سینیٹ الیکشن: ناراض پی ٹی آئی امیدواروں کا کاغذات نامزدگی واپس نہ لینے کا اعلان

پشاور:خیبرپختونخوا میں سینیٹ الیکشن پاکستان تحریک انصاف (پی ٹی آئی) کیلئے بڑا چیلنج بن گیا ہے، ناراض ارکان کھل کر سامنے آگئے۔پی ٹی آئی کے ناراض امیدواروں نے کاغذات نامزدگی واپس نہ لینے کا اعلان کر دیا، ناراض امیدواروں عرفان سلیم، وقاص اورکزئی، خرم ذیشان، ارشاد حسین اور عائشہ بانو نے دستبرداری سے انکار کر دیا۔
ناراض امیدوار خرم ذیشان نے کہا کہ میدان نہیں چھوڑوں گا، جبکہ عائشہ بانو کا اپنے ویڈیو میں کہنا تھا کہ دبا میں آئیں گے نہ سودے بازی کریں گے، بانی کے نظریے پر آج بھی قائم ہیں۔عرفان سلیم نے کہا کہ پی ٹی آئی کے 25 سے 30 ایم پی ایز رابطے میں ہیں، الیکشن میں سرپرائز دیں گے، سیاسی کمیٹی کی میٹنگ سے پہلے 13 کے مقابلے 11 ووٹوں سے فیصلہ ہوا کہ سینیٹ کا الیکشن کرایا جائے گا، بلامقابلہ نہیں ہوگا۔
ان کا کہنا تھا کہ اگر علی امین گنڈاپور کو پتہ ہے 23 ایم پی ایز نے بیان حلفی دیا ہے تو ان کے نام سامنے لائیں۔ادھر پی ٹی آئی پارلیمانی پارٹی میں بھی شدید اختلافات سامنے آئے ہیں، مردان سے حکومتی رکن اسمبلی طارق محمود نے عرفان سلیم کو ووٹ دینے کا اعلان کر دیا، جبکہ سابق صوبائی وزیر شکیل خان نے بھی عرفان سلیم کی حمایت کر دی۔
چیئرمین پاکستان تحریک انصاف بیرسٹر گوہر خان نے ناراض ارکان کیخلاف کارروائی کی وارننگ دیتے ہوئے کہا کہ ناراض ارکان دستبردار نہ ہوئے تو پارٹی ڈسپلن کے تحت کارروائی کریں گے، پارٹی سے نکال دیا جائے گا۔دوسری جانب وزیراعلی خیبرپختونخوا نے پارلیمانی پارٹی کا اجلاس آج طلب کر لیا، جس میں سینیٹ الیکشن اور دیگر معاملات پر بات چیت کی جائے گی۔