ملتان ٹیسٹ: پاکستان نے ویسٹ انڈیز کو 127 رنز سے شکست دیدی

دو ٹیسٹ میچز کی سیریز کے پہلے میچ میں پاکستان نے ویسٹ انڈیز کو 127 رنز سے شکست دے دی۔ پاکستان نے ویسٹ انڈیز کی ٹیم کو جیت کیلئے 251 رنز کا ہدف دیا، مہمان ٹیم صرف 123 رنز بنا کر پویلین لوٹ گئی، پاکستانی سپنر ساجد خان نے میچ میں مجموعی طور پر 9 وکٹیں حاصل کیں اور مین آف دی میچ قرار پائے۔ میزبان پاکستان نے ٹاس جیت کر پہلے کھیلتے ہوئے پہلی اننگز میں 230 رنز بنائے، پہلی اننگز میں پاکستان کی جانب سے سعود شکیل نے 84 اور محمد رضوان نے 71 رنز کی ناقابل شکست اننگ کھیلی۔ پہلی اننگز میں کپتان شان مسعود 11، محمد ہریرہ 6، بابر اعظم 8 ، کامران غلام 5 ، سلمان آغا 2، ساجد خان 18 اور خرم شہزاد 7 رنز بنا سکے۔ ویسٹ انڈیز کی جانب سے پہلی اننگز میں جومل ویریکن اور جیڈن سیلز نے 3،3 کھلاڑیوں کو آٹ کیا، کیون سنکلیئر نے 2اور گڈاکش موتی نے ایک وکٹ حاصل کی۔ مہمان ٹیم کی بیٹنگ لائن کو پاکستان سپنرز نیا دھیڑ کر رکھ دیا ، پہلی اننگز میں ویسٹ انڈیز کی پوری ٹیم 137 رنز پر پویلین لوٹ گئی، پاکستان کی جانب سے نعمان علی نے 5اور ساجد خان نے 4 کھلاڑیوں کو چلتا کیا جبکہ ایک وکٹ ابرار احمد کے حصے میں آئی، یوں پاکستان نے پہلی اننگز میں ویسٹ انڈیز پر 93 رنز کی برتری حاصل کرلی۔ دوسری اننگز میں پاکستانی ٹیم 157 رنز پر ہی ڈھیر ہو گئی، پاکستان کی جانب سے کپتان شان مسعود 52 رنز بنا کر نمایاں رہے، محمد ہریرہ 29، کامران غلام 27 اور سلمان آغا 14 رنز بنا کر پویلین لوٹ گئے۔ پاکستان ٹیم کے 5 کھلاڑی ڈبل فگر میں بھی داخل نہ ہوسکے جبکہ خرم شہزاد بغیر کھاتہ کھولے ہی چلتے بنے، پاکستان کی جانب سے بابر اعظم 5، سعود شکیل اور محمد رضوان 2،2، نعمان علی 9 اور ساجد خان 5 رنز بنا کر آٹ ہو گئے، یوں پاکستان نے ویسٹ انڈیز کو جیت کیلئے 251 رنز ہدف دیا۔ ویسٹ انڈیز کی جانب سے جومیل ویریکن نے 7 کھلاڑیوں کو پویلین کی راہ دکھائی جبکہ گڈاکش موتی نے ایک کھلاڑی کو آٹ کیا۔ہدف کے تعاقب میں مہمان ٹیم صرف 123 رنز بنا سکی، پاکستانی سپنر ساجد خان نے دوسری اننگز میں بھی پانچ شکار کیے ، ابرار احمد نے 3 کھلاڑیوں کو آٹ کیا جبکہ نعمان علی نے ایک کھلاڑی کو پویلین کی راہ دکھائی۔