- الإعلانات -

پدماوتی میں دپیکا نے 400 کلو سونا، 30 کلو وزنی لہنگا پہنا

بولی وڈ کی آنے والی تاریخی فلم ’پدماوتی‘ کے چرچے تو گزشتہ 2 سال سے جاری ہیں، تاہم اب اس فلم کے ریلیز کے دن قریب آنے پر ان چرچوں میں مزید اضافہ ہوگیا ہے۔

’پدماوتی‘ کی شوٹنگ سے لے کر اس کی پہلی جھلک ریلز ہونے تک جاری رہنے والے جھگڑوں اور تنازعات کے بعد فلم کے ٹریلر نے جب نیا ریکارڈ قائم کیا تو فلم کے اداکاروں کے لباس اور شاہانہ انداز پر باتیں ہونے لگیں۔

ویسے تو ’پدماتی‘ میں دپیکا پڈوکون، شاہد کپور اور رنویر سنگھ کے کرداروں کی تصاویر جاری ہوتے ہی، میڈیا اور انٹرنیٹ پر ان کے چرچے تھے، تاہم شائقین کی سب سے ذیادہ نظریں دپیکا پڈوکون کے سونے سے جڑے رانیوں کے لباس پر تھیں۔

یہ اندازے تو پہلے ہی کیے جا رہے تھے کہ ’پدماوتی‘ میں دپیکا پڈوکون کا لباس عام اور معمولی نہیں ہوگا، کیوں کہ فلم کی کہانی 13 ویں صدی کی ہے، جس وجہ سے لباس کو بھی اس وقت کے مطابق تیار کیا گیا ہے۔

رپورٹس کے مطابق ’پدماوتی‘ میں دپیکا پڈوکون نے 400 کلو گرام سونا اور 30 کلو گرام وزنی لہنگا پہنا۔

ٹائمز آف انڈیا کی ایک رپورٹ کے مطابق ’پدماوتی‘ میں دپیکا پڈوکون کا سرخ لہنگا 30 کلو گرام وزنی ہے، جس کی قیمت 20 لاکھ بھارتی روپے ہے۔

یہی نہیں بلکہ اس لہنگے کی تیاری میں جہاں ایک سے زائد ڈزائنرز نے کام کیا، وہیں اس کی تیاری میں کئی ہفتے بھی لگے۔

رپورٹ کے مطابق ’پدماوتی‘ کی شوٹنگ کے دوران دپیکا پڈوکون کے ذیادہ تر لباس کا وزن عام لباس سے کہیں بڑھ کر تھا۔

دپیکا پڈوکون نے 30 کلو وزنی لہنگا’پدماوتی‘ کی شوٹنگ کے دوران کم سے کم 100 دنوں تک مسلسل 12 سے 14 گھنٹے پہنے رکھا۔

’پدماوتی‘ کے ٹوئٹر ہینڈل سے کیے جانے والے ٹوئیٹ کے مطابق مطابق دپیکا پڈوکون نے فلم میں جو زیورات پہنے، اسے 200 کاریگروں نے 600 دنوں میں تیار کیا۔