بین الاقوامی

میکسیکو میں 20 افراد کو قتل کرکے اعضاء نکالنے والا سفاک جوڑا گرفتار

میکسیکو سٹی: میکسیکو میں 20 افراد کے قتل میں ملوث سیریل کلر میاں بیوی کو حراست میں لے کر انسانی اعضاء برآمد کر لیے گئے۔

بین الاقوامی خبر رساں ادارے کے مطابق میکسیکو میں گرفتار سیریل کلر میاں بیوی انسانی اعضاء کی اسمگلنگ میں ملوث نکلے۔ گرفتار شدگان نے انسانی اعضاء کی چوری کے لیے 20 افراد کے قتل کا اعتراف کیا ہے۔

پولیس نے سیریل کلر میاں بیوی کے اعتراف کے بعد اُن کے فلیٹ کے خفیہ خانوں سے انسانی اعضاء برآمد کرلیے۔ میاں بیوی نے زیادہ تر خواتین کے قتل کیے جس کے لیے شوہر خواتین کو محبت کے جال میں پھنساتا تھا۔

سیریل کلر بیوی خواتین کے جسم سے قیمتی اعضاء جیسے آنکھیں، گردہ، دل اور پھیپھڑے نکالنے اور انہیں حفاظت سے رکھنے میں اپنے شوہر کی مدد کرتی تھی اور اعضاء کی فروخت کے لیے بھی لوگوں سے رابطے کرتی تھی۔

جرائم پیشہ میاں بیوی نے اپنے ایک شکار کے دو ماہ کے بچے کو بھی فروخت کرنے کا اعتراف کیا۔ پولیس نے بچہ خریدنے والے جوڑے کو بھی حراست میں لے لیا ہے تاہم پولیس اب تک انسانی اعضاء خریدنے والے گروہ کا پتا چلانے میں ناکام رہی ہے۔

دوسری جانب پراسیکیوٹر نے میڈیا کو بتایا ہے کہ سیریل کلر میاں بیوی نفسیاتی مریض ہیں۔ بیوی پیدائشی طور پر ذہنی مریض ہے جب کہ شوہر نفسیاتی الجھنوں کا شکار ہے جس نے شہرت کے حصول کے لیے خواتین کا قتل کیا اور جسم کے اعضاء نکالے تاکہ اس کا نام اور تصویر میڈیا پر آئے۔

بھارت میں اسٹیل مل میں دھماکے سے 9 افراد ہلاک، 15 زخمی

رائے پور: بھارت میں لوہا بنانے والی فیکٹری میں دھماکے میں 9 افراد ہلاک اور 15 سے زائد زخمی ہوگئے ہیں۔

بھارتی میڈیا کے مطابق  شہر بیہلائی  میں لوہا بنانے والی فیکٹری میں زوردار دھماکا ہوا ہے۔ دھماکے سے ہرطرف افراتفری مچ گئی اور خوفناک آگ بھڑک اُٹھی جب کہ پوری فیکٹری میں دھواں بھر گیا۔ دھماکے کی زد میں آکر 9 افراد ہلاک اور 15 سے زائد زخمی ہوگئے ہیں۔

ریسکیو اداروں نے فیکٹری میں پھنسے لوگوں کو باہر نکالا اور زخمیوں کو قریبی اسپتال منتقل کردیا گیا۔ اسپتال انتظامیہ کا کہنا ہے کہ زخمی بری طرح جھلس گئے ہیں جس کے باعث تمام زخمیوں کی حالت نازک ہے اور ہلاکتوں میں اضافہ ہوسکتا ہے۔

پولیس کا کہنا ہے کہ جائے وقوعہ سے ابتدائی شواہد جمع کر لیے ہیں، پہلی ترجیح زخمیوں کو طبی امداد کی فراہمی ہے۔ ابتدائی تفتیش سے لگتا ہے کہ دھماکا گیس پائپ لائن پھٹنے کی وجہ سے ہوا ہے۔ ذمہ داروں کے خلاف سخت سے سخت کارروائی کی جائے گی۔

فیکٹری انتظامیہ کا کہنا تھا کہ دھماکے کی جگہ پر 24 ملازمین موجود تھے اور تقریباً سب ہی متاثرین میں شامل ہیں۔ فیکٹری انتظامیہ بھی اپنے طور پر بھی واقعے کی تحقیقات کرے گی۔

جوہری تنازع، شمالی کوریا نے امریکا سے دوبارہ مذاکرات کیلئے ہامی بھرلی

سیئول: شمالی کوریا کے رہنما کم جونگ ان نے امریکا کے صدر ڈونلڈ ٹرمپ کے ساتھ دوسرے مذاکراتی دور کے لیے ہامی بھرلی۔

واضح رہے کہ مذکورہ فیصلہ ایسے وقت پر سامنے آیا ہے جب امریکی سفیر نے پیانگ یانگ میں شمالی کوریا کے رہنما سے جوہری تنصیب کے خاتمے سے متعلق ’معنیٰ خیز‘ ملاقات کی۔

فرانسیسی خبررساں ادارے اے ایف پی کے مطابق امریکی سیکریٹری اسٹیٹ مائیک پومپیو نے اتوار کی صبح کم جونگ ان سے دو گھنٹے کی ملاقات کی تھی۔

مائیک پومپیو نے کہا کہ ’کم جونگ ان نے امریکا-شمالی کوریا سمٹ پر جلدازجلد آمادگی کا اظہار کیا ہے‘۔

شمالی کوریا کے صدارتی افس سے جاری اعلامیہ میں سمٹ سے متعلق وقت اور مقام کے بارے میں کچھ نہیں کہا گیا۔

مائیک پومپیو کی شمالی کوریا کے رہنما سے ملاقات کے متعلق امریکی اعلامیہ میں کہا گیا کہ مائیک پومپیو اور کم جونگ ان نے شمالی کوریا کو جوہری تنصیبات سے پاک کرنے اور اس مسئلے پر امریکی حکومت کے کردار پر بات چیت کی‘۔

واضح رہے کہ مذکورہ دورہ مائیک پومپیو کا چوتھا دورہ تھا۔

امریکی صدر ڈونلڈ ٹرمپ نے شمالی کوریا کے رہنما سے جون میں سنگاپور میں ملاقات کی تھی تاہم ناقدین کا کہنا تھا کہ مذکورہ ملاقات رسمی تھی۔

دوسری جانب مائیک پومپیو نے ٹوئٹ کیا کہ ’مجھے اور میری ٹیم کی میزبانی کے لیے شکریہ ‘۔

کم جونگ ان نے مائیک پومیپو سے ملاقات کو ’اچھی ملاقات‘ قراردیا اور کہا کہ ’دونوں ملکوں کے درمیان اچھے دن کے ساتھ اچھے مستقبل کے وعدے ہوئے‘۔

انڈونیشیا میں زلزلے اور سونامی سے 5 ہزار افراد تاحال لاپتا

جکارتا: انڈونیشیا کے شدید زلزلے اور ہولناک سونامی کو ایک ہفتہ گزرنے کے باوجود تاحال 5 ہزار سے زائد شہری لاپتا ہیں جب کہ تباہ کن سونامی میں 1763 افراد لقمہ اجل بن چکے ہیں۔

بین الاقوامی خبر رساں ادارے کے مطابق 28 ستمبر کو انڈونیشیا کے  جزیرہ سولاویسی میں 7.5 شدت کے زلزلے کے جھٹکوں اور آفٹر شاکس کے بعد سونامی کی 10 فٹ بلند لہروں نے پالو شہر میں بڑے پیمانے پر تباہی مچادی تھی اور 17 سو سے زائد افراد ہلاک ہوگئے تھے جب کہ ایک ہفتہ گزر جانے کے باوجود تاحال 5 ہزار سے زائد افراد لاپتا ہیں۔

Indonesia

سونامی سے سیکڑوں گھر تباہ، درجنوں ہوٹل اور عمارتیں منہدم ہوگئی تھیں اور درجنوں افراد ملبے تلے دب گئے تھے۔ اسی طرح لینڈ سلائیڈنگ، بجلی کے تار گرنے سمیت دیگر واقعات میں ہلاک ہونے والوں کی تعداد 1763 ہوگئی تھی جب کہ زخمیوں کی تعداد ڈھائی ہزار سے تجاوز کر گئی تھی۔

Indonesia 4

اسپتال زخمیوں سے بھر گئے تھے اور ریلیف کیمپوں میں ہزاروں لوگوں نے پناہ لی۔ ریسکیو اداروں کے حکام کا کہنا ہے کہ 5 ہزار سے زائد افراد لاپتا ہیں اور کیمپوں میں موجود متاثرین کو اجناس، ادویات اور پینے کے پانی کی کمی کا سامنا ہے۔

Indonesia 6

امریکی جیولوجیکل سروے کے مطابق ریکٹر اسکیل پر زلزلے کی شدت 7.5 ریکارڈ کی گئی جس کی گہرائی زیر زمین 10 کلومیٹر تھی۔ شہر پالو میں سونامی کی 10 فٹ بلند لہریں پیدا ہوئیں جب کہ آفٹر شاکس نے بھی بڑے پیمانے پر تباہی مچائی تھی۔

واضح رہے کہ انڈونیشیا میں گزشتہ ماہ کی 28 تاریخ کو آنے والے زلزلے اور سونامی کی زد میں آکر 1763 افراد لقمہ اجل بن گئے تھے۔

فلسطین کے مغربی کنارے میں فائرنگ سے 2 اسرائیلی ہلاک

فلسطین کے مقبوضہ مغربی کنارے میں فائرنگ سے 2 اسرائیلی ہلاک جب کہ ایک خاتون زخمی ہوگئی۔

بین الاقوامی میڈیا رپورٹس کے مطابق واقعہ مقبوضہ مغربی کنارے کے انڈسٹریل زون میں  غیر قانونی آباد کاری  والے علاقے ایریل میں پیش آیا جہاں ایک مسلح شخص نے فائرنگ کردی جس کے نتیجے میں ایک 30 سالہ خاتون اور مرد ہلاک ہوگیا جب کہ گولی لگنے سے ایک 54 سالہ خاتون زخمی بھی ہوئی۔

پولیس نے مبینہ ملزم کی شناخت بتاتے ہوئے کہا کہ 23 سالہ فلسطینی نوجوان نے  فائرنگ کی، مبینہ ملزم اسی فیکٹری میں کام کرتا تھا جہاں قتل کی واردات ہوئی۔ اسرائیلی وزیر دفاع ایودگور لئیبرمین کا کہنا ہے کہ ملزم کی تلاش کے لیے ٹیمیں تشکیل دے دی گئی ہیں جائے وقوع اور اطراف کے علاقوں کو اسرائیلی فوج نے گھیرے میں لے رکھا ہے۔

فلسطینی نیوز ایجنسی کے مطابق اسرائیلی فوج نے اطراف کے علاقوں کے سرچ آپریشن کی آڑ میں کئی گھنٹوں سے محاصرہ کر رکھا ہے  اور راستوں کی بندش کی وجہ سے آمد روفت معطل ہے۔

امریکا 17 سال بعد بھی افغانستان میں مقاصد حاصل کرنے میں ناکام رہا: رپورٹ

واشنگٹن: بین الاقوامی ادارے پیو ریسرچ سینٹر کا اپنی رپورٹ میں کہنا ہے کہ امریکا 17 سال بعد بھی افغانستان میں مقاصد حاصل کرنے میں ناکام رہا ہے۔ 

پیو ریسرچ سینٹر نے افغانستان میں امریکی کی جنگ سے متعلق سروے رپورٹ جاری کی ہے جس میں امریکی شہریوں سے اس جنگ کے حوالے سے رائے لی گئی ہے۔

سروے رپورٹ کے مطابق افغانستان پر امریکی حملے کے درست یا غلط ہونے پر امریکی قوم منقسم ہے اور 49 فیصد امریکی سمجھتے ہیں کہ واشنگٹن افغانستان میں مقاصد حاصل نہیں کر پایا۔

رپورٹ کے مطابق 16 فیصد امریکی اس ابہام کا شکار ہیں کہ افغانستان میں امریکا کامیاب ہوا یا ناکام۔

رپورٹ میں کہا گیا ہے کہ 2009 سے 2011 تک امریکیوں کا خیال تھا کہ امریکا اپنے مقاصد میں کامیاب ہوگا لیکن اس میں کمی دیکھنے میں آرہی ہے اور 2014 اور 2015 میں مثبت سے زیادہ منفی ردعمل سامنے آئے۔

کانگو میں آئل ٹینکر اور مسافر بس میں تصادم سے 50 افراد ہلاک

کنشاسا: افریقی ملک کانگو میں آئل ٹینکر اور مسافر بس میں تصادم کے نتیجے میں 50 افراد ہلاک اور 100 سے زائد زخمی ہوگئے ہیں۔

بین الاقوامی خبر رساں ادارے کے مطابق کانگو کی مرکزی شاہراہ پر آئل ٹینکر سامنےسے آنے والی مسافر بس سے ٹکرا گیا۔ ہولناک تصادم کے بعد ٹینکر سے بہنے والے پٹرول سے آگ بھڑک اُٹھی جس نے قریبی گھروں کو بھی اپنی لپیٹ میں لے لیا۔تصادم کے نیتجے میں 50 افراد ہلاک ہوئے جب کہ 100 سے زائد زخمی ہیں۔ زیادہ تر ہلاکتیں بری طرح جھلس جانے کے باعث ہوئیں۔ زخمیوں میں سے 15 کی حالت نازک بتائی جا رہی ہے جس کی وجہ سے ہلاکتوں میں اضافے کا خدشہ ہے۔

فائر بریگیڈ کے عملے نے گاڑیوں اور مکانوں میں لگی آگ پر ایک گھنٹے میں قابو پالیا تاہم کولنگ کے عمل میں مزید دو گھنٹے صرف ہوئے۔ پولیس نے جائے وقوعہ سے ابتدائی شواہد جمع کر کے تفتیش کا آغاز کردیا ہے۔

امریکا کا پاکستان کو ماضی بھلا کر آگے بڑھنے کا پیغام

واشنگٹن: امریکی مشیر قومی سلامتی جان بولٹن نے کہا ہے کہ وائٹ ہاؤس پاکستان میں نئی حکومت کے قیام کو ماضی بھلا کر آگے بڑھنے کے لیے ایک سنہری موقع سمجھتا ہے۔

امریکی مشیر قومی سلامتی جان بولٹن نے 2 اکتوبر کو پاکستانی وزیر خارجہ شاہ محمود قریشی کے دورہ وائٹ ہاؤس کے دوران امریکی وزیر خارجہ مائیک پومپیو سے ہونے والی ملاقات کے حوالے سے میڈیا بریفنگ دیتے ہوئے بتایا کہ ہم منصبوں کے درمیان ملاقات تعمیری اور خوشگوار رہی۔

مشیر قومی سلامتی جان بولٹن نے کہا کہ شاہ محمود قریشی نے مجھ سے بھی علیحدگی میں ملاقات کی جس میں پاکستان کی فوجی امداد میں کٹوتی کے حوالے سے بھی بات ہوئی اور دہشت گردی کے خلاف جنگ میں پاکستان کا کردار بھی زیر بحث آیا۔

ایک سوال کے جواب میں مشیر قومی سلامتی نے دعویٰ کیا کہ ڈاکٹر شکیل کی رہائی کے حوالے سے مائیک پومپیو اور شاہ محمود قریشی کے درمیان تبادلہ خیال ہوا ہے اور ہم اس معاملے پر نظر رکھے ہوئے ہیں۔

دوسری جانب پاکستان کے وزیر خارجہ شاہ محمود قریشی نے امریکی میڈیا کو انٹرویو میں ڈاکٹر شکیل آفریدی کی رہائی کی پیش کش کے تاثر کو مفروضہ قرار دیتے ہوئے رد کردیا تھا۔

وزیر خارجہ شاہ محمود قریشی نے کہا تھا کہ پاکستان ڈاکٹر شکیل آفریدی کے معاملے پر اپنے قانون کے مطابق عمل کر رہا ہے اور توقع کرتے ہیں کہ امریکا بھی ہمارے قانونی نظام کا احترام کرے گا۔

وزیر خارجہ شاہ محمود قریشی کا مزید کہنا تھا کہ ہمارے لوگ ڈاکٹرعافیہ کو خاص نظر سے دیکھتے ہیں اگر ڈاکٹر شکیل کی رہائی سے متعلق امریکی عوام کی کچھ توقعات ہیں تو پاکستانی بھی ڈاکٹرعافیہ صدیقی کی رہائی کی خواہش رکھتے ہیں۔

Google Analytics Alternative