Home » تازہ ترین » میرے وزیر خارجہ بننے سے کشمیر کا موضوع پوری دنیا میں گونج رہا ہے، شاہ محمود قریشی

میرے وزیر خارجہ بننے سے کشمیر کا موضوع پوری دنیا میں گونج رہا ہے، شاہ محمود قریشی

لتان: شاہ محمود قریشی کا کہنا ہے کہ میرے وزیر خارجہ بننے سے 54 سال بعد اقوام متحدہ سمیت پوری دنیا میں کشمیر کا ایشو گونج رہا ہے۔

ملتان میں ورکرز کنونشن سے خطاب کرتے ہوئے وزیر خارجہ شاہ محمود قریشی کا کہنا تھا کہ 2018ء کے انتخابات سے قبل کہا جاتا تھا نوجوان سیاست میں کچھ نہیں کرسکتے، آخری وقت تک لوگ سمجھتے تھے کہ مرکز میں پی ٹی آئی اور پنجاب میں (ن) لیگ کی حکومت بنے گی، لیکن کے پی سے چلنے والی ہوا نے پنجاب اور وفاق کو اپنی لپیٹ میں لیا، اب سندھ کے عوام بھی تحریک انصاف کی جانب دیکھ رہے ہیں، آئندہ سندھ میں بھی بلا چلے گا۔

شاہ  محمود قریشی کا کہنا تھا کہ جب اقتدار سنبھالا تو معیشت شدید بحران سے دوچار تھی اور خزانہ خالی تھا، ہم نے بڑے مشکل حالات میں بجٹ پیش کیا، اگر قطر، سعودی عرب اور یو اے ای تعاون نہ کرتا تو پاکستان دیوالیہ ہوجاتا، ہم نے مشکل فیصلے کیے، یہ جو موجودہ مہنگائی ہے اس میں اضافہ ڈالر کی قدر بڑھنے سے ہوا، تاہم اب حالات پہلے سے بہتر ہیں، ترقی کے راستے کھل رہے ہیں، معیشت کے حالات بدلیں گے، چین کے سرمایہ کار پاکستان میں سرمایہ کاری کرنے کو تیار ہے، سی پیک 2 پر بھی بہت جلد کام شروع ہوجائے گا۔

وزیر خارجہ نے کہا کہ ملک میں طرح طرح کی افواہیں پھیلائی جارہی ہیں، خارجہ پالیسی اور داخلہ مسائل پر تمام ادارے ایک پیج پر ہیں، پاکستان محفوظ ہاتھوں میں ہے اور جو لوگ یہ کہہ رہے ہیں کہ یہ اور وہ ہونے والا ہے ان کو منہ کی کھانی پڑے گی، کشمیر کا مسئلہ بھی حل ہوگا، ہم نے پوری دنیا میں کشمیریوں کی آواز پہنچائی۔

شاہ محمود قریشی نے مزید کہا کہ عمران خان نے دنیا بھر کی توجہ کشمیر کی طرف مبذول کرائی، میرے وزیر خارجہ بننے سے 54 سال بعد اقوام متحدہ سمیت پوری دنیا میں کشمیر کا ایشو گونج رہا ہے اور دنیا بھر میں کشمیر بنے گا پاکستان کے نعرے لگ رہے ہیں۔

About Admin

Google Analytics Alternative