بین الاقوامی

بھارتی فورسز کی فائرنگ سے کشمیری نوجوان شہید

سری نگر: بھارتی فورسزنے سوپورمیں فائرنگ کرکے کشمیری نوجوان کوشہید کردیا۔

مقبوضہ کشمیرمیں بھارتی فوج نے ریاستی دہشت گردی کا مظاہرہ کرتے ہوئے ضلع سوپورمیں فائرنگ کرکے کشمیری نوجوان آصف کوشہید کیا، قابض فورسزنے سوپورمیں ہی 8 نوجوانوں کو حراست میں بھی لے لیا۔

مقبوضہ وادی میں مسلسل 38 ویں روز بھی کرفیو اورپابندیاں برقرارہیں۔ اسپتالوں میں ادویات کی شدید قلت ہوگئی جب کہ ڈاکٹرزکے نہ پہنچے کی وجہ سے 6 مریض تشویش ناک حالت میں ہیں۔

مقبوضہ وادی میں موبائل، انٹرنیٹ سروس اور ٹی وی چینلزبھی بند ہیں جب کہ سڑکوں سے ٹرانسپورٹ غائب ہے۔

قابض فورسزنے یوم عاشور پر عزاداروں کوجلوس نکالنے کی اجازت بھی نہ دی جس کے باعث متعدد علاقوں میں کشمیریوں نے کرفیو توڑتے ہوئے جلوس نکالے۔

جمال خاشقجی قتل؛ آخری لمحات کی آڈیوریکارڈنگ سے متعلق نئی تفصیلات جاری

استنبول: سعودی صحافی جمال خاشقجی کی زندگی کے آخری لمحات میں کی گئی مبینہ ریکارڈنگ کی تفصیلات جاری کردی گئیں۔

برطانوی نشریاتی ادارے کے مطابق ترک اخبارکی جانب سے سعودی صحافی جمال خاشقجی کی زندگی کی آخری لمحات کی مبینہ ریکارڈنگ جاری کی گئی ہے جس میں صحافی کے آخری الفاظ سے متعلق معلومات شامل ہیں۔

رپورٹ کے مطابق صحافی جمال خاشقجی کو کہا گیا تھا کہ انہیں انٹرپول کے حکم کے مطابق سعودی دارالحکومت ریاض واپس جانا ہوگا، جس پران کی جانب سے انکارکردیا گیا تھا۔ رپورٹ کے مطابق صحافی کے انکارکے بعد انہیں نشہ آورچیزدی گئی تھی۔

ترک حکام کے دعوے کے مطابق خاشقجی نے مبینہ طور پر اپنے آخری الفاظ میں اپنے قاتلوں کو اپنا منہ بند نہ کرنے کی درخواست کی تھی کیونکہ انہیں دمے کا مرض لاحق تھا تاہم وہ اس کے بعد اپنے ہوش میں نہیں رہے جب کہ ریکارڈنگ میں مبینہ طورپرہاتھا پائی کی آوازیں بھی موجود ہیں۔

واضح رہے کہ صحافی جمال خاشقجی گزشتہ سال 2 اکتوبرکو ضروری کاغذات کے لیے استنبول میں سعودی قونصل خانے گئے تھے اور پھرلاپتہ ہوگئے تھے تاہم عالمی دباؤ کے بعد  سعودی عرب نے جمال خاشقجی کی استنبول کے سعودی قونصل خانے میں موت کی تصدیق کی تھی۔

امریکی اتحاد افواج نے عراقی داعش کے ٹھکانوں پر36ہزار کلوگرام بم برسادیئے

صلاح دین: امریکی اتحادی فوج نے عراقی جزیرے پر واقع داعش کے ٹھکانے پر80 ہزار پاونڈ وزنی بارود اور بموں سے شدید حملہ کیا ہے

غیر ملکی خبر رساں ادارے کے مطابق امریکی اتحاد نے عراقی صوبے صلادین میں واقع جزیرے قانوس پر قائم داعش کے ٹھکانوں پر بمباری کی۔ امریکی اتحاد کے اس آپریشن میں 80 ہزار پاونڈ ( 36 ہزار کلو)  بارود استعمال کیا گیا۔

داعش کے خلاف کئے جانے والے اس آپریشن میں امریکی ایئر فورس کے ایف 15 اسٹرائیک ایگل اور ایف 35 لائٹننگ طیاروں نے حصہ لیا۔ آپریشن میں داعش کے کئی ٹھکانے تباہ ہونے کا دعویٰ کیا ہے۔

ذرائع ابلاغ کے مطابق قانوس جزیرہ بظاہر داعش شدت پسندوں کا مضبوط اور محفوظ گڑھ بن چکا تھا۔ جزیرے پر بڑی تعداد میں سبزہ اور درخت ہونے کی بنا پر جنگجو وہاں چھپے ہوئے تھے۔

اس موقع پر اسپیشل آپریشنز جوائنٹ ٹاسک فورس کے سربراہ میجر جرنل ایرک ٹی ہِل نے بتایا کہ گزشتہ ایک ماہ سے داعش کے خلاف نئی معلومات ملی تھیں جس کے بعد مختلف مقامات پر ان کے خلاف کارروائیاں جاری ہیں۔

تاہم تصاویر اور ویڈیو سے دیکھا جاسکتا ہے کہ اس غیرمعمولی بمباری سے جزیرے پر بڑے پیمانے پر تباہی ہوئی ہے۔

جاپان میں طوفان ’فکسائی‘ سے نظام درہم برہم، درجنوں پروازیں منسوخ

جاپان میں آنے والے فکسائی طوفان نے تباہی مچادی جس سے درجنوں پروازیں منسوخ اور بجلی سمیت ٹرانسپورٹ کا نظام بھی درہم برہم ہوگیا۔

غیر ملکی میڈیا کے مطابق جاپان میں آنے والے طاقتور طوفان کے باعث درجنوں پروازیں منسوخ ہونے سے ہزاروں مسافر ہوائی اڈوں پر پھنس گئے جب کہ طوفان کے نتیجے میں 10 لاکھ کے قریب گھر بجلی سےمحروم ہوگئے۔

میڈیا رپورٹس کے مطابق طوفان کے نتیجے میں پیر کے روز جاپان کے ساحلی شہر چھیبا میں موسلا دھار بارشیں ہوئی اور 120 میل فی گھنٹہ کی رفتار سے ہوائیں چلیں جس سے شہر میں سیلابی صورتحال پیدا ہوگئی۔

طوفان نے ٹوکیو شہر کو بھی متاثر کیا جس سے شہر میں ٹرانسپورٹ کا نظام مفلوج ہوگیا جس کے باعث شہر کے بڑے ریلوے اسٹیشنوں پر بلٹ ٹرین اور سب وے سروسز کے لیے مسافروں کا جم غیر جمع ہوگیا۔

طوفان کے باعث ٹوکیو شہر میں متاثر ہونے والی ٹرین سروس عارضی بحال ہوگئی ہے تاہم تمام ٹرینیں تاخیر کا شکار ہیں جب کہ ٹوکیو کے ائیرپورٹس سے چلنے والی 100 سے زائد پروازیں منسوخ کردی گئی ہیں، اس کے علاوہ ٹوکیو اور یوکوماہا سے ہنیڈا ائیرپورٹ تک چلنے والی تمام ٹرینیں بھی منسوخ ہیں۔

فوٹو: بشکریہ سی این این

طوفان کے باعث ٹوکیو کے نریتا ائیرپورٹ پر 7 ہزار کے قریب مسافر پھنس گئے، ہائی ویز بلاک اور ریلوے سروس معطل ہیں جب کہ پروازوں سے آنے والے مسافروں کے لیے ائیرپورٹ سے دوسرے مقام تک جانے کے لیے کوئی ٹرانسپورٹ دستیاب نہیں۔

حکام نے ٹوکیو پورٹ سے جانے والے بحری جہازوں کو بھی روک دیا ہے جب کہ 10 لاکھ سے زائد گھر بجلی سے محروم ہوگئے ہیں۔

میڈیا رپورٹس کے مطابق طوفان کے نتیجے میں ہلاکتوں کی کوئی اطلاع نہیں تاہم 10 زخمیوں کو اسپتال منتقل کیا گیا ہے۔

طوفان سے قبل حکام کی جانب سے شہریوں کو سیلاب اور لینڈ سلائیڈنگ سے خبردار کرتے ہوئے انہیں گھروں میں رہنے کی ہدایات بھی جاری کی گئی گئیں۔

مقبوضہ کشمیر میں مظالم سے توجہ ہٹانے کیلیے مودی سرکار کی شاطرانہ چال

نئی دلی: بھارت کی بارڈر سیکیورٹی فورس نے مضحکہ خیز طور پر خبردار کیا ہے کہ بھارتی فوج اور عوام پر سمندر کے راستے حملے کیے جاسکتے ہیں جس کے لیے جیش محمد کے جنگجوؤں کو ’سمندر کی تہہ‘ میں ٹریننگ دی جارہی ہے۔

کشمیر میں جاری اپنے مظالم سے دنیا کی توجہ ہٹانے کے لیے مودی سرکار نے نئی چال چلتے ہوئے جھوٹ پر مبنی بے بنیاد دعویٰ کیا ہے کہ سمندر کی تہہ میں جیشِ محمد سے تعلق رکھنے والے 50 جنگجوؤں کو بھارت پر حملہ کرنے کی تربیت دی جا رہی ہے۔

بھارتی فوج کے جنوبی کمانڈ کے جی او سی لیفٹیننٹ جنرل ایس کے سینی کا کہنا تھا کہ بھارت کے جنوبی حصے پر فوجی اہلکاروں پر حملہ کیا جا سکتا ہے۔ جس کے لیے سیکیورٹی الرٹ بھی جاری کر دیا گیا ہے۔ پڑوسی ملک جنگجوؤں کو سمندر کی تہہ میں تربیت دے رہا ہے۔

بھارتی فوج کی لیفٹیننٹ جنرل کے انکشاف کے بعد کیرالہ پولیس نے بھی برق رفتاری کا مظاہرہ کرتے ہوئے تمام اضلاع کے چیفس کو الرٹ جاری کر دیا ہے اور ساحلی علاقوں پر پولیس کی پٹرولنگ اور پُرہجوم مقامات پر تعینات نفری میں بھی اضافہ کردیا گیا ہے۔

قبل ازیں بھارتی بحریہ کے چیف آف نیول اسٹاف ایڈمرل کرمبیر سنگھ نے نے پونا میں ایک تقریب سے خطاب کرتے ہوئے پاکستان کے بھارت پر بحری حملے کا بے سروپا الزام عائد کرتے ہوئے کہا تھا کہ بھارتی بحریہ نے بھی تیاریاں مکمل کرلی ہیں۔

واضح رہے کہ وزیر اعظم پاکستان عمران خان اور ڈی جی آئی ایس پی آر نے مودی سرکار کے مقبوضہ کشمیر کی خصوصی حیثیت ختم کرنے کے بعد کئی بار دنیا کو آگاہ کیا ہے کہ بھارت اپنے غیر آئینی اقدام اور کشمیریوں پر مظالم سے دنیا کی توجہ ہٹانے کے لیے پلوامہ حملے جیسا کوئی ڈرامہ رچا سکتا ہے اور ذمہ دار پاکستان کو قرار دے گا۔

حزب اللہ کا اسرائیلی ڈرون مار گرانے کا دعویٰ

یروت:لبنان کے عسکریت پسند گروہ حزب اللہ نے اسرائیلی ڈرون طیارہ مار گرانے کا دعویٰ کیا ہے۔

بین الاقوامی خبر رساں ادارے کے مطابق حزب اللہ نے لبنان کے جنوبی حصے میں ایک اسرائیلی ڈرون مار گرانے کا دعویٰ کرتے ہوئے کہا ہے کہ اسرائیلی ڈرون اب بھی ہمارے قبضے میں ہے تاہم لبنان کے دعوے کے حوالے سے اسرائیل کا کوئی تبصرہ سامنے نہیں آیا ہے۔

گزشتہ ہفتے اسرائیل نے حزب اللہ پر اسرائیلی ٹینک تباہ کرنے کا الزام عائد کر کے لبنان پر راکٹ حملہ بھی کیا تھا جس میں حزب اللہ کے ایک دفتر کو شدید نقصان پہنچا تھا جس پر حزاب اللہ نے بھی اسرائیلی چیک پوسٹوں اور تنصیبات کی جانب راکٹ داغے تھے۔

اسرائیل نے انتہائی جارحیت کا مظاہرہ کرتے ہوئے جنوبی لبنان پر توپ خانے سے 100 گولے داغے، حزب اللہ بھی ان حملوں کے لیے تیار تھی اور اسرائیلی گولوں کا جواب راکٹ حملوں سے دیا اور اسی دوران ایک اسرائیلی ڈرون کو بھی مارگرایا۔

دوسری جانب اسرائیلی فوج کے ترجمان نے اپنے بیان میں کہا کہ حزب اللہ کے راکٹ حملوں کو فضا میں ہی ناکارہ بنا دیا گیا ہے جب کہ ایک اسرائیلی ڈرون معمول کی تجرباتی پرواز کے دوران لبنان کے جنوبی صوبے میں گر کر تباہ ہوگیا۔

 

مقبوضہ کشمیر میں بھارتی فوج کا محرم الحرام کے جلوس پر پیلٹ گنز کا استعمال

سری نگر: مقبوضہ کشمیر میں بھارتی فوج نے ریاستی دہشتگردی کا مظاہرہ کرتے ہوئے محرم الحرام کے جلوس پر بھی پیلٹ گنز اور شیلنگ کا استعمال کیا جس کے نتیجے میں کئی افراد زخمی ہوگئے۔

جنت نظیر وادی میں مودی حکومت کے کرفیو کو آج 35 روز گزر چکے ہیں، مودی حکومت نے کشمیریوں سے نہ صرف حق خودارادیت کو چھین لیا ہے بلکہ کشمیریوں کی مذہبی آزادی کا حق بھی غصب کرلیا ہے۔

بھارتی حکومت نے مقبوضہ وادی میں محرم الحرام کی مناسبت سے نکلنے والے تمام جلوسوں پر پابندی لگا رکھی ہے جب کہ سری نگرمیں ماتمی جلوس پر آنسو گیس، پیلٹ گنز اور لاٹھی چارج کرکے کئی عزاداروں کو زخمی کردیا گیا۔

دوسری جانب کھانے پینے کی چیزوں اور ادویات کی قلت نے کشمیریوں کی زندگی اجیرن بنارکھی ہے ۔ ٹرانسپورٹ، کاروبار، دکانیں اور دفاترمکمل بند ہیں، کرفیواور سخت پابندیوں کی وجہ سے نظام زندگی مفلوج ہوکر رہ گیا ہے ۔

بریگزٹ ڈیل پر برطانوی وزیراعظم بورس جانسن کو ایک اور دھچکا

لندن: برطانوی خاتون وزیر امبر آگسٹا روُڈ نے یورپی یونین سے انخلاء کے معاملے پر نومنتخب وزیراعظم بورس جانسن کی پالیسیوں سے اختلاف پر استعفیٰ دے دیا ہے۔

بین الاقوامی خبر رساں ادارے کے مطابق نومنتخب برطانوی وزیراعظم بورس جانسن کی یورپی یونین سے انخلاء کی پالیسیوں پر خود ان کی جماعت میں اختلافات بڑھتے جارہے ہیں۔ پارلیمان میں یکے بعد دیگرے ناکامیوں کے بعد وزیراعظم کے لیے ایک اور مشکل کھڑی ہوگئی ہے۔

برطانوی وزیر برائے محنت و پنشن امبر آگسٹا رُوڈ بریگزٹ ڈیل پر وزیراعظم بورس جانسن کی پالیسیوں پر شدید تحفطات کا اظہار کرتے ہوئے نہ صرف وزارت سے مستعفی ہوگئی ہیں بلکہ اپنی جماعت کنزرویٹو پارٹی سے بھی راہیں جدا کرلی ہیں۔ امبر آگستا رُوڈ نے اپنا استعفیٰ ٹویٹر پر بھی شیئر کیا۔

دو روز قبل برطانوی وزیراعظم بورس جاسن کے بھائی جو جانسن نے بھی خاندان سے وفاداری اور ملکی مفاد کے مابین ملکی مفاد کا انتخاب کرتے ہوئے کابینہ سے مستعفی ہونے کا اعلان کیا تھا۔ جو جانسن کا کہنا تھا کہ ملکی مفادات پر کسی رشتے اور عہدے کو فوقیت نہیں دی جا سکتی ہے۔ اس سے قبل وزیراعظم بورس جانسن کو پارلیمان میں 4 قراردادوں پر شکست کا سامنا بھی کرنا پڑا تھا۔

Google Analytics Alternative