Home » بین الاقوامی » ایمرجنسی نفاذ پر ٹرمپ کے خلاف 16 امریکی ریاستوں نے مقدمہ دائر کردیا

ایمرجنسی نفاذ پر ٹرمپ کے خلاف 16 امریکی ریاستوں نے مقدمہ دائر کردیا

واشنگٹن: امریکا کی 16 ریاستوں نے ملک میں ایمرجنسی نافذ کرنے پر صدر ٹرمپ کے خلاف وفاقی عدالت میں مقدمہ دائر کردیا۔ 

بین الاقوامی خبر رساں ادارے کے مطابق 16 ریاستوں نے جنوبی کیلیفورنیا کی وفاقی عدالت میں صدر ڈونلڈ ٹرمپ کے ایمرجنسی نافذ کر کے سرحدی دیوار تعمیر کرنے کے فیصلے کے خلاف حکم امتناعی کے لیے استدعا کردی۔

اس حوالے سے ریاست کیلیفورنیا کے اٹارنی جنرل نے میڈیا کو بتایا کہ 16 امریکی ریاستوں نے عدالت سے صدر ٹرمپ کو ٹیکس ادا کرنے والوں کی رقوم کو ذاتی مرضی اور اپنے مفادات کے حصول کے لیے استعمال کرنے سے روکنے کی درخواست کی ہے۔

درخواست میں یہ بھی کہا گیا ہے کہ صدر ٹرمپ کی اپنے مقاصد میں کامیابی کی صورت میں مستقبل کے صدور کے لیے مثال قائم ہو جائے گی کہ اور جب بھی کانگریس کثرت رائے سے فنڈز جاری کرنے سے انکار کیا تو صدر ایمرجنسی نافذ کردیا کریں گے۔

واضح رہے کہ میکسیکو کی سرحد پر حفاظتی دیوار کی تعمیر کے لیے درکار فنڈز پر من مانی رقم نہ ملنے پر امریکی صدر ڈونلڈ ٹرمپ نے ملک میں ہنگامی حالت نافذ کردی ہے جس کے بعد انہیں کسی بھی کام کے لیے من مانے فنڈز کے اجراء کا اختیار مل گیا ہے۔

About Admin

Google Analytics Alternative