہلا میچ 12 جون جب کہ دوسرا میچ 13 جون کو ایڈنبرا میں کھیلا جائے گا، احمد شہزاد، حسین طلعت، آصف علی، محمد نواز، شاہین آفریدی اور شعیب ملک بھی قومی اسکواڈ کو جوائن کر چکے ہیں۔

مائیک ہیسن نیوزی لینڈ کی کوچنگ سے مستعفی

ویلنگٹن: کرکٹ ورلڈ کپ کے آغاز میں اب ایک سال سے بھی کم کا عرصہ رہ گیا ہے اور ایسے موقع پر نیوزی لینڈ کی ٹیم کے مایہ ناز کرکٹ ہیڈ کوچ مائیک ہیسن اپنے عہدے سے مستعفی ہو گئے ہیں۔

مائیک ہیسن نے جمعرات کو اپنے عہدے سے مستعفی ہونے کا اعلان کرتے ہوئے کہا کہ وہ انٹرنیشنل کرکٹ کے مطالبات اور سخت شیڈول سے اپنی نجی زندگی متاثر ہوئی ہے لہٰذا وہ اب اپنی بیوی اور دو بیٹیوں کے ساتھ وقت گزارنا چاہتے ہیں۔

مائیک ہیسن نے 20 جولائی 2012 میں کیویز ٹیم کی کوچنگ شروع کی اور تقریباً 6سال بعد 7 جون 2018 کو اپنے عہدے کو خیر باد کہہ دیا۔ چھ سال تک ہیسن کی کوچنگ کے دوران نیوزی لینڈ کی ٹیم تاریخ میں پہلی مرتبہ ورلڈ کپ کے فائنل تک پہنچنے میں کامیاب ہوئی۔

ان کی کوچنگ نیوزی لینڈ نے کرکٹ میں نئی بلندیوں کو چھوا خصوصاً سابق کپتان برینڈ میک کولم کے ساتھ ان کی جوڑی بہت کامیاب رہی اور دونوں نے مل کر ٹیم کو جارحانہ طرز کرکٹ کی ڈگر پر گامزن کر کے کامیابیوں سے ہمکنار کرایا۔

مائیک ہیسن کی کوچنگ کے دوران کیویز ٹیم نے 21 ٹیسٹ جیتے اور 21 میں ہی اس کو ناکامی کا سامنا کرنا پڑا جبکہ 65 ایک روزہ بین الاقوامی میچز میں نیوزی لینڈ کی ٹیم فاتح رہی اور 46 میچوں میں اس کو شکست کا منہ دیکھنا پڑا۔

اس کے علاوہ نیوزی لینڈ کی ٹیم نے مائیک ہیسن کی کوچنگ میں 56 ٹونٹی میچوں میں سے 30 میں کامیابی حاصل کی جبکہ 26 میں ناکام رہی۔

ویمنز ایشیا کپ میں پاکستان کی 147رنز سے فتح

کوالالمپور: ندا ڈار اور کپتان بسمہ معروف کی عمدہ کارکردگی کی بدولت پاکستان نے ویمنز ٹی20 ایشیا کپ ٹورنامنٹ میں ملائیشیا کو یکطرفہ مقابلے کے بعد 147 رنز سے ہرا کر تیسری کامیابی حاصل کر لی۔

جمعرات کو کھیلے گئے میچ میں پاکستان ویمنز ٹیم نے پہلے کھیلتے ہوئے مقررہ اوورز میں 5 وکٹوں کے نقصان پر 177 رنز بنائے۔

کپتان بسمہ معروف نے عمدہ بلے بازی کا مظاہرہ کرتے ہوئے 62 رنز کی دلکش اننگز کھیلی، ندا ڈار 41، جویریہ خان 31، جویریہ راؤف 13 اور ناہیدہ خان ایک رن بنا کر آؤٹ ہوئیں جبکہ ثنا میر 14 اور نین عابدی 9 رنز بنا کر ناٹ آؤٹ رہیں۔

جواب میں ملائیشین ٹیم مطلوبہ ہدف کے تعاقب میں 18.4 اوورز میں صرف 30 رنز پر ڈھیر ہو گئی اور صرف ایک کھلاڑی دوہرا ہندسہ عبور کر سکی۔

پاکستان کی جانب سے ندا ڈار نے 5 رنز دے کر 4 کھلاڑیوں کو پویلین کی راہ دکھائی، ثنا، نشرہ اور جویریہ خان نے ایک، ایک کھلاڑی کو آؤٹ کیا۔ ندا ڈار ٹیم کی جیت میں اہم کردار ادا کرنے پر میچ کی بہترین کھلاڑی قرار پائیں۔

دوسری جانب بھارت ویمنز ٹیم نے سری لنکا کو 7 وکٹوں سے شکست دے کر تیسری کامیابی سمیٹی جبکہ بنگلہ دیشی ویمنز ٹیم نے تھائی لینڈ کو 9 وکٹوں سے زیر کیا۔

امارات میں ٹی20لیگز کا انعقاد، پاکستان کا سیریز ملائیشیا منتقلی کا عندیہ

پاکستان اور ایمریٹس کرکٹ بورڈ کے درمیان معاملات سنگین صورتحال اختیار کرتے جارہے ہیں اور پاکستان نے اکتوبر سے مارچ تک امارات میں کسی بھی قسم کی لیگ کرکٹ کے انعقاد پر اپنی کرکٹ ملائیشیا منتقل کرنے کا عندیہ دے دیا ہے۔

متحدہ عرب امارات میں مقامی کرکٹ بورڈ کے زیراہتمام رواں سال کی آخری سہ ماہی میں متعدد ٹی20 لیگز کے انعقاد کا انکشاف ہوا تھا جس پر پاکستان کرکٹ بورڈ(پی سی بی) نے گہری تشویش کا اظہار کیا تھا کیونکہ پاکستان کی اس عرصے میں نیوزی لینڈ اور آسٹریلیا سے سیریز شیڈول ہے۔

ایمریٹس کرکٹ بورڈ کی جانب سے اپنی ٹی ٹوئنٹی لیگ کرانے کے اعلان کے بعد پاکستان کرکٹ بورڈ کے چیئرمین نجم سیٹھی نے ایمریٹس کرکٹ بورڈ کے سربراہ کو فون کر کے باضابطہ طور پر اپنے خدشات سے آگاہ کردیا یے۔

پی سی بی نے امارات کرکٹ بورڈ کے سربراہ سے مطالبہ کیا وہ اکتوبر سے مارچ تک لیگ منعقد نہ کرائیں بصورت دیگر پاکستان پلان بی کے طور پر آسٹریلیا اور نیوزی لینڈ سے ہوم سیریز اور پی ایس ایل کا انعقاد ملائیشیا میں کر سکتا ہے۔

پی سی بی کے مصدقہ ذرائع کے مطابق نجم سیٹھی نے ایمریٹس کرکٹ بورڈ کو واضح کردیا کہ اگر پاکستان کی ہوم سیریز اور پی ایس ایل سے کچھ دن قبل تک بھی متحدہ عرب امارات میں دوسری لیگز منعقد ہوئیں تو پی سی بی اپنی تمام کرکٹ ملائیشیا منتقل کردے گا۔

ذرائع کے مطابق دونوں کرکٹ بورڈ معاملے کے حل کے لیے سنجیدہ ہیں لیکن کچھ نکات پر اتفاق نہیں ہوسکا۔

امارات کرکٹ بورڈ رواں سال 3ٹی20 لیگز ایمریٹس لیگ، افغان لیگ اور ٹی ٹوئنٹی لیگ کا انعقاد چاہتا ہے۔

پی سی بی نے اپنے مطالبات پیش کرتے ہوئے واضح کردیا کہ پی ایس ایل سے پینتیس دن قبل اگر متحدہ عرب امارات میں کوئی کرکٹ منعقد ہوئی تو پاکستان کی تمام ہوم سیریز ملائیشیا منتقل کردیں گے جس کے لیے آسڑیلیا اور نیوزی لینڈ بھی تیار ہیں۔

پاکستان کرکٹ بورڈ کے حکام معاملے کے حل کے لیے پرامید ہیں لیکن پی ایس ایل اور پاکستان کی ہوم سیریز متاثر ہوئی تو وینیو تبدیل بھی کیا جاسکتا ہے۔

معاملے پر پاکستان کرکٹ بورڈ 12جون کو پی ایس ایل فرنچائز مالکان کو بھی اعتماد میں لے گا جس کے بعد پی سی ایل کے حوالے سے حتمی فیصلہ ہو گا۔

فلسطینیوں کا شدید احتجاج: ارجنٹینا نے اسرائیل سے میچ منسوخ کردیا

فلسطین کے شدید احتجاج کے بعد ارجنٹینا کی نیشنل فٹبال ٹیم نے ورلڈ کپ سے قبل اسرائیل سے کھیلا جانے والے دوستانہ میچ منسوخ کردیا۔

ورلڈ کپ کی تیاریوں کے سلسلے میں اسرائیل اور ارجنٹینا کے درمیان 9 جون کو مقبوضہ بیت المقدس کے ٹیڈی اسٹیڈیم میں دوستانہ میچ ہونا تھا، جو ورلڈ کپ سے قبل ارجنٹینا کا آخری وارم اپ میچ تھا۔

فلسطین کی جانب سے شدید احتجاج سامنے آنے کے بعد ارجنٹینا کی فٹبال ایسوسی ایشن نے 9 جون کو ہونے والا میچ منسوخ کردیا۔

ارجنٹینا کی اسپورٹس ویب سائٹ ‘مینیٹونو’ کے مطابق قومی فٹبال ٹیم کے کپتان لیونل میسی کی ہدایت پر مقبوضہ بیت المقدس میں اسرائیل کے ساتھ ہونے والا میچ منسوخ کیا گیا ہے۔

دوسری جانب ارجنٹینا میں فلسطینی سفیر حسنی عبدالوحید نے دوستانہ میچ کی شدید مخالفت کی تھی، جن کا کہنا تھا کہ ارجنٹینا اور اسرائیل کے درمیان اگر میچ ہوا تو اسے اسرائیل کے 70 سالہ قیام پر جشن کے مترادف سمجھا جائے گا۔

یاد رہے کہ اسرائیل نے 1948 میں فلسطین کی سرزمین پر قبضہ کرلیا تھا جس کے 70 سال مکمل ہوگئے۔

ارجنٹینا میں تعینات فلسطینی سفیر کا کہنا تھا کہ مقبوضہ بیت المقدس میں میچ کا انعقاد ہمارے لیے ناقابل قبول ہے کیوں کہ یہ مقبوضہ علاقہ ہے اور وہاں ایسی ٹیم کو کھیلتا دیکھنا قابل تکلیف ہوگا جس کے حامیوں کی فلسطین اور عرب دنیا میں بڑی تعداد ہے۔

اس سے قبل 70 فلسطینی بچوں کےایک گروپ نے لیونل میسی کو ایک خط لکھا تھا جس میں بچوں نے میسی سے اسرائیل کے خلاف دوستانہ میچ میں شرکت نہ کرنے کی درخواست کی تھی۔

فلسطینی فٹبال ایسوسی ایشن کے صدر جبریل رجب کا بھی کہنا تھا کہ لیونل میسی امن اور پیار کی علامت ہیں، اس لیے ہم نہیں چاہیں گے کہ وہ مقبوضہ علاقے میں کھیلے جانے والے میچ کا حصہ بنیں۔

انہوں نے عرب اور تمام مسلم ممالک میں میسی کے مداحوں سے اپیل کی تھی کہ اگر اسرائیل اور ارجنٹینا کے درمیان میچ ہوا تو میسی اور ارجنٹینا کی شرٹس اور تصاویر کو نذرآتش کردیا جائے۔

کرکٹ آسٹریلیا کے سربراہ جیمز سدر لینڈ کا مستعفی ہونے کا اعلان

کرکٹ آسٹریلیا کے سربراہ جیمز سدر لینڈ نے بال ٹیمپرنگ اسکینڈل کے پیش نظر مستعفی ہونے کا اعلان کردیا ہے۔

کرکٹ آسٹریلیا کے ساتھ 20 سال سے جڑے سدرلینڈ اپنے اس سفر کے 17 سال تک چیف ایگزیکٹو کے عہدے پر تعینات رہے ہیں۔

انہوں نے 12 ماہ کا نوٹس جاری کرتے ہوئے اپنے متبادل کے ملنے تک اپنی خدمات سرانجام دینے کا کہا ہے۔

ان کا کہنا تھا کہ کرکٹ آسٹریلیا میں تقریباً 20 سال گزارنے کے بعد اب یہ صحیح وقت ہے، میں بہت مطمئن ہوں کہ یہ وقت میرے لیے اور کھیل کے لیے بہتر ہے۔

خیال رہے کہ سدر لینڈ کا استعفیٰ آسٹریلین کرکٹ میں گزشتہ چند ماہ کے دوران آنے والی تبدیلیوں میں انتہائی اہم ہے۔

ان پر یہ دباؤ اس وقت سامنے آیا جب مارچ کے مہینے میں سابق کپتان اسٹیو اسمتھ، ان کے ڈپٹی ڈیوڈ وارنر اور بلے باز کمرون بین کرافٹ نے جنوبی افریقہ کے خلاف تیسرے ٹیسٹ میں بال ٹیمپرنگ کی تھی۔

ان تمام کھلاڑیوں کو اسکینڈل کے سامنے آنے کے بعد ریاستی و بین الاقوامی کرکٹ پر پابندی عائد کردی گئی تھی جبکہ ٹیم کے کوچ ڈیرن لیہ مین نے استعفیٰ دے دیا تھا۔

سدر لینڈ نے استعفیٰ دینے کے خلاف اٹھنے والی آوازوں کو دباتے ہوئے کہا تھا کہ اس بحران میں ان کا کوئی کردار نہیں تھا۔

ان کا کہنا تھا کہ یہ اس وقت انتہائی بڑا مسئلہ تھا تاہم اگر آپ کسی انڈسٹری اور ماحول میں کام کرتے ہیں جیسے ہم کام کرتے ہیں تو یہ چیزیں وقت کے ساتھ ساتھ سامنے آتی رہتی ہیں۔

فوری عہدہ نہ چھوڑنے کے سوال کے جواب میں سدر لینڈ کا کہنا تھا کہ وہ اختیارات کا تبادلہ بغیر کسی چیز میں رکاوٹ بنے کرنا چاہتے ہیں۔

واضح رہے کہ سدرلینڈ، ساببق اکاؤنٹنٹ اور میڈیم فاسٹ باؤلر نے کئی فرسٹ کلاس میچز میں شرکت کی تھی نے 1998 میں آسٹریلین کرکٹ بورڈ میں جنرل مینیجر کے عہدہ سنبھالا تھا۔

جنرل مینیجر کا عہدہ سنبھالنے کے 3 سال بعد مالکوم اسپیڈ کے مستعفیٰ ہونے پر وہ چیف اگزیکٹو کے عہدے پر تعینات ہوئے جس کے بعد سے وہ اس ہی عہدے پر فائز رہے۔

ویمنز ٹی ٹوئنٹی ایشیا کپ؛ پاکستان نے سری لنکا کو23 رنز سے ہرا دیا

لاہور: ویمنز ٹی ٹوئنٹی ایشیا کپ میں پاکستان نے سری لنکا کو 23 رنز سے ہرا دیا۔ ندا ڈار نے 5 شکار کیے، کپتان بسمعہ معروف نے ناقابل شکست 60 رنز کی اننگز کھیلی۔

کوالالمپور میں جاری ایونٹ میں سری لنکا نے ٹاس جیت کر پہلے بولنگ کرنے کا فیصلہ کیا، پاکستان ٹیم نے پہلے بیٹنگ کرتے ہوئے 4 وکٹوں کے نقصان پر 136 رنز کی اننگز کھیلی، کپتان بسمعہ معروف نے 41 گیندوں پر 7 چوکوں کی مدد سے 60 رنز کی ناقابل شکست اننگز کھیلی، ناہیدہ خان نے 38 اور جویریہ خان نے 13 رنز بنائے، سری لنکا کی جانب سے سوگندیکا کماری نے 2 جبکہ انوکا راناویرا اور نیلاکشی ڈی سلوا نے ایک ایک وکٹ حاصل کی۔

جواب میں سری لنکن ٹیم مقررہ اوورز میں 9 وکٹ پر 113 رنز بنا پائی، یاسودا مینڈس 25، نیپونی ہنسیکا 24، کپتان شاشیکالا سری وردنے 13رنز بنا پائیں، 6 بلے باز دوہرا ہندسہ عبور نہ کر سکیں، پاکستان کی جانب سے ندا ڈار نے شاندار بولنگ کرتے ہوئے 21 رنز کے عوض 5 شکار کیے، نشرہ سندھو اور بسمعہ معروف نے ایک ایک وکٹ اڑائی۔ ندا ڈار پلیئر آف دی میچ قرار پائیں۔

ہاکی چیمپئنزٹرافی ؛ پلیئرزکیلیے مزید غیرملکی کوچزکی کمک تیار

لاہور: رواں ماہ شیڈول چیمپئنز ٹرافی کی تیاریوں کیلیے مزید غیرملکی کوچز کی کمک تیار ہے، ہالینڈ سے ہی تعلق رکھنے والے سابق پنالٹی کارنر اسپیشلسٹ برین لومینز جمعرات کوگرین شرٹس کا کیمپ باقاعدہ طور پرجوائن کر لیں گے، کیمپ کے دوران ہی قومی ٹیم کو ہالینڈ ہی کے گول کیپر کوچ کی خدمات بھی حاصل ہوں گی۔

تفصیلات کے مطابق کامن ویلتھ گیمز کے بعد پاکستان ہاکی ٹیم کو ایف آئی ایچ چیمپئنز ٹرافی کا چیلنج درپیش ہے، میگا ایونٹ 23 جون سے یکم جولائی تک ہالینڈ کے شہر بریڈا میں کھیلا جائے گا جس میں پاکستان سمیت ارجنٹائن، آسٹریلیا، بیلجیئم، بھارت اور ہالینڈ کی ٹیمیں شریک ہوں گی۔چیمپئنز ٹرافی کی تیاریوں کے ابتدائی مرحلے میں پاکستان ہاکی ٹیم کا کیمپ ایبٹ آباد میں لگایا گیا جس میں پلیئرز کی فٹنس کو بہتر بنانے پر کام کیا گیا، دوسرے مرحلے میں عبدالستار ایدھی ہاکی اسٹیڈیم کراچی میں کھلاڑیوں کی گیم میں مہارت پیدا کرنے کی خصوصی مشقیں کرائی گئیں۔ تیسرے مرحلے میں قومی ٹیم کا کیمپ ہالینڈ کے شہر بریڈا میں جاری ہے جس میں غیر ملکی کوچ رولینٹ اولٹمنز ملکی کوچز کے ساتھ مل کر پلیئرز کو خصوصی مشقیں کرانے میں مصروف ہیں۔

ذرائع کے مطابق گذشتہ روز بھی ابتدا میں پلیئرز کو جم ٹریننگ اورپھر مخصوص مشقیں کرائی گئیں۔ ذرائع کے مطابق ہالینڈ سے ہی تعلق رکھنے والے سابق پنالٹی کارنر اسپیشلسٹ برین لومینز جمعرات کو گرین شرٹس کا کیمپ باقاعدہ طور پر جوائن کر لیں گے۔ پاکستان ہاکی فیڈریشن کا تھنک ٹینک سمجھتا ہے کہ کسی بھی بڑے ایونٹ میں کامیابی کے حصول کے لیے دوسرے شعبوں کے ساتھ پنالٹی کارنر کا شعبہ خاصی اہمیت کا حامل ہوتاہے، اس لیے یورپ جانے والی جس 22 رکنی ٹیم کا انتخاب کیا گیا ہے اس میں پنالٹی کارنر اسپیشلسٹ توثیق، علیم بلال، ابوبکر اور عرفان بھی شامل ہیں، کیمپ کے دوران لومیز ان پنالٹی کارنر اسپشلسٹ کو پنالٹی کارنر لگانے کے حوالے سے ٹریننگ کے ساتھ خصوصی ٹپس بھی دیں گے۔

مزید معلوم ہوا ہے کہ اسی کیمپ کے دوران ہالینڈ ہی سے تعلق رکھنے والے گول کیپر ٹرینر، ملائیشیا کے فزیو تھراپسٹ اور آسٹریلوی فزیکل ٹرینر کی بھی خدمات حاصل کی جائیں گی۔ اس کیمپ کے دوران ہی پاکستانی ٹیم 2 یورپی ٹیموں آسٹریا اور ہالینڈ کے خلاف 4 پریکٹس میچوں میں حصہ لے گی۔ آسٹریا کیخلاف 3 اور ہالینڈ کے خلاف ایک میچ رکھا گیا ہے۔ ہالینڈ کے خلاف واحد میچ 9 جون کو ہونے کا قوی امکان ہے جبکہ آسٹریا کے خلاف پہلا میچ 11جون کو رکھا گیا ہے، 13 جون کو دونوں ٹیمیں ایک بار پھر ایکشن میں دکھائی دیں گی جبکہ تیسرا میچ 14 جون کو رکھا گیا ہے۔

Google Analytics Alternative