- الإعلانات -

کامیاب اداکاری پر مانی بھی اہلیہ حرا کے گن گانے لگے

کراچی: اداکارہ حرا مانی کے یکے بعد دیگرے کامیاب ڈراموں پر ان کے شوہر مانی بھی اہلیہ کی صلاحیتوں کے معترف ہوگئے اور ان کی صلاحیتوں کے گن گانے لگے۔

اداکار سلمان شیخ بالمعروف مانی نے انسٹا گرام پر پاکستان انٹرنیشنل اسکرین ایوارڈ کی جانب سے حرا مانی کو بہتری اداکارہ کے لیے نامزد کیے جانے پر ووٹ کاسٹ کرنے کی پوسٹ شیئر کی جس کے ساتھ انہوں نے کیپشن میں اپنی اہلیہ کی حوصلہ افزائی کے لیے طویل پوسٹ بھی کی۔

مانی نے کیپشن میں حرا کی تعریف کرتے ہوئے کہا کہ پاکستان میں شاید ہی کوئی اداکارہ ہو جس نے اپنا کیریئر بطور میزبان اور کامیڈی کے ذریعے شروع کیا ہو، شوبز میں آنے سے پہلے شادی کی ہو، 2 بچوں کے بعد سنجیدہ اداکاری میں اول پوزیشن حاصل کی ہو، آپ نے مختصر وقت میں سب کچھ حاصل کرلیا۔

مانی نے یہ بھی کہا کہ تم ایک با صلاحیت اداکارہ ہو، مزے کی بات یہ ہے کہ ایکشن سے پہلے اور کٹ کے بعد تم ایک منکسر المزاج گھریلو سی حرا ہو۔