پشاور:خیبرپختونخوا اسمبلی کا مخصوص نشستوں کی حلف برداری کے لیے طلب کیا گیا اجلاس اڑھائی گھنٹے کی تاخیر سے شروع ہوا اور کورم پورا نہ ہونے پر 24 جولائی تک ملتوی کر دیا گیا۔پی ٹی آئی کے ارکان کی جانب سے اسمبلی کے اجلاس کا بائیکاٹ کیا گیا، 2 گھنٹے 24 منٹ کی تاخیر سے اجلاس شروع ہوتے ہی کورم کی نشاندہی کر دی گئی، شیر علی ارباب کی جانب سے کورم کی نشاندہی پر سپیکر بابر سلیم سواتی نے گنتی کی ہدایت کی، حکومتی بنچ پر صرف 3 ارکان بیٹھے تھے۔
حکومتی ارکان نے کہا کہ کورم پورا نہیں ، اجلاس نہیں ہو سکتا جس پر اپوزیشن ارکان نے سپیکر ڈائس کے سامنے احتجاجی مظاہرہ کیا اور ان سے کہا کہ آپ کے ارکان نا سمجھ ہیں، انہیں سمجھا دیں۔پیپلز پارٹی کے رکن احمد کنڈی نے کہا کہ آپ منتخب ارکان کو حلف لینے سے روک نہیں سکتے، آپ تلاوت کے دوران کورم کی نشاندہی نہیں کر سکتے، پہلے بھی ذمہ داران نے حلف لینے سے انکار کیا تو پھر دوسرے لوگوں نے حلف لے لیا۔
ن لیگی رکن اسمبلی صوبیہ شاہد نے سپیکر سے کہا کہ اگر آپ حلف نہیں لیتے تو ہم چیف جسٹس کو یہاں سے خط لکھ دیتے ہیں۔ خیبرپختونخوا اسمبلی کے سپیکر نے گنتی پر ارکان کو بتایا کہ اس وقت اسمبلی میں ارکان کی تعداد 25 ہے، اب کیا کریں جب کورم پورا نہیں، اس کے بعد سپیکر کی ہدایت پر گھنٹیاں بجنا شروع ہو گئیں۔
سپیکر بابر سلیم سواتی کی جانب سے اعلان کیا گیا کہ کورم پورا نہیں ہے، خیبرپختونخوا اسمبلی کا اجلاس 24 جولائی تک ملتوی کیا جاتا ہے۔
قبل ازیں وزیر قانون آفتاب عالم نے بتایا کہ پی ٹی آئی کی پارلیمانی پارٹی کا اجلاس ہوا ہے جس میں اسمبلی کے اجلاس کا بائیکاٹ کرنے کا فیصلہ کیا گیا ہے، ہمارے ارکان ناراض ہیں، اسمبلی کے اجلاس میں شرکت نہیں کر رہے۔
یاد رہے کہ کے پی اسمبلی کے آج ہونے والے اجلاس میں مخصوص نشستوں پر منتخب 25 ارکان سے آج حلف لیا جانا تھا جس میں 21 خواتین اور 4 اقلیتوں کی مخصوص نشستوں پر منتخب اراکین شامل ہیں۔ جمعیت علما اسلام اور ن لیگ کی 7 ، 7 خواتین پیپلزپارٹی کی 4 خواتین نے حلف اٹھانا تھا، اے این پی کی 2 اور پی ٹی آئی پی کی ایک خاتون سے حلف لیا جانا تھا، جے یو آئی کی دو اقلیت نشست پر منتخب اراکین عسکر پرویز اور گورپال سنگھ سے بھی حلف لیا جاناتھا۔
