بین الاقوامی

فرانس میں فائرنگ کرکے 3 افراد کوقتل کرنے والے حملہ آورکی ہلاکت کی تصدیق

پیرس: فرانس کی کرسمس مارکیٹ میں فائرنگ کرکے 3 افراد کو قتل اور12 افراد کو زخمی کرنے والے شخص کی ہلاکت کی تصدیق ہوگئی۔

بین الاقوامی خبررساں ادارے کے مطابق فرانس کے وزیر داخلہ کرسٹوف کاسٹنرنے کرسمس مارکیٹ میں پولیس کی جوابی فائرنگ سے زخمی ہونے والے  29 سالہ حملہ آورشیرف شیکٹ کی ہلاکت کی تصدیق کردی ہے۔

حملہ آورمنگل کے روز اسٹراس برگ کی کرسمس مارکیٹ میں شہریوں پرفائرنگ کرکے زخمی حالت میں فرارہوگیا تھا۔ پولیس نے ملزم کے والدین اوردو بھائیوں سمیت 5 افراد کو حراست میں لے لیا تھا۔

پولیس حکام کا کہنا ہے کہ حملے کے وقت ملزم چاقو اورپستول سے لیس تھا جب کہ اس کے اپارٹمنٹ سے ایک گرنیڈ،  2 رائفل، 4 چھریاں اور شکار کے لیے استعمال ہونے والے 2 تیز دھار چاقو بھی برآمد ہوئے۔

شیرف شیکٹ اسٹراس برگ میں مراکش سے ہجرت کرکے آنے والے ایک گھرانے میں پیدا ہوا، وہ سیکیورٹی اداروں کی ملک کو ممکنہ طور نقصان پہنچانے والے افراد کی ’واچ لسٹ‘ میں شامل تھا۔ ملزم کے خلاف فرانس اورجرمنی میں چوری، ڈکیتی وغیرہ کے 27 مقدمات درج ہیں۔

عام سے گینگ سے منسلک عادی ملزم 2013 سے 2015 میں اسیری کے دوران شدت پسند مذہبی خیالات کا حامل شخص بن گیا تھا اورجیل میں پہلی مرتبہ شدت پسند اسلامی جماعتوں سے متعارف ہوا۔

دوسری جانب شدت پسند جماعت داعش کی ویب سائٹ عمق نے بھی دعویٰ کیا ہے کہ فرانس میں کرسمس مارکیٹ پر حملہ کرنے والا شیرف شیکٹ داعش کا جنگجو تھا۔

فلسطین میں ایک اور نوجوان شہید، دو روز میں تعداد 4 ہوگئی

غزہ: فلسطین میں اسرائیلی فوج کی فائرنگ سے ایک اور نوجوان کی شہادت کے بعد دو دن میں شہادتوں کی تعداد 4 ہوگئی۔

بین الاقوامی خبر رساں ادارے کے مطابق رملہ میں جاری سرچ آپریشن کے دوران اسرائیلی فوج نے جارحیت کا مظاہرہ کرتے ہوئے ایک اور فلسطینی نوجوان کو شہید کردیا اس طرح 2 دنوں میں شہید ہونے والوں کی تعداد 4 ہوگئی۔

گزشتہ روز اسی علاقے میں چھ گھنٹے کے طویل سرچ آپریشن کے دوران اسرائیلی فوج نے تین فلسطینی نوجوانوں کو فائرنگ کرکے شہید کردیا تھا۔ محاصرے کے دوران داخلی اور خارجی راستوں کو بند کردیا گیا تھا۔

اسرائیلی فوج نے دعویٰ کیا ہے کہ ان چاروں فلسطینی نوجوانوں نے کار میں سوار ہو کر ایک بس اسٹاپ کے قریب شہریوں پر گولیاں برسائی تھیں جس کے نتیجے میں 2 اسرائیلی ہلاک اور متعدد زخمی ہوگئے تھے۔

حماس نے غیر قانونی آباد کاری والے علاقے میں نامعلوم افراد کی فائرنگ کی حوصلہ افزائی کرتے ہوئے کہا تھا کہ فلسطین کے نوجوان کسی بھی طاقت کو اپنے گھروں پر قابض ہونے نہیں دیں گے اور اپنے بنیادی حقوق کا دفاع کریں گے۔

اسرائیلی فوج کی جارحیت سے غزہ کی پٹی اور مغربی کنارے پر حالات نہایت کشیدہ ہو گئے ہیں۔ اسرائیلی فوج نے چیک پوسٹس پر نفری میں اضافہ کردیا ہے اور بلا وجہ شہریوں کو تنگ کیا جا رہا ہے۔

امریکی عدالت میں روسی خاتون کا جاسوس ہونے کا اعتراف

 واشنگٹن: امریکی عدالت میں روسی خاتون ماریا بوٹینا نے عدالت میں پوتن حکومت کے لیے جاسوسی کرنے کا الزام قبول کرلیا۔

بین الاقوامی خبر رساں ادارے کے مطابق امریکی یونیورسٹی کی روسی طالبہ ماریا بوٹینا نے وفاقی پراسیکیوٹر سے مبینہ ڈیل کے نتیجے میں روسی ایجنٹ ہونے کا اقرار کرلیا ہے، ماریا نے ڈسٹرکٹ جج تانیا چوٹکان کی عدالت میں جاسوسی اور امریکا کے خلاف سازش تیار کرنے کے جرم کو قبول کیا۔

ماریا بوٹینا نے ڈسٹرکٹ جج کو پراسیکیوٹرز کے ساتھ مکمل تعاون کی یقین دہانی بھی کرائی۔ روسی جاسوس کے خلاف کافی عرصے سے تفتیش جاری تھی تاہم پہلی مرتبہ خاتون جاسوس نے پراسیکیوٹر کے ہمراہ عدالت میں امریکی سیاست میں روسی مداخلت کا اعتراف کیا۔

روسی خاتون پر الزام تھا کہ انہوں نے 2016 کے صدارتی انتخاب میں مداخلت کی اور امریکی پالیسی سازوں کو روس کے حق میں کرنے کے لیے لابنگ کی۔ علاوہ ازیں روسی جاسوس نے نیشنل رائفل ایسوسی ایشن کے سرکردہ افراد تک بھی رسائی حاصل کر کے خصوصی تعلقات استوار کیے۔

تنظیم رائفل ایسوسی ایشن امریکی سیاسی جماعت ریپبلکن پارٹی اور موجودہ صدر سے قریبی روابط رکھتی ہے، اس تنظیم کا جھکاؤ بھی روس کی جانب ہے اور 2016 میں صدر ٹرمپ کی کامیابی کے پیچھے بھی مبینہ طور پر اس تنظیم کا ہاتھ تھا۔

اعتراف جرم کے بعد 30 سالہ روسی طالبہ ماریا بوٹینا اب سزا سنائے جانے کی منتظر ہیں، ماریا کو جاسوسی کے الزام میں 5 سال قید کی سزا ہوسکتی تھی تاہم عدالت میں اعتراف جرم اور پراسیکیوٹر سے تعاون کے باعث یہ سزا 6 ماہ قید تک مختصر کی جاسکتی ہے۔

مالی کے سرحدی علاقے میں مسلح افراد کا حملہ، 47 افراد ہلاک

بماکو: مالی کے سرحدی علاقے میں مسلح افراد کے حملے میں 47 افراد ہلاک اور متعدد زخمی ہو گئے۔

غیر ملکی خبر رساں ادارے کے مطابق موٹر سائیکل سوار مسلح افراد نے مالی کے شمالی سرحدی علاقے میں مقامی کمیونٹی کے افراد کو نشانہ بنایا۔

مانیکا کے میئر نے غیر ملکی خبر ایجنسی کو بتایا کہ مسلح افراد نے ٹاریگ قبیلے کے افراد کو نشانہ بنایا۔

حملے میں 47 افراد ہلاک اور متعدد زخمی ہوئے، زخمیوں کو طبی امداد کے لیے اسپتال منتقل کر دیا گیا ہے۔

خبر ایجنسی کے مطابق اس علاقے میں ٹاریگ اور فولانی قبائل کے درمیان زمین اور پانی کے تنازع پر اکثر فسادات ہوتے رہتے ہیں۔

رواں ماہ کے آغاز میں مالی کے علاقے موپٹی میں مسلح افراد نے حملہ کر کے فولانی قبیلے سے تعلق رکھنے والے 15 افراد کو قتل کر دیا تھا۔

مقبوضہ مغربی کنارے میں اسرائیلی فوج کی کارروائی، 3 فلسطینی شہید

مقبوضہ بیت القدس: اسرائیلی فوج نے مقبوضہ مغربی کنارے کے مختلف علاقوں میں محاصرے اور گھر گھر تلاشی کے دوران فائرنگ کر کے 3 فلسطینیوں کو شہید کردیا۔

بین الاقوامی میڈیا رپورٹس کے مطابق اسرائیلی فوج نے مقبوضہ بیت المقدس اور مغربی کنارے کے مختلف علاقوں میں چھ گھنٹے طویل محاصرے کی ایک کارروائی کے دوران تین فلسطینیوں کو فائرنگ کرکے شہید کردیا۔

آپریشن میں 3 فلسطینیوں کی شہادت کے بعد جمعرات کے روز مقبوضہ مغربی کنارے  میں غیر قانونی آباد کاری والے علاقے میں نامعلوم افراد کی فائرنگ سے 2 اسرائیلی ہلاک اور متعدد زخمی ہوگئے۔

صیہونی فوج نے واقعے کا الزام فلسطینیوں پر عائد کرتے ہوئے کہا ہے کہ کار میں سوار فلسطینی حملہ آوروں نے بس اسٹاپ کے قریب گولیاں چلائیں جس سے 2 شہری ہلاک ہوئے ۔

مقبوضہ کشمیرمیں بھارتی جارحیت سے مزید 2 کشمیری شہید

سری نگر: مقبوضہ کشمیر میں قابض بھارتی فوج کی فائرنگ سے مزید 2 کشمیری شہید ہوگئے۔

کشمیرمیڈیا سروس کے مطابق مقبوضہ کشمیرکے علاقے سوپورمیں بھارتی فوج نے ایک بار پھربربریت کا مظاہرہ کرتے ہوئے 2 کشمیریوں کو شہید کردیا۔ بھارتی فوج کی جانب سے محاصرے کے دوران کشمیری نوجوانوں کوشہید کیا گیا۔

محاصرے کے بعد کٹھ پتلی انتظامیہ کی جانب سے وادی کے مختلف علاقوں میں انٹرنیٹ سروس معطل کردی گئی ہے جب کہ حریت رہنماؤں کی کال پرشہادتوں کے خلاف وادی بھرمیں مکمل ہڑتال جاری ہے۔

ترکی ٹرین حادثے میں 9 افراد ہلاک، 86 زخمی

انقرہ: ترکی کے دارالحکومت میں ٹرین حادثے میں کم از کم 9 افراد ہلاک اور 86 زخمی ہو گئے۔

ترک میڈیا کے مطابق تیز رفتار مسافر ٹرین اسٹیشن پر پہلے سے کھڑے انجن سے ٹکرا گئی جس کے نتیجے میں بڑے پیمانے پر جانی و مالی نقصان ہوا۔

ترکی کے وزیر ٹرانسپورٹ نے جائے وقوع کا جائزہ لینے کے بعد میڈیا نمائندوں کو تفصیلات سے آگاہ کرتے ہوئے حادثے میں 9 مسافروں کی ہلاکت اور 86 کے زخمی ہونے کی تصدیق کی۔

ترک حکام کی جانب سے جاری کی گئی تفصیلات کے مطابق حادثے کے وقت مسافر ٹرین میں 206 مسافر سوار تھے۔

ہلاک ہونے والوں میں ٹرین کے تین ڈرائیور اور ایک جرمن باشندے سمیت چھ مسافر شامل ہیں۔

ترک میڈیا کے مطابق حادثے کی تحقیقات کے سلسلے میں ریلوے کے تین ملازمین کو حراست میں لے لیا گیا ہے۔

خیال رہے کہ رواں برس جون میں بھی ترکی میں پیش حادثہ رونما ہوا تھا جس میں 24 افراد ہلاک اور درجنوں زخمی ہوئے تھے۔

اقوام متحدہ میں بین المذاہب ہم آہنگی کے فروغ کی پاکستانی قرارداد منظور

نیو یارک: بین المذاہب ہم آہنگی  کو فروغ کی حمایت میں پاکستانی قرارداد اقوام متحدہ میں اتفاقِ رائے سے منظورکرلی گئی۔

اقوام متحدہ میں پاکستان کی مستقل مندوب ملیحہ لودھی نے جنرل اسمبلی میں بین المذاہب ہم آہنگی اورتعاون کو فروغ کی حمایت میں پاکستانی قرارداد پیش کی جو اتفاقِ رائے سے منظور کرلی گئی۔

پاکستانی قرارداد میں مذاہب اور تہذیبوں کے درمیان مثبت جامع اور پرامن بات چیت کو فروغ دینے کے ساتھ ساتھ ممالک پر زور دیا گیا کہ وہ اس مقصد کے حصول کے لیے مزید اقدامات کریں۔ قرارداد میں نفرت انگیز اور انتشار پسند رویوں کی شدید مذمت کرتے ہوئے انہیں عالمی امن اور بین الاقوامی تعاون کے لیے خطرہ قرار دیا گیا۔
Google Analytics Alternative