بین الاقوامی

ترکی بمبار طیارے کو مار گرانے پر معافی مانگے”روسی سفیر”

استنبول:  ترکی میں روس کے سفیر کا کہنا ہے ترکی روسی Sukhoi Su-24 بمبار طیارے کو مار گرانے پر معافی مانگے، اس کے ذمہ داروں کو سزا دے اور نقصان کا معاوضہ ادا کرے۔ ترکی کی طرف سے محض افسوس کا اظہار کافی نہیں ہے۔یہ مطالبہ ترکی میں روس کے سفیر اندرے کارلوو نے روسی خبر رساں ایجنسی سے بات کرتے ہوئے کیا۔ انہوں نے کہا کہ ولادی میر پوتین نے کہہ دیا تھا کہ ترکی کو روس کے ساتھ تعلقات کی بحالی کے لئے کیا کرنا ہوگا۔ اگر یہ مطالبے پورے نہ کئے گئے تو روس ترکی تعلقات کی بحالی کا کوئی امکان نہیں ہے۔روس ترکی تعلقات 24 نومبر 2015 کو ترکی کی طرف سے شام کی فضا میں روسی بمبار طیارے کو مار گرائے جانے کے بعد بگڑ گئے۔

بھارتی پائلٹس کا ’ادویات‘ کا استعمال

نئی دہلی: ہندوستانی ایئر فورس کے پائلٹس میں لمبے عرصے تک چاک و چوبند رہنے اور جنگی مشقوں میں بہترین کارکردگی کا مظاہرہ کرنے کے لیے ’ادویات‘ کا استعمال کیے جانے کا انکشاف ہوا ہے۔

’موڈافنل‘ اور ’زولپیڈم‘ نامی ادویات، ہندوستانی فضائیہ کے پائلٹس میں عرفیت کے طور پر بالترتیب ’گو‘ اور ’نو گو‘ کہلاتی ہیں. پہلی دوا جوش بڑھانے اور لمبے عرصے تک چاک و چوبند رہنے جب کہ دوسری پھر سکون حاصل کرنے اور اچھی نیند کے لیے استعمال کی جاتی ہے۔

یہ ادویات ہندوستانی فضائیہ کے پائلٹس خاص طور پر فوجی مشق ’ایکسرسائز لائیووائر‘ کے لیے استعمال کرتے ہیں، جو ہندوستانی فضائیہ کی 54 ایئربیسز پر ہر سال 31 اکتوبر سے 8 نومبر تک منعقد کی جاتی ہیں۔

ہندوستانی فضائیہ کے سینئر افسر کا کہنا تھا کہ یہ مشقیں زیادہ دنوں تک جاری رہتی ہیں، اس لیے اس میں زیادہ جوش اور چاک و چوبند رہنے کی ضرورت ہوتی ہے۔

اگر انتہائی دباؤ والے وقت میں نیند کی کمی اور تھکاوٹ کا مسئلہ آڑے آجائے تو وقت گزارنا بہت مشکل ہوجاتا ہے، جبکہ اس سے فیصلہ کرنے کی قوت بھی متاثر ہوتی ہے۔

’گو‘ کے استعمال سے جسم میں ’ایڈرانالن‘ نامی مادہ خارج ہوتا ہے جو پائلٹس کے جوش و ولولے کو بڑھاتا ہے، جبکہ ’نو گو‘ اس کے اثرات کو زائل کرنے اور جسم کو اگلے مشن سے قبل سکون پہنچانے کے لیے استعمال کی جاتی ہے۔

رپورٹ کے مطابق اگرچہ پائلٹس کی جانب سے ان ڈرگز کا استعمال تشویشناک بات ہے، لیکن ہندوستانی فضائیہ میں اس ادویات کے استعمال کو ضروری مانا جاتا ہے۔

ہندوستانی فضائیہ کے ایک سینئر افسر کا اس حوالے سے کہنا تھا کہ پائلٹس گو/ نو گو ادویات کا استعمال ہر موقع پر باقاعدہ معالج کے مشورے سے کرتے ہیں، اور اس دوران تمام حفاظتی اقدامات کو بھی مدنظر رکھا جاتا ہے۔

انہوں نے کہا کہ دونوں ادویات کے مضر اثرات نہ ہونے کے برابر ہیں اور اس حوالے سے تشویش کی کوئی بات نہیں۔

بھارتی بحریہ کی سمندری حدود کی خلاف ورزی

ٹھٹھہ: بھارتی بحریہ نے سمندری حدود کی خلاف ورزی کرتے ہوئے کجھور کریک کے قریب پاکستانی علاقے میں داخل ہوکر 11 ماہی گیروں سمیت پاکستانی کشتی زبردستی اپنے قبضے میں لے لی۔یوسف کتیار گاوں کے رہائشیوں نے نجی ٹی وی کو بتایا کہ دلبر کتیار نامی شخص کی الشہباز بوٹ کجھور کریک میں موجود تھی کہ اسی دوران ہندوستانی بحریہ کی بھاری نفری نے اسے اپنے قبضے میں لے لیا۔رہائشیوں نے بتایا کہ بھارتی بحریہ کے اہلکار کشتی کے علاوہ پاکستانی ماہی گیروں کو بھی اپنے ہمراہ لے گئے ‘جن میں تین بچے بھی شامل ہیں ‘ ماہی گیروں کی شناخت 10 سالہ جمیل ‘ 12 سالہ عبد الرزاق ‘13 سالہ محمد صدیق، علی محمد، علی اصغر، عبد العزیز، عبد الغفور، ابوبکر، محمد، سکندر اور محمد مرغر کے ناموں سے ہوئی۔

امریکا اور جنوبی کوریاکی تاریخی مشترکہ فوجی مشقیں

ماسکو: امریکا اور جنوبی کوریا اس برس تاریخ کی سب سے بڑی مشترکہ فوجی مشقیں کریں گے۔ کوریا کی کمیٹی آف جوائنٹ چیفس کے ترجمان میجر جنرل کم یون ہیون نے بتایا ہے کہ یہ مشقیں شمالی کوریا کی جانب سے جوہری تجربہ کرنے اور دورمار میزائل داغے جانے کا جواب ہونگی۔جوابی اقدام میں ایسے اعمال شامل ہونگے جن سے شمالی کوریا کو مزید اشتعال انگیزی کرنے سے روکا جا سکے اور ان کا ایک حصہ اس سال امریکہ جنوبی کوریا کی عسکری مشقوں کی تاریخ کی سب سے بڑی اور ہائی ٹیک مشقوں کے انتظام کا پیش خیمہ ہوگا” انہوں نے کہا۔واشنگٹن اور سیول 1990 سے بڑی بڑی جنگی مشقیں کرتے چلے آ رہے ہیں۔ شمالی کوریا کا دعوٰی ہے کہ یہ مشقیں ان کی سرزمین پر حملہ کرنے کی تیاری کے ہیں اور وہ ان مشقوں کو روکنے کا مطالبہ کرتا ہے۔

شہاب ثاقب گرنے سے بس ڈرائیور ہلاک

تامل ناڈو:  بھارتی ریاست تامل ناڈومیں اپنی نوعیت کے انوکھے واقعے میں شہاب ثاقب گرنے سے بس ڈرائیور ہلاک اور تین زخمی ہو گئے۔بھارتی میڈیا نے دعویٰ کیا ہے کہ تامل ناڈو میں کالج بس کا ڈرائیور خلا سے گرنے والے پتھر کی وجہ سے ہلاک ہوا ہے ، پتھر گرنے سے ہونے والے دھماکے سے قریب کھڑی بس کے شیشے بھی ٹوٹ گئے۔عینی شاہدین کے مطابق انہوں نے آسمان سے گرتی ایک چمکدار چیز دیکھی جس کے بعد دھماکا ہو گیا۔

روس نے شام میں جنگ بندی پر اتفاق کرلیا”جان کیری”

لندن : امریکی وزیر خارجہ جان کیری نے کہا کہ روس نے شام میں جنگ بندی پر اتفاق کرلیا۔

لندن میں برطانوی وزیر خارجہ فلپ ہیمونڈ سے ملاقات کے بعد میڈیا سے گفتگو کرتے ہوئے امریکی وزیر خارجہ جان کیری نے بتایا کہ روسی وزیر خارجہ نے شام میں جنگ بندی پر اتفاق کرلیا۔

ان کا کہنا ہے کہ روس متفق ہے کہ شام میں جاری جنگ کے خاتمے کیلئے تمام فریقین کو متحد ہوکر ایسا لائحہ عمل اپنانا چاہئے جس سے شام میں امن کا قیام ممکن ہو سکے۔

ایران کا سعودی عرب کے خلاف تند و تیز بیان

دبئی: ایران کے پاسداران انقلاب کے سربراہ محمد علی جعفری کا کہنا ہے کہ سعودی عرب میں اس حوالے سے جرات کا فقدان ہے کہ وہ اپنے زمینی دستوں کو منصوبہ بندی کے ساتھ شام بھیجے.

ساتھ ہی انھوں نے خبردار کیا کہ اگر سعودی عرب نے ایسا کیا تو ان کی فورسز کو ختم کردیا جائے گا.

خبر رساں ادارے  کے مطابق محمد علی جعفری کا یہ تند و تیز بیان، حریف ملک سعودی عرب کی جانب سے شام میں زمینی آپریشن میں شمولیت کے حوالے سے دیئے جانے والے بیان کے بعد ایران کی جانب سے پہلا سرکاری بیان ہے.

یاد رہے کہ حال ہی میں سعودی عرب کی جانب سے بیان سامنے آیا تھا کہ اگر امریکا اور اس کے اتحادی ممالک شام میں داعش کے خلاف زمینی آپریشن شروع کرنے کا فیصلہ کرتے ہیں، تو وہ بھی اپنی فوج بھیجنے کے لیے تیار ہے۔

محمد علی جعفری نے کہا، ‘سعودی عرب نے یہ دعویٰ تو کردیا ہے لیکن میرا نہیں خیال کہ وہ اتنے بہادر ہیں کہ ایسا کریں گے اور اگر ایسا ہو بھی گیا تو ان کو لازمی شکست سے دوچار ہونا پڑے گا، یہ خودکشی کے برابر ہوگا’.

یاد رہے کہ داعش نے 2014 میں شام اور عراق کے بڑے رقبے پر قبضہ کرکے خود ساختہ خلافت قائم کرنے کا اعلان کیا تھا، جس کے خلاف امریکا کی قیادت میں کئی ممالک کی فوجی نے کارروائیاں شروع کیں، تاہم اب تک داعش کو کنٹرول نہیں کیا جا سکا۔

امریکا میں دو چھوٹے فضائی طیارے آپس میں ٹکرا کر تباہ ہوگئے

کیلیفورنیا:  امریکا میں دو چھوٹے فضائی طیارے آپس میں ٹکرا جانے کے باعث تباہ ہوگئے ۔ امریکی کوسٹ گارڈ کے مطابق حادثہ ریاست کیفلیفورنیا کے شہر لاس اینجلس میں پیش آیا جبکہ تصادم کے بعد دونوں طیارے انجیلس کی بندرگاہ میں دوب گئے ۔حکام کے مطابق حادثے میں اب تک کسی کے زندہ بچنے کی اطلاع موصول نہیں ہوئی ہے ۔ حادثہ لاس اینجلس کے تاریخی اینجل لائٹ ٹاور سے نصف کلومیٹر کے فاصلے پر پیش آیا تاہم پیش کے دوران اسے بند رکھا گیا ہے ۔

Google Analytics Alternative