ایس کے نیازی
پاکستان الیکٹرانک میڈیا ریگولیٹری اتھارٹی کی چیئرپرسن کے طور پر محترمہ عنبرین جان کی تقرری ایک خوش آئند اور اطمینان بخش پیش رفت ہے۔میں انہیں دل کی گہرائیوں سے مبارک پیش کرتا ہوں۔ یہ رسمی مبارک باد نہیں بلکہ ایک اہم ذمہ داری کے لیے ایک درست اورموزوں شخصیت کے انتخاب پر اظہار مسرت و اطمینان ہے۔عنبرین جان صاحبہ اس شعبے میں نووارد نہیں ہیں ۔ اس میدان کا وسیع تجزبہ ا ن کے ساتھ ہے۔ وہ سرکاری شعبے کے میڈیا نظم و نسق میں ایک نمایاں پیشہ ورانہ پس منظر رکھتی ہیں۔ وہ پی ٹی وی کی منیجنگ ڈائریکٹر رہ چکی ہیں۔ اس منصب پر ادارتی سمت، ادارہ جاتی نظم و ضبط، مالی امور اور قومی نشریاتی پالیسی کی نگرانی شامل ہوتی ہے۔ پی ٹی وی کی قیادت معمول کی انتظامی ذمہ داری نہیں بلکہ اس کے لیے میڈیا اخلاقیات، ریاستی ذمہ داری اور عوامی توقعات کا گہرا فہم درکار ہوتا ہے۔اس سے قبل وہ ریڈیو پاکستان کی ڈائریکٹر جنرل بھی رہیں۔ اس حیثیت میں انہوں نے ملک کے ایک تاریخی اور وسیع نشریاتی ادارے کی نگرانی کی۔ ریڈیو آج بھی شہری مراکز کو دور دراز علاقوں سے جوڑنے کا مؤثر ذریعہ ہے۔ ایسے ادارے کا نظم و نسق صرف انتظامی صلاحیت نہیں بلکہ ضابطہ جاتی تقاضوں اور مواد کی ذمہ داری سے مکمل آگاہی بھی چاہتا ہے۔اسی بنا پر جس منصب کی ذمہ داری وہ اب سنبھال رہی ہیں وہ ان کے لیے اجنبی نہیں۔ پیمرا کے اختیارات، فرائض اور قانونی تقاضے ان کے پیشہ ورانہ تجربے کے دائرے میں آتے ہیں۔ وہ نشریاتی نظام کی ساخت، میڈیا اداروں پر موجود دبا ؤاور ضابطہ بندی میں توازن کی ضرورت سے بخوبی واقف ہیں۔اس اہم موقع پر انہیں اس باوقار تقرری پر دلی مبارک باد پیش کرنا ضروری تھا۔ پاکستان گروپ آف نیوز پیپرز اور روز نیوز دعا گو ہے کہ وہ دانش، قوت اور دیانت کے ساتھ اپنی ذمہ داریاں ادا کریں۔ کوئی شک نہیں کہ پیمرا کی قیادت ایک بڑی ذمہ داری ہے اور ہماری نیک تمنائیں ہیں کہ وہ ادارے کو تعمیری اصلاح اور استحکام کی سمت لے جائیں گی۔اس وقت جس پہلو پر خصوصی توجہ درکار ہے وہ پیمرا ضابطہ اخلاق پر مؤثر عمل درآمد ہے۔ ضابطہ بندی اسی وقت معنی رکھتی ہے جب قواعد منصفانہ، یکساں اور بلا امتیاز نافذ ہوں۔ عنبرین جان میڈیا شعبے کو اچھی طرح جانتی ہیں اس لیے وہ نشریاتی ضابطہ بندی کی روح اور فنی پہلو دونوں سے آگاہ ہیں۔ یہ تجربہ انہیں اس قابل بناتا ہے کہ پیمرا ضابطہ اخلاق کو اس کے اصل متن اور حقیقی مفہوم کے مطابق نافذ کریں۔ضابطہ اخلاق محض ایک انتظامی دستاویز نہیں بلکہ آئینی اقدار، قومی یکجہتی، ذمہ دار صحافت اور محتاط نشریات کے تحفظ کا فریم ورک ہے۔ اس پر عمل درآمد میڈیا صنعت کی ساکھ کے لیے ضروری ہے۔روز نیوز ایک ایسے چینل کے طور پر جو پاکستان کے قوانین اور آئین کے مطابق اپنا داخلی ضابطہ اخلاق رضاکارانہ طور پر مرتب اور نافذ کرنے والوں میں اولین اداروں میں شامل رہا ہے، ضابطہ جاتی نظم کی اہمیت کو بخوبی سمجھتا ہے۔ ہم سمجھتے ہیں کہ ذمہ دار نشریات آزادی صحافت کی راہ میں رکاوٹ نہیں بلکہ اس کا تحفظ ہیں۔ اسی لیے ہم پیمرا کے معیارات کے درست نفاذ کو اہمیت دیتے ہیں۔ہمیں یقین ہے کہ ان کی قیادت میں پیمرا نظم و نسق، شفافیت اور جوابدہی میں بہتری کی جانب بڑھے گا۔ انتظامی اور پالیسی امور میں پیش رفت کے ساتھ ہم توقع رکھتے ہیں کہ وہ عمل درآمد کے نظام کو مضبوط بنانے اور پورے میڈیا منظرنامے میں ضابطہ اخلاق کی پاسداری کو یقینی بنانے پر بھی توجہ دیں گی۔ایک بار پھر عنبرین جان کو اس تقرری پر مبارک باد پیش کرتا ہوں اور ان کے دور کے لیے نیک تمناؤں کا اظہار کرتا ہوں۔ امید ہے کہ ان کی قیادت پاکستان میں ایک زیادہ ذمہ دار، پیشہ ورانہ اور آئین سے ہم آہنگ میڈیا ماحول کے قیام میں مددگار ثابت ہوگی۔