سرخ بھنورا یا لیڈی بگ سرخ اور سیاہ رنگت کا ایک خوبصورت کیڑا ہے جو نہایت ماحول دوست ہے، حال ہی میں اس خوبصورت کیڑے کے حیرت انگیز پروں کی ایک ویڈیو جاری کی گئی ہے۔
سائنسدانوں نے پہلی بار اس خوبصورت کیڑے کے اندرونی پروں کے بارے میں حیرت انگیز معلومات حاصل کی ہیں۔
بھنورے کے پر نہایت لچک دار اور نازک ہوتے ہیں جنہیں وہ دو تہوں میں موڑ کر اندر کرلیتا ہے، اس کے ساتھ ساتھ یہ اتنے مضبوط ہوتے ہیں کہ اسے اڑنے میں بھی مدد دیتے ہیں۔
ان پروں کے اوپر ایک سخت خول ہوتا ہے جو سرخ رنگ کا اور سیاہ دھبے دار ہوتا ہے۔
ماہرین نے اس تحقیق کے لیے پروں کے اوپر موجود خول کی شفاف نقل بنائی جو بھنورے کی جلد پر لگائی گئی، اس شفاف خول کے ذریعے ماہرین کو اندر کے پروں کی حرکت دکھائی دی۔
ماہرین کا کہنا ہے کہ بھنورے کے پروں پر سرخ رنگ کا بیرونی خول ان کے دفاع کا کام کرتا ہے، یہ کیڑا انسانوں کے لیے نقصان دہ نہیں ہوتا تاہم کیڑے مکوڑوں اور پرندوں کے لیے زہریلا ثابت ہوسکتا ہے۔