بین الاقوامی

ایرانی دھمکیوں کے پیش نظر امریکی بمبار طیارہ قطر پہنچ گیا

واشنگٹن: امریکا نے ایرانی دھمکیوں کے بعد اپنا بی-52 بمبار طیارہ قطر میں واقع اپنے فوجی کیمپ میں پہنچا دیا ہے۔

بین الاقوامی خبر رساں ادارے کے مطابق ’وائٹ ہاؤس‘ کے حکم پر ایرانی دھمکیوں کے پیش نظر بمبار طیارہ قطر میں امریکی فوجی کیمپ میں پہنچادیا گیا ہے۔ طیارے ایک سے زائد ہیں تاہم طیاروں کی تعداد ظاہر نہیں کی گی۔

امریکی فضائیہ کی جانب سے جاری کی گئی تصویر میں ایک بی-52 ایچ اسٹریٹوفورٹریس طیارے کو العودید ایئر بیس پر اترتے ہوئے دکھایا گیا ہے جب کہ دیگر طیارے خفیہ مقامات پر اتارے گئے ہیں۔

ایران نے عالمی جوہری معاہدے 2015 کی بعض شقوں سے دستبردار ہونے کا اعلان کیا تھا۔ فوٹو : ٹویٹر

چند روز قبل ہی امریکا نے ایران کی غیر معمولی دھمکیوں کے بعد ’ابراہام لنکن ایئرکرافٹ کیریر اسٹرائیک گروپ‘ قطر بھیجنے کا اعلان کیا تھا تاکہ ایران کی ممکنہ جنگی کارروائی کا مقابلہ کیا جاسکے۔

واضح رہے کہ بدھ کے روز ایران نے عالمی قوتوں کے ساتھ کیے گئے جوہری توانائی 2015 کی بعض شقوں سے دستبردار ہونے کا اعلان کرتے ہوئے جوہری توانائی کو ایٹمی مقاصد کے لیے استعمال کرنے میں آزاد ہونے کا عندیہ دیا تھا۔

لندن میں نماز تراویح کے دوران مسلح شخص کی مسجد میں فائرنگ

لندن: تراویح کے دوران مسلح شخص نے لندن کی مسجد میں فائرنگ کی اور فرار ہوگیا تاہم واقعے میں کسی کے زخمی یا ہلاک ہونے کی اطلاع نہیں ملی۔

غیر ملکی خبر رساں ادارے کے مطابق مشرقی لندن کے علاقے سیون کنگز میں نماز تراویح کے وقت مسلح شخص نے مسجد میں گھس کر فائرنگ کی تاہم نمازیوں کے پیچھا کرنے پر حملہ آور فرار ہوگیا، واقعے کے بعد پولیس نے علاقے کو گھیرے میں لیکر حملہ آور کی تلاش شروع کردی ہے جب کہ مسجد کے باہر پولیس کی بھاری نفری کو تعینات کردیا گیا ہے۔

اسکاٹ لینڈ یارڈ کے مطابق واقعے کی جگہ سے شواہد اکھٹے کیے جارہے ہیں اور عینی شاہد کے بیانات بھی قلمبند کیے جارہے ہیں تاہم فائرنگ کے واقعے میں کسی بھی شخص کے زخمی یا ہلاک ہونے کی اطلاع نہیں ملی، پولیس کے مطابق واقعے میں دہشت گردی کاعنصر شامل نہیں ہے تاہم واقعے کی مزید تحقیقات جاری ہیں۔

عراق میں خود کش دھماکا، 8 افراد ہلاک

بغداد: عراق کے پُر رونق بازار میں خود کش دھماکے کے نتیجے میں 8 افراد ہلاک اور 10 سے زائد زخمی ہوگئے۔

بین الاقوامی خبر رساں ادارے کے مطابق عراق کے دارالحکومت بغداد کی جمیلہ مارکیٹ میں خود کش بمبار نے خود کو دھماکے سے اُڑالیا، دھماکا اس وقت کیا گیا جب مارکیٹ میں سیکڑوں افراد خریداری میں مصروف تھے۔

بغداد پولیس نے دھماکے میں 8 افراد کے ہلاک ہونے کی تصدیق کی ہے جب کہ زخمیوں کی تعداد 10 سے تجاوز کرگئی ہے، ہلاک اور زخمی ہونے والوں کو ریسکیو اداروں نے بغداد کے الکنڈی اسپتال منتقل کیا، جہاں 3 زخمیوں کی حالت نازک بتائی جارہی ہے۔

شدت پسند جماعت داعش نے دھماکے کی ذمہ داری قبول کرتے ہوئے اپنے بیان میں مزید حملوں کی دھمکی بھی دی اور دھماکے کی وجہ اپنی موجودگی کا احساس دلانا قرار دیا،  تاہم حکومت کی جانب سے داعش کے دعویٰ پر کسی قسم کا تبصرہ سامنے نہیں آیا ہے۔

واضح رہے کہ عراق میں داعش اور اتحادی افواج کے درمیان برسوں سے جاری گھمسان کی جنگ کا خاتمہ اتحادی افواج کی جیت میں صورت ہوا تھا اور حکومتی دعوے کے مطابق عراق سے داعش جنگجوؤں کا مکمل خاتمہ کردیا گیا تھا۔

ٹرمپ کا چین پر تجارتی معاہدہ توڑنے کا الزام

امریکی صدر ڈونلڈ ٹرمپ نے چین پر تجارتی معاہدہ توڑنے کا الزام عائد کر دیا۔

ڈونلڈ ٹرمپ کا بیان چین کے اس بیان کے بعد سامنے آیا ہے جس میں کہا گیا ہے کہ اگر امریکا نے چینی اشیاء پر ٹیکس عائد کیے تو اس کے جواب میں ضروری اقدامات اٹھائے جائیں گے۔

امریکی صدر نے جمعے کو 200 ارب روپے کی چینی اشیاء پر ڈبل سے زیادہ ٹیکس عائد کرنے کا اعلان کر رکھا ہے۔

ایک طرف دونوں ممالک کی جانب سے ایک دوسرے کی اشیاء پر ٹیکس عائد کرنے کے بیانات داغے جا رہے ہیں جب کہ دوسری جانب دونوں ممالک کے درمیان امریکا میں تجارتی مذاکرات بھی جاری ہیں۔

امریکا میں چین کے وفد کی سربراہی نائب وزیراعظم لیو ہی کر رہے ہیں جنہیں چین میں ایک طاقتور عہیدار کے طور پر جانا جاتا ہے۔

چینی حکام سے مذاکرات سے قبل ڈونلڈ ٹرمپ نے بیجنگ پر معاہدے کی خلاف ورزی کا الزام عائد کرتے ہوئے کہا وہ ایسا نہیں کر سکتے تھے، اب انہیں اس کی قیمت چکانا ہو گی۔

خیال رہے کہ 2018 میں امریکا نے چین کی اشیاء پر 250 ارب ڈالر کے ٹیکس عائد کئے جس کے جواب میں چین نے بھی امریکی اشیاء پر 110 ارب ڈالر کے ٹیکس نافذ کیے۔

شمالی کوریا کا 5 روز کے دوران دوسری مرتبہ میزائل تجربہ

شمالی کوریا کی جانب سے مختصر فاصلے تک مار کرنے والے مزید 2 میزائلوں کا تجربہ کیا گیا ہے۔

برطانوی خبر رساں ادارے کے مطابق جنوبی کوریا کے عسکری حکام کا کہنا ہےکہ شمالی کوریا نے ملک کے شمال مغربی سائنو ری بیس سے میزائل فائر کیے جنہوں ںے تقریباً 260 میل کا فاصلہ طے کیا۔

برطانوی میڈیا کا کہناہےکہ یہ میزائل تجربے ایسے وقت میں کیے گئے جب امریکی سفیر ایٹمی مذاکرات پر ڈیڈلاک کے خاتمے کی کوششوں کے لیے جنوبی کوریا میں موجود ہیں۔

میڈیا رپورٹس کے مطابق جنوبی کوریا کے جوائنٹ چیفس آف اسٹاف نے کہا ہےکہ 2 شارٹ رینج میزائل مشرقی حصے کی طرف فائر کیے گئے، اس حوالے سے امریکی انٹیلی جنس حکام کے ساتھ مل کر تفصیل اکٹھا کی جارہی ہے تاہم یہ بات اب تک واضح نہیں ہوسکی کہ یہ میزائل کہاں گرے۔

واضح رہے کہ شمالی کوریا کے سربراہ کم جونگ اور امریکی صدر ٹرمپ کی فروری میں ہونے والی ملاقات بے نتیجہ ختم ہوگئی تھی اور امریکی صدر نے اسے شمالی کوریا کے سربراہ کی طرف سے ایک بری ڈیل قرار دیا تھا۔

اس بے نتیجہ ملاقات کے بعد شمالی کوریا نے میزائل تجربے شروع کیے جس کے تحت گزشتہ ہفتے 4 مئی کو بھی مختصر فاصلے تک مار کرنے والے کئی میزائلوں کا تجربہ کیا گیا جس کےبعد اب یہ ایک ہفتے میں شمالی کوریا کا دوسرا تجربہ ہے۔

نیویارک میں عمارت میں آتشزدگی سے 4 بچوں سمیت 6 افراد ہلاک

نیو یارک: امریکی شہر نیویارک میں عمارت میں آتشزدگی  سے 4 بچوں سمیت 6 افراد ہلاک ہوگئے۔

امریکی شہر نیویارک میں رہائشی عمارت کی پانچویں منزل پر اچانک آگ بھڑک اٹھی جس کے نتیجے میں گھر میں موجود 4 بچوں سمیت 6 افراد ہلاک ہوگئے، واقعہ کے اطلاع ملتے ہی بعد فائر بریگیڈ کی گاڑیاں موقع پر پہنچ گئیں اور آگ پر قابو پالیا، پولیس حکام کے مطابق ہلاک ہونے والے بچوں کی عمر 3 سے 11 سال کے درمیان ہے جب کہ بچوں کی والدہ اور بھائی بھی حادثے میں ہلاک ہوگیا ہے۔

پولیس کا کہنا ہے کہ تحقیقات کے مطابق خاتون کچن کا چولہا بند کرنا بھول گئی تھیں جس کے سبب حادثہ پیش آیا جب کہ گھر میں لگے اسموک ڈیٹیکٹرز بھی کام نہیں کررہے تھے تاہم اس اس حوالے سے مزید تحقیقات جاری ہیں۔

واضح رہے کہ اس سے قبل 2017 میں رہائشی عمارت میں آگ لگنے کا واقعہ پیش آیا تھا جس کے نتیجے میں 13 افراد ہلاک ہوگئے تھے۔

کابل میں امریکی این جی او کے دفتر پر طالبان کا حملہ، 6 افراد ہلاک

کابل: افغانستان میں  امریکی غیرسرکاری تنظیم پر طالبان کے حملے میں 6 افراد ہلاک اور متعدد  زخمی ہوگئے ہیں۔ 

حملے کے بعد طالبان  اور سیکیورٹی فورسز کے درمیان فائرنگ کا تبادلہ ہوا جس میں وزارتِ داخلہ کے مطابق چار شہری اور دو پولیس افسر ہلاک ہوئے  جب کہ 20 سے زائد افراد زخمی ہوئے، حملے میں درجنوں گاڑیاں تباہ اور کئی دکانوں کو بھی  نقصان پہنچا۔

وزارت داخلہ کے مطابق پانچوں حملہ آوروں کو ہلاک کردیا گیا ہے جب کہ عمارت میں موجود 200 سے زائد افراد کو بحفاظت نکال لیا گیا۔

افغانستان میں امریکی سفیر جوہان بیس نے اس حملے کی مذمت کرتے ہوئے کہا کہ این جی او افغانستان اور عوام کی مدد کررہی تھی۔

ایران ایٹمی پروگرام کے عالمی معاہدے کے اہم حصے سے دستبردار

تہران: ایران 2015 میں ہونے والے ایٹمی پروگرام کے عالمی معاہدے کے اہم حصے سے دستبردار ہوگیا۔

برطانوی میڈیا کے مطابق ایرانی صدر حسن روحانی نے کہا ہےکہ وہ ملک میں یورینیم کا بھاری اسٹاک رکھیں گے اور اسے یورپ کو فروخت نہیں کیا جائے گا۔

ایرانی صدر نے آئندہ 60 دنوں میں دوبارہ یورینیم کی بھاری افزودگی کی بھی دھمکی دیدی۔

ایرانی صدر کا کہنا ہے کہ وہ عالمی معاہدے کے دو حصے معطل کر رہے ہیں جنہیں مشترکہ جامع ایکشن پلان (Joint Comprehensive Plan of Action) کے نام سے جانا جاتا ہے۔

حسن روحانی نے یورپی قوتوں، چین اور روس کو تیل اور پیسے سے متعلق وعدوں کی پاسداری کے لیے 60 روز کی مہلت دیتے ہوئے کہا کہ ایسا ہونے کی صورت میں ہی ایران فروخت بحال کرے گا۔

ایرانی صدر نے وعدوں کی پاسداری نہ ہونے اور عالمی قوتوں کی جانب سے امریکی پابندیوں کی حمایت کی صورت میں بھاری مقدار میں یورینیم کی افزودگی کی دھمکی بھی دی۔

حسن روحانی نے مزید کہا کہ ایران اس معاہدے دستبردار نہیں ہو رہا اور ہم یہ معاہدہ چھوڑنا نہیں چاہتے، اس لیے دنیا کو پتا ہونا چاہیےکہ آج اس معاہدے کا آخری روز نہیں ہے بلکہ یہ معاہدے کے فریم ورک میں رہتے ہوئے ایک نیا قدم ہے۔

ایرانی صدر نے مزید دھمکی دی کہ اگر ایران کے ایٹمی پروگرام کا معاملہ اقوام متحدہ کی سلامتی کونسل کو بھیجا گیا تو پانچ عالمی طاقتوں کو فیصلہ کن رد عمل کا سامنا ہو گا۔

Google Analytics Alternative