- الإعلانات -

جنگ65 ء: راجستھان سیکٹر میں بھارتی پسپائی

تاریخ کے مطالعہ سے پتہ چلتا ہے کہ اب تک دنیا میں قوموں کے درمیان جتنی بھی جنگیں ہوئی ہیں تمام کا نقطہ نگاہ ایک دوسرے سے مختلف رہا ہے۔ قیام پاکستان کے بعد بھارت ہی ایک واحد ملک ہے جس سے پاکستان سے سرحدی معاملات سنگین حد تک خراب رہے ہیں۔ اسی سلسلہ میں اس کے درمیان میں جنگوں کا سلسلہ بھی جاری رہ چکا ہے۔ مگر ستمبر 1965 کی جنگ وہ واحد جنگ ہے جو عجیب و غریب انسانی نفسیات پر لڑی گئی۔ یہ جنگ اپنی نوعیت کی منفرد اور لاثانی جنگ تھی۔ کہتے ہیں طاقتور قومیں ہمیشہ اپنی طاقت کے گھمنڈ میں کمزور اقوام کو محکوم بناتی ہیں۔یہی نفسیات اس جنگ میں ہمارے پڑوسی ملک بھارت کی بھی تھی جس کے پاس نہ صرف ہم سے چار گنا زائد افرادی اور عسکری قوت موجود تھی بلکہ جدید سامان حرب بھی موجود تھا اور دوسری طرف پاکستانی فوج کے پاس قوت ایمانی کے سوا کچھ بھی نہ تھا۔ جب کہ بھارت نے کراچی، وزیرآباد، چنیوٹ، سانگلہ ہل، چک جھمرہ کے علاقوں میں اپنی چھاتہ بردار فوج تک اتارنے میں عار محسوس نہ کی۔رات کے اندھیرے میں بزدلانہ حملہ کر کے بھارتی افواج لاہور کے نواح تک پہنچ گئی اور ہڈیارہ کے گاؤں پر قبضہ کر لیا۔پاک فوج نے جوابی کاروائی کرتے ہوئے برکی کے محاذ پر بھارتی فوجوں کے اجتماع کو نو گھنٹے تک کامیابی سے روکا جس کے نتیجے میں پاک فوج کو اپنی پوزیشن بہتر کرنے کا موقع ملا اور بھارتی پلان ڈگمگا کر رہ گیا بی آر بی نہر لاہور اور بھارتی فوجوں کے درمیان ایک مضبوط دیوار بن کر ابھری۔یہ معرکہ میجر راجہ عزیز بھٹی نے انجام دیا اسی محاذ پر انہوں نے جام شہادت نوش کیا اور اس جنگ میں نشان حیدر حاصل کرنے والے واحدپاکستانی فوجی تھے۔ اگلے دو روز تک پاکستانی فوجوں نیبھارتی علاقے میں 8 کلومیٹر تک پیش قدمی کیاور کھیم کرن نامی بھارتی قصبہ پر سبز ہلالی پرچم لہرا دیا۔ بھارت سیخ پا ہو چکا تھا۔ سخت مزاحمت اور ہزیمت کے باعث اپنی سبکی محسوس کرتے ہوئے بھارت نے اپنے ٹینک جنگ میں جھونک دئیے۔سیالکوٹ محاذ پر جنگ عظیم دوئم کے بعد دنیا کی دوسری بڑی ٹینکوں کی لڑائی لڑی گئی۔بھارتی فوج میں’’ فرسٹ انڈین آرمر ڈویڑن ‘‘بھی شامل تھا جسے ناقابل تسخیر سمجھا جاتا تھا۔جبکہ بھارتی آرمی چیف جنرل چوہدری کی 16 کیولری جس کو ’’فخر ہند ‘‘بھی کہا جاتا تھا وہ بھی سیالکوٹ کی جانب گامزن تھی۔یوں اس محاذ پر پاک فوج شدید دباؤ سے دوچار تھی۔سیالکوٹ سیکٹر میں چونڈہ کے علاقے میں 12 ستمبر ٹینکوں کی سب سے بڑی جنگ لڑی گئی۔جسے جنگِ عظیم کے بعد ٹینکوں کی سب سے بڑی جنگ کہا جاتا ہے اور جس میں بھارت نے 600 بھاری سنچورین ٹینکوں اور کئی لاکھ فوج کے ساتھ حملہ کیا تھا۔ لیکن ہمارے تھوڑے سے بہادر فوجیوں نے بھارت کے ٹینکوں کی صفوں میں گھس کر اور گولے جسم پر باندھ کر ٹینکوں کے نیچے لیٹ کر ایسی زبردست اور عبرتناک تباہی مچائی کہ پوری دنیا اش اش کر اٹھی اور یوں اس جنگ کے ہیرو کا اعزاز میجر راجا عزیز بھٹی کے حصے میں آیا جن کو ملک کا سب سے بڑا جنگی اعزاز نشانِ حیدر ملا۔لاہور سیکٹر کے واہگہ اور برکی محاذ، سیالکوٹ سیکٹر کا چونڈہ محاذ، کھیم کرن سیکٹرز، راجستھان سیکٹر، جہاں ہماری شجاع اور بہادر فضائیہ کے جوانوں نے وہ وہ کارنامے انجام دیے ہیں جو رہتی دنیا تک یادگار رہیں گے۔ ویسے تو مسلمانوں کی پوری تاریخ جنگ و جدل اور جہاد سے بھری پڑی ہے لیکن 1965 کی جنگ کی شان ہی نرالی ہے۔ فوج کے شانہ بشانہ شہریوں نے دشمن کے ساتھ لڑائی میں مختلف انداز میں حصہ لیا۔ہماری افواج جذبہ ایمانی سے لیس تھی۔ ہم نے یہاں تک دیکھا کہ جب بھی کسی فوجی کا محاذ پر جانے سے پہلے داتا صاحب کے مزار پر حاضری دیا کرتے تھے۔ لاہور کے چاروں اطراف دشمن نے گھیراؤ تنگ کیا ہوا تھا اور بھرپور عسکری قوت سے حملوں کا سلسلہ جاری تھا۔ وہ تاریخ انسانی کا قیمتی حصہ بن گیا۔ انڈین آرمی نے جب راجستھان محاذ کھولا تو اس نے سب سے پہلے 8ستمبر کو گڈڑو کو اپنا نشانہ بنایااور اس پر قبضہ کرلیاجس کا دوبارہ قبضہ حاصل کرنے کا سہرا سیکٹر کمانڈرفقیر محمد ابراہیم ھنگورجو کو جاتا ہے۔45مجاہدین کہ اس دستے نے تین گھنٹے کی گھمسان کی لڑائی کے بعد واپس حاصل کرلیا۔موناباؤ پاکستانی سرحد سے تقریباً 12 میل کے فاصلے پر ہے ۔ ہندو سینا نے اس کو بچانے کی ہر ممکن کوشش کی۔ پاک فوج کے تابڑ توڑ حملوں کے باوجود وہ ڈٹے رہے اور پاک فوج بھی ناامید نہیں تھی۔حروں نے پاک فوج سے مل کر ان کی سپلائی لائن کاٹ دی۔ توپیں اور مشین گنز بارود برسا رہا تھے لیکن پاک فوجی آگے بڑھتے رہے۔ 12گھنٹوں کی شدید لڑائی کے بعد پاک فوج شہر میں داخل ہوگئی ۔ آخرکار دشمن پسپا ہوا اور موناباؤ اسٹیشن پر سبز ہلالی پرچم لہرا دیا گیا۔راجستھان سیکٹر کا شمالی محاذ سرکاری کنواں ہندوستانی چوکیوں میں سے سب سے بڑی چوکی تھی، جہاں دشمن کے سپاہی ہر قسم کے اسلحے سے لیس ہزاروں کی تعداد میں موجود تھے اورانتہائی پختہ مورچوں میں بیٹھے ہوئے تھے اور دوسری طرف سے 125 پاک فوجی اور ہرمجاہدین تھے۔ان مجاہدین نے نہایت ہی ہوشیاری سے کام لیتے ہوئے ان کا گھیرا تنگ کردیا اور ان کو پسپا ہونے پر مجبور کردیا، دشمن کے سپاہی لاشیں چھوڑ کر بھاگ گئے۔حقیقت یہ ہے کہ جنگ ستمبر افواج پاکستان کی شجاعت ، دلیری اور جانبازی کی وہ تاریخ رقم کر گئی جس نے خلافت عثمانیہ کے بعد دنیا کے نقشہ پر ملت اسلامیہ کی ایک قوت کو زندہ کیا۔ 65ء کی جنگ کا ہر محاذ جذبہ حریت کی داستان رقم کر گیا۔ اس جنگ میں پوری قوم فوج کے ساتھ سیسہ پلائی دیوار کی طرح کھڑی تھی۔ ہمیں سوچنا چاہیے جس قوم نے رات کے اندھیرے میں حملہ کرنے والے اپنے سے چار گنا بڑے دشمن کو شکست سے دوچار کرکے بازو مسلم کا زور دکھایا۔ آج بھی وہ قوم دشمن کے دانت کھٹے کرنے کیلئے تیار ہے۔

*****