Home » Author Archives: Admin (page 30)

Author Archives: Admin

گوگل کے نئے فلیگ شپ فون کی مزید تصاویر سامنے آگئیں

گوگل کی جانب سے 2016 سے اپنے تیار کردہ اسمارٹ فونز پکسل متعارف کرائے جارہے ہیں مگر ایسا لگتا ہے کہ اسے دیگر کمپنیوں کے مقابلے میں اپنی ڈیوائسز کو زیادہ نمایاں بنانے میں کوئی دلچسپی نہیں۔

گزشتہ سال پکسل 3 فون بھی اس کے 2 سال پرانے پکسل جیسے ڈیزائن سے لیس تھا جس میں بہت بڑے بیزل دیئے گئے ہیں جبکہ پکسل 3 ایکس ایل میں ایک بہت بڑا نوچ دیا گیا تھا۔

اب اس کے نئے پکسل 4 ایکس ایل کے خاکے لیک ہوکر سامنے آئے ہیں اور ان کو دیکھ کر معلوم ہوتا ہے کہ فرنٹ پر یہ فون دیکھنے میں پکسل تھری جیسا ہے جبکہ بیک پر رواں سال متعارف کرائے جانے والے آئی فون 11 کی نقل کی گئی ہے۔

گوگل پکسل فور سیریز اکتوبر میں متعارف کرائے جانے کا امکان ہے مگر آن لیکس نامی ٹوئٹر صارف نے اس کے رینڈرز لیک کردیئے ہیں۔

ان لیکس کے مطابق پکسل 4 ایکس ایل میں 6.25 انچ ڈسپلے دیا جائے گا اور چونکہ اس میں بیزل کافی زیادہ ہیں تو یہ کافی بڑا فون محسوس ہوگا۔

فوٹو بشکریہ آن لیکس ٹوئٹر اکاؤنٹ
فوٹو بشکریہ آن لیکس ٹوئٹر اکاؤنٹ

گوگل نے بھی اپنے نئے فون کی جھلک خود جاری کی تھی، جن میں بیک پر کیمروں کے لیے چوکور خانہ سا بنا ہوا تھا۔

مگر پہلی بار اس سیریز میں بیک پر 2 یا اس سے زائد کیمرے دیئے جارہے ہیں، اس سے قبل گزشتہ سال پکسل تھری ایکس ایل کے فرنٹ پر تو 2 کیمرے تھے مگر بیک پر ایک ہی کیمرا دیا گیا تھا۔

ویسے نئی لیک تصاویر سے تو عندیہ ملتا ہے کہ پکسل 4 ایکس ایل کے بیک پر 3 کیمروں کا سیٹ اپ ہوگا جبکہ فنگرپرنٹ سنسر ڈسپلے کے اندر منتقل کردیا جائے گا۔

فوٹو بشکریہ آن لیکس ٹوئٹر اکاؤنٹ
فوٹو بشکریہ آن لیکس ٹوئٹر اکاؤنٹ

گوگل کی جانب سے پکسل 4 اور پکسل 4 ایکس ایل رواں سال اکتوبر میں متعارف کرائے جاسکتے ہیں جن میں ٹرو ٹون جیسا ڈسپلے اور جیسٹر کنٹرولز دیئے جانے کا بھی امکان ہے۔

آرمی چیف کوتمغہ جمہوریت دینے کی قرارداد پنجاب اسمبلی میں جمع

لاہور: آرمی چیف جنرل قمر جاوید باجوہ کو تمغہ جمہوریت دینے کے مطالبے کی قرارداد پنجاب اسمبلی میں جمع کروائی گئی ہے۔

تحریک انصاف کے رکن پنجاب اسمبلی ہارون عمران گل کی جانب سے جمع کروائی گئی قرارداد کے متن میں کہا گیا ہے کہ یہ ایوان آرمی چیف جنرل قمر جاوید باجوہ کی ملکی سلامتی کے لئے بطور پیشہ ور سپاہی کردار ادا کرنے کو تحسین کی نگاہ سے دیکھتا ہے۔ یہ ایوان پاکستان میں جمہوریت کی بقا اور استحکام کے لئے بھی قمرجاوید باجوہ کے غیر جانبدارانہ کردار کوسراہتا ہے۔

قرارداد میں حکومت سے مطالبہ کیا گیا ہے کہ پاک فوج کے سپہ سالار جنرل قمر جاوید باجوہ کو جمہوریت کی بقا، استحکام اور ملک کے جمہوری اداروں کے تحفظ پرتمغہ جمہوریت سے نوازا جائے۔

آب و ہوا میں تبدیلی اور جنگلات میں کمی جانوروں کے لیے ہلاکت خیز ثابت ہوگی

لندن: آب و ہوا میں تبدیلی کے ساتھ جنگلات کی ہولناک تباہی کو اگر شامل کیا جائے تو یہ جنگلی حیات کے لیے مزید تباہ کن ثابت ہوگی اور اس کے اثرات واضح طور پر سامنے آچکے ہیں۔

ماہرین نے مزید خبردار کرتے ہوئے کہا ہے کہ عین یہی صورتحال جاری ہے اور جنگلی حیات کے لیے زندگی مزید تنگ سے تنگ ہوتی جارہی ہے۔ اس کی تفصیلات ہفت روزہ سائنسی جریدے نیچر میں شائع ہوئی ہیں۔

اس رپورٹ میں کہا گیا ہے کہ سال 2000 سے 2012 تک بھارت کے برابر بارانی جنگلات ختم ہوچکے ہیں اور اب وہاں جنگلی حیات کی نشوونما نہیں ہوپارہی۔ رپورٹ کی مصنفہ کہتی ہیں کہ جنگلات ختم ہونے سے جانوروں کا گھر ٹوٹ جاتا ہے اور اس کے بعد جانداروں کا دوسری جگہ منتقل ہونا مشکل ہوجاتا ہے۔

جنگل ختم ہونے سے جانور ٹھنڈے علاقوں کی تلاش میں نکلتے ہیں لیکن سرد علاقے نہیں ملتے۔ اگر گرمی کا سلسلہ ایسے ہی جاری رہا تو 2070 تک عالمی اوسط درجہ حرارت میں دواعشاریہ سات درجے سینٹی گریڈ تک اضافہ ہوگا اور یوں جنگلی حیات کی مشکل میں مزید اضافہ ہوجائے گا۔

آب و ہوا بدلتی ہے تو جانداروں کی اکثریت یا تو پہاڑوں پر جاتی ہے یا اترتی ہے۔ یا قطبین سے پرے ہٹتی ہیں یا اس طرف جاتی ہے۔ یا پھر اگر سمندری مخلوق ہے تو وہ گرم سے سے سرد یا سرد سے گرم پانیوں کا رخ کرتی ہیں۔ لیکن موسم اتنی تیزی سے بدل رہا ہے کہ جانور نہ اسے برداشت کرسکتے ہیں اور نہ ہی وہ کہیں منتقل ہوسکتے ہیں۔

منطقہ حارہ یا ٹراپیکل علاقوں کے جانور گرمی اور سردی کے معاملے میں بڑے حساس ہوتے ہیں۔ اب یہ حال ہے کہ 550 جانداروں کی مختلف انواع میں سے نصف یا تو ختم ہوچکی ہے یا فنا کے قریب ہے۔ ان میں چیتے، تیندوے، بندراور اودبلاؤ جیسے جاندار بھی شامل ہیں۔ یہ جاندار بہت سفر کرکے دورنہیں جاسکتے اور یوں کلائمٹ چینج اور جنگلات کی تباہی ان کے تابوت کی آخری کیل ثابت ہوگا۔

مکی آرتھر ڈوبتے کیریئر کو بچانے کیلیے ہاتھ پاؤں مارنے لگے

کراچی:  ورلڈکپ کے پہلے راؤنڈ سے اخراج پر پاکستانی کرکٹ میں بڑے پیمانے پر تبدیلیوں کا امکان ہے جب کہ کوچ مکی آرتھر کا بھی برقرار رہنا دشوار ہوگا،انھوں نے ڈوبتے کیریئر کو بچانے کیلیے ہاتھ پاؤں مارنے شروع کر دیے ہیں۔

ورلڈکپ میں قومی ٹیم کی ناقص کارکردگی کے بعد بڑے پیمانے پر تبدیلیوں کی بازگشت جاری ہے، کوچ مکی آرتھر کی کرسی بھی خطرے میں ہے مگر انھوں نے عہدے پر برقرار رہنے کیلیے کوششیں شروع کر دی ہیں، کوچ نے گذشتہ روز  لندن میں چیئرمین پی سی بی احسان مانی و ایم ڈی وسیم خان سے ملاقات کی اور گرین شرٹس کیلیے اپنے ’’کارنامے‘‘ گنوائے۔

انھوں نے ورلڈکپ2019کے پہلے راؤنڈ سے باہر ہونے کا ملبہ کارکردگی نہیں بلکہ قسمت پر ڈال دیا، وہ  پریس کانفرنس میں بھی نیٹ رن ریٹ کے قانون کو تنقید کا نشانہ بنا چکے جبکہ ان کے خیال میں نیوزی لینڈ کی ٹیم خراب کھیل پیش کرنے کے باوجود فائنل فور میں شامل ہو گئی۔

ذرائع کے مطابق بورڈ حکام نے انھیں کسی قسم کی یقین دہانی کرانے سے گریز کرتے ہوئے فیصلہ کرکٹ کمیٹی پر چھوڑنے کا کہا جس کے سربراہ وسیم ہی ہیں، آرتھر کو بتایا گیاکہ نئے کوچ کیلیے اشتہار دیا جائے گا اور  وہ بھی درخواست دے سکتے ہیں،کوچ کرکٹ کمیٹی میٹنگ میں اپنے دور کے حوالے سے پریذنٹیشن دیں گے۔

ذرائع کا کہنا ہے کہ اگر مکی آرتھر کو برقرار نہ رکھا گیا تو نیا کوچ بھی غیرملکی ہی ہوگا، ایم ڈی وسیم خان کسی پاکستانی کوچ کا تقرر نہیں چاہتے، ان کے مطابق فارن کوچ قومی کرکٹرز کو بہتر انداز میں سنبھال سکتا ہے اور اس کی بات سنی بھی جاتی ہے، وسیم خان سابق کپتان وسیم اکرم اور رمیز راجہ کی رائے کو بہت اہمیت دیتے ہیں اور وہ دونوں بھی غیرملکی کوچ کے ہی حق میں ہیں۔

پاکستان کو آئی ایم ایف سے ایک ارب ڈالر کی قسط آج ملے گی

اسلام آباد: پاکستان کو عالمی مالیاتی فنڈ (آئی ایم ایف) کی جانب سے منظور کردہ قرض میں سے ایک ارب ڈالرز کی پہلی قسط آج مل جائے گی۔

اسٹیٹ بینک آف پاکستان کے ذرائع کے مطابق عالمی مالیاتی فنڈ (آئی ایم ایف) کی جانب سے منظور کردہ قرض میں سے ایک ارب ڈالرز کی پہلی قسط آج مل جائے گی، قرض کی رقم آج رات پاکستان کے اکاؤنٹ میں منتقل ہوجائے گی۔

واضح رہے کہ عالمی مالیاتی فنڈ کے ایگزیکٹو بورڈ نے رواں ماہ کے اوائل میں پاکستان کو 6 ارب ڈالرز قرض دینے کی منظوری دی تھی۔ آئی ایم ایف یہ رقم 3 سال میں مختلف قسطوں کی صورت میں دے گا اور رواں مالی سال پاکستان کو اس قرض میں سے 2 ارب ڈالر ملیں گے۔

پاکستان کے لیے 6 ارب ڈالر کے قرض پروگرام کے حوالے سے آئی ایم ایف کا کہنا ہے کہ حکومت نے جی ایس ٹی کو ویلیو ایڈڈ ٹیکس کی طرف لے جانے، ٹیکس چھوٹ اور رعایات ختم کرنے، رواں مالی سال میں ٹیکس وصولیاں بڑھا کر 5.5 ٹریلین روپے کرنے اور مالی سال 24-2023 میں ٹیکس وصولیاں ساڑھے 10 ٹریلین کرنے کا وعدہ کیا ہے۔

آئی ایم ایف نے اپنی رپورٹ میں کہا ہے کہ پاکستانی روپے کے مقابلے میں ڈالر کی موجودہ قدر حقیقت سے قریب تر ہے۔ پاکستان نے جی ایس ٹی کی چھوٹ جلد مکمل ختم کرنے کی یقین دہانی کروائی ہے، جی ایس ٹی کی بین الصوبائی ہارمونائزیشن و کوآرڈنیشن کا میکنزم لایا جائے گا، جی ایس ٹی کی چھوٹ صرف اشیائے خور و نوش اور ادویات تک محدود کردی جائے گی۔

عالمی مالیاتی ادارے کا کہنا ہے کہ حکومت پاکستان نے کم از کم 7 چھوٹے سرکاری اداروں کی جلد نجکاری کا بھی وعدہ کیا ہے، باقی اداروں کی نجکاری کےلئے ستمبر2020 تک روڈ میپ مکمل کرنا ہوگا۔ پاکستان کے کل غیرملکی قرضے میں سے 85 ارب 48 کروڑ 20 لاکھ ڈالر چین کا قرضہ ہے، پاکستان کو آئی ایم ایف پروگرام کے اختتام تک 37 ارب35 کروڑ نوے لاکھ ڈالر کے غیر ملکی قرضے واپس کرنا ہیں ، اس میں سے 14 ارب 68کروڑ20 لاکھ ڈالر چین کو واپس کرنا ہیں۔

صارفین کا ڈیٹا چوری ہونے پر برطانوی ایئرلائن پر 183 ملین پاؤنڈجرمانہ

 لندن: برطانوی ایئرلائن پر صارفین کا ڈیٹا محفوظ رکھنے میں ناکامی پر 183 ملین پاؤنڈ کا جرمانہ عائد کر دیا گیا۔

بین الاقوامی خبر رساں ادارے کے مطابق برطانیہ کے انفارمیشن کمشنر آفس کی جانب سے برٹش ایئر ویز کو صارفین کا ڈیٹا محفوظ رکھنے کے قوانین کے تحت 183 ملین پاؤنڈز کے جرمانے کا نوٹس بھیج دیا گیا۔

یہ جرمانہ برٹش ایئرویز کے 2017ء کی سالانہ کمائی کا 1.5 فیصد ہے۔ برطانوی قوانین کے تحت صارفین کا ڈیٹا چوری ہونے پر سالانہ آمدنی کا 4 فیصد تک جرمانہ عائد کیا جا سکتا ہے تاہم کمپنی نے جرمانہ کم کرنے کے لیے اپیل دائر کی ہے۔

انفارمیشن کمشنر کی جانب سے جاری نوٹس میں کہا گیا ہے کہ صارفین کا ڈیٹا ’ذاتی ملکیت‘ ہوتی ہے جسے افشاں نہیں کیا جاسکتا اور ڈیٹا کو لیک یا چوری ہونے سے بچانے کے لیے تمام ضروری اقدامات کرنا ہوتے ہیں جس میں برٹش ایئرویز کو ناکام پایا گیا۔

واضح رہے کہ گزشتہ برس جون میں ہیکرز نے برٹش ایئرویز کے کمپیوٹر نظام پر سائبر حملہ کرکے 5 لاکھ سے زائد صارفین کا ڈیٹا چوری کرلیا تھا جس میں صارفین کے بینک اکاؤنٹس کی تفصیلات بھی شامل ہیں۔

کیا آپ نمک کے ان حیران کن طریقہ استعمال سے واقف ہیں؟

نمک دنیا بھر میں سب سے زیادہ استعمال ہونے والی اشیاءمیں سے ایک ہے اور کھانے کا ذائقہ اس کے بغیر اچھا نہیں لگتا۔

یہ بہت مہنگا تو نہیں مگر کیا آپ کو معلوم ہے کہ کھانے میں شامل کرنے سے ہٹ کر بھی اسے مختلف طریقوں سے استعمال کرکے زندگی کو آسان بنایا جاسکتا ہے؟

جی ہاں واقعی اس کے ایسے متعدد فوائد ہیں جو ہوسکتا ہے آپ کو معلوم بھی نہ ہو۔

یہاں آپ نمک کے چند حیران کن طریقہ کار جان سکیں گے۔

دانتوں کو جگمگائے

اگر دانتوں پر داغ دھبوں سے پریشان ہیں تو گیلے برش کو ٹیبل سالٹ پر لگا کر نرمی سے دانتوں کی صفائی کریں یا پیسٹ لگانے کے بعد اس پر تھوڑا سا نمک چھڑک کر دانتوں کی صفائی کریں، یہ ٹوٹکا دانتوں کے داغ صاف کرکے ان کو سفید کرتا ہے۔ ایسا راتوں رات نہیں ہوتا مگر کچھ دن تک اس کو آزمائیں اور پھر نتیجہ دیکھیں۔

پرانے کپڑوں کی اصل رنگت واپس لائیں

اگر کسی پرانے مگر پسندیدہ لباس کی رنگت اڑنے لگی ہے تو اسے ایک بار پھر نیا جیسا بنانے کے لیے نمک سے مدد لیں، ان کپڑوں کو نمک ملے پانی میں ڈبو دیں یا واشنگ مشین میں چوتھائی کپ نمک کا اضافہ کردیں، نتیجہ آپ کو حیران کردے گا۔

جلد کو صحت مند بنائے

نمک خشک جلد کی نگہداشت کے لیے اچھا متبادل ثابت ہوسکتا ہے، جو مردہ جلد کو ہٹاتا ہے جبکہ خون کی گردش بڑھاتا ہے۔ اس مقصد کے لیے نہانے کے بعد جلد (گیلی) پر نمک کو لگا کر مساج کریں، سمندری نمک زیادہ بہتر نتائج فراہم کرے گا۔

خراب انڈے کی شناخت

ویسے تو انڈے اندر سے ٹھیک ہیں یا کراب، یہ دیکھ کر جاننا ممکن نہیں، تو اس کا ایک آسان نمک ملا پانی ہے۔ 2 کھانے کے چمچ نمک کو ایک کپ یا جگ پانی میں مکس کریں اور اس میں انڈا ڈال دیں، اگر وہ ڈوب جائے تو اس کا مطلب ہے کہ وہ ٹھیک ہے، اگر وہ تیرنے لگے تو اسے کھانے سے گریز کریں۔

بالوں کی خشکی سے نجات

بالوں میں خشکی سے پریشان ہیں تو نہانے کے دوران شیمپو لگانے سے قبل کچھ مقدار میں نمک کو سر پر چھڑک کر 5 منٹ تک مالش کریں اور پھر شیمپو لگاکر سر دھولیں، یہ خشکی دور کرنے کے ساتھ ساتھ بالوں کی نشوونما بہتر کرے گا جبکہ ان کی مضبوطی بھی بڑھائے گا۔

گلے کی خراش سے نجات

ایک گلاس پانی میں نمک کو ملائیں اور 30 سیکنڈ سے ایک منٹ تک غرارے کریں، آپ دیکھ کر دنگ رہ جائیں گے کہ گلے کی خراب دور کرنے کے لیے یہ کتنا مفید ٹوٹکا ہے۔

مچھروں کے کاٹنے سے ہونے والی جلن سے ریلیف

اگر مچھر کے کاٹنے سے جلن ہورہی ہے تو اپنی انگلی کی پور کو پانی سے نم کریں اور نمک میں ڈبو دیں، اب اس مکسچر کو متاثرہ حصے میں رگڑیں، آپ کو ریلیف محسوس ہونے لگے گا۔

تانبے کی اشیاءکو جگمگائیں

تانبے کے برتنوں کی چمک بحال کرنا چاہتے ہیں؟ تو نمک کو سرکے اور آٹے میں مکس کریں یا اسے لیموں کے عرق میں شامل کرکے برتنوں پر رگڑیں۔

تیل کی چھینٹوں کو روکیں

فرائنگ پین میں کسی چیز جیسے مچھلی کو تلنے سے پہلے کچھ مقدار میں نمک کو چھڑک دیں، اس سے گرم تیل کی چھینٹیں مچھلی کو فرائنگ پین میں ڈالنے پر اچھلیں گی نہیں۔

جوتوں کی بو دور کریں

اگر جوتوں میں بدبو پیدا ہوگئی ہے تو اسے دور کرنے کے لیے کپڑے میں نمک بھر کر لپیٹ لیں، اور کچھ گھنٹوں کے لیے چھوڑ دیں۔ آپ محسوس کریں گے کہ بو غائب ہوگئی ہے۔ اس کے علاوہ آپ جوتوں کے اندر نمک چھڑک دیں اور پھر جوتوں کو ہلائیں، اس کے بعد نمک کو نکال دیں۔

چیونٹیوں سے نجات

چیونٹیوں سے نجات کے لیے نمک اور پانی کو 1:4 کے تناسب سے بوتل میں ملائیں، اس سلوشن کو ہر اس جگہ چھڑک دیں جہاں چیونٹیوں کی بھرمار ہو یا بس نمک ہی متاثرہ حصے پر چھڑک دیں، وہ بھی کارآمد ہوتا ہے۔

سبزیوں اور پھلوں کو براﺅن سے بچائیں

پھل اور سبزیاں کٹ جانے کے بعد جلد براﺅن ہوجاتی ہیں، اس سے بچنے کے لیے ایک برتن میں کھارا پانی بھر کر پھل یا سبزی کو اس میں ڈبو دیں۔

لہسن اور پیاز کی بو ہاتھوں سے دور کریں

لہسن اور پیاز کاٹنے پر ہاتھوں میں بو بس جاتی ہے، تاہم اس کا حل کافی آسان ہے، اپنے ہاتھوں کو گیلا کریں اور نمک کی کچھ مقدار کو کسی سپاٹ جگہ پر چھڑک کر اپنے ہاتھ اس سے رگڑیں اور پھر دھولیں۔

ائیر فریشنر بنائیں

اس مقصد کے لیے آدھے سے ایک کپ نمک اور بیس سے تیس قطرے کسی خوشبودار تیل یا گلاب کی پتیاں چاہیے ہوں گی۔ اب یہ اشیاءکسی برتن یا جار میں ڈالیں اور چھوڑ دیں، اس سے گھر میں ایک بھینی مہک پھیل جائے گی۔

اچانک بھڑکنے والی آگ کو بجھائیں

یہ طریقہ کار عام طور پر چولہے کے اچانک بھڑکنے سے پیدا ہونے والے شعلوں کے لیے استعمال کیا جاسکتا ہے، ان شعلوں پر نمک چھڑک دیں جس سے آکسیجن کی روانی کٹ جائے گی اور شعلے بجھ جائیں گے۔

استری کی صفائی

اگر استری کے نیچے کوئی کپڑا جل کر چپک گیا ہے تو استری کو تیز ترین درجہ حرارت پر چلائیں اور ایک بھورے پیپر کے ٹکڑے پر نمک چھڑک کر گرم استری اس پر چلائیں۔

سنک کی صفائی

لیموں کے عرق اور نمک کو ملا کر ایک پیسٹ بنائیں اور اس سے اسٹین لیس اسٹٰل کو چمکائیں، یہ پیسٹ کیمیکل کلینرز سے بھی زیادہ بہتر کام کرتا ہے۔

‘میلیفسنٹ’ میں انجلینا جولی کی نئی دنیا متعارف

ہولی وڈ کی کامیاب اداکارہ انجلینا جولی نے 5 سال قبل ڈزنی کی ‘میلیفسنٹ’ میں جلوہ گر ہوکر اپنے کردار اور انداز سے سب کو حیران کردیا تھا اور اب اتنے سالوں بعد اداکارہ دوبارہ اس کردار میں واپسی کررہی ہیں۔

فلم میلیفسنٹ کا سیکوئل ’میلیفسنٹ: مسٹرس آف ایول‘ کے ٹیزر کے بعد اب اس کا پہلا ٹریلر ریلیز کردیا گیا ہے، جس میں ایک نئی جادوئی دنیا متعارف کروائی گئی ہے۔

انجلینا اس فلم میں ایک مرتبہ پھر جادوگرنی کے دلچسپ کردار میں نظر آئیں گی۔

یاد رہے کہ 2014 کی فلم ’میلیفسنٹ‘ 1959 کی ڈزنی کی کامیاب کارٹون فلم ’سلیپنگ بیوٹی‘ سے متاثر ہوکر بنائی گئی تھی، تاہم اس فلم کی کہانی میں جادوگرنی کا کردار منفی سے مثبت میں تبدیل کردیا گیا تھا۔

رواں سال مئی میں فلم کے سیکوئل ’میلیفسنٹ: مسٹرس آف ایول‘ کے پہلے ٹیزر کو دیکھ کر ایسا محسوس ہوا تھا کہ اب ہولی وڈ اداکارہ کا مثبت کردار تبدیل ہوچکا ہے اور اب وہ فلم کی ولن بن رہی ہیں۔

تاہم اب ٹریلر کو دیکھ کر ایسا محسوس ہورہا ہے کہ وہ ولن نہیں بنے بلکہ فلم کے دیگر اداکار انہیں ولن ظاہر کرنے کی کوشش کررہے ہیں۔

نئی فلم کی کہانی مصنف لنڈا ولورٹن نے تحریر کی ہے، جبکہ اس کی ہدایات جوئچم روننگ نے دی۔

فلم ’میلیفسنٹ: مسٹرس آف ایول‘ رواں سال 18 اکتوبر کو نمائش کے لیے پیش کی جائے گی۔

Google Analytics Alternative